1. Jméni xi tokʼoamale je chjota xi tokʼia bichótítjon je kjoajtínná (kʼoati chótsenlai sén xi faʼaitʼa).

 TSA jngolani chjota kao chjoónle xi tosʼa kuichotítjon ya Ndʼia jña chotʼayá, tokʼoamale josʼin kjoeya je ndsʼee, nga nda chjota kʼoa nga bakolee kjoatsjoacha xíngiaa. Kʼianga jebichóni niʼyale, je chjoón itsole xʼinle: “Nʼio sasénna josʼín je testigole Jeobá”.

2. Ánni nga tjínkʼani xi tsín tije Jeobá síxánile.

² Nʼio chjíle kʼianga bakolee kjoatsjoacha xíngiaa. Ninga kʼoalani, alikui chjotatsje maa xi testigole Jeobá ʼminá (1 Juan 1:8). Kʼianga jenda ʼyaxkoaan je ndsʼee kʼoati ʼyaa jñani chʼao sʼín (Rom. 3:23). Tjínkʼa je ndsʼee xi tsín tije Jeobá síxánile kʼianga be nga tsín nda sʼín kʼa je ndsʼee.

3. Jósʼin jchanile ʼyáni xi ñaki chjotale Cristo ma kjoaixi (Juan 13:34, 35).

³ Kuentala sʼian ijngokʼá jotso texto xi yʼangini kjoaʼmiya jebi (tʼexkiai Juan 13:34, 35). b Jósʼin jchanile xi ñaki chjotale Cristo ma. Kʼoasʼin jchanile nga tsjoake xínkjín, ali tsakuijin nga chjotatsje koa̱n. Kʼoa je Jesús ali tsa i̱jin kitso: “Isʼin jchaño nga chjotana mao”. I kitso: “Kʼuisʼin skoe̱ ngatsʼi nga jon nío chjotana”. Kui xi kitsonile Jesús nga skoe̱ je chjotale kao xi kjaʼaí chjota ʼyáni xi ñaki chjotatjenngile  ma kjoaixi, nga̱ kʼoasʼin jchanile nga tsjoacha koa̱nngañá xíngiaa.

4. Jókuitso kʼa chjota.

⁴ Tsakui nichxin i̱ kuitso kʼa xi tsín testigole Jeobá ma: “Ánni nga kao kui ʼyanile je xi ñaki chjotale Cristo ma nga tsjoakengañá xínkjín. Jósʼin tsakakó Jesús nga tsjoake koan kjoaixi je pastrole. Kʼoa jósʼin koa̱n chjénngilee je Jesús”. Ninga jetestigole Jeobá maa kʼoati ndatjín nga si̱kjaʼaitsjenjiaan jebi. Tsa kʼoasʼiaan, kui xi koasenkaoná nga ngisa tsjoacha koaan xíngiaa ninga sakʼoa josikaoná kʼoa jokuitsoná (Efes. 5:2).

5. Tojo tso ya Juan 15:12, 13, jósʼin tíjna je kjoatsjoacha xi kisikʼaxki̱ Jesús.

⁵ Je Jesús kʼoakitso josʼin koakole kjoatsjoacha xínkjín je chjotatjenngile (tʼexkiai Juan 15:12, 13). c I kitsole je chjotatjenngile: “Tsjoacha katamao xíngio josʼin tsjoake̱no an”. Jósʼin tjínnele koakole kjoatsjoacha xínkjín je chjotatjenngile. Kui kinchja̱ni nga nʼio tsjoake koa̱n xínkjín je chjotale Cristo, nga saʼnda kuiyántjai xínkjín. d

6. Jósʼin bakó je Énle Niná nga nʼio chjíle nga tsjoacha koaan xíngiaa.

⁶ Je Énle Niná kʼoatso nga nʼio chjíle nga tsjoacha koaan xíngiaa. Nkjín xi kʼoatso nga kui texto jebi xi ngisa tsjoake, jolani je xi tso: “Jé Niná xi kjoatjaocha” (1 Juan 4:8). “Katamatsjoachai xikʼa joni nga tijini” (Mat. 22:39). “Nkjín kjoatsʼen bʼéʼmatʼain kjoatjaochabe” (1 Ped. 4:8). “Je kjoatjaocha nikʼiajin  fetʼa” (1 Cor. 13:8). Je texto jebi kao xi kjaʼaínile kui bakó nga nʼio chjíle nga koakoá kjoatsjoacha.

7. Ánni nga tsín kʼoakoa̱nnile Na̱i nga jtín sʼin sikatío chjota kʼoa nga tsjoake koa̱n xínkjín.

⁷ Nkjín chjota xi i̱ tso: “Jósʼin skoeña jñánile religión xi ñaki kjoaixi, ngatsʼi kʼoatso nga tʼatsʼe Niná bakóya tonga kjaʼaí kjaʼaí tso nga jngó jngó”. Je Na̱i nʼio nkjín religión kisikʼatsen kʼoa tsín tibeni chjota jñánile xi ñaki kixi. Tonga je Na̱i alikui kʼoakoa̱nle nga jtín sʼin sikatío chjota xi tjín jngo tjíjtsa Sonʼnde kʼoa nga tsjoake koa̱n xínkjín. Tojé Jeobá xi koa̱nle kʼoasʼin. Kuinga ʼyañá nga̱ je kjoatsjoacha tʼatsʼe Jeobá nroani. Tojé chjota xi tjínle nganʼiotsjele kao kjoanichikontʼainle xi koa̱n nga tsjoake koa̱n kjoaixi xínkjín (1 Juan 4:7). Kuinga kʼoakitsoni Jesús nga kʼoasʼin jchanile xi ñaki chjotatjenngile ma nga tsjoake koa̱n kjoaixi xínkjín.

8, 9. Jósʼin tíbichómani nga tjíobe je chjota nga tsjoakengañá xínkjín je testigole Jeobá.

⁸ Tojo kitso je Jesús nʼio nkjín chjota xi tjíobe ʼyáni xi ñaki chjotatjenngile Cristo ma nga tsjoakengañá xínkjín. Tobʼelañá, jngo ndsʼee xi Ian ʼmi kʼoatso jokoan nga tosʼa ki títjon kjoajtíntse ya chrian ndʼiale jñani tíjna jngo estadio. Jngo jao sá tongini kikotsenle chjota xi síská ya ʼnde jebi. Itso: “Kʼianga kichoa kjoajtíntse je testigole Jeobá nda kiskoéyana kʼoa nda kjoan najño xi yʼakjá kʼoa nʼio nda sʼín je ʼndíxtile. Je xi tokʼoakoanna nga tsaʼbe kuinga nʼio tsjoa tjíole kʼoa nda fikao xínkjín. Kʼoa kui xi koannmena saʼnda ngasʼa nga skoe chjota xi kʼoasʼín. Ningalani tsín tifaʼaitsjennina jmeni xi kisakoya, je xi tsínkʼia chajinna kui josʼín je testigole Jeobá”. e Kuinga tsjoachaa je xíngiaa nga kʼoanʼiañá tojo kisʼin je xíngiaa xi tsabe je Ian. Nga tsjoachaa je ndsʼee ndʼé nikoaa kʼoa bakolee kjoaxkóntokon.

⁹ Kʼoati tokʼoakoanle jngo ndsʼee xi John ʼmi jmeni xi tsabe kʼianga tosʼa kichotítjon kjoajtín. Tsabe nga nʼio nda chjota je ndsʼee kʼoa nga nda sʼín. Itso: “Nga tsjoake kjoaixi xínkjín kʼoasʼin tsaʼbeña nga kui religión xi kixi”. f Nkjín choa̱ xi bakó nga toje testigole Jeobá xi chjotatjenngile Cristo ma kjoaixi.

10. Kʼiáni nga ñʼai koa̱nná koakoá nga tsjoachaa je ndsʼee (kʼoati chótsenlai nota).

¹⁰ Tojo kabixoán nga títjon, alikui ʼya xi tsje. Je ndsʼee sakʼoajin kui kʼoakuitso kʼoa kui kʼoasʼin tsa jmeni xi tsín sa̱sénná (Sant. 3:2). g Kʼianga tsín yaoná si̱jtilee yaa koakoñá nga tsjoacha kjoaixiaa xíngiaa. Jméni xi koasenkaoná. Kataʼyala choa̱le Jesús (Juan 13:15).

11. Jméni xi kitso ñandia je Santiago kao Juan kʼoa jméni xi tsakakó nga kʼoakitso (kʼoati chótsenlai sén xi faʼaitʼa).

¹¹ Je Jesús koanjinle nga tsín chjotatsje je chjotatjenngile. Kuinga tsakasenkaoni nga kisindaya yaole ánni nga nda koationi ngixko̱n Jeobá. Ñandia nga kʼoakitsole Santiago kao Juan je male nga kʼoakatatsole Jesús tsa koa̱n ya koatiotʼale  kʼianga koatexoma (Mat. 20:20, 21). Nga kʼoakitso nga jao pastro jebi yaa tsakakóni nga ngʼakon kjima kʼoa nga xkaiʼa kjima (Prov. 16:18).

12. Jósʼin ʼyañá nga tsín toje Santiago kao Juan xi tsín nda sʼin kisikjaʼaitsjen.

¹² Ali tsa tojejin Santiago kao Juan xi tsín nda kisʼin nga kʼia. Koanjtile je xi ngi te pastrole Jesús nga kisʼejinle jme xi kitso je Santiago kao Juan (Mat. 20:24). Si̱kjaʼaitsjenla jokisatio kon. Tsakui nichxin i̱ kitsole: “Jótso tokon nga kui xá tinijáo nga̱ tsín tsa tojonjion xi nda tinixáo, kʼoati nʼio tinixáijin tsanda jinjin. Kʼoati bakinnajin nga kui xá kʼoainajin”. Alikui tinda kikaoni xínkjín pastrole Jesús nga kʼia.

13. Jósʼin tsabekon Jesús je chjotatjenngile ningalani tsín nda kisʼin sakʼoa (Mateo 20:25-28).

¹³ Je Jesús tsín koanjtile kʼoa tsín kʼoakitso nga tosa kjaʼaí chjota koa̱njngí xi pastrole koa̱n, xi tsjoake koa̱n xínkjín kʼoa xi nangitokon koa̱n. Je Jesús ngasin nganda tsakjákao nga̱ be nga ndatjío ni̱ma̱le (tʼexkiai Mateo 20:25-28). h Ningalani nkjín kʼa nga kui tsakjáotiyani je pastro ʼyáni xi ngisa ngʼa tíjna, je Jesús  tsakakóle kjoatsjoacha (Mar. 9:34; Luc. 22:24).

14. Jmé kjoafaʼaitsjen xi tjínle je chjota kʼianga koanjchínga chjotatjenngile Jesús.

¹⁴ Je Jesús kui kuenta kisʼin josʼin koanjchínga je pastrole (Juan 2:24, 25). Nga kui nichxin, je xi nyatítjonle religión kui xi ngisa koanmele nga nda koatio kʼoa nga ngʼa xá sʼe̱le (Mat. 23:6; tingósonkoai kao video Asientos del frente en la sinagoga, xi faʼaitʼa ya nota de estudio xi tsʼe Mateo 23:6). Je xi tsakinyatítjonle religión kʼoasʼin kisikjaʼaitsjen nga je xi ngisa ngʼa tjío tikʼoajinni xi ngikʼa (Luc. 18:9-12). i Je Jesús koanjinle nga kʼoati kui kʼoakisʼinni je chjotale jokisʼin je chjota xi tsakinyatítjonle religión (Prov. 19:11). Je Jesús be nga tsín chjotatsje je chjotatjenngile kʼoa tsín yaole kisijtile kʼianga tsabe jñani chʼao kisʼin je chjotale. Je Jesús be nga nda tjío ni̱ma̱le chjotatjenngile, kuinga ngasin nganda tsakasenkaoni nga tsínti ngʼakon kʼoa tsínti xkaiʼa katamani, nga tosa nangitokon katama kʼoa nga tsjoake katama xi kjaʼaí.

15. Jmé xi bakóyaná jokoan je Santiago kao Juan.

¹⁵ Tsee xi bakóyaná jokitso je Santiago kao Juan. Alikui nda kisʼin nga kui kisijé nga ya mele koatiotʼale Jesús kʼianga koatexoma. Tonga kʼoati tsín nda kisʼin je pastro xi ngikʼa nga tokui kini kʼoa nga tsín tijtín sʼin tsakationi. Je Jesús tsjoake koan kʼoa tongóson sʼin tsabekon nga tejao chjotatjenngile. Jmé xi bakóyaná jebi. Kʼianga ʼyani xi tsín nda sʼín jósʼin nikjaʼaitsjeen ñá. Kʼiatsa tsín sa̱sénná josʼin je ndsʼee koaan i̱ tso xi si̱kjaʼaitsjeen: “Ánni nga kasíjtinina jmeni xi kasʼín. A anña xi machjén nga sindaya yaona. A kjoa tífaʼatojin ndsʼee jebi. Ningalani tjín xi kasíkaona a tsí ngisa nda nga tosichajian ʼndele nga yaona sijtile”. Tsa koakoá ngantsjai nga tsjoachaa xíngiaa kʼoasʼin koakoñá nga chjotatjenngile Cristo ma kjoaixiaa.

16. Jmésa xi bakóyaná je choa̱le Jesús.

¹⁶ Josʼin tsabekon Jesús je chjotatjenngile kui bakóyaná nga tjínnele si̱jinlee yaoná josatío kon je ndsʼee (Prov. 20:5). Je Jesús tsabe jotjío ni̱ma̱le chjota. Tonga ñá alikui ʼyaa jotjío ni̱ma̱le xi ngikʼa. Tonga koaan koakolee kjoatsejta je ndsʼee nga sakʼoa tsín nda sʼín (Efes. 4:1, 2; 1 Ped. 3:8). Je xi koasenkaoná kuinga nda jchaxkoaan xíngiaa. Kataʼyala jngoaa choa̱.

17. Jósʼin kichomani nga ngisa nda tsabexkon jngo ndsʼee je superintendente xi tsʼe circuito.

¹⁷ Jngo ndsʼee xi superintendente xi tsʼe circuito sʼin tíjna ya África oriental, kʼianga tosʼa tsabexkon jngo ndsʼee kʼoasʼin kisikjaʼaitsjen nga tsín nda chjota ndsʼee jebi. Tonga je superintendente jebi alikui tokui kini josʼin kisikjaʼaitsjen. Itso: “ʼNdele nga tokjin sikoa tosaa kisimiyoa”. Kʼoasʼin tsabeni jme kjoa xi jaʼatojin ndsʼee jebi kʼoa nga kuinga kʼoakjoanni. Itsosa je superintendente xi tsʼe circuito: “Tokʼoakoanna nga kisʼejinna jme kjoa xi jaʼatojin  ndsʼee jebi kʼoa nga jetísíndaya yaole. Nʼio nda miyo kichobaijin”. Kʼiatsa ngisa nda jchaxkoaan je ndsʼee kʼoa si̱jinlee yaoná jotjío kon ngisaa nda kjuinkoaa xíngiaa.

18. Jméni xi koa̱n si̱kjaʼaitsjenjiaan tsa jokitsoná kʼoa tsa jokisikaoná jngo ndsʼee (Proverbios 26:20).

¹⁸ Tsa mená chja̱kaonajmiá jngo ndsʼee xi jokitsoná kʼoa tsa jokisikaoná, títjonkjoanla si̱kjaʼaitsjenjiaan jebi: “A tjínjinyejena jokjoantjínni kjoa (Prov. 18:13). A tokjoataon xi koanle tsa jokitso kʼoa tsa jokisʼin (Ecl. 7:20). A kʼoati jekisʼian tsanda an (Ecl. 7:21, 22). A ngisaa tse kjoa kuichomani tsa kjoakaonajmía je ndsʼee” (tʼexkiai Proverbios 26:20). j Tsa si̱kjaʼaitsjenjiaan jebi tsakui nichxin koa̱njinná nga ngisa nda nga tosi̱chajiaan jmeni xi koan kʼoa nda kjuinkoaa xíngiaa.

19. Jméni xi machjén nga sʼiaan.

¹⁹ Ngatsʼiaa xi testigole Jeobá maa bakoñá nga chjotale Cristo maa. Kʼoa jósʼin koakoá nga jngó jngoá nga chjotatjenngile Cristo ma kjoaixiaa. Kʼiaa nga tsjoacha koaan je ndsʼee ninga tsín sa̱sén sakʼoaná jmeni xi sʼin. Nga kʼoasʼiaan, kʼoasʼin skoe̱ni chjota nga kui religión xi kixi tiyojiaan kʼoa kʼoajin tikoa̱nmele nga je Jeobá skoe̱xkón, je Niná xi nʼio tsjoakená. Kuinga machjénni nga tosi tonda koakolee kjoatsjoacha xíngiaa, nga̱ kʼoasʼin bakoñá nga ñaki chjotatjenngile Cristo ma kjoaixiaa.