1. Jméni xi tsakasenkao je Job nga ngisa nda tsabexkon je Jeobá.

 NʼIOJIN nkjín chjota tsakjákaonajmí je Job jokjitse tsakʼejna, tonga xi ngisa nʼio tsakasenkao kuijin jmeni xi kitsole Jeobá. Kʼoakitsole nga kui kuenta katasʼín jmeni xi koannda, nga̱ kui xi koasenkao nga skoe̱ jokji chjine je Jeobá kʼoa nga kʼoejngo kon nga síkuinda je choʼndale. Tobʼelañá, je Job tsabe nga je Jeobá tsjoále je cho̱ jmeni xi kjine kʼoa nga kʼoati koa̱nle kʼoasikao tsanda je (Job 38:39-41; 39:1, 5, 13-16). Kʼianga kui jebi kisikjaʼaitsjenjin je Job koanjinle jokjoan je Jeobá.

2. Ánni nga sakʼoa ñʼai maniná nga chotsenlee jmeni xi kisinda Niná.

² Kʼianga chótsenlee jmeni xi kisinda Niná kʼoati jchasaa xi tʼatsʼe. Tonga tsakui nichxin ñʼai koa̱nná kʼiatsa ya tinijchá yaoná jñani jenaxinandáyʼai nga̱ tsín tinanda jme yá kao cho̱ tjínni, kʼoa ninga tsín naxinandáyʼai tiyoaa tsakui nichxin kʼoasʼin nikjaʼaitsjeen nga tsín maʼaná nga kui chotsenlee jmeni xi tjín. Kataʼyala ánni nga nʼio chjínile nga si̱kʼayaa nichxin nga chótsenlee jmeni xi kisinda Niná. Kʼoati jchaa nga je Jeobá kao Jesús kui kisichjén jmeni xi koannda nga tsakakóya jmeni xi nʼio chjíle, kʼoa jchañá jméni xi bakóyaná jmeni xi kisinda Jeobá.

3. Jósʼin ʼyañá nga kui xi koanmele Jeobá nga tsjoa katasʼe kon je Adán nga skoe̱ jmeni xi koannda.

³ Je Jeobá kui xi koanmele nga tsjoa sʼe̱ kon je Adán nga skoe̱ jmeni xi koannda, kuinga ya ʼndenaxó kisikʼéjnani nga je sikuinda jme xi tjín kʼoa nga kʼoentje tsojmintje  (Gén. 2:8, 9, 15). Si̱kjaʼaitsjenla jokisʼe kon Adán kʼianga tsabe je tocho nga bisó kʼoa nga xonga naxó. Nʼio tse kjoanda kisʼele nga je kisʼenele kisikuinda je ʼndenaxóle Edén. Kʼoati kui xá tsakánele Jeobá nga je katatsjoájaʼaínle je cho̱ (Gén. 2:19, 20). Koanjin nga je Jeobá kʼoakisʼin xá jebi, tonga jé Adán tsakánele. Ndajin kiskotsenle Adán josʼín nga jngó jngó cho̱ kʼoa jokjoan kʼoa kʼiajin kitsjoajaʼaínle. Tsjoajin kisʼe kon Adán nga kʼoakisʼin, nga̱ kʼoasʼin tsabeni nga nʼio chjine je Jeobá nga naskánakjoan xi kisinda.

4. 1) Ánni nga chótsennilee jmeni xi kisinda je Jeobá. 2) Jméni xi ngisa tsjoachai je xi kisinda Niná.

⁴ Je Jeobá kui xi mele nga chótsenlee jmeni xi kisinda. Itsoná: “Chjómingʼao jko ya ngʼá kʼoa chótsaon”. Kʼoa itsosa: “ʼYáni xi kisinda ngayeje jebi”. ʼYañá nga je Jeobá kisinda ngayeje xi tjín (Is. 40:26). Ali toyajin ngʼajmi jña naskánakisichon Jeobá, kʼoati kisichon i̱ Sonʼnde kao jinndáchikon kʼoa tsee xi bakóyaná (Sal. 104:24, 25). Si̱kjaʼaitsjenla nga kʼoasʼin kisindaná Jeobá nga chjí ʼyatokoán jmeni xi kisinda. Kʼoati kui xi koanmele nga tsjoa sa̱tío tokoán nga jchaa jmeni xi koannda, kuinga kitsjoaniná xkoaan, xo̱ñoaa, nijeen, nitjoaan kao ndsaa.

5. Tojo tso Romanos 1:20, ánni ndatjínni nga chótsenlee jmeni xi kisinda Niná.

⁵ Je Biblia kʼoati tso nga ngisa nda jchaa jokjoan je Jeobá nga chótsenlee jmeni xi kisinda (tʼexkiai Romanos 1:20). b Tobʼelañá, nga chotsenlee josʼin kisinda Niná jmeni xi tjín ʼyañá nga nʼio chjine. Kʼoa nga nkjín koya tjín tsojmi xi ma chinee ʼyañá nga nʼio tsjoakená. ʼYañá jokjoan Niná kʼianga kuenta nʼia jmeni xi kisinda, ngisasa nda ʼyaxkoaan kʼoa ngisaa machriantʼalee. Kataʼyala josʼin síchjén Jeobá jmeni xi kisinda nga bakóyaná jmeni xi nʼio chjíle.

6. Jméni xi bakóyaná nga xin fikatio kʼa je cho̱.

⁶ Tsen tsen tjínle cha̱n jmeni xi kisinda Jeobá. Tobʼelañá, nga xki̱ nó kʼianga tífe sá febrero saʼnda tjenbasen sá mayo, je chjota israelita tsabe nga xin ʼnde fi je cho̱ xi cigüeña ʼmi nga kui nichxin. Je Jeobá i kitsole je chjota israelita: “Je cigüeña be cha̱nle” (Jer. 8:7). Nga kʼoasʼin kisinda Jeobá cho̱ jebi nga be kʼiani nga xin fikatio, kʼoatisʼin jetíjnale hora Jeobá  kʼiani kʼoendajin je kjoa xi tjín. Nga ʼyaa nga xin fikatio cho̱ jebi nga bichó cha̱nle, kʼoati majinná nga jetjínndajinle Jeobá kʼiani kjoaʼaxin jmeni xi chon sonʼnde kʼoa alikui jao tjín tokoán nga kʼoasʼin (Hab. 2:3).

7. Jméni xi bakóyaná josʼin fitjen kʼa je cho̱ (Isaías 40:31).

⁷ Je Jeobá tsjoále nganʼio je choʼndale. Jé Isaías kisichjén Jeobá nga kʼoakitso nga tsjoánganʼiole je choʼndale kʼianga kjuinroajen kon, kʼoasʼin tsjoánganʼiole joni tsa jngale ja̱ tjínle (tʼexkiai Isaías 40:31). c Je chjota israelita tsabe nga kʼoasʼin fitjen je ja̱ josʼin fi je ntjao̱ kʼoa nga tsín nʼio tse nganʼiole síkje. Jebi kui bakóyaná nga kʼoatisʼin tsjoále nganʼio Jeobá je choʼndale tojo síkao je ja̱. Kʼianga jchai je ja̱ nga nʼio ngʼa tjíomatjen kʼoa nga saʼnda tsín tjíosíkjan je jngale, tikjaʼaitsjenjin nga kʼoati koa̱nle Jeobá koasenkaoli kʼianga kjoa kuitjátojin.

8. 1) Jméni xi koanjinle Job kʼianga kui kisikjaʼaitsjen jmeni xi kisinda je Jeobá. 2) Jmé xi bakóyaná ñá.

⁸ Koaan si̱nʼiotʼaa je Jeobá. Ngisaa kisinʼiotʼa Niná je Job kʼianga tsakjákaonajmí (Job 32:2; 40:6-8). Je Jeobá kui kisikʼaxki̱ jmeni xi kisinda. Jolani je niño, yojbi kao lʼíle chʼao̱n. Kʼoati kisikʼaxki nra̱ja̱ kao naxín (Job 38:32-35; 39:9, 19, 20). Kui xi tsakasenkao je Job nga koanjinle nga nʼio tse nganʼio tjínle je Niná, nga chjine kʼoa nga tsjoakená. Je Job ngisaa kisinʼiotʼa Niná kʼianga jetsakjákaonajmí (Job 42:1-6). Kʼianga chotsenlee kʼoa nga nikjaʼaitsjenjiaan jmeni xi koannda ʼyañá nga ngisa nʼio chjine je Jeobá kʼoa nga nʼio tse nganʼio tjínle tikʼoani ñá. Ngisaa ninʼiotʼaa je Jeobá nga kui nikjaʼaitsjeen nga koa̱nle kjoaʼaxin je kjoa xi tjínná.

9, 10. Jméni xi bakóyaná xi tʼatsʼe Jeobá je ndoá kao jtsí.

⁹ Je Jesús nʼio nda be jmeni xi koannda, nga̱ jé tsakasenkao Jeobá nga kisinda je ngʼajmi kao Sonʼnde (Prov. 8:30). Kʼianga jaʼai i̱ Sonʼnde kui kisikʼaxki̱ jmeni xi koannda kʼianga kitsoyale chjotatjenngile xi tʼatsʼe Nʼaile. Kataʼyala kʼa jmeni xi kisikʼaxki̱ je Jesús.

¹⁰ Je Jeobá tsjoake ngatsʼi chjota. Kʼianga kitsoya Jesús ya jngo jko̱nindo kui kisikʼaxki̱ je jtsí kao ndoá, nga jao koya jebi nʼio machjénná. Je Jeobá alikui toje tsjoále ndoá kao jtsí je xi bexkon, nga tsjoakená tsjoáná ngatsʼiaa je ndoá kao jtsí (Mat. 5:43-45). Kui choa̱ jebi kisichjén je Jesús nga kʼoakitso nga kui xi mele je Jeobá nga tsjoacha koaan ngatsʼi chjota. Kʼianga jchaa nga kjibʼa jtsí kʼoa tsa kʼiaje̱ nga kantjai Tsʼuí, si̱kjaʼaitsjenjiaan nga tsjoakená Jeobá kʼoa nga tsín ʼya xi faʼájin. Josʼín je Jeobá kui tsoyaná nga kʼoati koa̱n chjénngilee kʼoa kʼuínyasonlee toʼya chjotani.

11. Jósʼin basenkaoná kʼianga chotsenlee je nise.

¹¹ Je Jeobá tsjoáná jmeni xi machjénná nga koa̱n kuiyochoaan. Je Jesús kʼoati i̱ kitso kʼianga kitsoya ya jngo jko̱nindo: “Chótsenlao nise xi fitjen jinsén, nibʼéntjejin jno̱, nibʼéxkójin, nibinyájin ya ningʼa. Kʼoa je Nʼaino xi tíjna ngʼajmi, tsjoále xi kjine”. Je chjota xi kinrʼoéle Jesús tsakui nichxin tsabe nga tjíomatjen nise kʼianga i̱ kitso Jesús: “Jon ngisasa chjíno kaoni tsa je” (Mat. 6:26).  Jmeni xi kitso kui tsoyaná nga je Jeobá tsjoáná ngantsjai jmeni xi kuiyochonñá (Mat. 6:31, 32). Jmeni xi koannda nʼio tse jmeni xi bakóyaná ñá xi choʼndale Jeobá maa. Jngo tichjaa xi precursora sʼin tísíxá xi España tsʼe kisikinroajen kon nga tsín kisokole ndʼia jñani kʼoéjnani. Kʼianga tsabe nga tjíokjen je nise nda kisʼe kon. Kʼoa itso: “Kui kisikjaʼaitsjen tsa je Jeobá síkuinda nise kʼoati sikuindana an”. Tochoatsee jaʼato kʼoa kisokole ndʼia jña tsakʼejnani je tichjaa.

12. Tojo tso Mateo 10:29-31, jméni xi bakóyaná tʼatsʼe Jeobá je nise xi gorrión ʼmi.

¹² Je Jeobá chjí bená nga jngó jngoá. Kʼianga kjesa síkasénjin je chjotatjenngile Jesús nga koaitsoyason kʼoakitsole nga tsín chjota katatsokjónle ninga koaitjenngike (tʼexkiai Mateo 10:29-31). d Kui choa̱le je nise xi gorrión ʼmi kisichjén nga kisinʼiojin je chjotatjenngile. Nga kui nichxin ya naxinandá Israel tochoa tsakʼa je chjota nga tsakaténa je nise jebi. Je Jesús i kitsole je chjotatjenngile: “Nijngojin nga je katʼanangi, tsa tsín tsa jyole Nʼaino”. Kʼoa i kitsosale: “Ngisa chjíno nga jon kaoni tsa nkjín niseʼndí”. Kʼianga kui choa̱ jebi kisichjén je Jesús kʼoasʼin tsakakónile chjotatjenngile nga chjí be je Jeobá nga jngó jngó. Kʼoa kui xi tsakinyakao nga tsín chjota kitsokjonle. Kʼianga kitsoyason kʼoa nga tsabe je nise, kuijin jaʼaitsjenle jmeni xi kitsole Jesús. Tikʼoasʼinni, kʼianga jchaa nise si̱kjaʼaitsjeen nga chjí bená Jeobá nga jngó jngoá kʼoa nga ngisa chjílee tikʼoajinni je nise. Jé Jeobá koasenkaoná nga nʼiojin koaan ninga chjota koaitjenngikená (Sal. 118:6).

13. Jméni xi sʼiaan nga tosi tonda si̱kjaʼaitsjenjiaan jmeni xi kisinda Niná.

¹³ Tosi tonda jchaa xi tʼatsʼe Jeobá nga chótsenlee jmeni xi kisinda. Kuinga machjénni nga si̱kʼayaa nichxin nga chótsenlee jmeni xi tjín kʼoa si̱kjaʼaitsjenjiaan jméni xi bakóyaná xi tʼatsʼe Niná. Sakʼoajin ñʼai koa̱nná nga kʼoasʼiaan. Jngo tichjaa xi Camerún tsʼe xi Géraldine ʼmi, itso: “Nga naxinandáyʼai jñani koanjchínga tsakasjaile josʼin kiskotsenle jmeni xi kisinda Niná”. Jngo ndsʼee xi chjotajchínga sʼin tíjna xi Alfonso ʼmi, itso: “Sikʼayaña nichxin nga kotsenle jme xi kisinda Niná kʼoa sikjaʼaitsjenjinña jmeni xi bakóyana xi tʼatsʼe”.

14. Jméni xi koanjinle je David kʼianga kisikjaʼaitsjenjin jmeni xi kisinda Niná.

¹⁴ Je rey David kisikjaʼaitsjenjin jmeni xi kisinda Jeobá. I kitsole: “Kʼianga kotsen jochon ya ngʼajmi, je xi ndsai kinindani,  je sá kao je niño xi ji kinindai, ʼyáni je chjota kʼianga kuenta tinʼiani” (Sal. 8:3, 4). Kʼianga tsabe niño alikui totsakʼéjngo kon, kui kisikjaʼaitsjenjin jmeni xi bakóyale tʼatsʼe Niná. Koanjinle nga nʼio jeya tíjna Jeobá kʼoa nga nʼio tjínle nganʼio. Ñandia kʼianga kui kisikjaʼaitsjenjin josʼin koanjcháya ya yatsʼoa̱ na̱le. Kʼianga kui jebi kisikjaʼaitsjenjin koanjinle nga nʼio chjine Jeobá (Sal. 139:14-17).

15. A ʼyaní jokjoan je Jeobá kʼianga chotsenlai jmeni xi kisinda. Tatio kʼai choa̱ (Sal. 148:7-10).

¹⁵ Tojo kisʼin je David, koaan si̱kjaʼaitsjenjiaan jmeni xi tjín ya jñani tsaan kʼoa jchañá jokjoan Niná. Tobʼelañá, koaan si̱kjaʼaitsjenjiaan jokji nganʼio tjínle je Jeobá kʼianga sísoná je ndoá (Jer. 31:35). Kʼianga jchaa nga tjíobʼénda je tjéle nise kui si̱kjaʼaitsjeen nga nʼio chjine je Jeobá. Kʼianga jchaa je nía nga nitsʼin tísískákao kui si̱kjaʼaitsjenjiaan nga tsjoa tjín kon je Jeobá. Kʼoa nga jchaa jngo na̱ nga ʼndíleele tísískákao kʼoailee kjoanda Jeobá nga nʼio tsjoakená. Nʼio nkjín koya tjín jmeni xi bakóyaná tʼatsʼe Jeobá, nga̱ ngayeje xi kisinda ninga ʼndí kjoan kʼoa ninga yʼai kjoan, ninga kjin tjío kʼoa ninga chrian tjío, jé Jeobá bʼasjengʼa (tʼexkiai Salmo 148:7-10). e

16. Jméni xi machjén nga sʼiaan.

¹⁶ Tojé Jeobá xi ngisasa nʼio chjine, xi tsjoakená, xi naskákjoan xi kisinda kʼoa xi nʼio tse nganʼio tjínle. Yaa ʼyañá jebi nga chotsenlee jmeni xi tjín, kuinga machjénni nga si̱kjaʼaitsjenjiaan jmeni xi kisinda Niná. Si̱kʼayaa nichxin nga chótsenlee jmeni xi kisinda Niná kʼoa jméni xi bakóyaná xi tʼatsʼe. Kʼiatsa kʼoasʼiaan, ngisaa koa̱nchriantʼalee je Jeobá (Sant. 4:8). Ya kjoaʼmiya xi ijngo kui jchaa jósʼin je xi xijchá ma nga kui sichjén jmeni xi kisinda Niná kʼianga kuitsoyale je ʼndíxtile xi tʼatsʼe Jeobá nga ngisa katamachriantʼale.