1. Jméni xi mele je xi xijchá ma nga katasʼín je ʼndíxtile.

 XI XIJCHÁ mao mejinno nga skoe̱ je ʼndíxtino xi tʼatsʼe Jeobá kʼoa nga tsjoake katama. Tonga nga tsín matsen Niná jósʼin kuinyakao je ʼndíxtino nga katabe nga ñaki tíjna Niná kʼoa nga katasíchriantʼale (Sant. 4:8).

2. Jméni xi sʼin je xi xijchá ma nga kuitsoyale je ʼndíxtile xi tʼatsʼe Jeobá kʼoa jokjoan.

² Jngo koya xi koa̱n sʼin je xi xijchá ma nga sichriantʼale Niná je ʼndíxtile kuinga kuitsoyale jotso Biblia (2 Tim. 3:14-17). Ijngosa koya kʼoatso je Biblia josʼin skoe̱ xi tʼatsʼe Niná je xi sʼa xti. Ya libro xi tsʼe Proverbios jngo choa̱ faʼaitʼa tʼatsʼe jngo nʼai xi kʼoatsole je tile nga kuenta katasʼín jmeni xi koannda ánni nga skoe̱ni jokjoan Niná (Prov. 3:19-21). Kataʼyala jósʼin je xi xijchá ma nga koakole je ʼndíxtile jmeni xi koannda nga kuitsoyale xi tʼatsʼe Niná kao jokjoan.

3. Jósʼin kuinyakao xi xijchá ma je ʼndíxtile.

³ Je Biblia kʼoatso nga “je kjoa xi tsínkui matsen xi tsʼe Niná […] koantsen saʼnda nga kisʼenda sonʼnde. Je kjoabi tsaʼyale totʼatsʼe tsojmi xi kisʼenda” (Rom. 1:20). Xi xijchá mao tsjoajin satío tokon nga ya biyokao je ʼndíxtino. Nga ya tiyokao kui chja̱kaonajmíño tʼatsʼe jmeni xi koannda nga kʼuínyalao jokjoan Jeobá. Kataʼyala jósʼin koa̱n skénngile Jesús je xi xijchá ma.

4. Jósʼin kisichjén Jesús jmeni xi koannda nga kitsoyale chjotatjenngile (Lucas 12:24, 27-30).

 ⁴ Kataʼyala jósʼin kisichjén Jesús jmeni xi koannda kʼianga kitsoya. Ñandia nga kʼoakitsole je chjotatjenngile nga katakotsenle je nraa kao naxó (tʼexkiai Lucas 12:24, 27-30). b Kʼianga kitsoya je Jesús kui kisikʼaxki̱ je nise kao naxó xi bexkon je chjotatjenngile. Tsakui nichxin tjíomatjen nraa nga kʼia, kʼoa kji je naxó kʼoa tsa saʼnda tsakakóle ntsja je Jesús nga kui kisikʼaxki̱. Xijekoan, je Jesús kui kitsoyale chjotatjenngile nga kʼoatisʼin sikuinda Jeobá josʼin síkuinda je nise kao naxó, nga je tsjoále jme xi koatiokonni kʼoa xi kʼoakjá je xi kixi fitʼale.

5. Jméni xi koa̱n sikʼaxki̱le xi xijchá ma je ʼndíxtile nga kuitsoyale xi tʼatsʼe Jeobá.

⁵ Xi xijchá mao jósʼin koa̱n chjénngilao josʼin kitsoya je Jesús. Koaan kui tikʼaxki̱lao je ʼndíxtino jmeni xi tsjoachao, jolani tsa naxó kʼoa tsa cho̱. Kʼoatʼinlao jmé xi bakóyaná xi tʼatsʼe Jeobá. Xijekoa̱n, koaan kui chjónangilao jmé naxóni kʼoa ʼyá cho̱ni xi ngisa tsjoake. Ngisajin kjuinrʼoéno tsakui si̱kʼaxki̱lao jmeni xi tsjoake kʼianga kʼuínyalao xi tʼatsʼe Jeobá.

6. Jméni xi bakóyaná josʼin kitsoyale male Christopher.

⁶ Ali tsakuijin xi tsonile tsa je xi xijchá ma nʼio nda skótʼayason tʼatsʼe jngo cho̱ kʼoa tsa tʼatsʼe jngo naxó. Je Jesús ali tsakuijin kisikʼaxki̱ jmeni xi kjine je nraa kʼoa josʼin tjínnda je naxó. Tsakui nichxin tsjoake je xtiʼndíli nga kotʼayason tʼatsʼe jmeni xi kisinda Niná, tonga likui nʼio tse jmeni xi machjén kʼianga kʼuínyale tʼatsʼe Jeobá, sakʼoani tokui machjén tsa jme xi chjónangilee kʼoa tsa jme xi kʼuínlee. Tobʼelañá, jngo ndsʼee xi Christopher ʼmi, itso: “Kʼianga ya tiyuijin jña nindo chon itso je mana nga kitsoyanajin xi tʼatsʼe Niná: Tomakjoan ngʼa je nindo kʼoa naskásʼin matsen. Tokʼoamaná jokjoan xi kisinda Jeobá. Kʼoa tsa kʼiaje̱ nga ya mangínjin jñani kijna ndáchikon, itsonajin: Jmé kʼoasimani je xóle nandá, yaa ʼyañá nga nʼio tse nganʼio tjínle Niná”. Je Christopher itso: “Kʼianga kʼoatsonajin nikjaʼaitsjenníjin xi tʼatsʼe Niná”.

7. Jméni xi koa̱n sʼiaon nga kʼuínyalao ʼndíxtino tʼatsʼe jmeni xi kisinda Niná.

⁷ Josʼin nga kjimajchínga je ʼndíxtino koaan kʼuínyalao tʼatsʼe jmeni xi kisinda Niná ánni nga skoe̱ni jokjoan. Kʼianga kui chja̱kaonajmíño tʼatsʼe jme xi kisinda Niná koaan i̱ kʼuínlao: “Jméni xi bakóyali jebi xi tʼatsʼe Jeobá”. Tsakui nichxin tokʼoakoa̱nli jokuitsoli (Mat. 21:16).

8. Jmé xi kisʼin je chjota israelita kʼianga ndiaa tjenya kao ʼndíxtile.

⁸ Je chjota israelita kʼoatsakʼinle nga katatsoyale je ʼndíxtile nga ndiaa tjenya (Deut. 11:19). Ya naxinandá Israel nʼio nkjín cho̱ kao naxó kisʼe ya yandiaa, kuinga koan kui tsakjákaoni je ʼndíxtile je xi xijchá ma tʼatsʼe jmeni xi kisinda Jeobá. Kʼoati koa̱n sʼin je xi xijchá ma nichxin xi tiyoaa ndʼaibi. Kataʼyala kʼa choa̱.

9. Jmé xi bakóyali jokisʼin je Punitha kao Katya.

 ⁹ Jngo tichjaa xi Punitha ʼmi xi ya India tsʼe, itso: “Kʼianga mangínnixatʼaijin xíngijin xi kjintʼa tjío, kʼiaa chjakaonajmínijin ʼndíxtinajin tʼatsʼe jmeni xi kisinda Jeobá. Ngisaa choa ñʼai male je ʼndíxti nga majinle tʼatsʼe xi kisinda Niná kʼianga ya mangínkoaa jñani tsín nʼio nkjín carro tjín kʼoa jñani tsín nʼio nkjín chjota tjín”. Xi xijchá mao, alikui jchajinle je ʼndíxtino nga ya koanngínkao jñani naskáchon, jñani tjín jñá kao yá. Jngo tichjaa xi Katya ʼmi xi Moldavia tsʼe, itso: “Nʼio nda faʼaitsjenna kʼoa tsjoale kjoanda je xijchána nga ya kikaona ʼnde jñani naskáchon jñani tjín yá nga sʼa ʼndí kjiʼe̱ kʼianga kitsoyana xi tʼatsʼe Jeobá”.

10. Jméni xi koa̱n sʼin je xi xijchá ma tsa tsín kʼoakoa̱nle koai jñani kjintʼa jñani tjín jñá kao yá (chótsenlai je recuadro “ Xi kuinyakao je xi xijchá ma”).

¹⁰ Jméni xi koa̱n sʼiaon tsa tsín kʼoakoa̱nno nga ya koanngíon jñani tjín jñá kao yá. Je Amol xi kʼoati ya India tsʼe, itso: “Ya jñani tsʼan alikui maʼale je xi xijchá ma nga ya koai jñani kjintʼa jñani tjín jñá nga̱ síxá ʼndeʼndee. Kʼoa nʼio chjí sʼengi nga ya mangián. Tonga koaan nga ya parque koanngínkoaa ʼndíxti nga chja̱kaoñá xi tʼatsʼe Niná, kʼoa ninga toya ndʼianá tiyoaaje̱”. Tsa kuenta sʼiaon jmeni xi tjín jñani tsaon koaan kui chja̱kaonajmíño je ʼndíxtino jmeni xi kisinda je Niná (Sal. 104:24). Tsakui nichxin jchao nise, naxó kʼoa tsa jmesani xi kjaʼaínile. Je Karina xi Alemania tsʼe, itso: “Je mana nʼio tsjoake je naxó. Kʼianga sʼa ʼndí kjiʼe̱, nga bitjuijin kui tsakakóna je naxó xi kji ya yandiaa”. Kʼoati koa̱n si̱chjaon tsa video kʼoa tsa jmesa xi bʼasje naxinandále Niná xi kui nchja̱ni tʼatsʼe jmeni xi kisinda Niná. Tojñani tsaon koaan kʼuínyalao ʼndíxtino tʼatsʼe  jme xi kisinda Niná. Kataʼyala kʼa jme xi koa̱n chja̱kaonajmíño je ʼndíxtino tʼatsʼe jokjoan Jeobá.

11. Jméni xi koa̱n sʼin je xi xijchá ma nga katabe je ʼndíxtile jokji tsjoakená Jeobá.

¹¹ Kʼianga skoe̱ je ʼndíxtino jokji tsjoakená je Jeobá, koaan kui chja̱kaonajmíño josʼin síkuinda cho̱ je ʼndíle (Mat. 23:37). Kʼoati koa̱n kui chja̱kaonajmíño jotjín koya tsojmi tjín. Je Karina xi sajená kanikʼaxkiaa, itso: “Kʼianga jña mangínjin, je mana bakóna naxó xi kji ya yandiaa kʼoa kʼoatsona nga kjaʼaí kjaʼaí kjoan nga jngó jngó. Kʼoatsona nga kui bakó nga tsjoakená je Jeobá nga naskánakjoan naxó xi kisinda. Ninga jenkjín nó jaʼato tojo kuenta sʼian jokjoan je naxó, nga kjaʼaí kjaʼaí kjoan kʼoa nga kjaʼaí kjaʼaísʼin tsen. Nga kui kotsenle kʼoasʼin ʼbeña nga tsjoakená Jeobá”.

12. Jméni xi koa̱n sʼin je xi xijchá ma nga kuitsoyale ʼndíxtile jokji chjine Jeobá (Salmo 139:14; kʼoati chótsenlai sén xi faʼaitʼa).

¹² Tinyakao je ʼndíxtino nga katabe jokji chjine je Jeobá, nga̱ je kjoachjine xi tjínle alikui mangóson kao je kjoachjine xi tjínná ñá (Rom. 11:33). Koaan kʼoakʼuínlao nga kui nandá xi yojbi ma kʼoa nga ma bichó tojñani, ma bʼa ijngokʼa jtsí jñani xin ʼnde (Job 38:36, 37). Kʼoati koa̱n kui chja̱kaoño josʼin tjínnda yaoná (tʼexkiai Salmo 139:14). c Jngo ndsʼee xi Vladimir ʼmi, itso: “Ñandia kʼianga bicicleta kiskakao je ʼndítinajin kʼoa kixjajon je xkóle, tonga nga jejaʼato jngo jao nichxin koanndani. Je chjoónna kao an kʼoatsakʼinlaijin nga toxá kʼoasʼin tjínndani je yaoná nga toje manda kʼoa nga tsín kʼoama je xi to chjota sínda. Tobʼelañá, tsa jngo carro kuitsón alikui ma nga toje sʼendaya. Nga kʼoasʼin tsakʼinyalaijin je ʼndítinajin koanjinle jokji chjine Jeobá”.

13. Jósʼin kuinyakao je ʼndíxtile xi xijchá ma nga katasíkjaʼaitsjenjin jokji nganʼio tjínle Jeobá (Isaías 40:26).

¹³ Je Jeobá kʼoatsoná nga chótseen  ya ngʼá kʼoa si̱kjaʼaitsjenjiaan jokji nganʼio tjínle nga kisikatío je niño (tʼexkiai Isaías 40:26). d Koaan kʼoatʼinlao je ʼndíxtino nga katakotsen ya ngʼá kʼoa katasíkjaʼaitsjenjin jmeni xi tjín. Jngo tichjaa xi Taiwán tsʼe xi Tingting ʼmi bʼéyanajmí jmeni xi koan kʼianga sʼa ʼndí kji, itso: “Ñandia kʼianga jngo ʼnde tsangínjin kʼoa yaa tsakiyuijin jinsén kʼianga njio, kʼoa nga tsín jme ndʼia tjín ñaki matsen je niño ya ngʼá. Nga kʼia tsee kjoa tifaʼatojian ya ndʼiaskuela kʼoa tsín mena nga kjoaʼatone kjoatéxomale Jeobá. Tonga je mana kʼoakitsona nga sikjaʼaitsjenjian jókji nganʼio tjínle Jeobá nga kisinda je niño kʼoa nga kʼoati koa̱nle koasenkaona nga kixi kjuítʼale. Kʼianga tsangínjin ya ʼnde jebi kʼoa nga kisikjaʼaitsjenjian jme xi kisinda Niná kui xi tsakasenkaona nga koanmena tsaʼbesa xi tʼatsʼe Jeobá kʼoa nga je sixále ninga tojme kjoa xi kjoaʼatojian”.

14. Jósʼin koa̱n sichjén je xi xijchá ma jmeni xi koannda nga kuitsoyale je ʼndíxtile nga nʼio tsjoa tjín kon je Jeobá.

¹⁴ Jmeni xi kisinda Jeobá kui bakó nga nʼio tsjoa tjín kon. Je chjota xi tʼatsʼe cho̱ kotʼayason kʼoatso nga me tongatsʼi cho̱ nga síská, jolani je nise kao jti̱ (Job 40:20). Tsakui nichxin be je ʼndíxtino josʼín je chito nga síská, kʼoa tsa kʼiaje̱ nga síská je níaʼndí, tsakui nichxin saʼnda bijnoke. Kʼianga jchao xi ngindia nga tjíobijnoke ʼndíxtino josʼín nga síská je ʼndícho̱ koaan kʼoatʼinlao nga je nixálee jngo Niná xi nʼio tsjoa tjín kon (1 Tim. 1:11).

15. Jméni xi koasenkao xi xijchá ma nga skoe̱ jotjío kon je ʼndíxtile (Proverbios 20:5; kʼoati chótsenlai sén xi faʼaitʼa).

¹⁵ Sakʼoa ñʼai male je ʼndíxti nga bʼéyanajmí jme kjoa xi faʼatojin. Tsa ñʼai male je ʼndíxtino nga kʼoatsono jme kjoa xi faʼatojin jméni xi koa̱n sʼiaon (tʼexkiai  Proverbios 20:5). e Tjínkʼa je xijchá xi kʼoatso nga ngisa nda fákaonajmí je ʼndíxtile kʼianga ya fikʼetsoma jinjñá. Nga chon jñá jñá jñani bʼetsoma ngisaa nda fáonajmí. Jngo ndsʼee xi Taiwán tsʼe xi Masahiko ʼmi, itso: “Ngisaa nda chobanajmíjin kao ʼndíxtinajin kʼianga ya mangínkitsomaijin jñani nandá kijna kʼoa tsa ya jñani nindo tjín kʼoa bʼéyanajmínajin jotjío kon”. Je Katya, xi sa jekanikʼaxkiaa ya párrafo 9, itso: “Kʼianga jebitjoa skuela yaa mangínkitsomaijin kao mana jñani tíjna parque. Nga ya mangínjin ngisaa choa ñʼai mana nga fakaonajmía tʼatsʼe kjoa xi faʼatojian ya ndʼiaskuela kʼoa tsa jmeni xi makjáojinna”.

16. Jósʼin koa̱n kʼoétsaojinkao jmeni xi kisinda Jeobá nga jngo yaniʼya maño.

¹⁶ Jmeni xi kisinda Jeobá kui xi basenkaoná nga bʼetsaojiaan. Kʼoa nga kʼoanʼia jtín sʼin biyoaa nga jngo yaniʼya maa. Je Biblia kʼoatso nga toxá tjínni nichxin nga bijnoá kʼoa nga chjingʼaa (Ecl. 3:1, 4, nota). Nʼio nkjín koya ʼnde tjín jñani koa̱n koanngínkʼetsaojiaan. Nkjín xi ya fikʼetsoma jñani kijna nandá, tsa jñani nindo tjín kʼoa tsa jñasani naskánachon. Tjínkʼa xti xi tsjoake nga ya fi jñani tjín parque, jñani tjín nandá kʼoa tsa ya jñani nindo tjín. Nkjín koya xi kisinda Jeobá xi koa̱n kʼoétsaojinkoaa.

17. Ánni machjénni nga kuinyakao xi xijchá ma je ʼndíxtile nga kʼoetsaojinkao jmeni xi kisinda Jeobá.

¹⁷ Kʼianga jeʼndenaxó koa̱n Sonʼnde, je xi xijchá ma kao ʼndíxtile kʼoetsaojinkao jmeni xi kisinda Niná, nga̱ tsín tikuijkónnilee je cho̱ kʼoa tsín titso̱kjonniná tsanda je (Is. 11:6-9). Nʼio tse nichxin sʼe̱ná nga kʼoétsaojinkoaa jmeni xi kisinda Jeobá (Sal. 22:26). Xi xijchá mao, tongini chja̱kaonajmío je ʼndíxtino tʼatsʼe jmeni xi kisinda Jeobá, ali kʼiajin saʼnda choyao nga jeʼndenaxó koa̱n Sonʼnde. Tsakui si̱chjaon jmeni xi koannda nga kʼuínyalao je ʼndíxtino xi tʼatsʼe Jeobá, kʼoati sa̱tío kon jokisʼe kon je rey David, nga kitso: “Alikui ʼya xi tjín joni ji Jeobá, tsín xá xi mangóson je xáli” (Sal. 86:8).