Ánni kʼoakitsosíni jngo chjota nga sicha jme xi tjínle tsa jelani kuixankao Rut (Rut 4:1, 6).

Nichxin kjoatse, kʼiatsa kʼia kʼien je chjota nga kjesa tsínjinle xti, jókoanni je nangile. A tokichajin jaʼaínle je familiale. Xi tʼatsʼe jebi yaa kitsoya je kjoatéxoma xi tsakʼaile Moisés.

Tsa kʼien je chjota kʼoa tsa tsakaténa nangile nga ma̱ kisijchá yaole, jé ndsʼe̱ kʼoa tsa xi xínkjín ma tsakatseni nangile ánni nga tojo tsʼe xínkjín koa̱nni je nangi (Lev. 25:23-28; Núm. 27:8-11).

Kʼoa jókoanni nga tsín kichangi jaʼaínle ʼndíkʼien. Jé ndsʼe̱ ʼndíkʼien chixankao je chjoónle ʼndíkʼien. Kʼoa je ʼndí xi kisʼele tsʼee koan je nangile ʼndíkʼien kʼoa tsín kichangi jaʼaínle. Nga kʼoasʼin kisʼendajin kʼoati nda tsakʼejna je chjoónle ʼndíkʼien (Deut. 25:5-7; Mat. 22:23-28). Kʼoakoan je Rut, jé chixankao je xi xínkjín koan je ʼndíkʼien xʼinle.

Si̱kjaʼaitsjenla xi tʼatsʼe Noemí, Elimélec tsakʼin je xʼinle. Nga kʼien je Elimélec kao nga jao xtile aliʼya xi titsakajngiʼani (Rut 1:1-5). Kʼianga kichoni Judá je Noemí kʼoakitsole je Rut nga je Boaz koatse nangile ʼndíkʼien xʼinle nga̱ xínkjín mani (Rut 2:1, 19, 20; 3:1-4). Tonga je Boaz be nga tíjnasa ijngo chjota xi ngisa tjenni xínkjín je Elimélec (Rut 3:9, 12, 13). Ya Biblia alikui kʼoatso jotsakʼin chjota jebi.

Chjota jebi kʼoakitso tsakai nga je koatse nangile Elimélec (Rut 4:1-4). Ningalani chjí sʼe̱ngile je nangi kʼoati be nga jejchínga je Noemí kʼoa nga tsín tikoa̱n sʼe̱nile je xti xi tsʼe koa̱n je nangi. Je nangi xi koatse ñaki totsʼejin koa̱n chjota jebi, kuinga kiskenndiaanile tsakai.

Tonga nga kisʼejinle nga je Rut tjínnele kuixankao, chjota jebi alikuini tsakatse je nangi. I kitso: “Tosa likui koatse, nga̱ tsa mai anjin sicha” (Rut 4:5, 6). Ánni nga kʼoakitsoni chjota jebi.

Kʼiatsa je chjota jebi chixankao je Rut kʼoa tsa kjaʼaísa xi xínkjín mani, je ʼndí xi sʼe̱le tsʼejin koa̱n je nangile Elimélec. Ánni kʼoakitsoni chjota jebi nga sicha. Kataʼyala kʼa anni ningalani tsín kʼoatsokixi ya Biblia.

• Xi títjon, tsakui nichxin kʼoasʼin kisikjaʼaitsjen nga tosicha je tao̱nle nga̱ je ʼndí xi sʼe̱le Rut tsʼejin koa̱n je nangile Elimélec.

• Xi majaoni, jé tjínnele tsakajngiʼa je Rut kao Noemí.

• Xi majanni, tsa jelani chixankao Rut chjota jebi kʼoa tsa nkjínlani xti kisʼele kisixkoa̱yajinle nangi ngatsʼi xtile.

• Xi mañoni, tsa tsínsa ʼya xti tjínle chjota jebi, kʼoa tsa tojngo ʼndí sʼe̱le kao Rut, tsʼejin koa̱n ʼndí jebi je nangile chjota jebi kao nangile Elimélec. Tsa kʼoalani, tsʼejin koa̱n nangile je ʼndí xi jaʼaínle Elimélec kʼoa̱. Kuinga tsín koanmenile chjota jebi tsakasenkao je Noemí. Tosaa je Boaz kʼoakitsole nga katabatse nga̱ kʼoati xínkjín mani je Elimélec, kʼoa je Boaz tsakatse nga̱ kui xi koanmele nga tsín jchangi jaʼaínle ʼndíkʼien (Rut 4:10).

Je xi ngisa koanndosinle chjota xi tsínni chixankao Rut kuinga tsín jchangi jaʼaínle kao tsojmi xi tjínle. To yaole kini nga kʼoakisʼin. Ninga kʼoalani, toxitsjoani nga kʼoakisʼin nga tojo kichajinni jaʼaínle. Kʼoati kisicha je kjoanda xi tsakʼaile Boaz, nga chjotajchíngale koanni je Jesucristo, je Mesías. Ngisani tse kisicha chjota jebi nga to yaole kini kʼoa nga tsín tsakasenkao xi nganʼio koanchjénle (Mat. 1:5; Luc. 3:23, 32).