1-3. 1) Jméni xi tojo ñʼai maná ninga jetsangínsʼenngindá. 2) Kʼiatsa ñʼai maná nga nindayaa yaoná, jméni xi tsakui nichxin chjonangilee yaoná (chótsenlai sén xi faʼaitʼa ibi).

KʼIANGA kjesa testigole Jeobá majin je Kevin, tao̱n kisiskáni, na̱jno̱ kisken, nʼio tsakʼi kʼoa droga kisikao. ^[1] Kʼianga tsabe xi tʼatsʼe Jeobá koanmele nga kisimiyo. Tonga nga kjesa fisʼenngindájin títjon kjoanla kisikʼantjaiya yaole. Jé Jeobá kao Biblia tsakasenkao nga kisikʼantjaiya yaole (Hebreos 4:12).

² Kʼianga jekisʼenngindá je Kevin, tojo kisindayaa yaole nga ngisasa nda chjotale Cristo koa̱n (Efesios 4:31, 32). Tobʼelañá, ngotjo majtinile. Tijé tokʼoakoannile nga tsabe nga tojo kjeni mandayajin. Kʼoatso nga kui xi ngisa ñʼai koanle tikʼoajinni nga kisikʼéjna jmeni xi chʼao kisʼin nga kjesa fisʼenngindájin. Kuinga je Jeobá kisijénile nganʼio kʼoa nʼio nda kiskotʼayajin je Biblia. Nga kʼoakisʼin koan kisikʼantjaiya yaole.

 ³ Nga kjesa mangínsʼenngindájián nkjín kjoanla koya josʼin kinindayaa yaoná. Nga̱ kʼoasʼin kinitjosonñá jmeni xi tso je Biblia. Tonga tsakui nichxin jchaa nga machjénná nga tosi tonda si̱ndayaa yaoná nga kʼoakoa̱nkjoaan jokjoan je Niná kao Cristo (Efesios 5:1, 2; 1 Pedro 2:21). Tobʼelañá, tsakui nichxin kʼoasʼin nganá nga totsín sasénná tojmeni kʼoa tsa nʼio nikʼaxkiaa xi kjaʼaí. Kʼoa tsakui nichxin likui kui kʼoanʼia xi ndatjín nga tokui nokjonlee jokuitso kʼoa josʼin sikjaʼaitsjen xi ngikʼa. Kʼoa tsa jenkjín nó tibʼenelee yaoná nga tinindayaa tonga tsa tojo ñʼai maná. Tsakui nichxin i̱ bixoán: “Ánni nga kʼoasikji ñʼai manina nga sikʼantjaiya yaona. Jméni xi sʼian nga tosi tonda sikʼantjaiya yaona tojo tso je Énle Niná”.

4. Ánni nga ñʼai ma sakʼoaniná nga tsjoa bʼe kon je Jeobá.

⁴ Tsjoachañá je Jeobá kʼoa ñaki kʼoatjín ni̱ma̱ná nga tsjoa kʼoé kon. Tonga tsín tongantsjai nga kʼoanʼia nga̱ chjotajéeñá. Kʼoati sʼe tokoán jokoanle je pastro Pablo, nga kʼoakitso nga kʼianga kui xi ndatjín mele kʼoakisʼin, likui tongantsjai nga choa ñʼai koanle (Romanos 7:18; Santiago 3:2).

5. 1) Jméni xi kinikatioá kʼianga koan tsangínsʼenngindá. 2) Jméni xi tojo ñʼai maná nga chjotajée maa.

⁵ Nga koan tsangínsʼenngindá nga testigole Jeobá koaan, títjon kjoanla kinikatioá jmeni xi jtike je Jeobá (1 Corintios 6:9, 10). Tonga nga tojo chjotajée maa, tojo saténgiñá ninga jenkjín nó tsangínsʼenngindá (Colosenses 3:9, 10). Tsakui nichxin sakʼoa chʼaotjín xi nimetokoán kʼoa tsa chʼaosʼin nikjaʼaitsjeen, kʼoa tsa ñʼai maná nga nindayaa yaoná jokjoaan. Tsakui nichxin jenʼio nkjín nó nga kui tibixkantʼakoaa.

6, 7. 1) Ninga chjotajée maa, ánni nga koa̱n miyole Jeobá koa̱nñá. 2) Ánni nga si̱jésínilee je Jeobá nga katasíchatʼaná.

⁶ Ninga chjotajée maa, koaan miyole Niná koaan kʼoa koaan si̱xálee. Si̱kjaʼaitsjeen nga je Jeobá kui tsabe xi ndatjín xi tʼatsaan kʼoa kuinga koanmesínile nga tsaʼyaxkoaan (Juan 6:44). Je Jeobá be nga chjotajée maa kʼoa nga kuinga saténgiñá kʼoa ñʼai maniná nga kui kʼoanʼia xi ndatjín. Ninga kʼoalani, je Jeobá koanmele nga miyole koan.

⁷ Nga nʼio tsjoakená je Jeobá, jngo kjoatjao kitsjoaná xi nʼio chjíle. Kisikasén i̱ Sonʼnde je ʼNdíle kʼianga kitsjoa kjoabijnachonle xi totʼatsaan kʼoa tsakʼéchjíntjai je jéená (Juan 3:16). Kʼianga saténgiaa koaan ni̱jélee je Jeobá nga katasíchatʼaná. Xi totʼatsʼe nga tsakʼéchjíntjainá je Jesús, je Jeobá síchatʼaná kʼoa tsjoáʼndená nga tojo miyole maa (Romanos 7:24, 25; 1 Juan 2:1, 2). Si̱kjaʼaitsjeen nga je Jesús jé kʼienntjai chjota xi kʼoamanile jéele. Kʼiatsa kʼoasʼin nikjaʼaitsjeen nga nʼio chʼaotjín jmeni xi kanʼia, si̱jélee je Jeobá nga katasíchatʼaná. Tsa tsín si̱jélee kjoanichatʼa, joxi yaa mangóson tsa tsín koa̱nmená koanejoaan ndsaa tsa jndí kjoan. Nʼio bʼailee kjoanda je Jeobá nga miyole kjimaa ninga chjotajée maa (tʼexkiai 1 Timoteo 1:15). *

8. Ánni nga kʼoénenilee yaoná nga si̱ndayaa.

⁸ Ningalani síchatʼaná je Jeobá, alikui koa̱n tokjoaská katamaná jmeni xi nʼia. Je Jeobá kʼoatsoná jotjínnele koa̱nkjoan je xi miyole mani (Salmo 15:1-5). Tsa mená nga miyole Niná koaan, tjínnele nga kʼoénelee yaoná nga kjuintjenngiaa je choa̱le kao tsʼe ʼNdíle. Kʼoati tjínnele kʼoénelee yaoná nga tsín kʼoasʼiaan xi chʼaotjín mametokoán kʼoa tsa kʼoakoa̱nná ñaki jngokʼa chjaʼaxinlee yaoná. Ninga jenkjín nó tsangínsʼenngindá kʼoa ninga sʼa choa, tjínnele nga tojo si̱ndayasaa yaoná (2 Corintios 13:11).

9. Jósʼin ʼyañá nga koa̱n tosi tonda si̱ndayaa yaoná.

⁹ Je pastro Pablo i kitso: “Chja̱ʼaxinlao yaono  je ni̱ma̱no xi jchínga xi kjaínga tokoanngale kjoa xi chʼao tjín jo tso kjoatsjoale yaono xi tobʼanacha, josʼin tsangínkao yaono ngasʼa. Kʼoasʼin katamachjotseya jo tjín kjoafaʼaitsjenno. Chjóao je ni̱ma̱no xi chjotse, xi ngoyale Niná kisʼendani kao xi tjínle kjoakixi kʼoa kao xi ñaki tsje” (Efesios 4:22-24). Jebi kui xi tsonile nga tosi tonda chʼa̱sjee nganʼio nga si̱ndayaa yaoná kʼoa nga kʼoakoa̱nkjoaan josʼin mele Niná. Ni sʼa choa kʼoa ni jenkjín nó nga tinixálee je Jeobá, tojo nʼio tse xi koa̱nsa chótʼayá tʼatsʼe. Kʼoa je Biblia koasenkaoná nga tosi tonda si̱ndayaa yaoná nga kʼoakoa̱nkjoaan jokjoan Jeobá.

10. 1) Jméni xi tjínnele sʼiaan nga tosi tonda koasenkaoná je Biblia nga si̱ndayaa yaoná. 2) Jméni xi chjonangilee yaoná.

¹⁰ Ngatsʼiñá nga mená si̱tjosoán jmeni xi tso je Biblia. Tsa mená nga tosi tonda si̱ndayaa yaoná, tjínnele kʼoénelee yaoná. Ánni nga machjénsíni nga kʼoasʼiaan. A tsín koa̱nle je Jeobá kʼoasʼin nga choa ñʼai katamaná nga si̱ndayaa yaoná.

11-13. Ánni nga kui xi menile Jeobá nga kʼoénelee yaoná nga kuixkantʼakoaa xi chʼaotjín.

¹¹ Kʼianga kui nikjaʼaitsjeen ngayeje jmeni xi kisinda je Jeobá, ʼyañá nga nʼio tse nganʼio tjínle kʼoa nga tsín jme xi ñʼai male. Si̱kjaʼaitsjenla je Tsʼuí. Nga xki̱ segundo nʼio tse lʼí bʼasje kʼoa tochoa faʼai i̱ Sonʼnde, kʼoa tokʼoakji machjén nga tjín kjoabijnachon (Salmo 74:16; Isaías 40:26). Je Jeobá kʼoati tsjoále nganʼio je choʼndale kʼianga machjénle (Isaías 40:29). Tsakui nichxin tjínkʼa xi kʼoakuitso ánni nga tsín kʼoasʼínni je Jeobá nga choa ñʼai katamaná nga si̱ndayaa yaoná.

¹² Je Jeobá tsjoáʼndená nga ñá chjoéjiaan jmeni xi sʼiaan. Ñá xi kuixónñá tsa si̱tjosonlee kʼoa tsa mai. Kʼianga nitjosonlee kʼoa nga bʼenelee yaoná nga kui kʼoanʼia josʼin mele,  bakolee nga tsjoachaa kʼoa nga mená nda sʼe̱ kon. Je Na̱i kʼoatso nga tsínle ʼnde je Jeobá nga je koatexomaná. Tonga kʼianga nitjosonlee je Jeobá, bakoñá nga mená nga je koatexomaná. Je Jeobá tsjoakená kʼoa nʼio bechjí jokji bʼenelee yaoná (Job 2:3-5; Proverbios 27:11). Kʼianga bʼenelee yaoná nga bixkantʼakoaa xi chʼaotjín ninga ñʼai maná, bakoñá nga kixi timangíntʼalee je Jeobá kʼoa nga mená nga je koatexomaná.

¹³ Je Jeobá kʼoatsoná nga kʼoénelee yaoná nga chjénngilee jokjoan (Colosenses 3:12; tʼexkiai 2 Pedro 1:5-7). * Kui xi mele nga kʼoénelee yaoná nga tsínkui si̱kjaʼaitsjeen xi chʼaotjín (Romanos 8:5; 12:9). Tsa chʼa̱sjee nganʼio nga si̱kʼantjaiyaa yaoná, kʼoa tsa kʼoantjaiyaa, nʼiojin tsjoa sʼe̱ tokoán.

14, 15. Jméni xi sʼiaan nga kʼoakoa̱nkjoaan josʼin mele Jeobá (chótsenlai rekuadro “ Je Biblia kao kjoabʼetsʼoa tsakinyakao nga kisindaya yaole”).

¹⁴ Jméni xi tjínnele sʼiaan nga kʼoakoa̱nkjoaan josʼin mele Jeobá. Alikui koa̱n nga ñá kʼoakuixoán jmeni xi si̱kʼantjaiyaa jokjoaan kʼoa jmeni xi mai. Kʼoaiʼndee nga je Jeobá kʼoakatatsoná jñani si̱ndayaa yaoná. Romanos 12:2 itso: “Ali kʼoajinsʼin mangínkao yaono jo tjín kjoa sonʼndebi. Katabʼantjaiyao yaono nga koa̱nchjotseyanda ngijngokʼani kjoafaʼaitsjenno, jméni nga jchasínio jmeni xi Niná mele, jñale xi nda, xi sasénle, xi ñaki tjíjngo”. Tsa mená jchaa jmeni xi sasénle je Jeobá, tjínnele nga si̱chjén jmeni xi títsjoáná. Tjínnele nyaon nyaon kʼoéxkiaa je Biblia, si̱kjaʼaitsjenjiaan jmeni xi bʼexkiaa kʼoa si̱jélee nganʼiotsjele (Lucas 11:13; Gálatas 5:22, 23). Tsa kʼoasʼiaan, je Jeobá koasenkaoná nga koa̱njinná jmeni xi sasénle kʼoa koaanná kʼoasʼin si̱kjaʼaitsjeen josʼin síkjaʼaitsjen je. Kʼoa jmeni xi si̱kjaʼaitsjeen, jmeni xi kuixoán kʼoa jmeni xi sʼiaan, sa̱sénle je Jeobá. Tonga tojo machjén nga tosi tonda kuixkantʼakoaa xi chʼaotjín (Proverbios 4:23).

¹⁵ Ali tsa tokuijin xi sʼiaan nga kʼoéxkiaa je Biblia nga nyaon nyaon, machjén nga kʼoati chótʼayá. Kʼianga chótʼayá je Biblia, si̱chjén je xo̱n xi bʼasje naxinandále Jeobá, jolani je Xo̱n xi Bájinkonná kao ¡Despertad! Je kjoaʼmiya xi faʼaitʼa rebista jebi tsoyaná jósʼiaan nga kʼoakoa̱nkjoaan jokjoan je Jeobá kʼoa jósʼin kuixkantʼakoaa xi chʼaotjín. Tsakui nichxin kuikjoan machjénná xi kʼoéxkiaa ya Biblia kʼoa tsa ya rebista. Koaan koatiotjao kʼaa kʼoa sakʼoa kʼoéxkiaa.

16. Ánni nga tsín si̱kʼajennilee tokoán kʼiatsa tsín ndi̱to̱n tíbʼantjaiyaa.

¹⁶ Tse kuichomani nga kʼoakoa̱nkjoaan jokjoan je Jeobá. Kuinga tsín si̱kinroajenñá  tokoán tsa tojo kje mandayajián ninga tibʼenelee yaoná. Nga sʼa títjon, tsakui nichxin machjén nga nʼio kʼoénelee yaoná nga kʼoasʼiaan jotso je Biblia. Tonga tsa tosi tonda kʼoénelee yaoná nga kʼoasʼin si̱kjaʼaitsjeen kʼoa nga kʼoasʼiaan josʼin mele Jeobá, ngisaa choa ñʼai koa̱nná nga kʼoasʼin si̱kjaʼaitsjeen josʼin síkjaʼaitsjen kʼoa nga kui xi ndatjín kʼoasʼiaan (Salmo 37:31; Proverbios 23:12; Gálatas 5:16, 17).

17. Tsa kixi kjuintʼalee je Jeobá, jmé kjoanda xi choyalee.

¹⁷ Jemená nga kjoaʼaí je nichxin kʼianga chjotatsje koaan kʼoa nga si̱xálee je Jeobá ngantsjai nichxin. Nga kʼia, alikui tikui xi chʼaotjín kuixkantʼakaoñá nga̱ jechjotatsje koaan. Ngisajin choa ñʼai koa̱nná nga kʼoakoa̱nkjoaan jokjoan je Jeobá. Tonga ninga chjotajée maa ndʼaibi, koaan jchaxkoán je Jeobá xi totʼatsʼe nga tsakʼéchjíntjainá je Jesús. Tsa tosi tonda chʼa̱sjee nganʼio nga si̱ndayaa yaoná kʼoa tsa si̱tjosonlee, nda sʼe̱ kon je Jeobá.

18, 19. Jméni xi bakó nga tjínle nganʼio je Énle Niná nga síndayaná.

¹⁸ Je ndsʼee Kevin, xi ngotjo síjtinile yaole tsakai, kisikjaʼaitsjenjin jmeni xi tsakʼéxkia ya Biblia kʼoa tsakʼasjee nganʼio nga kisindaya yaole. Kʼoati kinrʼoé je kjoafaʼaitsjen xi kitsjoale je ndsʼee. Ningalani tse kichomani nga kisindaya yaole, nga jeki nichxin siervo ministerial koan. Kʼoa ndʼaibi jekan nó nga chjotajchínga sʼin tíjna ya jinjtín. Tonga kʼoatso nga tosi tonda tíkjantʼakao xi chʼaotjín.

¹⁹ Joni tsa Kevin, kʼoati koa̱n tosi tonda si̱ndayaa yaoná tsanda ñá. Tsa kʼoasʼiaan ngisaa koa̱nmiyosaa je Jeobá (Salmo 25:14). Je Jeobá koasenkaoná tsa kʼoénelee yaoná nga kʼoasʼiaan josʼin mele. Je Énle Niná tjínle nganʼio nga tosi tonda sindayaná (Salmo 34:8).