Nʼio nkjín koya kjoafaʼaitsjen tjín, tonga alikui tongayeje nga basenkaoná. Tobʼelañá, tsakui nichxin tjínkʼa xi kʼoakuitsoná nga tsín chjíʼndá kʼoa tsín kʼoakuixoán jotjín tokoán, tonga kʼoati tjín xi kʼoakuitsoná nga ndatjín nga chjíʼndá kʼoa nga kʼoakuixoán jotjín tokoán. Je kjoafaʼaitsjen xi tsjoá je Biblia ngisaa basenkaoná, kʼoa mangóson jme xi tjíobe ndʼaibi je chjota xi kui tjíokotʼayason.

Tjín ʼnde jñani likui ndasʼin ʼyale kʼianga kjiʼndá je xi xʼin. A soa koa̱nná kʼiatsa jinle chjota chjíʼndá. Tjínkʼa chjinexki xi kʼoatso nga toxá  chjiʼndáñá kʼianga kjoaba tiyojiaan. Kʼianga bakoá jomaná nga kjoaba tiyojiaan tikui basenkaoniná. Tonga tsa tosi̱jelee tokoán, tosa tosikiʼaonná. Ya Biblia alikui kʼoatso tsa chʼaotjín kʼianga chjiʼndá kʼoa tsa chʼaotjín nga kjiʼndá je xi xʼin. Si̱kjaʼaitsjenla jokisʼin je Jesús. Ninga koanle kisikjaʼáyale kʼien, kʼianga kʼien je Lázaro, xi nʼio miyole koanni kiskiʼndání. Alikui soa koanle (Juan 11:33-35).

Je xi kjoaba tjíojin sakʼoaa tojti sʼe kon kʼoa ngisaa tsa tongotjo kamʼeni je xínkjín. Nkjín koya tjínni anni nga kʼoasatíoni kon. Tobʼelañá, tsa je chjota xi bexkón likui nda tso én xi kjoakao. Je Mike xi Sudáfrica tsʼe itso: “Tosʼaa 14 nóna nga kʼien je nʼaina. Kʼoa je xi pastor ma kʼoakitsona nga yaxó ngʼajmi machjénle Niná je xi nda chjota kʼoa kuixó nga ya fikaoni. * Nga kʼoakitsona nʼio jti koanna, nga̱ ngisaa nʼio machjénnajin je nʼainajin. Kʼoa ninga jetsʼato 60 nó jaʼato nga kʼien, tojo aon mana jme xi kitsona je pastor”.

Kʼoa jósʼiaan tsa ñá tjínná jée koa̱nná. Tsa tongotjo kamʼeni xíngiaa, tsakui nichxin i̱ kuixoán: “Tsa i̱lani kisʼian alikuijin kʼien”. Kʼoa tsakui nichxin ngisa tichʼaosʼe̱ngáni tokuin tsa kichobatio nga tokʼoatjínsa tsaʼyao xíngio.

Tsa sakʼoa tojti sʼe tokuin kʼoa tsa ji tjínli jée mali, ali tonijejinlai tokuin. Chja̱kaonajmí je miyoli xi kjuinrʼoéli kʼoa xi koasenkaoli, xi kʼoakuitsoli nga toxá kʼoamani nga jngo xíngiaa biya. Je Biblia itso: “Jngo xi ñaki miyo tsjoakená tokʼiani, kʼoa jngoyale ndsʼeñá kʼianga kjoaba tijnajiaan” (Proverbios 17:17).

Je xi ngisasa nda koasenkaoná nga kjoaba tiyojiaan jé Jeobá. Kʼoatʼinlai Jeobá jotjín tokuin nga̱ mandosinle xi tʼatsi (1 Pedro 5:7). Tsa kʼoasʼiain, ñaki nda sʼe̱ tokuin nga̱ koasenkaoli “je kjoanyʼántakonle Niná xi ñaki faʼatole ngayije kjoafaʼaitsjenle chjota” (Filipenses 4:6, 7). Kʼoati tsjoánganʼioli je Énle Niná. Koaan kʼoétʼaxuin je testole Biblia xi koasenkaoli kʼoa kʼoéjintokon kʼai (chótsenlai je  rekuadro xi faʼaitʼa ibi). Tsa si̱kjaʼaitsjenjin jotso je Énle Niná koasenkaoli, ngisaa tsa kʼianga jenjio nga toji tijnai kʼoa tsa tsín tísʼefai (Isaías 57:15).

Jngo chjota xi 40 nóle xi Jack kʼuínlee, chriansʼaa kʼien chjoónle, cáncer kisikʼien. Sakʼoaa nʼio ba male, tonga kui kjoabʼetsʼoa xi nʼio tíbasenkao. Itso: “Kʼianga fakoa je Jeobá alikui titoʼan tijnaña mana. Kʼianga njio me tongantsjai nga faʼána kʼoa tsín tisʼefeña. Kʼianga jebʼexkia kʼoa jesikjaʼaitsjenjian jmeni xi tso je Biblia kʼoa nga jekʼoaxinle Niná jotjín tokoan, nda sʼe tokoan. Chan nyʼán sʼe kjoafaʼaitsjenna kao ni̱ma̱na kʼoa sʼefe ijngokʼaña”.

Jngo tsoti xi Vanessa ʼmi xi chʼin kisikʼien male, kʼoatso nga tíbe josʼin tíbasenkao Niná. Itso: “Kʼianga nʼio ba kisʼe tokoan, ñaki tokiskiʼndáña kʼoa kui jaʼaínle Niná kisikʼaxkia. Kinrʼoéna je Jeobá nga tsakʼetsʼoale kʼoa tsakasenkaona ngantsjai”.

Tjínkʼa chjinexki xi kʼoatso nga nda sa̱tío kon je chjota xi kjoaba tjíojin kʼiatsa jme xá xi sʼin nga kuinyakao xi kjaʼaí chjota ya ʼndele. Tsa kʼoasʼin, tjónganʼiole kʼoa ngisaa nda sa̱tío kon (Hechos 20:35). Nʼio nkjín chjotale Cristo xi tjín xi kʼienle xi kʼoatso nga tsjoa tjíosatío ijngokʼani kon nga tjíobinyakao xi kjaʼaí (2 Corintios 1:3, 4).