Tsakui nichxin alikui ʼyaa josʼiaan kʼoa jokʼuínlee nga kʼoainganʼiolee xi xínkjín kamʼe, kʼoa tosa lijo bixoán. Tonga tjín jmeni xi koa̱n sʼiaan nga kuinyakoaa xi kjoaba tjíojin.

Koaan kjuinchónlee kʼoa kʼoakʼuínlee nga nʼio katasʼín kon. Tjínkʼa xi kʼoasʼin beni nga tsoakjá xínkjín nga̱ kʼoasʼin bakónile nga mandosinle xi tʼatsʼe. Tsa mele kuinchja̱ je xi kjoaba tíjnajin nda kuinóʼyalee. Kʼoa tsa maije̱ kuisenkoaa nga kʼoéndalee tsojmi xi ma chine, si̱kuindaa ʼndíxtile kʼoa kʼoainganʼiolee tsa jme xi machjénle nga sʼin. Ngisaa binyakoaa xíngiaa nga kʼoanʼia tikʼoajinni tsa jokʼuínlee.

Nga jekoai nichxin, tsakui nichxin chja̱kaonajmíni tʼatsʼe ʼndíkʼien. Tobʼelañá tsakui jokoankjoan kʼoa tsakuije̱ jmeni xi kisʼin nga tsakʼejna. Tsakui nichxin nda sʼe̱ kon nga kui chja̱kaonajmíñá. Kui jebi xi tíbasenkao je Pam xi kʼoasʼin jejaon nó tjínle nga kʼien xʼinle xi Ian tsakʼin. Pam itso: “Kʼianga sʼeyanajmína jmeni xi kisʼin je Ian xi tsín tjínjinna, kui xi nda bʼé tokoan”.

Tjínkʼa chjinexki xi kʼoatso nga tokʼia nʼio bʼainganʼiole xi kjoaba tjíojin nga tosʼa kamʼe xínkjín, tonga nga jemaskanni je miyole chajinle nga tojo machjénle nganʼio. Tonga machjénní nga tojo kʼoainganʼiolee xi kjoaba tjíojin. * Nkjín xi kjoaba tjíojin xi tsjoá kjoanda nga tojo bʼainganʼiole ninga jetse jaʼato nga kʼien xínkjín.

Kataʼyala jokoan je Kaori, jngo tsoti xi Japón tsʼe. Nʼio ba koanle kʼianga kʼien male kʼoa 15 sá koanskanni sa tindichjaa kʼienngáni. Tonga xi miyole mani nʼio tsakinyakao. Jngo chjoón miyole xi ngisa jchínga xi Ritsuko ʼmi kʼoakitso nga kʼoasʼin sikuinda joni tsa tsotile. Je Kaori itso: “Alikui kisasenna nga̱ tojngo mani je xi mana koanni kʼoa likui mena nga kjaʼaí xi kʼoéjnaya ngajaole. Tonga josʼin tsakasenkaona je Ritsuko nʼio kitsjentʼale. Nga xki̱ xomana ñatjen tsakʼinyasonníjin nga joaijin kʼoa ñatjen tsanginníjin je kjoajtín. Mangínʼyoníjin té, bichókaona tsojmi xi ma chine kʼoa kjina karta kao tarjeta. Nga kʼoakisʼin ma Ritsuko nʼio kitsjoanganʼiona”.

Jetejao nó jaʼato nga kʼien je na̱le Kaori. Ndʼaibi je Kaori kao xʼinle kʼoasʼin síchjén nichxinle nga fákaoni Énle Niná je chjotandaindʼiale. Kaori itso: “Je ma Ritsuko tojo kʼoasʼin síkuindana. Nga bichoña ndʼiana fikonle kʼoa nʼio nda sʼena nga fakaonajmía”.

Jngo testigole Jeobá xi Chipre tsʼe xi Poli ʼmi kʼoati nʼio nda tíbasenkao nga kʼoasʼin tíbʼainganʼiole. Je xʼinle xi Sozos tsakʼin nʼio nda chjota koan kʼoa nʼio nda kisikuinda je jtín. Kʼoa nchjale je ʼndíxtijchʼa̱n kao ʼndíyánchjínkʼan nga katabichókjen niʼyale (Santiago 1:27). Tonga tumor kinroaya jko̱ kʼoa kui xi kisikʼien, 53 nóle nga kʼien. Je Poli itso: “Jekʼien je xʼinna, 33 nó tsakiyokoaijin xíngijin”.

Nga jekisʼeñe je xʼinle Poli yaa kikatio ya Canadá kao tiʼndíle xi Daniel ʼmi xi 15 nóle. Ki je kjoajtín kʼoa je Poli itso: “Ninga tsín be je ndsʼee jokji kjoa kitjatojinjin, nʼio nda tsakinyakaonajin kʼoa nʼio kitsjoanganʼionajin. Nʼio nda tsakasenkao je tina nga̱ kʼiakjoán  machjénle nganʼio. Je ndsʼee xi tjíotítjonle je jtín nʼio koanndosinle xi tʼatsʼe Daniel. Jngo ndsʼee xi fikaontsjai nga fikʼétsaojin kao miyole kʼoa tsa kʼiaje̱ nga fisískákao pelota”. Ndʼaibi je Poli kao Daniel nda tjío kʼoa tsjoa tjíole.

Tojosʼin tiʼyaa nʼio nkjín koya josʼin koa̱n kuinyakoaa kʼoa kʼoainganʼiolee je xi tjín xi kamʼele. Je Biblia kʼoati nʼio tsjoánganʼioná kʼianga tsjoáná kjoachoya tʼatsʼe nichxin xi nroaján. Kuila kataʼyaa ya kjoaʼmiya xi ijngo.