1, 2. 1) Jótjín tokoán xi tʼatsʼe Biblia. 2) Jñánile libro xi tsʼe Biblia xi ngisa tsjoachai.

ÑÁ XI testigole Jeobá maa nʼio tsjoachaa je Biblia. Je Biblia tsjoáná kjoachoya, sínʼiojinná kʼoa bándiaaná (Romanos 15:4). Je én xi nya ali tsʼe chjotajin, énle Ninání (1 Tesalonicenses 2:13).

² Tsen tjín librole Biblia xi tsjoachaa nga jngó jngoá. Tjínkʼa xi nʼio tsjoake je libro xi tsʼe Mateo, Marcos, Lucas kao Juan nga̱ jmeni xi tsoya tʼatsʼe Jesús kui xi binyakao nga ngisa nda be jokjoan je Jeobá (Juan 14:9). Kʼoa tjínkʼa xi kui tsjoake je libro xi tsʼe Apocalipsis nga̱ kui tsoya “je kjoa xi koa̱n ndi̱to̱n” (Apocalipsis 1:1). Tjínkʼa xi nʼio tsjoánganʼiole je libro xi tsʼe Salmos. Kʼoa tjín xi nʼio tsjoake je kjoafaʼaitsjen xi faʼaitʼa ya Proverbios. Tojosʼin tiʼyaa, je Biblia machjénle ngatsʼi je chjota.

3, 4. 1) Jótjín tokoán tʼatsʼe xo̱n kao xi kjaʼaísanile xi bʼasje naxinandále Niná. 2) ʼYáni xi chjile jme xi bʼasje naxinandále Niná.

³ Nga tsjoachaa je Biblia kʼoati tsjoachaa je xo̱n xi bʼasje naxinandále Jeobá nga̱ yaa Biblia yʼangini. Je libro, foyeto, rebista kʼoa xi kjaʼaísanile kui faʼaitʼa kjoankjíntokon xi tsʼe Niná (chótsenlai je rekuadro “Jósʼin tsoyanile”). Xo̱n jebi kui xi binyakaoná nga tosi tonda miyole Jeobá maa kʼoa nga tsín nroajen kjoamakjainná (Tito 2:2).

⁴ Nʼio nkjín xo̱n bʼasje je naxinandále Niná xi binyakaoná xi testigole Jeobá maa. Tjínkʼa xi ngatsʼiaa chjiná kʼoa tjínkʼa xi toxá je  chjinile xi sʼa xti kʼoa tsa je xi xijchá ma. Kʼoa nʼio nkjín kjoaʼmiya kao video xi tjío ya pájina xi tíjnaná ya Internet xi je sʼendale chjota xi tsín testigole Jeobá ma. Ngayeje jebi kui xi bakó nga tísítjoson Jeobá nga kʼoakitso nga nʼio tse kjoankjíntokon tsjoále ngatsʼi je chjota (Isaías 25:6).

5. Jméni xi tsín jao tjínná nga bechjí je Jeobá.

⁵ Mená nga ngisasa tse nichxin sʼe̱ná nga chótʼayá je Biblia kao xo̱n xi síkasénná naxinandále Niná. Tonga tsakui nichxin likui kʼoamaná nga tongóson kji tse nichxin nikʼayalee nga jngó jngó je xo̱n xi bitjo. Tonga alikui jao tjínná nga bechjí je Jeobá tsa ndasʼin nichjén nichxinná nga bʼexkiaa kʼoa chotʼayá je Biblia kao xo̱n xi tsjoáná naxinandále (Efesios 5:15, 16). Ninga kʼoatinʼia, tjín jmeni xi si̱kuindalee yaoná. Kataʼyala jméni.

6. Jméni xosikaoná tsa tsín si̱chjén ngayeje kjoachjine xi títsjoáná je Jeobá.

⁶ Tsa tsín si̱kuindaa yaoná tochale kʼoasʼin si̱kjaʼaitsjeen nga tjínkʼa librole Biblia kʼoa nga tjínkʼa xo̱n xi kjioná xi tsín koa̱nchjénná. Tobʼelañá, tsa kʼoasʼin si̱kjaʼaitsjeen nga tsín machjénná jmeni xi tso jngo librole Biblia, jósʼiaan. Kʼoa jósʼiaan tsa tsín ñá kichjiná jngo xo̱n xi bʼasje naxinandále Niná. Kʼianga kʼoéxkiaa, a tsín nʼio koa̱nndosinná axo ñaki tsín kʼoéxkiaa. Tsa kʼoasʼiaan, tosi̱chajián kjoafaʼaitsjen xi nʼio koasenkaoná tsakai. Tʼatsʼe Jeobá tínroani ngayeje jmeni xi tso je xo̱n xi síkasénná naxinandále. Je Biblia itso: “An, Jeobá, anña Nináli, je xi kʼoasʼin bakóyali ánni nga ji xi nda kuijnasíni” (Isaías 48:17). I̱ kjoaʼmiya jebi jan koya kuitsoyaná xi koasenkaoná nga si̱chjén ngayeje kjoankjíntokon xi títsjoáná je Jeobá.

7. Ánni nga kui si̱kjaʼaitsjensíñá josʼin koa̱nchjénná jmeni xi bʼexkiaa ya Biblia.

⁷ Kʼianga kʼoéxkiaa Biblia si̱kjaʼaitsjeen josʼin koa̱nchjénná jmeni xi kʼoéxkiaa. Ninga tjín librole Biblia xi jngo kʼoa tsa nkjín chjota kichjile, ya 2 Timoteo 3:16 itso: “Ngayije xo̱n Escritura Niná jinroani, kʼoa kjaínga nda machjén”. Kuinga tsín kʼoasʼin si̱kjaʼaitsjensíñá nga tsín koasenkaoná jme xi bʼexkiaa. Tobʼelañá, jngo ndsʼee xi kʼoatso nga kui síkjaʼaitsjen nga nʼio nkjín koya jmeni xi koa̱njinle ninga tochoa jme xi kʼoexkia ya Biblia. Nga kʼoasʼín, sokóle kjoafaʼaitsjen xi tsín ngotjo masjaininá. Kʼianga kʼoéxkiaa je Biblia títjon kjoanla si̱jélee Jeobá nga katabasenkaoná kʼoa katatsjoáná kjoachjine ánni nga koa̱njinsíniná jmeni xi mele kuitsoyaná (Esdras 7:10; tʼexkiai Santiago 1:5). *.

8, 9. 1) Jñánile xi jan koya chjónangilee yaoná kʼianga kʼoéxkiaa je Biblia. 2) Jmé xi tsoyaná tʼatsʼe Jeobá kʼianga nkjín koya tjínni xi síjé jokoa̱nkjoan je xi chjotajchínga sʼin tjío.

⁸ Chjónangilee yaoná. Kʼianga kʼoéxkiaa je Biblia koaan chjónangilee yaoná nga jan koya jebi: “Jmé xi tsoyana jebi xi tʼatsʼe Jeobá. Jósʼin koa̱nchjénna jebi. Jósʼin sichjén jebi nga koasenkoa xi kjaʼaí”. Tsa kʼoasʼiaan ngisaa koasenkaoná jmeni xi kʼoéxkiaa. Tobʼelañá, ya Biblia nkjín koya síjé Jeobá jotjínnele koa̱nkjoan je xi chjotajchínga sʼin tjío (tʼexkiai 1 Timoteo 3:2-7). * Kʼoa nga tsín chjotajchínga sʼin tiyoaa ngatsʼiaa, tsakui nichxin kʼoasʼin si̱kjaʼaitsjeen nga tsín machjénná testo jebi. Tonga kuila nga jan kjoachjonangi xi kabixoán si̱chjén  kʼianga jchaa jósʼin koasenkaoná testo jebi ngatsʼiaa.

⁹ “Jmé xi tsoyana jebi xi tʼatsʼe Jeobá”. Nga nkjín koya síjé Jeobá jotjínnele koa̱nkjoan je xi chjotajchínga sʼin tjío kui xi bakó nga nʼio chjí be je jtínle Cristo. Je Biblia kʼoatso nga kao njínle ʼNdíle tsakatseni (Hechos 20:28). Kuinga kui xi mesínile Jeobá nga nda choa̱ katabatío je xi chjotajchínga sʼin tjío. Xi ijngosani, je Jeobá kuenta sijéle je xi chjotajchínga sʼin tjío josʼin skoe̱kon je jtín. Kui xi mele nga ñaki ndasʼin kuiyoaa (Isaías 32:1, 2). Tojosʼin tiʼyaa, jmeni xi síjé Jeobá jotjínnele koa̱nkjoan je xi chjotajchínga sʼin tjío kui bakóná nga nʼio mandosinle xi tʼatsaan.

10, 11. 1) Jósʼin binyakaoná nga chotʼayajiaan jme xi nijéle je xi chjotajchínga sʼin tjío. 2) Jósʼin si̱chjén je testo jña faʼaitʼa jme xi nijéle je xi chjotajchínga sʼin tjío kʼianga kuinyakoaa je xi kjaʼaí.

¹⁰ “Jósʼin koa̱nchjénna jebi”. Kʼiatsa chjotajchínga sʼin tiyoaa, koaan sakʼoa chótʼayá ijngokʼá jme xi síjéle Jeobá je xi chjotajchínga sʼin tjío kʼoa kʼoénelee yaoná nga koa̱nndayasaa. Kʼoa tsa tsín chjotajchínga sʼin tiyoaa tonga tsa mená nga kui koaan, kʼoénelee yaoná nga si̱tjosoán jmeni xi síjé Jeobá ánni nga kuichotjenngisíñá kjoanda jebi (1 Timoteo 3:1). Tonga machjénná ngatsʼiaa jme xi nijéle je xi chjotajchínga sʼin tjío. Tobʼelañá, je Jeobá kui xi mele nga ndʼé koaan kʼoa nga koa̱nná si̱kjaʼaitsjeen (Filipenses 4:5; 1 Pedro 4:7, TNM). Kʼianga nda choa̱ batío je xi chjotajchínga sʼin tjío, je ndsʼee koaitjenngi choa̱le kʼoa skénngi kjoamakjainle (Hebreos 13:7; 1 Pedro 5:3).

¹¹ “Jósʼin sichjén jebi nga koasenkoa xi kjaʼaí”. Koaan si̱chjén je testo jñani faʼaitʼa jme xi nijéle je xi chjotajchínga sʼin tjío nga kʼoakʼuínlee je xi ʼmiyalee Biblia kʼoa kao chjota xi kjaʼaí nga je xi chjotajchínga sʼin tjío alikui mangóson kao xi nyatítjonle relijión xi ngikʼa. Jmeni xi tso testo jebi kʼoati kui tsoyaná jokji nʼio síxá je xi chjotajchínga sʼin tjío. Tsa si̱kjaʼaitsjeen jokji bʼénele yaole nga síxá ngisaa koakolee kjoaxkóntokon (1 Tesalonicenses 5:12). Kʼoa nga koakolee kjoaxkóntokon ngisaa tinda sa̱tíongáni kon nga sixá ya jinjtín (Hebreos 13:17).

12, 13. 1) Jmésani xi koa̱n kjoásjaiyasaa. 2) Jngo choa̱ tʼejnai jmeni xi ʼyaa kʼianga fasjaiyasaa jme xi tso je Biblia.

¹² Kjoásjaiyasaa. Kʼianga kʼoéxkiaa je Biblia koaan kjoásjaiyaa jebi:

• ʼYáni xi kiski jebi.

• Jñáni kʼoa kʼiáni kichji.

• Jméni xi koan kʼianga kichji libro jebi.

Tsa kʼoasʼin kjoásjaiyaa koa̱nsjainá kjoafaʼaitsjen xi tsín ngotjo masjaininá.

¹³ Jngola choa̱ kataʼyaa. Ya Ezequiel 14:13, 14, je Jeobá kʼoakitso kʼiatsa jngo naxinandá koa̱njngijée ngixko̱n, sikjeson je naxinandá kao tsojmi xi ma chine xi tjínle kʼoa kao cho̱le. Tonga xijekoan, kʼoakitso nga kuinje̱ngile yaole je Noé, Daniel kao Job tsa yalani tjíojinle, nga̱ chjotakixiní. Kʼiatsa kjoásjaiyasaa xi tʼatsʼe jebi, jchañá nga jaon siento kao tejaola nó tonginile nó 1 kiski Ezequiel én jebi. Ninga jenkjín siento nó tjínle nga kʼien je Noé kao Job nga kichji én jebi, je Jeobá tojo faʼaitsjenle nga kixi koan. Tonga tsakui nichxin sʼa 20 nóle je Daniel kʼianga kichji én jebi. Kʼoa je Jeobá kʼoakitso nga kʼoakji kixi je Daniel jokji kixi koan je Noé kao Job. Jméni xi bakóyaná jebi. Kuinga je Jeobá nʼio bechjí ngatsʼi je choʼndale xi kixi tjíofitʼale ninga je xi sʼa xti (Salmo 148:12-14).

14. 1) Jósʼin binyakao je xi sʼa xti jmeni xi je chjile. 2) Jósʼin binyakao je xi ngikʼa jme xi chjile je xti (chótsenlai sén xi fitsʼiani kjoaʼmiya jebi).

¹⁴ Xi chjile je xi sʼa xti. Tojosʼin jekaʼyaa nʼio tse xi tsoyaná ngatsʼiaa je Biblia. Kʼoati nʼio tse xi tsoyaná ngatsʼiaa ngayeje xo̱n xi  bʼasje naxinandále Niná. Kataʼyala jngojoá choa̱. Je nó xi sʼa tífaʼato, je naxinandále Jeobá nkjín libro kao artículo tíkjile je xi sʼa xti. ^[1] Kjoafaʼaitsjen xi faʼaitʼa xo̱n jebi kui xi binyakao je xti nga tsínkui tsaojin je kjoa xi sʼe ya ndʼiaskuela kʼoa kao kjoa xi faʼatojin nga sʼa xti. Jósʼin kuinyakaoná ngatsʼiaa jmeni xi tso xo̱n jebi. Tsa kʼoéxkiaa jchañá jme kjoa xi faʼatojin xi sʼa xti kʼoa jchañá josʼin kuinyakoaa kʼoa josʼin kʼoainganʼiolee.

15. Ánni nga tjínnenile koa̱nndosinle xi jejchínga jmeni xi chjile je xi sʼa xti.

¹⁵ Xi jejchíngaa alikui koa̱n kʼoasʼin si̱kjaʼaitsjeen nga tsín machjénná nga kui kʼoéxkiaa jmeni xi chjile je xi sʼa xti. Chʼaojin sʼiaan tsa kʼoasʼin si̱kjaʼaitsjeen. Je xi jejchínga kʼoati faʼatojin je kjoa xi síkʼaxki̱ jme xi chjile xi sʼa xti. Tobʼelañá, ngatsʼiñá nga nitoánntje kjoamakjainná, nga chjoexkoá yaoná, nga tsín kʼoaiʼndee nga jme xi kʼoenená xikʼa, nga tsín je si̱miyoaa chjota xi tsín nda sʼín kʼoa nga tsínkui kʼoétsaojinkoaa xi chʼaotjín. Je xo̱n xi chjile xi sʼa xti kʼoati ya Biblia yʼangini. Kuinga machjénsíniná ngatsʼiaa xi chjotale Cristo maa.

16. Jósasʼin binyakaoná je xo̱n xi chjile xi sʼa xti.

¹⁶ Je xo̱n xi chjile je xi sʼa xti binyakao nga ngisa símiyo je Jeobá (tʼexkiai Eclesiastés 12:1, 13). * Tonga kʼoati binyakao xi jejchínga. Tobʼelañá, je rebista ¡Despertad! xi tsʼe abril de 2009 jngo artículo xi tsʼe xti jaʼaitʼa xi “¿Cómo disfrutar la lectura de la Biblia?” ʼmi. Artículo jebi nkjín koya kjoafaʼaitsjen kitsjoa josʼin koa̱n chótʼaya Biblia kʼoa jngo rekuadro jaʼaitʼa xi ma bichá xi koasenkaoná nga chótʼayá. A tsakinyakao xi jejchínga kjoafaʼaitsjen jebi. Jaon. Jngo chjoón xi jechixan kʼoa xi jetjínle xti kʼoakitso nga ñʼai male nga bʼéxkia je Biblia tsakai, tonga nga kitjenngi kjoafaʼaitsjen xi jaʼaitʼa artículo jebi nʼio tsakasenkao. Ndʼaibi be josʼin mangóson jme xi tínchja̱ni je librole Biblia kʼoa kao kjoatsjoa bʼéxkia. Kʼoa itso: “Nisa ñandiajinla nga kʼoasikji tsjoake̱ koan nga tsakʼexkia Biblia”.

17, 18. Jngola koya kʼoasi jósʼin basenkaoná jmeni xi chjile je xi tsín testigole Jeobá ma.

¹⁷ Xi chjile je xi tsín testigole Jeobá ma. Kʼianga nó 2008 kʼiaa kitsʼiani nga kitjo je  Xo̱n xi Bájinkonná xi je ngisa machjénle je testigole Jeobá. Tonga kʼoati jngo rebista bitjo xi je chjile chjota xi tsín testigole Jeobá ma. Jósʼin nga ngisa nda si̱chjén rebista jebi. Tobʼelañá, tsa jngo chjota kʼoakʼuínlee nga katafi kjoajtínná, kʼoa tsa koai chjota jebi nʼiojin tsjoa sʼe̱ tokoán. Kʼoa kʼianga tífaʼa je kjoanokjoaya koaan si̱kjaʼaitsjeen jótjín kon je chjota xi tosʼa kafichó kʼoa jósʼin koasenkao je kjoanokjoaya xi tífaʼa nga sikʼantjaiya yaole. Tsa kʼoasʼiaan ngisaa kʼoee kjoanda tʼatsʼe jmeni xi ʼmiyaná kʼianga faʼa kjoanokjoaya.

¹⁸ Tsakui nichxin kʼoati sʼe tokoán kʼianga bʼexkiaa je xo̱n xi je chjile xi tsín testigole Jeobá ma. Tosi̱kjaʼaitsjenla jme xi faʼaitʼa La Atalaya xi je chjile kʼoa kao jme xi satíotʼa ya jw.org. Kjoaʼmiya jebi ngotjo majinniná nga̱ je chjile je xi tsín testigole Jeobá ma. Kʼianga bʼexkiaa ngisaa nda majinná jme xi tsoya Biblia kʼoa ngisaa matsjoachaa. Kʼoati masaná josʼin chjakoaa chjota kʼianga ʼmiyasoán. Kʼoa je rebista ¡Despertad! kʼoati basenkaoná nga ngisa mataja kjoamakjainná kʼianga tíjna je Niná kʼoa nga je kisinda jmeni xi tjín. Kʼoati tsoyaná josʼin kʼuínyaa jmeni xi makjainná (tʼexkiai 1 Pedro 3:15). *

19. Jósʼin koakoá nga bʼailee kjoanda je Jeobá tʼatsʼe ngayeje kjoankjíntokon xi títsjoáná.

¹⁹ Tojosʼin tiʼyaa, je Jeobá nʼio tse kjoankjíntokon títsjoáná xi basenkaoná (Mateo 5:3, TNM). Kuinga tosi tonda kʼoéxkiasíñá kʼoa si̱chjén kjoafaʼaitsjen xi títsjoáná. Tsa kʼoasʼiaan, nda kuiyoaa kʼoa koakolee je Jeobá nga bʼailee kjoanda tʼatsʼe ngayeje kjoankjíntokon xi títsjoáná (Isaías 48:17).