JE DANIEL KAO MÍRIAM kʼiaa chixan nga sá septiembre nó 2000 kʼoa nʼio ndasʼin tsakatio ya naxinandá Barcelona (España). Je Daniel itso: “Yaa mangínkichijin ya restaurant nga̱ nda njenajin tao̱n, kʼoa nda kjoan najño xi nichjainjin kʼoa mangínníjin jñani xin naxinandá. Kʼoa kjitʼaa bakoyasuinjin”. Tonga jmé xi kisʼin ndsʼee jebi nga koanskanni.

Kʼianga kisʼejna kjoajtíntse nga nó 2006, je Daniel kʼoatso nga ñaki kichokajin ni̱ma̱le jngo kjoanokjoaya xi itso xi kiskonangi: “A tibʼenelee yaoná nga tibinyakoaa je chjota nga ya katafiya je ndiaa xi tsʼe kjoabijnachon xi tsínkʼia fetʼa” (Proverbios 24:11). Je kjoanokjoaya jebi kui kitsoya nga tjínnele kʼuínyalee Énle Niná je chjota, nga̱ kuitjontjaile yaole tsa kjuinrʼoé (Hechos 20:26, 27). Je Daniel itso: “Joxi an xokitsona Jeobá koanna”. Je kjoanokjoaya kʼoati kui kinchja̱ni nga ngisa tsjoa sʼe tokoán nga Jeobá nixálee. Je Daniel be nga ñaki kʼoatjín jebi, nga̱ je Míriam tokʼoa jeprecursora sʼin tísíxá kʼoa nʼio tsjoa tjín kon.

Je kjoanokjoaya jebi nʼio tsakasenkao je Daniel. Kʼoa kʼoasʼin kisikjaʼaitsjen nga jekicho choa̱le nga ngisasa nda sixále je Jeobá. Ngisaa choa ora kisixá xi tsʼe xá, precursor koan, kʼoa kui kisikjaʼaitsjen jokji tsjoa sa̱tío kon kʼiatsa ya koaitsjoánganʼio jñani ngisa machjén je xi tsoyason Énle Niná.

Kʼianga sá mayo nó 2007, je Daniel kao Míriam kisikatío xále kʼoa yaa Panamá ki. Tokʼoa jebexkon naxinandá jebi. Yaa kitsoyason ʼnde xi tjíojin nandá jña Bocas del Toro ʼmi ya jñani kijna je ndáchikon Caribe. Je chjota xi ya tjín jéní xi én ngäbere nchja̱. Je Daniel kao Míriam kʼoasʼin kisikjaʼaitsjen nga jinla sá koa̱nsonile je tao̱n xi yʼa nga koatio ya Panamá.

Nga ki ya ʼnde xi tjíojin nandá, chitso kisichjén kao bicicleta. Tojo faʼaitsjenle nga tokʼia kikao títjon je bicicleta nga 30 kilómetro kjin kimijon je nindo, kʼoa nʼio sjeya nga kui nichxin. Je Daniel tome koanʼinda nga̱ nʼio kijtale. Tonga je chjota xi ya tsʼe xi tsabexkon, nda chjota kʼoa nda kiskoeya, ngisaa kʼianga tsabe nga je Daniel kao Míriam koan kʼale én ngäbere. Tochoatsee jaʼato nga 23 koanni chjota xi kitsjoale estudio.

Jókoan kʼianga jeya tao̱n xi yʼa. Je Daniel itso: “Kinroajen ndáxkuinjin nga kui kinikjaʼaitsjainjin nga koanngínnijin ya España. Ba koannajin nga si̱katuíjin je chjota xi bʼailaijin estudio”. Tonga xi jejaʼato jngo sá, nʼio tsjoa tsakʼé kon jmeni xi tsakʼinle. Je Míriam itso: “Kʼoatsakʼinnajin nga precursor especial sʼin si̱xáijin. Nʼio tsjoa kisatio tokuinjin nga tojo ya kuiyuijin ya ʼnde jebi”.

Kʼianga tsʼantjaiyajin josʼin kjimaxá ya jinnaxinandále Niná, je Daniel kao Míriam likui tiprecursor especial sʼin kisixáni nga nó 2015. Jméni xi kisʼin. Kui kuenta kisʼin jmeni xi tso Salmo 37:5: “Je Jeobá tintsjai je ndiaali, kʼoa je tinʼiotʼai yaoli, kʼoa je koasenkaoli”. Kisokole jngo xá xi kitsjoaʼndele nga precursor regular sʼin kisixá, kʼoa ndʼaibi yaa tjíotsjoánganʼio ya jtín xi tijna ya Veraguas (Panamá).

Je Daniel itso: “Nga kjesa bitjojinjin ya España, to jao kisʼenajin tsa kʼoakoa̱nnajin nga tochoa tsojmi sʼe̱najin. Ndʼaibi kʼoasʼin tiyuijin kʼoa alikui jme xi chanajin”. Jméni xi nʼio tsjoa tjíobatío kon. Itso: “Nga binyakoaa je chjota xi tjínle kjoanangitokon nga bexkon Jeobá, alikui jme xi mangóson jokji tsjoa sʼe tokoán”.