1, 2. 1) Jmé tʼatsʼe xi tsakjákaonajmíni Jesús je chjotatjenngile tongini nga kje nikʼienjin (chótsenlai sén xi faʼaitʼa ibi). 2) Ánni machjénsíni nga koa̱njinná ánni nga ʼmiyasonñá. 3) Jmé xi chótʼayajiaan i̱ kjoaʼmiya jebi.

NITJE̱N nga tojeme ni̱kʼien je Jesús tsee tsakjákaonajmí je pastrole. Kʼoakitsole nga nʼio tsjoake. Kʼoa tojonásʼin kichotʼayá ya kjoaʼmiya xi jejaʼato, kʼianga xka̱totsee kisingósonkao yaole je Jesús kui xi koanmele nga kisinʼiojin je chjotale nga tosi tonda katatsoyason xi tʼatsʼe Chjotaxále Niná (Juan 15:8).

² Tonga je Jesús ali tsa tokuijin xi kitsole je chjotale jmeni xi sʼin, kʼoati kitsole ánni nga tjínnenile kʼoasʼinni. Kitsoyale ánni nga tjínnenile tosi tonda kuitsoyason. Kʼoati machjén nga si̱kjaʼaitsjenjiaan tsanda ñá xi tʼatsʼe jebi, nga̱ kui xi koasenkaoná nga tosi tonda kʼuínyasonlee “ngatsʼi naxinandá” (Mat. 24:13, 14). Kuinga ño koya tjínni xi chótʼayajiaan jotso je Biblia tʼatsʼe nga ʼmiyasoán. Kʼoati ño koya jchaa tʼatsʼe jósʼin basenkaoná je Jeobá nga tosi tonda kʼuínyasoán.

3. 1) Tojo tso ya Juan 15:8, ánni nga ʼmiyasonñá. 2) Jmé xi tsoyanile totsee xi kinchja̱ni je Jesús.

³ Je xi ngisa nʼio chjíle anni nga ʼmiyasonñá kuinga kʼoasʼin chʼasjejeyaa kʼoa chʼasjetsjee je jaʼaínle Jeobá (tʼexkiai Juan  15:1, 8). * Je Jesús yaa kisingósonkao je Nʼaile jngo chjota xi tsojmintje síkuinda. Kʼoa je Jesús yaa kisingósonkao yaole je yáje xi tsʼe xka̱totsee kʼoa kʼoakitso nga je yántsja jé chjotatjenngile tsoyanile (Juan 15:5). Kʼoa je totsee kui tsoyanile nga tsoyason Énle Niná je chjotale Cristo. Je Jesús i kitsole je pastrole: “Kʼoasʼin bʼasjejeya Nʼaina, nga kʼoasʼin tonkjín to koa̱no”. Kʼianga ndakjoan to bale je xka̱totsee jé xi síkuinda nda bitjo. Tikʼoasʼinni, kʼianga bʼenelee yaoná jokji tjen kʼoamaná nga ʼmiyasoán je Énle Niná, jé Jeobá bitjongʼa (Mat. 25:20-23).

4. 1) Jósʼin chʼasjetsjee je jaʼaínle Niná. 2) Jósʼe tokuin nga kui kjoanda tjínli nga chʼasjetsjai je jaʼaínle Niná.

⁴ Kʼianga ʼmiyasoán kʼoasʼin chʼasjetsjeñá je jaʼaínle Niná. Je profeta Isaías itso xi kiski: “Je Jeobá xi tsʼe chjotakjoajchán... jéní xi tjínnele tsje sʼin jchatokon” (Is. 8:13). Chʼasjetsjeñá je jaʼaínle Niná kʼianga ngisa ngʼa nikʼéjnaa tikʼoajinni tojme jaʼaínni kʼoa nga ʼmiyalee xi kjaʼaí chjota nga katamajinle nga nʼio tsje sʼin tíjna je jaʼaínle Jeobá (Mat. 6:9). Tobʼelañá, kʼianga kui nokjoañá tʼatsʼe jokjoan je Jeobá kʼoa tʼatsʼe jmeni xi tjínndajinle kao chjotasonʼnde, jé Niná bʼainganʼiolee kʼoa kʼoasʼin bakoñá nga to énndiso jmeni xi tso je Na̱i (Gén. 3:1-5). Kʼoati chʼasjetsjee je jaʼaínle kʼianga ʼmiyalee je chjota nga toje Jeobá xi bakinle nga kuitjojeya, nga xkón kataʼya, kʼoa nga sʼe̱le nganʼio (Apoc. 4:11). Je Rune, xi 16 nó nga precursor sʼin tísíxá itso: “Tsjoaña kjoanda nga i̱ tijnajinle je naxinandále Jeobá kʼoa nga testigole ma. Kui xi basenkaona nga tosi tonda xinyasoan”.

5. 1) Tojo tso ya Juan 15:9, 10, ánni nga ʼmiyasonñá. 2) Jókitso je Jesús tʼatsʼe nga machjénná je kjoaka.

⁵ (Tʼexkiai Juan 15:9, 10). * Xi majaoni koya anni nga ʼmiyasonñá kuinga tsjoachaa je Jeobá kao Jesús (Mar. 12:30; Juan 14:15). Je Jesús ali tsa tokuijin xi kitsole je chjotatjenngile nga tsjoake katama, kʼoakitsole nga tjínnele koakole kjoatsjoacha ngantsjai. Ánni. Kuinga machjénná je kjoaka kʼianga chjotale Cristo koaan. Kui je kjoaka kisikʼaxki̱ je Jesús kʼianga nkjín kʼa kisichjén je én xi kuiyokaonáo tso, tojosʼin faʼaitʼa ya Juan 15:4-10.

6. Jósʼin bakoá nga mená sʼe̱ná ngantsjai je kjoatsjoachale Cristo.

⁶ Kʼiatsa mená nga sʼe̱ná ngantsjai je kjoatsjoachale Cristo kʼoa mená ndasʼin kuiyoaa ngixko̱n, tjínnele si̱tjosonlee. Kʼoati kui síjéná nga kʼoasʼiaan jmeni xi kisʼin je, kʼianga i̱ kitso: “Joni an nga kisitjosoan je kjoatéxomale Nʼaina, kʼoa tjínna je kjoatsjoachale”. Nʼio nda choa̱ tsakʼéjnaná je Jesús nga kisitjosonle je Nʼaile (Juan 13:15).

7. Ánni kʼoabixónsíñá nga tjínná je kjoatsjoacha kʼianga nitjosoán.

⁷ Kʼianga nitjosoán kʼoasʼin bakoñá nga tjínná je kjoatsjoacha, kui jebi xi kitso je Jesús kʼianga i̱ kitsole je pastrole: “Je xi tjínle kjoatéxomana, xi síkitjoson kui kjoatéxomabi, jébi xi tsjoakena” (Juan 14:21). Je kjoatéxoma xi kitsjoa je Jesús tʼatsʼe Nʼaile kinroani. Kuinga kʼoatisʼin bakoñá nga tjínná kjoatsjoacha xi kao Niná kʼianga nitjosoán je kjoatéxoma xi  kitsjoa je Jesús kʼianga kʼoakitso nga tjínnele koakoyasoán (Mat. 17:5; Juan 8:28). Kʼianga bakolee kjoatsjoacha, kʼoati tosi tonda tsjoake maná je Jeobá kao Jesús.

8, 9. 1) Xi ijngosani, ánni nga ʼmiyasonñá. 2) Kʼianga tosi tonda kʼuínyasoán, jósʼin basenkaoná jmeni xi tso Ezequiel 3:18, 19 kao 18:23.

⁸ Xi majanni koya anni nga ʼmiyasonñá kuinga mená kjoájinkoaan je chjota tʼatsʼe nichxinle Jeobá. Ya Biblia kʼoatso nga je Noé “kinchja̱ya xi kjoakixi” (tʼexkiai 2 Pedro 2:5). * Kʼianga kitsoyason je Noé, kui tsakájinkon je chjota nga jngo Jtsínʼio kjoaʼaí. Ánni nga kʼoabixónsíñá. Kuinga i̱ kitso je Jesús: “Jo koanchon je nichxinbe tongini je jtsínʼio, nga tjíokjen, tjíoʼbi, tjíobixan, kʼoa tjíosíkixan, saʼnda nga je nichxin nga Noé jaʼasʼen je chitsoyʼai. Chjota likui tsabe [likui kinrʼoé] saʼnda nga jaʼai je jtsínʼiobe xi kikao ngatsʼi. Kʼoatisʼin koa̱nchon kʼia nga kjoaʼaí je ʼndíle chjota” (Mat. 24:38, 39). Ningalani tsín kinrʼoé je chjota, je Noé kitsoyasonle jmeni xi kitsole Jeobá.

⁹ Nichxin xi tiyoaa ndʼaibi, kui tʼatsʼe Chjotaxále Niná ʼmiyasoán kʼianga katabe je chjota jmeni xi tjínndajinle Niná tʼatsʼe chjotasonʼnde. Joni je Jeobá, kʼoati kui xi mená nga katanrʼoé je chjota ánni nga tosi tonda koatiokonni (Ezeq. 18:23). Kʼianga ʼmiyasoán nga xki̱ niʼya kʼoa kao jñani nkjín chjota tjín, ngisaa nkjín chjota fajinkoaan nga je Chjotaxále Niná jeme kjoaʼaxin ngayeje xi chʼaotjín i̱ Sonʼnde (Ezeq. 3:18, 19; Dan. 2:44; Apoc. 14:6, 7).

10. 1) Tojo tso ya Mateo 22:39, ánni nga ʼmiyasonñá. 2) Tʼeyanajmí jósʼin tsakinyakao je Pablo kao Silas jngo chjota xi ndoyá síkuinda.

¹⁰ Xi mañoni koya ánni nga tosi tonda ʼmiyasonñá kuinga tsjoachaa je xíngiaa (Mat. 22:39). Jé kjoatsjoacha xosíkaoná nga tosi tonda ʼmiyasonñá nga̱ ʼyañá nga bʼantjaiyani je kjoafaʼaitsjenle chjota kʼianga kjoa faʼatojin. Tobʼelañá, je chjota xi jtike koan je Pablo kao Silas ndoyá kisikatíoʼya ya naxinandá Filipos. Tonga kʼianga basennitje̱n toxijña jngo cháonnʼio jaʼa xi ñaki kisitinyale je ndoyá, kʼoa kitjoʼai ngayeje xo̱ntjoa ndoyá. Je chjota xi síkuinda je ndoyá koanmele kisikʼien yaole nga̱ kʼoasʼin kisikjaʼaitsjen nga jekitokachjinga je chjota xi ya tjíoʼya. Tonga je Pablo kʼoakitsole nga tsín kʼoakatasʼín. Kʼoa je chjota jebi i kitso: “Jméni xi machjén nga kʼoasʼian nga kuitjontje”. Kʼoa je Pablo kao Silas kitsole: “Katamakjainli tʼatsʼe Nainá Jesucristo, kʼoa kuitjontjainí” (Hech. 16:25-34).

11, 12. 1) Jmé xi bakóyaná jokoan je chjota xi ndoyá síkuinda. 2) Ánni nga meniná tosi tonda kʼuínyasoán.

¹¹ Jmé xi bakóyaná jokoan je chjota xi ndoyá síkuinda. Je chjota jebi kʼiaa kisikʼantjaiya je kjoafaʼaitsjenle kʼoa kisijé nganʼio kʼianga jejaʼa je cháonnʼio.  Kʼoatisʼinni, tsakui nichxin tjínkʼa je chjota xi tsín kinrʼoé ngasʼa je Énle Niná, tonga kʼianga kjoa faʼatojin kʼiaa síkjaʼaitsjen kʼoa síjé nganʼio. Tobʼelañá, tjínkʼa je chjota xi síkinroajen kon kʼianga sícha je xále, tsa tsjion xínkjín, tsa jngo chʼin katʼale, kʼoa tsa kʼiaje̱ nga jngo xínkjín biya. Kʼianga kui kjoa faʼatojin je chjota mele skoe̱ ánni nga kʼoamani. Tsakui nichxin kʼoati i̱ tso: “Jméni xi machjén nga kʼoasʼian nga kuitjontje”. Kʼoa nrʼoé je Énle Niná kʼianga satéjiaan nga tiʼmiyasoán.

¹² Kʼiatsa tosi tonda kʼuínyasoán, koaan kuinyakoaa je chjota xi mele kjuinrʼoé je Énle Niná (Is. 61:1). Jngo tichjaa xi Charlotte ʼmi, xi 38 nó nga precursora sʼin tísíxá, itso: “Je chjota alikui tibeni josʼin. Machjénle nga kjuinrʼoé je Énle Niná”. Kʼoa ijngo tichjaa xi Ejvor ʼmi, xi 34 nó nga precursora sʼin tísíxá, itso: “Nichxin xi tiyoaa ndʼaibi, nʼio nkjín chjota xi síkinroajen kon. Kʼoa nga mena koasenkoa, kuinga xinyasonña”. Kʼianga tsjoachaa je xíngiaa kui xosíkaoná nga tosi tonda ʼmiyasonñá.

13, 14. 1) Jmé kjoatjao xi nchja̱ni ya Juan 15:11. 2) Jósʼin koa̱n sʼe̱ná je kjoatsjoa xi tjínle je Jesús. 3) Jósʼin basenkaoná je kjoatsjoa kʼianga ʼmiyasoán.

¹³ Nitje̱n nga tojeme ni̱kʼien je Jesús i̱ Sonʼnde, kʼoakitsole je pastrole nga nkjín kjoatjao tsjoále je Jeobá xi kuinyakao nga tosi tonda kuitsoyason. Jñánile je kjoatjao jebi, kʼoa jósʼin binyakaoná.

¹⁴ Je kjoatsjoa. A ai tíjna kʼianga ʼmiyasoán. Mai. Kʼianga jekinchja̱ni xi tʼatsʼe xka̱totsee, kʼoakitso nga kʼoati tsjoa sa̱tío tokoán joni je kʼiatsa kʼuínyasoán énnda chjotse xi tʼatsʼe Chjotaxále Niná (tʼexkiai Juan 15:11). * Tojosʼin jetsaʼyaa, je Jesús yaa kisingósonkao yaole je yáje xi tsʼe xka̱totsee kʼoa kʼoakitso nga je yántsja jé chjotatjenngile tsoyanile. Tojo ma jngo yá, jé yájele xi tsjoánganʼiole je yántsja. Kʼoatisʼinni tsanda ñá, tsjoa sʼe̱ tokoán joni je Jesús kʼiatsa si̱tjosoán josʼin mele je Jeobá, tonga tokʼiaa tsa kʼoasʼin kjuintjenngiaa josʼin bándiaaná je Jesús kʼoa kjuintjenngiaa je choa̱le (Juan 4:34; 17:13; 1 Ped. 2:21). Jngo tichjaa xi Hanne ʼmi, xi jetsʼato 40 nó nga precursora sʼin tísíxá itso: “Je kjoatsjoa xi sʼena nga xinyasoan kui xi basenkaona nga tosi tonda sixále je Jeobá”. Tojo tso tichjaa jebi, nga tsjoa sʼe tokoán kui xi basenkaoná nga tosi tonda ʼmiyasoán ninga sakʼoa tsín kjuinrʼoéná je chjota (Mat. 5:10-12).

15. 1) Jmé kjoatjao xi nchja̱ni ya Juan 14:27. 2) Jósʼin basenkaoná je kjoanyʼán nga tosi tonda kʼuínyasoán.

¹⁵ Je kjoanyʼán (tʼexkiai Juan 14:27). * Kʼianga tikuini nitje̱n nga tojeme ni̱kʼien je Jesús, i kitsole je pastrole: “Josʼin nga nyʼán tijna, kʼoasʼin tsjoano”. Jósʼin basenkaoná je kjoanyʼán xi tsjoá je Jesús nga tosi tonda ʼmiyasoán. Kʼianga chókjoajinná nga ʼmiyasoán, kʼoasʼin ʼyañá nga je Jeobá kao Jesús binyakaoná. Kʼoa kui xi nyʼán bʼé tokoán (Sal. 149:4; Rom. 5:3, 4; Col. 3:15). Jngo ndsʼee xi Ulf ʼmi, xi 45 nó nga precursor sʼin tísíxá, itso: “Nʼio bijtana kʼianga jefaʼai̱ña nga fixinyasoan, tonga kui xá jebi xi nʼio tsjoa bʼé tokoan”. Bʼaiñá kjoanda nga koa̱n sʼe̱ná je kjoanyʼán ngantsjai.

16. 1) Jmé kjoatjao xi nchja̱ni ya Juan 15:15. 2) Jmé xi tjínnele kisʼin je pastro nga tosi tonda miyole koanni je Jesús.

 ¹⁶ Je kjoamiyo xi tjínná kao Jesús. Kʼianga jekʼoakitsole je pastrole Jesús nga katasʼele je kjoatsjoa, kʼoati kitsole jokji chjíle nga kao kjoatsjoa binyakoaa xi kjaʼaí (Juan 15:11-13). Kʼoa xi koanskanni, i kitsole: “Tonga miyona kixinno”. Nʼio tseni kjoanda kʼianga miyole Jesús maa. Tonga jmé xi tjínnele kisʼin je pastrole Jesús kʼianga tosi tonda miyole koanni. Tjínnele tosi tonda kitsoyason je Énle Niná (tʼexkiai Juan 15:14, 15). * Jaola nó tongini, kui kʼoakitsole je pastrole jmeni xi tjínnele kuitsoyason, i kitsole: “Je kjoatéxomale ngʼajmi jenroa machrian” (Mat. 10:7). Nitje̱n nga tojeme ni̱kʼien je Jesús kisinʼio kon je pastrole nga tosi tonda kuitsoyason (Mat. 24:13; Mar. 3:14). Ningalani tsín choa ñʼai tíjna nga kuitjosonle jmeni xi kitso je Jesús, koaanle kʼoasʼin ánni nga tosi tonda miyole koa̱nni je Jesús. Kʼoa ijngosa kjoatjao kitsjoale je Jeobá xi tsakinyakao.

17, 18. 1) Jmé kjoatjao xi nchja̱ni ya Juan 15:16. 2) Jósʼin tsakinyakao kjoatjao jebi je chjotatjenngile Jesús. 3) Jñánile je kjoatjao xi tʼatsʼe Jeobá nroani xi binyakaoná ndʼaibi.

¹⁷ Nrʼoéná je Niná kʼianga bʼetsʼoalee. Je Jesús kʼoakitsole je chjotatjenngile nga tsjoále je Jeobá jmeni xi sijéle kʼiatsa kao jaʼaínle Jesús sijéni (Juan 15:16). Nʼiojin kisinʼio kon je én jebi. * Nga kʼia tojeme ni̱kʼien je Jesús, tonga tosi tonda kʼoainganʼiole je chjotatjenngile. Kʼianga sijéle Jeobá je nganʼio nga kuitsoyason tʼatsʼe je Chjotaxále, kjuinrʼoéle je kjoabʼetsʼoale. Kʼoa to choaa nichxin jaʼato kʼianga tsabe josʼin kitjoson jmeni xi kisijéle je Jeobá (Hech. 4:29, 31).

¹⁸ Nichxin xi tiyoaa ndʼaibi, kʼiatsa tosi tonda kʼuínyasoán tosi tonda miyole Jesús koaan. Xi ijngosani, je Jeobá koasenkaoná kʼianga si̱jéle nganʼio kʼiatsa jmeni xi ñʼai koa̱nná nga kʼuínyasoán (2 Cor. 4:7). Bʼailee kjoanda je Jeobá nga nrʼoéná kʼianga bʼetsʼoalee kʼoa nga miyoná mani je Jesús. Kui jebi xi binyakaoná nga tosi tonda ʼmiyasoán (Sant. 1:17).

19. 1) Ánni nga tosi tonda ʼmiyasonsíñá. 2) Jmé xi koasenkaoná nga kuitjosonná je xá xi tsakánená je Niná.

¹⁹ I̱ kjoaʼmiya jebi, ño koya kaʼyaa ánni nga ʼmiyasonsíñá: kuinga chʼasjejeyaa kʼoa chʼasjetsjee je jaʼaínle Jeobá, kuinga kʼoasʼin bakoñá nga tsjoachaa je Jeobá kao Jesús, kuinga fajinkoaan je chjota, kʼoa kʼoasʼin bakoñá nga tsjoachaa je xíngiaa. Kʼoati kaʼyaa tʼatsʼe kjoatjao xi tsjoáná je Jeobá, jolani je kjoatsjoa, kjoanyʼán, kjoamiyo xi tjínná kao Jesús, kʼoa nga nrʼoéná je Jeobá kʼianga bʼetsʼoalee. Je kjoatjao jebi kui xi koasenkaoná nga tosi tonda kʼoasʼiaan je xále Niná. Je Jeobá nʼio tsjoa sʼe kon kʼianga be jokji bʼenelee yaoná nga tosi tonda ʼmiyasoán.