JOKJITSE nga kia je skuela alikui nʼio nkjín koya jmeni xi tsʼantjaiya. Je xi ñatjen kichotʼayaijin nga tosʼa kʼia skuela tojo ñatjen jetʼanajin. Me tongatsʼi nga ʼyaijin je jaʼaínle xi ya tsʼe ʼnde jñani tsʼan.

Ya ndai Liberty granja kisatio kʼoa kʼoati najmé kisʼentje. Kʼianga kitsian, je pana yaa tísíxále jngo chjota xi granja tjínle. Kʼianga sʼa xtia, koanna kisixákoa je tractor kʼoa koansana je xi kjaʼaí xá.

Kʼianga kitsian, je mana 35 nóle kʼoa je pana 56 nóle. Ninga kʼoalani, nʼio taja koan, kʼoa alikui jme chʼin kisʼele. Nʼio kisixá kʼoa kʼoati kitsoyale je xtile nga kʼoati chjotanixá katama. Ningalani tsín nʼio tse tao̱n kinjele, alikuikʼia kichanajin jmeni xi kichinaijin, jñani tsakiyuijin kʼoa jmeni xi kichʼakjáijin. Alikuikʼia kitsjionkonnajin. Je pana 93 nóle nga kʼien, kʼoa je mana 86 nóle nga kʼien. Alikui je Jeobá kisixále je xijchána. Tonga jngo tindsʼe xi chjotajchínga sʼin tíjna saʼnda tjen nó 1972.

Je mana nʼio koanndosinle xi tʼatsʼe relijión, kʼoa ntsjaintsjai kikaonajin ya yo̱ngo̱ bautista  kʼianga taingo. Kʼianga 12 nóna, kinrʼoele nga kui kinokjoani tʼatsʼe Trinidad, kʼoa itso xi kiskonangile je mana: “Jókoa̱nnile nga tijeni je Jesús je ʼNdí kʼoa kao je Nʼai”. Faʼaitsjenna nga i̱ kitsona: “Alikui ʼya xi be, ʼndípa. Alikuijin koa̱njinná”. Kʼoa alikui koanjin kjoaixina xi tʼatsʼe jebi. Tonga tojo kisʼe̱nngindáña nga 14 nóna, ya jñani tíjna jngo xo̱ngá, kʼoa jan kʼa kichanisʼenngindána, jngokʼa xi tʼatsʼe Nʼai, jngokʼa xi tʼatsʼe ʼNdí kʼoa jngokʼa xi tʼatsʼe nganʼiotsje.

Kʼianga tsakʼamje secundaria, jngo ti miyona xi boxeador ma, kʼoakitsona nga kʼoati kui katama tsanda an. Kuinga ya kiña ya Golden Gloves, jngo jtín xi tsoya tʼatsʼe boxeo. Alikui nanda koanna kisʼian boxear, kuinga tosa tokisikʼéjnaña. Xijekoan, yaa tsakatejnajinle sondado xi tsʼe Estados Unidos kʼoa yaa kikaona ya Alemania. Kʼoa nga jeya tijna, je xi nyatítjon kʼoakitsona nga jngo skuela sikasénna nga koa̱n an koasentítjonle je sondado. Kui xi koanmele nga nʼio nda sondado koa̱nña. Tonga nga tsín koanndosinna, to jao nó kiskotʼaya ya skuela jñani kinikasénna kʼoa kitjoña nga jekoanni kʼianga nó 1956. Tonga xijekoanni, yaa tsakatejnajinle jngo jtín xi tsín mangóson kao je jtínle sondado.

Nga kjesa ʼbejian je Énle Niná, alikuini kʼoatjín josʼin sikjaʼaitsjen tʼatsʼe jngo chjota xi ñaki xʼin ʼmile. Kui kiña josʼín jngo xi xʼin ʼmile kʼianga kiskotsenle je pelíkula kʼoa kao jotso je chjota. Kʼoa kʼoasʼin kisikjaʼaitsjen nga tsín nʼio xʼin je xi Biblia tsoyason. Tonga tsʼantjaiyaa je kjoafaʼaitsjenna nga jekoanni. Ñandia kʼianga tijnaya je karrona, jao xtiyánchjín kisitiʼndana. Jéní je xtiyánchjín ndichja je xʼinle tsoti tichja. Kʼoa testigole Jeobá nga jao. Jesa kitsjoana nga títjon je Xo̱n xi Bájinkonná kao ¡Despertad!, tonga kʼoasʼin kisikjaʼaitsjen nga nʼio ñʼai faʼai jmeni xi tso je Xo̱n xi Bájinkonná. Tonga nga kʼia, kʼoakitsona nga kjuía je kjoajtín Nga chotʼaya Biblia, yaa ndʼiale sʼejna je kjoajtín jebi kʼoa kui chotʼaya je Biblia. Kʼoakixinle nga tosikjaʼaitsjenla. Kʼoakitsona tsa kjoaixi xi kixian. Kʼoa kʼoakixinle nga jaon.

Kʼoakoannina nga kʼoakixian, tonga kiña je kjoajtín xi kisʼejna nga tikuini nichxin. Xi tokʼoakoanna kuinga nʼio be je xi sʼa xtiʼndí xi tʼatsʼe Biblia. Ningalani kikoa je mana ngantsjai ya yo̱ngo̱ alikui jme xi koanjinna. Tonga nga kui nichxin kʼoatsakʼe tokoan nga skotʼayasa, kʼoa kʼoakixian nga koa̱n kʼoaina estudio. Koanjinna nga Jeobá ʼmi je jaʼaínle Niná xi nʼio tjínle nganʼio. Jngo jao nó tongini, kʼianga kiskonangile je mana tʼatsʼe testigole Jeobá, i kitsona: “Jngoo chjotajchínga bʼétsʼoale xi Jeobá ʼmi”. Tonga nga tsakʼinyana je Biblia kitjoʼaingi je xkoan.

Ngotjo kisikʼantjaiyaña josʼin kikoa yaona, nga̱ jekoansjaina je xi kixi. Kʼiaa nga sá marzo nó 1957 kisʼe̱nngindá, kʼoa tosʼaa ñajan sá jaʼato nga ki títjoan je kjoajtín. Alikui tikʼoasʼin kisikjaʼaitsjenña joni ngasʼa. Nʼio tsjoa tjín tokoan kʼianga koanjinna jokjoanni sʼín jngo xi ñaki xʼin ʼmile tojo tso je Biblia. Je Jesús ñaki chjotakixi koan. Ngisaa nʼio taja koan kʼoa ngisaa tse nganʼio kisʼele tikʼoajinni toʼya chjotani. Tonga  alikuikʼia kjoabixkan kijin, tojosʼin nga tongini kinokjoa, tosaa kitsjoaʼnde kʼianga kjoañʼai kinikjaʼá (Is. 53:2, 7). Koanjinna nga jngo xi ñaki chjotale Cristo ma tjínnele “nga ndʼé koa̱n” kao ngatsʼi chjota (2 Tim. 2:24).

Nga jekoan jngo nóni, nga nó 1958, kʼiaa tsakʼetsʼiakoa nga precursor sʼin kisixá. Tonga kisikʼéjnala choatse. ¡Chixanña! Jé Gloria chixankoa, je xi kʼoakitsona nga kia je kjoajtín nga títjon. Alikui kʼoamanina nga je chixankoa, nʼio chjí tsaʼbekoan kʼoa tojo kʼoasʼin ʼbekoan ndʼaibi. Ngisaa nʼio chjíle tikʼoajinni jngo diamante. Kʼoa ndʼaibi jé Gloria kʼoeyanajmí choano xi tʼatsʼe.

“Je xtindsʼe kao xtiyánchjín tichja 16 koanni. Je mana kixi kitʼale je Jeobá kʼoa kʼiaa 14 nóna nga kʼien. Kʼiaa kiskotʼaya Biblia je pana. Nga jekʼien je mana, je pana kikonle je director xi tsʼe ndʼiaskuela kʼoa kʼoakitsole tsa koa̱n nga jngó jngó nichxin koanngínjin je skuela kao je tsoti tichja xi majchínga. Nga jngo xi fi skuela, xi ijngo jé síkuinda xtiʼndíndsʼe kʼoa jé bʼénda tsojmi xi bichinijin nga jefaʼaini nga fisíxá je pana. Je director kitsjoaʼndenajin nga kʼoakinʼiaijin saʼnda nga jetʼale skuela je tsoti tichja. Jao mani je familia xi kitsjoanajin je estudio kʼoa te mani je xtindsʼe kao an xi testigole Jeobá koainjin. Nʼio tsjoake̱ koan nga kixinyasoan ningalani me soana nga kinchja. Tonga je Sam nʼio tíbasenkaona jokji nga tífaʼato je nó”.

Je Gloria kao an kʼiaa chixainjin nga sá febrero nó 1959. Nʼio tsjoa kisatio tokuinjin nga precursor koainjin. Nga kui xi koanmenajin nga ya ni̱xáijin ya oficina xi tíjnatítjon xi tsʼe testigole Jeobá, jngoo solicitud tsakʼendaijin nga sá julio nga ya menajin koanngínnixáijin ya Betel. Jé ndsʼee Simon Kraker tsakjákaonajmínajin. Tonga kʼoakitsonajin nga xi tokʼiala alikui tjíobichósíxá ya Betel xi jechixan. Kui xi koanmenajin ngantsjai nga ya Betel si̱xáijin, tonga nʼio nkjín nó jaʼato nga koan ya kinixáijin.

Kichjilaijin ya oficina xi tíjnatítjon xi tsʼe testigole Jeobá nga kichjonangijin jñáni koa̱n kʼoainganʼiuijin. Kʼoatsakʼinnajin nga koa̱n ya koanngínjin ya Pine Bluff, Arkansas. Nga kʼia, jao mani jtín xi tjío, jngo jñani fi je xi chikon kjoan kʼoa jngo jñani fi je xi jma kjoan yaole. Kʼoa yaa kinikasénnajin jñani fi je xi jma kjoan yaole, kʼoa ya jtín jebi 14 mani je publicador.

Ánni nga xinxin tsakatioxkóni je testigole Jeobá xi kjaʼaí kjaʼaísʼin tsen yaole. Kuinga je kjoatéxoma xi kʼoatso nga tsín koa̱n ya ñatjen koatio je chjota xi kjaʼaí kjaʼaísʼin tsen yaole. Tsa kʼoalani kisʼin tsejin kjoa kichomani. Nkjín ʼnde jñani kui kitsokjonle je ndsʼee nga kuichonixkoa̱ je Ndʼia jñani chotʼayá kʼiatsa ñatjen tsakatiojtín. Kʼoa tjín ʼnde jñani kʼoakoan. Kʼiatsa je testigole Jeobá xi jma kjoan yaole ya kitsoyason jñani chikon kjoan chjota tjín, je policía koan kitsoaa kʼoa tsakui nichxin saʼnda kisikiʼaon. Kuinga kinitjosonnijin jotso je kjoatéxoma, kʼoa kichoyalaijin nga kuicho nichxin nga tsín tikʼoakoanni.

Sakʼoaa ñʼai koannajin nga tsakʼinyasuinjin. Nga ya tsakʼinyasuinjin jñani tjío je chjota xi jma kjoan yaole sakʼoaa toxijña ya bichuijin jñani tjío je ndʼiale xi chikon kjoan yaole. Ngotjo nikjaʼaitsjennijin jonʼiaijin, tsa chja̱kaonajmíjin xi tokjitʼanangi kʼoa tsa maije̱ tosa to kjoanichatʼa si̱jélaijin kʼoa koanngínjin. Kʼoakoan nga kui nichxin.

Nʼio kinixáijin kʼianga tsakijnyiʼaijin yaonajin. Jan dólar machjínajin jñani kinixáijin. Je Gloria yandʼia kisixá kʼoa sakʼoaa kikasenkoa nga ngisa ngotjo jetʼanile je xá xi kisʼin. Je xi tsʼe niʼya tsjoánajin je xi bichinijin. Nga xki̱ xomana, je Gloria yaa yaniʼya kisixá kʼoa an yaa jardín kisixá, ventana kisitsje kʼoa kʼoakisʼian xi kjaʼaísa xá. Nga ya kinixáijin ya ndʼiale chjota xi chikon kjoan, je Gloria yaa yandʼia kisitsjeni je ventana, kʼoa an yaa nditsin kisitsje. Nga bʼajnda nichxin kinixáijin yaa tsjoáninajin xi bichinijin. Tonga je Gloria yaa tsakjen ya yaniʼya, kʼoa an xin tsakje̱n. Tonga alikui kui kiña nga̱ nʼio nda chine je xi bichinijin. Nda chjota je xi kinixálaijin. Ñandia nga gasolina tsakinyalaijin je karro, je  chjota xi tsakinyále gasolina je karro kʼoakixinle tsa koa̱n kjoaʼa baño je Gloria. Tokoanjtile kʼoa i kitsona: “Tíchjoa”.

Tonga kʼoati nʼio tsjoa kisatio tokuinjin nga ya tsakiyokoaijin je ndsʼee. ¡Nʼio tsjoacha koainjin nga tsakʼinyasuinjin! Nga kichuijin ya Pine Bluff, yaa tsangínjin ya ndʼiale je xi chjotajchínga sʼin tíjna xi siervo de congregación koan. Je chjoónle tsín testigole Jeobá ma, kʼoa jé Gloria kitsjoale estudio. Kʼoa an kixinyale je tsotile kʼoa kao xʼinle. Je chjoónle ndsʼee kʼoa kao tsotile jé Jeobá kisixále kʼoa kisʼenngindá.

Kisʼenajin je miyo xi chikon kjoan yaole. Nchjaanajin ya niʼyale nga mangínkichijin, tonga tokʼiaa nga jemanjio ma mangínjin ánni nga tsín ʼya xi beninajin. Je jtín xi Ku Klux Klan ʼmi, xi bʼasjengi je chjota xi kjaʼaísʼin tsen yaole, nʼio tsakatéxoma nga kui nichxin. Ñandia nga jngo chjota tsaʼbe xi nʼio ngʼakon nga tíbʼakjá jngo traje xi chxoa kji, kʼoakji xi tíbʼakjá jokjoan najño xi bʼakjá je chjota xi tjíojinle je Ku Klux Klan. Tonga alikui kui jebi tsakʼéchjoale je ndsʼee nga tsakakó kjoanda. Ñandia kʼianga tsínnajin je tao̱n nga tsangínjin je kjoajtíntse, jngo ndsʼee tsakatse je karronajin kʼoa koan tsangínjin je kjoajtíntse. Kʼoa jngo sá koanskanni kʼianga cha̱nndoá, nʼio sjeya kʼianga jekichonijin nga tsakʼinyasuinjin kʼoa nga jetsakʼaijin estudio. ¡Tokʼoakoannajin nga ya kijna je karro xi tsakatenaijin ya nditsin! Jngo xo̱n kijnatʼa ya cho̱tsínle xi i̱ tso: “Titsjoanino je karrono. Jngoo kjoatjao titsjoano. Je ndsʼao”.

Ijngosa kjoanda kisakona xi kʼoati tokʼoakoanna. Kʼianga nó 1962, kʼoatsakʼinna nga ya kjuía je Skuela jña nichjine je ndsʼee xi xá kjinele. Je skuela jebi yaa South Lansing, Nueva York kisʼejna. Je skuela jebi jngo sá kisʼejna, kʼoa jé kisakoyale superintendente xi tsʼe circuito, superintendente xi tsʼe distrito kao ndsʼee xi xá kjinele ya jinjtín. Tonga nga kʼia, tsínna xá kʼoa to choaa mani je tao̱n tíjnanajin. Kʼoa jeya tsakajngixá jñani teléfono saténa ya Pine Bluff. Kʼoa tsa yalani sixá tosʼaa an xi ya sixá títjoán xi kjaʼaísʼin tsen yaole. Kʼoatsakʼinna nga kʼoaixána, kʼoa nga tsínna tao̱n xi kjuíña ya Nueva York, kisikjaʼaitsjenña tsa tosa skoe je xá xi tíbʼaina kʼoa tsín kjuía je skuela. Kʼianga tojeme kjia jngo karta xi sikasén nga kʼoaxián nga tsín kʼoakoa̱nna kjuía je skuela, tjín xi koan xi tsínkʼia chajinna.

Jngo tichjaa xi tsín testigole Jeobá je xʼinle, ñandia kʼianga tanjio kicho ya niʼyanajin kʼoa jngo sobre kitsjoana xi tao̱n nya. Kʼoakitsona nga je kʼoa kao xtiʼndíle nga tanjio tanjio binyatje̱n nga fisíxá jñani majchá je algodón. Kʼoakitsona nga koa̱n kjuíña ya Nueva York je tao̱n xi kitsjoana. Je tichjaa i kitsona: “Tʼin je skuela, nʼio tse xi katamali, kʼoa nga jekjoaʼaini, kʼia tʼinyanáijin jmeni xi sa̱kóyali”. Xijekoan, kiskonangiña ya jñani jetsakʼaixána tsa koa̱n nga aon xomana  koa̱nskanni kjuísixá, tonga kʼoatsakʼinna nga tsín koa̱n. Tonga tojo jekʼoatjín tokoan nga kjuía je skuela. Nʼio tsjoa tjín tokoan nga tsín kiskoe je xá jebi.

Jé Gloria kʼoeyanajmí ndʼaibi tʼatsʼe josʼin tsakiyuijin ya Pine Bluff: “Nʼio koantsjoake̱ je ʼnde jebi. Je chjota xi kitsjoale estudio tsa 15 kʼoa tsa 20 koanni. Nga tanjio xki̱ niʼya tsakʼinyasuinjin, kʼoa nga jemani kʼiaa bʼailaijin estudio je chjota. Sakʼoaa las 11 nga jemanjio fetʼanajin. ¡Nʼio tsjoa kisʼe tokuinjin nga tsakʼinyasuinjin! Koanmena nga ya tsakatejna ngantsjai, kʼoa tosaa ya koanmena tsakatejna tsakai tikʼoajinni nga xá xi tsʼe circuito kinʼiaijin. Tonga je Jeobá alikui kʼoasʼin kisikjaʼaitsjen”. Kʼoatjín kjoaixi.

Kʼianga precursor sʼin kinixáijin ya Pine Bluff, tsakʼendaníjin je solicitud xi tsʼe precursor especial. Alikui jao kisatio tokuinjin nga kʼoasʼin si̱xáijin nga̱ je superintendente xi tsʼe distrito koanmele nga precursor especial sʼin si̱xáijin nga kʼoainganʼiuijin ya Texas. Nʼio koanmenajin nga kʼoasʼin si̱xáijin. Tsee kichoyaijin, kʼoa tsín jme xo̱n kichonajin. Tonga nga koanskanni, kʼianga sá enero nó 1965, kʼiaa kichonajin jngo xo̱n xi kʼoatso nga viajante koai̱njin. Kʼoati kʼia superintendente xi tsʼe circuito koan je ndsʼee Leon Weaver, xi coordinador sʼin tíjnale ndʼaibi je Comité xi tsʼe Sucursal ya Estados Unidos.

Kitsokjonle nga superintendente xi tsʼe circuito koa̱n. Jngola nó tongini, je superintendente xi tsʼe distrito, je ndsʼee James Thompson, hijo, kuenta kisʼin josʼin tisixá. Kʼoakitsona jñani koa̱n sindayasa yaona nga ndasʼin sitjosoan nga superintendente xi tsʼe circuito koa̱n. Kʼoa jmeni xi kitsona nʼio tsakasenkaona kʼianga superintendente sʼin jetisixá. Kʼianga jetsakʼaina xá xi tsʼe viajante, je superintendente xi tsʼe distrito xi kichosíxatʼanajin jé ndsʼee Thompson. Nʼio tse xi kitsoyana je ndsʼee jebi, kʼoa nʼio nda kisixále Niná.

Nga kui nichxin, alikui nʼio tse jmeni xi sakóyale je superintendente xi tsʼe circuito. Jngo xomana kʼianga tokiskotsenle jósʼin jngo superintendente kʼianga síxatʼa jngo jtín, kʼoa xijekoanni, sajé kikaongána nga kisixatʼa jngo jtín kʼoa kitsjoa kʼana je kjoafaʼaitsjen. Xijekoanni, tojin tsakiyuijin. Faʼaitsjenna nga i̱ kixinle je Gloria: “A tjínnele jekoai kjoaixi”. Nga koanskanni, koanjinna nga sʼe̱ntsjai je ndsʼee xi kuinyakaoná kʼiatsa ñá xi kʼoaiʼndelee nga kuinyakaoná. Tojo faʼaitsjenna josʼin tsakinyakaona je ndsʼee James Brown, xi viajante koan kʼoa kao Fred Rusk, xi betelita koan.

 Nga kui nichxin nʼio tsakʼasjengi je xínkjín chjota xi kjaʼaí kjaʼaísʼin tsen yaole. Ñandia kʼianga jngo marcha tsakʼéjna je Ku Klux Klan ya naxinandá xi tinixatʼaijin ya Tennessee. Kʼoati faʼaitsjenna kʼianga tiʼmiyasuinjin kao je ndsʼee, yaa tsangínjin jñani tíjna jngo restaurante nga tsakichijin. Kʼianga kia baño, jngo chjota kitjenngina xi tsín ndakjoan najño yʼakjá kʼoa xi tatuaje tjíotʼale. Tonga jngo ndsʼee xi chikon kji kʼoati kitjennginajin, xi ngisa ngʼa kji kʼoa xi ngisa taja joni je chjota jebi. Je ndsʼee i kitsona: “A tokʼoandani ndsʼe Herd”. Kʼoa je chjota jebi tokitjoni, saʼnda tsínni jaʼa baño. Jokji nga tífaʼato je nó, tiʼbeña nga tsínkui nga kjaʼaí kjaʼaísʼin tsen yaole je chjota nga bʼasjengini xínkjín, kuinga kʼoamani nga kui kichʼá je jée xi tsakajngi Adán. Kʼoati ʼbe nga ndsʼee mañá ngatsʼiaa ninga kjaʼaí kjaʼaísʼin tsen yaoná, kʼoa nga tjíonda je ndsʼee nga tsjoántjai yaole xi totʼatsaan.

Nga superintendente xi tsʼe circuito koan 12 nó, kʼoa 21 nó nga superintendente xi tsʼe distrito koan. Nʼio tsjoa kisatio tokuinjin kʼoa tsee kjoanichikontʼain kisokonajin. Tonga kisokosanajin je kjoanda. Kʼianga sá agosto nó 1997, kʼiaa kitjoson jmeni xi nʼio nkjín nó kichoyalaijin. ¡Kʼoatsakʼinnajin nga ya si̱xáijin ya Betel xi tíjna ya Estados Unidos! Kʼoa jngo sá koanskanni, kʼianga 38 nó jejaʼato nga kinikʼasʼen títjuinjin je solicitud kʼiaa tsakʼetsʼiakoaijin nga kinixáijin ya Betel. Tochoatsejin ya ni̱xáijin kixinña, tonga maini.

Nga títjon yaa kisixá ya Departamento xi tsʼe Servicio. Tsee xi koanjinna nga ya kisixá, nga jngó jngó je ndsʼee xi ya síxá nʼio tse xá kjinele nga̱ yaa sʼendajin je kjoachjonangi xi batío je xi chjotajchínga sʼin tjío kʼoa kao superintendente xi tsʼe circuito. Nʼio chjí ʼbekoan josʼin tsakinyakaona nga kao kjoatsejta kitsoyana. Tsa ngindiaa ya ni̱kasénna ya departamento jebi, tojo tsejin xi sʼa koa̱njinna.

Nʼio tsjoa tjío tokuinjin nga ya tinixáijin ya Betel. Nʼio tanjio bisotjainjin, kʼoa nga ya Betel tinixá nʼio basenkaoná nga tanjio bisotjeen. Jngola nó koanskanni, yaa kisixákoa je Comité de Servicio xi tsʼe Cuerpo Gobernante, kʼoa nga nó 1999, yaa tsakatejnajinle je Cuerpo Gobernante. Je xi ngisa nʼio tjínle kjoandosin xi kjimajinna, kuinga je Jesucristo xi jko̱ sʼin tíjnale je naxinandále Niná, ali tsa jngojin chjota.

Kʼianga sikjaʼaitsjenjian josʼin koanjchá, kʼoasʼe tokoan joni je profeta Amós. Je Jeobá jé kitsjoale xá je Amós, jngo chjota xi to cho̱ kisikuinda kʼoa xi to yá sicómoro xi higo bale kisixákao, kʼoasʼin tsaʼyale nga je to jebi tojé chjota xi ma̱ tjío xi kui kjine. Je Amós profetale Niná koan kʼoa tsee kjoanichikontʼain tsakʼaile (Amós 7:14, 15). Tikʼoasʼinni tsanda an, kitsjoaxána je Jeobá. Je nʼaina granja kisikuinda ya Liberty, alikuijin koa̱nxki̱na kʼiatsa kʼoalani xián jokji kjoanichikontʼain títsjoána je Jeobá (Prov. 10:22). Ningalani ma̱ koanjchá, je Jeobá nʼio tse kjoanyiná títsjoána nga tiʼbe xi tʼatsʼe, saʼnda tsínkʼia kiya jkoa jokji kjoanda títsjoána.