1, 2. 1) Jósʼin basenkaoná choa̱le je ndsʼee kao tichjaa xi tosi tonda tsoyason ninga tsín nanda nrʼoé je chjota (chótsenlai sén xi faʼaitʼa ibi). 2) Jókitso je Jesús tʼatsʼe nga ya ʼndená ʼmiyasoán (chótsenlai nota).

SERGIO KAO OLINDA precursor sʼin tjíosíxá ya Estados Unidos kʼoa jetsʼato 80 nóle nga jao. Tonga nga chʼin bʼetʼale je ndso̱ko̱ ñʼai male kʼianga fi. Ninga kʼoalani, jenkjín nó nga tanjio tanjio fi jñani nkjín chjota faʼa. Yaa binya jñani fayo je karro kʼoa tsjoále je chjota xi ya faʼa je xo̱n xi Énle Niná yʼangini. Me tongatsʼi je chjota nga tsín kuenta sʼín, tonga je Sergio kao Olinda tosi tonda tsoyason. Kʼoa nga jemanyisen kʼiaa fi ya niʼyale. Kʼoa nga manyaonni, tanjio fi ijngokʼa jñani tsoyason. Nga jao ndsʼee jebi kʼoasʼín ngantsjai, jaon nichxin tsoyason nga xki̱ xomana je Énle Niná.

² Nkjín mani je ndsʼee kao tichjaa xi nʼio nkjín nó nga tsoyason ya ʼnde jñani nga likui nanda nrʼoé sakʼoa je chjota. Tsakui nichxin kʼoati matʼain tsanda ji kʼianga ʼmiyasuin. Nʼio nda tinʼiai nga tosi tonda tiʼmiyasuin ninga tsín nanda ʼya xi nrʼoéli. * Nkjín ndsʼee kao tichjaa xi binyakao je choa̱li, ninga je xi jekjoatsele nga xále Niná tjíosʼín. Jngo superintendente xi tsʼe circuito  xi i̱ kitso: “Kʼianga ñatjen xinyasoan kao je ndsʼee xi kixi kjima, nʼio basenkaona je choa̱le”, “nga tjíokale kʼoati basenkaona nga tosi tonda xinyasoan” kʼoa “ñaki bichókajin je ni̱ma̱na nga kʼoasʼín”.

3. Jñánile xi jan kjoachjonangi chótʼayajiaan, kʼoa ánni.

³ I̱ kjoaʼmiya jebi jan koya tjínni je xi chótʼayajiaan. Xi títjon, ánni nga nroajen sakʼoani tokoán kʼianga ʼmiyasoán. Xi majaoni, jmé xi tsoyanile nga kao kjoatsejta kʼoasʼianñá xi ndatjín. Kʼoa xi majanni, jméni xi koasenkaoná nga tsín kuijtaná nga tosi tonda kʼuínyasoán. Kʼianga jejchaa xi tʼatsʼe jebi, tsjoánganʼioná nga tosi tonda si̱tjosoán je xá xi tsakánená je Jesús.

4. 1) Jókisʼe kon je pastro Pablo nga tsín kinrʼoéle je chjota judío kʼianga kitsoyasonle. 2) Ánni nga kʼoakisʼeni kon je Pablo.

⁴ A sakʼoaa nikʼajenlai tokuin nga tsín nrʼoé Énle Niná je chjota ya jñani ʼmiyasuin. Je pastro Pablo kʼoati sakʼoa tsín kinrʼoéle je chjota. Kantela nó nga kitsoyason kʼoa nʼio nkjín chjota tsakasenkao nga chjotale Cristo koan (Hech. 14:21; 2 Cor. 3:2, 3). Tonga je chjota judío alikui kinrʼoéle nga kitsoyasonle kʼoa saʼnda kitjenngike (Hech. 14:19; 17:1, 4, 5, 13). Jókisʼe kon je Pablo kʼianga tsín kisasenle je chjota nga kitsoyason. I kitso: “Kjaínga tse kjoaba xi tjínna” (Rom. 9:1-3). Ánni ba koannile je Pablo. Kuinga tsjoake koan nga kitsoyason kʼoa tsjoake koan je chjota. Kʼoati kuinga aon koannile nga̱ je chjota judío tsakʼasjengi je kjoamatokonle Niná.   

5. 1) Ánni nga ʼmiyasonñá. 2) Ánni nga toxá ba satío sakʼoani tokoán.

⁵ Joni je Pablo, mená kuinyakoaa je chjota kuinga ʼmiyanilee je Énle Niná (Mat. 22:39; 1 Cor. 11:1). ʼYañá nga tse kjoanichikontʼain sʼená nga je Jeobá nixálee. Kʼoa mená kuinyakoaa je xi kjaʼaí nga kʼoati kui kjoanda katasʼele je xi tjínná. Kuinga tosi tonda ʼmiyanilee je chjota xi tʼatsʼe Jeobá kʼoa kao jme xi tjínndajinle tʼatsʼe chjotasonʼnde. Kʼoaʼmilee je chjota nga katakjoé je kjoatjao xi tʼatsʼe Niná nroani. Kʼoa kʼianga tsín kjoé je kjoatjao xi bʼailee je chjota, ba satío tokoán tojo kisʼe kon je pastro Pablo. Ánni kʼoasatíoni tokoán. Ali tsakuijin nga tsín nʼio tíjna je kjoamakjainná, kuinga tsjoacha kjoaixiaa je chjota. Kuinga tosi tonda ʼmiyasonñá ninga ba sʼe sakʼoa tokoán. Je Elena, jngo tichjaa xi 25 nó nga precursora sʼin tísíxá, itso: “Ñʼai mana nga xinyasoan, tonga ʼbeña nga tsínsa ijngo xá xi tsjoa koaya tokoan”.

6. Jñánile je kjoachjonangi xi chótʼayajiaan.

⁶ Ánni nga koa̱n kʼoakʼoéñá tokoán nga ndasʼin kuichomani nga kʼuínyasoán. Kʼianga koa̱njinná jebi, jaola choa̱ xi kitsoya je Jesús chótʼayajiaan xi koasenkaoná nga tosi tonda kʼuínyasoán (Mat. 13:23). Je xi títjon choa̱ kui tʼatsʼe je xka̱totsee.

7. 1) ʼYáni xi tsoyanile je xi “síkuinda” je tsojmintje, je “yáje” xi tsʼe xka̱totsee, kʼoa kao je “yántsja”. 2) Jmé tʼatsʼeni xi mená jchaa.

⁷ (Tʼexkiai Juan 15:1, 2, 8). * Je Jesús kʼoakitso nga je Jeobá xi “síkuinda” je tsojmintje, kʼoa jé Jesús tsoyanile “yáje” xi tsʼe xka̱totsee, kʼoa je “yántsja” jé chjotale tsoyanile. * Je Jesús i kitsole je  chjotale: “Kuibi xi kʼoasʼin bʼasjejeya Nʼaina, nga kʼoasʼin tonkjín to koa̱no. Kʼoasʼin jchakixino nga chjotana mao”. Jmé xi tsoyanile nga “kʼoasʼin tonkjín to koa̱no” kitso je Jesús. Alikui kitsoya kixi jmeni xi kinchja̱ni nga kui kisikʼaxki̱, tonga jmesani xi kitso basenkaoná nga majinná jmeni xi kinchja̱ni.

8. 1) Je choa̱ xi tsakʼéjna je Jesús, ánni nga tsínkui tsoyanile nga chjotatjenngile Cristo nikoaa je chjota. 2) Jméni xi síjéná je Jeobá nga sʼiaan.

⁸ Je Jesús i kitso xi tʼatsʼe Nʼaile: “Ngayije yándsa̱ xi tsín tsa bale to, faʼáxin”. Xi tsonile, tokʼiaa nga jo choʼndale sʼin skoe̱konná je Jeobá kʼiatsa ya mangósoán jngo xka̱totsee xi “bale to” (Mat. 13:23; 21:43). Kʼianga kui choa̱ kitsoya je Jesús tʼatsʼe je xka̱totsee xi “bale to” ali tsakuijin nchja̱ni nga chjotale Cristo nikoaa je chjota (Mat. 28:19). Tsa kʼoalani, je chjotale Cristo xi tsín ʼya chjota basenkao nga chjotale Cristo koa̱n yajin mangóson je xka̱totsee xi tsín bale to. Tonga majinná nga tsínkui jebi tínchja̱ni, nga̱ alikui koa̱n kʼoénelee je chjota nga chjotale Cristo katama. Kʼoa xi ijngosani, je Jeobá tsjoakená kʼoa alikui kui síjéná jmeni xi tsín kʼoakoa̱nná si̱tjosoán. Kui síjéná jmeni xi bele kon nga kuitjosonná (Deut. 30:11-14).

9. 1) Jméni xi tjínnele sʼiaan nga ya koa̱nngósoán je xka̱totsee xi bale to. 2) Jmé choa̱ xi chótʼayajiaan, kʼoa ánni.

⁹ Jmé xi tsoyanile je choa̱ xi kitsoya je Jesús. Kui tsoyanile jmeni xi koa̱nná kʼoasʼiaan ngatsʼiaa. Jmé xá xi títsjoáná ngatsʼiaa je Jeobá xi choʼndale maa. Kuinga kʼuínyasoán je énnda chjotse xi tʼatsʼe Chjotaxále (Mat. 24:14). * Yaa tsoyaná jebi je choa̱ xi kitsoya je Jesús tʼatsʼe je xi tsojmi bʼéntje. Chótʼayajinla choa̱ jebi.

10. 1) Jmé xi tsoyanile je na̱xi̱n xi kisikʼaxki̱ je Jesús. 2) Jméni xi sʼele jngo xka̱ trigo.

¹⁰ (Tʼexkiai Lucas 8:5, 8, 11, 15). * Kʼianga kui choa̱ tsakʼéjna je Jesús tʼatsʼe jngo chjota xi na̱xi̱n kojndí, kʼoakitso nga je na̱xi̱n kui tsoyanile je Énle Niná. Je nangi kui tsoyanile je ni̱ma̱le chjota. Je na̱xi̱n xi ya kitsao jña nda nangi chitso kʼoa tsakinngʼa. Kʼoa “jngo siento ya” kʼoakji to tsakale. Tsa kuila kuinókjoañá tʼatsʼe trigo, kʼianga sʼentje ali tsakuijin je xka̱le xi mankjínya, kui je trigo xi mankjínya, xi kʼoati mantje ijngokʼa nga jemani. Je choa̱ jebi kui tsoyaná nga jngo na̱xi̱nle trigo sʼentje 100 ya kʼoakji trigo majchá ijngokʼani. Jmé xi tsoyaná jebi tʼatsʼe nga ʼmiyasoán.

11. 1) Je choa̱ xi kitsoya je Jesús tʼatsʼe je chjota xi na̱xi̱n bʼéntje, jméni xi tsoyaná tʼatsʼe nga ʼmiyasoán. 2) Jósʼin ninkjínyaa je na̱xi̱n xi tsʼe Chjotaxále Niná.

¹¹ Kʼianga tsakʼinyaná je Énle Niná, tsa je xijcháná kʼoa tsa kjaʼaí ndsʼee kitsoyaná, nʼiojin tsjoa kisatio kon nga koanmená kichotʼayá. Kui xi tsonile nga ya nangi xi nda tsakʼéntjejin je na̱xi̱n. Kʼoa je na̱xi̱n jebi, xi kisʼentjejin ya jinni̱ma̱ná, koantje saʼnda nga tsakale to. Kʼoa tojo ma jngo na̱xi̱nle trigo kʼianga sʼentje, je xi mankjínya kui je trigo, ali tsakuijin je xka̱le xi mankjínya. Tikʼoasʼinni, ali tsakuijin tínchja̱ni nga nʼio nkjín xi chjotale Cristo si̱koaa. * Je xi ninkjínyaa  kui je na̱xi̱n xi tsʼe Chjotaxále Niná, xi tsonile, nga ʼmiyasoán. Kʼianga tʼatsʼe Énle Niná nokjoakaoñá je chjota kui xi tsonile nga tichjoʼjndía je na̱xi̱n xi kisʼentjejin ya jinni̱ma̱ná (Luc. 6:45; 8:1). Je choa̱ jebi, kui tsoyaná nga ya mangósoán jngo yá trigo xi bale to kʼianga tosi tonda ʼmiyasoán je Énle Niná.

12. 1) Jmé xi tsoyaná je choa̱ xi tsakatío je Jesús tʼatsʼe xka̱totsee kao tʼatsʼe chjota xi na̱xi̱n bʼéntje. 2) Jósʼe tokuin nga majinli xi tʼatsʼe jebi.

¹² Jmé xi tsoyaná je choa̱ xi tsakatío je Jesús xi tʼatsʼe xka̱totsee kao tʼatsʼe chjota xi na̱xi̱n bʼéntje. Kʼianga ya koa̱nngósoán je xka̱totsee xi “bale to” ali tsakuijin xi kuitsoni tsa kjuinrʼoé je chjota kʼoa tsa mai kʼianga ʼmiyasoán. Kui xi kuitsoni tsa tosi tonda koakoyasoán. Me kʼoati kitso je Pablo kʼianga itso xi kiski: “Kʼoaile [nga] jngójngó je chjíle josʼin koan xále” (1 Cor. 3:8). Je Jeobá tsee kjoanichikontʼain tsjoáná kʼianga je tinixálee, ali tsakuijin xi kuitsoni tsa kjuinrʼoéná je chjota kʼoa tsa mai. Je Matilda, jngo tichjaa xi 20 nó nga precursora sʼin tísíxá, itso: “Nʼio tsjoa sʼe tokoan kʼianga ʼbe nga síchikontʼainná je Jeobá tʼatsʼe jokji bʼenelee yaoná kʼianga nixálee”.

13, 14. Tojo tso Romanos 10:1, 2, ánni nga tosi tonda kitsoyasonni je Pablo.

¹³ Jmé xi koasenkaoná nga sʼe̱ná kjoaka kʼianga tosi tonda kʼuínyasoán. Tojosʼin saje kaʼyaa, je Pablo kisikinroajen kon kʼianga tsín kinrʼoé je chjota judío je Énle Niná. Ninga kʼoalani, alikuikʼia tsakájñále nga kitsoyason. Kʼoakitso jokisʼe kon xi tʼatsʼe chjota judío kʼianga i̱ kitso: “Ñaki kjoakixi ní kui xi mele ni̱ma̱na, kʼoa kui xi bʼetsʼoale Niná tʼatsʼe Israel, nga kuitjontjai. Nga̱ an tsjoa kjoakixi tʼatsʼe Israel nga nʼio xkón be Niná, tonga likui josʼin machjén kjoaisentakon” (Rom. 10:1, 2). Ánni nga tosi tonda kitsoyasonni je Pablo.

¹⁴ Xi títjon, je Pablo kʼoakitso nga ni̱ma̱le kinroajinni nga kitsoyale Énle Niná je chjota judío. Kui xi koanmele nga kuitjontjaile yaole je chjota judío (Rom. 11:13, 14). Xi majaoni, kʼoakitso nga  tsakʼétsʼoale Niná xi tʼatsʼe chjota judío. Je Pablo kui kisijéle je Jeobá nga katabasenkao nga jngó jngó je chjota judío nga kjuinrʼoé je Énle Niná. Kʼoa xi majanni, je Pablo i kitsosa: “Nʼio xkón be Niná”. Je Pablo kui kiskotsenle xi ndatjín tjíosʼín je chjota kʼoa kui kisikjaʼaitsjen nga koa̱n nʼio nda sixále Niná. Koanjinle nga koa̱n chjotale Cristo koa̱n chjota jebi.

15. Jósʼin koa̱n chjénngilee je pastro Pablo. Tikʼaxki̱ kʼai choa̱.

¹⁵ Jósʼin koa̱n chjénngilee je pastro Pablo. Xi títjon, kuinga ñaki ni̱ma̱ná kjuinroajinni nga kjoásjee je chjota xi mele kjuinrʼoé je Énle Niná ánni nga koa̱n sʼe̱nile je “kjoabijnachon ngantsjai”. Xi majaoni, si̱jélee je Jeobá nga katanrʼoéná je chjota xi ndʼé tjío ni̱ma̱le kʼianga kʼuínyasoán (Hech. 13:48; 16:14). Kʼoatísʼín je Silvana, jngo tichjaa xi jeme 30 nó nga precursora sʼin tísíxá. Je tichjaa jebi itso: “Nga kjesa fikonjinle je chjota ya niʼyale, jé Jeobá bʼetsʼoale, kui sijéle nga ñaki kao kjoatsjoa xínyasoan”. Kʼoati koa̱n kʼoétsʼoalee je Jeobá nga si̱jélee nga je ánkje katabinyakaoná nga koa̱nsjainá je chjota xi kjuinrʼoéná kʼianga kʼuínyasoán (Mat. 10:11-13; Apoc. 14:6). Je Robert, xi jela 30 nó nga precursor sʼin tísíxá, itso: “Nʼio tsjoa sʼe tokoán kʼianga ʼyaa josʼin binyakaoná je ánkje nga mangínchonlee je chjota kʼianga ʼmiyalee je Énle Niná”. Xi majanni, kui kuenta sʼiaan jmeni xi ndatjín kʼoasʼín je chjota kʼoa kʼoasʼin si̱kjaʼaitsjeen nga koa̱n nʼio ndasʼin sixále je Niná. Je Carl, jngo xi chjotajchínga sʼin tíjna, xi jela 50 nó tjínle nga kisʼenngindá, itso: “Kui kotsenle jmeni xi bakó jokjoan je chjota. Tobʼelañá, tsa bijno, tsa kʼoasʼin matsen nga nda chjota kʼoa tsa jme kjoachjonangi síkʼéjna”. Tojo kisʼin je Pablo, tsa kʼoasʼiaan tsanda ñá, kui xi koasenkaoná nga tosi tonda kʼuínyasoán je Énle Niná.  

16, 17. 1) Jmé xi bakóyaná jmeni xi tso Eclesiastés 11:6. 2) Jngo choa̱ tʼejnai jósʼin binyakao je chjota xi bená kʼianga ʼmiyasoán.

¹⁶ Je xi kuenta sʼiaan kʼianga ʼmiyasoán kuinga binyakao je chjota, ningalani tjínkʼa xi tsín binyáño (tʼexkiai Eclesiastés 11:6). * Je chjota kuenta sʼín jonʼia kʼoa josoyoaa, kuenta sʼín nga tsje kjoan najño chʼakjá, nga nda tso én nokjoaa kʼoa nga tsjoa tjíona ngantsjai. Tsakui nichxin je xi tsín ndasʼin síkjaʼaitsjen xi tʼatsaan nga títjon skanni koa̱nkjainle. Je Sergio kao Olinda be nga kʼoasʼin bichóma sakʼoani.   

¹⁷ Je Sergio itso: “Kʼianga chʼin tsakʼetʼanajin alikui tsangínjin ya jñani ʼmiyasuinjin. Kʼianga kicho ijngokʼaijin, je chjota kui kiskonanginajin ánni nga tsín kichonijin kʼoa kʼoatso nga kisikjáonajin”. Kʼoa je Olinda nʼio tsjoa kisʼe kon, kʼoa itso: “Saʼnda kisitiʼndanajin je chjota xi síxákao je karro kʼoa tjínkʼa xi rebista kisijénajin”. Kʼoa je Sergio kao Olinda tokʼoakoanle nga jngo chjota xi naxó kichokaole nga ya nya nga tjíotsoyason, kʼoa je chjota jebi kʼoakitsole nga nʼio ndatjín je xá xi tjíosʼín.

18. Ánni nga kʼoatjínni tokuin nga kao “kjoatsejta” kʼuínyasuin.

¹⁸ Je Biblia itso: “Likui katasíkjáya ndsai”. Kʼianga tosi tonda kʼuínyasoán je Énle Niná, kʼoasʼin kʼoainganʼioá nga kʼuínyasonle “ngatsʼi naxinandá” (Mat. 24:14). Xi ngisa tsjoa koaya tokoán kuinga nda kuiyoaa ngixko̱n Jeobá, nga̱ je Jeobá tsjoake je xi kao “kjoatsejta” tsoyason.