NICHXIN xi tiyoaa ndʼaibi nʼio tse kjoa tjín, ñʼai maná nga nyʼán sʼin biyoaa. Jmé kjoafaʼaitsjen xi tsjoá je Biblia koasenkaoná nga so̱koná kjoanyʼán kʼoa nga tsín si̱chaa. Kʼoa jósʼin kuinyakoaa xi ngikʼa nga kʼoati nyʼán sʼin koatio.

Kʼianga ñaki nyʼán sʼín kuiyoaa kʼianí nga tsín jme xi kuinókjonlee, nga tsín xkón kuiyoaa. Kʼoati nʼio tjínle kjoandosin nga je miyo xi kixi sʼe̱ná. Tonga xi ngisa nʼio chjíle kuinga je Niná si̱miyoaa ánni nga nyʼán sʼin kuiyosíñá. Kataʼyala, jméni xi machjén nga sʼiaan.

Kʼiatsa si̱tjosoán je kjoatéxomale Jeobá kao kjoafaʼaitsjen xi tsjoá je Biblia, kʼoasʼin koakoñá nga je ninʼiotʼaa kʼoa nga mená nga nyʼán sʼin kuiyoaa xi kao je (Jer. 17:7, 8; Sant. 2:22, 23). Tsa kʼoasʼiaan, je Niná sichriantʼaná kʼoa sichikontʼainná nga nyʼán sʼe̱ tokoán. Ya Isaías 32:17, itso: “Je kjoatéxomakixi kjoanyʼán kuichotsjoá, je kjoatéxomakixi nyʼán bʼé tokoán kʼoa tsín jme xi nokjonlee”. Kʼiatsa si̱tjosoán jmeni xi tsoná Jeobá, nyʼán sʼin kuiyoaa (Is. 48:18, 19).

Kʼianga nyʼán sʼin kuiyoaa ngantsjai, je Jeobá tsjoáná jngo kjoatjao xi basenkaoná, je nganʼiotsjele (Hech. 9:31, TNM).

Je Pablo kʼoakitso nga je “kjoa xi nyʼán tjín” yaa tíjnajin je kjoanda xi tsjoájin ni̱ma̱ná je Espíritu Santo (Gál. 5:22, 23). Kʼiatsa mená nga nyʼán sʼin kuiyoaa, tjínnele kʼoaiʼndee nga je  nganʼiotsje katabándiaaná. Jaola koya kataʼyaa jmeni xi tjínnele sʼiaan nga koasenkaoná je nganʼiotsje.

Xi títjon, machjén nga nyaon nyaon kʼoéxkiaa je Énle Niná (Sal. 1:2, 3). Kʼianga nikjaʼaitsjenjiaan jmeni xi tso je Biblia, je nganʼiotsje basenkaoná nga majinná josʼin bekon Jeobá tsa jmeni. Tobʼelañá, jmeni xi koa̱n sʼiaan nga nyʼán sʼin kuiyoaa kʼoa anni nga nʼio tjínnile kjoandosin jebi xi kao Niná. Kʼiatsa si̱tjosoán jmeni xi majinná nga chótʼayá je Biblia, nyʼán sʼin kuiyoaa (Prov. 3:1, 2).

Xi majaoni, machjén nga kʼoétsʼoalee je Jeobá kʼoa si̱jélee je nganʼiotsjele (Luc. 11:13). Je xi Jeobá sínʼiotʼa yaole, itsole: “Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga̱ tiyokao Cristo Jesús” (Filip. 4:6, 7). Kʼiatsa kjitʼa si̱jélee Jeobá je nganʼiotsjele, tsjoáná je kjoanyʼántokonle nga̱ tsjoále je xi miyole mani (Rom. 15:13).

Je Biblia tjíobinyakao je chjota nga tjíosíkʼantjaiya yaole kʼoa ndʼaibi nyʼán sʼin tjíosíjchá yaole, nyʼán tjío xi kao Jeobá kʼoa kao xi kjaʼaí chjota. Jaola choa̱ kataʼyaa.

Nichxin xi tiyoaa ndʼaibi, je jtín xi tsʼe chjotale Cristo, tjínkʼa xi ngotjo kisijtinile yaole tsakai. Tonga ndʼaibi, kosonnile josʼín, tsejtaa, tojbi tjíosíjchá yaole kʼoa ndʼéní * (Prov. 29:22). Jaola choa̱ kataʼyaa jmeni xi kisʼin je ndsʼee nga kjimale tjíokjoéxkó yaole tʼatsʼe nga ngotjo majtinile tsakai kʼoa nga nyʼán sʼin tjío kao xi ngikʼa.

Nga tsʼen koan je David kʼoati chʼao tso én kinchja̱. Nga kjesa testigole Jeobá majin, kʼoasʼin ngale tsakai nga chjota síkʼaxki̱ kʼoa tsín bexkón je xijchále. Koanjinle nga tjínnele sikʼantjaiya yaole. Jmé xi tsakasenkao nga nyʼán sʼin tsakʼejnani kao xi kjaʼaí. Itso: “Kuenta kisʼian jmeni xi tso je kjoafaʼaitsjen xi tsjoá je Biblia. Nga kʼoakisʼian, ngisaa tsaʼbexkoán je xijchána”.

Josʼin koanjchínga je Rachel kui xokisikao jokoankjoan, itso: “Tojo sakʼoaa majtina, kʼianga  sʼa koanjchínga, ngatsʼi familiana ñaki to tsakjáoti ʼndeʼndee”. Jmé xi tíbasenkao nga nyʼán tjínni kon ndʼaibi. Je Rachel itsosa: “Ntsjaintsjai bʼetsʼoale Jeobá nga katabasenkaona”.

Je choa̱le David kao Rachel kui tsoyaná nga ndasʼin bichómani nga mangíntjenngiaa je kjoafaʼaitsjen xi tsjoá je Biblia kʼoa nga bʼaiʼndee nga basenkaoná je nganʼiotsjele Niná. Ningalani chʼao chon je sonʼnde, koaan nga nyʼán sʼe̱ tokoán, nyʼán sʼin kuiyoaa kao familianá kʼoa kao je jtín. Je Jeobá kui xi mele nga “nyʼán [kuiyoaa] kao ngatsʼi chjota” (Rom. 12:18). Jméni xi koasenkaoná nga nyʼán sʼin kuiyoaa. Kʼoa jmé kjoanda xi so̱koná tsa kʼoénelee yaoná nga kʼoasʼiaan.

Kʼianga ʼmiyasoán, kui chjakaoñá chjota tʼatsʼe kjoanyʼán xi kjoaʼaíkao je Chjotaxále Niná (Is. 9:6, 7; Mat. 24:14). Nda sʼe tokoán nga nkjín chjota nrʼoe kʼianga ʼmiyasoán kʼoa binyakao nga tsín tokjoan síjtile yaole ninga chʼao chon sonʼnde. Chjota jebi, tjínle kjoachoya tʼatsʼe nichxin xi nroaján kʼoa sítjoson kjoafaʼaitsjen jebi: “Kjoanyʼán tjasjai kʼoa kui tʼintjenngi” (Sal. 34:14).

Kʼianga sʼa bichochonlee je chjota alikui tongatsʼi nga nda nrʼoéná (Juan 3:19). Ninga kʼoalani, je nganʼiotsjele Niná basenkaoná nga tsín yaoná nijtilee kʼoa nga bakolee kjoaxkóntokon je chjota nga chjakaonajmiá. Nga kʼoanʼia, mangíntjenngiñá je kjoafaʼaitsjen xi kitsjoa Jesús tʼatsʼe nga ʼmiyasoán: “Kʼia nga kuitjásʼaon niʼya, titiʼndao. Kʼoa tsa je niʼya skoe̱tjaono, nyʼán katatio tʼatsʼe kjoanitiʼndano, tonga tsa tsín skoe̱tjaono, katachajin kjoanitiʼndano” (Mat. 10:11-13). Kʼianga mangíntjenngiaa kjoafaʼaitsjen jebi, basenkaoná nga tsín chobatiaa kao je naile niʼya, nga koa̱nskanni tsakuini nichxin koa̱n kuinyakoaa.

Ñá xi chjotale Cristo maa, kʼoati fasjee kjoanyʼán kʼianga bakolee kjoaxkóntokon je chjotale gobierno kʼoa saʼnda je chjota xi batiochjoale je xá xi nʼia. Jngola choa̱ kataʼyaa. Jngo gobierno xi África tsʼe chʼaosʼin kisikjaʼaitsjen tʼatsʼe xá xi nʼia xi testigole Jeobá maa kʼoa tsín kitsjoaʼnde nga kisʼenda je Ndʼia jña chotʼayá. Kʼianga mele je ndsʼee nga sʼe̱ndajin kjoa jebi, jngo ndsʼee xi misionero koan ya naxinandá jebi kisikasén nga katabʼéyanajmíle je chjota xi xá tjínle ya Londres (Inglaterra) nga kjoanyʼán tjenkao je xá xi tinʼia. Jósʼin kichomani.

Je ndsʼee itso: “Kʼianga kichoa, tsaʼbeña jokjoan najño xi yʼakjá je chjoón xi síkuinda jña koya chjota, tsaʼbeña nga kui ntje̱ kitjenni je én xi koanna. Kʼianga kisitiʼnda, énle kinchjale kʼoa tokʼoakoanle kʼoa kiskonangina jmé xá kichoña. Kao kjoaxkóntokon kʼoakixinle nga je mena kjoakaonajmía je chjota xi xá tjínle. Kʼiaa kinchja̱le teléfono kʼoa nga kicho chjota jebi kao én xi male kisitiʼndanina. Xijekoan, nda tsakasénño jmeni xi kixinle tʼatsʼe xá xi nʼia xi testigole Jeobá maa”.

Nga kao kjoaxkóntokon kinchja̱ ndsʼee jebi tsakasenkao je chjota xi xá tjínle nga tsín tinanda chʼaosʼin kisikjaʼaitsjenni xi tʼatsʼe testigole Jeobá. Nga jeki nichxin, je gobierno xi ya tsʼe naxinandá jebi, kitsjoaʼnde nga kisʼenda je Ndʼia jña chotʼayá. Nʼiojin tsjoa kisatio kon je ndsʼee. Kʼianga bakolee kjoaxkóntokon je xi ngikʼa ndasʼin bichómani kʼoa sʼe kjoanyʼán.

Nichxin xi tiyoaa ndʼaibi, jtín tiyoaa kʼoa nyʼán sʼin tiyoaa. Kʼoa ngisaa nyʼán sʼin kuiyoaa kʼiatsa tosi tonda sʼená je kjoanda xi tsjoájin ni̱ma̱ná je Espíritu Santo. Tonga je xi ngisa tjínle kjoandosin kuinga je Jeobá sichikontʼainná kʼoa nyʼán sʼin kuiyoaa ngantsjai kʼianga jesʼe̱jna je sonʼnde chjotse (2 Ped. 3:13, 14).