JE Jesús tongini kʼoakitso nga nʼio tse xi kʼoexkó je chjotale kʼianga jetífikjetʼa nichxin (Mat. 9:37; 24:14). Kʼoa ñaki nʼio nda tíbitjoson én jebi ya Transcarpatia (Ucrania). Tobʼelañá, jan ʼnde xi tiya tjíoni 50 mani je jtín xi tjío kʼoa tsʼato 5,400 mani je xi tsoyason. * Kʼoa tsa kʼoéxkiaa chjota xi tjín ʼnde jebi, nga ño chjota jngo xi testigole Jeobá mani.

Jósʼín je chjota xi ya tjín. Je ndsʼee xi Vasile ʼmi itso: “Je chjota xi tjín ibi bexkón je Biblia, tsjoakee xi kixi tjín, jtín tjío yaniʼyale kʼoa binyakaongañá xínkjín”. Je ndsʼee itsosa: “Sakʼoaa tjín jmeni xi tsín sasénle josʼin makjainná, tonga kʼianga bakolee testole Biblia ndani nrʼoéná”.

Nga kʼoasikji nkjín mani xi tsoyason ñʼai male je ndsʼee. Tobʼelañá, jngo jtín xi 134 publicador tjínle kʼoa to 50 mani ndʼia jña tsoyason. Jméni xi sʼín ndsʼee jebi.

Nʼio nkjín ndsʼee xi ya fitsjoánganʼio jñani ngisa machjén xi tsoyason. Jngo ndsʼee xi 90 nóle, xi Ionash ʼmi itso: “Ya jtínnajin to jao ndʼia bʼakaole nga jngó jngó ndsʼee. Ndʼaibi nga jengisa tíbʼetʼana chʼin toʼisa xinyasoan, kʼoati fixinyasoan tsakai jngo ʼnde xi 160 kilómetro kjin tíjna, én húngaro kixinyasoan”. Nʼio tse jmeni xi sʼín je ndsʼee kʼianga fitsoyason ʼnde xi kjintʼa tjío. Je ndsʼee Ionash itso: “Las cuatro tsakisotjen kʼoa tren kikoa. Kʼoa saʼnda las seis kisikjetʼa nga kixinyasoan, nga̱ kʼoachon nroa ijngokʼani je tren. Sakʼoaa jao kʼoa tsa jan kʼa kia nga xki̱ xomana”. Alikui toxitsjoa nga kʼoakisʼin je ndsʼee. Itso: “Nga kʼoasʼin kixinyasoan nʼio tsjoa kisʼe tokoan. Koan kixinyale jngo familia xi kjintʼa tjío”.

Tjínkʼa je ndsʼee xi tjío ya jtín jebi xi tsín kʼoamale nga kʼoasikji kjin fitsoyason, tonga ngatsʼi, saʼnda je xi chjotajchínga bʼasjee nganʼio nga tsoyasonle chjota xi tjío ʼndele. Kʼoa kʼianga nó 2017, nga jan ʼnde jebi, me jaoya kʼoakji chjota kicho nga jaʼaitsjenya Kjoabiyale Cristo jotjín mani je xi tsoyason. Jotjín chjota tjín ʼnde jebi, basen koanni xi kicho. Tojosʼin tiʼyaa, tojñani tiyoaa tojo tsesa xá tjínná xi tsʼe Niná (1 Cor. 15:58).