1. Jméni xi tsoyaná je Énle Niná.

JÉ Jeobá xi nʼio nda bakóyaná kʼoa jé koasenkaoná kʼianga kui kjoa xi ñʼai tjín kuitjátojiaan (Is. 30:20, 21). Je Énle Niná tsoyaná jmeni xi machjénná nga jngó jngoá nga sʼe̱jngo tokoán kʼoa nga jchaa “tʼatsʼe ngayije xá xi nda” (2 Tim. 3:17). Kʼianga mangíntjenngiaa jmeni xi tso je Biblia ngisaa chjine maa tikʼoajinni je chjota xi kui “kjoachjinele sonʼndebi” fitjenngi (1 Cor. 3:19; Sal. 119:97-100).

2. Jméni xi jchaa i̱ kjoaʼmiya jebi.

² Tojosʼin jchaa xi fisani, je kjoachjinele sonʼnde kui tsoyaná nga to yaoná kjuinñá. Alikui choa ñʼai maná nga chjaʼaxinlee yaoná josʼin síkjaʼaitsjen je chjota kao jmeni xi sʼín. Kuinga i̱ tsoni je Biblia: “Chótsaon nga niʼyajin xi kʼoanachano kao kjoachjine xi tokjoandiso xi tsínjme chjíle, josʼin mangale chjota” (Col. 2:8). I̱ kjoaʼmiya jebi jao koya jchaa tʼatsʼe kjoachjine xi “tsínjme chjíle” xi tjín sonʼnde. Kʼoati jchaa jókoanni nga nʼio tsaʼyanile. Nga jngó jngó koya, jchañá nga tsín jme chjíle kjoachjine jebi, tonga kʼoati jchaa ánni nga ngisa ngʼa tíjnasíni je kjoachjinele Niná tikʼoajinni tojmeni xi tjín sonʼnde.

3, 4. Kʼianga tosʼa tífitsʼia siglo 20, jósʼin tsʼantjaiya je kjoafaʼaitsjenle chjota tʼatsʼe josʼin mangínkoaa yaoná.

³ Kʼianga tosʼa kitsʼia siglo 20, nʼio tsʼantjaiya josʼin kisikjaʼaitsjen chjota tʼatsʼe josʼin mangínkoaa yaoná. Nga kʼia, nkjín chjota xi kʼoasʼin síkjaʼaitsjen nga toje xi jechixan xi koa̱n kjoáyokao xínkjín kʼoa nga tsín koa̱n kui kjaoyani jebi ya jinle chjota. Tonga xijekoanni alikui tikʼoasʼin kisikjaʼaitsjenni, tosaa tokitsjoaʼndele yaole jmeni xi kisʼin.

 ⁴ Kʼianga nó 1920, kʼoasʼin tsaʼyale nga jeto kjaʼaíngá kisʼin je chjota kʼoa nʼio tsʼantjaiya jmeni xi kisʼin. Jngo chjota xi kui kotʼayason, i kitso: “Je película, je teatro, canción, novela kʼoa jmeni xi tsʼatsen nga kʼia, kui tsakakó xi kjoachajngi tjenkao”. Nga kui nó, jeto kjaʼaíngá kisʼin je chjota nga kite, kʼoa tsín tinda matsenni jokjoan najño xi tsakʼakjá. Je Biblia tongini kʼoakitso nga je nichxin xi fetʼa ngisaa koa̱ntsjoake “kjoaská” je chjota (2 Tim. 3:4).

5. Tjen nó 1960, jósʼin tjíosíkʼantjaiya kjoafaʼaitsjenle chjota tʼatsʼe josʼin mangínkoaa yaoná.

⁵ Nga nó 1960, je chjota alikui tichʼaosʼin tsabeni nga tixʼin xínkjín kʼoa nga tiyánchjín xínkjín tsakjayokaoni, nga totjín totjen kjoa kitsjionni xínkjín kʼoa nga totsakatiokao xínkjín. Xi ijngosani, je kjoasʼetsaojin xi kisʼe kui nʼio tsakakó josʼín nga síchajngi je chjota. Tonga jósʼin tíbichómani jebi. Kʼianga kui kinchja̱ni xi tʼatsʼe jebi, jngo chjoón xi xo̱n kji xi kʼoakitso nga tsín tibexkónni josʼin fikao yaole je chjota, nga ya nroani nga maxkoa̱ya je familia, nga tojesa xi nʼai kʼoa tsa xi na̱ síjchá je xtile, nga aon satío kon kʼoa nga pornografía tsjentʼale. Nga nʼio nkjín koya chʼin bakinle je chjota nga xínkjín fayokao, jolani je sida, kui bakó nga tsín jme chjíle je kjoachjinele sonʼnde (2 Ped. 2:19).

6. Ánni nga kui mesínile je Na̱i nga tsín nda katafikao yaole chjota.

⁶ Je Na̱i kui xi mele nga tsín tinda katasʼínni je chjota. Nʼio tsjoa male nga síchajngi kʼoa nga tsín tibexkónni je kjoabixan (Efes. 2:2). Je kjoatjao xi kitsjoale Jeobá je chjota kuinga koa̱n sʼe̱le xti. Tonga je xi síchajngi, alikui bechjí je kjoatjao jebi. Kʼoa je xi kʼoasʼín alikui sʼe̱le kjoanda nga koa̱n koatio ngantsjai nichxin (1 Cor. 6:9, 10).

7, 8. Ánni nga ngisa ndatjínni je kjoafaʼaitsjen xi tsjoá je Biblia xi tʼatsʼe nga koa̱n kjoáyokao xínkjín xi jechixan tikʼoajinni jotso je kjoachjinele sonʼnde.

⁷ Je chjota xi kui fitjenngi je kjoachjinele sonʼnde kʼoatso nga tsín ndatjín jmeni xi tso je Biblia tʼatsʼe josʼin mangínkoaa yaoná kʼoa bʼasjenginí. Tsakui nichxin i̱ tso xi kjonangile yaole: ánni nga kʼoasʼin kisindaniná je Niná nga kui nimetokoán nga tjín xi sóyokoaa kʼoa nga kʼoatso kaoniná nga si̱kuindaa yaoná nga tsínkui katasíkinjená. Nga kui kjoafaʼaitsjen jebi tjínle je chjota, yaa nroani nga totsjoáʼndele yaole josʼín. Je Biblia kʼoatso nga koa̱n  kʼoéchjoalee yaoná nga tsínkui si̱kjaʼaitsjeen jmeni xi chʼaotjín. Tsa kʼoasʼiaan ndasʼin kuiyoaa (Col. 3:5). Xi ijngosani, je Jeobá kʼoasʼin tsakʼéndajin nga toje xi jechixan xi tiʼndele nga koa̱n kjoáyokao xínkjín kʼoa nga sitsjoayale xínkjín nga jngó jngó (1 Cor. 7:8, 9). Kʼoa nga kjoáyokao xínkjín, alikui chʼao sa̱tío kon kʼoa tsínkui sikjáojin jmeni xi síkjáojin je xi síchajngi.

⁸ Alikui mangóson jmeni xi tso je Biblia kao je kjoachjinele sonʼnde. Je Énle Niná kʼoatso nga koa̱n kjoáyokao xínkjín xi jechixan kʼoa nga sitsjoayale xínkjín nga jngó jngó (Prov. 5:18, 19). Tonga kʼoati i̱ tso kjoafaʼaitsjen xi tsjoá: “Jngójngó nga jon tsje tiyokao yánchjínno, jchaxkón. Ali tokuijin kjoachi̱nga̱ xi nʼianilao, joni tsa chjota xi li judíojin xi tsínkui be Niná” (1 Tes. 4:4, 5).

9. 1) Kʼianga siglo 20, jósʼin tsakasenkao Jeobá je naxinandále nga kui katafitjenngi je kjoachjine xi faʼaitʼa Biblia. 2) Jmé kjoafaʼaitsjen xi tsjoá 1 Juan 2:15, 16. 3) Tojo tso Romanos 1:24-27, jmé kjoa xi machjén nga chʼa̱sjengiaa.

⁹ Nga tífitsʼia siglo 20, je choʼndale Jeobá alikui ya kiskenngile je chjota xi “jekisichajin kjoafaʼaitsjenndale” (Efes. 4:19). Tosaa tsakʼénele yaole nga kisitjoson je kjoatéxomale Niná. Je revista xi tsʼe 15 de mayo de 1926, xi én inglés kitjo kʼoakitso nga je “xi xʼin kao xi yánchjín tjínnele nga tsje koaikao yaole kʼoa nga kui sikjaʼaitsjen jmeni xi ndatjín kʼoa ngisaa tsa ñatjen tjío je xi xʼin kao je xi yánchjín”. Ninga sa chʼao sa chʼao koanchon sonʼnde, je choʼndale Jeobá tosi tonda kisitjoson je kjoachjine xi faʼaitʼa je Biblia (tʼexkiai 1 Juan 2:15, 16). * Nʼio bʼé kjoanda nga tíkijnaná je Énle Niná kao jmeni xi títsjoáná je naxinandále Jeobá xi basenkaoná nga chʼasjengiaa je kjoafaʼaitsjen xi tjínle sonʼnde tʼatsʼe josʼin mangínkoaa yaoná * (tʼexkiai Romanos 1:24-27). *

10, 11. Jmé xi tongini kitso Biblia nga koa̱nchon nichxin fetʼa.

¹⁰ Je Biblia tongini kʼoakitso nga sʼe̱ “chjota xi toyaole tsjoake koa̱n” kʼianga toje tífetʼa nichxin (2 Tim. 3:1, 2). Kuinga tsín tokʼoamaniná nga ngʼa bʼasje yaole chjota. Jngo enciclopedia xi kʼoatso nga nʼio kisʼe je libro xi tsakinyakao je chjota kʼianga nó 1970. Tjínkʼa je libro xi kui kinchja̱ni “nga ngisa nda katabexkon yaole je chjota, nga tsín tjínnele sikʼantjaiya yaole kʼoa nga ngʼa katabʼasje yaole”. Tobʼelañá, jngo libro xi kʼoatso nga tjínnele tsjoake koa̱n yaole chjota kʼoa nga kʼoasʼin katasíkjaʼaitsjen “nga je xi ngisasa naskánakji, nga nʼio chjíle, nga nʼio male sínʼio kon xi kjaʼaí kʼoa nga tsínsa xi kʼoakji jokji je”. Libro jebi kʼoati tso nga tiʼndele chjota jme religión xi koatiojin, nga je xi kuitsoni josʼin koaikao yaole kʼoa nga kui kʼoasʼin jmeni xi skénndiaale.

¹¹ Sakʼoajin noʼyá nga kʼoatso je chjota. Je Na̱i me kʼoati tso én xi kisichjén nga tsakjákao Eva, kʼoakitsole nga koa̱n jo Niná sʼin kʼoéjna nga skoe̱ “xi ndatjín kao xi chʼaotjín” (Gén.  3:5). Nichxin xi tiyoaa ndʼaibi, nʼio nkjín chjota xi kʼoati kui kjoafaʼaitsjen sʼele kʼoa ngʼa bʼasje yaole, kʼoasʼin síkjaʼaitsjen nga tsín ʼya xi tjínnele kʼoakuitsole jmeni xi ndatjín kao xi chʼaotjín, nijejinla Niná. Nʼio nkjín chjota xi kui kjoafaʼaitsjen jebi tjíosʼele, tobʼelañá, josʼin síkjaʼaitsjen xi tʼatsʼe kjoabixan.

12. Jósʼin síkjaʼaitsjen chjota xi tʼatsʼe kjoabixan.

¹² Je Biblia kʼoatsole je xi xʼin kao xi chjoón nga katabexkón xínkjín kʼoa nga katasítjoson je én xi kitsjoale xínkjín nga chixan. Tonga kʼoati tso je Biblia nga tsín to kjoaská katabekon je kjoabixanle, itso: “Kuinga je xʼin sikʼéjnasíni je nʼaile kʼoa kao na̱le kʼoa jé chjoónle kʼoéjnakao kʼoa tojngo yao koa̱nni” (Gén. 2:24). Tonga xi kui kjoachjinele sonʼnde fitjenngi kjaʼaísʼin síkjaʼaitsjen. Kʼoatso nga tsen tsen katabajngi jme xi machjénle nga jngó jngó. Jngo libro xi kui nchja̱ni kʼianga tsjion xínkjín chjota, itso: “Kʼianga tsjoále én xínkjín xi bixan kʼoatso nga toje kjoabiya xi sikinyátʼaxinle xínkjín, tonga ndʼaibi, tjíokʼa xi kʼoatso nga kʼia sikatío xínkjín tsa tsín titsjoake koa̱nni”. Nga kʼoasʼin síkjaʼaitsjen chjota, yaa nroani nga tsín tinda bationi kʼoa tsín tinda satíoni kon. Nga kui kjoafaʼaitsjen jebi tjínle, kui bakó nga tsín jme chjíle je kjoachjinele sonʼnde.

13. Ánni nga chʼaosʼin beni Jeobá je xi ngʼakon.

¹³ Je Biblia itso: “Nʼio chʼao be je Jeobá toʼyani xi kjoangʼakon tjínle ni̱ma̱le” (Prov. 16:5). Ánni nga chʼaosʼin beni Jeobá je xi ngʼakon. Kuinga je chjota xi ngʼa bʼasje yaole kʼoa xi kʼoatsole xi kjaʼaí nga kʼoati katasʼín, jé Na̱i kjenngile. Nga nʼio ngʼakon je Na̱i, kui xi koanmele nga katabasenxkónyʼintʼale Jesús kʼoa katabexkón, ningalani be nga je Jesús tsakasenkao Niná nga kisinda ngayeje jmeni xi tjín (Mat. 4:8, 9; Col. 1:15, 16). Josʼín je chjota xi ngʼakon, kui bakó nga tsín jme chjíle je kjoachjinele sonʼnde ngixko̱n Niná.

14. Jósʼin basenkaoná Romanos 12:3 nga tsín nikʼatoné choa̱le josʼin nikjaʼaitsjeen xi titʼatsaanñá.

¹⁴ Je Biblia basenkaoná nga tsín nikʼatoné choa̱le josʼin nikjaʼaitsjeen xi titʼatsaanñá. Kʼoatso nga tsín chʼaotjín nga tsjoacha  maa yaoná, tobʼelañá, je Jesús i kitso: “Katamatsjoachai xikʼa joni tsa tijini” (Mat. 19:19). Jebi kui xi tsonile nga chósonnilee josʼin jchatokoán yaoná. Je Biblia alikui kʼoatso nga ngʼa chʼa̱sjee yaoná tikʼoajinni xi ngikʼa. Itso kjoafaʼaitsjen tsjoáná: “Ali kʼoajin tongʼatakon mao. Tosa kjoayo̱ma̱ kjiatakon nga chósonnilao nga xikʼa ngisa nda male kjoa xi tjín kaoni tsa jon” (Filip. 2:3; tʼexkiai Romanos 12:3 *).

15. Jósingái ji, jósʼin basenkaoná je kjoafaʼaitsjen xi tsjoá Biblia xi tʼatsʼe kjoangʼakon.

¹⁵ Nʼio nkjín chjota xi chjine sʼin ʼyale i̱ Sonʼnde xi besin jmeni xi tso je Biblia xi tʼatsʼe kjoangʼakon. Je kjoafaʼaitsjen xi tjínle kuinga kʼoatso nga totaon skoe̱ná je chjota kʼiatsa kʼoasʼin si̱kjaʼaitsjeen nga ngisa ngʼa tjío je xi ngikʼa. Tonga jósʼin tíbichómani nga kʼoasʼin kjoangʼakon tíkaníbason je Na̱i. A tsjoa tjío kon je chjota xi ngʼakon. A tsjoa tjíole je familiale. A tjínle miyo xi sínʼiotʼa. A ndatjío ngixko̱n Niná. Jósingái ji, jñánile kjoachjine xi ngisa nda tíbichótsjoá, a kui kjoachjinele sonʼnde axo kui kjoachjine xi ya Énle Niná nroatʼa.

16, 17. Jméni xi tsjoa báya tokoán, kʼoa ánni.

¹⁶ ʼYani xi kui fitjenngi je kjoafaʼaitsjen xi tsjoá chjota xi chjine tsole yaole, yaa mangóson jngo chjota xi xin ʼndele xi kui kjonangile jósʼin kuicho jngo ʼnde jñani mele tífi jngo chjota xi kʼoati tsín be. Nichxin nga tsakʼejna i̱ Sonʼnde je Jesús, kʼoati tsakatio je chjota xi chjine kitsole yaole. Je Jesús i kitso xi tʼatsʼe chjota jebi: “Toxkaa kjoan, kʼoa bándiaale xi xka̱. Kʼoa tsa je xi xka̱ kjoan koandiaale je xi xka̱ kjoan, tsao̱ya nga jao jña tixʼa̱” (Mat. 15:14). Xi kao Niná, je kjoachjinele sonʼnde alikui jme chjíle.

¹⁷ Nʼio nda je kjoafaʼaitsjen xi tsjoá Biblia kʼoa basenkaoná “nga bakóyaná, nga nchja̱tikaoná, nga sichoyandaná, nga sikinyáyandiaaná xi kjoakixi” (2 Tim. 3:16). Nʼio tsjoa tjío tokoán nga je naxinandále tísíchjén Jeobá nga basenkaoná nga tsínkui koanngíntjenngiaa je kjoachjinele sonʼnde (Efes. 4:14). Nkjín koya jmeni xi títsjoáná je Jeobá xi basenkaoná nga mangíntjenngiaa je kjoatéxomale. Tsee kjoanda tjínná nga kijnaná je Énle Niná, nga̱ ʼyañá nga tokui xi ngisasa nda koandiaaná.