KJOAʼMIYA XI CHOTʼAYA 22
Katamaná nga nda chótʼayá
“Jméni nga jchasínio xi nda tjín [xi ngisa nʼio chjíle]” (FILIP. 1:10).
KJOAJNDA 35 Kui kuenta sʼiaan xi ngisa nʼio chjíle
XI TÍNCHJA̱NI *
1. Ánni nga ñʼai ma kʼanile je ndsʼee kʼianga kotʼaya.
NICHXIN xi tiyoaa ndʼaibi ñʼai maná nga bijnyiʼá yaoná. Nkjín ndsʼee xi síxá bʼajnda nichxin kʼoa tochoa̱ sokóʼale je familiale. Kʼoati nkjín ndsʼee xi nkjín ora síkʼaya nga fi jñani síxá kʼoa kao nga nroani. Kʼoa tjíokʼa xi nʼio ai xá sʼín. Kʼianga jemaxon, je ndsʼee jebi jenʼio kijtale kʼoa tsín titsoni kon nga skótʼaya.
2. Kʼiáni chʼasjeʼai nichxin nga chotʼayai.
2 Tonga machjén nga chʼa̱sjeʼaa nichxin nga ñaki nda chótʼayá je Énle Niná kʼoa kao je xo̱n xi tsjoáná je naxinandále. Kʼianga kʼoasʼiaan ngisaa koa̱nmiyosaa Jeobá kʼoa koaan kuiyoaa ngantsjai nichxin (1 Tim. 4:15, 16). Tjínkʼa je ndsʼee xi tanjio binyatje̱n nga kotʼaya, kʼianga tosʼa chon jñájñá, nga kjesa jme xi kjaʼaí síkjaʼaitsjenjin. Kʼoa tjíokʼa xi kʼia kotʼaya ngotjo nga jemaxon ya jñani tojñá chon.
3, 4. Jméni xi tíbʼantjaiyajin je xi bʼasje naxinandále Niná, kʼoa ánni.
3 Ngatsʼiaa ʼyañá nga nʼio tjínle kjoandosin nga si̱kʼayaa nichxin kʼianga chótʼayá. Tonga jméni xi chótʼayá. Tsakui nichxin kʼoasʼin nikjaʼaitsjeen nga nʼio nkjín koya jmeni xi tjínnele kʼoéxkiaa kʼoa ñʼai maná nga bʼexkiaa ngayeje jmeni xi síkasénná je naxinandále Niná. Tjíokʼa ndsʼee xi bʼéxkia ngayeje, tonga kʼoati tjíokʼa xi ñʼai male nga kʼoasʼín. Je Cuerpo Gobernante majinle jebi, kʼoa kuinga kʼoasʼin tsakʼéndajinni nga tochoasa xo̱n katabitjo kʼoa kao xi satíotʼa ya Internet.
4 Tobʼelañá, alikui tibitjoni je Anuario de los testigos de Jehová, tonga koaan kui si̱chjén je página xi tíjnaná ya Filip. 1:10). Kuila kataʼyaa jméni xi ngisa kʼoailee kjoandosin kʼoa jméni xi koa̱n sʼiaan nga ngisa nda koa̱njinná kʼianga chótʼayá je Biblia.
Internet, jw.org®, kʼoa kao programa xi tsʼe JW Broadcasting® xi xki̱ sá satío, jñani nʼio nkjín choa̱ faʼaitʼa xi koa̱n tsjoánganʼioná. Ndʼaibi, kʼianga xki̱ nó to jansa Xo̱n xi Bájinkonná xi sʼeyole chjota kao ¡Despertad! bitjo. Kʼianga kʼoasʼin tíbʼantjaiyajin jebi, ali tsakuijin kʼoakjimani nga tokjaʼaíla xá si̱kʼayalee nichxinná, machjén nga kui kʼoailee kjoandosin jmeni xi ngisa nʼio chjíle (JMÉNI XI NGISA KʼOAILEE KJOANDOSIN KʼIANGA CHÓTʼAYÁ
5, 6. Jméni xi nʼio nda chótʼayá.
5 Je xi ngisa kʼoailee kjoandosin kuinga nyaon nyaon si̱kʼayaa nichxin nga chótʼayá je Énle Niná. Ndʼaibi, nga satíoná kjoajtín nga jinle xomana jekoanchoaya jotjín capítulo maxkia je Biblia. Nga kʼoasʼin kisʼendajin ngisaa tsjoáná nichxin nga nikjaʼaitsjenjiaan kʼoa fasjaiyaa xi kjaʼaísanile. Kʼianga chótʼayá ali tsa tokuijin xi tsonile nga tokʼoéxkiaa je capítulo xi bʼakaole nga xki̱ xomana, kuinga katabichókajin ni̱ma̱ná je Énle Niná kʼoa nga koa̱nnchriantʼasalee je Jeobá (Sal. 19:14).
6 Jmésani xi kʼoati machjén nga nʼio nda chótʼayá. Machjén nga nda kuiyondaa nga chótʼayá je kjoaʼmiya xi faʼaitʼa Xo̱n xi Bájinkonná, Nga chotʼaya Biblia kʼoa kao kjoajtín xi sʼená nga jinle xomana. Kʼoati machjén nga kʼoéxkiaa je Xo̱n xi Bájinkonná xi sʼeyole chjota kao ¡Despertad!
7. A si̱kʼajenlee tokoán kʼiatsa tsín tsjoáná nichxin nga bʼexkiaa ngayeje xi faʼaitʼa ya Internet kʼoa kao JW Broadcasting.
7 Tonga tsakui nichxin tjínkʼa xi i̱ kuitso: “Jótosikoa ngayeje xi faʼaitʼa ya jw.org kʼoa kao JW Broadcasting nga̱ nʼio nkjín mani”. Si̱kjaʼaitsjenjinla choa̱ jebi. Tsa ya jinndi̱tsi̱n tiyoaa jñani nʼio nkjín koya tsojmi tjín xi ma chine, tokʼaa xi chjaʼajiaan nga chinee. Tikʼoasʼinni, kʼiatsa tsín tsjoáná nichxin nga bʼexkiaa ngayeje xi faʼaitʼa ya Internet alikui koa̱n si̱kinroajeen tokoán. Koaan kʼoéxkiaa kʼoa chótsenlee jokji tjen kʼoakoa̱nná. Tonga jósʼin tíjna nga chotʼayá kʼoa jméni xi koa̱n sʼiaan nga koa̱njinná xi chotʼayá.
KJOAMAA SʼENGI NGA CHOTʼAYÁ
8. 1) Jósʼin koa̱n kuiyondaa nga chótʼayá Xo̱n xi Bájinkonná. 2) Jósʼin kuichomani tsa kʼoasʼin chótʼayá.
8 Kʼianga chotʼayá ali tsa tokuijin nga bʼexkiaa kʼoa nga bandiaangilee. Kui xi tsonile nga si̱jinkaonilee yaoná jmeni xi kʼoéxkiaa. Kataʼyala jósʼiaan nga chótʼayá Xo̱n xi Bájinkonná. Títjon kui kuenta sʼiaan ya jña xi tínchja̱ni tso, jña fitsʼiani kjoaʼmiya. Xijekoa̱n, kʼoéxkiaa je título, subtítulo kʼoa kao kjoachjonangi xi faʼaitʼa jña fetʼani. Kʼoa bijbi kʼoéxkiaa ngakjijngo kjoaʼmiya kʼoa si̱jinkaonilee yaoná. Kuenta sʼiaan je én xi nʼio tínchja̱ni, kʼoa me tontsjai nga ya faʼaitʼa jña fitsʼiani nga jngó jngó párrafo. Kʼianga kʼoéxkiaa, kuenta sʼiaan jmeni xi tso je párrafo kao je subtítulo kʼoa josʼin mangóson kao ngayeje kjoaʼmiya. Kʼoétʼaxoaan je én xi tsín majinná kʼoa jmesani xi mená kjoásjaiyaa.
9. 1) Ánni machjénsíni nga nʼio kuenta sʼiaan je textole Biblia kʼianga biyondalee je Xo̱n xi Bájinkonná, kʼoa jósʼin tjínnele chótʼayajiaan. 2) Tojo tso Josué 1:8, jmésani xi koa̱n sʼiaan kʼianga kʼoéxkiaa je textole Biblia.
9 Nga chotʼaya je Xo̱n xi Bájinkonná kui kjoanni je Biblia chotʼayá. Kuinga machjénni nga nʼio kuenta sʼiaan je texto xi faʼaitʼa kʼoa ngisaa je xi maxkia ya jinjtín kʼoa josʼin Josué 1:8). *
tsoya ya párrafo je én xi faʼaitʼa je textole Biblia. Xi ijngosani, si̱kʼayaa nichxin nga si̱kjaʼaitsjenjiaan je texto xi faʼaitʼa kʼoa jósʼin koasenkaoná (tʼexkiaiJon xi xijchá mao, takoyalao je ʼndíxtino josʼin skótʼaya (Chótsenlai párrafo 10) *
10. Tojo tso Hebreos 5:14, je xi xijchá ma ánni nga tjínnenile skótʼayajtín ya niʼyale nga kuitsoyale je ʼndíxtile josʼin skótʼaya kʼoa josʼin koasjaiya tsa jmeni.
10 Kuila kataʼyaa ndʼai tʼatsʼe nga chotʼayajtían Énle Niná ya niʼyaná. Je xi xijchá ma kui xi mele nga tsjoa katasatío kon je ʼndíxtile nga kotʼayajtín. Kʼoa ningalani je xi xijchá ma tongini bʼéndajin jmeni xi skótʼaya, alikuikjoan machjén nga nʼio tse jmeni xi sʼin. Koaan kui skótsenle je programa JW Broadcasting xi xki̱ sá satío kʼoa tsa jme xi sindachoyaje̱, jolani je arcale Noé. Tonga kʼoati machjén nga je xi xijchá ma katabakóyale je ʼndíxtile josʼin skótʼaya. Je xtiʼndí tjínnele koa̱nle koationda jmeni xi chotʼayá kʼianga satíoná kjoajtín kʼoa nga koasjaiya tsa jmeni xi kafáoyani ya ndʼiaskuela (tʼexkiai Hebreos 5:14). * Kʼiatsa sikʼayale nichxin nga skótʼaya jme xi tínchja̱ni Biblia, ngisaa choa ñʼai koa̱nle nga kuinyaño nga sʼejna je kjoajtín kao kjoajtíntse jñani tsín nanda video chotsenlee. Je xijchá kui kuenta sʼin nga skótʼaya josʼín je ʼndíxtile kʼoa jotjín nóle.
11. Ánni machjénni nga kʼuínyalee je chjota xi bʼailee estudio josʼin nga nda skótʼaya Biblia.
11 Je chjota xi bʼailee estudio kʼoati tjínnele koa̱nle josʼin skótʼaya. Nga títjon, tsjoa maná nga bándiaangile je xo̱n xi tíkotʼaya kʼoa tsakuije̱ xi chotʼayá ya kjoajtín. Tonga kʼoati machjén nga kʼuínyalee josʼin skótʼaya nga toje kʼoa nga koa̱nle koasjaiya tsa jmeni. Tsa kʼoasʼin, kui xi kuinyakao nga tsín tokjoan kjaʼaí xi skónangile jmeni xi sʼin tsa jme kjoa kjoaʼatojin, koaanle nga jesoa skótʼayajin je xo̱n xi kjioná tʼatsʼe jmeni xi koa̱n sʼin.
SI̱KJAʼAITSJENJIAAN JOSʼIN BASENKAONÁ XI CHOTʼAYÁ
12. Jmé xá chotʼayañá.
12 Kʼiatsa tsín tsjoachaa nga chotʼayá, tsakui nichxin kʼoasʼin si̱kjaʼaitsjeen nga tsínkʼia koa̱ntsjoachaa nga chótʼayá. Koaan tongotjo chótʼayá nga títjon, kʼoa xijekoa̱nni sa tse sa tse chótʼayá. Kuenta sʼiaan
jme xá chotʼayañá. Kui xi mená nga ngisa koa̱nmiyosaa je Jeobá. Tonga kʼoati koa̱n kui chótʼayajiaan tsa jmeni xi kiskonanginá je chjota kʼoa tsakuije̱ nga kjoásjaiyaa tsa jmeni xi kjimakjáojinná.13. 1) Jmé xi koa̱n sʼin jngo ti nga sitoánntjai je kjoamakjainle ya ndʼiaskuela. 2) Jósʼin koa̱n si̱tjosoán je kjoafaʼaitsjen xi faʼaitʼa Colosenses 4:6.
13 Jngola choa̱ kataʼyaa tʼatsʼe jngo ti xi skuela tsoʼba. Ngatsʼi compañerole kui makjainle tʼatsʼe evolución. Ti jebi mele kuitsoya jotso je Biblia xi tʼatsʼe evolución, tonga kʼoasʼin síkjaʼaitsjen nga tsín be jokuitso. Tjínnele nga koasjaiya xi tʼatsʼe jebi. Kʼianga skótʼaya, koaan kui títjon koasjaiya jmeni xi sitaja kjoamakjainle tʼatsʼe nga je Niná kisinda ngayeje jmeni xi tjín. Kʼoa xi majaoni, nga koa̱nle kuitsoya jmeni xi tso je Biblia (Rom. 1:20; 1 Ped. 3:15). Jmeni xi koa̱n sʼin kuinga sikjaʼaitsjenjin ánni nga tʼatsʼe evolución makjainnile je xti compañerole, kʼoa xijekoa̱n, koaan kui koasjaijin je xo̱n xi kjioná. Nga skótʼaya koa̱njinle nga tsínni ñʼai tíjna nga sitoánntjai kjoamakjainle. Nga̱ je chjota kuinga tʼatsʼe evolución makjain sakʼoanile nga je chjota xi bexkón kʼoatso nga ñaki kʼoatjín jebi. Tonga nga ngisa nda koa̱njinle ti jebi jokjoantjínni xi tʼatsʼe evolución, koaan kuitsoyale tsa ʼya xi kui skónangile (tʼexkiai Colosenses 4:6). *
TSJOACHA KATAMAA NGA CHÓTʼAYÁ
14-16. 1) Jméni xi koa̱n sʼiaan nga ngisa nda koa̱njinná jngo librole Biblia xi tsín nanda ʼyaxkoaan. 2) Jósʼin basenkaoná je texto xi faʼaitʼa ibi, nga ngisa nda majinná je librole Amós (chótsenlai je recuadro “ Nda kataʼyaa xi tʼatsʼe choʼndale Niná xi faʼaitʼa Biblia”).
14 Si̱kjaʼaitsjenla tsakuilani tichotʼayajiaan nga sʼe̱jnaná kjoajtín tʼatsʼe jngo profeta xi toʼndí kji libro kiski kʼoa tsakui nichxin tsín nanda ʼyaa xi tʼatsʼe. Je xi títjon sʼiaan kuinga chótʼayajiaan jmeni xi kiski profeta jebi. Jókoa̱n sʼiaan.
15 Je xi títjon, kuinga si̱kjaʼaitsjenjiaan jméni xi ʼyaa tʼatsʼe je profeta xi kiski je libro, jókoankjoan, jñáni tsʼe kʼoa jmé xá xi kisʼin. Kʼianga jchaa jebi, koa̱njinná jotso je én xi kiski kʼoa jme choa̱ xi kisichjén. Kʼianga kʼoéxkiaa, kjoásjaijiaan je én xi koasenkaoná nga ngisa nda jchaa jokoankjoan je profeta xi kiski.
16 Xijekoa̱n, kjoásjaiyaa kʼiáni kichji libro jebi. Nga ngisa choa ñʼai koa̱nná, ya kjoásjee jñani “Tabla de los libros de la Biblia” tso, xi ya faʼaitʼa jña fitsʼiani je Biblia Traducción del Nuevo Mundo de las Santas Escrituras (con referencias). Kʼoati koa̱n chótʼaa ya kjoaʼmiya 3 xi tsʼe folleto Xo̱n xi basenkaoná nga chotʼayajiaan Énle Niná jña nchja̱ni xi tʼatsʼe je profeta kao rey xi tsakatio nichxin kjoatse. Nga kui tínchja̱ni je libro je én xi tongini kinokjoa, kuijin kjoásjaiyaa jóchon nga kui nichxin. Kʼoati koa̱n kjoásjaiyaa jméni xi koanmele je profeta nga katasíkʼantjaiya yaole chjota kʼoa ʼyáni xi kʼoati kʼia tsakatio. Nga koa̱njinyejená, tjínnejinle kʼoéxkiasaa xi kjaʼaí librole Biblia. Tobʼelañá, kʼianga nda koa̱njinná jokoanchon nichxin nga tsakʼejna je profeta Amós, koaan kʼoéxkiaa je libro xi tsʼe 2 Reyes kʼoa kao 2 Crónicas xi ya faʼaitʼa ya referencias marginales xi tsʼe Amós 1:1. Kʼoati koa̱n kʼoéxkiaa je librole Oseas, xi kʼoati kʼia tsakʼejna nga tsakʼejna Amós. Kʼianga kʼoéxkiaa ngayeje jebi, ngisaa koa̱njinná jokoanchon nichxin nga tsakʼejna Amós (2 Rey. 14:25-28; 2 Crón. 26:1-15; Os. 1:1-11; Amós 1:1).
KUENTA SʼIAAN NGAYEJE JMENI XI KʼOÉXKIAA
17, 18. Tʼeyanajmí jósʼin basenkaoná nga ngisa tsjoacha maa nga chotʼayá Biblia nga kuenta nʼia ngayeje jmeni xi tso. Tichjain je choa̱ xi faʼaitʼa je párrafo kʼoa tsa kjaʼaísanile.
17 Tjínnele kuenta sʼiaan ngayeje jmeni xi tso je Biblia kʼianga kʼoéxkiaa. Tobʼelañá, tsa yala capítulo 12 xi tsʼe Zacarías tibʼexkiaa, jñani kui tínchja̱ni nga ni̱kʼien je Mesías (Zac. 12:10). Ya versículo 12 kʼoatso nga je familiale Natán nʼio skíʼndá nga kuiyá je Mesías. Nga kuenta sʼiaan jebi koaan chjónangilee yaoná: “Ánni nga ñatjen síkʼaxki̱ni je Mesías kao je familiale Natán. Jñásani koasjaiya”. Kʼiatsa kuijnyísjaiyaa jchañá nga je referencias marginales yaa síkasénná 2 Samuel 5:14, jñani kʼoatso nga je Natán tile koanni je David. Xi ijngo referencia yaa faʼaitʼa Lucas 3:31, TNM, jñani kʼoatso nga je Jesús yaa kitjenni je Natán, xi chjotajchíngale koanni María (chótʼai Xo̱n xi Bájinkonná xi tsʼe agosto 2017, página 32, párrafo 4). Nʼio tjínle kjoandosin ngayeje jebi. ʼYañá nga tongini kʼoasʼin kinokjoa nga ya ntje̱le David kinroani je Jesús (Mat. 22:42). Tonga tsʼato 20 koanni je xtile David. Kʼianga kuenta nʼia jebi, alikui tokʼoamaná jmeni xi kitso je Zacarías, nga ñaki tojekjoan kisikʼaxki̱ je niʼyale Natán kʼianga skíʼndá nga ni̱kʼien je Jesús.
18 Ijngola choa̱ kataʼyaa. Ya capítulo 1 xi tsʼe Lucas, kʼianga kichosíxatʼa ánkje Gabriel je María i kitsole tʼatsʼe je ʼndí xi sʼe̱le: “Jebi chjotajeya koa̱n, kʼoa kʼuínle ʼndíle Niná xi nʼio ngʼa tíjna. Je Nainá Niná tsjoále yáxilele David nʼaile. Jé koatexoma ntsjaile chjota ndʼiale Jacob” (Luc. 1:32, 33). Tsakui nichxin tokui kuenta sʼiaan nga kʼoakitso je ánkje nga “ʼndíle Niná xi nʼio ngʼa tíjna” kʼuínle je Jesús. Tonga kʼoati kitso nga rey koa̱n je Jesús. Koaan chjónangilee yaoná jósʼin kisikjaʼaitsjen je María kʼianga kinrʼoé én jebi. A kʼoasʼin kisikjaʼaitsjen nga je Jesús kʼoéjnangajaole Herodes, kʼoa tsa jeje̱ xi koatexoma nga koa̱nskanni. Axo kui kisikjaʼaitsjen nga kʼoati ya koatexomakao Jesús kʼoa nga ya ndʼiabasen koationi ngatsʼi familiale. Alikui kʼoatso je Biblia tsakui jebi kiskonangi je María. Kʼoati likui jña kʼoatso tsakui kisijé nga kʼoati jngo xángʼa katabʼaile nga koatexoma Jesús, tojo kisʼin je xi jao chjotatjenngile Jesús (Mat. 20:20-23). Jebi kui tsoyaná nga nʼio nangitokon koan je María.
19, 20. Tojo tso Santiago 1:22-25 kao 4:8, jméni xi kuenta sʼiaan kʼianga chótʼayá.
19 Kuenta sʼiaan nga kui chotʼayañá Biblia kao je xo̱n xi kjioná xi Énle Niná faʼaitʼa nga ngisasa koa̱nchriantʼalee je Jeobá. Tonga kʼoati kui xi mená nga jchaa jókjoaan kʼoa jmésani xi koa̱n si̱kʼantjaiyaa yaoná nga sa̱sénle Niná xi tʼatsaan (tʼexkiai Santiago 1:22-25; * 4:8 *). Kʼianga chótʼayá, machjén nga si̱jélee je nganʼiotsjele Jeobá. Kʼoati machjén nga kʼoakʼuínlee nga katabasenkaoná nga katamajinná jmeni xi tichotʼayá kʼoa nga kʼoasʼin jchatokoán yaoná josʼin bekonná je Niná.
20 Kʼoakatamakjoaan jokoankjoan je choʼndale Niná xi bʼaxki̱ ya Salmo 1:2, 3, jñani i̱ tso: “Kui tsjoake je kjoatéxomale Jeobá, kʼoa chéché bʼéxkia nichxin kao nitje̱n. Kʼoa [...] tojmeni xi sʼin nda kuichotsjoá”.
KJOAJNDA 88 Takonái je ndiaali
^ párr. 5 Je Nináná Jeobá nkjín koya jmeni xi tsjoáná xi ma chotsenlee, bʼexkiaa kʼoa chotʼayá. I̱ kjoaʼmiya jebi, koasenkaoná nga jchaa jméni xi chótʼayá kʼoa tsjoáná kjoafaʼaitsjen jósʼiaan nga nda koa̱njinná jmeni xi chótʼayá.
^ párr. 9 Josué 1:8: “Je xo̱n kjoatéxoma jebi tjínneli nga ntsjaintsjai kʼoéxkiai. Kʼoa nichxin kao nitje̱n tjínneli chéché kʼoéxkiai, ánni nga nda si̱tjosonsíni ngayeje xi tjítʼa. Tsa kʼoasʼiain nda kuitjo tojmeni xi sʼiain kʼoa ñaki nda sʼiain”.
^ párr. 10 Hebreos 5:14: “Tonga je tsojmi xi taja, kui xi machjénle je xi jekoanjchá, xi nʼio koanngakaole je kjoafaʼaitsjenle nga male faʼájin je xi nda, kʼoa je xi tsʼen”.
^ párr. 13 Colosenses 4:6: “Je énno ñaki nda tinókjoao kao kjoanda. Katamale joni tsa tsojmi xi nda chine, jméni nga jchasínio josʼin machjén nga chjakao nga jngójngó chjota”.
^ párr. 19 Santiago 1:22-25: “Kʼoatʼiaon jo tso je énbi, ali tonoʼyajinlao nga kʼoasʼin tichʼanachalao yaono. 23 Tsa jngo xi nrʼoé énbi, kʼoa likui kʼoasʼín jo tso, jebi kʼoakjoan joni tsa jngo chjota xi jngo cho̱tsín kotsensʼennile nkjaín. 24 Je kiskotsenle yaole, ki, kichajin ndi̱to̱nnile jo kji. 25 Tonga jó tonda koa̱nle je xi nda básjaijin je kjoatéxoma xi ñaki kjoakixi, xi síkʼéyondaíná. Jó tonda koa̱nle je xi bʼejnanʼiojin, nga tsín tsa tonrʼoé, kʼia chajinle, tonga kʼoasʼín jo tso”.
^ párr. 19 Santiago 4:8: “Tichriantʼalao Niná, kʼia kʼoati je sichriantʼano nga jon. Xi chjotajáo, titsjao ndsao, kʼoa jon xi jao bʼaotakon titsjao ni̱ma̱no”.
^ párr. 66 XI TÍNCHJA̱NI SÉN XI FAʼAITʼA: Je xi xijchá ma tongini tjíotsoyale ʼndíxtile nga tjíobationdale nga chotʼaya Xo̱n xi Bájinkonná.
^ párr. 68 XI TÍNCHJA̱NI SÉN XI FAʼAITʼA: Jngo ndsʼee kui tíbásjaiya jmeni xi kiski je Amós. Je dibujo xi faʼaitʼa ya jto̱n yátsʼi̱n kui tsoya jmeni xi tísíkjaʼaitsjen nga tíbʼéxkia textole Biblia xi kui tínchja̱ni xi tʼatsʼe Amós.