Jngo tichjaa xi Sara ʼmi * itso: “Toxá anña nga soana. Kuinga tsín tsoni tokoan nga ya batejnajinle je chjota xi kʼoatsokixi jotjío kon. Tonga kʼianga ya tijnajinle je chjota xi ndʼé kʼoa xi nangitokon nda sʼe tokoan. Alikui ñʼai mana nga fakaonajmía kʼianga kʼoaxinle jotjín tokoan kʼoa nga bʼeyanajmíle jme kjoa xi tifaʼatojian. Ndʼé je miyona”.

Tojo tso je Sara sasénná jokjoan jngo chjota xi bakó kjoaʼindajintakon, xi tsonile jngo chjota xi ndʼé. Kʼoa je Jeobá tsjoake je chjota xi kʼoakjoan. Je Biblia itso: “Katasʼeno [...] kjoandʼé” (Col. 3:12). Jósʼin tíjna nga ndʼé maa. Jósʼin tsakakó Jesús nga ndʼé koan. Kʼoa jósʼin koasenkaoná nga tsjoa sa̱tío tokoán.

Kʼianga ndatjín kon jngo chjota yaa nroani nga ndʼé ma. Jngo chjota xi kʼoakjoan alikui totaon be xi kjaʼaí kʼoa bakó kjoanda. Ngasin nganda bʼéndajin jme kjoa xi faʼatojin.

Jngo chjota xi ndʼé bakó kjoanʼiojin. Kʼianga én griego, je én xi “kjoaʼindajintakon” sʼin jaʼatoya ya Biblia kʼiaa machjén nga nchja̱ni jngo naxínjñá xi jekoanndʼé. Jngo naxín xi jekoanndʼé tojo kʼoakji nganʼio tjínle, tonga jemale josʼin síchjén nganʼiole. Kʼoatisʼinni tsanda ñá, kʼianga ndʼé maa, maná chjoéxkoá yaoná kʼoa ndasʼin biyoaa kao xi ngikʼa.

Tsakui nichxin kʼoasʼin nikjaʼaitsjeen nga tsín kʼoasʼin kichʼañá nga ndʼé maa. Xi ijngosani, nga ngotjo síjtinile yaole chjota xi tiyojinlee ñʼai maná nga ndʼé maa (Rom. 7:19). Alikui choa ñʼai tíjna kʼianga ndʼé maa, tonga jé nganʼiotsjele Jeobá koasenkaoná kʼianga tsín si̱kʼajenlee tokoán (Gál. 5:22, 23). Ánni nga tjínnenile kʼoénelee yaoná nga ndʼé katamaa.

Sasénná josʼín chjota xi ndʼé. Tojo tso Sara, xi jenása kanikʼaxkiaa, nda satío tokoán nga ya biyojinlee chjota xi ndʼé. Je Jesús kʼoasʼin tsaʼyale nga ndʼé koan kʼoa nga tsakakó kjoanda (2 Cor. 10:1). Saʼnda je xtiʼndí xi tsín bexkon Jesús koanmele nga ya tsakatiokao (Mar. 10:13-16).

Nga ndʼé maa basenkaoná ñá kʼoa binyakao xi ngikʼa. Tsa ndʼé koaan, koasenkaoná nga tsín ndi̱to̱n koa̱nsiná kʼoa tsín ndi̱to̱n si̱jtilee yaole (Prov. 16:32). Tsa kʼoasʼiaan, nda  sa̱tío tokoán nga̱ tsínjin ʼya xi si̱kiʼoaan kjoafaʼaitsjenle, ngisaa je chjota xi tsjoachaa. Xi ijngosani, kʼianga ndʼé maa binyakao xi ngikʼa. Kʼoa nga tsín ndi̱to̱n nijtilee yaoná alikui ʼya xi miʼaon kjoafaʼaitsjenle.

Ninga nʼio tse xá kisʼele Jesús kʼoa ninga tsín nanda koanʼale, ndʼé koan ngantsjai. Nga kui nichxin, nʼio nkjín chjota xi ñʼai tjíosíjchá yaole kʼoa xi nʼio tse kjoa tjíojin, xi nganʼio koanchjénle. Tsakinyakaojin nga i̱ kitsole je Jesús: “Nroachonnáo, [...] nga ndʼénía, kʼoa yo̱ma̱ kjiakoan” (Mat. 11:28, 29).

Jósʼin chjénngilee Jesús nga ndʼé koan. Xi koasenkaoná kʼiaa nga chótʼayá je Énle Niná nga jchaa josʼin tsabekon Jesús je chjota kʼoa jokisʼin kʼianga ñʼai tjín kjoa jaʼatojin. Xi ijngosani, kʼianga kjoa kuitjátojiaan kʼoénelee yaoná nga kʼoasʼiaan jokisʼin je Jesús nga ndʼé koan (1 Ped. 2:21). Janla koya kataʼyaa jmé xi tsakasenkao je Jesús nga ndʼé koan.

Ni̱ma̱le kinroajinni je Jesús nga nangitokon koan. Je Jesús i kitso: “Ndʼénía, kʼoa yo̱ma̱ kjiakoan” (Mat. 11:29). Je Biblia ñatjen síkʼaxki je kjoanangitokon kao nga ndʼé maa, nga̱ jngo chjota xi ndʼé kʼoati bakó kjoanangitokon (Efes. 4:1-3). Ánni nga kʼoabixónsíñá.

Kʼianga nangitokon maa basenkaoná nga tsín tokjoan nijtilee yaoná. Jókisʼin je Jesús kʼianga kʼoatsakʼinle nga “nʼio kjen” kʼoa nga “nʼio ʼbi bino”. Kao kui jokisʼin tsakakóni nga tsín kʼoatjín jmeni xi tsakʼinle, ndʼé koan kʼoa i kitso: “Je kjoachjine kao xále ʼyanile nga ñaki kʼoatjín” (Mat. 11:19, TNM).

Tsa ʼya xi chʼaosʼin sikʼaxki̱ná tʼatsʼe josʼin tsen yaoná kʼoa jñani tsaan, alikui ndi̱to̱n si̱jtilee yaoná. Jngo ndsʼee xi Peter ʼmi, xi chjotajchínga sʼin tíjna ya Sudáfrica, itso: “Kʼianga jme xi ʼmina xi tsín sasénna, kui sikjaʼaitsjen jósʼin tsa jelani Jesús”. Je ndsʼee jebi kʼoatso nga kjimale jotísʼín nga tsín ndi̱to̱n síjtile yaole.

Je Jesús koanjinle nga chjotajée maa. Je chjotatjenngile Jesús tsakʼénele yaole nga kui kʼoakisʼin xi ndatjín, tonga sakʼoaa ñʼai koanle nga̱ chjotajée koan. Tobʼelañá, je nitje̱n tongini nga tojeme ni̱kʼien Jesús, je Pedro, Santiago kao Juan alikui kisinʼio kon. Je Jesús kʼoakitso nga “je espírituná tíjnanda, tonga je yaoná tsínle nganʼiojin” (Mat. 26:40, 41). Nga be Jesús nga chjotajée ma je pastrole, alikui kisijtile yaole.

Kataʼyala tʼatsʼe jngo tichjaa xi Mandy ʼmi. Ngasʼa ñaki tokui kotsenle jñani chʼao sʼín xi ngikʼa. Tonga ndʼaibi kui choa̱le Jesús fitjenngi nga ndʼé kjima. Itso: “Kui kuenta sʼian nga chjotajée maa ngatsʼiaa, kʼoa xi ngisa kuenta sʼian kui jñani nda sʼín xi ngikʼa, tojo sʼín je Jeobá”. Je tichjaa jebi bakó kjoamatokon tojo kisʼin je Jesús. Tsa kʼoati sʼiaan tsanda ñá, ngisaa choa ñʼai koa̱nná nga ndʼé koaan.

Jé Niná kisinʼiotʼa yaole je Jesús. Kʼianga tsakʼejna i̱ Sonʼnde, kiskale ninga totaon tsaʼya. Alikui nda tsʼaxki̱, kichʼasjengi kʼoa kjoañʼai kinikjaʼá. Ninga kʼoalani koantʼain, ndʼé koan kʼoa yaa “kiskanitʼale kjoa je xi bʼéndajin kao kjoakixi” (1 Ped. 2:23). Je Jesús be nga je Nʼaile xi tíjna ngʼajmi sikuinda kʼoa nga je tsjoále kjoañʼai nga kuicho nichxin je xi totaon tsabe.

Tsa si̱jtilee yaoná kʼianga ʼya xi josikaoná, alikuijin ndasʼin kuichomani kʼoa koa̱ntsejin je kjoa. Kuinga i̱ tsoni je Biblia: “Je chjota xi majtile likui sʼín xi kjoakixi ngixko̱n Niná” (Sant. 1:20). Ninga tjen ndiaale nga yaoná si̱jtilee, tsakui nichxin likui kixi tíjna jmeni xi sʼiaan nga̱ chjotajée maa.

Jngo tichjaa xi Cathy ʼmi, xi Alemania tsʼe, kʼoasʼin kisikjaʼaitsjen nga tjínnele sitoánntjai yaole. Tonga kʼianga je Jeobá kisinʼiotʼa yaole alikui tikʼoasʼin kisikjaʼaitsjenni. Itso: “Alikui tikʼoasʼin sikjaʼaitsjenña nga tjínnele sitoánntje yaona. Nga̱ kuenta tísʼín je Jeobá jmeni xi kjima, kui xi tíbasenkaona nga ndʼé kjima”. Tsa je Niná si̱nʼiotʼaa tojo kisʼin je Jesús kʼianga tsín  kixi tíjna jme xi koa̱ntʼeen, kui xi koasenkaoná nga ndʼé koaan.

Je Jesús kʼoakitso nga tjínnele ndʼé koaan tsa mená nga tsjoa sa̱tío tokoán. Kʼoakitso nga tsjoa tjío kon je chjota xi ndʼé (Mat. 5:5). Kataʼyala josʼin basenkaoná nga ndʼé maa kʼianga kjoa bitjatojiaan.

Ngisaa choa kjoa sʼele xi jechixan. Jngo ndsʼee xi Robert ʼmi, xi Australia tsʼe, itso: “Sakʼoaa toxkia tsakjakoa je chjoónna ninga tsínni kʼoatjín tokoan. Tonga kʼianga jetoxkia kanokjoaa, alikui tijo ma nʼiañá. Kʼiaani kʼoamana nga ʼbe jokji síkiʼaon chjoónna jmeni xi kaxinle”.

Ngatsʼiñá nga sakʼoa toxkia nokjoaa. Kʼoa kʼianga tsín nikjaʼaitsjeen jmeni xi bixoán, sakʼoaa tse kjoa bichómani (Sant. 3:2). Tsa ndʼé maa kui xi koasenkaoná nga tsín ndi̱to̱n si̱jtilee yaoná kʼoa nga tsín toxkia kuinókjoaa (Prov. 17:27).

Je Robert tsakʼénele yaole nga tsín tokjoan kisijtile yaole kʼoa koanle kiskoéxkó yaole. Itso: “Ndʼaibi, kʼianga jme kjoa sʼena kao chjoónna, ngasin nganda nrʼoele kʼoa ngasin nganda fakoa, kʼoa alikui tokjoan sijtile yaona. Nga kʼoasʼian ngisaa nda tiyuijin”.

Ngisaa nda biyoaa kao xi ngikʼa. Je xi ngotjo síjtinile yaole alikui nanda miyo sʼele. Tonga je xi ndʼé nda batio kao xi ngikʼa (Efes. 4:2, 3). Je Cathy, xi jenása kanikʼaxkiaa, itso: “Nga ndʼé kjima tsjoa sʼe tokoan nga fakaonajmía je chjota, ninga tjínkʼa xi tsín sasénna josʼín”.

Basenkaoná nga nda sʼe tokoán. Je Biblia kʼoatso nga “je kjoaʼisentakon xi ngʼá nroani” yaa tojngo yʼa xínkjín nga ndʼé maa kʼoa nga kjoanyʼán fasjee (Sant. 3:13, 17). Jngo chjota xi ndʼé tjínle “jngo ni̱ma̱ xi tojbi” (Prov. 14:30). Jngo ndsʼee xi Martin ʼmi, xi nʼio tíbʼénele yaole nga ndʼé kjima, itso: “Ndʼaibi, alikui kʼoasʼin sikjaʼaitsjen nga toʼan kuitjosonna jmeni xi xian kʼoa alikui tinʼio sijtinile yaona, kʼoa ngisaa nda tísʼe tokoan kʼoa tsjoa tjínna”.

Machjén nga kʼoénelee yaoná nga ndʼé katamaa. Jngo ndsʼee xi kʼoatso nga tojo nʼio ñʼai male nga ndʼé ma, kʼoa nga sakʼoa tojo nʼio síjtile yaole. Tonga je Jeobá kʼoatsoná nga ndʼé katamaa kʼoa koasenkaoná nga kʼoakoankjoaan (Is. 41:10; 1 Tim. 6:11). Je Biblia itso: “Je soa Niná sindayano, [...] tsjoáno nganʼio” (1 Ped. 5:10). Kʼoa jokji nga koai nichxin, tosi tonda koakoá je “kjoandʼé kʼoa kao kjoaʼindajintakon joni tsa tsʼe Cristo”, tojo kisʼin je pastro Pablo (2 Cor. 10:1).