1. Jókitso je Jesús tʼatsʼe kjoanyiná xi tsʼe ngʼajmi.

ALIKUI to ngayeje kjoatjao xi nʼio chjíle nga matsen. Kʼianga kinchja̱ya je Jesús ya jngo sonnindo kui kinchja̱ni tʼatsʼe kjoanyiná xi tsʼe ngʼajmi xi ngisa chjíle tikʼoajinni tsojmi xi tjín sonʼnde. Kʼoa i kitsosa: “Ya jña nga tíjna kjoanyináli, kʼoati ya kʼoéjna ni̱ma̱li” (Mat. 6:19-21). Yaa ni̱ma̱ná kjuinroajinni nga kjoásjee jmeni xi chjí ʼyatokoán. Yaa ngʼajmi bʼejnatjoá “kjoanyiná” kʼianga nda mangínkoaa yaoná kʼoa nga nda biyoaa ngixko̱n Niná. Tojo kitso je Jesús, niʼyajinla xi koa̱nle kjoaʼaná tsojmichjí jebi.

2. 1) Tojo tso 2 Corintios 4:17, 18, jmé xi kuenta sʼiaan. 2) Jmé xi chótʼayajiaan i̱ kjoaʼmiya jebi.

² Je pastro Pablo kʼoatsoná nga kui kuenta sʼiaan je tsojmi “xi tsín matsen” (tʼexkiai 2 Corintios 4:17, 18). * Jngo koya xi nʼio chjíle xi tsín matsen kui je kjoanichikontʼain xi tsjoáná Niná ya sonʼnde chjotse. I̱ kjoaʼmiya jebi ño koya xi nʼio chjíle xi tsín matsen xi jetjínná ndʼaibi chótʼayajiaan: nga miyoná mani je Niná, je kjoabʼetsʼoa, josʼin basenkaoná je nganʼiotsjele Niná, kʼoa josʼin basenkaoná je Jeobá, Jesús kao ánkje kʼianga ʼmiyasoán. Kʼoati kui jchaa jósʼin koakoá nga ʼyachjiá je kjoatjao jebi.

3. Jméni xi ngisa nʼio chjíle xi tsín matsen, kʼoa ánni nga koa̱n sʼe̱niná.

³ Je xi tsín matsen xi ngisasa chjíle kuinga miyoná mani  je Jeobá (Sal. 25:14). Nga tsje je Niná, a koaan nga miyo kuitsoná nga chjotajée maa. Koaan nga miyo kuitsoná je Niná nga̱ je kjoabʼechjíntjaile Jesús “faʼáxin jéele chjotasonʼnde” (Juan 1:29). Kʼianga kjesa tsjoájin kjoabijnachonle Jesús, je Jeobá be nga kixi koa̱n je ʼNdíle saʼnda nga kuiyá ánni nga koa̱n kʼoasjentjaini je chjotasonʼnde. Kuinga koan kisimiyoni je chjota xi tsakatio nga kjesa faʼaijin je Jesús i̱ Sonʼnde (Rom. 3:25).

4. Tikʼaxki̱ kʼai je miyole Niná xi kʼia tsakatio nga kjesa faʼaijin je Jesús i̱ Sonʼnde.

⁴ Kataʼyala kʼaa tʼatsʼe xi miyole Niná koan xi tsakatio nga kjesa faʼaijin je Jesús i̱ Sonʼnde. Je Abrahán nʼio kisʼejna kjoamakjainle. Kʼoa ninga jetsʼato 1,000 nó jaʼato nga kʼien je Abrahán, “je miyona” kitso je Jeobá (Is. 41:8). Nijejinla kjoabiya koa̱nle sikinyáxinle Jeobá je miyole. Je Abrahán tojo tíjnakon yajin kjoafaʼaitsjenle Jeobá (Luc. 20:37, 38). Je Job kʼoati nʼio nda choa̱ bʼéjnaná. Ñandia kʼianga tjíojtín je ánkje ya ngʼajmi, je Jeobá kʼoakitso nga ñaki tjínjngo kon xi tʼatsʼe Job. I kitso: “Ñaki chjotakixiní kʼoa tsín jée bajngi, kʼoa tsokjónke Niná kʼoa alikui kui kʼoasʼín xi chʼaotjín” (Job 1:6-8). Kʼoa jósʼin kisikjaʼaitsjen je Jeobá xi tʼatsʼe Daniel, xi ñokanla nó nga kixi kitʼale ninga ya tsakʼejnajinle chjota xi kjaʼaí niná bʼétsʼoale. Kʼianga jenʼio koanjchínga Daniel, je ánkje jan kʼa kʼoakitsole nga “nʼio chjí” bekon je Niná (Dan. 9:23; 10:11, 19). Alikui jao tjín tokoán nga tíkoyale Jeobá je nichxin nga sikjaʼáyanile je miyole xi nʼio tsjoake (Job 14:15).

5. Jmé xi tjínnele sʼiaan nga miyole Jeobá koaan.

⁵ Nichxin xi tiyoaa ndʼaibi, millón mani chjota xi miyole Jeobá kjima. Jngo tjíjtsa Sonʼnde nkjín mani xi xʼin, xi yánchjín kao xtiʼndí xi tjíobakó nga mele miyole Niná koa̱n. Je Biblia kʼoatso nga miyole Jeobá mani je chjota xi kixi (Prov. 3:32). Kuinga miyole Niná mani nga̱ makjainle xi tʼatsʼe kjoabʼechjíntjaile Jesús. Xi totʼatsʼe kjoabʼechjíntjai, koaan kʼoaitʼalee yaoná je Jeobá kʼoa kjuinsʼenngindá. Kʼianga kʼoanʼia, yaa majngokoaa je choʼndale Niná xi millón mani xi jekitsjoatʼale yaole kʼoa xi jekisʼenngindá xi miyole Jeobá mani.

6. Jósʼin koakoá nga ʼyachjiá nga miyoná mani je Jeobá.

⁶ Jósʼin koakoá nga ʼyachjiá nga miyoná mani je Niná. Kʼiaa nga chjénngiaa je choa̱le Abrahán kao Job. Tsʼato 100 nó nga kixi kitʼale Niná. Kʼoati tjínnená kʼoasʼiaan tsanda ñá, ni jekjoatse kʼoa ni chriansʼa tinixálee je Jeobá. Kʼoa joni Daniel, ngisa chjí jchatokoán nga miyoná mani je Jeobá tikʼoani kjoabijnachonná (Dan. 6:7, 10, 16, 22). Jé Jeobá koasenkaoná nga chókjoajinná tojme kjoa xi kuitjátojiaan kʼoa nga tosi tonda miyole koaan (Filip. 4:13).

7. 1) Tojo tso Proverbios 15:8, jósʼe kon je Jeobá kʼianga bʼetsʼoalee. 2) Jósʼin bakó Jeobá nga nrʼoéle je kjoabʼetsʼoaná.

⁷ Jmesani xi nʼio chjíle xi tsín matsen kui je kjoabʼetsʼoa. Je xi nʼio miyo fao bʼéyanajmíle xínkjín jotjío kon. Kʼoatisʼinni xi kao Jeobá. Yaa Biblia faʼaitʼa josʼin síkjaʼaitsjen kʼoa jotjín kon. Kʼoa ñá kʼiaa chjakaonajmiá kʼianga bʼetsʼoalee. Kʼianga kʼoétsʼoalee koaan kʼoéyanajmílee jotjín je tokoán kʼoa josʼin nikjaʼaitsjeen. Nʼio tsjoa sʼele je Jeobá kʼianga bʼetsʼoalee (tʼexkiai Proverbios 15:8). * Je Jeobá tsjoakená,  nrʼoéná kʼianga bʼetsʼoalee kʼoa basenkaoná. Sakʼoaa ngotjo basenkaoniná. Tonga sakʼoaa machjén nga nkjín kʼa kʼoétsʼoaa. Tojosʼinni, alikui jao tjínná nga koasenkaoná kʼianga machjénná. Tsakui nichxin likuikjoan kʼoakoa̱n josʼin tichoyalee. Tobʼelañá, ʼndele nga kjoaʼaxinná je kjoa xi tibitjatojiaan, koaanle tsjoáná je kjoachjine kao nganʼio xi koasenkaoná nga chókjoajinná (1 Cor. 10:13).

8. Jósʼin koakoá nga ʼyachjiá nga ma bʼetsʼoalee Niná.

⁸ Jngo koya josʼin koakoá nga ʼyachjiá nga ma bʼetsʼoalee Niná kʼiaa nga kjuintjenngiaa je kjoafaʼaitsjen xi tsjoáná, nga i̱ tso: “Tʼetsʼoao ali nichajinjion ngantsjai” (1 Tes. 5:17). Je Jeobá alikui kjoanʼio sʼínná nga kʼoétsʼoalee. Tosaa tsjoáʼndená nga ñá chjoéjiaan jme xi mená sʼiaan, kʼoa i tsoná: “Tʼetsʼoantsjao” (Rom. 12:12). Kʼianga nkjín kʼa kʼoétsʼoaa nga nyaon nyaon kʼoasʼin koakonilee nga ʼyachjiá je kjoanda xi tjínná nga ma bʼetsʼoalee. Kʼianga kʼoétsʼoaa kʼoailee kjoanda kʼoa chʼa̱sjengʼaa (Sal. 145:2, 3).

9. 1) Jósʼe kon jngo ndsʼee xi Chris ʼmi kʼianga bʼétsʼoa. 2) Kʼoa ji jósʼin nikjaʼaitsjain xi tʼatsʼe kjoabʼetsʼoa.

⁹ Kʼianga sa koai sa koai nichxin nga je Jeobá tinixálee kʼoa nga jchaa josʼin nrʼoéle je kjoabʼetsʼoaná, ngisaa chjí jchatokoán kʼianga kʼoétsʼoalee. Jngo ndsʼee xi Chris ʼmi, xi jetsʼato 47 nó tísíxále Niná, itso: “Tsjoa sʼe tokoan nga tanjio bisotjen kʼoa nga fakaonajmí ngotjoa je Jeobá. Nʼio tsjoa sʼe tokoan nga kʼia fakaonajmía nga tosʼa kjimaʼisen. Kʼianga kʼoasʼian, tsjoale kjoanda je Jeobá tʼatsʼe kjoatjao xi tsjoáná kʼoa nga ma bʼetsʼoalee. Kʼoa kʼianga jebʼetsʼoa nga jemanjio, nda sʼe tokoan nga sikjáya”.

10. Ánni nga nʼio chjí jchatokonsíñá je nganʼiotsjele Niná.

¹⁰ Je xi tsín matsen xi kʼoati tjínnele nʼio chjí jchatokoán kui je nganʼiotsjele Niná.  Je Jesús kʼoatsoná nga kjitʼa si̱jé je nganʼiotsjele Niná (Luc. 11:9, 13). Je Jeobá kui nganʼiotsjele síchjén nga tsjoáná “je nganʼio xi nʼio tse” (2 Cor. 4:7; Hech. 1:8). Kui je nganʼiotsjele Jeobá koasenkaoná nga chókjoajinná tojme kjoa xi kuitjátojiaan.

11. Jósʼin basenkaoná je nganʼiotsjele Niná.

¹¹ Je nganʼiotsje basenkaoná nga nda nitjosoán je xá xi sʼenená jinnaxinandále Niná. Jé nganʼiotsjele Niná basenkaoná nga ngisa nda bitjosonná je xá xi sʼenená. ʼYañá nga tsín kʼoakoa̱nná tsa totsaan nganʼio si̱chjén. Jé nganʼiotsje basenkaoná nga ndasʼin bitjo je xá xi nʼia kʼianga nixálee Niná.

12. Tojo tso Salmo 139:23, 24, jmé xi koa̱n si̱jé kʼianga kʼoétsʼoaa.

¹² Ijngo koya josʼin bakoá nga chjí ʼyatokoán je nganʼiotsjele Niná kʼiaa nga nijélee je Jeobá nga katabasenkaoná nga jchaa tsa tsín kixi tíjna jme xi tinikjaʼaitsjeen kʼoa tsakui xi chʼaotjín tinimetokoán ya jinni̱ma̱ná (tʼexkiai Salmo 139:23, 24). * Je Jeobá nrʼoé kʼianga bʼetsʼoaa, kʼoa kui je nganʼiotsjele sichjén nga jchaa tsa jñani machjén nga si̱ndayaa yaoná. Tsa kʼoalani, kʼoakʼuínlee je Jeobá nga je nganʼiotsjele katabasenkaoná nga chja̱ʼaxian jinkjoafaʼaitsjenná xi tsín kixi tíjna kʼoa tsakui xi chʼaotjín tinimetokoán. Kʼoasʼin koakonilee nga tsín mená kui xi chʼaotjín kʼoasʼiaan, kʼoa je Jeobá tosi tonda koasenkaoná nga tsjoáná je nganʼiotsjele (Efes. 4:30).

13. Jmé xi koa̱n sʼiaan nga ngisa chjí jchatokoán je nganʼiotsjele Niná.

¹³ Ngisaa chjí jchatokoán je nganʼiotsjele Niná tsa si̱kjaʼaitsjenjiaan jme xi kjima nichxin xi tiyoaa ndʼaibi. Nga kjesa fijin ya ngʼajmi je Jesús, i kitsole je chjotatjenngile: “Tjoéno nganʼio kʼia nga je Espíritu Santo kjoaʼaíno. Jon koa̱on testigona [...] jña saʼnda nga fetʼa sonʼnde” (Hech. 1:8).  Tokʼoamaná josʼin tíbitjoson je én jebi. Jé nganʼiotsje tíbasenkao je chjota xi tsʼato jin millón basen mani jngo tjíjtsa Sonʼnde nga choʼndale Jeobá kjima. Xi ijngosani, je choʼndale Niná jtín tjío kʼoa nyʼán tjíokao xínkjín, nga̱ jé nganʼiotsjele Niná basenkaoná nga bakoá je xi ndatjín, jolani kjoatjaocha, kjoatsjoa, kjoanyʼán, kjoatsejta, kjoandʼé, kjoanda, kjoamakjain, kjoaʼindajintakon, kʼoa nga chjoexkoá yaoná. Kui kjoanda jebi xi tsjoá “je Espíritu Santo” (Gál. 5:22, 23). Alikui jao tjínná nga nʼio chjíle je nganʼiotsjele Niná.

14. ʼYáni xi binyakaoná kʼianga ʼmiyasoán.

¹⁴ Je xi kʼoati nʼio chjíle xi tsín matsen kuinga je nixákoaa Jeobá, Jesús kao ánkje (2 Cor. 6:1). Jé binyakaoná kʼianga ʼmiyalee Biblia je chjota. Kʼianga kui kinchja̱ni Pablo jokisʼin je kao chjotale Cristo xi ngikʼa nga kitsoyason, i kitso: “Tojngo nixákoaijin Niná” (1 Cor. 3:9). Kʼianga ʼmiyasoán, kʼoati je Jesús nixákoaa. Kʼianga kʼoakitsole je chjotale nga chjotatjenngile katasíkao je chjota, je Jesús i kitsole: “An tijnakaono” (Mat. 28:19, 20). Kʼoa jósʼin nixákoaa je ánkje. Bʼaiñá kjoanda nga je ánkje bándiaaná kʼianga ʼmiyasonlee je chjota jngo tjíjtsa Sonʼnde “je énnda xi tjín ngantsjai” (Apoc. 14:6).

15. Jmé choa̱ xi faʼaitʼa Biblia bakó josʼin basenkaoná je Jeobá nga ʼmiyasoán.

¹⁵ Jósʼin tíbichómani nga je tjíobinyakaoná Jeobá, Jesús kao ánkje. Kʼianga ʼmiyasoán je Énle Niná, tjínkʼa je chjota xi nrʼoé kʼoa xi makjainle (Mat. 13:18, 23). ʼYáni xosʼín nga bichókajinni ni̱ma̱le chjota je Énle Niná. Je Jesús kʼoakitso nga tsín ʼya xi chjotatjenngile koa̱n tsa tsín je Niná “kjoaʼaíkao” (Juan 6:44). Ya Biblia faʼaitʼa choa̱ xi tsoyaná tʼatsʼe jebi. Kʼoatso jmeni xi koan kʼianga kitsoyale Pablo Énle Niná je yánchjín xi tjío ya nditsinle naxinandá Filipos. Itso tʼatsʼe jngo chjoón xi Lidia tsakʼin: “Je Nainá [Jeobá] kiskoʼai ni̱ma̱le, tsakasén xo̱ño jméni nga kinrʼoésíni xi kitso Pablo” (Hech. 16:13-15). Joni je Lidia, je Jeobá millón mani chjota tífaʼaikao jinnaxinandále.

16. ʼYáni xi tjínnele kuitjongʼa kʼianga masjainá je chjota xi nda nrʼoé je Énle Niná.

¹⁶ ʼYáni xi tjínnele kuitjongʼa kʼianga masjainá je chjota xi nda nrʼoé je Énle Niná. Yaa tsoyaná tʼatsʼe jebi nga i̱ tso xi kiskile Pablo je chjotale Cristo xi Corinto tsʼe: “An tsakʼentje, Apolos tsakʼéjtenngile nandá, tonga Niná xi kisijchá. Nijejin xi bʼéntje xi chjíle, nijejin xi nandá bʼéjtenngile, tonga Niná xi síjchá” (1 Cor. 3:6, 7). Tojo kisʼin je Pablo, kʼianga masjainá je chjota xi nda nrʼoé je Énle Niná, tjínnele je Jeobá chʼa̱sjengʼaa.

17. Jósʼin koakoá nga ʼyachjiá nga je tinixákoaa Jeobá, Jesús kao ánkje.

¹⁷ Jósʼin koakoá nga ʼyachjiá nga je tinixákoaa Jeobá, Jesús kao ánkje. Kʼiaa nga kʼuínyasonlee Énle Niná je chjota jokji tjen kʼoakoa̱nná. Nkjín koya jokoa̱n sʼiaan. Tobʼelañá, koaan kʼuínyasoán ya jñani nʼio tjín chjota kʼoa nga xki̱ ndʼia xki̱ ndʼia (Hech. 20:20). Nʼio nkjín ndsʼee xi nʼio tsjoake nga ya tsoyason jñani nʼio tjín chjota. Kʼianga satéjin je chjota xi tsín bexkon, sitiʼnda kʼoa fákaonajmí. Tsa mele kuinchja̱najmí je chjota ngasin nganda tsoyale je Énle Niná.

18, 19. 1) Jmé xi tjínnele sʼiaan kʼianga mandosinle Énle Niná jngo chjota. 2) Jósʼin tsakasenkao Jeobá jngo chjota xi Raphalalani ʼmi.

¹⁸ Nga je Niná tinixákoaa, alikui tokui xi machjén nga kʼuínyasoán, tjínnele  tosi tonda kʼuínyalee Biblia je chjota xi mandosinle Énle Niná. Kʼianga satéjiaan jngo chjota xi mandosinle, tjínnele nga tosi tonda koakoyalee kʼoa tsa maije̱ kʼoakʼuínlee tsa ʼyani nga katatsoyale Biblia. Kʼianga sa nda sa nda kotʼaya je Énle Niná jngo chjota nga mele chjotale Cristo koa̱n, tsjoa satío tokoán josʼin basenkao je Jeobá nga síndaya yaole kʼoa nga síkʼantjaiya josʼin síkjaʼaitsjen.

¹⁹ Kataʼyala jokoan je xi Raphalalani ʼmi, xi Sudáfrica tsʼe, xi chjinebʼenda koan ngasʼa. Nga tosʼa kiskotʼaya nʼio kisasenle jmeni xi bakóya je Biblia. Tonga ñʼai koanle nga koankjainle nga kʼoatso je Biblia nga tsín ndatjín nga ʼndíkʼien fákao chjota (Deut. 18:10-12). Tonga kitsjoaʼnde nga je Niná kisindaya josʼin síkjaʼaitsjen. Kʼoa tochoatsee jaʼato nga tsín tichjinebʼenda koanni, ningalani kʼoasʼin bajngiʼani yaole. Je Raphalalani, xi 60 nóle ndʼaibi, itso: “Tsjoale kjoanda je testigole Jeobá josʼin tsakinyakaona, tobʼelañá, tsakinyakaona nga kisokoxána. Tonga jé Jeobá xi ngisa tsjoale kjoanda nga tsakasenkaona nga kisindaya yaona, kʼoa ndʼaibi jema xinyasoan je Énle Niná kʼoa jekisʼe̱nngindá”.

20. Jméni xi tosi tonda mená sʼiaan.

²⁰ I̱ kjoaʼmiya jebi ño koya tjínni xi nʼio chjíle xi tsín matsen kaʼyaa. Je xi ngisa chjíle kuinga miyole Jeobá maa. Nga kui kjoanda tjínná, maa bʼetsʼoalee, basenkaoná je nganʼiotsjele, kʼoa yaa tjen ngʼajmi bʼainganʼioniná nga ʼmiyasoán. Mená nga tosi tonda chjí jchatokoán je kjoanda xi tsín matsen xi tsjoáná Jeobá. Kʼoa kʼoailee kjoanda ngantsjai kʼianga miyoná mani.