Kʼianga kʼoakoan kʼiaa saʼnda tsakasjaiña je Niná. Nga kjesa bʼeyanajmíjinno jmeni xi koan nga kʼia, kuila xínyano josʼin koanjchínga, kʼoa xi tsakasenkaona nga tsakasje je Niná.

Kʼiaa kitsian nga nó 1937 ya Guesnain jngo naxinandá xi tíjna ya Francia. Je nʼaina yaa kisixá jñani bitjo je ki̱xo̱n. Kʼoati kitsoyana nga nʼio chjíle nga kui xi ndatjín kʼoanʼia. Je nʼaina tsakasenkao je chjota xi ya kisixá, kʼoa yaa tsakʼejnajinle je chjota xi tsakʼéjtín yaole kʼianga nganʼio kisijéle je chjotaxá. Je pana kʼoati tsín kisasenle jokisʼin je naʼmi. Ningalani nda tsakatio je naʼmi kʼoa ninga nkjín tsojmi kisʼele tojo kisijéle tao̱n kao tsojmi xi ma chine je chjota xi ya kisixá jñani chʼasje ki̱xo̱n, ninga tochoa̱ masonnile jmeni xi sokóle, nga kʼoakisʼin je naʼmi alikui kisasenle je pana, kuinga tsínkʼia tʼatsʼe religión kitsoyanina. Nikʼiajinla nga tʼatsʼe Niná kichobayanijin.

Kʼianga kjimajchínga, sa chʼao sa chʼaosʼin tsaʼbe nga totaon ʼya je chjota. Alikui kisasenna  nga kichʼasjengi je chjota xi xin naxinandále xi ya Francia kichokatio. Yaa kisimiyoa je xtile chjota xi ya kichokatio kʼoa ñatjen kiniskáníjin fútbol. Je mana yaa Polonia tsʼe. Kʼoa kui xi koanmena nga nda koaikao xínkjín je chjota ninga xinxin tsʼe.

Kʼiaa kinokjoana nga sondado koan nga nó 1957, kʼoa kuinga ya kichoña ya Argelia, jonása sʼin kabʼeyanajmía nga títjon. Kʼianga nʼio kitsokjoan kʼoa kʼianga kʼoakixinle Niná nga katabasenkaona, je xi kicho tojngoni búrró ali tsa chjotajin. Ñaki ndani kisʼe tokoan. Tonga nga kʼoakoan, kui xokisikaona nga kisikjaʼaitsjenjian jmé xá tiyoñá, a mandosinlee Niná, kʼoa a kuicho nichxin nga ndasʼin kuiyoaa.

Kʼianga kichoa ya ndʼiale xijchána, kʼiaa tsaʼbexkoan jngo testigole Jeobá, kʼoa jngo Biblia kitsjoana. Kʼiaa tsakʼexkia nga kicho ijngokʼa ya Argelia. Je texto xi ngisa kisikjaʼaitsjenjian kui jmeni xi tso Apocalipsis 21:3, 4, jñani tso: “Je niʼyale Niná kijnajinle chjota. [...] Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male”. Kjesa kʼoatsojin xi bʼexkia, kuinga jao kisʼeni tokoan tsa ñaki kʼoatjín, nga̱ kjesa jme xi ʼbejian xi tʼatsʼe Niná kao xi tʼatsʼe Biblia.

Kʼianga tsínti sondado koanña nga nó 1959, kʼiaa tsaʼbexkoan jngo testigole Jeobá xi François ʼmi, kʼoa nʼio tse xi kitsoyana xi tʼatsʼe Biblia, jolani nga Jeobá ʼmi je Niná (Sal. 83:18). Kitsoyana nga je Jeobá kjoaʼaxin jmeni xi tsín kixi tjín kjima i̱ Sonʼnde, nga ʼndenaxó sikao Sonʼnde kʼoa nga kuitjoson jmeni xi tso Apocalipsis 21:3, 4.

Ngotjo koanjinnina nga kʼoatjín jebi, kʼoa ñaki kichokajin ni̱ma̱na. Nʼio kisijtina josʼín je naʼmi kʼoa koanmena tsakjajétʼen nga tsínkui bakóya jmeni xi tso Biblia. Kʼoatisʼin kisikjaʼaitsjen joni nʼaina nga ngotjo menina kʼoendajian je kjoa.

Tsakasenkaona je François kao xi kjaʼaísa ndsʼee nga tsín tikʼoasʼin kisikjaʼaitsjenña. Kui kitsoyana nga ñá xi chjotale Cristo maa, alikui koa̱n nga kui chótsenlee josʼín je chjota, tosaa kui xi machjén nga kʼuínyalee je Énle Niná. Kui xá kisʼin je Jesús kʼoa kʼoati kui xá tsakánele je chjotatjenngile nga kʼoati katasʼín (Mat. 24:14; Luc. 4:43). Kʼoati nda kisikoa je chjota kʼoa tsakakole kjoaxkóntokon ninga kjaʼaí kjaʼaí religión tjíojin. Je Biblia kʼoatso nga “je choʼndale Nainá alikui machjén nga chjotakjoasi koa̱n, tonga machjén nga ndʼé koa̱n xi tʼatsʼe ngatsʼi” (2 Tim. 2:24).

Kisikʼantjaiyaña yaona, kʼoa kʼiaa kisʼe̱nngindá nga nó 1959, kʼianga kisʼejna jngo kjoajtíntse. Yaa tsaʼbexkoan jngo tichjaa xi nʼio koantsjoake̱. Angèle ʼmi. Sakʼoaa ya kia ya jtín jñani fi, kʼoa kʼiaa chixainjin nga nó 1960. Nʼio nda sʼín je chjoónna, kʼoa jngoo kjoatjao xi je Jeobá kitsjoana (Prov. 19:14).

Jokji tífaʼato nó, nʼio tíbasenkaona choa̱le je ndsʼee xi jetjínle kjoafaʼaitsjen. Je xi ngisa tíbasenkaona kuinga kjoanangitokon machjénná nga kuitjosonná jngo xá xi ñʼai tjín, kʼoa nga kjuintjenngiaa je kjoafaʼaitsjen xi tsjoá Proverbios 15:22, jñani tso: “Alikui ndasʼin bichómani jngo kjoa tsa tsín cho̱bayañá, tonga ndasʼin bichótsjoá nga nkjín ma xi tsjoá kjoafaʼaitsjen”.

Kʼiaa nga nó 1964 koanjinna nga ñaki kʼoatjín jmeni xi tso je Biblia. Nga tikuini nó, superintendente xi tsʼe circuito koan, nga kisixatʼa je jtín kitsjoanganʼiole je ndsʼee nga tosi tonda katasíxále Niná. Tosʼaa 27 nóna, kʼoa kjesa nanda tjínjinna kjoafaʼaitsjen, kuinga sakʼoa tsín kʼoasʼin kitjosonnina jmeni xi tjínnele sʼian tsakai. Xi tsakasenkaona nga ngisa nda kisitjosoan je xá xi kisʼenena nga koanskanni, kuinga tsakinyakaona je ndsʼee xi jetjínle kjoafaʼaitsjen.

Faʼaitsjenna jokoan ñandia. Kʼianga tokʼia kisixatʼa títjoan jngo jtín ya París, jngo ndsʼee xi kʼoakitsona tsa koa̱n cho̱baijin, kʼoa kʼoakixinle nga koa̱n chobanajmíjin.

I kitsona je ndsʼee: “Louis, kʼianga jngo chjinexki bichó jngo ndʼia, ʼyáni xi bichókotsenle”.

Kʼoa i kixinle: “Jé xi tjíomʼe bichókotsenle”.

Tonga i kitsona: “Tojéngó nʼio chjakaonajmí je xi kʼoasʼin matsen nga nʼio tjío je kjoamakjainle, jolani je xi superintendente sʼin tíjnale je jtín. Tjío je ndsʼee xi tosʼa choatsele nga tjíokotʼaya je Énle Niná kʼoa tsa jeje̱ xi síkinroajenle kon. Nʼiojin nda kuinyakao nga si̱kʼayalai nichxin, kʼoa tsa saʼnda kʼuín ya ndʼiale nga kʼuínkichikoai”.

Nʼio tsakasenkaona jmeni xi kitsona ndsʼee jebi. Koanjinna nga nʼio tjaole je ndsʼee kʼoa kuinga ndi̱to̱n kisikʼantjaiyaña yaona kʼoa kitjenngiña je kjoafaʼaitsjen xi kitsjoana. Jé Jeobá tsjoale kjoanda nga kʼoasʼin tsakasenkaona je ndsʼee jebi.

Kʼianga nó 1969 kao nó 1973, je xi jao kjoajtíntse kisatio ya Colombes (París), an kisʼenena nga kisikuinda jñani sʼenda je tsojmi xi bʼaile ndsʼee xi bichó xi xinxin naxinandá faʼaini. Kʼianga nó 1973, aon nichxin nga jankanla jmi chjota kinikjainjin  kʼianga kisʼejna kjoajtíntse. Ningalani kitsokjoan, xi tsakasenkaona kui jmeni xi tso Proverbios 15:22. Jé kisijéle kjoafaʼaitsjen je ndsʼee xi saje ya kisixá. Kisijéle kjoafaʼaitsjen je ndsʼee xi jebe josʼin maxá jñani tsojmi bʼabí. Kʼoati kisijéle kjoafaʼaitsjen je ndsʼee xi yao baténa, xi tsojmi bántje, xi tsojmi bʼénda kʼoa xi tsojmi batse. Nga kʼoasʼin tsakinyakaonajin je ndsʼee, kitjosonnajin je xá xi kisʼenenajin.

Kʼiaa nga nó 1973 kʼoatsakʼinnajin nga ya kʼoainganʼiuijin Betel xi tíjna ya Francia. Tonga alikui choa ñʼai koanna je xá xi tsakʼinna nga sʼian. Tsakasjaile josʼin kisikasénle xo̱n xi machjénle je ndsʼee xi tjío ya Camerún, jngo naxinandá xi tíjna ya África, jñani kisʼechjoale je xále Niná nga nó 1970 saʼnda nó 1993. Nʼio kisikjáojian nga nʼio tse xá kisʼena nga kʼia. Tsabee je ndsʼee xi kisʼenele xá ya Francia kʼoa i kitsona nga kitsjoanganʼiona: “Je ndsʼee xi tjío ya Camerún, nʼio machjénle xi tʼatsʼe Énle Niná, kʼoa machjén nga kuinyakoaa. Kʼoa tsakʼainganʼioníjin”.

Nkjín kʼa kia ya ʼnde xi tjíochrian ya Camerún nga tsakiyojtínjin kao je xi chjotajchínga sʼin tjío xi ya tsʼe. Je ndsʼee jebi nʼio nda síxá kʼoa be josʼín, kʼoa tsakinyakaona nga kichole je ndsʼee xi Camerún tsʼe je xo̱n xi Énle Niná yʼangini. Kʼoa je Jeobá kisichikontʼainnajin josʼin kinixáijin. Xi 20 nó jaʼato, je ndsʼee xi Camerún tsʼe, alikuikʼia nga tsín kichole je Xo̱n xi Bájinkonná kao je xo̱n xi xki̱ sá kitjo xi Nuestro Servicio del Reino tsakʼin.

Saʼnda nga tokʼia tsaʼbexkoan je Angèle kui kuenta kisʼian josʼin tísíxále Niná. Kʼoa ngisaa tinda tsaʼbengáña josʼin tísíxále Niná kʼianga jechixainjin. Nga tikuini nichxin nga jechixainjin nga jekoannjio, kʼoakitsona nga kʼoetsʼoale je Jeobá kʼoa nga kui sijéle  nga kʼoasʼin si̱xálaijin jokji tjen kʼoakoa̱nnajin. Kʼoa kinrʼoénajin je Jeobá jmeni xi tsakʼinlaijin.

Je Angèle nʼio tíbasenkaona nga je Jeobá tisinʼiotʼa. Tobʼelañá, kʼianga nó 1973, nga kʼoatsakʼinnajin nga ya Betel koanngínjin, to jao kisʼe tokoan, nga̱ nʼio tsjoake̱ nga superintendente xi tsʼe circuito majian. Kʼoa je Angèle kʼoakitsona nga jetsakʼaitʼalaijin yaonajin je Jeobá kʼoa nga tjínnele si̱tjosuinjin jmeni xi tso je naxinandále (Heb. 13:17). Kʼoa lijme xi tikoan kixinnile, kʼoa tsangínníjin ya Betel. Jokji tífaʼato nó, nga nda sʼín je chjoónna, nga kosonnile jmeni xi sʼín kʼoa nga ndasʼin síkjaʼaitsjen, kui xi tíbinyakaonajin nga nda tibiyuijin kʼoa nga nda chjoejinjin jmeni xi nʼiaijin.

Ningalani jekjimajchíngaijin, je Angèle tojo nʼio ndasʼin tíbasenkaona. Nʼio nkjín skuela satío jinnaxinandále Niná nga én inglés. Nga koan tsangínjin je skuela xi satío, ngisaa tsakʼenelaijin yaonajin nga inglés kichotʼayaijin, kuinga ya tsangínnijin jngo jtín jñani én inglés nokjoa, ninga jeme 75 nónajin. Nga ya tijnajinle je Comité xi tsʼe Sucursal ya Francia, ñʼai koanna nga tsakʼasjeʼa nichxin nga kjaʼaí én kiskotʼaya. Tonga tsakinyakaongañáníjin xíngijin. Ningalani jeñokan nónajin, tojo chotʼayaníjin nga biyondalaijin je kjoajtín nga én inglés kao nga én francés. Bʼainganʼioníjin ya jtín jñani tiyuijin nga ʼmiyason kʼoa nga satío je kjoajtín. Jé Jeobá tíbasenkaonajin nga tibʼenelaijin yaonajin nga inglés tichotʼayaijin.

Nga nó 2017, tsee kjoanichikontʼain kisokonajin, je Angèle kao an kʼiaa tsangínjin je Skuela xi fi Ndsʼee xi ya tjíojin Comité xi tsʼe Sucursal kao Yánchjínle, skuela jebi yaa satío ya Patterson (Nueva York).

Jé Jeobá xi nʼio nda bakóyaná (Is. 30:20). Kuinga nʼio chjine mani je xi sʼa xti kao xi jejchínga (Deut. 4:5-8). Je xti xi fitjenngi kjoafaʼaitsjen xi tsjoá je Jeobá kao je ndsʼee kʼoa kao tichjaa xi jetjínle kjoafaʼaitsjen, ndasʼin bichómani jmeni xi sʼín kʼoa kixi fitʼale je Jeobá. Ñaki kʼoatjín jotso Proverbios 9:9, nga i̱ tso: “Tʼinyalai jngo xi chjine kʼoa ngisaa chjine koa̱n. Tʼinyalai jngo chjota xi kixi kʼoa ngisaa tse xi koa̱nle”.

Sakʼoaa kui sikjaʼaitsjenjian jmeni xi koan nindo xi tjío ya Argelia, nichxin kjoan 60 nóján. Alikuikʼia kiya jkoa jokji tsjoa tjín tokoan ndʼaibi. Nʼio nda tíbasenkaona choa̱le je ndsʼee. Nʼio tísíchikontʼainnajin je Jeobá, kʼoa nʼio tsjoa tjío tokuinjin. Kuinga ñaki kʼoatjínni tokuinjin nga tosi tonda jchasaijin xi tʼatsʼe Jeobá, kʼoa nga tosi tonda koanngíntjenngijin je choa̱le ndsʼee kao tichjaa xi chjine kʼoa xi tsjoake je Jeobá.