KJOAʼMIYA XI CHOTʼAYA 21
Jmeni xi tsoná Apocalipsis tʼatsʼe nichxin xi sʼa nroa
“Kʼoa katama [...]. Nroai, Señor Jesús” (APOC. 22:20).
KJOAJNDA 142 Likui kuinjioán kjoachoya xi tjínná
XI TÍNCHJA̱NI *
1. Jméni xi tjínnele skoéjin ngatsʼi chjota.
MACHJÉN nga skoéjin jmeni xi sʼin ngatsʼi chjota nichxin xi tiyoaa ndʼaibi: a jé Jeobá, xi batéxomale ngayeje tsjoánganʼiole, axo jé Na̱i tsjoánganʼiole xi kontra tíjnale Niná. Machjén nga chjoéjiaan ʼyáni xi kʼoainganʼiolee nga̱ kui xi kuitsoni tsa sʼe̱ná kjoabijnachon xi tsínkʼia fetʼa kʼoa tsa mai (Mat. 25:31-33, 46). Kʼianga jetíjna kjoañʼai xi nʼio tse, kʼiaa sʼe̱choa̱ nga kuitjontjaile yaole je choʼndale Jeobá xi kixi koaitʼale (Apoc. 7:14; Ezeq. 9:4, 6). Kʼoa kjoeson je chjota xi kui choa̱le cho̱ sʼe̱tʼale (Apoc. 14:9-11).
2. 1) Jméni xi tsoná nga sʼiaan Hebreos 10:35-39. 2) Jósʼin basenkaoná je libro xi tsʼe Apocalipsis.
2 (Tʼexkiai Hebreos 10:35-39). * Nda tinʼiai tsa jeya tibʼainganʼiolai Chjotaxále Niná. Kʼoa kuijin xi meli nga kʼoati katasʼín xi kjaʼaí. Koasenkaoli jmeni xi tso libro xi tsʼe Apocalipsis. Je libro jebi kui bakóyaná jmeni xi koa̱nle je xi kontra batiole Jeobá. Kʼoati bakóyaná jme kjoanda xi sʼe̱le xi ya tsjoánganʼiole Chjotaxále Niná. Nga chotʼayajiaan jmeni xi tso libro xi tsʼe Apocalipsis basenkaoná nga tosi tonda je Jeobá nixálee. Kʼoati koa̱n si̱chjén jmeni xi jekichotʼayajiaan nga kuinyakoaa xi kjaʼaí nga je Jeobá katasíxále kʼoa nga tsín katasíkʼajenle kon.
3. Jmé xi chótʼayajiaan i̱ kjoaʼmiya jebi.
3 Kui tʼatsʼe jebi chótʼayajiaan i̱ kjoaʼmiya jebi: jméni xi koyale je xi ya tsjoánganʼiole Chjotaxále Niná, kʼoa jméni xi koa̱nle je xi ya tsjoánganʼiole je cho̱toán xi ní kji xi tínchja̱ni libro xi tsʼe Apocalipsis.
KJOANDA XI SʼE̱LE XI KIXI KOAITʼALE NINÁ
4. ʼYáni xi be je pastro Juan nga tjíokao je Jesús ya ngʼajmi.
4 Kʼianga jngo sén kisakole je pastro Juan jao jtín chjota tsabe xi tsjoánganʼiole je Chjotaxále Niná kʼoa xi tse kjoanichikontʼain bʼaile nga batio ngantsjai nichxin. Je xi jngo jtín 144,000 mani (Apoc. 7:4). I tjoejinni i̱ Sonʼnde kʼoa yaa ngʼajmi fi nga koatexomakao je Jesús. Je Jesús kao xi 144,000 mani yaa tjen ngʼajmi koatexomani i̱ Sonʼnde (Apoc. 5:9, 10; 14:3, 4). Kʼianga kisakole sén je Juan kui tsabe nga ya nya kao Jesús ya nindo Sion, xi tsonile, ya ngʼajmi (Apoc. 14:1).
5. Jméni xi jeme koa̱ntʼain je chjotale Cristo xi ya ngʼajmi koai xi tjíosa i̱ Sonʼnde.
5 Kitsʼiakjoanni nga tsakatio je pastro saʼnda nichxin xi tiyoaa ndʼaibi jmi chjota títjoéjin nga ya koatiojinle je xi 144,000 mani xi ya koai ngʼajmi (Luc. 12:32; Rom. 8:17). Tonga kʼoatsakʼinle je pastro Juan nga tochoasa ma xi tjío i̱ Sonʼnde xi ya koai ngʼajmi kʼianga to jetífikjetʼa nichxin. Nga kjesa fitsʼiajin kjoañʼai xi nʼio tse kʼiaa sʼe̱choa̱ chjota jebi, xi tsonile, nga ndasʼin tjío ngixko̱n Jeobá yaa koai ngʼajmi (Apoc. 7:2, 3; 12:17). Kʼoa kʼianga jetíjna kjoañʼai xi nʼio tse, kʼiaa koai ya ngʼajmi chjotale Cristo jebi kʼoa yaa kuichokatiojinle chjotale Cristo xi jeya tjío, xi kʼoati kixi kitʼale Niná saʼnda nga kʼien. Yaa koatexomakao je Jesús (Mat. 24:31; Apoc. 5:9, 10).
6, 7. 1) Jméni xi be je Juan nga jemani, kʼoa jméni xi ʼyaa tʼatsʼe chjota jebi. 2) Ánni machjénsíni nga kuenta sʼin je chjotale Cristo xi ya ngʼajmi koai xi tjíosa i̱ Sonʼnde kao je chjotankjín jmeni xi tso capítulo 7 xi tsʼe Apocalipsis.
6 Kʼianga jebe pastro Juan je chjotale Cristo xi ya koai ngʼajmi, jngo jtín chjotankjín be xi i̱ Sonʼnde koatio, tonga je chjotankjín jebi alikui ʼya xi maxki̱le jotjín mani (Apoc. 7:9, 10). Jméni xi ʼyaa tʼatsʼe chjota jebi. Je Juan i tsakʼinle: “Jébi xi nʼio tse kjoañʼai tsakjaʼá, kʼoa jetsakanéjon najñole, kʼoa je kisichxoa kao je njínle je Barré” (Apoc. 7:14). Kʼianga jekjoaʼatojin tjínkon kjoañʼai xi nʼio tse, je chjotankjín jebi nʼio tse kjoanichikontʼain sʼe̱le nga koatio i̱ Sonʼnde (Sal. 37:9-11, 27-29; Prov. 2:21, 22; Apoc. 7:16, 17).
7 Ni ya ngʼajmi kjuian kʼoa ni i̱ Sonʼnde kuiyoaa ngatsʼiñá nga kuenta sʼiaan jmeni xi tso ya capítulo 7 xi tsʼe Apocalipsis. Nga je Chjotaxále Niná bʼainganʼiolee nʼio tsjoa sa̱tío tokoán nichxin xi sʼa nroa. Jmésani xi tso je libro xi tsʼe Apocalipsis tʼatsʼe kjoañʼai xi nʼio tse (Mat. 24:21).
JÓKOA̱NTʼAIN JE XI KONTRA BATIOLE NINÁ
8. Jókoa̱n nga koaitsʼia kjoañʼai xi nʼio tse, kʼoa jósʼin je chjota.
8 Tojosʼin tsaʼyaa ya kjoaʼmiya xi jejaʼato, je chjota político tojeme kʼoetʼale je Babilonia xi nʼioje, xi tsonile, ngatsʼi religión ndiso xi tjín (Apoc. 17:16, 17). Kʼianga kʼoetʼale kʼiaa koaitsʼia je kjoañʼai xi nʼio tse. Nga kʼoakoa̱n, a nʼio nkjín chjota xi je Jeobá koasjai. Mai. Tojo tso ya capítulo 6 xi tsʼe Apocalipsis, kʼianga kʼoakoa̱n, je chjota xi tsín je Jeobá síxále jé sinʼiotʼa chjota político kao negosioyʼai xi tjín, xi nindo ningósonkao ya capítulo jebi. Nga tsín ya tsjoánganʼiole Chjotaxále Niná chjota jebi, je Jeobá kʼoasʼin skoe̱kon nga kontra tjíole (Luc. 11:23; Apoc. 6:15-17).
9. Ánni kʼoabixónsíñá nga nʼio kuenta koa̱n naxinandále Niná kʼianga jetíjna kjoañʼai xi nʼio tse, kʼoa jósʼin kuichomani.
9 Je choʼndale Jeobá xi kixi koaitʼale alikui koa̱nngóson kao josʼin je chjota xi tsín je Niná síxále kʼianga jetíjna kjoañʼai xi nʼio tse, tojéní xi tosi tonda je Jeobá tsjoánganʼiole kʼoa xi tsín ya tsjoánganʼiole je cho̱toán (Apoc. 13:14-17). Kʼoa je xi kontra tjíole Jeobá nʼio koa̱njtike je xi kixi koaitʼale Jeobá. Jngojtín naxinandá kʼoetʼale je choʼndale Jeobá jngo tjíjtsa Sonʼnde. Kʼoa nga kʼoakoa̱n, je Biblia kʼoatso nga je Gog xi tsʼe Magog kʼoetʼale naxinandále Niná (Ezeq. 38:14-16).
10. Tojo tso Apocalipsis 19:19-21, jósʼin Jeobá kʼianga kontrale kʼoetʼale naxinandále.
10 Jósʼin je Jeobá kʼianga kʼoanikao naxinandále. Je Jeobá itso: “Koakoña je kjoajtina” (Ezeq. 38:18, 21-23). Yaa capítulo 19 xi tsʼe Apocalipsis bakóyaná jmesani xi koa̱n. Je Jeobá jé ʼNdíle sikasén nga sitoánntjai naxinandále kʼoa nga sikjeson je kontrale. Kʼoa nga kʼoasʼin je Jesús yaa kitjenkao je ánkje kao xi 144,000 mani (Apoc. 17:14; 19:11-15). Jósʼin kuichomani nga kʼoakoa̱n. Kjoeson ngatsʼi je jtín kao chjota xi kontra batiole Jeobá (tʼexkiai Apocalipsis 19:19-21). *
KʼIANGA JEKJOETʼA KJOAJCHÁN JNGO KJOABIXAN SʼE̱JNA
11. Jméni xi ngisa nʼio chjíle xi nchja̱ni libro xi tsʼe Apocalipsis.
11 Jósa̱tío kon je choʼndale Niná xi kixi koaitʼale i̱ Sonʼnde kʼianga kuinje̱ngile yaole nga ni̱kjeson je kontrale Niná. Nʼiojin tsjoa sa̱tío kon. Ninga nʼio tsjoa sa̱tíole je xi tjío ya ngʼajmi nga ni̱kjeson je Babilonia xi nʼioje, tjín jmeni xi ngisa titsjoa kʼoengáni kon (Apoc. 19:1-3). Je xi ngisa nʼio tjínle kjoandosin xi nchja̱ni je libro xi tsʼe Apocalipsis kui tʼatsʼe “kjoabixanle je Barré” (Apoc. 19:6-9).
12. Kʼiáni sʼe̱jna “kjoabixanle je Barré” (Apocalipsis 21:1, 2).
12 Kʼiáni sʼe̱jna kjoabixan. Ali tsakʼiajin kuixan je Barré kʼianga tojekjoan me koaitsʼia Armagedón, ninga jeya tjío ngʼajmi ngatsʼi xi 144,000 mani (tʼexkiai Apocalipsis 21:1, 2). * Kʼiaa kuixan je Barré kʼianga jekjoaʼato Armagedón, kʼianga jekjoeson ngatsʼi je kontrale Niná (Sal. 45:3, 4, 13-17).
13. Jméni xi koa̱n kʼianga sʼe̱jna “kjoabixanle je Barré”.
13 Jméni xi koa̱n kʼianga sʼe̱jna “kjoabixanle je Barré”. Jebatiokao xínkjín kʼianga bixan jngo chjoón jngo xʼin. Tikʼoasʼinni, kʼianga sʼe̱jna “kjoabixanle je Barré”, xi tsonile, je Jesucristo xi Rey sʼin tíjna, ñatjen koatio kao “chjoónle”, xi tsonile, je xi 144,000 mani. Kʼiaa koaitsʼiani nga koatexomason i̱ Sonʼnde je Chjotaxále Niná xi jngo jmi nó (Apoc. 20:6).
JNGO NAXINANDÁ XI NʼIO JEYA TÍJNA KʼOA JOSʼIN KUIYOAA NICHXIN XI SʼA NROA
Ya capítulo 21 xi tsʼe Apocalipsis kʼoatso nga je Jerusalén chjotse, yaa bitjojenni ngʼajmi jñani tíjna Niná. Je xi jngo jmi nó koatexoma Cristo, je “naxinandá” jebi nʼio tse kjoanichikontʼain tsjoále je chjota xi sitjoson (Chótsenlai párrafo 14-16)
14, 15. Jméni xi ningósonkao je xi 144,000 mani ya capítulo 21 xi tsʼe Apocalipsis (chótsenlai sén xi faʼaitʼa ya portada).
14 Ya capítulo 21 xi tsʼe Apocalipsis, je xi 144,000 mani jngoo naxinandá ningósonkao xi “Jerusalén chjotse” ʼmile (Apoc. 21:2, 9). “Kʼoa xjáolao̱le naxinandábe tjínle tejao xjáoja̱ma̱. Ya tjíotʼa tejao jaʼaínle je xi tejao pastro xi tsʼe Barré”. Nʼiojin koanndosinle je pastro Juan nga kui tsabe. Ánni. Nga̱ tsabe nga kʼoati ya tjítʼa je jaʼaínle ya la̱jao̱. Nʼio tse kjoanda kitsʼaile (Apoc. 21:10-14; Efes. 2:20).
15 Je naxinandá xi kisakole Juan alikui jme naxinandá mangósonkao. “Nditsinle je naxinandá ñaki taonsine ní”, je xi 12 xo̱ntjoale ñaki kui to xi naskákjoan xi perla ʼmi koanndani, kʼoa je xjáo xi kjindai kao xjáoja̱ma̱le ñaki kui kisʼendani je la̱jao̱ xi naskákjoan. “Je naxinandá kʼoasʼin kijna nga ño xi̱ngi̱le, tikʼoakji ndoni jo kji teya” (Apoc. 21:15-21). Tonga je Juan koanjinle nga tjín xi chale naxinandá jebi. Itso: “Nijngojin yo̱ngo̱ tsaʼbe yabe, nga̱ je Nainá Niná xi batéxoma ngayije, kao je Barré tijeni xi yo̱ngo̱le. Je naxinandábe likui machjénle tsʼuí nisájin, jméni nga siʼisensínile, nga̱ je kjoaʼisenle Niná xi síʼisenle, kʼoa jé Barré je lʼíle” (Apoc. 21:22, 23). Je xi ya tjíojinle je “Jerusalén chjotse” yaa koatiokao je Jeobá (Heb. 7:27; Apoc. 22:3, 4). Kuinga je yo̱ngo̱le naxinandá jebi jéní Jeobá kao Jesús.
ʼYáni xi so̱kole je kjoanichikontʼain xi ya ningósonkao “jngo ndáje” kao “yá” (Chótsenlai párrafo 16, 17)
16. Jmé kjoanichikontʼain xi sʼe̱le chjota kʼianga koatexoma Chjotaxále Niná xi jngo jmi nó.
16 Nʼio tsjoa satío kon je chjotale Cristo xi ya ngʼajmi koai nga kui síkjaʼaitsjen tʼatsʼe naxinandá jebi. Tonga kʼoati tjínnele koa̱nndosinle je chjotale Cristo xi i̱ Sonʼnde koyale koatio. Je xi jngo jmi nó koatexoma je Chjotaxále Niná i̱ Sonʼnde nʼio tse kjoanichikontʼain kjoaʼaíkao. Je Juan tsabe nga je kjoanichikontʼain jebi kʼoasʼin fai joni “jngo ndáje xi tsje xi tsʼe kjoabijnachon”, kʼoa “nga jao ngoale ndáje nya yále kjoabijnachon”, kʼoa “xka̱le yábe maxkinile ngatsʼi naxinandá” (Apoc. 22:1, 2). Ngatsʼi chjota xi kʼia koatio nʼio tse kjoanichikontʼain sʼe̱le. Kʼoa je xi sitjosonle Niná tobijbi chjotatsje koa̱n. Alikui tisʼe̱ni chʼin, kjoaʼaon kʼoa tsín tiba sa̱tíoni tokoán (Apoc. 21:3-5).
17. ʼYáni xi sʼe̱le kjoanda nga koatexoma Chjotaxále Niná xi jngo jmi nó (Apocalipsis 20:11-13).
17 ʼYáni xi sʼe̱le kjoanda jebi. Kui kjoanda sʼe̱le je chjotankjín xi kuinje̱ngile yaole nga kjoaʼaí Armagedón kao xtiʼndí xi kʼia jtsín ya sonʼnde chjotse. Kʼoa ya Apocalipsis capítulo 20 kʼoatso nga kjoaʼáyanile xi jekʼien (tʼexkiai Apocalipsis 20:11-13). * ʼYáni xi kjoaʼáyanile. Je “chjota xi tjínle kjoakixi”, xi tsonile, je chjota xi kʼien nichxin kjoatse xi kixi kitʼale Jeobá, kao xi “chjotatsʼen” ʼmile, xi tsonile, je chjota xi tsín tsabe xi tʼatsʼe Jeobá (Hech. 24:15; Juan 5:28, 29). A kui xi tsonile jebi nga kjoaʼáyanile ngatsʼi chjota kʼianga jetíbatéxoma Chjotaxále Niná xi jngo jmi nó. Mai. Je chjota xi tsabe tʼatsʼe Jeobá tonga xi toxá tsín koanmenile nga je kisixále nga kjesa biyajin alikui tikjoaʼáyanile. Jetsakʼaile kjoanda jebi, tonga tsakakó nga tsín mele nga ya koatio ya ʼndenaxó (Mat. 25:46; 2 Tes. 1:9; Apoc. 17:8; 20:15).
XI TOFETʼANI
18. Jósʼin koatio je chjota kʼianga jekjoaʼato xi jngo jmi nó.
18 Kʼianga jekjoetʼa xi jngo jmi nó, ngatsʼi xi tjío i̱ Sonʼnde jechjotatsje koa̱n. Alikui tiʼya xi kjoañʼai kjoaʼani xi totʼatsʼe jée xi tsakajngi Adán (Rom. 5:12). Tondiaa tjóxin ngayeje kjoa xi tsakajngi Adán xi totʼatsʼe nga tsakajngijée. Kʼianga jekjoetʼa xi jngo jmi nó ñaki koatiokon je chjota xi koatio nga̱ ñaki chjotatsje koa̱n (Apoc. 20:5).
19. Ánni machjénsíni nga chótʼayakao xi tofetʼani je chjota.
19 Je Jesús chjotatsje koan kʼoa ʼyañá nga kixi kitʼale Niná ningalani nʼio nkjín koya josʼin kiskotʼayakao je Na̱i. Kʼoa kʼianga jechjotatsje koa̱n ngatsʼi xi koatio i̱ Sonʼnde, a kʼoatisʼin kixi koaitʼale Niná kʼianga skótʼayakao je Na̱i. Nga jngó jngó chjota xi kuitsoni josʼin kʼianga jekjoetʼa xi jngo jmi nó nga si̱kʼéjnandái je Na̱i (Apoc. 20:7). Je xi kixi koaitʼale Niná kʼianga chótʼayakao xi tofetʼani koatio ngantsjai nichxin kʼoa ndái sʼin koatio (Rom. 8:21). Tonga je xi tsín sitjosonle Niná tondiaa ni̱kjeson, tojo ni̱kao je Na̱i kao sénnichxin xi chʼaokjoan (Apoc. 20:8-10).
20. Jósʼe tokuin kʼianga jekichotʼayajin choaa jmeni xi tso je libro xi tsʼe Apocalipsis.
20 Jósʼe tokuin kʼianga jekichotʼayajin choaa jmeni xi tso je libro xi tsʼe Apocalipsis. A tsí nʼio tsjoa sʼe tokuin nga kʼoati bʼakaotʼali josʼin tíbitjoson én jebi. A meli nga kuisenkoai xi kjaʼaí nga kʼoatisʼin katabexkón Niná josʼin mele (Apoc. 22:17). Kʼianga jekachotʼayajiaan jmeni xi sʼa kʼoakoa̱n nʼio tsjoa satío tokoán, kʼoa kʼoati mená nga kʼoakuixoán jokitso je pastro Juan nga i̱ kitso: “Kʼoa katama [...]. Nroai, Señor Jesús” (Apoc. 22:20).
KJOAJNDA 27 Nga jchasontsenle je xtile Niná
[Nota xi faʼaitʼa]
^ I̱ kjoaʼmiya jebi kui chótʼayajiaan nga nʼio ndasʼin koatio je xi kixi koaitʼale Niná, tonga kjoeson je xi kontra batiole je Chjotaxále Niná.
^ Hebreos 10:35-39: “Ali nichajion tsokʼoa xi nda nʼiotʼatakon, je xi tse chjíle. 36 Nga jon machjénno nga jchókjoajinno, jméni nga kuinje̱sínino je kjoanisʼengi, kʼia nga jekinitjoson josʼin nga mele Niná. 37 Ngijngotjolani, je xi kjoaʼaí, kjoaʼaíní, kʼoa likui koa̱ntseyale. 38 Ndʼai je xi chjotakjoakixi kʼoéjnakonní xi totʼatsʼe nga makjainle, tonga tsa koasentʼaxin, likui sasénle ni̱ma̱na. 39 Tonga ñá likui kʼoakjoaan nga binyatʼaxián, nga chaa. Ñá kʼoakjoaan joni je xi makjainle nga kuitjontjai ni̱ma̱le”.
^ Apocalipsis 19:19-21: “Tsaʼbe je cho̱, kao chjotatítjon xi tsʼe sonʼnde kao sondadole, xi tojngo tjío nga kʼoasʼin sʼin kjoajchán. Kontra koaile je xi tíjnason naxín, kʼoa kontra koaile je sondadole. 20 Je cho̱be tsakʼejnanʼio, kao je xi énndiso kinchja̱ya, xi kjoaxkón kisʼin ngixko̱n cho̱be. Kʼoasʼin tsakʼanachale je xi kiskoé choa̱le cho̱be, xi tsabexkón xkósonle. Kinikʼatsaojin nga tjíokon nga jao ya jngo jnrólʼí xi títi kao azufre. 21 Kʼoa je xikʼa kinikʼenni ki̱cha̱ndo xi jitjoni tsʼoa je xi tíjnason naxín. Ngatsʼi nise koanskini yaole”.
^ Apocalipsis 21:1, 2: “Tsaʼbejngoa ngʼajmi chjotse kao jngo sonʼnde chjotse. Je ngʼajmi títjon kao sonʼnde títjon kini, kʼoa ndáchikon likui titjínni. 2 An xi Juan ʼmina tsaʼbe je naxinandá xi tsje, Jerusalén chjotse, xi jitjojenni ngʼajmi tsʼe Niná. Tíjnanda joni tsa jngo chjoón xi tíjnanda xi tʼatsʼe xʼinle”.
^ Apocalipsis 20:11-13: “Tsaʼbejngoa yáxile xi chxoa kji kao je xi tíjnason. Ngixko̱n nga je tsangatʼaxinle sonʼnde kao ngʼajmi. Likui tikoansjainile ʼndele nga je. 12 Tsaʼbe je xi kʼen, xi jchínga kao xi xti, xi tjío ngixko̱n Niná. Je xo̱n kitjoʼai. Kʼoa je xi ngijngo xo̱n kitjoʼai, xi tsʼe kjoabijnachon. Kʼoasʼin je xi kʼen kitsʼaile kjoañʼai tʼatsʼe je kjoa xi tjíotʼa ya xo̱n, josʼin xále. 13 Je ndáchikon kitsjoa je xi kʼen xi ya tjíojin. Kʼoa je kjoabiya kao ya ʼnde jña nga tjío xi kʼen kitsjoa je xi ya tjíojin. Kʼoasʼin kitsʼaile kjoañʼai nga jngójngó josʼin xále”.
