1, 2. Jméni xi sakʼoa nikjaʼaitsjeen.

 A SAKʼOA kʼoasʼin nikjaʼaitsjain tsa nrʼoéli Jeobá kʼianga bʼetsʼoalai. Kʼianga kjoa faʼatojin je ndsʼee nkjín xi kʼoasʼin síkjaʼaitsjen. Kʼianga kjoa bitjatojiaan tsakui nichxin kʼoatisʼin si̱kjaʼaitsjeen nga tsín nrʼoéná Niná nga bʼetsʼoalee.

² I̱ kjoaʼmiya jebi kui chótʼayajiaan ánni nga tsín jao tjínni tokoán nga nrʼoéná Jeobá kʼianga bʼetsʼoalee (1 Juan 5:15). Kʼoati kui chótʼayajiaan ánni sakʼoa kʼoasʼin nikjaʼaitsjenñá nga tsín nrʼoéná je Jeobá, tonga kʼoati jchaa jósʼin tsjoáná jme xi nijélee.

3. Ánni kʼoatsoniná Jeobá nga kʼoétsʼoalee.

³ Je Biblia kʼoatso nga nʼio tsjoakená je Jeobá kʼoa nga chjí bekonná (Ageo 2:7; 1 Juan 4:10). Kuinga kʼoatsoniná nga kʼoétsʼoalee kʼoa nga si̱jélee nganʼio (1 Ped. 5:6, 7). Koasenkaoná je Niná nga̱ kui xi mele nga si̱chriantʼalee kʼoa nga chókjoajinná kjoa xi bitjatojiaan.

4. Jósʼin ʼyañá nga nrʼoé Jeobá kʼianga bʼétsʼoale choʼndale (kʼoati chótsenlai sén xi faʼaitʼa).

⁴ Ya Biblia nkjín choa̱ faʼaitʼa jñani kʼoatso nga kinrʼoéle Jeobá je choʼndale kʼianga tsakʼétsʼoale. Jolani je rey David, jokjitse tsakʼejna nkjín kʼa tsakʼetʼale je chjota xi jtike tonga jé Jeobá kisijéle nganʼio ngantsjai. Ñandia nga i̱ kitsole: “Ji Jeobá, tinóʼyai nga bʼetsʼoale; tinóʼyanái nga tisijéle nganʼio. Nga kixi kʼoa nga tjínli kjoatéxomakixi, tinóʼyanái” (Sal. 143:1). Je Jeobá kinrʼoéle kʼoa tsakʼasjentjai  (1 Sam. 19:10, 18-20; 2 Sam. 5:17-25). Ñaki tjínjngo kon David nga i̱ kitso: “Je Jeobá chrian tíjnale ngatsʼi je xi nchja̱le”. Kʼoati tjín tokoán tsanda ñá (Sal. 145:18).

5. A kʼoakisʼin ngantsjai je Jeobá jmeni xi kisijé choʼndale kʼianga tsakʼétsʼoale. Jngo choa̱ tʼejnai (kʼoati chótsenlai sén xi faʼaitʼa).

⁵ Tsakui nichxin likuikjoan kui kʼoasʼin je Jeobá jmeni xi mená ñá. Kʼoakoan je pastro Pablo, kʼoakitso nga joxi naʼyá kisasensʼenjin yaole nga kjoa jaʼatojin. Kʼoa jan kʼa kʼoakitsole Niná nga katafaʼáxinle kjoa jebi. Je Jeobá kinrʼoéle kʼianga tsakʼétsʼoale, tonga tsín kʼoasʼin tsakasenkao josʼin koanmele je Pablo. ʼNdele nga kjoaʼaxinle je kjoa xi tífaʼatojin, tosaa kui xi kisʼin nga kitsjoale nganʼio nga katachókjoajinle ánni nga tosi tonda kixi koaitʼanile (2 Cor. 12:7-10).

6. Ánni nga sakʼoa kʼoasʼin nikjaʼaitsjenñá nga tsín nrʼoéná Jeobá kʼianga bʼetsʼoalee.

⁶ Kʼianga kʼoétsʼoalee Jeobá tsakui nichxin tsínkui kʼoasʼin jmeni xi mená ñá, tonga jé xi ngisa nda be jméni xi machjénná kʼoa tsʼato kʼoakji tsjoáná jokji nijélee (Efes. 3:20). Kuinga sakʼoa tsín majinniná kʼiáni kʼoa jósʼin koasenkaoná.

7. Ánni machjénni nga si̱kjaʼaitsjenjiaan jmeni xi si̱jélee Jeobá kʼianga kʼoétsʼoalee. Jngo choa̱ tʼejnai.

⁷ Ngisaa jchaa jmeni xi si̱jélee Jeobá kʼianga ngisa koa̱njinná jmeni xi mele. Kataʼyala jokoan je ndsʼee Martin Poetzinger. Nga to chriankʼia chixan yaa kinikasén jngo ʼnde jñani kjoañʼai kinikjaʼá. Kʼianga tosʼa kicho ya ʼnde jebi, kʼoakitsole Jeobá nga katabasenkao nga kʼoéjnandái ánni nga koa̱n ya kʼoéjnakaoni je chjoónle kʼoa nga koa̱n kuitsoyason ijngokʼani. Nga jejao xomana jaʼato kʼoa nga tsín kinikʼéjnandái ndsʼee jebi tsakʼétsʼoale je Jeobá kʼoa i kitsole: “Tisenkaonái nga katamajinna jméni xi meli nga sʼian”. Kui kisikjaʼaitsjenjin jokjima je ndsʼee xi kʼoati ya tjío ʼnde jebi. Nkjín mani xi yánchjínle kao ʼndíxtile tjíosíkjáojin. Kuinga i̱ kitsonile Jeobá je ndsʼee Poetzinger kʼianga tsakʼétsʼoale: “Tsjoale kjoanda nga kui xá jebi tibʼainái. Tisenkaonái nga sinʼiojian je ndsʼe”. Je xi ñajan nó tsakʼejna ya ʼnde jebi, kisinʼiojin je ndsʼe̱.

8. Jméni xi kuenta sʼiaan kʼianga kʼoétsʼoaa.

⁸ Kuenta sʼiaan nga jekʼoasʼin tjínndajinle Jeobá nga kjoaʼaxin jmeni xi  kjoañʼai síkjaʼáná kʼianga kuicho choa̱le. Jolani nga kjoaxkón sʼe, nga chʼin katʼaná kʼoa nga biyaa. Jé Chjotaxále Niná kjoaʼaxin ngayeje kjoa jebi (Dan. 2:44; Apoc. 21:3, 4). Tonga nga kjesa faʼáxinjin jebi, títsjoáʼndee nga je Na̱i tíbatéxoma (Juan 12:31; Apoc. 12:9). b Jéjin Na̱i ndasʼin kʼoaxki̱ tsa ndʼailani kjoaʼaxin Jeobá ngayeje kjoa xi tjín. Tíbasenkaoná je Jeobá ningalani tichoyá nga kuitjoson jmeni xi tso. Kataʼyala jósʼin tíbasenkaoná.

9. Jósʼin basenkaoná je Jeobá kʼianga kui chjoejiaan jmeni xi sʼiaan. Jngo choa̱ tʼejnai.

⁹ Tsjoáná kjoachjine. Je Jeobá kʼoatso nga tsjoáná kjoachjine nga nda chjoéjiaan jmeni xi sʼiaan. Ngisaa kʼianga kui chjoéjiaan jmeni xi nʼio tjínle kjoandosin, jolani tsa kuixaan kʼoa tsa mai (Sant. 1:5). Kataʼyala jokoan jngo tichjaa xi María ʼmi xi tíjnatoje. c Precursora regular sʼin tísíxá kʼianga tsabexkon jngo ndsʼee. Itso: “Nga jeki nichxin miyo kichobaijin kʼoa koantsjoachaníjin xíngijin. Nga tjínnele skoejian jmeni xi sʼian tsee tsakʼetsʼoale Jeobá nga tsakʼeyanajmíle jotjín tokoan. Koanjinna nga je Jeobá koandiaana ninga anni skoejian jmeni xi sʼian”. Je María kʼoatso nga kinrʼoéle Jeobá kʼoa nga kitsjoale kjoachjine xi machjénle. Yaa xo̱n xi Énle Niná yʼangini tsakásjaijin jméni xi koa̱n sʼin kʼoa nkjín koya koansjaile xi tsakasenkao. Nga kotʼaya Énle Niná je na̱le kʼoati kitsjoale kjoafaʼaitsjen. Kʼoa je María nda kiskoejin jmeni xi kisʼin.

10. Tojo tso 2 Corintios 4:7, jósʼin basenkao Jeobá je choʼndale. Jngo choa̱ tʼejnai (kʼoati chótsenlai sén xi faʼaitʼa).

¹⁰ Tsjoáná nganʼio nga chókjoajinná je kjoa xi bitjatojiaan. Tojosʼin tsakasenkao je pastro Pablo, je Jeobá kʼoati tsjoáná nganʼio nga chókjoajinná je kjoa xi bitjatojiaan (tʼexkiai 2 Corintios 4:7). d Kataʼyala josʼin tsakasenkao Jeobá jngo ndsʼee xi Benjamin ʼmi. Saʼnda nga sʼa ʼndí kji, nkjín nó nga ya tsakatio kao familiale ya África ya ʼnde jñani nikatío je chjota xi xin naxinandá faʼaini. Itso: “Kjitʼaa tsakʼetsʼoale Jeobá kʼoa kʼoakixinle nga katabasenkaona nga kui xi ndatjín kʼoasʼian. Kʼoasʼin tsaʼbeña nga kinrʼoéna Jeobá nga̱ nda kisʼe tokoan, nʼiojin koan nga tosi tonda kixinyasoan, kʼoa kisʼeyona xo̱n xi Énle Niná yʼangini xi tsakasenkaona  nga nʼio kisʼejna kjoamakjainna”. Itsosa: “Nga tsakʼexkia tʼatsʼe xi kjaʼaí ndsʼee kʼoa nga tsaʼbe josʼin tsakasenkao Jeobá nga kichokjoajinle kjoa xi jaʼatojin, tsakasenkaona nga tsín kisikʼajenle tokoan kʼoa nga tosi tonda kixi kitʼale Niná”.

11, 12. Kʼianga bʼetsʼoalee Jeobá, jósʼin síchjén je ndsʼee nga basenkaoná (kʼoati chótsenlai sén xi faʼaitʼa).

¹¹ Jé ndsʼee síchjén Jeobá nga basenkaoná. Nitje̱n nga kjesa nikʼienjin je Jesús, nʼio tsakʼétsʼoa. Je Jesús kui jée kisʼene nga Niná kinchja̱ʼaonle, kʼoa kui nʼio kisijéle Niná nga tsínkui jée katasʼene. Tonga je Niná kʼoasʼin tsakasenkaoni nga kisikasén jngo ánkje nga kitsjoanganʼiole (Luc. 22:42, 43). Kʼoatisʼin basenkaoná Jeobá ndʼaibi kʼiatsa kuinchja̱ná kʼoa tsa kuichosíxatʼaná jngo ndsʼee nga tsjoánganʼioná. Ngatsʼiaa koaan kʼoainganʼiolee je ndsʼee (Prov. 12:25).

¹² Kataʼyala tʼatsʼe jngo tichjaa xi Míriam ʼmi. Kʼianga jngo jao xomana jaʼato nga kʼien xʼinle, tojé tsakʼejnaʼya ndʼiale kʼoa nʼio ba kisʼe kon. Kiskiʼndá ʼndeʼndee kʼoa nganʼio koanchjénle. Itso: “Alikui kitso tokoan nga ʼya xi kinchjale. Tosaa je Jeobá tsakʼetsʼoale. Kʼiaa kitjokjane teléfono nga tibʼetsʼoa. Jé kinchja̱na jngo xi chjotajchínga sʼin tíjna”. Je ndsʼee jebi kao chjoónle kitsjoanganʼiole Míriam. Kʼoa je tichjaa kʼoatso nga je Jeobá xokisʼin nga kinchja̱le ndsʼee jebi.

13. Jngo choa̱ tʼejnai jósʼin síchjén Jeobá je chjota xi tsín je bexkón nga basenkaoná.

¹³ Je Jeobá sakʼoa je síchjén chjota xi tsín je bexkón (Prov. 21:1). Kʼianga bʼetsʼoalee Jeobá sakʼoa je síchjén chjota xi tsín je bexkón nga basenkaoná. Tobʼelañá, jé Jeobá xokisʼin nga kitsjoaʼndele je rey Artajerjes je Nehemías nga ki ya Jerusalén nga kikʼéndaya je naxinandá (Neh. 2:3-6). Ndʼaibi kʼoati síchjén Jeobá chjota xi tsín je bexkón nga basenkaoná.

14. Jósʼin basenkaoli jokoan je tichjaa Soo Hing (kʼoati chótsenlai sén xi faʼaitʼa).

¹⁴ Jngo tichjaa xi Soo Hing ʼmi kʼoatso nga je chjinexki kisichjén Jeobá nga  tsakasenkao. Je tile chʼin kiskatʼale kjoafaʼaitsjenle, kʼoa nga koanskanni ngʼa jñani kiskangi. Nga kʼoakoan, je tichjaa kao xʼinle ñʼai koanle tao̱n nga̱ tsín tikisixáni nga kisikuinda je tile. Je tichjaa kʼoatso nga tsín tikichokjoajinnile kjoa xi tjíofaʼatojin. Tsakʼétsʼoale Jeobá nga tsakʼéyanajmíle jotjín kon. Nga kisʼejinle je chjinexki jme kjoa xi tjíofaʼatojin tichjaa, tsakasenkao nga kitjoéle nganʼio xi tsjoá je gobierno. Kʼoati kisokole jngo ndʼia jña tsakationi xi ngisa choa tsakʼéchjí. Je tichjaa itso: “Tsaʼyaníjin josʼin tsakasenkaonajin Jeobá nga kui kjoa kitjatojinjin. Kinrʼoénajin kʼianga tsakʼetsʼoalaijin” (Sal. 65:2).

15. Jmé xi kisʼin jngo tichjaa nga tsabe nga nrʼoéle Jeobá kʼianga bʼétsʼoale.

¹⁵ Kʼianga bʼetsʼoalee Jeobá sakʼoa tsín kʼoasʼin tsjoáná jme xi nijélee josʼin mená. Tonga kui tsjoáná jmeni xi kʼiakjoan machjénná nga kixi kjuintʼalee. Kuinga kuenta sʼianñá josʼin basenkaoná je Jeobá kʼianga bʼetsʼoalee. Jngo tichjaa xi Yoko ʼmi kʼoasʼin kisikjaʼaitsjen nga tsín nrʼoéle Jeobá kʼianga bʼétsʼoale. Xo̱n tsakʼétʼa jmeni xi síjéle Jeobá kʼianga bʼétsʼoale. Xi koanskanni, kisikjaʼaitsjenjin jme xi tsakʼétʼaxo̱n kʼoa tsabe nga kitsjoale Jeobá jmeni xi kisijéle. Saʼnda kitsjoale jme xi tsín tifaʼaitsjennile tichjaa tsakui kisijé. Kuinga machjénni nga si̱kʼayaa nichxin nga si̱kjaʼaitsjenjiaan jósʼin títsjoáná Jeobá jmeni xi nijélee kʼianga bʼetsʼoalee (Sal. 66:19, 20).

16. Kʼianga bʼetsʼoaa, jósʼin basenkaoná nga ñaki kʼoabʼé tokoán nga kjuinrʼoéná Jeobá (Hebreos 11:6).

¹⁶ Kʼianga bʼetsʼoalee je Jeobá machjénní nga kʼoakʼoé tokoán nga kjuinrʼoéná tonga kʼoati machjén nga si̱kjaʼaitsjeen josʼin títsjoáná jmeni xi tinijélee, nga̱ tsín kʼoakjoansʼin tsjoáná josʼin mená (tʼexkiai Hebreos 11:6). e Kataʼyala jokoan je Mike kao Chrissy. Yaa Betel koanmele koaisíxá tsakai. Je Mike itso: “Nkjín kʼa tsakʼendaijin solicitud kʼoa ntsjaintsjai tsakʼetsʼoalaijin Jeobá nga ya menajin koanngínkʼainganʼiuijin tonga alikuikʼia  kinokjoanajin”. Je Mike kao chjoónle kʼoasʼin kisikjaʼaitsjen nga ngisa nda be Jeobá jñani ngisa nda tsjoánganʼio. Tosi tonda je Jeobá kisixále kʼoa precursor regular sʼin kisixá jñani ngisa machjén xi tsoyason. Kʼoa kitsjoanganʼio jñani sʼenda ndʼia jña ʼyaxkón Niná. Kʼoa ndʼaibi superintendente xi tsʼe circuito ma. Je Mike itso: “Kʼianga bʼetsʼoalaijin Jeobá, alikui tongantsjai nga kui tsjoánajin jmeni xi nijélaijin, tonga ʼyaníjin nga nrʼoénajin kʼoa sakʼoa kui tsjoánajin jmeni xi tsín choyalaijin”.

17, 18. Tojo tso Salmo 86:6, 7, ánni kʼoéjngosíñá tokoán nga kjuinrʼoé Jeobá kʼianga kʼoétsʼoalee.

¹⁷ (Tʼexkiai Salmo 86:6, 7). f Je David ñaki kʼoatsakʼé kon nga kinrʼoé Jeobá kʼianga tsakʼétsʼoale. Kʼoati koa̱n kʼoéjngoaa tokoán tsanda ñá. Je choa̱ xi kaʼyaa i̱ kjoaʼmiya jebi, kui bakóná nga je Jeobá tsjoáná kjoachjine kao nganʼio xi machjénná nga chókjoajinná je kjoa xi bitjatojiaan. Kʼoati kaʼyaa nga je ndsʼee síchjén Jeobá kʼoa kao chjota xi tsín je bexkón kʼianga basenkaoná.

¹⁸ Ningalani tsín tongantsjai nga kʼoasʼin tsjoáná Jeobá jmeni xi nijélee kʼianga bʼetsʼoalee, tonga ʼyañá nga nrʼoéná kʼoa kʼiakjoán tsjoáná jmeni xi nijélee kʼianga machjénná. Kuinga machjénni nga tosi tonda kʼoétsʼoalee je Jeobá kʼoa jé sikuindaná ndʼaibi. Kʼoa kʼianga jeʼndenaxó koa̱n Sonʼnde tsjoáná tojmeni xi koa̱nchjénná (Sal. 145:16).