1. Jméni xi ñʼai maná ngatsʼiaa.

 A SAKʼOA ñʼai mali nga bitjosonli jme xi bʼendajin. Ali tsa tojijin xomai. Tobʼelañá, je Philip kui xi koanmele nga nkjín kʼa kʼoetsʼoale Jeobá, tonga tsín maʼale nga kʼoasʼín. Je Erika kʼoasʼin tsakʼéndajin nga xátí kuicho kjoajtín kʼianga ʼmiyasoán, tonga tojo tsínni xátí bichó. Je Tomáš kui xi koanmele nga tsakʼéxkia ngakjijngo Biblia, tonga itso: “Alikui tsjoa kisʼe tokoan nga tsakʼexkia Biblia. Jan kʼa tsakʼetsʼiakoa nga tsakʼexkia tonga toyaa tjen Levítico kichokoa”.

2. Ánni nga tsín si̱kʼajennilee tokoán tsa kje bichotjenngijián jmeni xi jetsakʼendajiaan.

² Ali nikʼajenjinlai tokuin tsa tsín bitjosonli josʼin bʼendajin nga nixálai Niná, nga̱ nichxin tjenkao kʼoa alikui choa ñʼai tíjna nga bitjosonná jmeni xi bʼendajiaan ninga tosʼa choa tíjna. Nga tsín tinikʼajenlai tokuin kʼoasʼin bakoni nga chjí ʼyatokuin nga miyoli ma Jeobá kʼoa nga kʼoasʼin tinixálai jokji tjen kʼoakjimali. Kuenta sʼín Jeobá jebi kʼoa alikui kui síjéli jmeni xi tsín kʼoakoa̱nli (Sal. 103:14; Miq. 6:8). Kuinga machjénni nga kui kʼoéndajin jmeni xi koa̱n kuichotjenngi. Jméni xi koa̱n sʼiain nga kuitjosonli jmeni xi kʼoéndajin. Kataʼyala kʼa choa̱.

3. Ánni nga nʼio tjínnile kjoandosin nga ñaki kʼoakʼoé tokoán nga si̱tjosoán jmeni xi bʼendajiaan.

³ Ánni machjénni nga ñaki kʼoakʼoé tokoán nga si̱tjosoán jmeni xi kʼoéndajiaan. Nga̱ tsa ñaki kʼoatjín tokoán kʼoénejinlee yaoná nga kuitjosonná. Nga ñaki kʼoatjín tokoán nga mená si̱tjosoán jmeni xi bʼendajiaan yaa mangóson joma je ntjao̱ xi fikao je chitso. Tsa kifaʼa ntjao̱, kuichojin je chitso jñani tífi. Kʼoa tsa nʼio kjoaʼa je ntjao̱ ngisajin ngotjo  kuichoni. Tikʼoasʼinni, tsa ñaki kʼoakʼoé tokoán nga kʼoasʼiaan jmeni xi bʼendajiaan kuitjosonná. Jngo ndsʼee xi El Salvador tsʼe, xi David ʼmi, itso: “Ngisaa bʼenelee yaoná nga nitjosoán jmeni xi bʼendajiaan nga ñaki kʼoabʼe tokoán kʼoa alikui jme xi bʼéchjoaná”. Jméni xi koasenkaoná nga ñaki kʼoakʼoé tokoán nga kuitjosonná jmeni xi bʼendajiaan.

4. Jméni xi koa̱n si̱jélee Jeobá (Filipenses 2:13; kʼoati chótsenlai sén xi faʼaitʼa).

⁴ Kʼoatʼinlai Jeobá nga katabasenkaoli nga koa̱nmeli si̱tjosuin jmeni xi kʼoéndajin. Jé nganʼiotsjele Niná koasenkaoli nga koa̱nmeli si̱tjosuin jme xi kʼoéndajin (tʼexkiai Filipenses 2:13). b Tonga sakʼoa tokui nga tjín xi bʼendajinñá nga kʼoasʼin nikjaʼaitsjeen nga toxá kui kjineniná kʼoasʼiaan. Kʼoa tsakui nichxin tsínni tso tokoán nga kui kʼoasʼiaan. Kʼoakoan je Norina, jngo tichjaa xi Uganda tsʼe. Kʼoasʼin tsakʼéndajin nga koasjai jngo chjota xi Biblia kuitsoyale. Tonga kʼoasʼin kisikjaʼaitsjen nga tsín male nda tsoya. Jmé xi tsakasenkao tichjaa jebi. Itso: “Nyaon nyaon tsakʼetsʼoale Jeobá nga katabasenkaona nga koa̱nmena xínyale Biblia je chjota. Tonga kʼoati tsakʼenele yaona nga ngisasa nda kixinya. Tochoaa sá jaʼato nga tsaʼbe nga ñaki jekʼoatjín tokoan nga mena xínyale Biblia je chjota. Nga tikuini nó jao chjota kixinyale”.

5. Jméni xi koa̱n si̱kjaʼaitsjenjiaan nga ngisa koa̱nmená si̱tjosoán jme xi kʼoéndajiaan.

⁵ Tikjaʼaitsjenjin josʼin tíbasenkaoli Jeobá (Sal. 143:5). Je pastro Pablo kisikjaʼaitsjenjin josʼin tsakakóle kjoanda Niná. Kui xi tsakasenkao nga nʼio nda kisixále Niná (1 Cor. 15:9, 10; 1 Tim. 1:12-14). Tikʼoasʼinni, nga si̱kjaʼaitsjenjin josʼin tíbasenkaoli je Jeobá ngisaa koa̱nmeli si̱tjosuin jme xi tibʼendajin (Sal. 116:12). Kataʼyala jmé xi tsakasenkao jngo tichjaa xi Honduras tsʼe nga precursora regular koan. Itso: “Kui kisikjaʼaitsjenjian nga nʼio tsjoakena je Jeobá. I jaʼaikaona jinnaxinandále kʼoa síkuindana. Nga kui kisikjaʼaitsjenjian jebi ngisaa tsjoake̱ koan Jeobá kʼoa ngisaa tikoanmengánina nga precursora koa̱n”.

6. Jmésa xi koasenkaoná nga koa̱nmená kʼoasʼiaan jmeni xi kʼoéndajiaan.

⁶ Kui tikjaʼaitsjain jósʼin koasenkaoli nga kuichotjenngi jmeni xi tibʼendajin. Si̱kʼaxki̱la ijngokʼá je Erika, xi sa jekabʼaxki̱ ya párrafo 1. Jmé xi tsakasenkao nga xátí kicho nga satíoná kjoajtín kʼianga ʼmiyasoán. Itso: “Koanjinna nga nʼio tse jme xi tisicha kʼianga tsín xátí bichoa. Tonga tsa xátí kuichoa koa̱njin sitiʼnda kʼoa kjoakaonajmía je ndsʼee. Kʼoati kjuinrʼoe je kjoafaʼaitsjen xi bʼainá xi koasenkaona nga ngisa nda xínyasoan kʼoa ngisaa  tsjoa sʼe̱ tokoan”. Nga kui kisikjaʼaitsjenjin jebi je Erika xátí kicho. Jméni xi koa̱n si̱kjaʼaitsjenjin ji, tsakui tinikjaʼaitsjain nga meli ngisa nkjín kʼa kʼoétsʼoalai Jeobá kʼoa nga ntsjaintsjai kʼoéxkiai je Biblia, kui tikjaʼaitsjain nga ngisa miyoli koa̱n je Jeobá tsa kʼoasʼiain (Sal. 145:18, 19). Kʼoa tsakui tinikjaʼaitsjain nga ngisa si̱ndayai yaoli, kui tikjaʼaitsjain nga ngisa nda cho̱bao kao xi ngikʼa tsa kʼoasʼiain (Col. 3:14). Tʼetʼaxuin ánni nga menili kuichotjenngi xi kʼoéndajin kʼoa sakʼoa chótʼajin. Je Tomáš, xi sa jená kanikʼaxkiaa, itso: “Ngisaa bʼenele yaona nga sitjosoan jmeni xi bʼendajian kʼianga kuenta sʼian ánni nga menina kuichotjenngia”.

7. Jméni xi kisʼin je Julio kao chjoónle nga kichotjenngi jme xi tsakʼéndajin.

⁷ Je timiyui chjota xi koasenkaoli nga kuitjosonli jme xi kʼoéndajin (Prov. 13:20). Je Julio kao chjoónle kui xi koanmele nga ya koaitsjoánganʼio jñani ngisa machjén xi tsoyason. Jméni xi tsakinyakao. Itso: “Jé kinimiyuijin xi tsakinyakaonajin kʼoa tsakʼeyanajmílaijin jme xi tjínndajinnajin. Nga jekichotjenngi je jmeni xi tsakʼéndajin, nda kjoafaʼaitsjen kitsjoanajin. Kʼoati kiskonanginajin jókjimani jme xi tjínndajinnajin. Kʼoa nga nganʼio koanchjénnajin tsakinyakaonajin nga tosi tonda kuitjosonnajin jme xi tjínndajinnajin”.

8. Jósʼin kuichomani tsa tokʼia kʼoasʼiaan jmeni xi tjínndajinná kʼianga kuitso tokoán (kʼoati chótsenlai sén xi faʼaitʼa).

⁸ Ngatsʼiñá nga sakʼoa tsín tso tokoán nga kʼoanʼia tsa jmeni. Tonga alikui xi tsonile tsa tsín tisi̱tjosonñá jmeni xi tjínndajinná. Si̱kjaʼaitsjenla ijngokʼá joma je ntjao̱ nga fikao je chitso. Ninga je ntjao̱ fikao chitso jñani mele koai, tonga alikui tongantsjai nga nʼio faʼa je ntjao̱. Kʼoa tjín nichxin nga sakʼoa tsín kitjen ntjao̱. Tonga alikui xi tsonile nga tsín tikoa̱n koaikaoni chitso je chjota xi tísíxákao. Tobʼelañá, tjínkʼa chitso xi motor tjínle kʼoa tjínkʼa xi yá tjínle xi kjenndáni, kʼoa kui síchjén jebi je chjota xi síxákao. Tikʼoasʼinni, sakʼoajin koa̱nmená si̱tjosoán jme xi tjínndajinná tonga sakʼoajin mai. Tsa toñá xi mená kʼoasʼiaan alikuijin kuitjosonná. Tojo sʼín je chjota xi chitso síxákao nga fikao je chitso ninga kʼia nga tsín kitjen ntjao̱, kʼoati koa̱n kʼoénelee yaoná nga kuichotjenngiaa xi tjínndajinná ninga sakʼoa ñʼai koa̱nná. Ninga tse kjoama̱ sʼe̱nginá tsjoa sʼe̱ tokoán tsa kʼoasʼiaan. Jméni xi koasenkaoná tsa ñʼai kjimaná nga tíbitjosonná jmeni xi tjínndajinná. Kuila títjon kataʼyaa jméni xi tso kʼa.

9. A ndatjín nga nitjosoán jmeni xi tjínndajinná ninga sakʼoa tsín tso tokoán nga kʼoasʼiaan.

⁹ Je Jeobá kui xi mele nga ñaki kao kjoatsjoa si̱xálee kʼoa nga ñaki ni̱ma̱ná  katanroajinni nga kʼoasʼiaan (Sal. 100:2; 2 Cor. 9:7). Ánni machjénni nga si̱tjosoán jme xi tjínndajinná ninga sakʼoa tsín tso tokoán. Si̱kjaʼaitsjenjinla jmeni xi kitso je pastro Pablo. I kitso: “Kʼoasʼin bʼenele yaona, joni tsa jngo choʼnda” (1 Cor. 9:25-27). Je Pablo tsakʼénele yaole nga kʼoakisʼin jmeni xi sasénle Jeobá ninga kʼia nga tsín tso kon. Nga kʼoakisʼin Pablo tsjoa kisʼe kon Jeobá kʼoa kisichikontʼain nga nda kisixále (2 Tim. 4:7, 8).

10. Jósʼin kuichomani tsa si̱tjosoán jme xi tjínndajinná ninga sakʼoa tsín tso tokoán nga kʼoasʼiaan.

¹⁰ Tsjoa sʼe kon je Jeobá kʼianga nitjosoán jmeni xi tjínndajinná ninga sakʼoa tsín tso tokoán, nga̱ kuinga kʼoanʼiañá nga tsjoachaa Jeobá. Je Jeobá kisichikontʼain Pablo kʼoa kʼoati sichikontʼainná tsanda ñá tsa kʼoasʼiaan (Sal. 126:5). Kʼoa nga ʼyaa nga síchikontʼainná ngisajin koa̱nmená si̱tjosoán jme xi tjínndajinná. Jngo tichjaa xi Polonia tsʼe xi Lucyna ʼmi, itso: “Sakʼoa tsín tso tokoan nga kjuíxinyasoan, ngisaa tsa kʼia nga aonyana. Tonga kʼianga jefeʼe̱ña tsjoa sʼe tokoan kʼoa alikui jme xi mangósonkao nga kʼoasʼe tokoán”. Kataʼyala jméni xi koa̱n sʼiaan tsa tsín tso tokoán nga si̱tjosoán jme xi tjínndajinná.

11. Jósʼin koasenkaoná Jeobá nga koa̱nná chjoéxkoá yaoná.

¹¹ Kʼoatʼinlai Jeobá nga katabasenkaoli nga koa̱nli chjoéxkuí yaoli. Jngo chjota xi kjoéxkó yaole male síkuinda kjoafaʼaitsjenle kao jmeni xi sʼín. Nga chjoexkoá yaoná alikui kui xi chʼaotjín kʼoanʼia. Basenkaoná nga kui kʼoanʼia xi ndatjín. Ngisaa tsa ñʼai kjimaná kʼoa tsa tsín tso tokoán nga kʼoasʼiaan jme xi tjínndajinná. Nga maná chjoexkoá yaoná kui “kjoanda xi tsjoájin ni̱ma̱ná je espíritu santo”. Tsa si̱jélee nganʼiotsjele Jeobá kui xi koasenkaoná nga koa̱nná chjoéxkoá yaoná (Luc. 11:13; Gál. 5:22, 23). Je David, xi jenása kanikʼaxkiaa ya párrafo 3, kʼoasʼin tsakʼéndajin nga ngisa kjitʼa skótʼaya nga toje. Nʼio tsakasenkao nga tsakʼétsʼoa. Itso: “Kʼoakixinle Jeobá nga katabasenkaona nga koa̱nna skoexkoá yaona. Tsakasenkaona Jeobá nga kʼoakixinle. Jngo programa tsakʼenda josʼin skotʼaya nga toʼan kʼoa tojo kui tifitjenngia saʼnda ndʼaibi”.

12. Jósʼin basenkaoná jmeni xi tso Eclesiastés 11:4 nga bitjosonná jmeni xi tjínndajinná.

¹² Alikuijin choyalai nga kʼia kʼoasʼiain nga nda kuijnai. Nga̱ alikuijinkʼia nda kuiyoaa nichxin xi tiyoaa ndʼaibi. Tsa kʼoakuixoán nga kʼia kʼoasʼiaan nga nda kuiyoaa, alikuijinkʼia kuichotjenngiaa jme xi tjínndajinná (tʼexkiai Eclesiastés 11:4). c Jngo ndsʼee xi Dayniel ʼmi, itso: “Alikuikʼia nga nda biyoaa, tonga tsa kʼoasʼiaan jmeni xi tjínndajinná jchañá nga tsínni nʼio ñʼai tíjna”. Jngo ndsʼee xi Paul ʼmi, xi Uganda tsʼe kʼoatso nga tsín koa̱n skan kʼoasʼiaan jme xi tjínndajinná. Itso: “Kʼianga kʼoanʼia jmeni xi tjínndajinná ninga ñʼai koa̱nná je Jeobá sichikontʼainná” (Mal. 3:10).

13. Ánni ndatjínni nga tochoa choa kʼoasʼiaan jmeni xi tjínndajinná.

¹³ Sa tse sa tse tixálai Jeobá. Sakʼoajin tsín kuitso tokoán nga kʼoasʼiaan jmeni xi tjínndajinná tsa kʼoasʼin si̱kjaʼaitsjeen nga tsín kuitjosonná. Tsa kʼoakjimai koaan tochoa choa kʼoasʼiain jmeni xi tjínndajinli ánni nga kuitjosonnili. Tobʼelañá, tsakui xi meli nga si̱ndayasai yaoli, koaan tochoa choa kʼoasʼiain. Kʼoa tsakui xi meli nga kʼoéxkiai ngakjijngo Biblia koaan  kʼoasʼin kʼoéndajin nga tochoa choa kʼoéxkiai. Je Tomáš, xi sa jekanikʼaxkiaa nʼio ñʼai koanle nga jngo nó tsakʼéxkiani ngakjijngo Biblia. Itso: “Koanjinna nga tsín kʼoakoa̱nna nga jngo nó kʼoexkiaña je Biblia. Tsakʼetsʼiakao ijngokʼa tonga tochoa choaa tsakʼexkia. Saʼnda tsín jngo capítulo tsakʼexkia nga jngo nichxin kʼoa kisikjaʼaitsjenjinña jmeni xi tsakʼexkia. Kʼoa sa tsjoake̱ sa tsjoake̱ koan nga tsakʼexkia”. Nga tsjoake koan Tomáš nga tsakʼéxkia Biblia ngisaa tse nichxin kisikʼayale, kʼoa jetʼale nga tsakʼéxkia ngakjijngo Biblia. d

14. Jmé xi bʼetʼa sakʼoaná nga tsín bitjosonná jmeni xi tjínndajinná.

¹⁴ Sakʼoajin ñʼai koa̱nná nga kuitjosonná jmeni xi tjínndajinná ninga mená kʼoasʼiaan. Tobʼelañá, tsa toxijña jme xi koa̱nná kuijin xosikaoná nga tsín kuitjosonná jmeni xi tjínndajinná (Ecl. 9:11). Tsa jmenije̱ xi sikʼajen tokoán kʼoa tsín titsjoa sʼe̱niná (Prov. 24:10). Nga chjotajée maa sakʼoajin kui kʼoasʼiaan xi tsín ndatjín kʼoa kuijin xosikaoná nga tsín kuitjosonná jmeni xi tjínndajinná (Rom. 7:23). Tsakuije̱ nga jenʼio aonyaná (Mat. 26:43). Jméni xi koasenkaoná nga tsín si̱kʼajenlee tokoán nga kuitjosonná jmeni xi tjínndajinná.

15. Ánni nga tsín koa̱n si̱kʼajennilee tokoán ninga sakʼoa kjoa bitjatojiaan (Sal. 145:14).

¹⁵ Kʼiatsa sakʼoa kjoa sʼe̱ná alikui xi tsonile nga tsín kuitjosonná jmeni xi tjínndajinná. Je Biblia kʼoatso nga toxá kjoa kuitjátojinñá. Tonga kʼoati tsoná nga je Jeobá koasenkaoná nga kuitjosonná jme xi tjínndajinná (tʼexkiai Salmo 145:14). e Je Philip, xi sa jekanikʼaxkiaa ya párrafo 1,  itso: “Tsa tsín kʼoama sakʼoaná nga bitjosonná jmeni xi tjínndajinná, je xi ngisa chjíle kuinga tosi tonda kʼoasʼiaan”. Je David, xi sa jekanikʼaxkiaa, itso: “Kʼianga ñʼai ma sakʼoana alikui kʼoasʼin sikjaʼaitsjen nga kui kʼoechjoana nga kuitjosonna jme xi tjínndajinna, tosaa kʼoasʼin bakonile Jeobá jokji tsjoake̱”. Nga tosi tonda nitjosoán jmeni xi tjínndajinná ninga ñʼai ma sakʼoaná, kʼoasʼin bakonilee Jeobá nga mená kui kʼoasʼiaan jmeni xi tsjoa bʼé kon. Nʼiojin tsjoa sʼe kon je Jeobá nga nitjosoán jmeni xi tjínndajinná ninga sakʼoa ñʼai maná.

16. Jméni xi si̱kjaʼaitsjenjiaan tsa jme xi tíbʼéchjoaná nga tsín tíbitjosonná jmeni xi tsakʼendajiaan.

¹⁶ Jméni xi koa̱n sʼiain kʼiatsa jme xi bʼéchjoali nga kuitjosonli jme xi tjínndajinli. Koaan i̱ tso xi tikjaʼaitsjain: “Jméni xi koa̱n sʼian nga tsín jme xi kʼoechjoana nga kuitjosonna jme xi tjínndajinna” (Prov. 27:12). Tonga tsa tsín tíbitjosonná jmeni xi jetsakʼendajiaan koaan si̱kʼantjaiyaa jmeni xi koa̱n sʼiaan. Nga jchai xi tʼatsʼe jebi, tikjaʼaitsjenjin ijngokʼai a kʼoakoa̱nli nga kuitjosonli jmeni xi jetjínndajinli. f Je Jeobá alikui chʼaosʼin sikjaʼaitsjen xi tʼatsi tsa tsín kuitjosonli jmeni xi jetsakʼendajin tonga xi bele tokuin nga tsínni kʼoakoa̱nli (2 Cor. 8:12).

17. Ánni machjénni nga kuenta sʼiaan jmeni xi jekitjosonná.

¹⁷ Kuenta tʼiain jmeni xi jekitjosonli. Je Biblia kʼoatso nga tsín jokjini Niná nga sichajin jmeni xi tinʼia nga tinixálee (Heb. 6:10). Kʼoati ndatjín nga tsín si̱chajin ji. Tikjaʼaitsjain jméni xi jekitjosonli. Jolani nga miyole Jeobá kjimai, nga ʼmiyasuin kʼoa tsa jekʼinsʼenngindái. Tsa jekitjosonli jmeni xi tsakʼendajin ngasʼa, kʼoati kuitjosonli jmeni xi tjínndajinli ndʼai (Filip. 3:16).

18. Jméni xi kuenta sʼiain kʼianga tinitjosuin jmeni xi tjínndajinli (kʼoati chótsenlai sén xi faʼaitʼa).

¹⁸ Jé Jeobá koasenkaoli nga kuitjosonli jmeni xi tjínndajinli. Tojo sʼín jngo chjota xi chitso síxákao nga tsjoa sʼe kon nga jebichó jñani fi. Kʼoati tjínkʼa xi tsjoa satío kon kʼianga fijinkao chitso ya ndáchikon. Kʼoati tsjoa sʼe̱ tokuin nga tinitjosuin jmeni xi tjínndajinli tsa kuenta sʼiain josʼin tíbasenkaoli je Jeobá. Kʼoa sichikontʼainli nga kuitjosonli jme xi tjínndajinli (2 Cor. 4:7). Nʼio tse kjoanichikontʼain sʼe̱li tsa tsín si̱kʼajenlai tokuin (Gál. 6:9).