KJOAʼMIYA XI CHOTʼAYA 20
KJOAJNDA 67 Tinókjoayai én jebi
Tosi tonda kʼuínyasoán
“Títjon machjén nga je énnda xi tʼatsʼe Cristo katafisonle ngatsʼi chjota” (MAR. 13:10).
XI TÍNCHJA̱NI
Nga tsjoachaa je Jeobá kao chjota ñaki tsjoa tjín tokoán nga ʼmiyasoán.
1. Jméni xi kisʼejinkoaan kʼianga kisʼejna je kjoajtín xi xki̱ nó sʼejna nga nó 2023.
KʼIANGA kisʼejna je kjoajtín xi xki̱ nó sʼejna nga nó 2023 a kui kisʼejinkoaan nga tsʼantjaiyajin josʼin majinná tsakai jmeni xi tso je Biblia kao nga ʼmiyasoán. Tobʼelañá, tsakui nichxin tjínkʼa chjota xi kʼia koa̱nkjainle Énle Niná kʼianga jetjóxin je Babilonia xi nʼioje. Kʼoati tsakʼinná nga tjín jmeni xi tsínti sʼe̱tʼaxo̱nni kʼianga ʼmiyasoán tjen sá noviembre nó 2023. Tonga ali tsakuijin xi tsonile nga tsínti nʼio tjínnile kjoandosin kʼianga kʼuínyasoán.
2. Ánni nga nʼio tjínnile kjoandosin nga tosi tonda kʼuínyasoán (Marcos 13:10).
2 Ngisaa tinʼio tjínngánile kjoandosin nga kʼuínyasoán ndʼaibi nga̱ to jetífikjetʼa nichxin. Si̱kjaʼaitsjenjinla jokitso Jesús tʼatsʼe josʼin sa̱kóyason nichxin xi tiyoaa ndʼaibi (tʼexkiai Marcos 13:10). b Tojo tso Mateo 24:14, je Jesús kʼoakitso nga tjínnele sa̱kóyason je Énle Niná jngo tjíjtsa Sonʼnde nga kjesa fetʼajin jme xi chon sonʼnde. Je xi kjoetʼa kui ngayeje jmeni xi chonle sonʼnde je Na̱i, kʼoa je Jeobá jetíjnachoa̱le nichxin kao hora kʼiani nga kjoaʼaxin ngayeje jebi (Mat. 24:36; 25:13; Hech. 1:7). Nga nyaon nyaon sa machrian sa machrianle nga kjoetʼa jme xi chon sonʼnde (Rom. 13:11). Kuinga machjénni nga tosi tonda kʼuínyasoán saʼnda nga kʼoakoa̱n.
3. Ánni nga ʼmiyasonñá.
3 A sakʼoa nikjaʼaitsjenjiaan ánni nga ʼmiyasonñá. Kuinga tsjoachaa Énle Niná, nga tsjoachaa je chjota kʼoa nga tsjoachaa je Jeobá kao jaʼaínle. Chótʼayajinla nga jngó jngó koya jebi.
ʼMIYASONÑÁ NGA̱ TSJOACHAÑÁ ÉNLE NINÁ
4. Jónʼia kʼianga nda tso én xi sʼejinná.
4 Tikjaʼaitsjenlai jókisʼe tokuin nga nda tso je én xi kisʼejinli. Jolani tsa jngo ʼndí kisʼele je xíngi, kʼoa tsa kʼiakjoán kisokoxálije̱ nga nʼio machjénli. Nʼiojin tsjoa kisʼe tokuin kʼoa tsakʼeyanajmíjinlai je xíngi kʼoa kao je miyoli. Kʼoajin tikisʼe tokuin nga tosʼa tsaʼyai je Énle Niná nga̱ tokui je Énle Niná xi nʼiosa nda tso.
5. Jókisʼe tokuin nga tosʼa kichotʼayai je Biblia (kʼoati chótsenlai sén xi faʼaitʼa).
5 Nʼiojin tsjoa kisʼe tokuin nga tsaʼyai nga tsjoakená je Jeobá, nga je xi koanmele nga naxinandále tiyojiaan, nga kjoaʼaxin ngayeje kjoañʼai xi tjín kʼoa nga sikjaʼáyanile xíngiaa xi jekʼien (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Nʼiojin tsjoa kisatio tokoán nga tsaʼyaa xi tʼatsʼe jebi (Luc. 24:32). Nʼiojin tsjoacha koain je Énle Niná kʼoa tsakʼeyanajmíjinlai xi kjaʼaí (tingósonkoai Jeremías 20:9).
Nʼio tsjoa kisatio tokoán nga tosʼa kichotʼayá je Biblia kʼoa kichjakaonajmíñá xi kjaʼaí jmeni xi koanjinná (Chótsenlai párrafo 5)
6. Jmé xi bakóyaná jokisʼin je Ernest kao Rose.
6 Jngo ndsʼee xi Ernest ʼmi c kʼoatso nga tokʼia te nóle nga kʼien je nʼaile, kʼoa kui kisikjaʼaitsjen jñáni ki je nʼaile kʼianga jekʼien. A to kichajin axo yaa ngʼajmi ki. Je Ernest itso: “Koanxinkonkeña je xti xi tjínle xijchá”. Je Ernest nyaon nyaon ki jñani kisʼeñe je nʼaile kʼoa i kitsole Niná kʼianga tsakʼétsʼoale: “Jñáni tíjna je pana”. Kʼiaa tsabe Énle Niná nga 27 nóle kʼoa nʼio tsjoa kisʼe kon nga koanjinle nga tokjiofe je xi jekʼien kʼoa nga kjoaʼáyanile (Ecl. 9:5, 10; Hech. 24:15). Nʼio tsjoa kisʼe kon nga tsabe Énle Niná kʼoa nga tsabe jokjoantjínni jmeni xi nʼio kisikjáojin ngasʼa. Kʼoati kiskotʼaya je Rose, xi chjoónle mani, kʼoa nʼio tsjoa kisʼe kon tʼatsʼe jmeni xi koanjinle. Kʼoa kʼiaa kisʼenngindá nga jao nga nó 1978. Je Ernest kao Rose tsakjákaonajmíni Énle Niná je xínkjín, je miyole, kao chjota xi kinrʼoéle, kʼoa jetsʼato 70 chjota kisʼenngindá xi je kitsoyale Énle Niná.
7. Jméni xi nʼia nga tsjoachaa je Énle Niná (Lucas 6:45).
7 Kʼianga tsjoachaa Énle Niná kui chjakaonajmíñá je chjota (tʼexkiai Lucas 6:45). d Kʼoati tjío tokoán tojo kitso je chjotale Cristo xi tsakatio nga siglo 1, kʼianga kitso: “Alikui koa̱n nga jyó kuiyuijin xi tʼatsʼe xi tsaʼyaijin, xi kinoʼyaijin” (Hech. 4:20). Nga nʼio tsjoachaa Énle Niná kui xi mená nga chja̱kaonajmíñá toʼya chjota xi sa̱téjiaan.
ʼMIYASONÑÁ NGA̱ TSJOACHAÑÁ JE CHJOTA
8. Ánni nga ʼmiyasonnilee Énle Niná je chjota (chótsenlai je recuadro “ ʼMiyalee chjota nga̱ tsjoachañá”; kʼoati chótsenlai sén xi faʼaitʼa).
8 Tojo sʼín je Jeobá kao Jesús kʼoati tsjoachaa je chjota (Prov. 8:31; Juan 3:16). Mamachañá je chjota xi tsín jme kjoachoya tjínle nga tsín be tʼatsʼe Niná (Efes. 2:12). Je chjota nʼio tse kjoa tjíojin kʼoa ñá ʼyañá nga kui Énle Niná xi kuinyakao. Kui xi mená nga kʼuínyasonlee ngatsʼi chjota nga̱ tsjoachañá kʼoa mamachañá. Tsa kjuinrʼoé Énle Niná sʼeele kjoachoya, tsjoa sa̱tío kon ndʼaibi kʼoa kui kjoanda sʼe̱le nga koa̱n koatio ngantsjai nichxin (1 Tim. 6:19).
ʼMiyasonlee Énle Niná je chjota nga̱ tsjoachañá kʼoa mamachañá (Chótsenlai párrafo 8)
9. Jméni xi ʼmilee je chjota kʼianga ʼmiyasonlee, kʼoa ánni (Ezequiel 33:7, 8).
9 Nga tsjoachaa je chjota kʼoaʼmilee nga tojeme kjoetʼa jme xi chon sonʼnde (tʼexkiai Ezequiel 33:7, 8). e Mamachañá je chjota kʼoa kao xíngiaa xi tsín be je Énle Niná nga̱ tsín be jmeni xi jeme kʼoakoa̱n. Ya Mateo 24:21 kʼoatso nga jngo kjoañʼai sʼe̱ “xi tsín tsa kʼoakoan saʼnda nga totsʼinle kjoa, saʼnda ndʼai, nikʼiajin kʼoakoa̱nngáni”. Kui xi mená nga katamajinle jmeni xi koa̱n kʼianga sʼe̱ndajinle kjoa je chjota. Kui títjon religión ndiso tjóxin, kʼoa xijekoa̱n, kʼiaa tjóxin ngayeje jme xi chon sonʼnde kʼianga kjoaʼaí Armagedón (Apoc. 16:14, 16; 17:16, 17; 19:11, 19, 20). Kʼoaʼmilee je Jeobá nga nʼio nkjín chjota katanrʼoéná nga katabitjontjaile yaole kʼoa nga je katabexkón. Kʼoa jókoa̱nni je xíngiaa kʼoa kao je chjota xi tsín binyáño je Énle Niná.
10. Ánni nga nʼio tjínnile kjoandosin nga kjoájinkoaan je chjota jmeni xi jeme kʼoakoa̱n.
10 Tojosʼin tsaʼyaa ya kjoaʼmiya xi jejaʼato, tsakui nichxin tjínkʼa chjota xi kʼia sikʼantjaiya yaole kʼianga skoe̱ nga kjoeson Babilonia xi nʼioje. Kuinga nʼio tjínnile kjoandosin nga tosi tonda kʼuínyasoán. Kʼiajin kjoaʼaítsjenle nga kui nichxin jmeni xi kʼuínyalee ndʼaibi (tingósonkoai Ezequiel 33:33). Tsakui nichxin kʼia kjoaʼaítsjenle jmeni xi kʼuínlee ndʼaibi kʼoa kʼia koa̱nmele sixále Jeobá nga kjesa fetʼajin jme xi chon sonʼnde. Tojo kisʼin chjota xi kisikuinda ndoyá ya Filipos nga kʼia koankjainle nga jngo cháonnʼio jaʼa, kʼoajin tisʼin kʼa je chjota xi tsín makjainle ndʼaibi nga sakóyale Énle Niná, kʼiajin koa̱nkjainle nga ni̱kjeson je Babilonia xi nʼioje (Hech. 16:25-34).
ʼMIYASONÑÁ NGA̱ TSJOACHAÑÁ JE JEOBÁ KAO JAʼAÍNLE
11. Jósʼin chʼasjejeyaa Jeobá, jósʼin ʼyaxkoán kʼoa jósʼin bʼailee nganʼio (Apocalipsis 4:11; kʼoati chótsenlai sén xi faʼaitʼa).
11 Kuinga ʼmiyasonñá nga tsjoachaa je Jeobá kao jaʼaínle kʼoa kʼoasʼin chʼasjengʼañá kʼianga ʼmiyasoán. ʼYañá nga bakinle kuitjojeya je Jeobá, nga jchaxkón kʼoa nga sʼe̱le nganʼio (tʼexkiai Apocalipsis 4:11). f Kʼoasʼin ʼyaxkónñá je Jeobá nga ʼmiyalee je chjota nga je kisinda ngayeje kʼoa nga je kitsjoaná kjoabijnachon. Kʼoasʼin bʼainilee nganʼio xi tjínná je Jeobá kʼianga nikʼayaa nichxinná nga ʼmiyasoán jokji tjen kʼoamaná kʼoa nga bʼé jmeni xi tjínná (Mat. 6:33; Luc. 13:24; Col. 3:23). Nga tsjoachaa Niná kao kjoatsjoa chjakaonajmíñá chjota xi tʼatsʼe. Kʼoati ʼmiyalee joʼmi Niná kʼoa jokjoan.
Bʼailee Jeobá je nganʼio kʼianga nikʼayaa nichxinná, nga ʼmiyasoán jokji tjen kʼoamaná kʼoa nga bʼé jmeni xi tjínná (Chótsenlai párrafo 11)
12. Jósʼin chʼasjetsjee jaʼaínle Niná kʼianga ʼmiyasoán.
12 Nga tsjoachaa Jeobá kui xi mená nga katabitjotsje jaʼaínle (Mat. 6:9). Kui xi mená nga katabitjotsje je jaʼaínle Jeobá nga énndiso tsakáne je Na̱i (Gén. 3:1-5; Job 2:4; Juan 8:44). ʼMiyalee chjota xi binyáñoná jokjoantjínni xi tʼatsʼe Niná. Kui xi mená nga katamajinle je chjota nga nʼio tsjoakená je Jeobá kʼoa nga nʼio nda batéxoma. Kʼoa kʼianga jekoatexoma Chjotaxále i̱ Sonʼnde nda kuiyoaa nga̱ tsín tisʼe̱ni kjoañʼai (Sal. 37:10, 11, 29; 1 Juan 4:8). Kʼianga ʼmiyasonlee chjota chʼasjetsjeñá je jaʼaínle Niná kʼoa tsjoa satío tokoán nga nitjosoán je xá xi kjinená nga testigole Jeobá maa.
13. Ánni nga nʼio tse kjoanda tjínniná nga testigole Jeobá maa (Isaías 43:10-12).
13 Jé Jeobá kiskoéjinná nga testigole maa (tʼexkiai Isaías 43:10-12). g Ñandia nga i̱ tso carta xi kisikasén je Cuerpo Gobernante: “Nʼio tse kjoanda tjínná nga testigole Jeobá maa”. h Jngola choa̱ si̱kʼéjnaa. Tsa yalani ngixko̱n chjotaxá tiyoaa nga tísʼendajinná kjoa kʼoa tsa kʼoakʼuínná nga jngo testigo machjén, jéjin chjoéjiaan jngo chjota xi nda ʼyaxkoaan kʼoa xi nda be jokjoantjínni kjoa. Ñá tíkjoéjinná je Jeobá nga testigole koaan, nga̱ be nga kʼoakjoansʼin kʼuínyalee je chjota jokjoantjínni xi tʼatsʼe. Tsjoa tjío tokoán nga testigole Jeobá maa kʼoa ʼmiyalee chjota tojñani kʼianga kʼoaʼmilee nga tsín kʼoatjín jmeni xi ʼmile Niná. Kʼoasʼin nitjosonñá je xá xi kjinená nga testigole Jeobá maa (Sal. 83:18; Rom. 10:13-15).
TOSI TONDA KʼUÍNYASOÁN SAʼNDA NGA KJOETʼA JME XI CHON SONʼNDE
14. Jméni xi koa̱n nichxin xi machrianle.
14 Nichxin xi machrianle kui xi mená nga nʼiosa nkjín chjota katakotʼaya Énle Niná nga kjesa faʼaijin kjoañʼai xi nʼio tse. Kʼoajin titsjoa sa̱tío tokoán nga kʼia koa̱nkjain kʼale chjota nga jetíjna kjoañʼai xi nʼio tse, nga kʼoati je Jeobá skoe̱xkón (Hech. 13:48).
15, 16. Jméni xi tosi tonda kʼoasʼiaan, kʼoa kʼiá saʼnda tjen kʼoasʼiaan.
15 Kui xá títsjoáná Jeobá nga kʼuínyasoán. Kʼoa tokui nichxin xi tiyoaa ndʼai nga kʼoakjima. Kʼoati kui fajinkoaan chjota nga tojeme kjoetʼa jme xi chon sonʼnde. Kʼianga sʼe̱ndajinle kjoa kʼiaani koa̱njinle nga tʼatsʼe Jeobá nroani jmeni xi ʼmilee kʼianga ʼmiyasoán (Ezeq. 38:23).
16 Kuinga tosi tonda kʼuínyasonñá saʼnda nga je Jeobá xi kʼoakuitsoná nga tsín tikʼoasʼianñá, nga̱ tsjoachañá je chjota, tsjoachañá Énle Niná kʼoa tsjoachañá je Jeobá kao jaʼaínle.
KJOAJNDA 54 “Kui jebi je ndiaa”
a Kʼiaa nga 7 sá octubre nó 2023 kisʼejna kjoajtín jebi ya jñani sʼejna kjoajtíntse ya Newburgh, Nueva York (Estados Unidos). Kʼoa yaa jaʼa ijngokʼa ya JW Broadcasting® xi tsʼe sá noviembre nó 2023 kao sá enero nó 2024 jmeni xi jaʼa ya kjoajtín jebi.
b Marcos 13:10: “Títjon machjén nga je énnda xi tʼatsʼe Cristo katafisonle ngatsʼi chjota”.
c Chótʼai je kjoaʼmiya “Je Biblia síkʼantjaiyaa chjota: Tokʼoakoanna nga tsaʼbe jmeni xi tso je Biblia, nga ñaki kʼoatjín kʼoa nga ñaki kixi jotso”, xi faʼaitʼa Xo̱n xi Bájinkonná xi tsʼe 1 sá febrero nó 2015.
d Lucas 6:45: “Je xi nda chjota kjoanda xi sʼín, nga̱ kjoanda tjínle ni̱ma̱le. Je xi tsʼen kjoatsʼen xi sʼín, nga̱ kjoatsʼen tjínle ni̱ma̱le, nga̱ je xi nʼio tjínle ni̱ma̱le kui xi nchja̱ni tsʼoa”.
e Ezequiel 33:7, 8: “Kʼoa ji, ʼndíle chjota, ji tikjoejinle nga si̱kjinrʼoái je niʼyale Israel, kʼoa je én xi kuinóʼyai xi kuitjoni ndsoʼba kui xi kʼuínkjajinkuin. 8 Tsa jngo xi tsʼen i̱ xínle: Ji xi tsʼain kuiyáni. Tonga tsa tsín kjoájinkuin chjotatsʼen jebi nga sindaya yaole, kuiyá nga tsín nda kisʼin, tonga ji sijéle kuenta”.
f Apocalipsis 4:11: “Señor, bakinli nga ji katjitjojeyai, kʼoa nga xkón kataʼyatakonli, kʼoa katasʼeli nganʼio, nga ji kinindai ngayije tsojmi, nga ji koanmetakuin nga kisʼe, kʼoa kʼoasʼin koan”.
g Isaías 43:10-12: “Jonño testigona kui xi tso je Jeobá, je choʼndana xi kiskoejian, kʼianga kataʼyanáo kʼoa nga katamakjainno xi tʼatsʼan, kʼoa nga katamajinno nga tojo anña. Tsín Niná xi koannda títjonna an kʼoa xi koanskanni tojo liʼya xi kisʼe. 11 An, anña Jeobá, kʼoa tsínsa xi kjaʼaí xi male bʼasjentjai. 12 An xokixian, an tsakʼasjentje kʼoa an kixinyano kʼianga kjesa ʼyajion niná xi kjaʼaí. Kuinga jonsíño testigona, kui xi tso je Jeobá, kʼoa anña Niná”.
h Chótʼai je Anuario de los testigos de Jehová 2007, página 3.