1-3. 1) Jmé kjoani xi tsakui nichxin kisʼele je Evodia kao Síntique. 2) Jósʼiaan nga tsín kjoa katasʼená kao ndsʼee (chótsenlai sén xi faʼaitʼa ibi).

NʼIO chjí ʼyaa je Biblia nga̱ ʼyañá nga tʼatsʼe Niná jaʼaini. Je kjoafaʼaitsjen xi tsjoáná basenkaoná nga tsín kjoa tsaojiaan kʼoa síkixiyandaná jñani saténgiaa. Jónʼia nga bʼainá kjoafaʼaitsjen. Si̱kjaʼaitsjenla jokoan jao tichjaa xi ya koatexomakao Jesús ya ngʼajmi xi Evodia kʼoa Síntique tsakʼin. Je Biblia kʼoatso nga kjoa kisʼele, tonga tsín kʼoatso ánni nga kjoa kisʼenile. Si̱kjaʼaitsjenla jmeni xi koan.

² Tsakui nichxin je Evodia ya kinchja̱le je ndsʼee ya niʼyale nga kikjen, tonga tsín jokitsole je Síntique. Kʼoa kʼianga kisʼejinle je Síntique, nʼio koanjtile. Tsakui nichxin i̱ kitso: “Ánni nga tsín jokitsonina je Evodia. Nʼiola miyo chobaijin xinña tsakai”. Tsakui nichxin kʼoasʼin kisikjaʼaitsjen je Síntique nga tjín xi kisʼin kʼoa kuinga koanjtinile Evodia kʼoa kuinga tsín jokitsonile. Kuinga je Síntique tijé ndsʼee xi kikjen ya ndʼiale Evodia kʼoakitsonile nga katafikjen ya niʼyale, tonga tsín jokitsole je Evodia. Tsakui nichxin likui kisasenle je ndsʼee ya jinjtín nga kjoa kisʼele tichjaa jebi. Je Biblia kʼoatso nga je Pablo kitsjoale kjoafaʼaitsjen nga jao tichjaa kʼoa kʼoakitsole nga katafáondani. Tsín jao tjínná nga kisitjoson je kjoafaʼaitsjen xi tsakʼaile kʼoa tosi tonda kao kjoatsjoa kisixále je Jeobá (Filipenses 4:2, 3).

 ³ Nichxin xi tiyoaa ndʼaibi, tsakui nichxin kʼoati sakʼoa kjoa sʼená kao ndsʼee ya jinjtín. Tonga koaan kʼoéndajiaan je kjoa xi sʼená kʼoa tsa maije̱ koaanná josʼiaan nga tsín jme kjoa katasʼe kʼiatsa si̱tjosoán je kjoafaʼaitsjen xi tsjoáná je Biblia. Kʼianga nitjosoán bakoñá nga ʼyachjí kjoaixiaa je Énle Niná (Salmo 27:11).

4, 5. Jmé kjoafaʼaitsjen xi tsjoáná je Énle Niná nga tsín tokjoan si̱jtilee yaoná.

⁴ Sakʼoaa ngotjo nijtinilee yaoná. Tobʼelañá, tsakui nichxin chʼao sʼe tokoán kʼoa tsa jti maná kʼianga ʼya xi jotsoná kʼoa tsa josíkaoná xi totʼatsʼe tsa xin tsaan, josʼin tsen yaoná kʼoa jotisoyoaa. Ngisajin chʼao sʼe̱ tokoán kʼiatsa ndsʼee je xi kʼoakuitsoná. Jmé kjoafaʼaitsjen xi tsjoá je Énle Niná xi koasenkaoná kʼiatsa kʼoakoa̱n.

⁵ Je Jeobá be jokoa̱n kʼiatsa yaoná nʼio si̱jtilee. Kʼiatsa jtiná tsakui nichxin kui kʼoakuixoán kʼoa kui kʼoasʼiaan jmeni xi skanni kʼoakoa̱nná. Je Jeobá kʼoatsoná nga tsín tokjoan si̱jtilee yaoná. Tsa kjuintjenngiaa je kjoafaʼaitsjen xi tsjoáná je Jeobá kʼoa tsa tsín tokjoan si̱jtilee yaoná, tsínjin kjoa jtsaojiaan (tʼexkiai Eclesiastés 7:9; * Proverbios 16:32 *). Je Biblia kʼoati tso nga tjínnele si̱chatʼalee xíngiaa. Je Jesús kʼoakitso nga tsín sichatʼaná je Jeobá kʼiatsa tsín si̱chatʼalee xíngiaa (Mateo 6:14, 15). A machjénná nga ngisasa tsejta koaan kʼoa nga si̱chatʼalee xíngiaa.

6. Jméni xi koa̱n kʼiatsa kʼoaiʼndelee yaoná nga koa̱njtiná.

⁶ Tsa kʼoaiʼndelee yaoná nga koa̱njtiná, tokʼoajinsʼe̱ ngantsjai je tokoán kʼoa tsakui nichxin saʼnda koa̱njtichaa xíngiaa. Kʼoa tsakui nichxin kʼoati sa̱tío kon je ndsʼee ya jinjtín. Tsakui nichxin tsín tsen sʼiaan kʼianga jtiná kʼoa nga tjín xi jtichaa. Tonga kuicho nichxin nga skoe̱ná xi ngikʼa kʼoa tsakui nichxin likui tiya sichrianniná (Proverbios 26:24-26). Tsa kʼoakoa̱n, je xi chjotajchínga sʼin tjío koasenkaoná nga tsjoáná je kjoafaʼaitsjen xi faʼaitʼa Biblia nga tsín kʼoakʼoé tokoán kʼoa nga si̱chatʼalee xíngiaa (Levítico 19:17, 18; Romanos 3:11-18). Tsa kʼoakjimaa, a si̱tjosonñá je kjoafaʼaitsjen xi tsjoáná je Biblia.

7, 8. 1) Jósʼin bándiaale Jeobá je naxinandále. 2) Jméni xi tsoná je Biblia kʼoa ánni nga tjínnenile si̱tjosoán.

⁷ Nichxin xi tiyoaa ndʼaibi, je Jeobá tíbándiaale kʼoa títsoyale je naxinandále. Jósʼin tíbándiaale. Jé Jesús ngʼajko̱ sʼin kisikʼéjnale je jtín, kʼoa je Jesús jé “choʼnda xi nʼiotʼakon, xi nda be xá” tíbánele nga je katatsoyale kʼoa katabándiaale naxinandále Niná (Efesios 5:23; Mateo 24:45-47). Choʼnda jebi nʼio bechjí je Biblia nga̱ Énle Ninání. Kʼoati kisʼin je cuerpo gobernante kʼianga siglo 1 (tʼexkiai 1 Tesalonicenses 2:13). * Jméni xi tsoná je Biblia.

⁸ Je Biblia kʼoatsoná nga kjitʼa kuiyojtián (Hebreos 10:24, 25). Kʼoatsoná nga tongóson sʼin katamakjainná (1 Corintios 1:10). Kʼoati tsoná nga kui títjon kjoásjee “je kjoatéxomale Niná” (Mateo 6:33). Je Biblia kʼoati tsoná nga xki̱ niʼya kʼuínyasoán, nga ya kʼuínyaa jña nʼio tjín chjota kʼoa tojñani nga tjío (Mateo 28:19, 20, TNM; Hechos 5:42; 17:17; 20:20). Je Biblia tsjoále kjoafaʼaitsjen je xi chjotajchínga sʼin tjío jmeni xi  sʼin nga tsje katabatio je jtín (1 Corintios 5:1-5, 13; 1 Timoteo 5:19-21). Kʼoa kʼoatsoná nga tsje sʼiaan kʼoa nga tsínkui si̱kjaʼaitsjeen kʼoa tsínkui kʼoasʼiaan jmeni xi jtike Jeobá (2 Corintios 7:1).

9. ʼYáni xi tísíchjén je Jesús nga tíbasenkaoná nga kjimajinná je Énle Niná.

⁹ Tsakui nichxin tjínkʼa je chjota xi kʼoakuitso nga tsín machjén nga tjín xi kuitsoyale jmeni xi tso je Biblia. Tonga saʼnda tjen nó 1919 je Jesús jé tísíchjén “choʼnda xi nʼiotʼakon, xi nda be xá” nga tjíobinyakao je chjota nga kjimajinle jmeni xi tso je Biblia kʼoa nga katasítjoson. Kʼianga nitjosoán je kjoafaʼaitsjen xi tsjoá je Biblia, tsje sʼin bʼejna je jtín, jtín sʼin biyoaa kʼoa nyʼán sʼin biyoaa. Kuinga chjónangisínilee yaoná: “A kixi fitʼale je Jesús kʼoa a sitjosonña jmeni xi tso je choʼnda xi nʼiotʼakon, xi nda be xá”.

10. Jmé sén xi kisakole Ezequiel xi kui tínchja̱ni je jtínle Jeobá ya ngʼajmi.

¹⁰ Je Biblia kʼoatso nga je choʼndale Niná xi tjío ya ngʼajmi kʼoati tjíosíxá chʼin chʼin. Tobʼelañá, je Ezequiel jngo sén tsabe josʼin tísíxá je jtínle Jeobá, jngo karreta tsabe xi je Jeobá tísíxákao kʼoa josʼin mele Jeobá nga koai je karreta sasa kʼoasʼin fini (Ezequiel 1:4-28). Je karreta xi tsabe Ezequiel kui tsoyanile je jtínle Jeobá ya ngʼajmi. Jtín jebi kjitʼanangi sítjoson josʼin sʼendiaale. Kʼoa jé bándiaale je jtínle Jeobá i̱ Sonʼnde. Si̱kjaʼaitsjenla jmeni xi tíbʼantjaiyajin josʼin tísíxá je jtínle Jeobá je xi te nó jejaʼato. Jé Jeobá tíbándiaale je jtínle nga kʼoatísʼín. Je Jesús kao ánkje jeme sikjeson jmeni xi chon sonʼnde. Nga jekʼoasʼin, alikui ʼya xi tichʼaosʼin sikʼéjnani je Jeobá kao jaʼaínle kʼoa skoee ngatsʼi nga tojé Jeobá xi tiʼndele koatexoma.

11, 12. Jméni xi tísʼín je naxinandále Jeobá nichxin fetʼa xi tiyoaa ndʼaibi.

¹¹ Si̱kjaʼaitsjenla jmeni xi tísʼín je jtínle Jeobá nichxin fetʼa xi tiyoaa ndʼaibi. Xi títjon, ndʼia xi tjíosʼenda. Siento mani je ndsʼee kao tichjaa xi nʼio tjíosíxá nga tísʼenda chjotse je oficina xi tíjnatítjon xi tsʼe testigole Jeobá ya Warwick (Nueva York, Estados Unidos). Kʼoati jmi mani je ndsʼee kao tichjaa xi tjíobʼénda je Ndʼia jña chotʼayá kao sucursal jngo tjíjtsa Sonʼnde. Ngatsʼi ndsʼee jebi jé tjíobándiaale je Departamento Mundial de Diseño y Construcción. Nʼio bʼailee kjoanda je ndsʼee kao tichjaa xi kʼoasʼin tjíotsjoánganʼio. Je tao̱n xi machjén nga sʼenda niʼya jebi, yaa nroani je xi batío je ndsʼee kao tichjaa jngo tjíjtsa Sonʼnde. Je Jeobá síchikontʼain je naxinandále nga kʼoasʼin tsjoánganʼio (Lucas 21:1-4).

¹² Xi majaoni, kataʼyala josʼin tíʼmiyale je choʼndale Niná. Je Jeobá ñaki kao kjoatsjoa tsoyale je naxinandále (Isaías 2:2, 3). Si̱kjaʼaitsjenla je skuela xi tjíole je naxinandále Jeobá. Tíjna je Skuela xi tsʼe Precursor, Skuela xi síchjine je xi bakóyason tʼatsʼe Chjotaxále Niná, Skuela xi tsʼe Galaad jña nichjine misionero, Skuela xi fi xi tosʼa faʼasʼen Betel, Skuela jña nichjine Superintendente xi tsʼe Circuito kao Yánchjínle, Skuela jña nichjine je xi chjotajchínga sʼin tjío, Skuela jña nichjine je ndsʼee xi xá kjinele kao Skuela xi fi Ndsʼee xi ya tjíojin Comité xi tsʼe Sucursal kao Yánchjínle. Kʼoati tíjnaná je pájina jw.org ya Internet, jñani siento én faʼaitʼa je Biblia kao xo̱n xi Énle Niná yʼangini. Kʼoati faʼaitʼa xi tsʼe xtiʼndí kao xi tsʼe familia, kʼoati tíjna jñani faʼaitʼa noticia xi tʼatsʼe naxinandále Niná. A tinichjénñá je pájina jebi nga ʼmiyasoán kʼoa nga chotʼayajtían Énle Niná ya niʼyaná.

13. Jmé xi kjinená xi choʼndale Jeobá maa.

¹³ Nʼio tse kjoanda tjínná nga ya tiyojiaan jtínle Jeobá kʼoa nga ʼyaa jmeni xi mele nga  sʼiaan. Nga ʼyaa jmeni xi sasénle je Jeobá, kui xá kjinená nga si̱tjosonlee kʼoa nga kui kʼoasʼiaan xi ndatjín. Nʼio nkjín chjota xi kui tsjoake xi chʼaotjín. Tonga ñá tjínnele jticha koaan je xi chʼaotjín josʼin jtike je Jeobá (Salmo 97:10). Alikui kʼoati sʼiaan josʼín je “chjota xi kʼoatso nga chʼaotjín je xi ndatjín kʼoa nga ndatjín je xi chʼaotjín” (Isaías 5:20). Kui xi mená nga ndasʼin kuiyoaa kao Jeobá. Kuinga ñaki kʼoabʼeñá tokoán nga tsje sʼiaan, tsje kjuinkoaa yaoná kʼoa tsje sʼin jchaxkoán (1 Corintios 6:9-11). ʼYañá nga kjoanda tsaanñá jmeni xi tsoná je Jeobá. Tsjoachañá kʼoa mená nga kixi koanngíntʼalee. Kuinga nitjosonñá je kjoatéxomale ya niʼyaná, ya jinjtín, ya jñani nixá, ya ndʼiaskuela kʼoa tojñani tiyoaa (Proverbios 15:3). Kataʼyala kʼa kʼiani nga tjínnele kixi kjuintʼalee je Jeobá.

14. Jósʼin bakó je xi xijchá ma nga kixi fitʼale je Jeobá.

¹⁴ Je xi xijchá ma, jósʼin kuitsoyale je ʼndíxtile. Je Jeobá kui síchjén je Biblia nga kʼoatsole je xi xijchá ma josʼin kuitsoyale je ʼndíxtile. Kʼianga sítjoson je xijchá jmeni xi tso je Jeobá, bakó nga kixi tjíofitʼale Jeobá. Tjínnele sikuinda yaole nga tsín kʼoasʼin sikjaʼaitsjen josʼin síkjaʼaitsjen je chjota xi tjín sonʼnde (Efesios 2:2). Tjín ʼnde jñani kʼoasʼin síkjaʼaitsjen je chjota nga je xi yánchjín tjínnele kuitsoyale je ʼndíxtile. Tonga je Biblia kʼoatsokixi nga je xi nʼai ma tjínnele kuitsoyale je ʼndíxtile tʼatsʼe Jeobá (Efesios 6:4). Je xijchá xi tsjoake Jeobá kui xi mele nga miyole Jeobá katama je ʼndíxtile, joni je Samuel nga miyole Jeobá koan saʼnda nga sʼa ʼndí kji (1 Samuel 3:19).

15. Jósʼin bakoá nga kixi mangíntʼalee je Jeobá kʼianga chjoejiaan jmeni xi sʼiaan.

¹⁵ Kʼianga kui chjoejiaan jmeni xi sʼiaan. Nga kjesa jme xi nʼiajián, tjínnele kuijnatsʼinyaa josʼin síkjaʼaitsjen je Jeobá. Jósʼiaan. Kjoásjee jótso je Biblia kao je naxinandále Niná. Tsa kʼoasʼiaan, kʼoasʼin  koakonilee je Jeobá nga kixi mangíntʼalee. Tobʼelañá, je chjota xi xin naxinandá fisíxá xi ya sʼele xti, tjínkʼa xi ya síkasén ijngokʼani je xtile ya naxinandále ánni nga je síjchásíni xínkjín. Kʼoa je xijchá tojo yaa síxá jñani xin naxinandá. Nga jngó jngóñá xi kuixónñá josʼiaan. Tonga je xi xijchá ma kʼoati tjínnele kuenta sʼin jósʼin síkjaʼaitsjen je Jeobá (tʼexkiai Romanos 14:12). * Tjínnele kuenta sʼiaan jmeni xi tso je Biblia kʼoa kʼia chjoéjiaan jmeni xi sʼiaan xi tʼatsʼe familianá kao tʼatsʼe xáná. Machjén nga je Jeobá koandiaaná (Jeremías 10:23).

16. Jméni xi kisʼin jngo chjoón kʼianga kitsin je ʼndíle, kʼoa jméni xi tsakasenkao nga kui xi kixi tíjna kiskoejin.

¹⁶ Jngo chjoón kao xʼinle kjaʼaí naxinandá kikatio kʼoa jngo ʼndí kisʼele. Kʼoasʼin tsakʼéndajin nga ya sikasén je ʼndíle ya naxinandále kʼoa nga je xijchále katasíjchá. Tonga nga kʼia, je chjoón Biblia kiskotʼaya kao jngo tichjaa kʼoa koanjinle nga tjínnele kuitsoyale je ʼndíle xi tʼatsʼe Jeobá (Salmo 127:3; Proverbios 22:6). Kisikjaʼaitsjen jmeni xi sʼin, tsa sikasén je ʼndíle kʼoa tsa mai. Kʼoa tojo tso je Biblia, tsakʼétsʼoale je Jeobá nga katabasenkao nga kui skoéjin xi kixi tíjna (Salmo 62:7, 8). Kʼoati kisijéle kjoafaʼaitsjen je tichjaa xi títsoyale Biblia kao je ndsʼee. Je xi xínkjín mani kao miyole kʼoakitsole nga ya katasíkasén je ʼndíle jñani tjío je xijchále. Tonga je chjoón jebi bení nga tsín ndatjín tsa kʼoasʼin. Je xʼinle tsabee nga je ndsʼee kao tichjaa nʼio tjíobinyakao je chjoónle kao ʼndíleele. Kʼoa kuinga kiskotʼayani je Biblia kʼoa nga kini kjoajtín kao familiale. Nʼiojin tsjoa koanle je chjoón jebi nga kinrʼoéle Jeobá kʼianga tsakʼétsʼoale.

17. Jmé kjoafaʼaitsjen xi kjuintjenngiaa nga ʼmiyalee Biblia je chjota.

¹⁷ Josʼin sʼendiaaná. Nga nitjosoán jmeni xi tso je jtínle Jeobá, kʼoasʼin bakoñá nga kixi mangíntʼalee. Tobʼelañá, si̱kjaʼaitsjenla jmeni xi tjínnele sʼiaan kʼianga tosʼa tibʼetsʼiakoaa nga tibakoyale chjota je libro Jmé kjoanni xi bakóya je Biblia. Kʼoaʼminá nga kʼianga jngó jngó kʼa jeʼmiyalee je chjota, tjínnele jngo jao minuto chʼa̱sjeʼaa nga kʼuínyalee xi tʼatsʼe jtínle Jeobá. Koaan kui si̱chjén je video Jméni xi ma kʼianga biyojtínjin kao foyeto ʼYáni xi kʼoatjíosʼín ndʼaibi josʼin mele Jeobá. Kʼoa nga jefetʼaná je libro Jmé kjoanni xi bakóya je Biblia kʼoaʼminá nga kui kʼuínyalee je libro “Tosi tonda katasʼeno kjoatsjoachale Niná”, ninga jekafisʼenngindá. Tsa kʼoasʼiaan, kuinyakaoñá nga koa̱ntajasa kjoamakjainle (Colosenses 2:7). A kʼoanʼia jotsoná je jtínle Jeobá.

18, 19. Ánni nga tjínnenile kʼoailee kjoanda je Jeobá.

¹⁸ Nʼio bʼailee kjoanda je Jeobá nga nʼio nkjín koya jmeni xi títsjoáná. Xi títjon, “totʼatsʼení nga tiyoaa, nikjaan, kʼoa tiyochoán” (Hechos 17:27, 28). Xi majaoni, títsjoáná je Biblia. Joni je chjotale Cristo xi tsakatio ya Tesalónica, kʼoati ʼyachjiá kjoatjao jebi nga̱ ʼyañá nga “énle Niná” (1 Tesalonicenses 2:13).

¹⁹ Xi majanni, tjínnele kʼoailee kjoanda je Jeobá nga̱ títsoyaná jósʼin nga miyole koaan (Santiago 4:8). Kʼoa xi mañoni, tjínnele kʼoailee kjoanda nga títsjoáʼndená nga tiyojiaan je jtínle. Kʼoati bixoán jokitso je xi kiski Salmo 136 nga kitso: “Tʼailao kjoanda je Jeobá, nga̱ nda chjota; nga̱ likuikʼia kjoetʼa kjoatsjoachale xi ñaki kjoakixi” (Salmo 136:1). Nga jngó jngó bersíkulole Salmo 136 kui bʼaxki̱ nga tjínle kjoanda je Jeobá ngantsjai nichxin. Tsa kixi mangíntʼalee je Jeobá kʼoa tsa nitjosoán josʼin bándiaaná je jtínle, koakoná kjoatsjoachale ngantsjai nichxin.