XI NGISA TÍNCHJA̱NI REBISTA JEBI | JÓS’IN JCHAÑÁ JOCHON YA NG’AJMI
Josʼin síkjaʼaitsjen chjota xi tʼatsʼe ngʼajmi
Nʼio nkjín chjota xi sakʼoa síkjaʼaitsjen jóchon ya ngʼajmi kʼoa ʼyáni xi ya tjío. Kjaʼaí kjaʼaí tso chjota saʼnda ngasʼa. Tjín chjota xi kʼoatso nga ya tjío je chjotajchíngale xi jekjoatse kʼien kʼoa nga tjínnele skoe̱xkón. Tjínkʼa xi kʼoatso nga ya tjío je ánkje kʼoa kao chjota xi nda kisʼin, kʼoa nga nyʼán tjío kʼoa nga tsjoa tjíole. Kʼoati tjíokʼa xi kʼoasʼin makjainle nga miyón mani je niná xi ya tjío.
Tonga tjín chjota xi kʼoatso nga tsín jokoa̱nni jchaa jochon ya ngʼajmi nga̱ kjesa ʼyajin xi ya faʼaini xi kuitsoyaná jochon. Tonga a kʼoatjín jotso. Mai. Nga̱ je Jesucristo yaa ngʼajmi tíjna nga kjesa faʼaijin i̱ Sonʼnde. Kʼoa nga tsakjákao je chjota xi nyatítjonle relijión, i kitsole: “Likui jitjojennia ngʼajmi, jméni nga kʼoasʼinsínia josʼin mena nga an, tonga josʼin nga mele je Nʼainá xi kisikasénna”. Kʼoa nga be jochon ya ngʼajmi i kitsole je pastrole: “Ya ndʼiale Nʼaina kjaínga totjín ʼnde” (Juan 6:38; 14:2).
Je Nʼaile Jesús jéní Niná Jeobá, kʼoa yaa ngʼajmi tíjna (Salmo 83:18). Tojé Jeobá kao Jesús xi ngisa koa̱nle kuitsoyaná jochon ya ngʼajmi. Kʼoa nʼio tse xi jetsakatíotsenle je choʼndale xi tsakatio kjoatse xi tʼatsʼe jochon ya ngʼajmi, kʼoa sén kisichjén.
Je kjoaʼmiya xi fisani kui kuitsoya kʼa testole Biblia xi kui nchja̱ni jmeni xi tsabe je choʼndale Niná kʼianga kisakole sén. Nga kʼoéxkiai, kuenta tʼiain nga ya ngʼajmi alikui mangóson jochon kao i̱ tʼanangi. Nga̱ i̱ tʼanangi kao xkoaan chotsennilee tsa jmeni kʼoa kao ndsaa nikaoñá. Je Niná ʼndele nga kui én sichjén xi toje ánkje koa̱njinle, tosa sén kisichjén nga koa̱njinná jochon ya ngʼajmi kʼoa ʼyani xi ya tjío. Tsa chótʼayai sén jebi ngisaa nda koa̱njinli ʼyani xi ya tjío ya ngʼajmi.
