“Jngo yáxile xi tíjna ya ngʼajmi, kʼoa jngo xi ya tíjnane je yáxile. Kʼoa je xi tíjnane, kʼoakji joni tsa jngo la̱jao̱ xi jaspe ʼmi, kʼoa xi cornalina ʼmi. Kʼoa jngo ʼya̱ xi ya séjnandaile je yáxile, xi kʼoakji joni tsa sénle la̱jao̱ xi esmeralda ʼmi” (Apocalipsis 4:2, 3).

“Ñaki fate jngotjondaile josʼin mafate je ʼya̱ kʼianga sasénjin yojbi kʼianga nʼio bʼa jtsí. Kʼoasʼin fate jngotjondaile. Kʼoasʼin matsen joni tsa je kjoajeyale Jeobá” (Ezequiel 1:27, 28).

Sén jebi jé pastro Juan kao profeta Ezequiel kisakole, kʼoa kui bakó nga ñaki fate sʼin matsen je Jeobá, je Niná xi nʼio ngʼa tíjna. Kʼoa nga tsoya xi tʼatsʼe Jeobá kui síchjén jmeni xi ʼyaa xi chjotaa, jolani je la̱jao̱chjí, je ʼya̱ kao jngo yáxile xi síxkón kji. Ñaki tomaxkónná jonaskáchon jña tíjna Jeobá, kʼoa kui bakóná nga ñaki nyʼán chon.

Nga jao sén jebi kʼoati mangóson jmeni xi kitso je salmista: “Je Jeobá nʼio jeya tíjna kʼoa bakinle nga nʼio chʼa̱sjengʼa. Ngisaa kuinókjonchá tikʼoajinni ngatsʼi niná xi ngikʼa. Ngatsʼi ninále naxinandá xi tjín likui jme chjíle, tonga je Jeobá jéní xi kisinda ngʼajmi. Nʼio jeya kʼoa ñaki fatee kji; nganʼio tjín ya yo̱ngo̱le kʼoa nʼio naskáchon” (Salmo 96:4-6).

Ningalani je Jeobá xi ngisa nʼio ngʼa tíjna, kʼoatsoná nga si̱chriantʼalee kʼoa nga kʼoétsʼoalee, kʼoa kʼoatso nga kjuinrʼoéná (Salmo 65:2). Je Niná tsjoakená kʼoa nʼio mandosinle xi tʼatsaan. si Ñaki kʼoatjín jokitso je pastro Juan nga je “Niná xi kjoatjaocha” (1 Juan 4:8).

Je chjotale Jesús xi Esteban tsakʼin “ali tokʼoakji Espíritu Santo xi tjínjin ni̱ma̱le. Kiskotsen ngʼajmi. Tsabe kjoajeyale Niná, kʼoa tsabe Jesús xi sénndotʼa ngakixile Niná”. Kʼoa i kitso: “Koeni, tiʼbenía ngʼajmi nga tixʼa̱, kʼoa je ʼndíle chjota xi ya sénndotʼa ngakixile Niná” (Hechos 7:55, 56).

Nga tsabe sén jebi je Esteban, jé tífákao je chjota judío xi nyatítjonle relijión xi kʼoasʼin tsakʼéne nga katanikʼien je Jesús. Jmeni xi tsabe kui bakó nga jetíjnakon ijngokʼani Jesús, nga kinikjaʼáyale kʼoa nga ngʼa kinikʼéjna. Je pastro Pablo i kitso xi tʼatsʼe jebi: “[Je Jeobá] kisikjaʼáyajinnile kʼen [je Jesús], kʼoa nga kisikʼéjnatʼa ngakixile ya ngʼajmi. Ngisa tongʼa kisikʼéjnale kaoni tsa xi xátítjon tjínle, kao ngatsʼi chjotaxá, kao ngatsʼi xi tjínle nganʼio, kao ngatsʼi xi tjínle kjoatéxoma, kao ngatsʼi jaʼaín xi i̱ sonʼnde tjín, ali tsa tojejin nichxinbi, josa tjín nichxin xi sʼa nroasa” (Efesios 1:20, 21).

Je Biblia ali tsa tokuijin bʼéyanajmí jokji ngʼa tíjna je Jesús, kʼoati tso nga nʼio tsjoakená joni tsa Jeobá. Jokji tse kisixále Niná i̱ Sonʼnde, kisindayaa xi tjíomʼe kʼoa kisikjaʼáyale xi jekʼien. Kʼoa nga kitsjoa kjoabijnachonle kui tsakakó jokji tsjoake  je Niná kao chjota (Efesios 2:4, 5). Ndʼaibi yaa tíjna ngakixile Niná. Kʼoa jeme sichjén je kjoatéxoma xi kitsjoale Niná nga sichikontʼain je chjota xi tjíosítjosonle tojñani nga tjío.

Je profeta Daniel i kitso: “Tosi tonda tsaʼbe saʼnda nga kixinya yáxile kʼoa [je Jeobá] je Chjotajchínga xi jekjoatse tíjna yaa tsakʼejnane. [...] Jngo miyón mani xi tjíosíxále, kʼoa jngo siento miyón mani xi nya ngixko̱n” (Daniel 7:9, 10).

Je Daniel ali tsa tojngojin ánkje tsabe, nʼio nkjín ánkje tsabe, kʼoa ñaki tokoanxkónjinle. Je ánkje espírituní, nʼio chjine kʼoa nʼio tse nganʼio tjínle. Nʼio ndasʼin tjíojtín kʼoa tjío xi ngisa ngʼa xále, jolani tsa je xi serafín kao xi querubín ʼmi. Ya Biblia tsʼato 250 kʼa síkʼaxki̱ je ánkje.

Je ánkje ali tsa i̱jin Sonʼnde tsakatio ngasʼa. Je Niná jé ánkje xi ngisa títjon kisinda tikʼoajinni chjota. Tjíokotseen kʼianga koannda je Sonʼnde kʼoa ñaki kisijtsinya ntsja jokji tsjoa koanle (Job 38:4-7).

Jngo koya josʼin tjíosíxále Niná kuinga tjíotsjoánganʼio je xá xi ngisa chjíle xi kjima ndʼaibi, nga tíʼmiyason je énnda chjotse xi tsʼe Chjotaxále Niná (Mateo 24:14). Jósʼin ʼyañá nga tjíotsjoánganʼio je ánkje. Kuinga jngo sén kisakole pastro Juan kʼoa i kitso: “Tsaʼbe ngijngoa ánkje xi kitjenjinbasenle ngʼajmi, xi tjínle je énnda xi tjín ngantsjai, nga kuinchja̱yajinle je xi tjío sonʼnde, kao ngayije nangi, kao ngayije ntje̱, kao ngayije én, kao ngayije naxinandá” (Apocalipsis 14:6). Ningalani je ánkje likui tifákaoni je chjota jokisʼin nichxin kjoatse, tonga jé tjíobándiaale je xi tjíotsoyason nga katamasjaile je chjota xi ndʼé tjío ni̱ma̱le.

Ya Biblia kʼoatso nga jngo kjoajchán kisʼejna “ya ngʼajmi. Miguel [je Jesucristo] kao ánkjele kiskankao je cho̱toán. Kʼoa kiskan cho̱toánbi kao ánkjele. Likui kinjele, niʼndelejin tikoansjainile ya ngʼajmi. Kichanitʼaxin je cho̱toánbe, je ye̱ jchínga xi kʼoatsakʼin je na̱i kao Satanás, jñale xi bʼanacha[le] ngatsʼi.  Kinikʼatjenngi ya sonʼnde, kʼoa ánkjele kitsaokao” (Apocalipsis 12:7-9).

Kʼoati kisʼe choatse kjoa ya ngʼajmi. Kʼianga sʼa koannda je chjota jngo ánkje xi nʼio kisimekon nga je katasʼetsʼoale. Yátsʼin tsakasénle Jeobá kʼoa Satanás tsakʼinle, nga̱ tsakʼejnachjoale Niná. Nga koanskanni, tjíokʼa ánkje xi ya kisijngokao yaole je Na̱i kʼoa ánkjele na̱i koan. Je Na̱i kao ngatsʼi ánkje jebi, ñaki nʼio tjíobatiochjoale je Niná kʼoa me ngatsʼi chjotasonʼnde tjíobʼanachale nga tsín je Jeobá katasítjosonle.

Je Na̱i kao ánkjele nʼio chʼao kjoan kʼoa tsínle ni̱ma̱. Jtikee je chjota kʼoa me totʼatsʼe nga kʼoasikji kjoañʼai tjínni i̱ Sonʼnde. Tobʼelañá, jé Na̱i kisikʼien ngatsʼi cho̱ntjele je Job kʼoa kao choʼndale. Xijekoan, “jngo ntjao̱xkón” kisikasénne niʼya jña tjíoʼya nga te xtile Job kʼoa kʼieen ngatsʼi nga chixojenne niʼyale. Kʼoa saʼnda “jtsé kisikajon je Job ya jko̱ saʼnda ndso̱ko̱” (Job 1:7-19; 2:7).

Tonga tongi choatse kʼoéjna je Na̱i. Josaʼnda nga kinikʼatjenjenngi i̱ Sonʼnde bení nga tochoasa nichxin tíjnale (Apocalipsis 12:12). Jebe nga ni̱kʼien kʼoa nʼio tsjoa bʼé tokoán én jebi.

“Ji [Jesús] tsakʼechjíntjainajin xi tʼatsʼe Niná, nga jaʼainijin ngayije ntje̱, ngayije én, ngayije naxinandá, ngayije ʼnde. Ji tsakinyanajin chjotatítjon kʼoa naʼmi xi tʼatsʼe Niná. Kʼoasʼin koatexomaa i̱ sonʼndebi” (Apocalipsis 5:9, 10).

Joni tsa Jesús, tjíosakʼa chjota xi kʼoati ni̱kjaʼáyale nga ya koatio ya ngʼajmi. Kʼoa i kitsole je pastrole: “Kjuí sindachonno ʼnde [...], kjoaʼai ngindiania. Skoétjaono tʼatsʼan, jméni nga kʼoati jon ya kuiyosínio, jña nga tijna nga an” (Juan 14:2, 3).

Je xi ya koai ya ngʼajmi tjínxá koaini. Yaa tojngo koatexomakao Jesús ya ngʼajmi kʼoa i Sonʼnde koatexomason kʼoa tse kjoanichikontʼain tsjoále ngatsʼi chjota. Kʼoa kui kinchja̱ni je Jesús kʼianga kitsoyale je chjotale josʼin kʼoetsʼoa. Kitso: “Nʼainajin xi tijnai ngʼajmi, kataʼyaxkón jaʼaínli. Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mateo 6:9, 10).

Je pastro Juan i kitso: “Kinrʼoejngoa jta̱ nʼio ya ngʼajmi, xi kitso: Koeni je niʼyale Niná kijnajinle chjota [...]. Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” (Apocalipsis 21:3, 4).

Sén xi kisakole pastro Juan kui tínchja̱ni je nichxin kʼianga je Chjotaxále Niná, xi je Jesucristo kao xi i̱ Sonʼnde kitjoejinni, kjoaʼaxin je Na̱i kʼoa ʼndenaxó sikao jngo tjíjtsa Sonʼnde. Tjóxin ngayeje xi kjoañʼai kao kjoaʼaon tjíosíkatíojin je chjota. Saʼnda tjóxin je kjoabiya.

Kʼoa jókoa̱nni jotjín miyón chjota xi jekʼien xi tsín ya ngʼajmi koai. Kuichoka nichxin nga kjoaʼáyanile i̱ Sonʼnde kʼoa koaan koatio ngantsjai nichxin kʼianga ʼndenaxó koa̱n je Sonʼnde (Mateo 5:5).