1. Jósatío kon je choʼndale Niná tʼatsʼe je jée xi sokóle.

ÑANDIA kʼianga je pastro Pablo nʼio ba kisʼe kon, i kitso: “¡Ma̱xónia anbi!” (Rom. 7:24). Nichxin xi tiyoaa ndʼaibi, nʼio nkjín je choʼndale Niná xi kʼoati satío kon. Ñá xi chjotale Cristo maa, bʼenelee yaoná nga kʼoanʼia josʼin sasénle Jeobá, tonga ngatsʼiaa chjotajée maa kʼoa saténgiñá. Kʼoa tjínkʼa xi ai jée bajngi xi kʼoasʼin síkjaʼaitsjen nga tsín tisichatʼanile Jeobá.

2. 1) Tojo tso Salmo 34:22, ánni nga tsín tjínnenile sikinroajen kon je choʼndale Niná nga sokójéele. 2) Jméni xi chotʼayajiaan i̱ kjoaʼmiya jebi (chótsenlai rekuadro “ A tjín xi tsoyanile axo tjín xi bakóyaná”).

² Je Biblia kʼoatso nga je xi Jeobá sínʼiotʼa alikui tjínnele nga sikinroajen kon tʼatsʼe je jée xi kisokole (tʼexkiai Salmo 34:22). * Jósʼin tsoyanile nga Jeobá ninʼiotʼaa. Jmé xi tjínnele sʼiaan nga katabakóná Jeobá kjoamatokon kʼoa nga katasíchatʼaná. Nga koa̱njinná xi tʼatsʼe jebi, kuila kataʼyaa jméni xi tso je Kjoatéxoma xi tsakʼaile je chjota israelita kʼoa jósʼin koanchjén je naxinandá xi tsen kisatio jñani koan kitoka je chjota xi tokjoataon xi koanle nga kʼien kisikʼien. Je Kjoa xi kisʼendajin kao Kjoatéxoma xi tsakʼaile chjota israelita kʼiaa tsʼantjaiyajin nga sʼuí Pentecostés nga nó 33. Kuenta sʼiaan nga je Jeobá kitsjoa Kjoatéxoma jebi kʼoa jmeni xi kitso tʼatsʼe je naxinandá xi tsen  kisatio jñani koan kitoka je chjota xi tokjoataon xi koanle nga kʼien kisikʼien. Kui bakóná josʼin síkjaʼaitsjen Jeobá xi tʼatsʼe je xi sokójéele kʼoa kao xi kʼoamanile je jéele. Kataʼyala jmé xá kisationi je naxinandá jebi kʼoa jósʼin koanchjén.

3. Jméni xi kinikao je chjota israelita xi kʼien kisikʼien.

³ Je Jeobá nʼio chʼaosʼin tsabe kʼiatsa xínkjín kisikʼien je chjota israelita. Tsa ʼyani xi kʼoakisʼin, je chjota xi xínkjín mani xi kinikʼien jé kisijndangajaoni nga kisikʼien je chjota xokisʼin (Núm. 35:19). Kʼianga kinikʼien je chjota xi kjoa kisokole kʼoasʼin koanjndani je njín xi kixijten. Kʼoa je xi síjndangajaoni ndi̱toon kisikʼien, ánni nga tsín koanjndíni je nangi xi kʼoatsakʼinle nga kʼoaile, nga̱ je Jeobá kʼoakitso nga je njínle chjota síkitsón je nangi, kʼoakitso nga tsín tjínnele sijndí je nangi jñani tjíoson (Núm. 35:33, 34).

4. Jméni xi koantʼain je chjota israelita xi tokjoataon xi koanle nga kʼien kisikʼien.

⁴ Jméni xi koantʼain je chjota israelita xi tokjoataon xi koanle nga kʼien kisikʼien. Ninga tsín toxá kisʼinni tonga tojo je kisʼene (Gén. 9:5). Tonga nga tokjoataon xi koanle, je Jeobá kitsjoaʼnde nga kisakole kjoamatokon. Chjota jebi koaan ya kitoka tojñanile xi jaon naxinandá xi tsen kisatio jñani ma fikatio je chjota xi tokjoataon xi koanle nga kʼien kisikʼien nga tsín kixontsja je chjota xi síjndangajaoni. Kʼianga jeya kicho ya ʼnde jebi alikui tikoan kitjoni josaʼnda nga kʼien je naʼmitítjon (Núm. 35:15, 28).

5. Jósʼin basenkaoná je naxinandá xi tsen kisatio nga ngisa nda majinná xi tʼatsʼe Jeobá.

⁵ Je Jeobá kʼoakitsole je Josué nga katakjoéjin naxinandá xi tsen sa̱tío jñani koa̱n koaikatio je chjota xi tokjoataon xi koa̱nle nga kʼien sikʼien, kitsole: “Chjoéjion je naxinandá xi tsen sa̱tío jñani tóka je chjota xi tokjoataon xi koa̱nle nga kʼien sikʼien”. Jé Niná xokitso nga tsen katasatío je naxinandá jebi, xi tsonile nga tsje sʼin kataʼyale (Jos. 20:1, 2, 7, 8). Kuinga koa̱n chjónangisínilee yaoná jebi: “Jósʼin basenkaoná je naxinandá xi tsen kisatio nga ngisa majinná je kjoamatokonle Niná. Nichxin xi tiyoaa ndʼaibi, jméni xi bakóyaná josʼin tjínnele si̱nʼiotʼaa je Jeobá”.

6, 7. 1) Jósʼin tsakʼéndajin je chjotajchínga kʼianga tokjoataon xi koanle je chjota xi kʼien kisikʼien (chótsenlai sén xi fitsʼiani kjoaʼmiya jebi). 2) Ánni nga koanchjénsíni nga je chjotajchínga tsakʼéyanajmínile je chjota xi kʼien kisikʼien.

⁶ Kʼianga tokjoataon xi koanle je chjota israelita nga tjín xi kisikʼien, tjínnele ya kitoka ya naxinandá xi tsen kisatio jña fikatio je chjota xi tokjoataon xi koanle nga kʼien kisikʼien. Kʼoa yaa jchxo xo̱ntjoale naxinandá bʼéyanajmíle je chjotajchínga je kjoa xi kisokole, kʼoa je chjotajchínga tjínnele nda kiskoeya (Jos. 20:4). Kʼianga maskanni, nikasén ijngokʼani ya ʼnde jñani kisokole kjoa kʼoa je chjotajchínga xi ya tjío, jé bʼéndajin je kjoale (tʼexkiai Números 35:24, 25). * Kʼiatsa tsaʼyale nga tokjoataon xi koanle, kitjoʼndele nga ki ijngokʼani ya naxinandá xi tsen kisatio.

⁷ Ánni nga je chjotajchínga tsakʼéyanajmísínile je chjota xi kʼien kisikʼien. Kuinga je kisʼenele nga tsje sʼin katabʼejna je jtín xi kisʼejna ya Israel kʼoa nga je kuinyakao je xi kʼien kisikʼien nga katasakóle je kjoamatokonle Jeobá. Je chjota xi kui kotʼayason kʼoatso kʼiatsa tsín kʼoeyanajmíle je chjotajchínga, ndi̱to̱njin kinikʼien. Kʼoa itsosa: “Je njínle tije kanenile, nga̱ tsín tsabechjí josʼin tsakʼéndajin Niná nga koasenkao”. Je chjota xi tokjoataon xi koanle nga kʼien kisikʼien, koan josʼin tsakisenkao, tonga jé tjínnele tsakásjai  nganʼio kʼoa nga sitjoson jotsakʼinle. Kʼiatsa tsín ki ya naxinandá xi tsen kisatio, je chjota xi kisijndangajaoni koan kisikʼien.

8, 9. Ánni nga tjínnesínile nga je xi chjotajchínga sʼin tjío sijéle nganʼio je chjotale Cristo xi ai jée bajngi.

⁸ Nichxin xi tiyoaa ndʼaibi, je chjotale Cristo xi ai jée bajngi tjínnele nga sijéle nganʼio je xi chjotajchínga sʼin tjío ya jinjtín. Ánni nga machjénsíni nga kʼoasʼin. Xi títjon, kuinga kʼoatso je Énle Jeobá nga je xi chjotajchínga sʼin tjío tjínnele kʼoendajin je kjoa xi ai tjín (Sant. 5:14-16). Xi majaoni, kuinga kui xá tjíoni nga kuinyakao xi sokójéele nga nda katabationi ngixko̱n Niná kʼoa nga tsín tikatabajngijéeni (Gál. 6:1; Heb. 12:11). Kʼoa xi majanni, kuinga je kinikinyánda xi chjotajchínga sʼin tjío kʼoa nichjinee nga katabinyakao je xi sokójéele nga kʼoakatamanile jokji aon tjío kon. Je Jeobá kʼoasʼin síngósonkao je xi chjotajchínga sʼin tjío joni “jngo ʼnde jñani bijnangʼiánlee je jtsínʼio” (Is. 32:1, 2). A tsín kjoaixi nga kao kui jebi bakóniná je kjoamatokonle Jeobá.

⁹ Nʼio nkjín choʼndale Niná xi nda tjíosatío kon kʼianga jefákaonajmí kʼoa síjéle nganʼio je xi chjotajchínga sʼin tjío. Tobʼelañá, jngo ndsʼee xi Daniel ʼmi, kui jée xi nʼio ai tíjna tsakajngi tonga nkjín sá nga tsín tsakʼéyanajmíle je xi chjotajchínga sʼin tjío. Je Daniel itso: “Nga jetse jaʼato, kʼoasʼin kisikjaʼaitsjen nga tsín tikoa̱n josʼin kuinyakaonina je xi chjotajchínga sʼin tjío”. Je Daniel alikui koanmele nga tjín xi katasʼejinle jmeni xi kisʼin. Kʼoa nga ñandia ñandia tsakʼétsʼoa kʼoakisʼe kon nga machjén nga sijéle kjoanichatʼa je Jeobá. Chaan kisijéle nganʼio je xi chjotajchínga sʼin tjío. Kʼianga kui faʼaitsjenle, itso: “Likui koannʼio koan nga tsakʼeyanajmíle je xi chjotajchínga sʼin tjío. Tonga nga jekʼoakixinle ñaki tja̱ kisʼe tokoan. Ndʼaibi, likui tijme xi bʼéchjoanina nga ma bʼetsʼoale Jeobá”. Je Daniel nyʼán tjín kjoafaʼaitsjenle kʼoa chriansʼa nga siervo ministerial koan.

10. Jméni xi tjínnele kisʼin je chjota xi tokjoataon xi koanle nga kʼien kisikʼien kʼiatsa mele nga sa̱kóle kjoamatokon.

¹⁰ Kʼiatsa jngo chjota xi tokjoataon xi koanle nga kʼien kisikʼien, tjínnele kjitʼa nangi tóka ya naxinandá xi tsen kisatio kʼoa xi ngisa chrian tíjna  (tʼexkiai Josué 20:4). * Kʼiatsa ndi̱to̱n kuicho ya naxinandá jebi, bʼangile yaole kʼoa yaa bʼejna josaʼnda nga mʼe je xi naʼmitítjon ma. Kʼianga ya fi tsjionkon je xále, je tsojmi xi tjínle kʼoa tsín ma tifini jña xin ʼnde (Núm. 35:25). * Tonga nʼio tjínle kjoandosin jmeni xi kisʼin. Kʼiatsa kitjo chjota jebi ya naxinandá jñani tsakʼejna, alikuijin tsabechjí je kjoabijnachonle chjota xi kisikʼien kʼoa kʼoati xkón sʼin kisikʼéjna je kjoabijnachonle tsanda je.

11. Jméni xi tjínnele sʼin je chjotale Cristo xi kʼoamanile je jéele kʼoa nga tsín tokʼoejngole kon je kjoamatokonle Niná.

¹¹ Nichxin xi tiyoaa ndʼaibi, je chjota xi nʼio ai jée bajngi, kʼoati tjínnele ndi̱to̱n sijé nganʼio ánni nga koakonile Niná kjoamatokon. Tjínnele jngokʼa sikʼéjna je jée xi tíbajngi, tonga kʼoati tjínnele kʼoechjoale yaole jmeni xi jée ska̱nijin. Jé Niná xokitsole je pastro Pablo nga kʼoakitsole je chjotale Cristo xi tsakatio ya Corinto, je xi kʼoakoannile je jée xi tsakajngi nga jendái tsakationile je kjoajti, kjoajkon, kjoachini kʼoa je kjoañʼai xi kʼoaile tsakai (2 Cor. 7:10, 11). Kʼiatsa ñá xi kʼoénelee yaoná nga si̱katioá je jée xi ai tjío, koakolee Jeobá nga makjáojinná josʼin tiyoaa ngixko̱n kʼoa nga tsín tobʼejngolee tokoán je kjoamatokonle.

12. Jméni xi tjínnele sikatío je chjotale Cristo nga katabakóle Niná je kjoamatokonle.

¹² Jméni xi tjínnele sikatío je chjotale Cristo xi kʼoamanile je jéele nga katabakóle Niná je kjoamatokonle. Tjínnele sikatío jmeni xi tsjoake tsakai kʼoa tsakui jmeni xi jée kaníjin (Mat. 18:8, 9). Tobʼelañá, tsa je xi miyoná mani xi tsín nda sʼín, a tsín tije kjoájtañá. Kʼiatsa ñʼai maná nga nikʼéjnaa je xán, a tiyondañá nga tsín ya koanngían jñani nga kui kjoa ska̱nijinná. Kʼiatsa kui kjoachajngi tibixkantʼakoaa, a bʼechjoalee yaoná nga tsín tikui chótsennilee je pelíkula, jmeni xi tjín ya Internet kʼoa tsakuije̱ xi kjoachajngi ska̱niya jkoaa. Si̱kjaʼaitsjeen nga nʼio chjíle nga si̱katioá jebi ánni nga kixi kjuintʼanilee je Jeobá. Je xi ngisa aon bʼé tokoán kuinga tsín tinda biyoñá ngixko̱n Niná. Tonga xi ngisa tsjoa bʼé tokoán kuinga tjínná je kjoatsjoachale Niná ngantsjai nichxin (Is. 54:7, 8).

13. Ánni nga ndasʼin tsakʼejnani kʼoa nga nda kisʼeni kon je chjota xi tokjoataon xi koanle nga kʼien kisikʼien kʼianga ya tsakʼejna ya naxinandá xi tsen kisatio.

¹³ Kʼianga jeya kichokʼejna ya naxinandá xi tsen kisatio, je chjota xi tokjoataon xi koanle nga kʼien kisikʼien, likui tixkón tsakʼejnani. Je Jeobá i kitso xi tʼatsʼe naxinandá jebi: “Koasenkao nga tsín xóntsja je xi sijndangajaoni” (Jos. 20:2, 3). Je Jeobá alikui tikuenta kisijénile chjota jebi. Kʼoa je chjota xi síjndangajaoni, alikui kitjoʼndele nga ya jaʼasʼen naxinandá jebi kʼoa nga sikʼien je chjota xi kjoa kisokole. Kʼianga ya tsakʼejna chjota jebi ya naxinandá xi tsen kisatio, jé Niná kisikuinda kʼoa tsín jme xi kitsokjonle. Alikui tsa kjoañʼai tsakʼejna, nga̱ koan kisixá, koan tsakasenkao xi kjaʼaí kʼoa koan ndasʼin kisixále Jeobá. Koan ndasʼin tsakʼejna kʼoa nda kisʼe kon.

14. Jméni xi koa̱n kʼoejngole kon je chjotale Cristo xi kʼoamanile je jéele.

¹⁴ Tjíokʼa je choʼndale Niná xi jekʼoakoannile je jée xi nʼio ai tsakajngi tonga xi tojo kʼoasʼin síkjaʼaitsjen nga kje chatʼajinle. Saʼnda tjínkʼa xi kʼoasʼin síkjaʼaitsjen nga tsín chajinle Jeobá je jée xi tsakajngi. Kʼiatsa ji xi kʼoasʼin nikjaʼaitsjain, tʼejngui tokuin nga je Jeobá tíbakóli je kjoamatokonle kʼoa nga ñaki to jendiaa kisichatʼali. Kuinga tsín tjínnenile nga kuijkuín. Je Daniel, xi jenása kanikʼaxkiaa ya párrafo 9, koanjinle nga ñaki kʼoatjín jebi. Kʼianga jetsakinyakao je xi chjotajchínga sʼin tjío nga nda kisʼeni je  kjoafaʼaitsjenle kʼoatso nga ñaki nyʼán kisʼe kon. Kitso: “Alikui tijée tsakaneña yaona. Kʼianga chatʼaná je jéená, tondiaa chatʼaná. Tojo tso Jeobá nga je bʼami je chʼaná kʼoa nga nʼio kjin fisíkʼéjna kʼoa tsín tikʼia kjoaʼaítsjenniná”. Tojo koantʼain je chjota xi tokjoataon xi koanle nga kʼien kisikʼien, nga tsín tokitsokjonnile je chjota xi síjndangajaoni kʼianga jeya tíjna ya naxinandá xi tsen kisatio. Kʼoatisʼinni, kʼianga jesíchatʼaná je Jeobá alikui tikui jkonnilee tsa jée koane ijngokʼaná kʼoa tsa kuenta sijé ijngokʼaná (tʼexkiai Salmo 103:8-12). *

15, 16. Jósʼin basenkaoná nga ʼyaa nga kitsjoantjainá je kjoabijnachonle Jesús kʼoa nga naʼmitítjonná mani.

¹⁵ Ñá xi chjotale Cristo maa, ʼyañá nga ngisa tjínnele si̱nʼiotʼaa je kjoamatokonle Jeobá tikʼoajinni jokisʼin je chjota israelita. Tojosʼin kaʼyaa jña fitsʼiani i̱ kjoaʼmiya jebi, je Pablo kʼoakitso nga tsín nda kisʼe kon kʼoa nga kisikinroajen kon nga tsín ñaki kʼoakjoansʼin kitjosonle josʼin mele je Jeobá. Tonga nga kiskantʼakao je jée kʼoa kao jmeni xi kisʼin ngasʼa, i kitso: “Tsjoale kjoanda Niná xi totʼatsʼe Jesucristo Nainá” (Rom. 7:25). Kʼianga kʼoakoannile je jéele, ñaki tsakʼéjngo kon nga je Jesús kisichjén Jeobá nga kisichatʼale. Je Jesús kitsjoantjainá kjoabijnachonle kʼoa nda sʼe kjoafaʼaitsjenná kʼoa nyʼán sʼe tokoán (Heb. 9:13, 14). Kʼoa nga naʼmitítjon sʼin tíjnaná “male bʼasjentjai ngantsjai je xi tʼatsʼe fichó ngixko̱n Niná, nga̱ tíjnakon ngantsjai, jméni nga bʼétsʼoantjaisíni tʼatsʼe” (Heb. 7:24, 25). Nichxin kjoatse, je xi naʼmitítjon koan tsakinyakao je chjota israelita nga koan kisichatʼale Jeobá je jéele. Nichxin xi tiyoaa ndʼaibi, je xá xi tísʼín je Jesús nga naʼmitítjon ma, ñaki bʼéjngo tokoán nga koa̱n sa̱kóná kjoamatokon kʼoa nga kʼoainá je “kjoanda xi koasenkaoná kʼia nga koa̱nchjénná” (Heb. 4:15, 16).

¹⁶ Kʼiatsa meli nga Jeobá koasenkaoli, machjén nga katamakjainli tʼatsʼe kjoabʼechjíntjaile Jesús. Alikui koa̱n nga tokʼoasʼin si̱kjaʼaitsjain nga toje xi kjaʼaí chjota xi bakinle. Je Jesús kitsjoaa kjoabijnachonle xi tʼatsi (Gál. 2:20, 21, TNM). Tikjaʼaitsjain nga kui kjoabʼechjíntjai síchjén Niná nga koa̱n jchatʼali je jée xi bijnyi. Je kjoabʼechjíntjai tsjoáli kjoachoya nga koa̱n kuijnai ngantsjai nichxin. Nga kitsjoa je kjoabijnachonle Jesús jngoo kjoatjao xi kitsjoali je Jeobá.

17. Ánni nga mesínili nga je Jeobá katabasenkaoli.

¹⁷ Kʼianga tsen kisatio naxinandá jñani koan kitoka je chjota xi tokjoataon xi koanle nga kʼien kisikʼien, kʼoasʼin tsakakóni kjoamatokonle Jeobá. Kui naxinandá jebi kisichjén nga kʼoakitso nga nʼio chjíle je kjoabijnachon. Tonga kʼoati kui tsakakó josʼin binyakaoná je xi chjotajchínga sʼin tjío kʼoa jósʼin tíjna nga ñaki kʼoamaniná je jée xi bijnyaa kʼoa ánni nga ñaki koa̱n kʼoakʼoéñá tokoán nga sichatʼaná Jeobá. A je Jeobá tininʼiotʼaa yaoná nga koa̱nle koasenkaoná (Sal. 91:1, 2). Ya kjoaʼmiya xi ijngo kui jchaa jósʼin basenkaoná je naxinandá xi tsen kisatio nga chjénngilee je Jeobá, nga̱ jé xi ngisasa nda bakó je kjoatéxomakixi kao kjoamatokon.