SAʼNDA nichxin kjoatse, bʼaitʼale kjoatjao je Jeobá kʼianga ʼyaxkón. Je chjota israelita choo kitsjoatʼale Niná, kʼoa je kjoatjao xi tsjoá chjotale Cristo kuinga nchja̱ni tʼatsʼe Niná. Tonga tjínsa xi kjaʼaínile xi koa̱n kʼoee xi kʼoati sasénle Niná (Heb. 13:15, 16). ʼYani xi kui tsjoá, nʼio tsjoa satío kon kʼoa tsee kjoanichikontʼain sʼele, tojosʼin bakó choa̱ xi sʼa jchaa.

Je Ana, chjoón israelita koan. Tsín koan kisʼele xti ningalani nʼio koanmele nga jngo ʼndí sʼe̱le. Kʼianga tsakʼétsʼoale je Jeobá kʼoakitsole kʼiatsa jngo ʼndí sʼe̱le nga jé tsjoátʼale “jokjitse kʼoéjnakon” (1 Sam. 1:10, 11). Nga jeki nichxin, je Ana kisʼele ʼndí kʼoa Samuel kitsole. Kʼianga jetsín titsakakini, yaa kikao ya ndʼianajñole Jeobá nga ya katasíxále tojo kitso nga kitsjoa énle. Je Jeobá kisichikontʼain je Ana nga kitsjoa kjoatjao jebi. Je Ana ngi aonsa xti kisʼesale kʼoa je Samuel profeta koan kʼoa kʼoati kiski Biblia (1 Sam. 2:21).

To jokisʼin je Ana kao Samuel, ñá xi chjotale Cristo maa kʼoati koa̱n kʼoaitʼalee yaoná je Niná nga si̱xálee. Je Jesús kʼoakitso nga nʼio tse kjoanichikontʼain sʼe̱ná ningalani ñʼai koa̱n sakʼoaná nga si̱xálee Jeobá (Mar. 10:28-30).

Je Dorcas jngoo chjoón xi chjotale Cristo koan, xi kʼia tsakʼejna nga siglo 1. Nʼio tsaʼyale xi totʼatsʼe nga nda chjota koan kʼoa nga tsakakóle kjoamatokon xi kjaʼaí. Tonga kisokochʼinle kʼoa kʼieen kʼoa nʼio ba koanle je chjotale Cristo xi ngikʼa. Kʼianga kisʼejinle nga ya chrian tsoʼba je Pedro kʼoakitsole nga katafikonle. Tikjaʼaitsjenjinlai jokji tsjoa koanle nga kicho Pedro kʼoa nga kisikjaʼáyale je Dorcas. Tokʼiaa síkʼaxki̱ títjon Biblia nga jngo pastro kisikjaʼáyale jngo chjota (Hech. 9:36-41). Niná likui kisichajin je kjoatjao xi tsakakó Dorcas (Heb. 6:10). Yaa Biblia kisʼetʼa jmeni xi kisʼin kʼoa ndʼaibi, koaan chjénngiaa je choa̱le.

Je pastro Pablo kʼoati nda choa̱ tsakʼéjnaná nga kitjotʼa jme xi tjínle, kʼoa nga tsakasenkao xi kjaʼaí. Kʼoa itso xi kiskile je chjotale Cristo xi ya tsʼe Corinto: “Tonga kao kjoatsjoa sikjejian nganʼiona, kʼoa ndiaa kjoejin nganʼiona tʼatsʼe ni̱ma̱no” (2 Cor. 12:15). Je Pablo koanjinle nga binyakoaa xi kjaʼaí tsjoa sʼe tokoán kʼoa xi ngisa chjíle kuinga sʼená kjoanichikontʼainle Jeobá kʼoa nda biyoaa ngixko̱n (Hech. 20:24, 35).

Je Jeobá tsjoa sʼe kon nga kʼoasʼin nichjén je nganʼioná nga kʼoanʼia xále kʼoa nga binyakoaa je ndsʼee. Tonga jmésani xi koa̱n sʼiaan nga chʼa̱sjengʼaa je Jeobá. Kʼiaa nga kʼoainganʼioá kao tao̱nná. Je tao̱n xi bʼé kʼoasʼin kjimachjén nga tosi tonda tíʼmiyason je Énle Niná jngo tjíjtsa Sonʼnde. Tobʼelañá, kʼoati kʼoasʼin kjimachjén je tao̱n xi bʼé nga bʼainganʼiole je misionero kao xi to xále Niná tjíosʼín. Kʼoati ya kjimachjén nga tjíosatíonda kʼoa nga tjíofaʼatoya je xo̱n xi Énle Niná faʼaitʼa kʼoa kao video. Kʼoa nga bʼainganʼiole je ndsʼee xi kjoaxkón bichóne kʼoa nga tjíosʼenda je Ndʼia jña chotʼayá. Koaan kʼoéjngoaa tokoán nga je Jeobá sichikontʼainná kʼiatsa kʼoee jme xi tjínná kʼoa koaan chʼa̱sjengʼaa kao je tsojmichjí xi tjínná (Prov. 3:9; 22:9).