1. Jméni xi kitsole je pastro Pablo je chjotale Cristo (chótsenlai sén xi faʼaitʼa ibi).

TSAKUI nichxin kʼianga nó 60 kʼoa tsa kʼianga nó 61, kiskile je pastro Pablo je chjotale Cristo xi tsakatío ya Colosas nga kʼoakitsole jokji chjíle nga kui katasʼele je kjoankjíntokon xi tʼatsʼe Niná tínroani, xi tsonile nga kʼoasʼin katasíkjaʼaitsjen josʼin síkjaʼaitsjen je Jeobá (Col. 1:9). Tonga kʼoati i̱ kitsole: “Kui kjoa kʼoaxinnino, jméni nga tsín tsa ʼya xi kʼoanachasínino kao énntsjénʼa xi kjoakaono. Chótsaon nga niʼyajin xi kʼoanachano kao kjoachjine xi tokjoandiso xi tsínjme chjíle, josʼin mangale chjota, josʼin tjíoma síkjitjosonle yaole jo tso kjoale sonʼnde, tonga likui jo tso Cristo” (Col. 2:4, 8). Kʼoakitsole ánni nga tsín kixi tjínni josʼin síkjaʼaitsjen kʼa chjota kʼoa ánni nga je kjoafaʼaitsjen xi tjín sonʼnde koa̱nnile skénʼndóbʼakjáná nga chjotajée maa. Tsakui nichxin tjín chjota xi kʼoatso nga ngisa male síkjaʼaitsjen tikʼoajinni xi ngikʼa. Kuinga kʼoatsosínile Pablo je chjotale Cristo xi tsakatío ya Colosas, jósʼin nga kʼoasjengi je kjoafaʼaitsjen xi tjín sonʼnde kʼoa kao xi kjaʼaísanile (Col. 2:16, 17, 23).

2. Ánni nga kui chót’ayajinsíñá i̱ kjoaʼmiya jebi tʼatsʼe kjoafaʼaitsjen xi tjínkʼale chjota.

² Je chjota xi kui kjoafaʼaitsjenle sonʼnde tjínle alikui kuenta sʼín je  kjoatéxomale Jeobá. Kʼiatsa je si̱miyoaa chjota jebi koa̱nle sikinroajen je kjoamakjainná. Nga nyaon nyaon kui sʼejnabasenná je kjoafaʼaitsjen xi tjín sonʼnde jolani xi ya faʼa ya telebisión, Internet, ya tʼaxáná kʼoa tsa ya ndʼiaskuela. I̱ kjoaʼmiya jebi, kui jchaa jósʼiaan nga tsínkui katasíkitsónjin je kjoafaʼaitsjenná. Kʼoati aon koya jchaa tʼatsʼe josʼin síkjaʼaitsjen kʼa chjota kʼoa jósʼin chʼa̱sjengiaa jebi.

3. Jósʼin síkjaʼaitsjen kʼa chjota kʼoa ánni.

³ “Alikui kjoan tjínnele tʼatsʼe Niná koa̱nkjainna kʼianga nda chjota koa̱n”. Nʼio nkjín naxinandá jñani kʼoatso chjota nga tsín makjainle xi tʼatsʼe Niná. Tsakui nichxin kui kʼoatsoni nga tsín nda básjaiya tsa ñaki tíjna je Niná kʼoa tsa mai, tokui síkjaʼaitsjen nga koa̱n kʼoasʼin tojmeni xi mele (tʼexkiai Salmo 10:4). * Kʼoa tjínkʼa xi kʼoatso nga ngisa chjine kʼoa nga tsín machjénle nga Niná koandiaale kuinga tsín makjainnile xi tʼatsʼe.

4. Jókʼuínlee je chjota xi kʼoatso nga tsín ʼya xi kisinda ngayeje jmeni xi tjín.

⁴ A ndatjín tsa kʼoasʼin koa̱nkjainná nga tsín ʼya xi kisinda ngayeje jmeni xi tjín. Kʼiatsa ya kjoásjee xi tʼatsʼe jebi jotso je chjota científico, tsakui nichxin ngisa jao sʼe̱ tokoán. Tonga xi tʼatsʼe jebi choa ñʼai tíjna. Tobʼelañá, jngo niʼya tjín xi bʼénda kʼoa ngayeje xi tjín i̱ Sonʼnde kao ngʼajmi kʼoati tíjna xi kisinda. Saʼnda je célula xi ʼndí kjoan ngisaa ñʼai josʼin tjíonda tikʼoajinni je niʼya kʼoa ngotjo mankjínyani. Je célula kʼoasʼin kisʼenda nga male batíotjao kʼoa nga síkʼatoya jmeni xi machjénle tojoni nga koa̱nnkjínya. ʼYáni xi kisinda je célula. Je Biblia itso: “Ngayije ndʼia tjín jngo xi bʼénda, tonga je xi tsakʼénda ngayije, jé Niná” (Heb. 3:4).

5. Jókʼuínlee je chjota xi kʼoatso nga tsínkjoan machjén nga tʼatsʼe Niná koa̱nkjainná nga jchaa xi ndatjín kao xi chʼaotjín.

⁵ Kʼoa jókʼuínlee je chjota xi kʼoatso nga tsínkjoan machjén nga tʼatsʼe Niná koa̱nkjainná nga jchaa xi ndatjín kao xi chʼaotjín. Je Biblia kʼoatso nga saʼnda je chjota xi tsín makjainle tʼatsʼe Niná tjínkʼa xi nda sʼin fikao yaole (Rom. 2:14, 15). Tobʼelañá, bexkón kʼoa tjaole je xijchále. Tonga nga tsín kuenta sʼín nga je Jeobá kisindaná kʼoa nga je bakinle nga kʼoakuitsoná jñánile xi ndatjín kao xi chʼaotjín, chjota jebi koaanle kui kʼoasʼin xi tsín kixi tíjna (Is. 33:22). Nʼio nkjín chjota xi kʼoatso nga machjénle nganʼiole Niná je chjota tʼatsʼe jmeni xi chon i̱ Sonʼnde (tʼexkiai Jeremías 10:23). * Kuinga tjínnenile chja̱ʼaxinlee yaoná je kjoafaʼaitsjen xi kʼoatso nga tsín machjén nga tʼatsʼe Niná koa̱nkjainná kʼoa nga je koandiaaná ánni nga kui kʼoasʼiansíñá xi ndatjín (Sal. 146:3).

6. Jósʼin síkjaʼaitsjen chjota xi tʼatsʼe relijión.

⁶ “Alikui kjoan machjén nga jngo relijión koatejnajian nga nda sʼe̱ tokoan”. Kjoafaʼaitsjen jebi sasénle je chjota xi kʼoatso nga tsín jme chjíle je relijión kʼoa nga tsín josʼin basenkaoná. Xi ijngosani, nʼio nkjín relijión xi síkjinle Niná je chjota nga kʼoasʼin bakóya nga kjoañʼai tsjoále je xi tsʼen kʼoa nga ya síkasén jñani lʼí tífaʼájnga̱, kʼoa tjín xi kjoanʼio bʼénele chjota nga tao̱n katatsjoá kʼoa nga kjoa polítika katafijin. Kuinga tsín tokʼoamaniná nga nkjín chjota xi kʼoatso nga ngisa nda koatio kʼiatsa tsín jme relijión koatiojin. Tsakui nichxin kʼoatso nga makjainle xi tʼatsʼe Niná tonga tsín mele nga jngo relijión koatiojin.

7. Ánni nga basenkaosíniná je relijión xi kixi nga tsjoa katasatío tokoán.

⁷ A kjoaixi nga ngisa ndasʼin biyoaa kʼiatsa tsín relijión kuiyojiaan. Koaan ndasʼin kuiyoaa kʼiatsa tsín ya tiyojinlee je relijión ndiso. Tonga alikui koa̱n ndasʼin kuiyoaa kʼiatsa tsín miyole Jeobá maa, je Niná xi tsjoa tjínle (1 Tim. 1:11). Ngayeje jmeni xi sʼín je Jeobá kuinga ndasʼin kuiyoaa kʼoa tsjoa satío tokoán kʼianga binyakoaa je chjota (Hech. 20:35). Tobʼelañá, je relijión xi  kixi tsjoánganʼio nga ndasʼin katabatio je familia. Ánni. Kuinga kui bakóya nga tjínnele skoe̱xkón xínkjín xi jechixan kʼoa nga kixi katamale xínkjín, nga ndasʼin katasíjchá je ʼndíxtile kʼoa nga tsjoake katama je xi tjío ya yaniʼyale. Je relijión xi kixi jtín síkatío je choʼndale Niná kʼoa tojngoo naxinandá ma ngatsʼi nga bexkón Niná (tʼexkiai Isaías 65:13, 14). *

8. Jósʼin basenkaoná jmeni xi tso Lucas 11:28 nga nikjaʼaitsjenjiaan jmeni xi tsjoa bʼé tokoán.

⁸ Kʼoa jóbixoán tʼatsʼe nga kʼoatso chjota nga ngisa tsjoa satío tokoán kʼianga tsín Niná nixálee. Si̱kjaʼaitsjenla jebi: jméni xi tsjoa bʼé tokoán. Tjínkʼa chjota xi tsjoa satío kon kʼianga bichótjenngi carrerale, tsa kjoaniská kʼoa tsa jme kjoasʼetsaojinni. Kʼoa tjín xi kuinga tsjoa satíoni kon nga sísinle je familiale kʼoa tsa miyole. Ninga kui jebi xi tsjoa batío kon je chjota, tonga tjínsa jmeni xi ngisa tsjoa kʼoe tokoán ngantsjai nichxin. Ñá alikui mangósoán kao je cho̱. Nga̱ koaan jchaa tʼatsʼe xi kisindaná kʼoa si̱xálee. Kui jebi xi nʼio tsjoa bʼé tokoán nga kʼoasʼin kisindaná (tʼexkiai Lucas 11:28). * Tsjoa tjío tokoán nga ñatjen biyojtián kao je ndsʼee nga ʼyaxkoán je Jeobá (Sal. 133:1). Kʼoati nda satío tokoán nga jtín sʼin tiyoaa, nga tsje sʼin mangínkoaa yaoná kʼoa nga tjínná jngo kjoachoya.

9. 1) Jósʼin síkjaʼaitsjen chjota tʼatsʼe nga kjaʼaí xi fayokao je xi jechixan. 2) Ánni kʼoatsoni je Biblia nga tsín koa̱n nga kjaʼaí xi kjoáyokao xi jechixan.

⁹ “Alikui chʼaotjín tsa kjaʼaí xi kjoáyokao xi jechixan”. Tsakui nichxin tjínkʼa xi kʼoatso nga kui xá tiyoñá nga kʼoétsaojiaan kʼoa nga tsín chʼaotjín tsa kjaʼaí xi kjoáyokao xi jechixan. Tonga je Biblia kʼoatso nga tsín koa̱n nga kjaʼaí xi kjoáyokao xi jechixan kʼoa ñá xi chjotale Cristo maa nitjosonñá kjoatéxoma jebi * (tʼexkiai 1 Tesalonicenses 4:3-8). * Nga je Jeobá kisindaná, tjínle ʼnde nga je kʼoakuitsoná jméni xi koa̱n sʼiaan kʼoa jméni xi mai. Je Jeobá kʼoatso nga toje xi koa̱n kjoáyokao xínkjín xi jechixan. Kjoañʼai tsjoále Niná je xi toxá sʼinni nga tsín sítjoson je kjoatéxomale (Heb. 13:4).

10. Ñá xi chjotale Cristo maa, jméni xi koa̱n sʼiaan nga tsín kjoachajngi katatsaojiaan.

¹⁰ Je Biblia kʼoatso jméni xi koa̱n sʼiaan nga tsín kjoachajngi katatsaojiaan. Jngo koya xi koa̱n sʼiaan kuinga si̱kuindalee yaoná jmeni xi chotsenlee. Je Jesús i kitso: “Toʼyanibe xi kotsenle jngo chjoón nga maxkaile, jekisichajngi jajin ni̱ma̱le kao je. Tokui tsa xkuin ngakixi síkjitsónli, chʼa̱sjai, tikʼéjna tʼaxinlai yaoli” (Mat. 5:28, 29). Je chjotale Cristo alikui koa̱n nga pornografía skótsenle kʼoa nikuijinla koa̱n kjuinrʼoele je músika xi chʼao tso je letrale. Je pastro Pablo i kitso: “Tinyachʼaolao yaono, joni tsa tinikʼaon yaono, tʼatsʼe je kjoa xi tjín sonʼnde: kjoachajngi” (Col. 3:5). Xi ijngosani, tjínnele si̱kuindaa jmeni xi nikjaʼaitsjeen kʼoa jmeni xi bixoán (Efes. 5:3-5).

11. Ánni nga kui carrera xi tjín sonʼnde nʼio mandosin kʼasínile chjota.

¹¹ “Kʼianga jngo carrera bichotjenngiaa kui xi  tsjoa bʼé tokoán”. Nʼio nkjín chjota xi kʼoatsoná nga kʼoasʼin si̱chjén je nichxinná kao nganʼioná nga jngo carrera katabichotjenngiaa. Tsakui nichxin kʼoakuitsoná nga ngisa ndasʼin kuiyoaa kʼoa nga sʼe̱ná tao̱n. Kui jebi xi nʼio básjai ngatsʼi chjota kʼoa tjín chjotale Cristo xi kʼoati sʼin síkjaʼaitsjen.

12. A tsjoa bʼé tokoán kʼianga kui bichotjenngiaa je carrera xi tjín sonʼnde.

¹² A tsjoa bʼé tokoán kʼianga kui bichotjenngiaa je carrera xi nʼio ʼyale. Kuila si̱kjaʼaitsjeen jokoan je Na̱i. Kui koanmele nga je koanentsja je xi ngikʼa kʼoa jmeni xi ngisa ndasʼin sikʼéjna. Ningalani kisokole jmeni xi koanmele, alikui tsjoa tjín kon kʼoa nʼio jtile (Mat. 4:8, 9; Apoc. 12:12). Tochoa tsee nga tsjoa sʼe tokoán kʼianga kui bichotjenngiaa je carrera xi tjín sonʼnde. Alikui mangóson kao jokji tsjoa sʼe tokoán kʼianga binyakoaa je chjota nga katamale jotjínni xi tʼatsʼe Niná kʼoa nga koa̱n koatio ngantsjai nichxin. Xi ijngosani, i̱ Sonʼnde ñaki tokjoaxintokon tjín kʼoa je chjota kui xi mele nga ngisa nʼio kataʼyale tikʼoajinni xi ngikʼa. Tonga ngayeje jebi toxitsjoani kʼoasʼin mangóson joni tsa ntjao̱ kuindoa̱jinsén (Ecl. 4:4).

13. 1) Jósʼin tjínnele jchatokoán je xáná. 2) To jotso xi kiskile Pablo je chjotale Cristo xi Tesalónica tsakatio, jméni xi ngisa tsjoa tsakʼé kon.

¹³ Alikui chʼaotjín kʼianga nixá kʼoa nga bijnyiʼá yaoná. Tonga jebi ali tsakuijin xi tsonile nga ñaki to xáná sʼiaan. Je Jesús i kitso: “Niʼyajin xi jao naile ma síxále. Kʼoa jtike koa̱n jngo, kʼoa xijngo tsjoake, kʼoa koaitʼale jngo kʼoa xijngo chʼao skoe̱kon. Alikui koa̱n nixálao nga jao, Niná kao kjoanyiná” (Mat. 6:24). Je xi ngisa tjínle kjoandosin xi kao ñá, kuinga je Jeobá nixálee kʼoa nga ʼmiyalee chjota xi tʼatsʼe kʼoa jebi kui xi ngisa tsjoa bʼé tokoán. Je pastro Pablo tsabee nga kʼoatjín jebi. Kʼianga sʼa xti, kui ngisa koanndosinle nga ya tsakʼejnajin je relijiónle chjota judío kʼoa nga nʼio ndasʼin kʼoéjna tsakai. Tonga je xi nʼio tsjoa tsakʼé kon kuinga to xále Niná kisʼin nga kitsoyason, nga chjotale Cristo kisikao chjota kʼoa tsabee nga je Énle Niná kisikʼantjaiya kjoabijnachonle chjota (tʼexkiai 1 Tesalonicenses 2:13, 19, 20). * Tsínsa jmeni xi ngisa tsjoá bʼé tokoán.

14. Ánni nga sasénnile chjota je kjoafaʼaitsjen nga male nga toje bʼéndajin je kjoa xi tjínle.

¹⁴ “Je chjota male bʼéndajin je kjoa xi tjínle”. Tsakui nichxin sasénle kjoafaʼaitsjen jebi je chjota nga kʼoasʼin síkjaʼaitsjen nga tsín machjénle xi tʼatsʼe Niná kʼoa nga toje mele kʼoa̱ yaole. Xi ijngosani, saʼnda je chjota xi kui kotʼayason xi tʼatsʼe jebi kʼoatso nga tsín tinanda kjoajchán tísʼeni, kjoaché, chʼin kʼoa nga ma̱ tinijchá yaoná tʼatsʼe nga kjimale tjíobʼéndajin je chjota jmeni kjoa xi tísʼe. Jngo xo̱n xi i̱ tso: “Je sonʼnde kjimandachon, nga̱ je chjota xotjíosʼín”. A kʼoatjín jebi. A kjimale je chjota tjíobʼéndajin je kjoa xi nʼio tse kjoañʼai tjíosíkatíojin. Kataʼyala.

15. Jmé choa̱ xi bakó nga nʼio tse kjoa tjíojin je chjota.

¹⁵ Kjoajchán. Kʼianga kisatio nga jao Kjoajchántse, tsakui nichxin 60 miyón chjota xi ya kʼienjin. Saʼnda nga jetʼa je Kjoajchántse xi majaoni, je chjota alikui kjimale nga tjíofaʼáxin je kjoajchán. Kʼianga nó 2015, ngisaa nʼio nkjín koanni je chjota xi xin naxinandá kikatio, 65 miyón koanni, xi totʼatsʼe je kjoajchán xi kisʼe kʼoa tsakuije̱ nga chjota kitjenngike kʼoa nga tikuini nó, 12,4 miyón koanni je chjota xi kitsjionkon niʼyale. Je kjoatsʼen. Ninga tjínlani ʼnde jñani tsín tinʼio tjínni je kjoatsʼen, tonga tjín jmeni xi ngisa tísʼe jolani je xi síkitsónjin programa xi tjínle computadora, kjoatsʼen xi sʼe ya yaniʼya kʼoa nga ngotjo nikjesonni je chjota. Xi ijngosani, nga nyao nyaon ngisaa nʼio tísʼe kjoaché. Jebi kui xi bakó nga tsín kjimale je chjota nga tjíofaʼáxin je kjoatsʼen. Chʼin. Tjínkʼa chʼin xi tjínle xki, tonga xi likui timandayañá. Je xo̱n xi kitjo nga nó 2013, kʼoatso nga je chjota xi tosʼa 60 nóle, nga ñajan miyón mʼe nga xki̱ nó xi totʼatsʼe nga tsín tima kjenjtani, tʼatsʼe chʼin xi xokoajkoaa tsoale, cáncer kʼoa kao chʼinxi. Nga ma̱ tinijchá yaoná. To josʼin tíʼyale ya banco xi tjío jngo tjíjtsa Sonʼnde, ya jñani ngisa ma̱ tjíosíjchá yaole je chjota yaa África, kʼianga nó 1990 je chjota xi ma̱ tjíosíjchá yaole, 280 miyón mani tonga nga nó 2012, 330 miyón mani.

16. 1) Ánni nga tsín kjimanile tjíobʼéndajin je kjoa xi tjínle je chjota je jtín xi tsʼe kjoa polítiko kʼoa kao xi tsʼe tao̱n. 2) Jmé kjoanichikontʼain xi tongini kinokjoa ya librole Isaías kʼoa kao tsʼe Salmos xi kjoaʼaíkao je Chjotaxále Niná.

¹⁶ Alikui tomaxkónná nga ʼyaa jebi. Je chjota xi kjinentsja je jtín xi tsʼe kjoa polítiko kʼoa kao xi tsʼe tao̱n ngʼakonní kʼoa kuinga tsín kjimanile tjíofaʼáxin je kjoajchán, kjoaché, chʼin kʼoa kao nga ma̱ tinijchá yaoná. Tojé Chjotaxále Niná xi koa̱nle kjoaʼaxin ngayeje kjoa jebi. Kataʼyala jmeni xi sʼin je Jeobá xi tʼatsʼe chjotasonʼnde. Je kjoajchán. Je Chjotaxále Niná kjoaʼaxin jña nroani nga kjoajchán sʼe jolani je kjoangʼakon, kjoachʼanacha, chjota xi nʼio ngʼa basje naxinandále, relijión ndiso kʼoa kao je Na̱i (Sal. 46:8, 9). Je kjoatsʼen. Je Chjotaxále Niná, miyón chjota tíbakóyale nga tsjoake katama xínkjín kʼoa nga katasínʼiotʼa xínkjín kʼoa jebi nijngojinla chjotaxá sonʼnde xi kjimale kʼoatjíosʼín (Is. 11:9). Chʼin. Je Jeobá sichikontʼain je choʼndale nga tsín tijme chʼin sʼe̱nile (Is. 35:5, 6). Nga ma̱ tinijchá yaoná. Je Jeobá kjoaʼaxin kjinrá kʼoa je choʼndale ndasʼin koatio, sʼeele jmeni xi koatiokonni kʼoa koakoyale xi tʼatsʼe, jebi ngisaa nʼio chjíle tikʼoajinni je kjoanyiná xi tjín sonʼnde (Sal. 72:12, 13).

17. Jósʼiaan nga chʼa̱sjengiaa je kjoafaʼaitsjen xi tjín sonʼnde.

¹⁷ Kʼianga noʼyá je kjoafaʼaitsjen xi kontra tíjnale je kjoamakjainná, kjoásjaiyaa jmeni xi tso je Biblia kʼoa chjónangilee je ndsʼee xi ngisa tjínle kjoafaʼaitsjen. Si̱kjaʼaitsjeen ánni nga nʼio mandosinnile chjota je kjoafaʼaitsjen xi tjín sonʼnde kʼoa ánni nga tsín ndatjínsíni kʼoa jósʼin kʼoékjaoʼakoaa. Tjínnele si̱kuindalee yaoná je kjoafaʼaitsjen jebi kʼoa kjuintjenngiaa je kjoafaʼaitsjen xi kitsjoale Pablo je chjotale Cristo xi tsakatio ya Colosas nga i̱ kitsole: “Nda taínkao yaono kao kjoaʼisentakon ngixko̱n je xi tsoʼbatʼaxin. Ali nichxinjin nichao. Je énno ñaki nda tinókjoao kao kjoanda. Katamale joni tsa tsojmi xi nda chine, jméni nga jchasínio josʼin machjén nga chjakao nga jngójngó chjota” (Col. 4:5, 6).