1. Jósʼin basenkaoná je kjoajnda.

ÑANDIA kʼianga jngo chjota xi letrale canción kji kʼoakitso nga je én basenkaoná nga nikjaʼaitsjeen kʼoa je músika nda bʼé tokoán, tonga je kjoajnda kʼoabʼé tokoán jme xi nikjaʼaitsjeen. Kʼoa tsínsa jme xi mangóson josatío tokoán kʼianga kui nikjaʼaitsjeen tʼatsʼe Nʼainá xi tíjna ngʼajmi, kʼianga jndalee chʼasjengʼañá kʼoa bakoñá jokji tsjoachaa. Ñá xi choʼndale Jeobá maa ʼyañá kʼianga jndalee kʼoati ya tíjnajin josʼin nga bʼetsʼoalee ninga toñá tiyoaa kʼoa ninga kao ndsʼee ya jinjtín.

2, 3. 1) Jósatío kʼa kon ndsʼee kʼianga tjínnele ngisa nʼio sé ya jinjtín. 2) Jmé kjoachjonangi xi chotʼayajiaan i̱ kjoaʼmiya jebi.

² A tsjoachañá nga nʼio jndaa ya jinjtín axo masoaná. Tjínkʼa ʼnde jñani likui ngale je xi xʼin nga se ya jinle chjota. Kʼoa ñʼai male ya jinjtín nga tsín ngale se, kʼoa ngisaa tsa je xi chjotajchínga sʼin tjío likui nanda bʼénele yaole nga se kʼoa tsa tokjaʼaíla xá tjíosʼín nga tjíose xi ngikʼa (Sal. 30:12).

³ Kʼiatsa majinná nga kʼoati ya tíjnajin nga bʼetsʼoalee Jeobá nga jndaa, likuijin kjaʼaíla xá sʼiaan nga tjíose ndsʼee. Chjónangilee yaoná jebi: Jósʼin ʼbekoan kʼianga jndaa ya jinjtín. Jósʼian nga likui kjoajkon katasíkinjena nga tosa ñaki  kao kjoatsjoa se. Jmé xi koa̱n sʼian nga ñaki kao ni̱ma̱na seña.

4, 5. Ánni kʼoabixónsíñá nga nʼio kitsjoale kjoandosin je chjota israelita nga kise kʼianga tsakʼétsʼoale Jeobá.

⁴ Jenkjín siento nó nga músika síchjén je choʼndale Niná nga bʼasjejeya. Kʼianga kixi koan je chjota israelita, ñaki músika kisichjén nga kisixále Niná. Tobʼelañá, je rey David kʼianga tsakʼéndajin jme xá xi koan ya yo̱ngo̱ 4,000 chjota levita kisikatíonda nga katabʼasjejeya Niná kao músika. Chjota jebi 288 koanni xi nʼio nda koanle kise (1 Crón. 23:5; 25:7).

⁵ Je músika kao kjoajnda nʼio koanchjén nga koanjngo je yo̱ngo̱. Je Biblia itso: “Kʼianga kisikjane xi xjao síkjane kʼoa kise je xi se tojngo koanni josʼin kinoʼyale nga tsakʼasjengʼa kʼoa nga kitsjoale kjoanda je Jeobá, kʼoa kʼianga nʼio kisikjane xjao kao platillo kʼoa kao xi kjaʼaísanile tsojmi xi fane nga tsakʼasjengʼa Jeobá, [...] je kjoajeyale Jeobá ñaki kisʼejnakitse ya ndʼiale Niná xi kixi”. Kuijin xi tsakinyakao nga nʼio kisatio je kjoamakjainle chjota israelita (2 Crón. 5:13, 14; 7:6).

6. Jósʼin koanchjén músika kao kjoajnda kʼianga gobernador sʼin tsakʼejna Nehemías ya Jerusalén.

⁶ Kʼianga tsakʼéndaya xjáo xi kjindai Jerusalén je chjota israelita xi kixi kitʼale Niná, je Nehemías xi gobernador sʼin tsakʼejna, tsakinyándaa chjota levita nga katase kʼoa nga katasíkjane músika. Kʼianga jekoanjngo xjáo, je músika nʼio tsakinyakao nga ngisa tsjoa kisatio kon ngatsʼi. Jao jtín kinikatíonda xi kise nga kitsjoale kjoanda Jeobá. Nga jao jtín jebi yaa tsakʼetsomason je xjáo xi kjindai Jerusalén, jngo jtín xi ngʼaskón ki kʼoa jngo xi ngakixi ki saʼnda nga kisatekjao xínkjín ya chrian jña tíjna yo̱ngo̱ kʼoa nʼio kjin kinoʼyale nga kise (Neh. 12:27, 28, 31, 38, 40, 43). Alikui jao tjínná nga je Jeobá nʼio nda kisasenle nga kao kjoatsjoa kise je choʼndale.

7. Jósʼin tsakakó Jesús nga je chjotatjenngile tjínnele sé nga kʼoetsʼoale Niná.

⁷ Kʼianga tsakʼejna Jesús i̱ Sonʼnde, tojo nʼio kisʼele kjoandosin je músika kʼianga kisʼetsʼoale Jeobá. Kʼianga jetsakʼéjna Kjoabichile Nainá, je Jesús kisee kao chjotatjenngile (tʼexkiai Mateo 26:30). *

8. Jmé choa̱ tsakʼéjnaná je chjotatjenngile Cristo xi tsakatio nga siglo 1.

⁸ Je chjotale Cristo xi tsakatio nga siglo 1, jngoo choa̱ tsakʼéjnaná nga kisele Niná nga tsakʼétsʼoale. Ninga tsínlani ya yo̱ngo̱ tsakatiojtín, alikui kui tsakʼéchjoale nga kao kjoatsjoa kise. Je pastro Pablo i kitsole je chjotale Cristo: “Takoyalao tʼenelao xíngio kao ngayeje kjoaʼisentokon. Tijndálao Niná je énle, tijndáo je xi bʼasjejeya Niná” (Col. 3:16). Kʼoasʼin tjínnele kuijndálee Niná, nga̱ je kjoajnda jebi jé síkasénná “je choʼnda xi nʼiotʼakon, xi nda be xá” (Mat. 24:45).

9. 1) Ánni nga tsín tso kʼani kon ndsʼee nga nʼio se kʼianga sʼejnaná kjoajtín kao kjoajtíntse. 2) Jósʼin tjínnele kuijndálee Jeobá kʼoa ʼyáni xi tjínnele nga nda choa̱ koatio (chótsenlai sén xi fitsʼiani kjoaʼmiya jebi).

⁹ Tsakui nichxin likui tso tokoán nga jndaa nga likui kʼoasʼin nganá ya niʼyaná  kʼoa tsa ya ʼndená. Kʼoa tsa je si̱ngósonkoaa yaoná je chjota xi se ya radio kʼoa tsa ya telebisión kʼoa soa maná nga likui nda maná josʼin jnda. Tonga jebi likui tjínnele kʼoechjoaná nga kuijndálee Jeobá. Kʼianga kuijndá, ngʼa kuindoaa je xo̱n kjoajndaná, chjómingʼaa jkoaa kʼoa ñaki kao ni̱ma̱ná kuijndánilee Jeobá (Esd. 3:11; tʼexkiai Salmo 147:1 *). Ndʼaibi, ya Ndʼia jña chotʼayá tjín telebisión kʼoa nkjín ndsʼee xi kui síchjén nga ya bakó je letrale kjoajnda. Jebi koasenkaoná nga ngisa nʼio kuijndá. Xi ijngosani, je ndsʼee xi fi Skuela jña nichjine je xi chjotajchínga sʼin tjío kʼoati sele Jeobá. Jebi kui tsoyale xi chjotajchínga sʼin tjío nga nda choa̱ katabatío nga sé ya jinjtín.

10. Jméni xi tjínnele si̱kjaʼaitsjenjiaan tsa likui tso tokoán nga nʼio jndaa.

¹⁰ Kʼoa tjínkʼa ndsʼee xi likui nʼio se nga̱ soaa male nga noʼyale kʼoa tsa kʼoasʼin síkjaʼaitsjen nga tsín nda tso jta̱le. Tonga si̱kjaʼaitsjenla jebi, kʼianga nokjoaa saténgiñá ngatsʼiaa, tonga alikui xi tsonile tsa tsín tikuinókjoañá (Sant. 3:2). Tikʼoasʼinni, alikui xi tsonile nga tsín tikuijndánilee Jeobá tsa tsín nda tso jta̱ná.

11, 12. Jmé kjoafaʼaitsjen xi koasenkaoná nga ngisa nda kuijndá.

¹¹ Tsakui nichxin likui tso tokoán nga jndaa nga likui ʼyaa jósʼin kuijndá. Kataʼyala kʼaa kjoafaʼaitsjen xi koasenkaoná josʼin si̱ndayaa jta̱ná. *

¹² Jmeni xi koasenkaoná nga nʼio  kuijndá kuinga koa̱nná josʼin chjénjtá. Tojo ma je lʼí nga tsjoále nganʼio je foco nga tí, kʼianga chjenjtá tsjoále nganʼio je jta̱ná nga nokjoaa kʼoa nga jndaa. Tjínnele kʼoakji nʼio kuijndá jokji nʼio nokjoaa. (Chótʼajin je kjoafaʼaitsjen xi faʼaitʼa je libro Benefíciese de la Escuela del Ministerio Teocrático, pájina 181 saʼnda 184, ya jñani tso: “Control del volumen de aire”). Ya Biblia kʼoatsole je choʼndale Niná nga nʼio katasele kʼoa nga kao kjoatsjoa kʼoakatasʼín (Sal. 33:1-3).

13. Kʼoasi jmé xi koa̱n sʼiaan nga nda kuijndá.

¹³ Kʼianga chotʼayajtían ya niʼyaná kʼoa tsa toñá tiyoaa kʼoasʼiaan jebi, chjoejin jngoaa kjoajnda xi tsjoachaa kʼoa nʼio kʼoéxkiaa kʼoa xijekoa̱n, nda chjénjtaa kʼoa ngotjo kʼoakuixónñá nga jngó jngó ndiaa én. Xijekoa̱nni kʼoati kji nʼio kuijndá jokji nʼio kabʼexkiaa (Is. 24:14). Ngisaa nda kuitjo jta̱ná tsa kʼoasʼiaan. Tsín katamasoaná kʼoa tsín kuijkoán.

14. 1) Ánni nga ngisa nda kʼoétixʼasíñá ndsoʼbaa nga kuijndá (chótsenlai je rekuadro: “ Jósʼiaan nga nda kuijndá” tso). 2) Kʼoasi kʼai jmé xi koasenkaoná nga koa̱nndayasa je jta̱ná.

¹⁴ Kʼianga nda kuitjo jta̱ná tjínnele nda kʼoétixʼaa ndsoʼbaa. Xi ijngo koya xi koasenkaoná nga kuijndá kuiní nga ngisa nʼio kʼoétixʼaa ndsoʼbaa tikʼoajinni jonʼia nga nokjoaa. Tonga tsa kʼoasʼin nikjaʼaitsjeen nga nʼio nrʼoe kʼoa tsa nʼio xa̱n noʼyale jta̱ná. Yaa koa̱nsjaisaná kjoafaʼaitsjen ya pájina 184 xi tsʼe libro Benefíciese de la Escuela del Ministerio Teocrático, ya rekuadro jñani tso: “Cómo superar problemas específicos”.

15 1) Jmé én xi kisʼejinkon ndsʼee ya kjoajtín xi kisʼejna nga nó 2016. 2) Ánni nga kisʼendayani je xo̱n xi faʼaitʼa kjoajndaná.

¹⁵ Je kjoajtín xi xki̱ nó satíole je ndsʼee ya Pennsylvania, kʼianga nó 2016, je ndsʼee Stephen Lett xi tsʼe Cuerpo Gobernante kʼoakitso nga kitjo chjotse ijngokʼa xo̱n xi faʼaitʼa kjoajnda kʼoa i ʼmi Kao kjoatsjoa kuijndálee je Jeobá. Je ndsʼee Lett kʼoakitso nga kui xá kitjoni xo̱n jebi nga koa̱nngóson kao je Biblia Traducción del Nuevo Mundo de las Santas Escrituras, xi kitjo nga nó 2013 nga én inglés. Kitjoxin kʼoa tsʼantjaiyaa kʼa én nga kisʼendaya xo̱n jebi. Xi ijngosani, kisatiojin kʼa je kjoajnda xi kui tínchja̱ni nga ʼmiyasoán kʼoa xi tʼatsʼe kjoabʼechjíntjai. Kʼianga yaa tíjnajin je kjoajnda josʼin nga bʼetsʼoalee Jeobá, je Cuerpo Gobernante kui xi koanmele nga tsín jme xi katamale xo̱n jebi. Je pastale kʼoakji jokji je Biblia xi kitjo nga nó 2013.

16, 17. Jmé xi tsʼantjaiyajin je xo̱n xi faʼaitʼa je kjoajnda.

¹⁶ Nga ngisa choa ñʼai koa̱nná nga si̱chjén je kjoajnda, tjío chʼin chʼin. Tobʼelañá, xi títjon 12 kjoajnda kui nchja̱ni tʼatsʼe Jeobá kʼoa jin mani xi kui nchja̱ni tʼatsʼe Jesús kʼoa kao tsʼe kjoabʼechjíntjai. Kʼoa xi fisani kʼoatisʼin tsen tsen tjío. Jña sʼa fitsʼiani xo̱n jebi, xki̱ tema faʼai kʼoa ngisaa choa ñʼai koa̱nle je ndsʼee xi tsjoá kjoanokjoaya nga skoéjin je kjoajnda xi sichjén.

¹⁷ Nga ñaki kao ni̱ma̱ná kuijndáñá je kjoajnda ngisaa choa ñʼai josʼin faʼai ndʼaibi, kitjoxin je én xi ñʼai tso ánni nga ngotjo koa̱njinniná jmeni xi tínchja̱ni. Xi ijngosani, kʼoati tsʼantjaiyajin je letrale ánni nga ngisa choa ñʼai koa̱nniná josʼin kuijndá. Tjínkʼa je kjoajnda xi kui nchja̱ni jmeni xi ngisa machjénná ya kjoajtín kʼoa kao nga ʼmiyasoán.

18. Ánni nga tjínnenile nga nda kataʼyaa jotso je kjoajnda chjotse (kʼoati chótsenlai ya nota).

¹⁸ Nkjín kjoajnda xi ya faʼaitʼa je xo̱n Kao kjoatsjoa kuijndálee je Jeobá ʼmi, kʼoasʼin kichji joni tsa jngo kjoabʼetsʼoa tibʼejnalee Niná kʼoa kʼoasʼin bakonilee jotjín tokoán. Tjínsakʼa kjoajnda xi basenkaoná nga ninʼioá kon ndsʼee kʼoa nga bakolee kjoatsjoacha kʼoa kao xá xi ndatjín (Heb. 10:24). Kuinga machjénni nga nda kataʼyaa je letrale kjoajnda, josʼin fi je músika kʼoa josʼin jnda. Nga koa̱nná kuijndá koaan kuinóʼyalee je kjoanda xi faʼaitʼa ya jw.org. Tsa tongini chótʼayá ya yaniʼyaná, ñaki kaojin ni̱ma̱ná kuijndáñá kʼoa likuijin tisoa koa̱nniná. *

19. Jósʼin koa̱n chʼa̱sjejeyaa Jeobá ngatsʼiaa.

¹⁹ Si̱kjaʼaitsjeen nga ya tíjnajin josʼin nga bʼetsʼoaa kʼianga jndalee je Jeobá. Kʼoasʼin bakonilee nga tsjoachaa kʼoa nga bʼailee kjoanda (tʼexkiai Isaías 12:5). * Kʼianga ñaki kao kjoatsjoa jndaa kʼoati ninʼioá kon xi ngikʼa nga kʼoati katasʼín. Ngatsʼiñá nga koa̱n chʼa̱sjejeyaa Niná nga kuijndá ninga sʼa xtiaa ninga jetjínná nó kʼoa ninga sʼa tichotʼayá. Kuinga ñaki kao ni̱ma̱ná kuijndánilee Jeobá. Si̱tjosoán nga kʼoatso je Énle Niná nga tjínnele kuijndálee je Jeobá kʼoa kao kjoatsjoa kuijndá (Sal. 96:1).