1, 2. 1) Jmé kjoanda xi koyale nga kʼoaile je choʼndale Jeobá. 2) Jméni xi koasenkaoná nga likui si̱chaa je chjíná (chótsenlai sén xi faʼaitʼa ibi).

JONI je pastro Pablo, je chjotale Cristo xi ya koai ngʼajmi xi tjío ndʼaibi, jngoo kjoachoya tjínle xi nʼio naskánatjín yaa koyale nga kʼoaile chjíle ya ngʼajmi (Filip. 3:14). Nʼio mele nga ya koatexomakao je Jesús ya ngʼajmi nga kuinyakao chjota nga chjotatsje koa̱n ijngokʼa (Apoc. 20:6). ¡Nʼio naskánatjín je kjoachoya xi tsjoále Jeobá! Je chjotale Cristo xi i̱ Sonʼnde koatio nʼio tsjoa tjíole nga i̱ kʼoaile chjíle nga koatio ngantsjai nichxin (2 Ped. 3:13).

² Nga koasenkao Pablo je ndsʼe̱ xi ya koyale nga koai ngʼajmi nga kixi katama ánni nga tjoénile je chjíle, i kitsole: “Tikjaʼaitsjaon tʼatsʼe jmebe xi tjín ngʼá” (Col. 3:2). Tjínnele nga kui kisikjaʼaitsjen je kjoachoya xi tjínle nga ya koai ngʼajmi (Col. 1:4, 5). Tsa ya choyalee nga ya ngʼajmi koanngían axo i̱ Sonʼnde choyalee nga kuiyoaa, kʼianga kui nikjaʼaitsjenjiaan je kjoanichikontʼain xi  tsjoáná Jeobá kui xi koasenkaoná nga tsín si̱chaa je chjíná (1 Cor. 9:24).

3. Jméni xi tsakájinkon Pablo je chjotale Cristo.

³ Pablo kʼoati kitsole je chjotale Cristo jmeni xi koa̱n kʼoechjoale nga tsín tjoéle je chjíle. Tobʼelañá, kiskile je jtín xi kisʼejna ya naxinandá Colosas tʼatsʼe xi chjotale Cristo tjíotsole yaole, xi tjíosítjoson jotso je kjoatéxoma tonga tsínnile kjoamakjain tʼatsʼe Cristo (Col. 2:16-18). Xi ijngosani, kʼoati kitsole tʼatsʼe jmeni xi nimetokoán, je kjoa xi sʼe sakʼoaná kao ndsʼee kʼoa kao kjoa xi sʼená ya yaniʼyaná. Tojo kui kjoa jebi sʼe sakʼoaná ndʼai, kuinga tojo basenkaoniná je kjoafaʼaitsjen xi kitsjoa Pablo. Kataʼyala kʼaa je kjoafaʼaitsjen xi tsakʼaile je chjotale Cristo xi tsakatio ya Colosas.

4. Ánni nga koa̱nnile kjoaʼaná chjíná je kjoa xi nimetokoán.

⁴ Kʼianga jekisikjaʼaitsjenyale Pablo je kjoachoya xi tjínle je ndsʼee, i kitsole “Tinyachʼaolao yaono, joni tsa tinikʼaon yaono, tʼatsʼe je kjoa xi tjín sonʼnde: kjoachajngi, kjoajndí, kjoachi̱nga̱, kjoa xi mele xi chʼao tjío, kjoaxintakon” (Col. 3:5). Tsakui nʼio si̱metokoán je xi kjoajndí tjenkao, likuijin timiyole Jeobá koa̱nñá kʼoa likuijin titsjoa sʼe̱niná tʼatsʼe kjoachoyaná. Jngo ndsʼee xi kjoachajngi kisʼin kʼoa nga jetsakʼejnanda ijngokʼani ya jinjtín kʼoakitso nga nʼio ñʼai koanle kʼoa tokʼiaa saʼnda koanjinle nga chʼao tísʼín kʼianga jekisokojéele.

5. Jméni xi koa̱n sʼiaan nga si̱kuindaa yaoná kʼianga kjoa bitjatojiaan.

⁵ Tjínnele nʼio nda si̱kuindaa yaoná kʼianga kui satíobasenná jmeni xosikaoná nga tsín tisitjosonñá je kjoatéxomale Jeobá. Tobʼelañá, je xi sʼa tjíotsomakao xínkjín tjínnele tongini kjaoyani jókji kjoatsjoacha koakole xínkjín kʼoa nga tsín toje koatiokao xínkjín (Prov. 22:3). Je chjotale Cristo kʼoati ñʼai male kʼiatsa toje ñatjen síxá xi tsín xʼinle kʼoa tsa xi tsín chjoónle mani kʼoa tsa kjin tjíole xínkjín (Prov. 2:10-12, 16). Kʼiatsa sakʼoa kui kjoa jebi satíobasenná, kʼoakuixoán nga testigole Jeobá maa, kixi kjuinkoaa yaoná kʼoa si̱kjaʼaitsjenjiaan josʼin bichómani kʼiatsa ʼya xi si si̱koaa. Nda si̱kuindaa yaoná kʼiatsa ba tjín tokoán. Tsa kʼoakjima, tsakui nichxin kʼoasʼin si̱kjaʼaitsjeen nga tjín xi mandosinlee. Tochale nʼio koa̱ntsjoachaa tsa ʼyani xi tsjoánganʼioná kʼoa koa̱njyoná tojmeni xi kuitsoná. Tsa kʼoakoa̱n, si̱jélee nganʼio Jeobá kao ndsʼee nga katabinyakaoná ánni nga tsín si̱chasíñá chjíná (tʼexkiai Salmo 34:18; * Proverbios 13:20 *).

6. Jméni xi kuenta sʼiaan kʼianga chjoéjiaan josʼin kʼoétsaojiaan.

⁶ Kʼianga ñaki chja̱ʼaxinlee yaoná je xi kjoajndí tjenkao, machjénní nga chʼa̱sjengiaa je kjoasʼetsaojin xi jndí tjín. Me ngayeje xi bʼétsaojinkao ndʼai je chjota kui síkjaʼaitsjenjinná jmeni xi koan ya naxinandá Sodoma kao Gomorra (Jud. 7). Je xi bándiaale kjoasʼetsaojin jebi kʼoasʼin bakó nga je kjoachajngi tsín chʼaotjín. Tjenyatokon kuiyoaa kʼoa tsín kʼoaiʼndee nga kui kjoa jebi tsaojiaan. Tsa tsín koa̱nná nda chjoéjiaan je kjoasʼetsaojin, si̱chajiaan chjíná xi kjoabijnachon tjenkao (Prov. 4:23).

7. Jmé kjoa xi sakʼoa sʼe ya jinjtín.

⁷ Ngatsʼiñá nga kʼoasʼin nikjaʼaitsjeen nga nʼio tse kjoanichikontʼain tjínná nga i̱ tiyojiaan naxinandále Niná. Kʼianga chotʼayá Énle Niná ya kjoajtínná, bʼainganʼiolee xíngiaa kʼoa bakolee kjoanda, jebi basenkaoná  nga tsín chajinná je kjoatjao xi tsjoáná Niná. Tonga tsa sakʼoa kjoa sʼená kao ndsʼee kʼoa tsa tsín ndi̱to̱n kʼoéndajiaan, sʼe̱jngijtijin tokoán (tʼexkiai 1 Pedro 3:8, 9). *

8, 9. 1) Jótjínnele koa̱nkjoaan nga so̱koná kjoabijnachon. 2) Jmé xi koasenkaoná nga nyʼán sʼin kuiyoaa kʼiatsa jngo ndsʼee xi jokasíkaoná.

⁸ Jmé xi koa̱n sʼiaan kʼiatsa tjínngijti tokoán nga tsínkui katabʼéchjoaná nga tjoéná kjoanda xi tsjoáná Niná. Pablo i kitsole je jtín xi kisʼejna ya naxinandá Colosas: “Jon nío xi Niná tsakjaʼájinno, xi tsjao, xi Niná tsjoakeno. Kʼoasʼin tikʼantjaiyao yaono, katasʼeno kjoamatakon, kao kjoanda, kao kjoayo̱ma̱ kjiatakon, kao kjoandʼé, kao kjoatsetakon. Tosi tonda katakano xíngio kʼoa kao kjoatsjoa tichatʼalao xíngio kʼiatsa ʼya xi fajétʼale xínkjín. Jokisʼin Jeobá nga kao kjoatsjoa kisichatʼano, kʼoati tʼiaon tsanda jon. Je nga títjonle ngayije kjoabi, katamatsjoachao xíngio, nga je kjoatjaocha xi nda bʼékjaoná, kʼoa síjngoná” (Col. 3:12-14, TNM).

⁹ Tsa bakoá kjoatsjoacha kao kjoanda kui xi koasenkaoná nga si̱chatʼalee xíngiaa. Tobʼelañá, tsa aon tjín tokoán kʼiatsa jme xi kitsoná kʼoa tsa jme xi kisikaoná jngo ndsʼee, si̱kjaʼaitsjenjiaan jme xi tsakʼinlee kʼoa jme xi kinikoaa jngo chjota xi kʼoati aon tsakʼé kon. Nʼio bʼailee kjoanda je ndsʼee nga tsakakóná kjoatsjoacha kao kjoanda ninga jme xi kinikoaa (tʼexkiai Eclesiastés 7:21, 22). * Nʼio tsjoa tjínná nga tíbakóná kjoanda je Jesús nga tisíkatíojtínná nga tichʼasjejeyaa Niná (Col. 3:15). Ngatsʼiñá nga tojngo Niná bʼetsʼoalee, tikui én ʼmiyasonñá kʼoa me tikui kjoa bitjatojinñá. Tsa tjaochaa ndsʼee koakolee kjoanda kʼoa si̱chatʼalee xíngiaa, tsa kʼoasʼiaan jtín sʼin kuiyoaa kʼoa koasenkaoná nga tosi tonda kui si̱kjaʼaitsjeen je kjoabijnachon xi tsjoáná Jeobá.

10, 11. 1) Ánni nga tsín ndatjínni nga xinkon maa. 2) Jókoa̱n sʼiaan nga tsínkui kjoaxintokon katabʼéchjoaná nga tjoéná kjoanda xi tsjoáná Niná.

¹⁰ Kʼiatsa xinkon koaan koaanle kui kʼoechjoaná nga tjoéná kjoandale Niná. Ya Biblia nkjín choa̱ faʼaitʼa xi tsoyaná jokji xkón tíjna nga xinkon maa, tobʼelañá, Caín koanxinkonke je Abel kʼoa kisikʼieen. Je Coré, Datán kao Abiram kʼoati koanxinkonke Moisés kʼoa kisixíjinkao. Kʼoa je rey Saúl koanxinkonke David tʼatsʼe kjoanichikontʼain xi kisokole kʼoa koanmele kisikʼien. Kuinga ya Biblia i̱ tsoni: “Jña nga tjín kjoaxintakon kjoakontra, yaabe tjín kjoasi kao ngayije kjoatsʼen” (Sant. 3:16).

¹¹ Tsa bakoá kjoatsjoacha kao kjoanda ngisaa choa ñʼai koa̱nná nga tsín xinkon koaan. Je Énle Niná i tso: “Je kjoatjaocha tsejtaní, kʼoa tjínle kjoanda. Je kjoatjaocha tsínle kjoaxintakonjin” (1 Cor. 13:4). Kʼianga tsín kjoaxintokon katasʼejnajin ni̱ma̱ná, tjínnele kʼoatisʼin si̱kjaʼaitsjeen josʼin síkjaʼaitsjen Jeobá. Tjínnele si̱kjaʼaitsjeen nga tojngo mañá kao ndsʼee ya jinjtín. Kui jebi xi koasenkaoná nga kʼoati kʼoé tokoán jotjín kon ndsʼee, tojo tso én jebi: “Kʼoa tsa jngo jko̱yale xi xkón ʼya, ngayije xi jo tjín mani jko̱yale tojngo matsjoale” (1 Cor. 12:16-18, 26). ʼNdele nga koa̱nxinkonchaa ndsʼee, tosa tsjoa kʼoé tokoán kʼianga jme kjoanda bʼaile ya jinnaxinandále Niná. Si̱kjaʼaitsjenla tʼatsʼe Jonatán xi tile koanni je rey Saúl. Alikui koanxinkonke je David nga je kiskoejin Jeobá nga rey koa̱n. Je Jonatán tosaa  tsakakóle kjoatjaocha kao kjoanda je David, kisinʼiojin kʼoa tsakasenkao (1 Sam. 23:16-18). A koaan chjénngiaa choa̱le.

12. Jmé kjoafaʼaitsjen xi faʼaitʼa Biblia xi koasenkao je familia nga tjoéle chjíle.

¹² Nga mangíntjenngiaa je kjoafaʼaitsjen xi tsjoá Biblia xi tʼatsʼe familia, nyʼán sʼin biyoaa kʼoa nda biyoaa, jebi koasenkaoná nga so̱koná chjíná. Jmé kjoafaʼaitsjen kitsjoa Pablo tʼatsʼe familia kʼianga kiskile je chjotale Cristo xi tsakatio ya Colosas. I kitsole: “Jon xi yánchjón xi chixaon, nangi tiyolao xʼinno, josʼin bakinno nga tiyokao Nainá. Jon xi xʼion xi chixaon, tjaocha katamao yánchjínno, ali tsʼenkaojin mao. Jon xi ʼndítio, titjosonlao xijcháno ngayije. Jébi xi kjaí sasénle Nainá. Jon xi nʼai ʼmino, ali sijin nikao xtino, jméni nga tsín tsa si̱kjaʼajensínikon” (Col. 3:18-21). Kjoafaʼaitsjen jebi, tojo tjíobinyakao ndʼaibi je xi xʼin, xi yánchjín kʼoa kao xi sʼa xti.

13. Jósʼin koa̱n koasenkao je xʼinle tichjaa nga katamakjainle.

¹³ Si̱kjaʼaitsjenla kʼiatsa jngo tichjaa xi kʼoasʼin síkjaʼaitsjen nga tsín tjao be je xʼinle xi tsín testigole Jeobá ma. A ngisaa ndasʼin koatio kʼiatsa tokui kjaotini josʼín je xʼinle. Ningalani kʼoasʼin josʼin mele tichjaa, a koasenkao jebi je xʼinle nga testigole Jeobá  koa̱n. Maijin. Ngisajin ndasʼin kuichomani kʼiatsa skoe̱xkón, ndajin koatio ya yaniʼyale, jejin Jeobá kʼoasjengʼa kʼoa tsa saʼnda koanmenile je xʼinle nga Jeobá sixále. Tsa kʼoasʼin, tjoéjinle chjíle nga jao (tʼexkiai 1 Pedro 3:1, 2). *

14. Jméni xi koa̱n sʼin je ndsʼee kʼiatsa je chjoónle tsín bexkón.

¹⁴ Si̱kjaʼaitsjenla kʼiatsa jngo ndsʼee xi tsín testigole Jeobá ma je chjoónle kʼoa tsín bexkón. Kʼiatsa nʼio kjoakao je chjoónle kʼoa kʼoakuitso nga je ngʼajko̱ tíjnale niʼyale, a kʼoasʼin sa̱kónile kjoaxkóntokon. Maijin. Je Jeobá kui xi mele nga je Jesús katakjenngile kʼoa nga tjao katamale je chjoónle (Efes. 5:23). Nga ngʼajko̱ tíjnale Jesús je jtín kao kjoatsjoacha bándiaale kʼoa tsejtaní (Luc. 9:46-48). Tsa koaitjenngi je choa̱le Jesús je ndsʼee jebi tsakui nichxin jeni Jeobá sixále je chjoónle.

15. Jósʼin bakónile kjoatsjoacha je chjoónle xi chjotale Cristo ma.

¹⁵ Je Biblia itso kjoafaʼaitsjen xi tsjoále je xi xʼin: “Jon xi xʼion xi chixaon, tjaocha katamao yánchjínno, ali tsʼenkaojin mao” (Col. 3:19). Je chjotale Cristo xi tsjoake je chjoónle bakóle kjoaxkóntokon kʼianga nrʼoé jme xi tso je chjoónle kʼoa kʼoasʼin bakóni nga chjí bekon (1 Ped. 3:7). Ninga tsín tongantsjai nga sitjoson jme xi kuitso je chjoónle, kʼianga kuenta sʼin josʼin síkjaʼaitsjen kui xi koasenkao nga ngisa nda skoéjin jme xi sʼin (Prov. 15:22). Je xʼin xi tsjoake je chjoónle alikui bʼénele nga katabexkón. Kʼianga je chjotale Cristo tsjoake je chjoónle kao xtile, ngisaa choa ñʼai koa̱nle nga kao kjoatsjoa sixále Jeobá kʼoa nga so̱kole kjoabijnachon.

16, 17. Kʼiatsa sʼa xti, jméni xi sʼiain nga tsín nʼio sikjáojin josʼin batekjáyali je xijcháli.

¹⁶ Tsakui nichxin jetestigole Jeobá ma je xijcháli kʼianga sʼa koanjchíngai, tsa kʼoasʼin nikjaʼaitsjain nga tsín majinle xijcháli je kjoa xi bitjatojin kʼoa tsakui nga bʼéneli jmeni xi sʼiain. Tsakui nichxin kui jebi xi jao bʼé tokui tsa ndatjín nga Niná tinixálai kʼoa tsa mai. Kʼiatsa si̱kʼéjnai je xi kixi tjín, alikui ʼya xi tikoa̱nndosinnile xi tʼatsi josʼin mandosinle je ndsʼee kʼoa kao xijcháli.

¹⁷ Kʼianga batekjáyaná je xijcháná nʼio basenkaoná. Kʼiatsa tsín kuichákjáyali, a tsí kʼoasʼin si̱kjaʼaitsjain tsa mandosin kjoaixile xi tʼatsi (Heb. 12:8). Tonga tsakui xi tsín sasénli josʼin bichakjáyali, kuenta tʼiain nga tjenjin ndiaale ánni nga bichakjáyanili. Ali yaolijin nijtilai kʼoa chósonnilai jme xi sʼiain. Je Biblia kʼoatso nga je xi tjínle kjoankjíntokon kʼoa xi male síkjaʼaitsjen alikui tokjoan síjtile yaole (Prov. 17:27). Kʼianga kʼoaili kjoafaʼaitsjen, takui nga jekjimajchíngai kʼoa titjosuin jmeni xi kʼuínli, ali tokuijin ʼmini josʼin bʼaili kjoafaʼaitsjen (Prov. 1:8). Kʼianga tsjoake xijcháli je Jeobá nʼio koasenkaoli, je kui xi mele nga tjoéli kjoabijnachon xi tsínkʼia fetʼa.

18. Ánni nga kʼoénenilai yaoli nga tsín si̱chai je kjoanda xi kʼoainá.

¹⁸ Ngatsʼiñá nga koa̱n so̱koná je kjoatjao xi nʼio chjíle: Tsa ya tjínná kjoachoya ya ngʼajmi kʼoa tsa i̱ kuiyoaa ngantsjai nichxin i̱ Sonʼnde kʼianga jeʼndenaxó koa̱n. Kjoachoya jebi ñaki kuitjoson nga̱ je Niná xi kʼoatso nga kui tsjoáná. I tso: “Ñaki kui kjoankjíntokonle Jeobá sʼe̱ ngakjijnda sonʼnde” (Is. 11:9). Ngatsʼi xi ya koatio ya sonʼndenaxó, jé Jeobá koakoyale. Nʼio chjíle nga kʼoénelee yaoná nga katasokóná kjoanda jebi. Kuinga tsín si̱chajinsíñá jmeni xi tso je Jeobá. Tsín jme xi katabʼéchjoaná nga tjoéná kjoanda jebi.