1. Ánni machjénniná ngatsʼiaa nga ʼya xi sinʼio tokoán.

NGATSʼIÑÁ nga machjénná ʼyani xi sinʼio tokoán, tsakui nichxin kjoanikjáojin tjínná, tsa nroajen tokoán kʼoa tsa kjoa sʼená. Kʼoati chjaʼatokoán kʼianga chʼin bʼetʼaná, tsa jetjínná nó, kʼoa tsa jngo xíngiaa biya. Tjínkʼa je chjota xi totaon ʼya. Kʼoa sa tsʼen sa tsʼeen kjima je chjota. Jebi kui xi bakó nga jenichxin fetʼa tiyoaa, kʼoa nga faʼa nichxin sa chrian sa chrian biyolee je sonʼnde chjotse (2 Tim. 3:1). Ninga kʼoalani, tsakui nichxin jekjoatse tichoyalee nga kuitjoson jmeni xi tso je Jeobá kʼoa tsakui nichxin sa tse sa tse kjoa bitjatojiaan. Jméni xi sinʼio tokoán.

2, 3. 1) Jméni xi ʼyaa tʼatsʼe je Habacuc. 2) Ánni nga kui chótʼayajinsíñá je librole Habacuc.

² Yaa libro xi tsʼe Habacuc kuitsoyaná xi tʼatsʼe jebi. Ya Biblia alikui nʼio tse tsoya xi tʼatsʼe je profeta Habacuc. Tsakui nichxin “Je xi tsoakjá” sʼin tsoyanile je jaʼaínle. Jebi tsakui nichxin kui tsoyanile nga ñaki tsoakjáná je Jeobá kʼianga sínʼio tokoán, kʼoa tsakuije̱ nga ñaki ndoaa je Jeobá kʼianga je ninʼiotʼaa. Nʼio sínʼio tokoán je libro xi tsʼe Habacuc. Je profeta jebi kui kiskonangile je Jeobá jmeni xi koankjáojinle. Je Jeobá kitsoyale je Habacuc tʼatsʼe jmeni xi kiskonangi kʼoa kʼoakitsole nga katabʼétʼaxo̱n, nga̱  be nga kʼoati koasenkaoná nichxin xi tiyoaa ndʼaibi (Hab. 2:2).

³ Kʼianga tʼatsʼe Habacuc nchja̱ni je Biblia tokuikjoán síkʼaxki̱ jmeni xi tsakjáoyani kao Jeobá. Je librole Habacuc yaa maxki̱kao je Énle Niná xi kichji nichxin kjoatse “jméni nga sʼe̱síniná kjoachoya[...] xi totʼatsʼe kjoatsejta kao kjoanijetakon xi tjínle xo̱n Escrituras” (Rom. 15:4). Je librole Habacuc jao koya josʼin basenkaoná. Xi títjon, basenkaoná nga ʼyaa josʼin tsoyanile nga je Jeobá ninʼiotʼaa. Kʼoa xi majaoni, kʼoatsoná nga koa̱n nyʼán sʼe̱ tokoán ninga kjoa kuitjátojiaan.

4. Ánni nga nʼio kisikjáojinni je Habacuc.

⁴ (Tʼexkiai Habacuc 1:2, 3). * Nichxin nga tsakʼejna je Habacuc nʼio ñʼai koanchon. Nʼio ba kisʼe kon nga nʼio tsʼen koan je chjota. To kjoatsʼen tsabe ngakjijnda kʼoa tijéni chjota israelita xi nʼio chʼao kisʼin. Kuinga i̱ kitsoni je Habacuc: “Kʼiáni kjoetʼa je kjoatsʼen. Ánni nga tsín jme xi tísʼínni je Jeobá”. Joxi tojé tíjna koanle. Kuinga je Jeobá kisijénile nganʼio nga katabasenkao. Tsakui nichxin kʼoasʼin kisikjaʼaitsjen nga tsín koanndosinle je Jeobá jmeni xi kjima kʼoa nga nʼio tísíkʼachxin. A sakʼoaa kʼoasʼe tokoán jokisʼe kon je Habacuc.

5. Jméni xi nʼio chjíle bakóyaná je librole Habacuc (chótsenlai sén xi fitsʼiani kjoaʼmiya jebi).

⁵ Tojo jé Jeobá kisinʼiotʼa je Habacuc nga̱ tsakʼéyanajmíle je kjoa xi kisʼele kʼoa kao jmeni xi koankjáojinle. Jebi kui bakó nga tsínkui kisikinjele je kjoanikjáojin. Ningalani tsín koanjinle ánni nga tsín jme xi kisʼinni je Niná kʼoa kitsjoaʼnde nga kjoañʼai tsakjaʼá. Kʼianga kʼoakitsole Jeobá je Habacuc nga katabʼétʼaxo̱n jmeni xi koankjáojinle, kui bakóyaná nga tsín koa̱n kuinókjoaan kʼianga kʼoéyanajmílee je Jeobá jmeni xi makjáojinná kʼoa tsa jmeni xi to jao sʼená. Je Niná kui xi mele nga kʼoéyanajmílee jmeni xi nikjáojiaan (Sal. 50:15; 62:8). Ya Proverbios 3:5 itsoná: “Tin’iot’ai Jeobá kao ngayeje ni̱ma̱li, kʼoa ali tokuijin ’mini josʼin machoyali”. Je Habacuc kʼoakisʼin jotso én jebi.

6. Ánni nga nʼio chjínile je kjoabʼetsʼoa.

⁶ Je Habacuc jé Jeobá kisinʼiotʼa, je xi Nʼaile kʼoa xi Miyole koanni. Kuinga je tsakʼéyanajmínile jokisʼe kon ʼndele nga totsʼe kjoafaʼaitsjen sichjén kʼoa tokui koaini jmeni xi kisikjáojin, kʼoakitsole je Jeobá jokisʼe kon. Nga kʼoakisʼin nda choa̱ tsakʼéjnaná. Je Jeobá nrʼoé je kjoabʼetsʼoaná, kʼoa kʼoatsoná nga kʼoéyanajmílee jmeni xi makjáojinná nga̱ kʼoasʼin koakoñá nga je ninʼiotʼaa (Sal. 65:2). Tsa kʼoasʼiaan, jchañá nga nrʼoé Jeobá je kjoabʼetsʼoaná kʼoa jchañá josʼin koandiaaná (Sal. 73:23, 24). Koasenkaoná nga kʼoasʼin si̱kjaʼaitsjeen josʼin síkjaʼaitsjen tʼatsʼe je kjoa xi bitjatojiaan. Jngo koya josʼin bakoá nga je Jeobá ninʼiotʼaa kʼiaa nga bʼetsʼoalee.

7. Jókisʼin je Jeobá kʼianga tsakʼéyanajmíle je Habacuc jmeni xi koankjáojinle.

⁷ (Tʼexkiai Habacuc 1:5-7). * Je Habacuc  jé Jeobá tsakʼéyanajmíle jmeni xi koa̱nkjáojinle. Tsakui nichxin kui kisikjaʼaitsjen jósʼin je Jeobá. Je Jeobá jngoo Nʼai xi nʼio tsjoakená, kuinga koanjinnile jokisʼe kon Habacuc kʼianga tsakʼéyanajmíle jmeni xi koankjáojinle. Kʼoakitsole jmeni xi koa̱nle je chjota israelita xi tsín kixi tjíofitʼale. Tsakui nichxin je títjon Habacuc xokitsole je Jeobá nga sikjeson jmeni xi kjima nga kui nichxin.

8. Ánni nga tokʼoakoannile je Habacuc jmeni xi kitsole je Jeobá.

⁸ Je Jeobá kʼoakitsole je Habacuc nga jetíjnanda nga sitjoson jmeni xi kitsole. Je Jeobá kʼoakitso nga je chjota xi Babilonia tsʼe sichjén nga tsjoále kjoañʼai je naxinandá Judá. “Kʼianga nichxinno” kitso je Jeobá, kui xi tsonile nga kʼia kʼoakoa̱n kʼianga nichxinle je profeta Habacuc. A kui jebi xi koanmele je Habacuc. Mai. Nga̱ kui xi kitso je Jeobá nga ngisa tse kjoañʼai kʼoaile je naxinandá Judá. Je chjota babilonio nʼio chʼao koankjoan kʼoa nʼio tsʼen koan tikʼoajinni je chjota jñani tsʼe Habacuc. Ánni nga je naxinandá Babilonia sichjénni je Jeobá nga kjoañʼai tsjoále je naxinandále. Jókinʼia tsa ñálani xotsakʼinná.

9. Jméni xi kiskonangi je Habacuc.

⁹ (Tʼexkiai Habacuc 1:12-14, 17). * Je Habacuc koanjinle nga je naxinandá Babilonia sichjén je Jeobá nga tsjoále kjoañʼai je chjotatsʼen, ninga kʼoalani, tojo tsín kisʼejngo kon. Tonga nangitokon koan kʼoa tosi tonda je Jeobá kisinʼiotʼa. Kʼoakitso nga je Jeobá xi Na̱xi̱le mani (Deut. 32:4; Is. 26:4). Je Habacuc tsín jao kisʼele nga tjínle kjoatsjoacha kʼoa nga nda chjota je Jeobá. Kuinga kui kiskonanginile ánni nga kitsjoaʼndeni nga tosi tonda chʼao koanchon ya naxinandá Judá. Ánni nga tsín ndi̱to̱n jme xi kisʼinni. Nga nʼio tse nganʼio tjínle je Jeobá, ánni kitsjoaʼndeni nga tse kjoañʼai kisʼe. Ánni nga tsín jme xi kisʼinni nga kʼoasikji kjoatsʼen kisʼe. Nga̱ je Niná nʼio “Tsje” kʼoa je xko̱n “alikui ma be je xi chʼaotjín”.

10. Joni je Habacuc, jósa̱tío sakʼoa tokoán.

¹⁰ Tsakui nichxin sakʼoa kʼoasʼe tokoán joni je Habacuc. Noʼyañá jmeni xi tsoná je Jeobá. Jé ninʼiotʼaa kʼoa bʼexkiañá je Énle kʼoa kui xi tsjoáná kjoachoya. Nga bakóyaná je naxinandále Niná ʼyañá jmeni xi sʼin nichxin xi nroaján. Ninga kʼoalani, tsakui nichxin i̱ bixoán: “Kʼiá saʼndani nga tsín tikjoañʼai chja̱ʼañá”. Kuila kataʼyaa jmeni xi kisʼin je Habacuc kʼoa jósʼin koa̱n chjénngiaa je choa̱le.

11. Jméni xi kisʼin Habacuc kʼianga jekinrʼoé jmeni xi kitsole je Jeobá.

¹¹ (Tʼexkiai Habacuc 2:1). * Jmeni xi kitsole Habacuc je Jeobá kui xi nyʼán tsakʼé kon. Kuinga tosi tonda je Jeobá kisinʼiotʼani nga je koasenkao. Ali tsa tokʼiajin nga kʼoakisʼe kon je Habacuc, nga jeki nichxin kʼoakitso nga skóya saʼnda nga kʼoaile kjoañʼai je chjotatsʼen (Hab. 3:16). Kʼoati nkjínsa choʼndale Niná xi kʼoati kisʼele kjoatsejta kʼoa xi je Jeobá  kisinʼiotʼa. Je choa̱ xi tsakatíoná basenkaoná nga tsín si̱kinroajeen tokoán kʼoa nga tosi tonda chóyaa nga je Jeobá koasenkaoná (Miq. 7:7; Sant. 5:7, 8).

12. Jmé xi bakóyaná jokisʼin je Habacuc.

¹² Jmé xi bakóyaná jokisʼin je Habacuc. Xi títjon, kuinga ntsjaintsjai kʼoétsʼoalee je Jeobá ninga kjoa tibitjatojiaan. Xi majaoni, nga tjínnele kuinóʼya jmeni xi tsoná je Énle kʼoa kao josʼin bándiaaná je naxinandále. Kʼoa xi majanni, nga kao kjoatsejta chóyaa nga je Jeobá koasenkaoná, kʼoa tsín jao kʼoé tokoán nga kjoaʼaxin je kjoañʼai nga kuichoka nichxin. Tsa chjénngiaa je choa̱le Habacuc, nyʼán sʼe̱ tokoán kʼoa kui xi koasenkaoná nga chókjoajinná je kjoa xi kuitjátojiaan. Je kjoachoya kui xi koasenkaoná nga tosi tonda sʼe̱ná kjoatsejta, kʼoa je kjoatsejta kui xi koasenkaoná nga tsjoa sʼe̱ tokoán ninga kjoa tjínná. Je kjoachoya xi tjínná kʼoati basenkaoná nga tsín jao sʼe tokoán nga tsjoánganʼioná je Jeobá (Rom. 12:12).

13. Jméni xi kitsole Jeobá je Habacuc.

¹³ (Tʼexkiai Habacuc 2:3). * Je Habacuc jé Jeobá kiskoyale nga je koasenkao, kʼoa nga kʼoakisʼin nʼio kisasenle je Jeobá. Nʼio nda tsabe je kjoañʼai xi jaʼatojin je Habacuc. Kuinga kisinʼioni kon kʼoa kao kjoatsjoacha kitsoyale jmeni xi kiskonangi. Alikui nʼio tse nichxin kjoaʼato nga sitjoson je Jeobá jmeni xi kitso, joxi ini kitsole je Habacuc: “Katasʼeli kjoatsejta kʼoa tinʼiotʼanai. Ninga kʼoasʼin matsen nga kjimatseyana, sitjosonña jmeni xi tixinle”. Je Jeobá kʼoakitsole je Habacuc nga jetíjna nichxin nga sitjoson je énle kʼoa kʼoakitsole nga katakoyala. Kʼoa je Habacuc skoee nga kʼoasʼin je Jeobá.

14. Jméni xi ñaki tjínjngo tokoán nga sʼiaan ninga kjoa kuitjátojiaan.

¹⁴ Kʼiatsa kao kjoatsejta chóyaa nga je Jeobá koasenkaoná kʼoa kuinóʼya jmeni xi tsoná, sʼeená kjoanʼiotʼa kʼoa nyʼán sʼe̱ tokoán ninga kjoa kuitjátojiaan. Je Jesús kʼoakitso nga tsínkui nʼio si̱kjaʼaitsjenjiaan jmé nichxinni sitjoson je Jeobá jmeni xi tso (Hech. 1:7). Alikui jao kʼoé tokoán nga be je Jeobá kʼiáni sitjoson jmeni xi tso. Kuinga tsín si̱kinroajenñá tokoán kʼoa tosi tonda nangitokon katamaa, katasʼená kjoamakjain kʼoa tsejta katamaa. Nga kjesa faʼaijin je nichxinle Jeobá, kʼoénelee yaoná jokji tjen kuicho nganʼioná nga si̱xálee (Mar. 13:35-37; Gál. 6:9).

15, 16. 1) Jmé énni xi nʼio chjíle faʼaitʼa je librole Habacuc. 2) Jmé xi bakóyaná jmeni xi tso.

¹⁵ Je Niná kʼoatso nga sʼe̱le kjoabijnachon je chjota xi kixi kʼoa nga skoe̱ ngatsʼi je kjoajeyale Jeobá (Hab. 2:4, 14). Je Niná tsjoále kjoabijnachon xi tsínkʼia fetʼa je xi tsejta koa̱n kʼoa xi je sínʼiotʼa.

¹⁶ Je pastro Pablo nʼio kitsjoale kjoandosin jmeni xi tso Habacuc 2:4, nga̱ saʼnda jan kʼa kisikʼaxki̱ (Rom. 1:17; Gál. 3:11; Heb. 10:38). Ninga kjoa kuitjátojiaan, tsa tjínná kjoamakjain kʼoa tsa je Niná si̱nʼiotʼaa, jchañá nga kuitjoson jmeni xi tso. Je Jeobá kʼoatsoná nga kui si̱kjaʼaitsjeen je kjoachoya xi tjínná.

17. Jméni xi tsín jao bʼé tokoán nga kʼoakoa̱n tojo tso je librole Habacuc.

¹⁷ Je librole Habacuc nʼio tse jmeni xi tsoyaná kʼianga jenichxin fetʼa tiyoaa. Je Jeobá kʼoatso nga tsjoále kjoabijnachon je chjota xi kixi kʼoa xi je sínʼiotʼa. Kuinga  machjénsíni nga tosi tonda si̱tajaa je kjoamakjainná kʼoa tosi tonda je Jeobá si̱nʼiotʼaa, ninga kjoa kuitjátojiaan kʼoa ninga sakʼoa si̱kjáojiaan. Jmeni xi kitsole Jeobá je Habacuc kui xi tsín jao bʼé tokoán nga koasenkaoná kʼoa kʼoasjentjainá. Kʼoatsoná nga je si̱nʼiotʼaa kʼoa nga kao kjoatsejta chóyaa saʼnda nga kjoaʼaí je nichxin nga koatexoma je Chjotaxále i̱ Sonʼnde. Nga kui nichxin jé Jeobá skoe̱xkón ngatsʼi chjota jngo tjíjtsa Sonʼnde, nʼio tsjoa sa̱tío kon kʼoa sʼee kjoanyʼán (Mat. 5:5; Heb. 10:36-39).

18. Jósʼin tsakasenkao je Habacuc jmeni xi kitsole Jeobá.

¹⁸ (Tʼexkiai Habacuc 3:18, 19). * Nʼio tsakasenkao je Habacuc jmeni xi kitsole je Jeobá. Kui kisikjaʼaitsjen josʼin tsakasenkao Niná je naxinandále nichxin kjoatse kʼoa kui xi kitsjoanganʼiole. Ningalani be nga tojo kjoañʼai kjoaʼa choatse, ñaki kʼoatsakʼé kon nga je Jeobá koasenkao. Ningalani jao kisʼe kon nga títjon, xijekoanni, jé Jeobá kisinʼiotʼa nga je kʼoasjentjai. Jmeni xi tso ya versículo 18 kui tsoya nga nʼio kisinʼiotʼa je Jeobá. Kʼoa xi tʼatsʼe jebi, tjínkʼa je chjotachjine xi kʼoatso nga nʼio tsjoa kisʼe kon je Habacuc xi tʼatsʼe Ninále. Nʼio basenkaoná je choa̱le. Je Jeobá ali tokʼoajin tsoná jmeni xi sʼin, kʼoatsoná nga jetjínndajinle josʼin sitjoson jmeni xi tso.

19. Jméni xi machjén nga sʼiaan nga so̱koná je kjoanʼiojin joni je Habacuc.

¹⁹ Alikui jao tjínná nga nʼio chjíle jmeni xi tso je librole Habacuc, nga je Jeobá tjínnele si̱nʼiotʼaa (Hab. 2:4). Nga tosi tonda je Jeobá si̱nʼiotʼaa, machjén nga ngisasa si̱miyoaa. Kʼoa jan koya tjínni xi koasenkaoná. Xi títjon, kʼoétsʼoalee je Jeobá ngantsjai kʼoa kʼoéyanajmílee jmeni xi makjáojinná. Xi majaoni, si̱tjosoán jmeni xi tso je Biblia kʼoa kjuintjenngiaa josʼin bándiaaná je naxinandále. Kʼoa xi majanni, katasʼená kjoatsejta kao kjoamakjain nga je Jeobá koasenkaoná. Kʼoakisʼin je Habacuc. Kʼianga tosʼa bʼétsʼiakao je librole kʼoatso nga nʼio aon kisʼe kon, tonga nga síkjetʼani kʼoatso nga nʼio tsjoa tjín kon kʼoa nga je Niná sínʼiotʼa. Tsa kjuintjenngiaa je choa̱le kʼoati jchaa josʼin basenkaoná je Jeobá. Kui xi sinʼio tokoán nga nʼio chʼao chon sonʼnde ndʼaibi.