1-3. 1) Jósʼin tjínnele jchatokoán jmeni xi tso je Biblia. Jngo choa̱ tʼejnai (chótsenlai sén xi faʼaitʼa ibi). 2) Jmé kjoachjonangi xi chótʼayajiaan i̱ kjoaʼmiya jebi.

NICHXIN xi tiyoaa ndʼaibi, je chjota me tokjitʼa batse je tsojmi tonga skan fikao ijngokʼani. Tsakui nichxin kui kʼoasʼínni nga tsínni ndakjoan kʼoa tsínni matsjoake je tsojmi xi batse. Kuinga kjaʼaí tsojmi síjé ngajaoni kʼoa tsa maije̱ síjéni tao̱nle.

² Alikʼia mená kʼoasi̱koaa je kjoankjíntokon xi tjínná xi tsʼe Biblia. Kʼianga jebindaa je xi kixi, xi tsonile, nga jeʼyaa je Énle Niná, alikui mená nga koatenaa, xi tsonile, alikui si̱kʼéjnaa (tʼexkiai Proverbios 23:23; * 1 Tim. 2:4). Tojosʼin tsaʼyaa ya kjoaʼmiya xi ijngo, kʼianga koanná xi tʼatsʼe Niná, tsee nichxin kinikʼayalee. Tjínkʼa xi kisikatío je xále jñani tse tao̱n njele tsakai, kʼoa tsakuije̱ nga tsín kisasenle je xínkjín kao miyole nga Énle Niná kiskotʼaya. Kʼoati tjínkʼa xi kisikʼantjaiya josʼín  tsakai, jolani nga kisikatío je costumbre kʼoa kao jmeni xi tsín Biblia yʼangini. Tonga alikui jao tjínná nga ngisa tse kjoanichikontʼain tísʼená nga tiʼyaa je xi kixi.

³ Kʼianga koa̱njinná jokji chjíle je Énle Niná, je Jesús kui tsakʼéyanajmí tʼatsʼe jngo chjota xi kjoama̱ sʼín xi perla básjai. Kʼianga jngo perla xi nʼio chjíle kisokole, tsakaténaa ngayeje xi tjínle nga tsakatse (Mat. 13:45, 46). Kʼoatisʼinni, kʼianga jeʼyaa xi tʼatsʼe Chjotaxále Niná kʼoa kao jmeni xi bakóya je Biblia, nʼio chjí ʼyaa kʼoa kjitʼanangi nikatioá ngayeje jmeni xi tsín sasénle je Jeobá. Tsa tosi tonda chjí jchatokoán tsínjin kʼia si̱kʼéjnaa. Tonga tjínkʼa ndsʼee xi tsín tibechjíni kʼoa síkatío je Énle Niná. Alikui kʼoaiʼndee nga kʼoakatamaa, tosa tosi tonda kʼoasʼin kjuinkoaa yaoná jotjínni je xi kixi (tʼexkiai 3 Juan 2-4). * Kui xi tsonile nga kui títjon si̱kʼéjnaa kʼoa si̱tjosoán jmeni xi bakóyaná je Énle Niná. I̱ kjoaʼmiya jebi kui kjoachjonangi jebi chótʼayajiaan: Jméni xosíkao kʼa je chjotale Cristo nga síkatíoni je xi kixi, kʼoa jméni xi sʼín. Jméni xi koasenkaoná nga tsín kʼoasʼiaan tsanda ñá. Jméni xi koasenkaoná nga tosi tonda kʼoasʼin kjuinkoaa yaoná jotjínni je xi kixi.

4. Kʼianga siglo 1, ánni nga nkjín koanni xi kisikatío je Énle Niná.

⁴ Nga siglo 1, tsakatio kʼa je chjota xi nda kisasenle jmeni xi tsakakóya je Jesús, tonga xi jekoanni alikui tikʼoakisʼinni. Tobʼelañá, ñandia kʼianga jngo kjoaxkón tsakʼéjna je Jesús jñani nkjín chjota kisikjen, xi jekoanni, je Jesús kʼoa kao je chjota yaa ki xingoatʼa ndáchikon Galilea. Kʼianga ya tjío, tokʼoakoanle je chjota kʼianga i̱ kitso je Jesús: “Tsa tsín tsa chi̱nao yaole ʼndíle chjota, tsa tsín tsa sʼio njínleje̱, tsínno kjoabijnachonjin”. ʼNdele nga skónangile jósʼin tsoyanile je én xi kinchja̱ je Jesús, tosaa i̱ kitso: “Kjaínga ñʼai tjín én jebi. ʼYá xi koa̱n kjuinrʼoéle”. Kʼoa “nkjín chjotale Jesús kisikʼófaya, likui tiya tsʼamjenkaoni” (Juan 6:53-66).

5, 6. 1) Ánni nga jekisikatío kʼani je Énle Niná nichxin xi tiyoaa ndʼaibi. 2) Ánni nga tobijbi síkjin kʼanile je xi kixi.

⁵ Nichxin xi tiyoaa ndʼaibi tjínkʼa xi jekisikatío je Énle Niná. Tsakui nichxin kuinga tsín kisasenle jmeni xi ʼmiya chjotsená xi tʼatsʼe je Biblia, kʼoa tsakui kisikaténgije̱ jmeni xi kitso kʼoa tsa jmeni xi kisʼin jngo ndsʼee. Tjínkʼa xi tsín kisasenle kʼianga kjoafaʼaitsjen tsakʼaile kʼoa tsakuije̱ nga kjoa kisʼele kao jngo ndsʼee. Kʼoati tjínkʼa xi ya fijtakao je xi yátsʼi̱n binyále je Jeobá kʼoa tsa jeje̱ chjota xi batiochjoale je Énle Niná. Tsa totʼatsʼe kjoa jebi nga kʼoakisʼinni kʼoa tsa kjaʼaísanile, tonga jekisikjinle je Jeobá kao je naxinandále (Heb. 3:12-14). Tongisajin nda tsa tosi tonda kisʼele kjoamakjain kʼoa je Jesús kisinʼiotʼa, tojo kisʼin je pastro Pedro. Kʼianga kʼoakitsole Jesús je pastrole tsa mele nga tsín tije koaitjennginile, je Pedro i kitso: “ʼYá xi koangínchonlaijin. Ji xi tjínli én xi tsjoá kjoabijnachon ngantsjai” (Juan 6:67-69).

⁶ Tjínkʼa je ndsʼee xi saʼnda tsín be nga síkjinle je Énle Niná. Je Biblia kui síngósonkao jngo barco xi xin ndiaa fi kʼoa xi  tobijbi makjin (Heb. 2:1). Tsakui nichxin tsín toxá kisʼinni nga kisikatío je Énle Niná, tonga kitsjoaʼnde nga koankjinle Jeobá. Jméni xi machjén nga sʼiaan nga tsín kʼoakatamaa.

7. Jméni xi koasenkaoná nga tsínkʼia si̱kʼéjnaa je xi kixi.

⁷ Kʼianga kʼoasʼin kjuinkoaa yaoná jotjínni xi kjoakixi machjén nga si̱tjosoán ngayeje jmeni xi bakóyaná je Jeobá. Tjínnele nga kui títjon si̱kʼéjnaa je Énle Niná kʼoa kʼoaiʼndee nga kui katabándiaaná. Je rey David i kitso ñandiale je Jeobá: “Kʼoasʼin kjuíkoa yaona jotjín je kjoakixili” (Sal. 86:11). Joni je rey David, machjén nga kʼoakʼoé tokoán nga kʼoasʼin kjuinkoaa yaoná jotsoná je Jeobá. Tsa jao tjín tokoán, tsakui nichxin kui si̱metokon ijngokʼá jmeni xi jekinikatioá kʼianga kichotʼayá je Énle Niná. Tonga tsín koa̱n kʼoasʼiaan. ʼYañá nga tsín koa̱n ñá chjoéjiaan jmeni xi si̱tjosoán kʼoa jmeni xi mai, nga̱ majinná nga tjínnele kʼoasʼin kjuinkoaa yaoná jotjínni “ngayije xi ñaki kjoakixi” (Juan 16:13). Ya kjoaʼmiya xi ijngo, aon koya kinikʼaxkiaa xi tsakui nichxin kinikatioá kʼianga tsaʼyaa xi tʼatsʼe Niná. Kuila kataʼyaa jméni xi koasenkaoná nga tsín tikui si̱metokonñá jmeni xi kinikatioá (Mat. 6:19).

8. Ninga tsín kʼoatjín tokoán, jméni xosikaoná nga si̱kjinnilee je xi kixi. Jngo choa̱ tʼejnai.

⁸ Je nichxinná. Nga tsín koa̱nkjinlee je Énle Niná, tjínnele nga nda si̱chjén je nichxinná. Tsa tsín chósonnilee josʼiaan, tochajinle ngisa tse nichxin si̱kʼayalee je kjoasʼetsaojin, je Internet, je televisión kʼoa tsa jmesani xi nʼio tsjoachaa xi nʼia. Ningalani tsín chʼaotjín nga bʼetsaojiaan, tonga tsakui ngisa si̱kʼayalee je nichxinná, tsínjin tichótʼayañá nga toñá je Biblia kʼoa tsínjin tikʼoakoa̱nniná nga kʼoasʼiaan je xále Niná. Kataʼyala jmeni xi koanle jngo tichjaa xi Emma ʼmi. * Saʼnda nga sʼa ʼndí kji, nʼio tsjoake nga naxín bʼejnasonle. Tonga chaan koanjinle nga nʼio tse nichxin fáʼale nga kʼoasʼín, kuinga nda tsakʼéndajinni jmeni xi sʼin. Kʼoati tsakasenkao je choa̱le Cory Wells, xi kʼoati nʼio tsjoake koan nga naxín bʼejnason. * Tonga ndʼaibi je Emma ngisaa tse nichxin síkʼayale je xále Niná, kʼoati síkʼayale nichxin je miyole kʼoa kao xínkjín xi kʼoati choʼndale Niná ma. Ngisaa kjimachriantʼale je Jeobá kʼoa tsjoa tjín kon ndʼaibi nga̱ be nga nda tísíchjén je nichxinle.

9. Jósʼin jchatokoán je tsojmi xi tjín sonʼnde.

⁹ Je tsojmi xi tjín sonʼnde. Tsa mená nga tosi tonda kʼoasʼin kjuinkoaa yaoná jotjínni je xi kixi, machjén nga tsínkui nʼio si̱metokoán jmeni xi tjín sonʼnde. Alikui tikui nʼio tsakʼainilee kjoandosin kʼianga jetsaʼyaa xi tʼatsʼe Jeobá. Nkjín koya jmeni xi kinikatioá nga kʼoasʼin timangínkoaa yaoná jotjínni je xi kixi. Tonga nga jetífaʼato je nichxin, nga kui batse je chjota jmeni xi sʼa kjimatsen chjotse kʼoa tsa jmesani xi kjaʼaínile, tsakui nichxin kʼoasʼin si̱kjaʼaitsjeen nga tse xi tinichaa. Tsa tsín titsjoa tjíoni tokoán jokji tsojmi tjínná, koaanle kui xosikaoná nga si̱kʼéjnaa je xále Niná kʼoa kui kjoásjee je tsojmi xi tjín sonʼnde. Kʼoakoan je Demas. Nga kui ngisa koantsjoake jmeni xi tjín sonʼnde, kui xokisikao nga tsín tixále Niná kisʼinni kʼoa nga tsín tiya tsakʼamjekaoni je pastro Pablo  (2 Tim. 4:10). Je Biblia alikui kʼoatsokixi tsa ngisa tsjoake koan je Demas tsojmi xi tjín sonʼnde tikʼoajinni je xále Niná, kʼoa tsakuije̱ nga tsín tikoanmenile nga ya kikao je Pablo. Jokoan je Demas kui bakóyaná nga tsín koa̱n kui si̱metokon ijngokʼá je tsojmi xi tjín sonʼnde, ánni nga tsín kuinjenyʼánni je kjoatsjoacha xi tjínná kao Jeobá.

10. Nga tosi tonda kʼoasʼin kjuinkoaa yaoná jotjínni je xi kixi, jméni xi si̱kuindalee yaoná.

¹⁰ Josʼin tiyoaa kao miyoná kʼoa kao xíngiaa. Nga tosi tonda kʼoasʼin kjuinkoaa yaoná jotjínni xi kixi, alikui koa̱n kʼoaiʼndee nga tjín xi kʼoechjoaná nga kʼoasʼiaan. Kʼianga tsaʼyaa jokjoantjínni xi kixi, tsʼantjaiyaa josʼin tiyoaa kao je miyoná kʼoa kao xíngiaa xi tsín testigole Jeobá ma. Tjínkʼa xi kisasenle kʼoa tjínkʼa xi mai (1 Ped. 4:4). Kui xi mená nga ndasʼin kuiyoaa kao xíngiaa. Tonga tsín koa̱n kuitjátoné je kjoatéxomale Jeobá tojoni nga ndasʼin kuiyoaa kao je. Tojo tso ya 1 Corintios 15:33, toje si̱miyoaa je xi kʼoati tsjoake Jeobá.

11. Jméni xi koasenkaoná nga tsínkui si̱kjaʼaitsjeen kʼoa nga tsínkui kʼoasʼiaan je xi chʼaotjín.

¹¹ Nga kui nikjaʼaitsjeen kʼoa nga kui kʼoanʼia je xi chʼaotjín. Je xi kʼoasʼin tjíofikao yaole jotjínni xi kixi, tjínnele nga tsje koa̱n (Is. 35:8; tʼexkiai 1 Pedro 1:14-16 *). Kʼianga tsaʼyaa jmeni xi tso je Biblia, kinikʼantjaiyañá jmeni xi nʼia. Tjínkʼa xi nʼio tse kisikʼantjaiya yaole josʼín tsakai. Tonga tjínnele si̱kuindaa yaoná nga tsínkui kjoajndí xi tjín sonʼnde jtsaojiaan. Xi koasenkaoná, kuinga si̱kjaʼaitsjenjiaan jokji kjoama̱ kisʼengile je Jeobá nga kitsjoa je ʼNdíle nga tsakʼéchjíntjainá (1 Ped. 1:18, 19). Tsa kao ni̱ma̱ná kʼoa kao kjoafaʼaitsjenná si̱kjaʼaitsjenjinñá jokji chjíle je kjoabʼechjíntjaile Jesús, tsjejin sʼin kuiyoaa ngixko̱n Jeobá.

12, 13. 1) Ánni nga nʼio tjínnile kjoandosin nga kʼoatisʼin jchatokoán je sʼuí xi bʼasje chjota josʼin bekon je Jeobá. 2) Jméni xi chótʼayajiaan.

¹² Je costumbre kʼoa kao jmeni xi nʼia xi tsín Biblia yʼangini. Tsakui nichxin je xíngiaa, je xi ñatjen mangián skuela kʼoa tsa jeje̱ xi ñatjen nixá kʼoakuitsoná nga kʼoati sʼiaan josʼín je nga sʼuí bʼasje. Jméni xi koasenkaoná nga tsínkui kʼoasʼiaan kʼoa tsínkui sʼuí chʼasjee xi jtike Jeobá. Xi koasenkaoná kuinga nda katamajinná ánni nga tsín sasénnile. Kʼoati koasenkaoná nga chótʼayajiaan jmeni xi tso je xo̱n xi síkasénná je naxinandále Niná tʼatsʼe jñá nroani nga sʼuí bʼasje je chjota. Kʼianga nikjaʼaitsjenjiaan ánni nga tsínkui sʼuí chʼasjeñá josʼín je chjota, ngisaa sʼejngo tokoán nga kui kʼoatinʼia jmeni xi sasénle Niná (Efes. 5:10). Tsa je Jeobá si̱nʼiotʼaa kʼoa kao jmeni xi tso je Biblia, alikui chjota kuinókjonlee (Prov. 29:25).

¹³ Kui xi mená nga kʼoasʼin kjuinkoaa yaoná ngantsjai nichxin jotjínni je xi kixi. Jmé xi koasenkaoná nga tosi tonda kʼoasʼiaan. Janla koya kataʼyaa.

14. 1) Jósʼin basenkaoná nga tosi tonda chotʼayajiaan je xi kixi. 2) Ánni nga nʼio chjínile je kjoachjine, kjoabichakjáya kʼoa kao kjoamajintokon.

¹⁴ Xi títjon, tosi tonda chʼa̱sjeʼaa nichxin nga chótʼayajiaan je Énle Niná  kʼoa si̱kjaʼaitsjenjiaan jmeni xi tso. Nga sa tse sa tse chótʼayá, ngisaa koa̱ntsjoachaa je xi kixi kʼoa tsínjin kʼia si̱kʼéjnaa. Tonga ali tsa tokuijin je kjoankjíntokon xi machjénná. Ya Proverbios 23:23 itso: “Tindái je kjoakixi kʼoa alikʼiajin batenai”. Kʼoati tso nga tjínnele sʼe̱ná “je kjoachjine, kjoabichakjáya kʼoa kao kjoamajintokon”. Nga sʼená je kjoachjine, kui xi tsonile nga nitjosoán jmeni xi tso je Énle Niná. Nga sʼená je kjoamajintokon, kui xi tsonile nga ningósonkoaa jmeni xi majin chjotsená kao jmeni xi tokʼoa jeʼyaa. Xi ijngosani, sakʼoaa batekjáyaná je Énle Niná, nga̱ kʼoatsoná jñani machjén nga si̱ndayaa yaoná. Machjén nga kjitʼanangi si̱tjosoán nga bichakjáyaná, nga̱ je Biblia kʼoatso nga ngisa chjíle je kjoabichakjáya tikʼoajinni je tao̱nchxoa (Prov. 8:10).

15. Jósʼin basenkaoná je xi kixi joni jngo xjoa̱xínkjándía.

¹⁵ Xi majaoni, ñaki kʼoakʼoé tokoán nga kʼoasʼin kjuinkoaa yaoná jotjínni je xi kixi nga nyaon nyaon. Je Biblia kui síngósonkao je kjoakixi kao xjoa̱xín xi tsakʼékjá je sondado (Efes. 6:14). Nichxin kjoatse, je xjoa̱xín xi bʼékjá je sondado kui xi tsakasenkao nga tsín kitsiʼaon kʼianga ki kjoajchán. Tonga tjínnele nga nʼio nda tsakʼékjá. Kʼoa ndʼaibi, jósʼin basenkaoná je xi kixi joni jngo xjoa̱xínkjándía. Kʼiatsa kuenta sʼiaan ngantsjai je xi kixi, kui xi koasenkaoná nga tsín kjoaʼmiya ndiso si̱siaan kʼoa koaanná nga nda chjoéjiaan jmeni xi sʼiaan. Kʼoa kʼianga jme xi sʼe̱jnabasenná koasenkaoná nga kui kʼoasʼiaan je xi ndatjín. Je sondado alikuikʼia kisichajin je xjoa̱xínkjándíale kʼianga ki kjoajchán. Tikʼoasʼinni tsanda ñá, alikuikʼia si̱kʼéjnaa je xi kixi, tosa kʼoasʼin kjuinkoaa yaoná ngantsjai jotso je Énle Niná. Je xjoa̱xínkjándía xi tsakʼékjá je sondado kʼoati ya tsakátʼa je espadale. Kuila kataʼyaa jméni xi espada mangóson ndʼaibi kʼoa jósʼin koa̱n si̱chjén.

16. Jósʼin basenkaoná kʼianga ʼmiyalee Biblia je chjota.

¹⁶ Xi majanni, kʼoénelee yaoná nga koakoyalee xi kjaʼaí jmeni xi tso je Biblia. Joni je sondado nga koanle josʼin kisichjén je espada, machjén nga kʼoati koa̱nná nʼio nda si̱chjén je Énle Niná (Efes. 6:17). Machjén nga kʼoénelee yaoná ngatsʼiaa nga ngisasa nda si̱chjén je Énle Niná nga koakoyaa (2 Tim. 2:15). Kʼianga kui Biblia nichjén nga ʼmiyalee je chjota, basenkaoná nga ngisa ʼyaa jmeni xi tso kʼoa ngisaa tsjoacha maa je xi kixi. Tsa kʼoasʼiaan, ngisaa koanmená nga tosi tonda kʼoasʼin kjuinkoaa yaoná jotjínni je xi kixi.

17. Ánni nga chjí ʼyatokonni je xi kixi.

¹⁷ Je xi kixi jngoo kjoatjao xi nʼio chjíle xi títsjoáná je Nʼainá xi tíjna ngʼajmi. Kui xi basenkaoná nga nimiyoaa je Jeobá. Jenʼio tse jmeni xi títsoyaná je Niná, tonga kʼoatso nga tosi tonda kuitsoyaná ngantsjai nichxin. Nʼio chjí jchatokoán je xi kixi joni jngo perla xi nʼio chjíle. Tosi tonda katasʼená je kjoankjíntokon xi tsʼe Biblia kʼoa tsínkʼia si̱kʼéjnaa je xi kixi. Tsa kʼoasʼiaan, kʼoati kʼuínlee je Jeobá jokitsole je David, kʼianga i̱ kitso: “Kʼoasʼin kjuíkoa yaona jotjín je kjoakixili” (Sal. 86:11).