1, 2. 1) Jméni xi tjínná je xi nʼio chjíle. 2) Jméni xi nʼio chjí ʼyatokoán (chótsenlai sén xi faʼaitʼa ibi).

JMÉNI xi tjínná je xi nʼio chjíle. Nga naxinandále Niná maa, je xi ngisa chjíle xi kao ñá kui je kjoamiyo xi tjínná kao Jeobá. Alikuijin jme xi si̱kʼóntjaiñá. Kʼoati chjí ʼyaa jmeni xi tsoya je Biblia, nga̱ kui xi basenkaoná nga miyole maa je Nʼainá xi tíjna ngʼajmi (Col. 1:9, 10).

² Je Jeobá kui Biblia síchjén kʼianga bakóyaná. Kʼoatsoná joʼmi kʼoa jmeni xi tsoyanile je jaʼaínle, kʼoati tsoyaná jokjoan. Kʼoasʼin tsakakóni nga nʼio tsjoakená kʼianga kʼienntjainá je Jesús, je ʼNdíle. Tsoyaná tʼatsʼe je Chjotaxále. Je xi ya ngʼajmi koai kui kjoachoya tsjoále nga ya koatio ngantsjai, kʼoa je xi “kjaʼaí barré” ʼmile kui kjoachoya tsjoále nga i̱ Sonʼnde koatio nga jeʼndenaxó koa̱n (Juan 10:16). Kʼoati bakóyaná jósʼin si̱jchá yaoná. Josʼin bakóyaná je Jeobá nʼio chjíle, nga̱ basenkaoná nga machriantʼasalee kʼoa tsjoa satío tokoán.

3. A kui xi tsonile nga kao tao̱n kuindáñá je xi kixi.

 ³ Nga kʼoatso je Biblia nga kuindá je xi kixi, a kui xi tsonile nga kao tao̱n kuindáñá. Mai. Je Jeobá nʼio nda chjota. Saʼnda kitsjoaa je ʼNdíle nga kʼienntjainá. Kʼianga be jngo chjota xi kui básjai je xi kixi, basenkao nga masjaile kʼoa alikui tao̱n síjéle. Tobʼelañá, kʼianga kʼoakitsole jngo chjota xi Simón tsakʼin je pastro Pedro nga tao̱n tsjoále tsa kʼoati kui kjoatéxoma kʼoaile nga tsjoá je nganʼiotsje, je Pedro i kitsole: “Je tao̱nli katamʼekoai, nga nikjaʼaitsjain nga je kjoatjaole Niná ma bindani tao̱n” (Hech. 8:18-20).

4. Jméni xi jchaa i̱ kjoaʼmiya jebi.

⁴ (Tʼexkiai Proverbios 23:23). * Machjén nga chʼa̱sjee nganʼio nga so̱koná je xi kixi, kʼoa si̱katioá jmeni xi tsín koasenkaoná. Kʼoa nga jejchaa je Énle Niná, machjén nga si̱kuindaa, xi tsonile, alikuikʼia si̱kʼéjnaa. I̱ kjoaʼmiya jebi, kui chótʼayajiaan jmé xi tsoyanile nga bindaa je xi kixi kʼoa jméni xi sʼiaan kʼianga so̱koná. Nga jchaa jebi kui xi koasenkaoná nga ngisasa chjí jchaa je Énle Niná kʼoa nga tsínkʼia si̱kʼéjnaa. Nga̱ ngisaa nʼio chjíle tikʼoajinni tojmeni.

5, 6. 1) Jósʼin koa̱n kuindá je xi kixi. Jngo choa̱ tʼejnai. 2) Jósʼin basenkaoná kʼianga kui bindaa je xi kixi.

⁵ Kʼianga tjín xi bʼaikjoatjaoná, alikui xi tsonile nga tsín jme kjoama̱ sʼengi. Je én hebreo xi “tindái” tso ya Proverbios 23:23 kʼoati kui xi tsonile nga “fasjee” kʼoa tsa “sʼená”. Je én jebi kui nchja̱ni nga toxá kjoama̱ bʼengiñá jmeni xi fasjee kʼoa tsakuije̱ nga tjín xi bʼaingajaoñá. Tobʼelañá, tsa ya ndi̱tsi̱n tiyoaa kʼoa tsa jchaa jñani kʼoatso nga na̱chja̱ tíbʼaikjoatjao, tsa tsín kjuinchʼá a tojbi kuicho satíoson ya yámixa̱ná. Maijin. Ningalani tokjoatjao tíbʼabí, machjén nga si̱kʼayaa je nichxinná nga kjuinchʼá. Tikʼoasʼinni, kʼianga kuindá je xi kixi, alikui tao̱n kʼoee, tonga machjén nga tjín xi sʼian ngajaoñá.

⁶ (Tʼexkiai Isaías 55:1-3). * Jmeni xi tso je Jeobá tojosʼin faʼaitʼa ya librole Isaías basenkaoná nga majinná jme xi tsoyanile nga bindaa je xi kixi. Je énle Jeobá kui síngósonkao je nandá, je ndáchiki kao vino. Je Énle Niná nʼio nda bʼé tokoán joni jngo vaso nandá xi tsje kʼoa xi tjín nyʼán nyʼán. Kʼoa xi ijngosani, joni je ndáchiki nga basenkao jngo ʼndílee nga majchínga, kʼoatisʼinni je Énle Niná, basenkaoná nga mataja je kjoamakjainná. Kʼoa jósʼin mangóson je vino. Ya Biblia kʼianga vino síkʼaxki̱, kjoatsjoa nchja̱ni (Sal. 104:15). Kʼianga kʼoatsoná je Niná nga vino kuindá, kui xi tsonile nga nʼio tsjoa sa̱tío tokoán kʼiatsa si̱tjosoán je kjoatéxomale (Sal. 19:8). Kao kui choa̱ jebi bakóniná je Jeobá nga ndasʼin bichómani kʼianga ʼyaa je xi kixi kʼoa  nga nitjosoán. Aonla koya si̱kʼaxkiaa jmeni xi nikatioá kʼianga bindaa je xi kixi.

7, 8. 1) Ánni nga nichxin machjénni nga koa̱njinná je xi kixi. 2) Jméni xi kisʼin jngo tsoti, kʼoa jósʼin kichomani.

⁷ Je nichxinná. Nichxin machjén kʼianga noʼyá je Énle Niná, nga bʼexkiaa je Biblia kʼoa kao xo̱n xi Énle Niná yʼangini, nga chotʼayá nga toñá, nga biyondalee je kjoajtínná kʼoa nga mangián. Jebi kui xi tsonile nga tsín nʼio si̱kʼayalee je nichxinná jmeni xi tsín nʼio tjínle kjoandosin (tʼexkiai Efesios 5:15, 16). * Jókji tse nichxin machjén nga koa̱njinná jmeni xi tsoya Biblia. Kui xi kuitsoni josʼin chótʼayá nga jngó jngoá. Nga̱ tsínkʼia kjoetʼa nga chótʼayajiaan tʼatsʼe kjoachjinele Jeobá, jokjoan kʼoa kao jmeni xi kisinda (Rom. 11:33). Kʼianga kitjo títjon rebista jebi nga én inglés, “jngoo naxó” kisingósonkao je Énle Niná, kʼoa i kitso: “Ali tobʼejngojin tokuin tsa jekasokóli jngo naxó, xi tsonile, je kjoankjíntokon xi tsʼe Niná. Tsa tojngolani koya xi machjén alikuijin kʼoasikji kjoankjíntokon títsjoáná Niná, tosi tonda tʼexkuí, tosi tonda tjasjai”. Chjónangilee yaoná jebi: “Jótjín naxó jetjíona”, xi tsonile, jókji kjoankjíntokon xi tʼatsʼe Niná jetjínná. Ningalani kʼia nga jekuiyoaa ngantsjai, tosi tonda koa̱nsaná xi tʼatsʼe Jeobá. Nichxin xi tiyoaa ndʼaibi nʼio chjíle nga nda si̱chjén je nichxinná nga kuindá je kjoakixi. Jngola choa̱ kataʼyaa.

⁸ Jngo tsoti xi Mariko ʼmi, * xi Japón tsʼe, yaa Nueva York (Estados Unidos) kikotʼaya. Nga kʼia yaa tsakʼejnajinle jngo relijión xi Japón kinroani. Ñandia kʼianga jngo precursora kiskajin xi xki̱ ndʼia títsoyason. Kʼianga kiskotʼaya je Mariko, nʼio tsjoa kisʼe kon, saʼnda kʼoakitsole je precursora nga jao kʼa katatsoyale nga jngo xomana. Ningalani skuela fi kʼoa tísíxákaoni, kjitʼanangi ki je kjoajtín. Je Mariko ngisaa choa nichxin kisikʼayale nga tsakʼétsaojin, kʼoa tosa kui kitsjoale kjoandosin nga koa̱nsale tʼatsʼe je Énle Niná. Nga kʼoakisʼin ngotjo koantajani je kjoamakjainle. Saʼnda tsín jngo nó jaʼato nga kisʼenngindá. Kʼoa to jaon sá jaʼato nga precursora koan. Tjen nó 2006 saʼnda ndʼaibi tojo kʼoasʼin tísíxá.

9, 10. 1) Jósʼin ʼyatokoán jmeni xi tjín sonʼnde kʼianga jeʼyaa je xi kixi. 2) Jméni xi kisʼin jngo tsoti, kʼoa jótjín kon ndʼaibi.

⁹ Je xá kʼoa kao tsojmi xi tjínná. Kʼianga kuindá je xi kixi, xi tsonile, nga tosi tonda koa̱njinná xi tʼatsʼe Niná, tsakui nichxin si̱kʼéjnaa je xá xi nʼia ninga tse tao̱n njená. Tobʼelañá, je Pedro kao Andrés, jti̱ tsakʼasjengindá. Tonga nga kʼoakitsole je Jesús nga chjotatjenngile katama, kisikatío xá jebi (Mat. 4:18-20). Tonga alikui xi tsonile nga tjínnele sikatío je xále ngatsʼi xi Énle Niná kotʼaya. Nga̱ tjínnele koa̱njngíʼa yaole kʼoa kao familiale (1 Tim. 5:8). Tonga kʼianga jebe je Énle Niná alikui tikui nʼio tsjoánile kjoandosin jmeni xi tjín sonʼnde. Je Jesús kʼoakitso nga tsín kjoanyiná kʼoéxkoá i̱ Sonʼnde, nga tosa ya ngʼajmi kʼoéjnatjoá je kjoanyiná  (Mat. 6:19, 20). Kataʼyala je choa̱le jngo tsoti.

¹⁰ Kʼianga kjesa fijin skuela je María nʼio tsjoake kʼianga kui xi golf ʼmi síská. Kʼianga secundaria jetíkotʼaya, sa nda sa nda kisiská kʼoa jngoo beca tsakʼaile nga koai ya universidad. Nʼio tsjoake koan nga kisiská, kʼoa kui xi koanmele nga nʼio ngʼa kuicho kʼoa nga tse tao̱n kuinjele. Tonga kʼianga kiskotʼaya je Biblia nʼio tsjoake koan jmeni xi koanjinle kʼoa josʼin tsakasenkao. I kitso: “Kʼianga sa tse sa tse koanjinna jmeni xi tso je Biblia kʼoa kitjenngia jmeni xi tso, sa tsjoa sa tsjoa kisʼe tokoan”. Je María koanjinle nga nʼio ñʼai koa̱nle tsa kʼoakji kuenta sʼin xi tʼatsʼe Niná kʼoa tsa kʼoakji koasjai je tsojmi xi tjín sonʼnde (Mat. 6:24). Kuinga tsín tikisiskáni ninga nʼio tse tao̱n kuinjele tsakai. Kʼoa ndʼaibi, precursora sʼin tísíxá kʼoa kʼoatso nga nʼio tsjoa tjín kon.

11. Kʼianga Énle Niná chotʼayá, jósʼin biyoaa kao je xíngiaa kʼoa kao je miyoná.

¹¹ Josʼin tiyoaa kao miyoná kʼoa kao xíngiaa. Kʼianga kʼoanʼia jmeni xi tso je Biblia, bʼantjaiyaa josʼin biyoaa kao je xíngiaa. Nga̱ je Jesús i kitsole je Jeobá xi tʼatsʼe chjotatjenngile: “Tikatíondatsjai xi totʼatsʼe kjoakixili. Jé énli xi ñaki kjoakixi” (Juan 17:17). Nga “tikatíondatsjai” tso je Biblia kʼoati “tʼaxin tikatiui” sʼin tsoyanile. Kʼianga kui xi kixi tjín kʼoanʼia, tʼaxin biyolee je sonʼnde. Je chjota kjaʼaísʼin bekonná kʼianga kʼoanʼia jotso je Biblia. Ninga tsín mená nga kʼoakoa̱n, tonga je miyoná kʼoa kao je xíngiaa síkjinná kʼoa saʼnda batiochjoa nga Énle Niná chotʼayá. ʼYañá nga toxá kʼoakoa̱nni, nga̱ je Jesús i kitso: “Je xi kontrale chjota, tijeni xi tjío ya ndʼiale” (Mat. 10:36). Tonga kʼoati kitso nga tse kjoanichikontʼain sokóná kʼianga kui fasjee je xi kixi (tʼexkiai Marcos 10:28-30). *

12. Jméni xi kisʼin jngo chjota judío kʼianga tsabe xi tʼatsʼe Niná.

¹² Jngo chjota judío xi Aarón ʼmi, kʼianga sʼa ʼndí kʼoasʼin kisakoyale nga tsín ma nikʼaxkiaa je jaʼaínle Niná. Tonga je Aarón nʼio koanmele nga tsabe jokjoantjínni xi tʼatsʼe Niná. Ñandia kʼianga jngo testigole Jeobá kitsoyale nga je jaʼaínle Niná ño letra tjínle nga én hebreo, kʼoa nga “Jeobá” sʼin faʼatoya. Nʼio tsjoa kisʼe kon kʼoa ki ya yo̱ngo̱le nga kitsoyale je chjota xi nyatítjonle. Tonga ʼndele nga tsjoa sa̱tío kon nga skoe̱ je jaʼaínle Niná, tsakʼéchráʼa kʼoa tsakʼaonsje. Je familiale kʼoati tsín kisasenle. Tonga tsínkui tsakʼéchjoale nga tosi tonda koanle xi tʼatsʼe Jeobá. Kisʼenngindá kʼoa kixi kitʼale je Jeobá jokjitse tsakʼejna. Joni je Aarón, tiyondañá nga kʼoasʼiaan tojmeni xi totʼatsʼe je Énle Niná, ninga kʼoantjaiya josʼin tiyoaa, kʼoa ninga tsín tinda skoe̱konniná je xíngiaa.

13, 14. Kʼianga chotʼayá je Énle Niná, jméni xi machjén nga sʼiaan. Jngo choa̱ tʼejnai.

¹³ Nga kui nikjaʼaitsjeen kʼoa nga kui kʼoanʼia je xi chʼaotjín. Tsa mená kʼoasʼin kjuinkoaa yaoná jotso je Énle Niná, machjén nga si̱kʼantjaiyaa josʼin nikjaʼaitsjeen kʼoa jonʼia. Je Pedro kui kjoafaʼaitsjen jebi kitsjoa: “Joni ʼndíxtindʼé li nitjosonjinlao kjoachi̱nga̱no joni ngasʼa, kʼia nga tjíonjiosa kjoafaʼaitsjenno. [...] Tsje katamao josʼin mangínkao  yaono” (1 Ped. 1:14, 15). Tobʼelañá, ya naxinandá Corinto nʼio tse kjoajndí kisʼe, kʼoa je chjota xi koankjainle je Énle Niná nʼio tsakʼénele yaole nga tsín tikʼoakisʼinni (1 Cor. 6:9-11). Tikʼoasʼinni nichxin xi tiyoaa ndʼaibi, nkjín chjota xi tjíosíkatío je xi jndí tíjna kʼianga tjíobe je Énle Niná. Je Pedro i kitsole je chjotale Cristo: “Jejaʼato [nichxin] nga kʼoakinʼia josʼin koanmele chjota xi li judíojin, kʼia nga tsangínkoaa yaoná ngayije xi chʼao tjín, kao kjoaxintakon, kao kjoachʼi̱, [...] nga tsaʼyaxkón xkóson xi likui tjoʼndená” (1 Ped. 4:3).

¹⁴ Je Devynn kao Jasmine nʼio nkjín nó nga xán tsakʼi. Je Devynn nʼio nda xá kisʼele tsakai, tonga nga xán ʼbi alikui tse male jñani nga síxá. Kʼoa je Jasmine kʼoasʼin ʼyale nga nʼio tsʼen. Ñandia kʼianga ya carretera tsoʼbaya nga chʼi̱, yaa kisatejin jngo ndsʼee kao chjoónle xi misionero ma. Kʼoakitsole nga kuitsoyale Biblia. Nga jejngo xomana jaʼato, je misionero jebi kikonle je Devynn kao Jasmine ya niʼyale, tonga chʼi̱ nga kʼia. Alikuikʼia kʼoasʼin kisikjaʼaitsjen nga koa̱nndosinle je misionero jebi nga saʼnda ya ndʼiale kuichokonle. Tonga nga kichokon ijngokʼale je misionero jebi, kiskotʼaya nga jao kʼoa kisitjoson jmeni xi koanjinle. Saʼnda tsín jan sá jaʼato nga tsín titsakʼini, kʼoa chixankao xínkjín. Kisʼejinle ngatsʼi chjota xi ya tsʼe nga jenda tjíosʼín kʼoa nʼio nkjín xi kʼoati kiskotʼaya.

15. Jméni xi nʼio ñʼai ma kʼale nga síkatío kʼianga kotʼaya je Énle Niná, kʼoa ánni.

¹⁵ Je costumbre kʼoa kao jmeni xi nʼia xi tsín Biblia yʼangini. Tjínkʼa xi choa ñʼai male nga síkatío je costumbrele kʼianga jebe xi tʼatsʼe Niná. Tonga tjínkʼa xi nʼio ñʼai male. Tsakui nichxin kuinga tsín síkatíoni xi totʼatsʼe xínkjín, xi ñatjen síxá kʼoa kao xi miyole mani. Kʼoa ngisaa tiñʼai mangánile nga tsín tisʼuí bʼasjenile je ʼndíkʼienle josʼín je xínkjín (Deut. 14:1). Je choa̱le ndsʼee xi nʼiojin kjima koasenkaoná nga kʼoati sʼiaan tsanda ñá. Kataʼyala jokisʼin kʼa je chjota xi tsakatio ya naxinandá Éfeso kʼianga siglo 1.

16. Jméni xi kisʼin je chjota xi Éfeso tsʼe kʼianga jetsabe je Énle Niná.

¹⁶ Ya naxinandá Éfeso nʼio tsaʼyale nga kjoabʼenda koanle je chjota xi ya tsʼe. Jméni xi kisʼin je chjota xi ya tsʼe kʼianga jechjotale Cristo koan. Je Biblia itso: “Nkjín xi kʼoasʼin koanle je kjoachʼanacha jaʼaikao librole tjíobaká ngixko̱n ngatsʼi. Tsakʼasje kuenta jo tjín chjíle xo̱n xi tsakaká. Koansjaile nga ñachante jmi chjíle ngayije. Kʼoasʼin nga nʼio nda tsangason je énle Nainá [Jeobá], kʼoa nʼio kisʼele nganʼio” (Hech. 19:19, 20). Je chjotale Cristo jebi tsakaká je librole ninga nʼio tse tao̱n tsakʼéngi, tonga tsee kjoanichikontʼain kitsjoale je Jeobá nga kʼoakisʼin.

17. 1) Jméni xi tinikatioá nga tiʼyaa je xi kixi. 2) Jméni xi chótʼayajiaan ya kjoaʼmiya xi ijngo.

¹⁷ Jméni xi tinikʼéjnai nga Énle Niná tichotʼayai. Ngatsʼiñá nga tjínnele si̱kʼayaa je nichxinná nga sʼe̱saná je kjoankjíntokon xi tsʼe Niná. Tjínkʼa xi tjíosíkatío je tsojmi xi tjínle kʼoa xi tjíochókjoajinle je kjoa xi faʼatojin xi totʼatsʼe nga batiochjoa je xínkjín kʼoa kao miyole. Kʼoati nkjín xi síkʼantjaiya jokjoan kʼoa josʼín tsakai, kʼoa síkatío je costumbre xi tsín Énle Niná yʼangini. Tojme kjoani xi kuitjátojiaan, alikui jao tjínná nga ngisa chjíle je xi kixi tikʼoajinni tojmeni. Kʼoa je xi ngisa chjíle kuinga miyoná mani je Jeobá. Kʼianga ʼyaa josʼin basenkaoná je xi kixi, alikuijin kuitso tokoán si̱kʼéjnaa. Tonga, ánni nga síkatío kʼani je Énle Niná. Kʼoa jmé xi koasenkaoná nga tsín kʼoakatamaa. Yaa kjoaʼmiya xi ijngo kuitsoyaná xi tʼatsʼe jebi.