Kʼianga tojeme ni̱kʼien je Jesús kʼoakitsole je chjotatjenngile nga tsínkui katabásjai nga nʼio kataʼyale. I kitsole: “Je chjotatítjonle chjota xi li judíojin síkʼéyongi chjotale tʼatsʼe kjoatéxomale, kʼoa je xi batéxomale, jé ní xi chjotanda kʼoaʼmile. Tonga jonbi ali kuijion” (Luc. 22:25, 26).

ʼYáni xi chjotanda kitsole Jesús. Tojosʼin faʼaitʼa kʼa jñani kichjitʼa je jaʼaínle chjota, je tao̱n kʼoa kao je xo̱n xi kʼia kichji, kʼoatso nga je chjota griego kao romano tsabexkón kʼa je chjotaxá kao je chjota xi xángʼa kisʼele je xi chjotanda kitsole (kʼianga én griego, euerguétes kʼoa tsa evérgetes ʼmi). kuinga kʼoasʼin tsaʼyanile nga nda tsakinyakao je naxinandá.

Nkjín chjotaxá xi kʼoasʼin tsaʼyale, jolani je Tolomeo III kao Tolomeo VIII, xi chjotaxá koan ya Egipto. Kʼoatisʼin tsaʼyale je chjotaxá xi ya Roma tsakatio jolani Julio César kao Augusto, kao je rey xi tsakatéxoma ya Judea, jolani Herodes el Grande. Tsakui nichxin kuinga kʼoatsakʼinnile nga trigo kitsjoale naxinandá nga kisʼe kjinrá kʼoa nga najño kitsjoale xi ma̱ tjío.

Je chjota xi Alemania tsʼe, xi Adolf Deissmann tsakʼin xi Biblia kiskotʼayason, kʼoakitso nga nʼio tsaʼyale je én xi chjotanda tso, kitso: “Kjitʼaa nangi koa̱nsjainá tsa jngo siento koya kjoásjee josʼin koanchjén én jebi”.

Ánni kʼoakitsonile Jesús je chjotatjenngile nga tsín kʼoakoa̱nkjoan jokjoan je chjota xi kinchja̱ni. A kui xi kitsonile nga tsín katamandosinle tʼatsʼe je chjota xi tiyani tsʼe. Mai, kui xi koanmele nga ni̱ma̱le kjuinroajinni nga koako kjoanda.

Kʼianga tsakʼejna Jesús, je chjotanyiná kitsjoanganʼioní jñani kisiská je chjota kʼoa tsa jmesani xi koan, tsakʼéndaa je parque kao yo̱ngo̱ kʼoa nʼiosa nkjín koya jmeni xi kisʼin. Tonga ali tsakuijin nga nda chjota koan nga kʼoakisʼinni, tokui xi koanmele nga tsakʼasjengʼa je chjota, nga nʼio kataʼyale kʼoa tsakuije̱ nga nkjín chjota tsjoánganʼiole. Jngo xo̱n xi i̱ tso: “Ningalani tsakatio kʼa xi ñaki kʼoatjío kon nga kitsjoa jmeni xi kisʼele, tonga me tongatsʼi nga to yaole kini”. Kui xi koanmele Jesús nga je chjotatjenngile tsín ngʼakon katama kʼoa nga tsín to yaole katafini.

Nga je jaʼato choa nó je pastro Pablo kʼoati kʼoakitsole je chjotale Cristo xi ya tsʼe Corinto nga nʼio tjínle kjoandosin kʼianga ñaki kʼoatjín tokoán kʼianga tjotʼaa. I kitsole: “Nga jngójngó katatsjoá josʼin kosonnile ni̱ma̱le, ali kao kjoabajin, nikao kjoanʼiojin, nga̱ Niná tsjoake je xi kao kjoatsjoa tsjoá” (2 Cor. 9:7).