NICHXIN kjoatse, jngo xi choʼnda ma jé kisʼenentsja nga kisikuinda jngo niʼya kʼoa tsakuije̱ tsojmi xi tjínle xi kjaʼaí chjota.

Kʼianga choʼnda koan José ya Egipto, je tile Jacob, je naile “jé tsakánele je ndʼiale, kao ngayeje jmeni xi tjínle” (Gén. 39:2-6). Nga koanskanni, kʼianga chjotatítjon koan je José ya Egipto, kʼoati kisʼele choʼnda xi tsakánentsja je ndʼiale (Gén. 44:4).

Kʼianga nichxinle Jesús, je chjota xi tse nangi kisʼele alikui ya tsakatio jñani kjiole nangi. Kuinga choʼnda kisʼenile xi tsakánentsja je nangile kʼoa jé kisikuinda josʼin kisixá choʼnda xi ngikʼa.

Jmé xi tjínnele kisʼin jngo choʼnda nga koan je kisʼenentsja je ndʼiale naile. Jngo chjota xi Roma tsʼe xi Columela tsakʼin xi tsakʼejna nga siglo 1, kʼoakitso nga je xi choʼnda koan tjínnele nda koanle kisixá. Kʼoati tjínnele nda chjota koan, nga tsín totaon tsabe je choʼnda xi ngikʼa. Je Columela kʼoati kitso nga je choʼnda jebi alikui tjínnele kʼoasʼin kisikjaʼaitsjen nga nʼio nda male síxá, tosaa tjínnele kiskotʼaya jmeni xi kje majinle.

Ya Biblia kui choa̱ síchjén xi tʼatsʼe choʼnda kʼianga kui nchja̱ni xá xi ma ya jinjtín. Tobʼelañá, je pastro Pedro kʼoakitsole je chjotale Cristo josʼin nga Niná tsakakóle kjoanda nga kʼoatisʼin katabinyakaongañá xínkjín (1 Ped. 4:10).

Je Jesús kʼoati kui choa̱ xi tsʼe choʼnda kisichjén kʼianga tsakʼéyanajmí jmeni xi faʼaitʼa ya Lucas 16:1-8. Xi ijngosani, kʼianga kui kinchja̱ni Jesús jmeni xi koa̱n nga tojeme kuichokjetʼa nichxin, kʼoakitsole je chjotale nga koasennda jngo “choʼnda xi nʼiotʼakon, xi nda be xá”. Je xá xi sʼin choʼnda jebi kuinga kuinyakao chjotale Cristo nga tsjoále xi tʼatsʼe Niná tínroani (Mat. 24:45-47; Luc. 12:42). Nʼio tsjoa satío tokoán kʼianga síkasénná choʼnda jebi je xo̱n xi Énle Niná yʼangini kʼoa xi tíbʼabíson jngo tjíjtsa Sonʼnde nga tosi tonda nʼio katasatío je kjoamakjainná.