1, 2. 1) Jmé xi basenkaoná nga chókjoajinná je kjoa xi bitjatojiaan nga nyaon nyaon. Tʼeyanajmí. 2) Jmé xi chótʼayajiaan i̱ kjoaʼmiya jebi.

KʼIANGA kichokjoajinná jngo kjoa, tsakui nichxin kʼoatsakixoán nga tsín totsaan nganʼio kinichjén. Tsakui nichxin kui kʼoabixónñá nga chókjoajinná ningalani táo chʼin bʼetʼaná kʼoa tsa jngo xíngiaa kʼienje̱. Chókjoajinná je kjoa xi bitjatojiaan nga nyaon nyaon xi totʼatsʼe nga je nganʼiotsjele Jeobá basenkaoná nga tsjoáná “je nganʼio xi nʼio tse” (2 Cor. 4:7-9).

² Kʼoati kui nganʼiotsjele Niná machjénná nga chókjoajinná jme xi chon sonʼnde (1 Juan 5:19). Xi ijngosani, tjínnele kuixkantʼakoaa “ngatsʼi ntjao̱ xi chʼao sʼín” (Efes. 6:12). Kuinga jao koya tjínni xi chótʼayajiaan josʼin basenkaoná je nganʼiotsjele Niná. Xijekoa̱n, kui chótʼayajiaan jme xi tjínnele sʼiaan nga koasenkaoná.

3. Jósʼin basenkaoná je nganʼiotsjele Niná kʼianga chókjoajinná je kjoa xi bitjatojiaan.

³ Jé nganʼiotsjele Niná tsjoánganʼioná nga bitjosonná je xá xi kjinená ninga kjoa bitjatojiaan. Ninga kjoa jaʼatojin je pastro Pablo, kʼoakitso nga tosi tonda kisixále Jeobá xi totʼatsʼe “je nganʼiole Cristo” (2 Cor. 12:9). Xi koanjaoni kʼa nga kjin kikakóyason, nʼio tsakʼénele yaole nga kitsoyason kʼoa kʼoati kisixá nga tsakajngiʼa yaole. Kʼianga ya naxinandá Corinto kicho, yaa tsakʼejnani ya ndʼiale Áquila kao Priscila, xi ndʼianajño kisinda. Nga kʼoati kui xá kisʼin Pablo nkjín nichxin ya kisixákao nga xki̱ xomana (Hech. 18:1-4). Jé nganʼiotsjele Niná kitsjoanganʼiole nga kui xá kisʼin kʼoa nga kitsoyason.

4. Tojo tso 2 Corintios 12:7b-9, jmé kjoa xi jaʼatojin je Pablo.

 ⁴ (Tʼexkiai 2 Corintios 12:7b-9). * Jmé xi kinchja̱ni je Pablo nga “jngo naʼyá” sénsʼenjin yaona kitso. Nʼiojin aon koa̱n yaoná kʼiatsa jngo naʼyá sa̱sénsʼenjin. Kui xi kinchja̱ni Pablo nga kjoañʼai tsakjaʼá. Kʼoa kʼoakitso nga “jngo choʼndale Satanás” xi tosi tonda kjoañʼai kisikjaʼá. Tsakui nichxin likui je Na̱i kao na̱i xi ndajin xokisikao je Pablo nga kjoañʼai tsakjaʼá, xi ya mangóson joma kʼianga naʼyá sasénsʼenjin yaoná. Tonga kʼianga tsabe je Na̱i kao na̱i xi ndajin nga kjoañʼai tífaʼá je Pablo, tsakui nichxin ngisa tinʼio kiskanisʼenjinngáni naʼyá xi sénsʼenjin yaole Pablo, xi tsonile nga ngisasa tse kjoañʼai kisikjaʼá. Jmé xi kisʼin je pastro Pablo.

5. Jósʼin tsakakó Jeobá nga kinrʼoé kʼianga tsakʼétsʼoale je Pablo.

⁵ Je Pablo koanmele nga tsín tikui kjoa sʼe̱nile. I kitso: “Jan kʼa jetsakʼetsʼoale Nainá [Jeobá] nga kuitjoxinna”. Ninga nʼio tsakʼétsʼoa je Pablo alikui kitjoxinle je kjoañʼai. A kui xi tsonile nga tsín kinrʼoé je Jeobá nga tsakʼétsʼoale. Mai. Je Jeobá kinrʼoé je kjoabʼetsʼoale Pablo. Ningalani tsín tsakjaʼáxinle je kjoañʼai xi tíjnajin, tsakasenkao nga kichokjoajinle. Kʼoa i kitsole: “Je nganʼiona ngisa nʼio nda matsenni kao kjoaʼindali” (2 Cor. 12:8, 9). Nga je Jeobá tsakasenkao Pablo nda kisʼe kon (Filip. 4:4-7).

6. 1) Jósʼin koasenkaoná je Jeobá kʼianga kʼoétsʼoalee. 2) Jósʼin tsjoánganʼioná jme xi tso je texto xi faʼaitʼa i̱ párrafo jebi.

⁶ A sakʼoaa kʼoatinʼia tsanda ñá jokisʼin je Pablo, nga kui nijélee je Jeobá nga katabitjoxinná jmeni xi kjoañʼai síkjaʼáná. Ninga nʼio bʼetsʼoalee je Jeobá, tsa tsín bitjoxinná kʼoa tsakui nichxin saʼnda ngisasa tse kjoañʼai tichjaʼá, tsakui nichxin kʼoasʼin nikjaʼaitsjeen nga tsín tindasʼin tiyoñá ngixko̱n Jeobá. Tsa kʼoakjimaa, si̱kjaʼaitsjenjiaan je choa̱le Pablo. Tojosʼin kinrʼoé Jeobá nga tsakʼétsʼoale, kʼoati kjuinrʼoéná tsanda ñá. Ningalani tsín kjoaʼaxinná je kjoa xi tibitjatojiaan, jé nganʼiotsjele Niná tsjoánganʼioná nga chókjoaná (Sal. 61:3, 4). Tsakui nichxin tse kjoa kuitjátojiaan, tonga je Jeobá alikuikʼia tsjiónkonná (2 Cor. 4:8, 9; Filip. 4:13, TNM).

7, 8. 1) Jósʼin mangóson je nganʼiotsjele Niná kao je ntjao̱. 2) Jósʼin tsakʼéyanajmí Pedro tʼatsʼe josʼin síxá je nganʼiotsjele Niná.

⁷ Jósasʼin basenkaoná je nganʼiotsjele Niná. Tojo ma jngo chitso kʼianga je ntjao̱ basenkao nga nda bichó ya ndainandá ningalani nʼio síkjan je ndáchikon, tikʼoasʼinni je nganʼiotsjele Niná, kui xi basenkaoná nga chókjoajinná je kjoa xi bitjatojiaan ndʼaibi nga koa̱n kuiyoaa i̱ Sonʼnde kʼianga jeʼndenaxó koa̱n.

⁸ Nga jti̱ tsakʼasjengindá je Pedro, nʼio nda tsabe xi tʼatsʼe chitso. Tsakui nichxin kuinga kui én kisichjénni josʼin bʼemajin nandá je chitso nga kitsoya josʼin síxá je nganʼiotsjele Niná. I kitso: “Nga̱ nichxin kotse jaʼai je én xi tsakáyakonná, likuijin nga kʼoasʼin koanmele chjotasonʼnde. Tosa kinchja̱ya je chjota xi tsje tjío jatʼatsʼe Niná, josʼin kisiʼisenjin kjoafaʼaitsjenle je Espíritu Santo”. Je én xi “kisiʼisenjin” tso, kʼianga én griego “fikao” sʼin tsoyanile (2 Ped. 1:21).

9. Jmé xi kinchja̱ni je Pedro kʼianga kui én xi “fikao” tso kisichjén.

⁹ Jmé xi kinchja̱ni je Pedro nga kui én xi “fikao” tso kisikʼaxki̱. Je Lucas, xi kiski je libro xi tsʼe Hechos, kʼianga kui én griego kisichjén  kʼoati kui kinchja̱ni tʼatsʼe joma jngo chitso nga ntjao̱ fikao (Hech. 27:15). Jngo chjota xi tʼatsʼe Biblia kotʼayason, kʼoakitso nga kʼianga kui kinchja̱ni je Pedro nga je nganʼiotsjele Niná tsakándiaale je chjota xi kiski Biblia, kui én kisichjén josʼin fijin nandá je chitso. Kui xi kitsonile je Pedro, tojo ma je chitso nga je ntjao̱ fikao, kʼoatisʼinni, jé nganʼiotsjele Niná tsakándiaale je profeta kao chjota xi kiski Biblia nga kitjosonle je xá xi kisʼenele. Je chjota jebi i kitsosa: “Je profeta yaa koanngóson joma kʼianga tjoʼai je najño xi tsjenya je chitso”. Jé Jeobá kitsjoale nganʼiotsjele. Kʼoa je chjota xi kiski Biblia kʼoakisʼin josʼin tsakándiaale je nganʼiotsjele Niná.

10, 11. Jñánile xi jao koya tjínnele kʼoasʼiaan nga koasenkaoná je nganʼiotsjele Niná. Jngo choa̱ tʼejnai.

¹⁰ Nichxin xi tiyoaa ndʼaibi, alikui tikʼoasʼin síchjénni je nganʼiotsjele Niná kʼianga librole Biblia katachji. Tonga tojo kui síchjén nga bándiaale je choʼndale. Je Jeobá tojo títsjoá je nganʼiotsjele. Nga koasenkaoná je nganʼiotsjele Niná tjínnele kʼoasʼin kjuintjenngiaa josʼin koandiaaná. Jmé xi koa̱n sʼiaan.

¹¹ Si̱kjaʼaitsjenla choa̱ jebi. Je chjota xi chitso síxákao, tsa mele nga koasenkao je ntjao̱ nga koaikao je chitso, jao koya tjínni jme xi sʼín. Xi títjon, yaa tjínnele koaikao je chitso jñani kifaʼa je ntjao̱, nga̱ tsín josʼin sikjanni je chitso tsa tsín ya koaikao. Xi majaoni, tjínnele nga skóʼai je najño xi tjenya je chitso, nga̱ tokʼoasʼin nga koa̱n koaikao je ntjao̱. Tikʼoasʼinni, tokʼiaa nga koa̱n tosi tonda si̱xálee je Jeobá tsakui nganʼiotsjele koandiaaná. Tsa mená nga kui koandiaaná, jao koya tjínni xi sʼiaan. Xi títjon, kui kʼoasʼiaan je xá xi je nganʼiotsjele Niná bándiaale. Xi majaoni, kʼoénelee yaoná jokji tjen kʼoakoa̱nná nga si̱tjosoán je xále Niná (Sal. 119:32). Tsa kʼoasʼiaan, jé nganʼiotsjele Niná koasenkaoná nga tosi tonda je Jeobá si̱xálee ningalani kjoa kuitjátojiaan kʼoa ninga tjín xi koatiochjoaná, kʼoa kui jebi xi koasenkaoná nga koa̱n kuiyoaa nga jeʼndenaxó koa̱n i̱ Sonʼnde.

12. Jmé xi chótʼayajiaan xi fisani.

 ¹² Jao koya jekaʼyaa josʼin basenkaoná je nganʼiotsjele Niná. Tsjoánganʼioná kʼoa basenkaoná nga kixi mangíntʼalee Niná kʼianga kjoa bitjatojiaan. Kʼoati basenkaoná nga tosi tonda je Jeobá nixálee, nga̱ kui xi koasenkaoná nga koa̱n kuiyoaa ngantsjai nichxin. Kʼoa xi fisani, ñola koya chótʼayajiaan jme xi tjínnele sʼiaan nga koasenkaoná je nganʼiotsjele Niná.

13. 1) Tojo tso 2 Timoteo 3:16, 17, jósʼin koasenkaoná jme xi tso je Énle Niná. 2) Jmé xi tjínnele sʼiaan ñá.

¹³ Xi títjon, chótʼayá je Énle Niná (tʼexkiai 2 Timoteo 3:16, 17). * Kui nganʼiotsjele Jeobá kisichjén nga tsakándiaale je chjota xi kiski Biblia, nga̱ kui kjoafaʼaitsjenle Jeobá tsakʼétʼaxo̱n. Kʼianga bʼexkiaa je Énle Niná kʼoa nikjaʼaitsjenjiaan jotso, faʼasʼenjin kjoafaʼaitsjenná kʼoa bichókajin ni̱ma̱ná. Je kjoafaʼaitsjen jebi, kui xi basenkaoná nga kʼoasʼin mangínkoaa yaoná josʼin mele Niná (Heb. 4:12). Tonga nga koasenkaoná je nganʼiotsjele Niná, tjínnele nga si̱kʼayaa nichxin nga chótʼayá je Biblia kʼoa si̱kjaʼaitsjenjiaan jme xi bʼexkiaa. Tsa kʼoasʼiaan, kui je Énle Niná koandiaale josʼiaan kʼoa jme xi kuixoán.

14. 1) Ánni kʼoabixónsíñá nga nganʼiotsjele Jeobá bándiaaná kʼianga satíoná je kjoajtín. 2) Jmé xi koa̱n sʼiaan nga koasenkaoná je nganʼiotsjele Niná kʼianga mangián je kjoajtínná.

¹⁴ Xi majaoni, jchaxkoán je Niná kao ndsʼee (Sal. 22:22). Kui je nganʼiotsjele Jeobá bándiaaná kʼianga satíoná je kjoajtín (Apoc. 2:29). Ánni nga kʼoabixónsíñá. Kʼianga satíoná kjoajtín kui nganʼiotsjele Niná síjé je ndsʼee xi bʼéjna kjoabʼetsʼoa, kui jndaa je kjoanda xi ya Énle Niná yʼangini, kʼoa ngayeje xi noʼyá kʼianga tsjoá kjoanokjoaya je ndsʼee yaa Énle Niná yʼangini, kʼoa je ndsʼee xi nchja̱ya kao nganʼiotsjele Niná kitjoejinni nga xá tjínle ya jinjtín. Kʼoa kʼoati kui je nganʼiotsjele Niná binyakao je tichjaa kʼianga faʼachoya ya jinjtín josʼin sakóyason. Tsa mená nga koasenkaoná je nganʼiotsjele Niná, tjínnele tongini chótʼayajiaan jme xi kjoaʼa ya kjoajtínná, ánni nga koa̱n kʼoaiñá je énná. Tsa kʼoasʼiaan, koasenkaoná je nganʼiotsjele Niná nga kjuian je kjoajtín, tojosʼin basenkao ntjao̱ je chitso.

15. Jmé xi tjínnele sʼiaan nga koasenkaoná je nganʼiotsjele Niná nga kʼuínyasoán.

¹⁵ Xi majanni, kuitjokʼinyasoán. Kʼianga bʼexkialee Biblia je chjota nga ʼmiyasoán kʼoa nga bʼailee estudio, bʼaiʼndeñá nga je nganʼiotsjele Niná basenkaoná (Rom. 15:18, 19). Tonga tjínnele nga kjitʼa kuitjokʼinyasoán kʼoa si̱chjén je Biblia nga koasenkaoná je nganʼiotsjele Niná. Je xi koasenkaoná nga kʼuínyasoán kuinga si̱chjén je kjoafaʼaitsjen xi tsjoáná Xo̱n xi tjítʼa jme xi chotʼayá ya kjoajtín: Tʼatsʼe chjotale Cristo kao Xále Niná.

16. Jósʼin koa̱n si̱jélee Jeobá je nganʼiotsjele.

¹⁶ Xi mañoni, kʼoétsʼoalee Jeobá (Mat. 7:7-11; Luc. 11:13). Kʼoati koa̱n si̱jélee je Jeobá nganʼiotsjele kʼianga kʼoétsʼoalee. Alikui jme xi kʼoechjoa nga kuichokatʼale Jeobá je kjoabʼetsʼoaná, ni ndoyájinla kʼoa ni jejinla Na̱i, kʼoa alikui jme xi kʼoechjoa nga tjoéná je nganʼiotsjele Niná (Sant. 1:17). Jósʼin koa̱n kʼoétsʼoaa nga koasenkaoná je nganʼiotsjele Niná. Nga jchaa xi tʼatsʼe jebi, kuila chótʼayajiaan tʼatsʼe je kjoabʼetsʼoa xi toya Evangelio xi tsʼe Lucas faʼaitʼa. *

17. Jmé xi bakóyaná tʼatsʼe kjoabʼetsʼoa je choa̱ xi tsakʼéjna Jesús xi faʼaitʼa ya Lucas 11:5-9, 13.

¹⁷ (Tʼexkiai Lucas 11:5-9, 13). * Jmeni xi kitso je Jesús kui tsoya josʼin tjínnele si̱jé je nganʼiotsjele Niná. Kʼianga kisikʼéjna choa̱ je Jesús tʼatsʼe chjota xi nioxtila kisijéle miyole, kʼianga tosi tonda kisijé chaan tsakʼaile je nioxtila. Alikui kini ninga jebasennitje̱n nga kisijéle nganʼio je miyole (chótʼai je nota xi tsʼe estudio jñani “persistencia atrevida” tso, xi faʼaitʼa Xo̱n xi tjítʼa jme xi chotʼayá ya kjoajtín: Tʼatsʼe chjotale Cristo kao Xále Niná xi tsʼe sá julio nó 2018). Ánni nga kui choa̱ jebi kisichjénni Jesús nga kitsoya josʼin tjínnele kʼoétsʼoaa. I kitso: “Tijáo, kʼoa kʼoaino, tijnyísjao, kʼoa koa̱nsjaino, tikjanetʼao xo̱ntjoa, kʼoa tjóʼaino”. Tsa mená nga tsjoáná Niná je nganʼiotsjele, tjínnele nga tosi tonda kʼoétsʼoaa alikui kjoájñálee.

18. Ánni nga tsín jao tjínni tokoán nga tsjoáná Jeobá je nganʼiotsjele.

¹⁸ Je choa̱ jebi kʼoati basenkaoná nga majinná ánni nga tsjoániná Jeobá je nganʼiotsjele. Je chjota xi kinchja̱ni Jesús kui xi koanmele nga nda sisinle je chjota xi kichokonle. Nga tsínle jme xi kitsjoale, jé chjotandaindʼiale kisijéle nioxtila, kʼoa je Jesús kʼoakitso nga chjota jebi chaan tsakʼaile nioxtila nga̱ tosi tonda kisijé. Jmé xi bakóyaná jebi. Kʼiatsa jngo chjota xi basenkao je chjotandaindʼiale xi nganʼio machjénle, a tsí ngisa tíjnanda je Nʼainá xi tíjna ngʼajmi nga tsjoále je nganʼiotsjele je xi ngotjo ngosa síjénile. Alikui jao tjínná nga tsjoáná Jeobá je nganʼiotsjele kʼianga kʼoétsʼoalee (Sal. 10:17; 66:19).

19. Ánni nga tjínjngoni tokoán nga chókjoajinná tojme kjoa xi kuitjátojiaan.

¹⁹ Tjínjngoo tokoán nga chókjoajinná ninga tosi tonda kʼoetʼaná je Na̱i. Ánni. Kuinga jao koya tjínni josʼin basenkaoná je nganʼiotsjele Niná. Xi títjon, tsjoánganʼioná nga chókjoajinná jme kjoa xi bitjatojiaan. Kʼoa xi majaoni, kui xi koasenkaoná nga tosi tonda si̱xálee je Jeobá saʼnda nga jeʼndenaxó koa̱n i̱ Sonʼnde. Kuinga tiyondañá nga kʼoasʼiaan jmeni xi machjén ánni nga koasenkaoniná je nganʼiotsjele Niná.