KJOAʼMIYA XI CHOTʼAYA 48
Si̱jngoaa je xá xi bʼetsʼiakoaa
“Tikjetʼao je xi nʼiao” (2 COR. 8:11).
KJOAJNDA 35 Kui kuenta sʼiaan xi ngisa nʼio chjíle
XI TÍNCHJA̱NI *
1. Jmé xi tsjoáʼndená je Jeobá nga nʼia.
JE Jeobá tsjoáʼndená nga ñá chjoéjiaan jmeni xi mená sʼiaan. Bakóyaná nga koa̱nná nda chjoéjiaan jme xi sʼiaan kʼoa basenkaoná nga bitjosonná kʼianga kui chjoejiaan jme xi sasénle (Sal. 119:173). Nga mangíntjenngiaa je kjoafaʼaitsjen xi tsjoá je Biblia basenkaoná nga kui xi ndatjín chjoejiaan (Heb. 5:14).
2. Ningalani bʼendajiaan jmeni xi sʼiaan, jmé xi ñʼai ma sakʼoaná.
2 Ningalani bʼendajiaan jmeni xi sʼiaan, tsakui nichxin ñʼai maná nga bitjosonná. Tobʼelañá, tsa jngo ti xi kʼoasʼin bʼéndajin nga kʼoexkia ngakjijngo Biblia, tsakui nichxin jao jan xomana kʼoasʼin bʼéxkia josʼin bʼéndajin, tonga xijemani tsín tikʼoasʼínni. Tsa jngoje̱ tichjaa xi mele nga precursora sʼin sixá, tonga tsakui nichxin tokʼoatso tonga tsínni kʼoasʼín. Tobʼelañá, tsa je xi chjotajchínga sʼin tjío kʼoasʼin bʼéndajin nga koaisíxatʼa je ndsʼee nga tsjoánganʼiole, kʼoa tonga tsínni ʼya xi fisíxatʼa je ndsʼee nga jefaʼato sá. Ningalani kjaʼaí kjaʼaínile jmeni xi bʼendajiaan, tonga tsínni kʼoasʼin bitjoson. Kʼoati kisʼin je chjotale Cristo xi Corinto tsʼe kʼianga siglo 1. Kataʼyala jmé kjoafaʼaitsjen tsjoáná jokisʼin.
3. Jmé xi tsakʼéndajin je chjotale Cristo xi Corinto tsʼe, tonga jmé xi koan.
3 Kʼianga nó 55, je chjotale Cristo xi Corinto tsʼe nʼio tjínle kjoandosin jme xi tsakʼéndajin nga̱ kisʼejinle nga ma̱ tjío je chjotale Cristo xi Jerusalén kao xi Judea tsʼe. Kʼoa kʼoati kisʼejinle nga tsakʼéndajin je jtínle chjotale Cristo jñani xin nga kuinyakao je ndsʼe̱. Nga nda chjota koan, koanmele kitsjoanganʼio kʼoa jé pastro Pablo kiskonangile jme xi koa̱n sʼin. Kʼoa je pastro Pablo kitsjoale kjoafaʼaitsjen kʼoa jé Tito tsakánele nga kuinyakao (1 Cor. 16:1; 2 Cor. 8:6). Tonga nga jejaʼato sá, kisʼejinle Pablo nga tsínni jme xi kisʼin. Kʼianga jetjíonda je jtín xi ngikʼa nga koaikao ya Jerusalén jmeni xi tsakatíonda, tsakui nichxin je chjotale Cristo xi Corinto tsʼe kjeni jme xi tjíondajinle xi koaikaole ndsʼe̱ (2 Cor. 9:4, 5).
4. Tojo tso 2 Corintios 8:7, 10, 11, jmé xi kitsole Pablo je chjotale Cristo xi Corinto tsʼe nga katasʼín.
4 Je chjotale Cristo xi Corinto tsʼe ndatjín jme xi tsakʼéndajin, kʼoa je Pablo kʼoakitsole nga ndatjín nga kuinyakao je ndsʼe̱ kʼoa nga nʼio tjío je kjoamakjainle. Tonga kʼoati kitsole nga katasítjoson jme xi tsakʼéndajin nga sʼin (tʼexkiai 2 Corintios 8:7, 10, 11). * Jokoan je chjotale Cristo jebi, kui bakóyaná nga tjínnele kʼoénelee yaoná nga si̱tjosoán jme xi bʼendajiaan.
5. Jmé xi chótʼayajiaan i̱ kjoaʼmiya jebi.
5 Tojo koan je chjotale Cristo xi Corinto tsʼe, tsakui nichxin kʼoati ñʼai maná nga nitjosoán jmeni xi bʼendajiaan nga chjotajée maa kʼoa nga tsínni ndi̱to̱n nitjosoán. Kʼoa sakʼoa tjín xi bʼetʼaná nga tsínni bitjosonná jme xi bʼendajiaan (Ecl. 9:11; Rom. 7:18). I̱ kjoaʼmiya jebi, kui kjoachjonangi jebi chótʼayajiaan: Jmé xi koasenkaoná nga nda chjoéjiaan jme xi sʼiaan. Ninga jekabʼendajiaan jme xi sʼiaan, jmé xi koasenkaoná nga si̱kjaʼaitsjenjin ijngokʼá tsa kʼoasʼiaan kʼoa tsa mai. Kʼoa jmé xi koasenkaoná nga kuitjosonná jme xi bʼendajiaan.
NGA KJESA BʼENDAJINJIÁN JME XI SʼIAAN
6. Kʼiáni nga koa̱n si̱kʼantjaiyaa jme xi sʼiaan.
6 Tjín jmeni xi nʼio tjínle kjoandosin xi tsínkʼia si̱kʼantjaiyaa. Tobʼelañá, alikui si̱kʼéjnaa nga je Jeobá tinixálee kʼoa kixi kjuintʼalee ngantsjai je xi chixankoaa (Mat. 16:24, TNM; 19:6). Tonga tjín jmeni xi koa̱n si̱kʼantjaiyaa, nga̱ bʼantjaiyaa josʼin tiyoaa kʼoa jmeni xi ma. Jmé xi koasenkaoná nga koa̱nná nda chjoéjiaan jme xi sʼiaan.
7. Jmé xi koa̱n si̱jélee je Niná, kʼoa ánni.
7 Si̱jélee Niná kjoachjine. Jé Jeobá xi kʼoasʼin koanmele nga i̱ tso xi kiski je Santiago: “Tsa jngo xi jon xi chale kjoaʼisentakon, katasíjéle Niná, je xi kjaínga tse tsjoákjoatjaole ngatsʼi” (Sant. 1:5). Ngatsʼiñá nga machjénná kjoachjine. Kuinga machjénsíni nga je Jeobá si̱nʼiotʼaa kʼianga jme xi chjoejiaan kʼoa tsa kʼiaje̱ nga si̱kjaʼaitsjenjin ijngokʼá tsa koa̱n si̱kʼantjaiyaa jme xi jekabʼendajiaan. Tsa kʼoasʼiaan, jé Jeobá koasenkaoná nga nda chjoéjiaan jme xi sʼiaan.
8. Jósʼin tjínnele kuiyotsʼinyaa kʼianga kjesa bʼendajinjián jmeni xi sʼiaan.
8 Nda kuijnatsʼinyaa. Kjoásjaiyaa jotso je Énle Niná, kʼoéxkiaa je xo̱n xi síkasénná je naxinandále Jeobá kʼoa kʼoéyanajmílee jmeni xi mená sʼiaan jngo chjota xi ninʼiotʼaa (Prov. 20:18). Machjén nga kʼoasʼiaan kʼiatsa si̱kʼantjaiyaa jme xá xi sʼiaan, tsa xin ʼnde kjuinkiyoaa kʼoa tsa jme xi chótʼayá nga kuijnyíʼaa yaoná ánni nga tosi tonda si̱xánilee je Jeobá.
9. Jósʼin koasenkaoná nga ñaki ni̱ma̱ná kjuinroajinni jmeni xi sʼiaan.
9 Si̱kjaʼaitsjenjiaan ánni nga kʼoasʼiansíñá tsa jmeni. Je Jeobá nʼio mandosinle ánni nga kʼoanʼiañá tsa jmeni (Prov. 16:2). Je Jeobá kui xi mele nga ñaki ni̱ma̱ná katanroajinni jmeni xi sʼiaan. Kuinga nʼio machjénsíni nga tsín tiñá chʼa̱nachanilee yaoná kʼoa tsín kjaʼaí xi chʼa̱nachalee kʼianga chjoéjiaan jmeni xi sʼiaan. Tsa tsín ni̱ma̱ná kjuinroajinni jmeni xi sʼiaan, tochale tsín kuitjosonná jme xi tibʼendajiaan. Tobʼelañá, tsa jngo ti xi precursor sʼin sixá, tonga nga jefi nichxin, tsín bichótjenngi jotjín hora tjínnele sikʼasʼen kʼoa tsín titsjoa sʼeni kon. Ánni nga kʼoamani. Yaa nroani ánni nga precursor sʼin kisixáni. Nga tosʼa tsakʼétsʼiakao, a kui xi koanmele nga koayatsjoa ni̱ma̱le Jeobá axo kuinga kʼoakisʼinni nga mele tsjoa sa̱tío kon je xijchále kʼoa tsa ʼyasani xi kjaʼaí.
10. Jmé xi machjén nga sʼiaan tsa mená si̱kʼantjaiyaa yaoná.
10 Kataʼyala ijngoaa choa̱. Jngo xi sʼa tíkotʼaya je Biblia kʼoabʼé kon nga tsín tina̱jno̱ skénni. Kʼoa nga jngo jao xomana faʼato bʼénele yaole nga tsín na̱jno̱ kjien, tonga xijema tikjienngáni. Tonga chaan tondiaa síkʼéjna je na̱jno̱. Je xi basenkao kuinga tsjoake je Jeobá kʼoa kui xi mele nga ndasʼin kʼoéjna ngixko̱n (Col. 1:10; 3:23).
11. Ánni machjénsíni nga jchaa jmékjoánni xi mená sʼiaan.
11 Jmékjoánni xi mená sʼiaan. Tsa ʼyaa jmekjoanni xi mená sʼiaan, ngisaa choa ñʼai koa̱nná nga kuitjosonná. Tobʼelañá, tsa mená nga kjitʼa kʼoéxkiaa je Biblia, tonga tsa tsín jngo programa timangíntjenngiaa, tochale likui kʼoasʼiaan. * Ijngolasa choa̱ kataʼyaa: je xi chjotajchínga sʼin tjío kʼoasʼin bʼéndajin nga koaisíxatʼa je ndsʼee, tonga nga jefi nichxin likuini kʼoasʼín. Jngo koya xi kuinyakao kuinga skónangile yaole jebi: “A ʼyaná jokjoan ndsʼee xi koa̱n kjuinni̱xatʼaa. A jetsakʼendajiaan kʼiáni kjuinni̱xatʼaa”.
12. Jméni xi tsakui nichxin kʼoasʼian sakʼoaa, kʼoa ánni.
12 Kuenta sʼiaan jokji tjen bichó nganʼioná. Alikui kʼoamaná kʼoanʼia ngayeje xi mená tsakai, nga̱ tsínná nganʼio kʼoa tsínná tao̱n. Kuinga kuenta sʼiansíñá jokji tjen kʼoakoa̱nná. Sakʼoajin tsínni kʼoakoa̱nná si̱tjosoán jmeni xi jetjínndajinná tsakai (Ecl. 3:6). Tsa si̱kʼantjaiyajiaan jme xi jetjínndajinná, jmé xi koasenkaoná nga kuitjosonná. Aonla koya kataʼyaa.
XI KOASENKAONÁ NGA KUITJOSONNÁ JME XI BʼENDAJIAAN
13. Jósʼin so̱koná nganʼio nga kuitjosonná jme xi bʼendajiaan.
13 Si̱jélee nganʼio je Niná. Je Jeobá tsjoáná nganʼio nga kuitjosonná jme xi bʼendajiaan (Filip. 2:13). Kuinga machjénsíni nga si̱jélee nganʼiotsjele ánni nga tsjoánganʼioniná. Tosi tonda kʼoétsʼoaa, ninga sakʼoa kʼoasʼin nikjaʼaitsjeen nga tsín ndi̱to̱n nrʼoéná je Niná. Je Jesús i kitso: “Tijáo, kʼoa kʼoaino [nganʼiotsje]” (Luc. 11:9, 13).
14. Jósʼin basenkaoná je kjoafaʼaitsjen xi tsjoá Proverbios 21:5 nga bitjosonná jme xi bʼendajiaan.
14 Kʼoéndajiaan jme xi sʼiaan (tʼexkiai Proverbios 21:5). * Nga kuitjosonná tojme xáni, machjén nga nda kʼoéndajiaan jme xi sʼiaan kʼoa kʼoasʼin kjuintjenngiaa. Tikʼoasʼinni, kʼianga tjín xi chjoéjiaan, jngo xo̱n kʼoétʼaa josʼin si̱tjosoán. Ninga ñʼai tíjna jmeni xi sʼiaan, tsa si̱xkoa̱yaa je xá, ngisaa choa̱ ñʼai koa̱nná nga kuitjosonná. Je Pablo i kitsole je chjotale Cristo xi Corinto tsʼe: “Nga taingo nga jngójngó nga jon tʼeyotjao tʼaxion tao̱n”. Kuinga kʼoakitsonile nga tsín mele kʼia sʼe̱xkó tao̱n nga kuicho (1 Cor. 16:2). Kʼoati tsín bijtajinná kʼianga nixkoa̱yaa je xá xi ñʼai tjío.
15. Jmé xi machjén nga sʼiaan xijekoa̱nni kʼianga jekabʼetʼaxoaan jme xi sʼiaan.
15 Nga kʼoétʼaxoaan jmeni xi mená sʼiaan, koasenkaoná nga kuitjosonná (1 Cor. 14:40). Tobʼelañá, kʼianga batiojtín je xi chjotajchínga sʼin tjío, jngoo xi bʼétʼaxo̱n jme xi bʼéndajin, bʼétʼaxoon ʼyáni xi sitjoson jme xi kasʼendajin kʼoa jokjitse kʼoasʼinni. Ndasʼin bichómani nga kʼoasʼin fitjenngi kjoafaʼaitsjen jebi je xi chjotajchínga sʼin tjío (1 Cor. 9:26). Kʼoati koa̱n kʼoasʼiaan tsanda ñá. Tobʼelañá, koaan jngo xo̱n kʼoétʼaa jme xi tjíochxʼoáná kʼoa jñánile xi títjon kʼoasʼiaan. Tsa kjuintjenngiaa kjoafaʼaitsjen jebi, ngisaa ndi̱to̱n kuitjosonná jmeni xi tjínndajinná.
16. Tojo tso Romanos 12:11, jmé xi machjén nga sʼiaan nga kuitjosonná jmeni xi bʼendajiaan.
16 Kʼoénelee yaoná. Kʼianga nitjosoán jmeni xi bʼendajiaan alikui choa̱ ñʼai tíjna (tʼexkiai Romanos 12:11). * Je Pablo kʼoakitsole Timoteo nga tosi tonda katamale nda katatsoya. Kʼoati kui kjoafaʼaitsjen machjénná tojmeni xi sʼiaan nga Niná si̱xálee (1 Tim. 4:13, 16).
17. Jósʼin basenkaoná Efesios 5:15, 16 nga bitjosonná jme xi bʼendajiaan.
17 Nda si̱chjén je nichxinná (tʼexkiai Efesios 5:15, 16). * Nga jekʼoéndajiaan kʼiani kʼoasʼiaan tsa jmeni, alikui si̱kʼantjaiyaa. Alikui koa̱n nga tochóyakaola jme xi tibʼendajiaan (Ecl. 11:4). Alikui totjín totjenni kjoa xi si̱kʼayalee nichxinná kao nganʼioná, tosa kui kʼoasʼiaan jme xi ngisa tjínle kjoandosin (Filip. 1:10). Kʼianga kuitjosonná jme xi tjínndajinná, kʼia si̱kʼayaa nichxin nga bele tokoán. Kʼoakʼuínlee xi ngikʼa nga tsín aná. Si̱kjitsʼaolee je teléfononá kʼoa tsínla kui chótsenlee je correo electrónico kʼoa tsa redes sociales. *
18, 19. Nga jekabʼendajiaan jme xi sʼiaan, jmé xi koasenkaoná nga kuitjosonná ninga ñʼai koa̱nná.
18 Kuenta sʼiaan josʼin kuichomani. Josʼin bichómani jme xi bʼendajiaan yaa mangóson joma kʼianga tjín jña mangián. Tsa mená kuichoaa jñani timangián, alikuijin kui kjuinñá ninga tíchjoa je ndiaa kʼoa ninga xin kʼoétiaan. Tikʼoasʼinni, tsakui kuenta sʼiaan josʼin kuichomani jme xi tibʼendajiaan, alikuijin kui kjuinñá ninga ñʼai koa̱nná nga kuitjosonná (Gál. 6:9).
19 Alikui choa ñʼai tíjna nga bitjosonná jme xi bʼendajiaan. Tonga jé Jeobá tsjoáná kjoachjine kao nganʼio xi machjénná nga kuitjosonná je xá xi bʼetsʼiakoaa.
KJOAJNDA 65 Ali tobʼejngojin tokuin jojetinʼiai
^ párr. 5 A skaanni kʼoamaná jmeni xi nʼia. A ñʼai maná nga chjoejiaan jme xi sʼiaan kʼoa nga nitjosoán. Je kjoaʼmiya jebi koasenkaoná nga kuitjosonná jme xi bʼendajiaan.
^ párr. 4 2 Corintios 8:7, 10, 11: “Tokui josʼin nga tjíntsʼatontjaino ngayije, josʼin nga makjainno, josʼin nga nokjoao, kao kjoachjine, kao ngayije kjoanikuinda, kao kjoatjaochano xi tʼatsainjin, kʼoati tse katasʼe tsʼatontjaino je kjoandabi. 10 Kʼoa kao je kjoabi xinyano, nga jebi xi nda tjínnino nga jon. Je xi títjon tsakʼetsʼiakao ʼnda nichxin nó xi jaʼato, nga tsín tsa tokui nga kʼoakinʼia títjon, tonga kʼoati títjon kʼoasʼin koanmeno. 11 Ndʼaibi, tsokʼoa, kʼoati tikjetʼao je xi nʼiao. Josʼin nga kʼoasʼin koanjyo ndi̱to̱nno, kʼoatisʼin titjoson ndi̱toon, josʼin nga tjínno”.
^ párr. 11 Je “Programa de lectura de la Biblia” xi faʼaitʼa ya jw.org®, koasenkaoná nga jchaa josʼin kʼoéxkiaa je Biblia nga toñá (PUBLICACIONES > OTRAS PUBLICACIONES).
^ párr. 14 Proverbios 21:5: “Jngo chjota xi tongini nda bʼéndajin jme xi sʼín, nʼio ndasʼin bichótsjoá, tonga je xi xitso xiská kʼoasʼín tsa jmeni, tosicha”.
^ párr. 16 Romanos 12:11: “Ali tsʼejion xi nʼiao, tixítíyao, tsjoakjoa katamao kao Espíritu Santo, kʼoa joni choʼnda sʼin tixálao Nainá”.
^ párr. 17 Efesios 5:15, 16: “Chótsaon, tsokʼoa, nga kixi timao, ali joni chjota xi tsínle kjoafaʼaitsjenjin, tonga joni chjota xi tjínle kjoafaʼaitsjen. 16 Ali nichxinjin nichalao yaono, nga̱ je nichxin kjaínga tochʼao chon”.
^ párr. 17 Je artículo xi “Veinte consejos para que el tiempo le rinda” ʼmi, xi faʼaitʼa je ¡Despertad! xi tsʼe abril de 2010, tsjoásaná kjoafaʼaitsjen xi koasenkaoná nga nda si̱chjén je nichxinná.
