1, 2. Ánni nga nʼio tjínnile kjoandosin nga chótʼayajiaan je libro xi tsʼe Levítico.

JE PASTRO Pablo kʼoakitsole je Timoteo nga “ngayije xo̱n Escritura” tʼatsʼe “Niná jinroani, kʼoa kjaínga nda machjén nga bakóyaná” (2 Tim. 3:16). Kʼoa je “xo̱n Escritura” yaa tíjnajin je libro xi tsʼe Levítico. Jósʼin nikjaʼaitsjain xi tʼatsʼe libro jebi. Tjínkʼa je chjota xi kʼoatso nga tsín timachjénni nichxin xi tiyoaa ndʼaibi. Tonga ñá xi chjotale Cristo maa nʼio binyakaoná jme xi tso libro xi tsʼe Levítico.

² Je libro xi tsʼe Levítico jela kjoan 3,500 nó tjínle nga kichji, kʼoa je Jeobá kui xi mele nga kuitsoyaná, kuinga tojo ʼyañá libro jebi saʼnda ndʼaibi (Rom. 15:4). Nʼio tjínle kjoandosin nga chótʼayajiaan libro jebi nga̱ kui bakóyaná josʼin síkjaʼaitsjen Niná. Ñola koya kataʼyaa jme xi bakóyaná.

3. Ánni nga cho̱ tsakʼaitʼanile Niná nichxin nga kisitsje jéele chjota israelita.

³ Xi títjon xi bakóyaná: machjén nga ndasʼin kuiyoaa ngixko̱n Jeobá kʼianga sa̱sénle jme xi kʼoailee. Nichxin nga kisitsje jéele chjota israelita, tsakatiojtín kʼoa je naʼmitítjon cho̱ kitsjoatʼale je Jeobá. Nga kʼoasʼin cho̱ tsakʼaitʼale Jeobá nga kui nichxin, kui kisikjaʼaitsjenjinle je chjota israelita nga tjínnele sitsje je jéele. Kʼoa nga kjesa fikaojin je njínle cho̱ je naʼmitítjon nga tsjoátʼale Niná ya ʼNde xi nʼio tsje, títjonkjoanla tjín jmeni xi kisʼin xi ngisa nʼio chjíle tikʼoajinni nga chatʼa je jéele chjota israelita.

4. Tojo tso Levítico 16:12, 13, jmé xi kisʼin je naʼmitítjon nga tokʼia jaʼasʼen títjon ya ʼNde xi nʼio tsje nichxin nga kisitsje jéele chjota israelita (chótsenlai sén xi faʼaitʼa ya portada).

 ⁴ (Tʼexkiai Levítico 16:12, 13). * Si̱kjaʼaitsjenjinla jme xi koan kʼianga tsakʼaitʼale cho̱ je Niná nichxin kjoatse. Kʼianga jaʼasʼen je naʼmitítjon jñani tíjna je ndʼianajño, yʼatonntsja jngo xjoa xi xongó tjíoya kʼoa kʼoati yʼa je chxoa̱ʼí xi oro koanndani xi xólʼí tjíoya. Yaa basenjna jñani tjen je najño xi kitjenchjoa ʼNde xi nʼio tsje. Kao kjoaxkóntokon faʼasʼen ya ʼnde jebi kʼoa tokʼiaa faʼasʼen títjon nga kui nichxin (ngi jao kʼa faʼasʼen nga jemani) kʼoa yaa basenjna jñani tíjna kaxa̱ jña kixinya je kjoa xi kisʼendajin. Kui xi kitsoyanile nga ya kichokasejna ngixko̱n Jeobá. Kʼoa nga jeya séjna, kjoé je xongó kʼoa yaa síkʼatsaojin je xólʼí, kʼoa nʼio nda nje̱ nga jebaká je xongó. * Xijema, skaan fisʼen ijngokʼa ya ʼNde xi nʼio tsje nga fikao je njínle cho̱ xi bʼaitʼale Niná nga chatʼa je jéele chjota israelita. Je naʼmitítjon, títjonkjoanla xongó tsakaká nga kjesa tsjoátʼajinle Niná je njínle cho̱.

5. Jmé xi bakóyaná josʼin koanchjén je xongó nichxin nga kisitsje jéele chjota israelita.

⁵ Jmé xi bakóyaná josʼin koanchjén je xongó nichxin nga kisitsje jéele chjota israelita. Je Biblia kui síngósonkao je xongó kao je kjoabʼetsʼoa xi batíole Niná je choʼndale xi kixi fitʼale (Sal. 141:2; Apoc. 5:8). Je naʼmitítjon kao kjoaxkóntokon fikao je xongó ya ngixko̱n Jeobá. Tikʼoasʼinni, kʼianga bʼetsʼoalee Niná kao kjoaxkóntokon bʼetsʼoanilee. Nʼio chjí ʼyatokoán nga tsjoáʼndená Niná nga ma nichriantʼalee, tojo sʼín jngo nʼai kao tiʼndíle (Sant. 4:8). Miyo tsoná (Sal. 25:14). Nʼio tse kjoanda tjínná nga kʼoasʼin bekonná Jeobá, kuinga tsín meniná kui kʼoasʼiaan jme xi tsín sasénle.

6. Jmé xi bakóyaná tʼatsʼe Jesús nga je naʼmitítjon títjonkjoanla kui tsakaká je xongó nga kjesa tsjoátʼajinle cho̱ je Jeobá.

⁶ Kuenta sʼiaan nga je naʼmitítjon títjonkjoanla kui tsakaká je xongó nga kjesa tsjoátʼajinle cho̱ je Niná. Kuikjoanla títjon kuenta sʼín josʼin tíjna ngixko̱n Jeobá. Jmé xi bakóyaná jebi. Kʼianga tsakʼejna je Jesús i̱ Sonʼnde, kuikjoanla kʼoakisʼin jmeni xi ngisa nʼio tjínle kjoandosin tikʼoajinni nga kʼoasjentjai je chjotasonʼnde. Kʼianga sa̱sénle Jeobá nga tsjoátʼale kjoabijnachonle, je Jesús kisitjosonle ngantsjai. Kʼoasʼin tsakakóni nga kui xi ngisa ndatjín nga kui kʼoanʼia jmeni xi tso je Jeobá. Je Jesús tsakakó nga kixi josʼin batéxoma je Jeobá kʼoa nga kao kjoatéxomakixi batéxomani.

7. Ánni nga kisasennile Jeobá ngayeje jme xi kisʼin je Jesús nga tsakʼejna i̱ Sonʼnde.

⁷ Je Jesús ñaki nda kisitjoson je kjoatéxomale Jeobá jokjitse tsakʼejna i̱ Sonʼnde. Ninga kjoa jaʼatojin kʼoa ninga be nga ni̱kʼien, kisitoánntjai josʼin batéxoma je Nʼaile (Filip. 2:8, TNM). Kʼianga kjoa jaʼatojin je Jesús, nʼio tsakʼétsʼoa kʼoa saʼnda kiskiʼndá nga kisijéle nganʼio je Nʼaile (Heb. 5:7). Ñaki ni̱ma̱le kinroajinni nga tsakʼétsʼoa kʼoa kui xi tsakasenkao nga tosi tonda kisitjoson. Nga tsakʼétsʼoa je Jesús, yaa koanngóson joni nga nʼio naskánje̱ nga saká xongó. Ngayeje jme xi kisʼin je Jesús, nda kisʼe kon  je Nʼaile kʼoa tsakakó nga je xi ngisa nda batéxoma.

8. Jósʼin chjénngilee je Jesús.

⁸ Chjénngilee jokisʼin je Jesús, kʼoénelee yaoná nga si̱tjosoán je kjoatéxomale Niná kʼoa kixi kjuintʼalee. Kʼianga kjoa bitjatojiaan, bʼetsʼoalee je Jeobá nga nijélee nganʼio nga̱ kui xi mená nga nda katasʼe kon. Nga kʼoanʼia, kʼoasʼin bakoñá nga sasénná josʼin batéxoma. ʼYañá nga tsín kjuinrʼoéná kʼianga kʼoétsʼoalee tsakui kʼoasʼiaan jme xi tsín sasénle. Tonga tsa kʼoasʼin kjuinkoaa yaoná josʼin mele Niná, alikui jao tjínná nga je kjoabʼetsʼoaná yaa koa̱nngóson joni tsa xongó xi nʼio naskánje̱. Kʼoa ñaki tjínjngo tokoán nga sasénle je Nʼainá xi tíjna ngʼajmi nga kixi mangíntʼalee kʼoa nga nitjosonlee (Prov. 27:11).

9. Jósʼin tsakakó je chjota israelita nga tsjoake je Jeobá kʼoa nga kitsjoale kjoanda.

⁹ Xi majaoni xi bakóyaná: kʼianga nixálee je Jeobá kʼoasʼin bʼainilee kjoanda. Ijngolasa koya kataʼyaa josʼin tsakʼétsʼoale Niná je chjota israelita. Je libro xi tsʼe Levítico kʼoatso nga cho̱ kitsjoatʼa je chjota israelita nga nyʼán tsakatio ngixko̱n Niná. * Nga kʼoakisʼin, kʼoasʼin tsakakóni nga kitsjoale kjoanda Niná (Lev. 7:11-13, 16-18). Alikui tsa totsakʼénele yaole nga kʼoakisʼin. Nga tsjoake je Jeobá kao kjoatsjoa kitsjoatʼale cho̱. Je chjota israelita xi kitsjoatʼa cho̱, je familiale kao je naʼmi kiskine yaole cho̱ xi tsakʼaitʼa.  Tonga tjín jmeni xi tsín koan kiskine nga̱ jé Jeobá tsakʼaitʼale.

10. Tojo tso Levítico 3:6, 12, 14-16, ánni nga kʼoakisʼinni je Jesús josʼin mele je Nʼaile.

¹⁰ Xi majanni xi bakóyaná: nga tsjoachaa je Jeobá kui xi ngisa nda bʼailee. Je Jeobá kui xi ngisa chjí tsabe nga xínéle cho̱ tsakʼaitʼale. Kʼoati nʼio chjí tsabekon jmeni xi tjíoya yatsʼoa̱ je cho̱, jolani chjaokjándiale (tʼexkiai Levítico 3:6, 12, 14-16). * Kuinga nʼio tsjoa kisʼeni kon je Jeobá nga kao kjoatsjoa kitsjoatʼa je chjota israelita je chjaokjándiale cho̱ kao xínéle. Je chjota israelita xi cho̱ kitsjoatʼale je Jeobá kʼoasʼin tsakakóni nga kui xi ngisasa nda kitsjoale je Jeobá. Tikʼoasʼinni, je Jesús kui xi ngisasa nda kitsjoale je Nʼaile nga kao kjoatsjoa kisixále nga̱ nʼio kitsjoale kjoanda (Juan 14:31). Nʼio tsjoa kisʼe kon je Jesús kʼianga kʼoakisʼin josʼin mele je Niná, kʼoa nʼio tsjoake koan je kjoatéxomale (Sal. 40:8). Nʼiojin tsjoa kisʼe kon je Jeobá nga ñaki kao kjoatsjoa kisixále je ʼNdíle.

11. 1) Jósʼin mangóson nga nixálee Niná kao nga cho̱ kitsjoatʼale Niná je chjota israelita nga nyʼán tsakatio ngixko̱n. 2) Jósʼin tsjoánganʼioná jebi.

¹¹ Kao kjoatsjoa kitsjoatʼa je cho̱ chjota israelita nga nyʼán tsakatio ngixko̱n Niná kʼoa kʼoasʼin tsakakóni nga tsjoake. Nga Nixálee Niná yaa mangóson nga kʼoasʼin kitsjoatʼa cho̱ je chjota israelita, nga̱ kao kjoatsjoa kʼoanʼia. Kui xi ngisa nda bʼailee, kʼoa kuinga nixánilee nga̱ tsjoachañá. Nʼiojin tsjoa sʼe kon je Jeobá nga millón mani chjota xi je síxále, nga̱ kuinga nixánilee nga tsjoachaa je kʼoa kao kjoatéxomale. Nʼio tsjoánganʼioná nga kuenta sʼín je Jeobá kʼoa nga bechjí jmeni xi nʼia nga̱ be nga ni̱ma̱ná nroajinni nga nixálee. Tobʼelañá, tsa jejchíngaa kʼoa tsín tikʼoamaniná nga tse nixálee je Jeobá, koaan tsjoa kʼoé tokoán nga̱ bechjí jokji tjen kʼoamaná nga nixálee. Tsakui nichxin kʼoasʼin nikjaʼaitsjeen nga tsín nʼio tse nixálee, tonga je Jeobá be nga bʼenelee yaoná jokji tjen bichó nganʼioná nga nixálee kʼoa nga kui kʼoanʼiañá nga tsjoachaa. Nʼio tsjoa sʼe kon je Jeobá nga kui bʼailee jme xi ngisasa nda xi tjínná.

12. Jókisʼe kon Jeobá kʼianga cho̱ kitsjoatʼale je chjota israelita nga nyʼán tsakatio ngixko̱n, kʼoa jméni xi tsín jao sʼená.

¹² Jmé xi bakóyaná nga cho̱ kitsjoatʼa je chjota israelita nga nyʼán tsakatio ngixko̱n Niná. Je Jeobá nʼio tsjoa kisʼe kon nga kisakale jme xi ngisasa nda tjínle je cho̱. Kuinga tsín jao tjínni tokoán nga tsjoa sʼe kon je Jeobá nga kao kjoatsjoa nixálee kʼoa nga ni̱ma̱ná nroajinni nga kʼoanʼia (Col. 3:23). Si̱kjaʼaitsjenjinla jokji tsjoa sʼe kon. Nʼio chjí be je Jeobá nga kui kjoatsjoacha xosíkaoná nga nixálee, ni choa kʼoa ni tse, kʼoa kjoaʼaítsjenle ngantsjai nichxin (Mat. 6:20; Heb. 6:10).

13. Tojo tso Levítico 9:23, 24, jósʼin tsakakó Jeobá nga kisasenle nga je Aarón kao xtile xi naʼmi koan.

¹³ Xi mañoni xi bakóyaná: je Jeobá síchikontʼain naxinandále. Kataʼyala jme xi koan kʼianga nó 1512 tongini nga nó 1, kʼianga kisʼejna je ndʼianajño ya ngitotsʼin nindo Sinaí (Éx. 40:17). Jé Moisés tsakándiaa nga kui nichxin, kʼoa jé Aarón kao xtile kixinyanda nga naʼmi koa̱n. Je naxinandá Israel tsakatiojtín nga tsabe josʼin tsakakále cho̱ Jeobá je naʼmi (Lev. 9:1-5). Jósʼin tsakakó Jeobá nga kisasenle josʼin kisʼendajin. Kʼianga je Aarón kao  Moisés kisichikontʼain je chjota israelita, je Jeobá lʼí kisikasénni tjen ngʼajmi nga tsakaká je cho̱ xi kitsʼaitʼa jñani tíjna je sonxta (tʼexkiai Levítico 9:23, 24). *

14. Ánni nga tjínnenile koa̱nndosinná nichxin xi tiyoaa ndʼaibi nga kisasenle Niná nga naʼmi koan je Aarón.

¹⁴ Kʼoasʼin tsakakóni je Jeobá nga kisasenle nga je Aarón kao xtile xi naʼmi koan. Kʼianga tsabe je chjota israelita nga kisasenle Jeobá josʼin kixinyanda je naʼmi, kʼoati koanjinle nga tjínnele kʼoati tsjoánganʼiole tsanda je. Tjínnele nga koa̱nndosinná jme xi koan nga kui nichxin, nga̱ ngisaa nʼio tjínle kjoandosin jmeni xi kjima ndʼaibi. Jé Cristo xi Naʼmitítjon ma, kʼoa yaa koatexomakao je xi 144,000 mani, xi naʼmi kʼoa xi rey koa̱n (Heb. 4:14; 8:3-5; 10:1).

15, 16. Jósʼin ʼyañá nga tsjoánganʼiole Jeobá je “choʼnda xi nʼiotʼakon, xi nda be xá”.

¹⁵ Kʼianga nó 1919, je Jesús jngo jtín mani chjotale Cristo tsakinyánda je xi “choʼnda xi nʼiotʼakon, xi nda be xá” koa̱n. Je choʼnda jebi, jé bándiaa nga tíʼmiyason kʼoa jé tsjoále je chjotale Cristo jmeni xi machjénle nga bichó choa̱le (Mat. 24:45). A ʼyañá nga sasénle Niná je “choʼnda xi nʼiotʼakon, xi nda be xá”.

¹⁶ Je Na̱i kao jmeni xi chon sonʼnde, kui xi mele nga kʼoechjoale je xá xi tísʼín je choʼnda xi nʼiotʼakon, xi nda be xá. Kʼoa alikuijin kʼoakjimale je choʼnda jebi tsa tsín je Jeobá tíbasenkao. Jao kjoajchántse jekisatio kʼoa nʼio ñʼai kjimachon tao̱n jngo tjíjtsa Sonʼnde, kʼoati totaon tíʼya kʼoa chjota tjíofitjenngike naxinandále  Niná. Ninga kʼoalani, je choʼnda xi nʼiotʼakon, xi nda be xá tosi tonda títsjoále je chjotale Cristo jmeni xi tʼatsʼe Niná nroani. Si̱kjaʼaitsjenla jokji nkjín xo̱n kao video xi Énle Niná yʼangini tíbʼasje naxinandále Niná je xi tsʼato 900 én tjínni, kʼoa alikui saténa. Kui jebi xi bakóná nga je Jeobá tíbasenkao naxinandále. Kʼoa kʼoati tíʼyale nga je Jeobá tísíchikontʼain nga tíʼmiyason. Je énnda chjotse tíʼmiyason “ngakijnda sonʼnde” (Mat. 24:14). Alikui jao tjínná nga je Jeobá tíbándiaale kʼoa tísíchikontʼain je naxinandále.

17. Jósʼin bakoá nga bʼainganʼiolee je naxinandále Jeobá.

¹⁷ Chjónangilee yaoná jebi: “A tsjoaña kjoanda nga naxinandále Niná tijnajian”. Je choa̱ xi tjín nga títsjoánganʼiole Jeobá je naxinandále kʼoasʼin tíʼyale jokoan kʼianga nichxinle Moisés kao Aarón nga lʼí jaʼaijenni ngʼajmi. Kuinga machjénni nga kʼoee kjoanda (1 Tes. 5:18, 19). Jósʼin bakoá nga bʼainganʼiolee je naxinandále Jeobá. Kʼiaa nga mangíntjenngiaa je kjoafaʼaitsjen xi faʼaitʼa xo̱n xi Énle Niná yʼangini, jmeni xi noʼyá nga satíoná kjoajtín kao kjoajtíntse, nga ʼmiyasoán jokji tjen bichó nganʼioná kʼoa nga chjotatjenngile Cristo nikoaa je chjota (1 Cor. 15:58).

18. Jmé xi tiyondaa nga kʼoasʼiaan.

¹⁸ Ñaki kʼoakʼoé tokoán nga kjuintjenngiaa jme xi tsoyaná je libro xi tsʼe Levítico. Kʼoénelee yaoná nga ndasʼin kuiyoaa ngixko̱n Jeobá ánni nga sa̱sénnile nga si̱xálee. Kuinga si̱xánilee Niná nga̱ bʼailee kjoanda. Tosi tonda kui kʼoailee xi ngisasa nda nga̱ nʼio tsjoachaa. Kʼoa kʼoainganʼiolee je naxinandále. Tsa kʼoasʼiaan, kʼoasʼin koakonilee je Jeobá nga nʼio chjí ʼyaa nga je nixálee kʼoa nga testigole maa.