1. Jméni xi kitsole Jesús je chjotatjenngile tojosʼin faʼaitʼa ya Mateo 28:18-20.

NGA jejaʼáyanile Jesús tsʼatsenle je chjotatjenngile xi ya tjíojtín ya Galilea. Nʼio tjínle kjoandosin jmeni xi kitsole, tojosʼin faʼaitʼa ya Mateo 28:18-20 * (tʼexkiai).

2. Jméni xi jan koya chótʼayajiaan.

² Nichxin xi tiyoaa ndʼaibi, ngatsʼiaa xi choʼndale Niná maa machjén nga kʼoati si̱tjosoán jmeni xi kitsole Jesús je chjotatjenngile. Janla koya tjínni xi chótʼayajiaan xi kuinyakaoná nga kuitjosonná je xá xi tíbánená Jesús. Xi títjon, kʼianga kʼuínyalee jotjínni je kjoatéxomale Niná jngo chjota, jmésani xi machjén nga sʼiaan. Xi majaoni, jméni xi koa̱n sʼin je jtín nga kuinyakao je xi tosʼa tjíokotʼaya Biblia nga tosi tonda skoe̱sa xi tʼatsʼe Niná. Kʼoa xi majanni, jósʼin kuinyakoaa je ndsʼee xi jekisikjinle naxinandále Niná nga kuitsoyason ijngokʼa.

3. Jméni xi tínchja̱ni xi tsakʼénená je Jesús.

³ Je Jesús kʼoakitso nga tjínnele koakoyalee je chjota jmeni xi tsakʼénená. Tonga ali tsa to “takoyalao ngayeje jme xi tsakʼeneno” kitsojin. I kitso: “Takoyalao nga katasítjoson  ngayeje jme xi tsakʼeneno”. Tsa mená nga kuitjosonná jmeni xi kitso je Jesús, tjínnele koakoyalee je xi tiʼmiyalee Biblia jmeni xi tsakʼéne je Jesús, tonga kʼoati machjén nga kuisenkoaa nga kuitjosonle (Hech. 8:31). Ánni machjénsíni nga kʼoasʼiaan.

4. Jngo choa̱ tʼejnai xi tsoyaná jósʼin kʼuínyalee chjota nga sitjoson jmeni xi kitso je Jesús.

⁴ Jósʼin koakoyalee je chjota nga sitjoson jmeni xi kitso je Jesús. Jngola choa̱ kataʼyaa. Jméni xi sʼín jngo chjota xi kui tsoya josʼin maxákao carro. Tsakui nichxin kuikjoanla tsoyale je chjota jmeni xi kuenta nʼia kʼianga carro nixákoaa. Kʼianga kʼoasʼin jotíʼmile je xi carro tíʼmiyale, tjínnele jesoa koaikao je xi títsoyale ánni kʼoasʼin sixákaoni carro nga jetjenya carretera josʼin tsakʼinyale. Jmé xi bakóyaná jebi.

5. 1) Tojo tso Juan 14:15 kao 1 Juan 2:3, jméni xi machjén nga koakoyalee je xi tiʼmiyalee Biblia. 2) Tatio kʼai choa̱ josʼin kʼuínyalee je xi tiʼmiyalee Biblia.

⁵ Kʼianga bakoyalee Biblia je chjota kui ʼmiyalee jmeni xi mele Niná nga sʼiaan. Tonga ali tsa tokuijin xi machjén, machjén nga kʼuínyalee jokoa̱n sʼin nga nyaon nyaon nga koaitjenngi jotso je Énle Niná (tʼexkiai Juan 14:15; * 1 Juan 2:3 *). Kao jmeni xi nʼia koakonilee josʼin nitjosoán je kjoafaʼaitsjen xi faʼaitʼa Biblia, jolani ya ndʼiaskuela, ya tʼaxáná kʼoa kʼianga bʼetsaojiaan. Kʼoati koa̱n kʼoéyanajmílee josʼin tsakasenkaoná jmeni xi tso Biblia. Kʼianga kʼoétsʼoaa kao je xi tiʼmiyalee Biblia, si̱jélee je nganʼiotsjele Jeobá nga kui katabándiaale (Juan 16:13).

6. Jmésani xi sʼiaan nga kuinyakoaa xi kjaʼaí nga sitjoson jmeni xi kitso Jesús.

⁶ Jmésani xi tjínnele sʼiaan nga kʼuínyalee je chjota jmeni xi kitso je Jesús. Machjén nga kuisenkoaa je xi tiʼmiyalee Biblia nga kʼoati koa̱nmele kuitsoyason je Énle Niná. Tjínkʼa xi tsokjón nga kui síkjaʼaitsjen nga kuitsoyason. Ngasin nganda kuinyakoaa nga koa̱njinle jmeni xi tso Biblia ánni nga nʼio sʼe̱jnani je kjoamakjainle, kʼoa yaa ni̱ma̱le kjuinroajinni nga kuitsoyason. Jósʼin kuinyakoaa nga koa̱nmele kuitsoyason je Énle Niná.

7. Jósʼin kuisenkoaa je xi tiʼmiyalee Biblia nga koa̱nmele kuitsoyason je Énle Niná.

⁷ Koaan kui jebi chjónangilee je xi tiʼmiyalee Biblia: “Jósʼin tíbasenkaoli nga tsaʼyai tʼatsʼe Chjotaxále Niná. A kʼoati machjén nga sʼe̱jinle xi kjaʼaí chjota. Jósʼin koa̱n kuisenkoai” (Prov. 3:27; Mat. 9:37, 38). Koakolee je tratado xi nichjén nga ʼmiyaa Énle Niná kʼoa chjónangilee jñánile xi ngisa koa̱nndosinle je xínkjín, miyole kʼoa tsa je xi ñatjen síxá. Jñanile xi ngisa koa̱nndosinle kʼoai kʼalee je tratado, kʼuínyacho̱yalee jokuitsole xínkjín kʼianga tsjoále je tratado. Kʼianga jekuitjotsoyason je Énle Niná kao je jtín ninga kje fisʼenngindájin, tosi tonda kuinyakoaa nga koa̱nle kuitsoyason (Ecl. 4:9, 10; Luc. 6:40).

8. Ánni nga nʼio tjínnile kjoandosin nga nʼio tsjoake koa̱n Niná kao chjota je xi tiʼmiyalee Biblia (kʼoati chótsenlai je recuadro “ Jósʼin kuisenkoaa xi tiʼmiyalee nga ngisa tsjoake koa̱n Niná”).

⁸ Kuenta sʼiaan nga kʼoakitso je Jesús nga kuinyakoaa je xi kjaʼaí nga sitjoson ngayeje jmeni xi kitso. Kʼianga ʼmiyasoán kʼoa nga chjotatjenngile Cristo nikoaa je  chjota, kʼoati tinitjosoán nga jao kjoatéxoma xi nʼio chjíle, nga tsjoacha koaan je Niná kʼoa nga tsjoacha koaan xíngiaa (Mat. 22:37-39). Tsa koakoyalee je xi tiʼmiyalee Biblia josʼin sitjoson kjoatéxoma jebi, kʼoasʼin kuinyakaoñá nga kuitsoyason. Tjínjinkʼa xi kʼoasʼin síkjaʼaitsjen nga tsín kuitso kon nga kuitjotsoyason, tonga koaan kʼoakʼuínlee nga je Jeobá koasenkao nga chan tsín tichjota tsokjonnile (Sal. 18:1-3; Prov. 29:25). Je recuadro xi faʼaitʼa kjoaʼmiya jebi kui bakóya josʼin kuinyakoaa je xi tiʼmiyalee Biblia nga ngisa tsjoake koa̱n Niná. Ngatsʼiaa xi tiyoaa ya jinjtín koaan kuinyakoaa je xi sʼa tjíokotʼaya Biblia nga ngisa koako kjoatsjoacha. Kataʼyala jósʼin kuinyakoaa.

9. Jósʼin manile síxákao carro jngo chjota.

⁹ Si̱kʼaxki̱la ijngokʼá je chjota xi tosʼa kjimale tísíxákao carro. Kʼianga jetjenya carretera, ali tokuijin kuenta sʼín jmeni xi tsole je xi títsoyale, kʼoati kuenta sʼín josʼin síxákao carro je chjota xi kjaʼaí. Tobʼelañá, tsakui nichxin je xi títsoyale kʼoatsole nga kuenta katasʼín josʼín je chjota xi tsjoáʼnde nga faʼatʼale xi kjaʼaí carro. Kʼoa tsakui nichxin kʼoakuitsole nga xa̱n koaka je lʼíle ánni nga tsín ya sikitsʼaoyani xko̱n je chjota xi tjíosíxákao carro xi tjíonroani. Tsa kʼoasʼin kuitsoyale, nʼio koasenkao je xi carro tíkotʼaya.

10. Jméni xi koasenkao je xi Biblia tíʼmiyale nga ngisa nda skoe̱ xi tʼatsʼe Niná.

¹⁰ Tikʼoasʼinni, je xi Biblia tíʼmiyale ali tsa tojejin basenkao je xi títsoyale Biblia, kʼoati binyakao je choʼndale Jeobá xi nda choa̱ batío. Je xi nʼio koasenkao nga ngisa nda skoe̱ xi tʼatsʼe Niná kʼiaa nga koai je kjoajtín xi satíoná. Jmeni xi kjuinrʼoé nga satío kjoajtín koasenkao nga ngisa koa̱njinle jmeni xi tso Biblia, ngisaa nʼio sʼe̱jna je kjoamakjainle kʼoa ngisaa tsjoake koa̱n je Niná (Hech. 15:30-32). Je xi tíbakóyale Biblia koaan koakole ndsʼee xi kjaʼaí ánni nga skoe̱xkonni xi kʼoati kui kjoa tjíofaʼatojin joni je. Jósʼin koasenkao je xi tosʼa tíkotʼaya Biblia jmeni xi sʼín je ndsʼee nga bakó kjoatsjoacha. Kataʼyala kʼaa choa̱.

11. Jméni xi sakʼoa kʼoakoa̱n ya jinjtín, kʼoa jósʼin kuinyakao je xi tosʼa tjíokotʼaya Biblia.

¹¹ Jngo na̱ xi toje tísíjchá ʼndíxtile xi tosʼa tíkotʼaya Biblia, kuenta sʼín josʼín jngo tichjaa xi kʼoati toje tísíjchá ʼndíxtile. Kui síkjaʼaitsjenjin nga bʼénele yaole je tichjaa nga bichó kjoajtín kao xtiʼndíle. Ijngo xi sʼa tíkotʼaya Biblia xi mele nga tsín tina̱jno̱ skénni, bexkon jngo ndsʼee xi kʼoati na̱jno̱ kisken ngasʼa. Je ndsʼee kʼoatsole nga kuinga tsjoake je Jeobá nga kisikʼéjnani je na̱jno̱ kʼoa nga kisitjosonni jmeni xi tso Biblia (2 Cor. 4:7; 7:1). Je xi sʼa tíkotʼaya Biblia tsjoa sʼe kon kʼianga jebʼéyanajmíle jme kjoa xi jaʼatojin je ndsʼee kʼoa nga kʼoatsole nga kʼoati koa̱n kʼoasʼin tsanda je. Kʼoa jngo tsoti xi sʼa tíkotʼaya Biblia kuenta sʼín jngo tichjaa xi kʼoati tjín nóle jotjín nóle je, nga tsjoa tjín kon nga testigole Jeobá ma. Je xi tosʼa tíkotʼaya Biblia mamele nga be ánni nga tsjoa tjínntsjainile je tichjaa.

12. Ánni kʼoabixónsíñá nga koa̱n kuinyakoaa ngatsʼiaa xi tosʼa tjíokotʼaya Biblia.

¹² Kʼianga nkjín ndsʼee xi nda tjíosíxále Jeobá bexkon je xi tosʼa tíkotʼaya Biblia, majinle josʼin tíjna nga nitjosoán jmeni xi kitso je Jesús, nga tsjoacha maa Niná kao xíngiaa (Juan 13:35; 1 Tim. 4:12). Tojoná jekabixoán, je xi tosʼa tíkotʼaya Biblia koasenkao je choa̱ xi batío ndsʼee, xi kʼoati kui kjoa tjíofaʼatojin joni je. Kʼoasʼin skoe̱ni nga koa̱n kʼoati  sʼin tsanda je nga chjotatjenngile Cristo koa̱n (Deut. 30:11). Tojosʼin tiʼyaa, koaan kuinyakoaa ngatsʼiaa xi tiyoaa ya jinjtín je xi tosʼa tjíokotʼaya Biblia nga skoe̱sa xi tʼatsʼe Niná (Mat. 5:16). Si̱kjaʼaitsjenjiaan jebi nga jngó jngoá: “Jósʼin basenkoa je xi tosʼa tjíokotʼaya Biblia xi bichó kjoajtín”.

13, 14. Jósʼin tsakasenkao Jesús je pastrole kʼianga kisikʼajenle kon.

¹³ Mená kuinyakoaa je ndsʼee xi jekisikjin nga katatsoyason ijngokʼa kʼoa nga chjotatjenngile Cristo katasíkao chjota. Nga jchaa jósʼin kuinyakoaa, si̱kjaʼaitsjenjiaan jósʼin tsakasenkao Jesús je chjotatjenngile kʼianga kisikʼajenle kon.

¹⁴ Kʼianga tojeme ni̱kʼien je Jesús, je pastrole kitsjionkon kʼoa tsakanga (Mar. 14:50; Juan 16:32). Jósʼin tsakasenkao Jesús nga kʼoasʼin kisikʼajenle kon je pastrole. Kuentala sʼiaan jmeni xi kisʼin kʼianga jejaʼáyanile. Jé yánchjín xi kʼoati chjotatjenngile koanni kisikasén nga kikájinkon je pastrole nga kʼoakitsole nga jejaʼáyanile Jesús. I kitsole: “Ali bijkonjion, tangín nikinrʼoáo ndsʼe” (Mat. 28:10a). Ningalani kinjiotokon je Jesús, alikui kʼoakisikao ngajaoni je pastrole, tosi tonda “ndsʼe” kitsole. Jé Jeobá kiskenngile Jesús nga tsakakó kjoamatokon kʼoa koanle kisichatʼa (2 Rey. 13:23).

15. Jósʼin nikjaʼaitsjeen tʼatsʼe ndsʼee xi tsín titsoyasonni.

¹⁵ Kʼoati makjáojinná ñá tʼatsʼe ndsʼee xi tsín titsoyasonni. Tojo ndsʼee mani kʼoa tojo tsjoachañá. Alikui chajinná josʼin kisixále Jeobá, kʼoa tjínkʼa xi nʼio nkjín nó nga nda kisixále Jeobá (Heb. 6:10). Nikjáo kjoaixiñá ndsʼee jebi (Luc. 15:4-7). Jósʼin chjénngilee je Jesús kʼoa jósʼin koakolee je ndsʼee nga mandosin kjoaixiná.

16. Jósʼin koakolee je ndsʼee xi jekisikjin nga mandosin kjoaixiná.

¹⁶ Énsin énnda si̱chjén nga kʼoakʼuínlee nga katafi kjoajtín. Kʼianga kisikʼajenle kon je pastrole Jesús kisikatíojtín nga tsakasenkao (Mat. 28:10b; 1 Cor. 15:6). Kʼoati koa̱n kʼoakʼuínlee je xi jekisikjin nga katafi je kjoajtín xi satíoná. Machjénjin nga nkjín kʼa kʼoakʼuínlee ánni nga chan koai ijngokʼani kjoajtín. Nʼiojin tsjoa kisʼe kon je Jesús kʼianga kʼoakisʼin je chjotatjenngile jokitsole, kʼoajinti nʼio tsjoa sa̱tío tokoán kʼianga jekuicho ijngokʼani kjoajtín je ndsʼee (Mateo 28:16; tingósonkoai Lucas 15:6).

17. Jméni xi machjén nga sʼiaan tsa jngo ndsʼee xi jekisikjin tsakai kuicho kjoajtín.

¹⁷ Nda chjoéyaa. Kʼianga tsabe je chjotatjenngile, je Jesús kikonle kʼoa tsakjákaonajmí ánni nga nda kisationi kon (Mat. 28:18). Jósʼiaan kʼiatsa jchaa nga kuicho ijngokʼa kjoajtín jngo ndsʼee xi jekisikjin tsakai. Koaan chja̱kaonajmiá kʼoa kʼoakʼuínlee nga nda kasʼín nga kabichó. Tsakui nichxin tsín ʼyaa jokʼuínlee. Je xi koa̱n sʼiaan, kuinga kʼoakʼuínlee nga tsjoa maná nga kabichó.

18. Jósʼin kʼoainganʼiolee kʼoa jósʼin kuinyakoaa je ndsʼee xi jekisikjin.

¹⁸ Kʼoainganʼiolee kʼoa kuisenkoaa nga tsjoa katasatío kon. Je chjotatjenngile Jesús kʼoajinsʼin kisikjaʼaitsjen nga tsín kʼoakoa̱nle nga kuitsoyason jngo tjíjtsa Sonʼnde. Je Jesús kitsjoanganʼiole kʼoa i kitsole: “I tijnakaono ngantsjai nichxin” (Mat. 28:20, TNM). Nʼio tsakinyakao jmeni xi kitsole Jesús, nga̱ tochoatsee jaʼato nga kitsoyason ijngokʼa kʼoa “nitokʼiajin tsakatiojyo nga tsakakóya” (Hech.  5:42). Je ndsʼee xi tsín titsoyasonni kʼoati machjénle nga kʼoainganʼiolee kʼoa kuinyakoaa. Tsakui nichxin tsokjón nga kui síkjaʼaitsjen nga kuitsoyason ijngokʼa. Koaan si̱nʼiojiaan kʼoa kʼoakʼuínlee nga tsín toje kuitsoyason, kʼoa kʼoakʼuínlee nga ñatjen kuitjokʼinyasoán kʼianga jekoanmele kuitjotsoyason ijngokʼa. Ndajin sʼe̱ kon tsa kʼoasʼin kuinyakoaa. Tsa kʼoasʼin jchatokoán nga ndsʼee mani, kuijin xi kuinyakao nga sixá ijngokʼanile Niná kʼoa nʼiojin tsjoa sa̱tío tokoán ngatsʼiaa xi tiyoaa ya jinjtín.

19. Jméni xi mená sʼiaan, kʼoa ánni.

¹⁹ Kʼiá saʼnda tjen kʼoékjoanlee nga koakoyalee Biblia je chjota. Kʼiaa saʼnda nga kjoetʼa jmeni xi chon sonʼnde (Mat. 28:20, TNM; chótsenlai je glosario jñani “conclusión del sistema” tso). A kuitjosonná jmeni xi kitso je Jesús. Tjínjngoo tokoán nga kuitjosonná. Kao kjoatsjoa nikʼayaa nichxinná, nichjénñá nganʼioná kao jmeni xi tjínná nga fasjee je chjota xi tjíonda nga sʼe̱le “kjoabijnachon ngantsjai” (Hech. 13:48). Kʼoasʼin mangíntje̱ngiaa je choa̱le Jesús nga kitso: “Jé xi bakjennia, nga kʼoasʼian josʼin mele je xi kisikasénna kʼoa nga sijngoa xále” (Juan 4:34; 17:4). Kʼoati kui xi mená nga si̱jngoaa je xá xi kjinená (Juan 20:21). Kui xi mená nga tosi tonda ñatjen kʼuínyasoán je Énle Niná kao je ndsʼee kʼoa kao xi jekisikjin tsakai, saʼnda nga kjoetʼa jmeni xi chon sonʼnde (Mat. 24:13).

20. Tojo tso 2 Corintios 4:7, ánni nga kuitjosonniná je xá xi tsakánená Jesús.

²⁰ ʼYañá nga tsín choa ñʼai tíjna nga kuitjosonná je xá xi tsakánená Jesús. Tonga ali tsa toñájin tiyoaa, je Jesús kʼoakitso nga i̱ tjen tíjnakaoná. Kʼianga chjotatjenngile Cristo nikoaa je chjota, jé Niná nixákoaa kʼoa jé Jesús basenkaoná (1 Cor. 3:9; 2 Cor. 2:17). Koaan kuitjosonná xá jebi, nga̱ jé Jeobá kao Jesús binyakaoná. Nʼio tseni kjoanda kʼoa nʼio tsjoa satío tokoán nga nitjosoán je xá xi tsakánená Jesús kʼoa nga binyakoaa xi kjaʼaí nga kʼoati katasʼín tsanda je (tʼexkiai 2 Corintios 4:7). *