1, 2. Jngo choa̱ tʼejnai jósʼin koa̱n kjuintjenngiaa je kjoafaʼaitsjen xi tsjoá Proverbios 4:25.

SI̱KJAʼAITSJENJINLA nga jan koya jebi. Jngo tichjaa xi jejchínga kui síkjaʼaitsjenjin jmeni xi tsjoa tsakʼé kon ngasʼa. Ningalani ñʼai male ndʼaibi, tojo tísíxále Jeobá jokji tjen kʼoamale (1 Cor. 15:58). Kui kaníya jko̱ ngantsjai nichxin nga jeya tíjna ya ʼndenaxó kao xínkjín. Ijngo tichjaa kui faʼaitsjenle nga jngo tichjaa kisikiʼaon kjoafaʼaitsjenle, tonga alikui bʼéngijti kon (Col. 3:13). Ijngo ndsʼee xi tsín chajinle je jée xi tsakajngi ngasʼa, tonga kʼoabʼé kon nga likui tikʼoasʼinni (Sal. 51:10).

² Jósʼin mangóson je kjoa xi tjíofaʼatojin nga jan ndsʼee jebi. Nga jan faʼaitsjenle jme xi kisʼin ngasʼa, tonga alikui kui kuenta sʼín. Tosaa kui kuenta sʼín nichxin xi sʼa nroa (tʼexkiai Proverbios 4:25). *

3. Ánni nga nʼio tjínnile kjoandosin nga kui si̱kjaʼaitsjeen nichxin xi sʼa nroa.

³ Ánni nga nʼio tjínnile kjoandosin nga kui si̱kjaʼaitsjeen nichxin xi sʼa nroa. Tojo ma jngo chjota kʼianga yátsʼi̱n kotsenni, alikui fi kixikixi, kʼoatisʼinni tsanda ñá, alikui nda si̱xálee je Jeobá tsakui si̱kjaʼaitsjeen jmeni xi jekʼoakoan ngasʼa (Luc. 9:62).

4. Jmé xi chótʼayajiaan i̱ kjoaʼmiya jebi.

⁴ I̱ kjoaʼmiya jebi, jan koya tjínni xi kuinókjoañá xi síkjaʼaitsjenjinná jmeni xi jejaʼato: * nga yaoná nibalee, nga  bʼengijtiaa tokoán kʼoa nga tosi tonda jée fané yaoná. Nga chótʼayajiaan nga jngó jngó koya jebi, jchañá josʼin koasenkaoná je kjoafaʼaitsjen xi tsjoá Biblia nga si̱chajiaan “xi jejaʼato” kʼoa nga kʼoénelee yaoná nga kuichotjenngiaa jmeni “xi sʼa nroa” (Filip. 3:13).

5. Jméni xi tsoná Eclesiastés 7:10.

⁵ (Tʼexkiai Eclesiastés 7:10). * Je versículo jebi ali tsa kʼoajin tso nga chʼaotjín tsa kʼoasʼin si̱kjaʼaitsjeen nga nda tsakiyoaa ngasʼa, xi tsín kixi tíjna kuinga kʼoasʼin si̱kjaʼaitsjeen ánni nga ngisa nda tsakiyoñá tikʼoajinni ndʼai. Nga kui faʼaitsjenná xi ndatjín kinʼia ngasʼa jngoo kjoatjao xi tʼatsʼe Jeobá nroani. Xi tsín ndatjín kʼiaa nga kui ningósonkoaa josʼin tsakiyoaa ngasʼa kʼoa josʼin tiyoaa ndʼaibi kʼoa tsa kʼoasʼin si̱kjaʼaitsjeen nga tsín tinda tiyoñá.

6. Ánni nga tsín ndatjínni nga ngotjo ngosa kʼoasʼin si̱kjaʼaitsjenñá nga ngisa nda tsakiyoaa ngasʼa. Jngo choa̱ tʼejnai.

⁶ Ánni nga tsín ndatjínni nga ngotjo ngosa kʼoasʼin si̱kjaʼaitsjenñá nga ngisa nda tsakiyoaa ngasʼa. Nga̱ tokuijin si̱kjaʼaitsjeen nga nda tsakiyoaa kʼoa alikuijin kuenta sʼiaan je kjoa xi kitjatojiaan. Si̱kjaʼaitsjenla jokoan je chjota israelita, kʼianga jekitjoni ya Egipto, ngotjo kichajinnile jokji kjoañʼai tsakjaʼá, kʼoa tokui jaʼaitsjenle nga nda tsakjien. Kʼoakitso nga tokjoatjao kiskine je jti̱, pepino, sandía, oxo̱ kao tontsjo (Núm. 11:5). Tonga alikui tokjoatjao kiskine je tsojmi xi kisʼe ya Egipto, ngisani tse tsakʼéchjí jmeni xi kiskine, nga̱ choʼnda koan kʼoa totaon tsaʼya (Éx. 1:13, 14; 3:6-9). Tonga ngotjo kichajinnile jmeni xi koantʼain kʼoa tokui kisimekon jmeni xi kiskine. ʼNdele nga kui sikjaʼaitsjen josʼin tsakasenkao Jeobá, tosaa kui kisikjaʼaitsjen josʼin tsakatio ngasʼa. Je Jeobá alikui kisasenle nga kʼoakisʼin (Núm. 11:10).

7. Jméni xi tsakasenkao jngo tichjaa nga tsín yaole kisibale.

 ⁷ Jméni xi koasenkaoná nga tsín yaoná si̱balee. Kataʼyala jokoan jngo tichjaa xi kʼia kichosíxá nga nó 1945 ya Betel xi tíjna ya Brooklyn. Nga jeki nichxin jngo ndsʼee chixankao xi kʼoati ya Betel síxá, nkjín nó nga ya Betel kisixá nga jao. Nga nó 1976, je xʼinle tichjaa kitjochʼinle, kʼoa kʼianga tojeme kuiyá, nda kjoafaʼaitsjen kitsjoale. I kitsole: “Nʼio nda tiyokoaa xíngiaa. Nʼio nkjín chjota xi tsín kʼoasʼin tjío”. Kʼoa i kitsosale: “Alikuijin nʼio nikjaʼaitsjain. Chaan nda sʼe̱ni tokuin nga jekoai nichxin. Ali chʼaojin bʼai tokuin kʼoa ali tijijin mamachani yaoli. Tsjoa tʼai tokuin nga nda tsakiyoaa. Tʼatsʼe Niná nroani nga faʼaitsjenná xi ndatjín”. Nda kjoafaʼaitsjen kitsʼaile tichjaa.

8. Jmé kjoanda xi kisokole tichjaa nga kʼoakisʼin jokitsole je xʼinle.

⁸ Je tichjaa kʼoakisʼin jokitsole je xʼinle. Nda kisixále Jeobá saʼnda nga kʼien xi 92 nó tsakʼejna. Jngo jao nó tongini, i kitso: “Nʼio tsjoa sʼe tokoan kʼianga sikjaʼaitsjen xi tsʼato 63 nó nga to xále Niná tisʼian”. Kʼoa i kitsosa je tichjaa: “Je xi tsjoa bʼé tokoan kuinga ndsʼee sʼin chobá ngatsʼiaa kʼoa nga ya kuiyoaa nga jeʼndenaxó koa̱n Sonʼnde, nga toje Jeobá si̱xálee ngantsjai nichxin”. * Nʼio nda choa̱ tsakʼéjnaná tichjaa jebi nga kui kisikjaʼaitsjen ngantsjai nichxin xi sʼa nroa.

9. Tojo tso Levítico 19:18, kʼiáni nga sakʼoa bʼengijtiaa tokoán.

⁹ (Tʼexkiai Levítico 19:18). * Ñʼai maná kʼianga nichatʼalee tsa jokasíkaoná kʼoa tsa jokatsoná jngo ndsʼee, jngo miyoná kʼoa tsa jngo xíngiaa. Ñandia nga  jngo tichjaa xi kʼoakitso nga tao̱n kisichéle jngo tichjaa. Kisijéle kjoanichatʼa nga jekoanni, tonga je tichjaa xi jée kisʼene tokui kisʼeyaʼnde jko̱ jme xi tsakʼinle. Tsakui nichxin kjesa kui kjoa bitjatojinjián, tonga sakʼoajin bʼengijtiaa tokoán.

10. Jméni xi koasenkaoná nga tsín kʼoéngijtiaa tokoán.

¹⁰ Jméni xi koasenkaoná nga tsín kʼoéngijtiaa tokoán. Si̱kjaʼaitsjeen nga be je Jeobá ngayeje jmeni xi matʼeen. Be jme kjoa xi bitjatojiaan kʼoa nga tsín kixi tíjna jmeni xi matʼeen (Heb. 4:13). Aon male kʼianga kjoañʼai chjaʼá (Is. 63:9). Kʼoatsoná nga kjoaʼaxin ngayeje xi síkiʼaonná (Apoc. 21:3, 4).

11. Jósʼin basenkaoná nga tsín bʼengijtiaa tokoán.

¹¹ Kʼoati si̱kjaʼaitsjeen nga nda biyoaa kʼianga tsín bʼengijtiaa tokoán. Je tichjaa xi jée kisʼene koanjinle nga tije tísíkiʼaonni yaole nga tsakʼéngijti kon. Nga jeki nichxin kisichajin jmeni xi koan. Koanjinle kʼianga sichatʼaná Jeobá kʼiatsa si̱chatʼalee xíngiaa (Mat. 6:14). Ningalani tsín kixi tíjna jmeni xi tsakʼinle, alikui titsakʼéngijtini kon. Nga kʼoakisʼin nda kisʼe kon kʼoa ngisaa kui kuenta kisʼin nga je Jeobá sixále.

12. Jmé xi bakóyaná 1 Juan 3:19, 20.

¹² (Tʼexkiai 1 Juan 3:19, 20). * Ngatsʼiñá nga tsín nda satío tokoán kʼianga tsín ndatjín jmeni xi nʼia. Tsakui jmeni xi kinʼia kʼianga kjesa chotʼayájián je Énle Niná kʼoa tsakuije̱ jme xi kinʼia ninga jetsangínsʼenngindá. Kʼoa kuinga sakʼoa tsín nda sʼeni tokoán (Rom. 3:23). Ninga bʼenelee yaoná nga kui kʼoanʼia xi ndatjín, tojo nkjín kʼa saténgiaa ngatsʼiaa (Rom. 7:21-23; Sant. 3:2). Kʼianga tsín nda sʼe tokoán nga kui xi chʼaotjín kʼoanʼia, basenkaoná nga nindayaa yaoná kʼoa nga ñaki kʼoabʼé tokoán nga tsín tikui kʼoasʼianñá xi chʼaotjín (Heb. 12:12, 13).

13. Ánni nga tsín ndatjínsíni nga tosi tonda jée kjoáne yaoná.

¹³ Tonga sakʼoajin tojo tsín nda sʼe̱ tokoán ninga jekʼoakamaniná je jée xi tsakijnyaa kʼoa ninga ʼyaa nga jekisichatʼaná je Jeobá. Tonga kʼianga kʼoasʼin tosi tonda jée fané yaoná nʼio síkiʼaonná (Sal. 31:10; 38:3, 4). Ánni kʼoabixónsíñá. Kataʼyala tʼatsʼe jngo tichjaa xi tokui kisikjaʼaitsjenʼnde nga chʼao kisʼin ngasʼa. Itso: “Kʼoasʼin kisikjaʼaitsjen nga toxitsjoa ninga nʼio kʼoenele yaona nga sixále je Jeobá, nga̱ tsakui nichxin tsínni kuitjo̱ntje”. Tjínjinkʼa xi kʼoasʼin síkjaʼaitsjen, tonga alikui ndatjín nga jée kjoáne yaoná. Je Na̱i kui xi mele nga kʼoasʼin si̱kjaʼaitsjeen nga toxitsjoa jme xi tinʼia, tonga je Jeobá alikui kʼoasʼin síkjaʼaitsjen (tingósonkoai 2 Corintios 2:5-7, 11).

14. Jósʼin jchañá nga nda bekonná je Jeobá.

¹⁴ Tsakui nichxin i̱ bixoán: “Jósʼin skoeña nga nda bekonna je Jeobá”. Tsa kʼoasʼin nikjaʼaitsjeen kui xi tsonile nga mená nga sichatʼaná je Jeobá. Ánni kʼoabixónsíñá. Nichxin kjoatse jngo revista La Atalaya xi i̱ tso xi jaʼaitʼa: “Alikui nda sʼe tokoán nga tikui tima kjoa tsaojinñá jme xi kinʼia ngasʼa”. Kʼoa i kitsosa: “Ali nikʼajenjin tokuin, ali kʼoajinsʼin nikjaʼaitsjain nga kui jée tsakijnyi xi tsín  tikʼia jchatʼanili. Kui xi mele je Na̱i nga kʼoasʼin si̱kjaʼaitsjain. Tsa tsín nda sʼe tokuin nga kui kʼoanʼiai xi chʼaotjín, kui xi tsonile nga ndatjín ni̱ma̱li. Nangitokon katamai kʼoa tosi tonda tijélai Niná nga katasíchatʼali kʼoa nga katabasenkaoli nga nda sʼe̱ ijngokʼa tokuin. Kʼoasʼin tijélai nganʼio je Niná tojo sʼín jngo ʼndí kʼianga síjéle nganʼio je nʼaile ninga tikui tima kjoa kajinni, tsa si̱jélai nganʼio koasenkaoli, nga̱ je Jeobá nʼio nda chjota”. *

15, 16. Jósatío kon je ndsʼee kʼianga majinle nga nda bekon je Jeobá.

¹⁵ Nkjín ndsʼee xi nda satío kon kʼianga majinle nga nda bekonná je Jeobá. Tobʼelañá, jela jngo jao nó tjínle, nʼio tsakasenkao jngo ndsʼee kʼianga kui tsakʼéxkia ya jñani “La Biblia les cambió la vida” tso. Kui nchja̱ni tʼatsʼe jngo tichjaa xi ñʼai koanle nga kʼoasʼin kisikjaʼaitsjen nga tsjoake Jeobá xi totʼatsʼe nga tsín ndatjín jme xi kisʼin ngasʼa. Tojo kʼoasʼin kisikjaʼaitsjen ninga jenkjín nó jaʼato nga kisʼenngindá. Xi tsakasenkao kuinga kui kisikjaʼaitsjen nga tsakʼéchjíntjainá je Jesús. *

¹⁶ Jósʼin tsakasenkao jmeni xi tsakʼéxkia je ndsʼee. Itso: “Ngasʼa xtia kui nʼio kitsjentʼale je pornografía, tonga tsín tikui kiskotsennile nga jekoanni, kʼoa chriansʼaa nga tikui kjoa kiskajinngáña. Kisijéle nganʼio je xi chjotajchínga sʼin tjío, kʼoa tibʼenele yaona nga tsínkui kjoa ska̱jin jngokʼa. Kʼoatsona je xi chjotajchínga sʼin tjío nga tsjoakena je Niná kʼoa nga tíjnanda nga sichatʼana. Ninga kʼoalani, sakʼoaa kʼoasʼe tokoan nga tsín jme chjína kʼoa nga tsín tsjoake koa̱nna Niná”. Je ndsʼee jebi kʼoatso nga nʼio tsakasenkao jme xi tsakʼéyanajmí je tichjaa. Itsosa: “Ndʼaibi majinna kʼiatsa kʼoasʼin sikjaʼaitsjen nga tsín sichatʼana je Jeobá joxi tsínjinni chjí tiʼbe nga tsakʼéchjíntjaina je Jesús nga koa̱n jchatʼa je  jéena. Tíjnatjaona je artículo jebi, kʼoa kʼiaa bʼexkia kʼianga kʼoasʼe tokoan nga tsín tsjoakena je Jeobá”.

17. Jmé xi tsakasenkao Pablo nga tsín tosi tonda jée tsakáne yaole.

¹⁷ Joni je ndsʼee xi jekanikʼaxkiaa kʼoati koan je pastro Pablo. Tsee jée tsakajngi nga kjesa chjotale Cristo majin. Ningalani tsín kichajinle jmeni xi kisʼin, alikui kui nʼio kisikjaʼaitsjen (1 Tim. 1:12-15). Kʼoasʼin tsabekon je kjoabʼechjíntjaile Jesús joni jngo kjoatjao xi je Jeobá kitsjoale (Gál. 2:20). Alikui tosi tonda jée tsakáne yaole, kui kisikjaʼaitsjen josʼin nga ngisa nda sixále je Jeobá.

18. Jmé xi kachotʼayá i̱ kjoaʼmiya jebi.

¹⁸ Jmé xi kachotʼayajiaan i̱ kjoaʼmiya jebi. Xi títjon, nga ndatjín xi faʼaitsjenná jngoo kjoatjao xi tʼatsʼe Jeobá nroani, ningalani nʼio nda tsakiyoaa ngasʼa ngisaa nda kuiyoaa nga jeʼndenaxó koa̱n Sonʼnde. Xi majaoni, tsa tsín kixi tjín jmeni xi koantʼeen, tsa si̱chatʼalee xíngiaa tosi tonda nda si̱xálee je Jeobá. Xi majanni, nga tosi tonda jée fané yaoná alikui tsjoa sʼe tokoán nga nixálee je Jeobá. Joni je Pablo, machjén nga kʼoéjngoaa tokoán nga jekisichatʼaná je Jeobá.

19. Kʼianga jekjoaʼaí sonʼnde chjotse, jósʼin ʼyañá nga tsín tikui kjoaʼaítsjenniná xi chʼaotjín kinʼia ngasʼa.

¹⁹ Kʼianga jekjoaʼaí sonʼnde chjotse, kuiyoñá ngantsjai nichxin, kʼoa ali tikui kjoaʼaítsjenniná xi chʼaotjín kinʼia ngasʼa. Je Biblia kʼoatso, kʼianga kui nichxin “je kjoa xi jaʼato jetondiaa jchajin” (Is. 65:17). Tjínkʼa xi jenkjínná nó nga tinixálee je Jeobá kʼoa xi jenʼio jchíngaa, tonga nga jekjoaʼaí sonʼnde chjotse, koa̱nxtiya jngokʼa (Job 33:25). Kuinga tsín koa̱n kui nʼio si̱kjaʼaitsjenñá xi jejaʼato, tosa kui nʼio kuenta sʼiaan nichxin xi sʼa nroa.