1, 2. Ánni nga koakonilee xi ñaki kjoatsjoacha je xíngiaa.

NKJÍN koya anni nga bakonilee xi ñaki kjoatsjoacha je xíngiaa. Yaa Biblia tsoyaná ánni nga kʼoasʼiansíñá. Itso: “Alikui katatsjionkonli je xi ñaki kjoatsjoacha kao je kjoakixi [...]. Tsa kʼoasʼiain, ya ngixko̱n Niná kao ngixko̱n chjota ndasʼin kuijnai kʼoa kʼoasʼin jchali nga tjínli kjoachjine”. Kʼoa “je xi nʼio bʼénele yaole nga básjai je kjoakixi kao xi ñaki kjoatsjoacha so̱kole kjoabijnachon” (Prov. 3:3, 4; 11:17, nota; 21:21).

² Jan koya tjínni xi síkʼaxki̱ Biblia ánni nga koakosíñá xi ñaki kjoatsjoacha. Xi títjon, kuinga ngisa chjí bekonná je Niná. Xi majaoni, kʼianga bakoá xi ñaki kjoatsjoacha tiñá basenkaoniná. Tobʼelañá, sʼená xi ñaki miyo. Xi majanni, tsa koakoá xi ñaki kjoatsjoacha tsee kjoanichikontʼain sʼe̱ná nichxin xi nroa, jolani nga kuiyoaa ngantsjai nichxin. Kuinga nitjosonñá nga i̱ tsoná je Jeobá: “Takolao xíngio xi ñaki kjoatsjoacha kao kjoamatokon” (Zac. 7:9).

3. Jmé xi chótʼayajiaan i̱ kjoaʼmiya jebi.

³ I̱ kjoaʼmiya jebi, kui nga ño koya jebi chótʼayajiaan: ʼyáni xi tjínnele koakolee xi ñaki kjoatsjoacha, jmé xi bakóyaná je libro xi tsʼe Rut josʼin tíjna nga bakoá xi ñaki kjoatsjoacha, jósʼin koakoá xi ñaki kjoatsjoacha nichxin xi tiyoaa ndʼaibi, kʼoa jósʼin basenkaoná nga kʼoanʼia.

4. Jósʼin chjénngilee je Jeobá nga bakó xi ñaki kjoatsjoacha (Marcos 10:29, 30).

⁴ Tojosʼin tsaʼyaa ya kjoaʼmiya xi jaʼato, je Jeobá tojé bakóle xi ñaki kjoatsjoacha je xi tsjoake kʼoa xi je síxále (Dan. 9:4). Mená nga kʼoasʼiaan jotso Efesios 5:1, nga i̱ tso: “Chjénngilao Niná, joni tsa ʼndí xi kjaínga tjaocha”. Kuinga meniná nga koakolee xi ñaki kjoatsjoacha je ndsʼee kao tichjaa xi tjío ya jinjtín (tʼexkiai Marcos 10:29, 30). *

5, 6. Jngo choa̱ tʼejnai josʼin bakolee kjoatsjoacha toʼya chjotani.

⁵ Kʼianga koa̱njinná josʼin tíjna xi ñaki kjoatsjoacha, ngisaa tsjoacha koaan je ndsʼee. Jngola choa̱ kataʼyaa josʼin tíjna xi ñaki kjoatsjoacha kʼoa josʼin majinle je chjota nga kixi mangíntʼalee tsa ʼyani.

⁶ Si̱kjaʼaitsjenla jokoan ñandia kʼianga kiskangindá je chitso xi tíjnaya je pastro Pablo. Je Pablo kao chjota xi ya tjíoya chitso yaa saʼnda kicho ya ʼnde xi tíjnajin ndáchikon xi Malta ʼmi. Je chjota xi ya tsʼe nda kiskoeya ningalani tsín bexkon (Hech. 28:2, 7). Je chjota xi Malta tsʼe kʼoasʼin tsakakóle kjoatsjoacha tojo sikao toʼyani xi kjoa tíjnajin. Nga kʼoakisʼin chjota jebi, kui kjoatsjoacha tsakakó xi bakolee toʼya chjotani.

7, 8. 1) Jósʼin tíjna nga bakoá xi ñaki kjoatsjoacha. 2) Ánni nga kui chótʼayajin kʼasíñá jmeni xi tso je libro xi tsʼe Rut.

⁷ Kuila kataʼyaa ndʼaibi je choa̱le David kao Jonatán josʼin tíjna nga bakoá xi ñaki kjoatsjoacha. Je David tsakakóle xi ñaki kjoatsjoacha je Jonatán ningalani je nʼaile Jonatán koanmele kisikʼien je David. Ningalani jenʼio nkjín nó nga kʼien je Jonatán, je David tosi tonda tsakakóle xi ñaki kjoatsjoacha je Mefibóset, xi tile koanni Jonatán. Alikuijin kʼoakisikao David tsa kjaʼaí chjotalani. Kuinga kʼoakisʼinni nga nʼio miyole koanni Jonatán kʼoa nga nʼio kitsjentʼale xínkjín (1 Sam. 20:9, 14, 15; 2 Sam. 4:4; 8:15; 9:1, 6, 7).

⁸ Nʼio nkjín koya xi majinná josʼin tíjna xi ñaki kjoatsjoacha kʼianga chotʼayajiaan jmeni xi tso je libro xi tsʼe Rut. Jmé xi bakóyaná josʼin tsakakó xi ñaki kjoatsjoacha je chjota xi síkʼaxki̱ je libro xi tsʼe Rut. Jósʼin kjuintjenngiaa choa̱ jebi ya jinjtín. *

9. Ánni nga kʼoakitsosíni Noemí nga kontra tíjnale Jeobá.

⁹ Je libro xi tsʼe Rut kui bʼéyanajmí xi tʼatsʼe Noemí, tʼatsʼe Rut xi ʼndale koan Noemí, kʼoa tʼatsʼe Boaz, chjota jebi xínkjín koan Noemí kʼoa tsjoake koan Niná. Kʼianga kjinrá koan ya Israel, je Noemí kao xʼinle kʼoa kao nga jao xtile yaa naxinandá Moab kikatio. Yaa kʼien je xʼinle Noemí, kʼoa je xtile yaa chixan tonga kʼoati kʼien (Rut 1:3-5; 2:1). Nga kui kjoa jaʼatojin Noemí nʼio kisikʼajenle kon. Nʼio aon tsakʼé kon, saʼnda kʼoasʼin kisikjaʼaitsjen nga kontra tíjnale Jeobá. I kitso xi tʼatsʼe Niná: “Je Niná xi ngisasa tse nganʼio tjínle nʼio aon tíbʼé tokoan”.  Kʼoa i kitsosa: “Kontra tíbʼejnana je Jeobá. Kjoañʼai tísíkʼéjnajinna je Niná xi ngisasa tse nganʼio tjínle” (Rut 1:13, nota, 20, 21).

10. Jókisʼin Jeobá kʼianga tsín kixi tíjna jme xi kitso Noemí.

¹⁰ Jókisʼin Jeobá nga kʼoakitso je Noemí. Alikui kitsjionkon, tosaa koanjinle jotjín kon je Noemí. Je Jeobá majinle nga sakʼoa tsín kixi tíjna jmeni xi tso jngo chjota xi chjine kʼianga kjoa faʼatojin (Ecl. 7:7). Je Noemí tjínnele nga tjín xi tsakasenkao nga koanjinle nga tsín kitsjionkon je Jeobá. Jósʼin tsakasenkao je Niná (1 Sam. 2:8). Jé Niná xokisʼin nga tsakakóle Rut xi ñaki kjoatsjoacha je Noemí. Je Rut ngasin nganda tsakasenkao je na̱chále nga nda kisʼeni kon kʼoa nga koanjinle nga tsjoake je Jeobá. Jméni xi bakóyaná je choa̱le Rut.

11. Ánni nga binyakaoniná je ndsʼee kʼianga nroajen tokoán.

¹¹ Nga tjínná xi ñaki kjoatsjoacha binyakaoñá je xi tjíonroajen kon. Tojo kisʼin je Rut nga tsakasenkao Noemí, kʼoati tjín ndsʼee xi binyakaoná kʼianga nroajen tokoán kʼoa nga ba satío tokoán. Binyakaoná jokji tjen kʼoamale nga̱ tsjoakená (Prov. 12:25, nota; 24:10). Nga kʼoasʼín, fitjenngi kjoafaʼaitsjen xi kitsjoa je pastro Pablo, nga kitso: “Tinʼiokon xi choa tjíokon, tinyakao xi tsínle nganʼiojin, tikjaínlao ngatsʼi” (1 Tes. 5:14).

12. Jósʼin koa̱n kuisenkoaa jngo ndsʼee xi tísíkʼajenle kon.

¹² Kʼiatsa jngo ndsʼee tísíkʼajenle kon, je xi ngisa koasenkao kuinga kuinóʼyalee kʼoa kʼoakʼuínlee nga tsjoachaa. Je Jeobá kuenta sʼín josʼin binyakoaa je choʼndale (Sal. 41:1). Ya Proverbios 19:17 itso: “Je xi bakóle kjoanda je xi ma̱ tíjna jé Jeobá síkinyale, kʼoa jé tsjoángajaonile jmeni xi sʼín”.

13. Jméni xi kisʼin je Rut xi tsín kʼoakisʼin je Orpá, kʼoa jósʼin tsakakó xi ñaki kjoatsjoacha (chótsenlai sén xi faʼaitʼa ya portada).

¹³ Kʼianga koa̱njinná josʼin tíjna xi ñaki kjoatsjoacha, kuila kataʼyaa jokoan je Noemí kʼianga jekʼien xʼinle kao nga jao xtile. Ki ijngokʼani Noemí ya ʼndele kʼianga jekisʼejinle nga tísíchikontʼain Jeobá je naxinandále kʼoa nga títsjoále xi tjíokjine (Rut 1:6). Kikao nga jao ʼndale, tonga kʼianga jetjenyandiaa, je Noemí jan kʼa kʼoakitsole nga katafini ya Moab. Kʼoa jókisʼin je ʼndale nga kʼoakitsole. Je Biblia itso: “Je Orpá tsakʼéndsoʼa na̱chále kʼoa ki, tonga je Rut alikui kisikʼéjna na̱chále” (Rut 1:7-14). Je Orpá kʼoakisʼin jokitsole je Noemí, ki ijngokʼani ya Moab, tonga je Rut alikui kʼoakisʼin. Koanjin nga ki ijngokʼani ndʼiale tsanda je, tonga nga tsjoake koan kjoaixi je na̱chále alikui kitsjionkon (Rut 1:16, 17). Ali tsa tokuijin nga ya tjínnele kʼoéjnakao  je na̱chále nga kʼoakisʼinni, kuinga ñaki kʼoatjín kon nga tsjoake koan nga ya kikaoni. Jmé xi bakóyaná jokisʼin je Rut.

14. 1) Jósʼin kʼa je ndsʼee. 2) Tojo tso Hebreos 13:16, jmé xi tsjoa báya kon Niná.

¹⁴ Nga bakoá xi ñaki kjoatsjoacha basjailee josʼin binyakoaa xíngiaa. Tojo koan nichxin kjoatse, nʼio nkjín testigole Jeobá xi bakóle xi ñaki kjoatsjoacha je ndsʼe̱, kʼoasíkao ninga je xi tsín bexkon. Tobʼelañá, kʼianga jngo kjoaxkón sʼe, kjonangi jósʼin koa̱n tsjoánganʼio. Kʼoa nga sʼejinle nga jngo ndsʼee xi ñʼai kjimale tao̱n, básjaiya josʼin koa̱n kuinyakao. Fitjenngi je choa̱le chjotale Cristo xi tsakatio nga siglo 1 xi Macedonia tsʼe nga kitsjoasonsa jokji tjen kicho nganʼiole (2 Cor. 8:3). Tojo kisʼin chjotale Cristo jebi, je ndsʼee tsʼatone kʼoakji tsjoá jokji tjen bichó nganʼiole. Síkʼaya nichxinle kʼoa tsjoá jme xi tjínle nga binyakao je ndsʼe̱ xi nganʼio machjénle. Je Jeobá tsjoa sʼe kon nga kʼoasʼin bakó xi ñaki kjoatsjoacha je choʼndale (tʼexkiai Hebreos 13:16). *

15, 16. Jósʼin tsakakó Rut nga tsín totsakʼéjngo kon.

¹⁵ Tsee xi bakóyaná je choa̱le Rut kao Noemí. Kataʼyala kʼa.

¹⁶ Alikui tokʼoéjngoaa tokoán. Koankaile je Noemí kʼianga kʼoakitsole Rut nga koaikao ya Judá. Tonga je Rut alikui totsakʼéjngo kon. Jósʼin kichomani nga kʼoakisʼin. Je Énle Niná itso: “Kʼianga tsabe Noemí nga kjoanʼio mele koaikao je Rut, alijo tikitsonile” (Rut 1:15-18).

17. Jméni xi koasenkaoná nga tsín tokʼoéjngoaa tokoán.

¹⁷ Xi bakóyaná: Kjoatsejta machjénná nga kuinyakoaa je xi síkʼajenle kon, kʼoa tsín koa̱n nga tokʼoéjngoaa tokoán. Tobʼelañá, tsa jngo tichjaa xi nganʼio machjénle, tsakui nichxin koa̱nkaile nga kʼoakʼuínlee nga kuisenkoaa. * Ninga kʼoalani, tsa tjínná xi ñaki kjoatsjoacha alikuijin kuinjíotokoán (Gál. 6:2). Tsakuini nichxin koa̱nmele nga kuisenkoaa kʼoa si̱nʼioá kon.

18. Jméni xi nʼio aon tsakʼé kon je Rut.

¹⁸ Alikui yaoná si̱jtilee. Kʼianga kicho Rut kao Noemí ya Belén, je Noemí kiskajin je yánchjín xi bexkon kʼoa i kitsole: “Tjínyejena nga kia, tonga tokjitia ndsa̱ nga kisikjinroanina je Jeobá” (Rut 1:21). A fiyaa jkoaa jokisʼe kon je Rut nga kʼoakitso je na̱chále. Nga̱ je Rut alikui kitsjionkon je Noemí, kiskiʼndákao, kisinʼio kon kʼoa nʼio nkjín nichxin nga ñatjen tsakʼetsoma. Ninga kʼoalani, je Noemí kʼoakitso nga tokjitia ntsja nga kichoni ya Belén. Ningalani tsín kitsjionkon Rut, nga kʼoakitso je Noemí joxi tsínjinni tsabechjí jmeni xi kisʼin. Nga kʼoakitso je Noemí aonjin koanle je Rut, tonga alikui kitsjionkon.

19. Jmé xi koasenkaoná nga tsín kuinjíotokoán jngo xi tísíkʼajenle kon.

¹⁹ Xi bakóyaná: Tsakui nichxin aon kʼoe tokoán jmeni xi kuitsoná jngo tichjaa xi ba tjín kon ninga tibisenkoaa. Tonga alikui yaoná si̱jtilee. Alikui kuinjíotokoán kʼoa si̱jélee Jeobá nga katabasenkaoná josʼin koa̱n si̱nʼioá kon (Prov. 17:17).

20. Jméni xi tsakasenkao je Rut.

 ²⁰ Si̱nʼioá kon ʼyani xi nganʼio machjénle. Je Rut tsakakóle xi ñaki kjoatsjoacha je Noemí, tonga kʼoati koanchjénle nga ʼya xi kisinʼio kon tsanda je. Jé Jeobá xi koanmele nga i̱ kitso je Boaz nga kitsjoanganʼiole je Rut: “Je Jeobá katasíchikontʼainli nga kʼoatinʼiai. Katatsjoáli chjíli je Jeobá, je Ninále Israel, nga kʼoasʼin jaʼaikijnangi jngale”. Je én jebi nʼio tsakasenkao je Rut. I kitso: “Tininʼioni tokoan, xi choʼndali ma, kʼoa nda tísʼe tokoan jonga tiʼminái” (Rut 2:12, 13). Jmeni xi kitsole Boaz je Rut nʼio tsakasenkao.

21. Tojo tso Isaías 32:1, 2, jméni xi sʼin je xi chjotajchínga sʼin tjío nga tjínle kjoatsjoacha.

²¹ Xi bakóyaná: Je ndsʼee xi bakó xi ñaki kjoatsjoacha kʼoati sakʼoa machjén nga ʼya xi tsjoánganʼiole. Je Boaz kʼoakitsole je Rut nga nʼio nda kisʼin nga tsakakóle kjoanda je Noemí. Tikʼoasʼinni nichxin xi tiyoaa ndʼaibi, je xi chjotajchínga sʼin tjío kʼoatsole je ndsʼee xi tjío ya jinjtín nga nʼio nda sʼín nga binyakao xi kjaʼaí. Nʼio binyakao je ndsʼee nga kʼoaʼmilee nga nʼio nda tjíosʼín (tʼexkiai Isaías 32:1, 2). *

22, 23. Jókisʼe kon je Noemí nga koanskanni, kʼoa ánni (Salmo 136:23, 26).

²² Nga jeki nichxin, jé Boaz kitsjoale tsojmi xi kiskine je Rut kao Noemí kʼoa tsʼato kʼoakji kitsjoale jotjín koanchjénle (Rut 2:14-18). Kʼianga kʼoasikji kjoanda tsakakó je Boaz, je Noemí i kitso: “Je Jeobá katasíchikontʼain, xi tíbakóle xi  ñaki kjoatsjoacha je xi tjíokon kʼoa kao xi jekʼien” (Rut 2:20a). Alikui tiʼaon tjínni kon je Noemí nga kʼia. Nga títjon i kitso: “Je Jeobá kontra tíbʼejnana”. Tonga nga jetsjoa tjín kon i kitso: “Je Jeobá tíbakóna xi ñaki kjoatsjoacha”. Jmé xi tsakasenkao nga tsjoa kisʼeni kon.

²³ Je Noemí chaan koanjinle nga tsínkʼia kitsjionkon je Jeobá. Je Jeobá kʼoasʼin tsakasenkaoni je Noemí nga je Rut kikao ya Judá (Rut 1:16). Je Noemí kʼoati koanjinle nga je Boaz kisichjén Jeobá nga tsakasenkao je kʼoa kao Rut (Rut 2:19, 20b). I̱jin kitso je Noemí: “Sʼani majinna. Je Jeobá alikuikʼia nga toʼan tísíkʼéjnana. Likui títsjionkonna” (tʼexkiai Salmo 136:23, 26). * Je Noemí kitsjoajinle kjoanda je Rut kao Boaz nga tsín kitsjionkon kʼoa nga tosi tonda tsakinyakao. Tsjoa kisatio kon kʼianga nda kisʼeni kon je Noemí kʼoa nga kitjonganʼiole.

24. Ánni nga tosi tonda koakonilee xi ñaki kjoatsjoacha je ndsʼee.

²⁴ Jméni xi kabakóyaná je libro xi tsʼe Rut josʼin tíjna xi ñaki kjoatsjoacha. Tsa tjínná xi ñaki kjoatsjoacha tosi tondajin kuinyakoaa je ndsʼee xi tjíosíkʼajenle kon kʼoa tsínjin kuinjíotokoán. Kʼoati fasjailee josʼin binyakoaa. Je xi chjotajchínga sʼin tjío machjén nga tsjoánganʼiole je ndsʼee xi bakó je xi ñaki kjoatsjoacha. Nʼio tsjoa satío tokoán kʼianga nda satíoni kon je ndsʼee nga síxále je Jeobá (Hech. 20:35). Je xi nʼio chjíle xi kuenta sʼiaan ngantsjai kuinga je Jeobá chjenngilee nga bakoá xi ñaki kjoatsjoacha, nga̱ je Jeobá nʼio tjínle xi ñaki kjoatsjoacha (Éx. 34:6; Sal. 33:22).