1, 2. 1) Ánni machjénni nga je Jeobá sinʼiotʼa xi chriansʼa chixan (Salmo 37:3, 4). 2) Jmé xi chótʼayajiaan i̱ kjoaʼmiya jebi.

A CHRIANSʼAA chixain axo jeme kuixain. Kuijin xi meno nga tsjoa sa̱tío tokon nga je kuiyokao chjota xi nʼio tsjoachao. Kʼianga bixan je chjota toxá kjoa sʼe sakʼoanile. Tonga kʼoati machjén nga kʼoendajin jmeni xi sʼin. Josʼin kʼoéndajion jmeni xi sʼiaon yaa kjuinroani tsa tsjoa sa̱tío tokon kʼoa tsa mai je nó xi fini. Kʼiatsa je Jeobá si̱nʼiotʼao, nda chjoéjion jmeni xi sʼiaon, ngisaa nʼio sʼe̱jna je kjoabixanno kʼoa tsjoa sa̱tío tokon. Tonga tsa tsín koanngíntjenngio je kjoafaʼaitsjen xi tsjoá Jeobá, kjoajin kuiyojion kʼoa tsínjin tsjoa sa̱tío tokon (tʼexkiai Salmo 37:3, 4). *

² Ningalani kui nchja̱ni kjoaʼmiya jebi tʼatsʼe xi chriansʼa chixan, kʼoati tsoya jme kjoa xi faʼatojin ngatsʼi xi jechixan. Kui jchaa je choa̱le choʼndale Niná xi tsakatio nichxin kjoatse xi xʼin kao xi yánchjín. Jchañá jmeni xi bakóyaná jokisʼin kʼoa josʼin tsakatiokao xínkjín. Kʼoati jchaa jmeni xi bakóyaná je choa̱le xi jechixan nichxin xi tiyoaa ndʼaibi.

3, 4. Jmé kjoa xi sakʼoa faʼatojin xi chriansʼa chixan.

³ Tjín ʼnde jñani kʼoaʼmile je xi chriansʼa chixan nga  kʼoasʼin katabatio tojosʼin batio ngatsʼi xi jechixan. Tsakui nichxin kʼoakuitsole je xijchále kʼoa tsa xínkjín nga tokjoan katasʼele ʼndíxti. Tsakui nichxin kʼoakuitsole je xi xínkjín mani kʼoa tsa miyole nga katabatse ndʼia jñani koationi kʼoa nga nda katasíchon.

⁴ Tsa tsín nda sikjaʼaitsjenjin jmeni xi sʼin je xi chriansʼa chixan nʼiojin tse tao̱n kjoentʼain yaole. Kʼoa tsakui nichxin tse sixá nga jao nga sijnda kʼiatsa tao̱nlani tsjéntʼain. Kʼiatsa kʼoalani koa̱n, likuijin tikoa̱nʼanile nga skótʼaya Biblia nga toje, nga skótʼayajtín ya yaniʼyale kʼoa nga kuitsoyason. Tsakui nichxin saʼnda tsín tikoa̱nʼanile nga koai kjoajtín xi totʼatsʼe nga sixáson ya tʼaxále ánni nga tse tao̱n kuinjenile kʼoa tsakuije̱ nga tsín sicha je xále. Tonga tsejin xi sicha nga̱ tsínjin koa̱n nga tsesa sixále je Jeobá.

5. Jmé xi bakóyali je choa̱le Klaus kao Marisa.

⁵ Nkjín choa̱ bakó nga tsín tsjoa satío kon je xi tokui básjai nga ngisasa nkjín tsojmi sʼe̱le. Kʼoakoan je Klaus kao Marisa. * Nga chixan kisixá ʼndeʼndee nga jao nga̱ kui xi koanmele nga ndasʼin koatio. Tonga tsínni tsjoa kisatio kon. Je Klaus itso: “Tsʼato kʼoakji tsojmi kisʼenajin jokji machjénnajin, tonga tsínkui kinikjaʼaitsjainjin josʼin nga ngisa nda si̱xálaijin Niná. Ñʼai koannajin kʼoa sakʼoa kichobejinnajin nga kinixáijin”. Tsakui nichxin kʼoati ʼyai nga tsínni tsjoa satío tokoán kʼianga tokui fasjee nga ngisa nkjín tsojmi sʼe̱ná. Tonga ali nikʼajenjinlai tokuin. Kuinyakaoli je xi nda choa̱ batío. Xi títjon jchaa, kui jmé xi bakóyale xi xʼin je choa̱le rey Jehosafat.

6. Tojo tso Proverbios 3:5, 6, jókisʼin rey Jehosafat kʼianga ñʼai tjín kjoa jaʼatojin.

⁶ Xi xʼion, a sakʼoaa chóbejinno je xá xi kjineno. Tsa kʼoalani, koasenkaono je choa̱le Jehosafat. Nga rey koan, jé kisʼenele nga kisikuinda naxinandá. Kisikuinda naxinandá jokji tjen kʼoakoanle. Tsakʼéndaa je xjáo xi kisʼendai naxinandá Judá kʼoa tsʼato 1,160,000 sondado kisʼele (2 Crón. 17:12-19). Nga jeki nichxin, ñʼai tjín kjoa jaʼatojin. Je rey Jehosafat, je familiale kao naxinandá nʼio nkjín sondado kichokʼetʼale xi ya tsʼe Ammón, Moab kao xi ya tsʼe nindo Seír (2 Crón. 20:1, 2). Jé Jeobá kisijéle nganʼio je Jehosafat, tojo tso Proverbios 3:5, 6 * (tʼexkiai). Jokitso nga tsakʼétsʼoa rey Jehosafat yaa faʼaitʼa 2 Crónicas 20:5-12, kʼoa yaa tsoya nga nʼio kisinʼiotʼa je Jeobá. Jókisʼin Jeobá nga  kinrʼoéle kʼianga tsakʼétsʼoale je Jehosafat.

7. Jókisʼin Jeobá nga kinrʼoéle kʼianga tsakʼétsʼoale je Jehosafat.

⁷ Jé Jahaziel, jngo chjota levita kisichjén Jeobá nga i̱ kitsole Jehosafat: “Chjóao ʼndeno, ali tsa nikjanjion kʼoa chótsaon josʼin kʼoasjentjaino je Jeobá” (2 Crón. 20:13-17). A kuinjele kjoajchán nga kʼoasʼin. Ali tsa chjotajin xi kʼoakitsole nga kʼoakatasʼín, jé Jeobá xokitsole. Kisitjoson je Jehosafat nga̱ jé Jeobá kisinʼiotʼa yaole. Kʼianga kinrʼoe rey Jehosafat je chjotakontrale, alikui tsa je sondadole kisikinyá títjon, jé kisikinyá títjon je chjota xi tsín jme ki̱cha̱ yʼa kʼoa xi tjíose. Tojo kitsole Jeobá je Jehosafat kisikinjele je kontrale (2 Crón. 20:18-23).

8. Jméni xi bakóyale xi xʼin je choa̱le Jehosafat.

⁸ Jmé xi bakóyano xi xʼion je choa̱le Jehosafat. Jon kjineno nga si̱kuindao je familiano, nga kuinyakao kʼoa nga kʼoailao jme xi machjénle. Kʼianga kjoa sʼeno, tsakui nichxin kʼoasʼin si̱kjaʼaitsjaon nga koa̱nno nga tojon kʼoéndajion. Ali tokuijin mangínño josʼin nikjaʼaitsjaon, tosa je Jeobá tʼetsʼoalai nga toji kʼoa tijélai nganʼio. Kʼoati tʼetsʼoai kao je chjoónli. Chótʼayao je Biblia nga je Jeobá katabándiaano, tʼexkiao je xo̱n xi bʼasje naxinandále kʼoa tangíntjenngio je kjoafaʼaitsjen xi faʼaitʼa. Tsakui nichxin tjínkʼa xi tsín sa̱sénle nga ya Biblia chʼa̱ngiño jmeni xi chjoéjion nga sʼiaon kʼoa tsa saʼnda kʼoakuitsono nga toxitsjoa nga kʼoasʼiaon. Tsakui nichxin kʼoakuitsono nga ngisa ndasʼin kuiyo kʼiatsa tao̱n sʼe̱no kʼoa tsa nkjín tsojmi sʼe̱no. Tikjaʼaitsjenjion jokisʼin je Jehosafat, tsakakó nga je Jeobá kisinʼiotʼa yaole. Je Jeobá alikui kitsjionkon je Jehosafat nga kixi kitʼale kʼoa kʼoati tsín tsjiónkonno tsanda jon (Sal. 37:28; Heb. 13:5). Kʼoa je xʼin kao je chjoón xi jechixan, jméni xi sʼin nga tsjoa sa̱tío kon.

9. Jméni xi ngisa kitsjoale kjoandosin je profeta Isaías kao chjoónle.

⁹ Je Isaías kao chjoónle kui ngisa kuenta kisʼin je xále Jeobá. Je Isaías profeta koan kʼoa tsakui nichxin kʼoati kui koan chjoónle, nga̱ je Biblia “profetisa” tsole (Is. 8:1-4). Je Isaías kao chjoónle kui ngisa kitsjoale kjoandosin nga je Jeobá tsabexkón. Alikui jao tjínná nga je Isaías kao chjoónle nʼio nda choa̱ batíole xi jechixan nichxin xi tiyoaa ndʼaibi.

10. Jósʼin koasenkao nga skótʼaya xi jechixan je én xi tongini kinokjoa nga koa̱nmele nga ndasa sixále je Jeobá.

¹⁰ Jósʼin koaitjenngi xi jechixan je choa̱le Isaías kao chjoónle. Kʼiaa nga kʼoasʼin sixále Jeobá jokji tjen kʼoakoa̱nle. Kʼianga nʼio sa̱tío kjoamakjainle koaan ñatjen skótʼaya je én xi tongini kinokjoa xi faʼaitʼa Biblia ánni nga skoe̱ni josʼin bitjoson ngantsjai jmeni xi tso Jeobá (Tito 1:2). * Koaan sikjaʼaitsjenjin josʼin sixále Niná nga kʼoati sitjoson je én xi tongini kinokjoa, jolani nga kʼoakitso je Jesús nga tjínnele sa̱kóyason je  Énle Niná jngo tjíjtsa Sonʼnde nga kjesa faʼaijin kjoafetʼa (Mat. 24:14). Kʼianga sʼe̱jngo kon xi jechixan josʼin tíbitjoson je én xi tongini kinokjoa xi faʼaitʼa Biblia, ngisaa koa̱nmele nga ndasa sixále je Jeobá.

11. Jméni xi kisʼin je Priscila kao Áquila, kʼoa ánni.

¹¹ Je xi chriansʼa chixan koasenkao je choa̱le Priscila kao Áquila, xi ya naxinandá Roma tsakatio. Kʼianga kinrʼoé xi tʼatsʼe Jesús chjotatjenngile koan. Nʼiojin tsjoa kisatio kon josʼin tsakatio. Tonga tsínjin tinda tsakationi kʼianga kʼoakitso je emperador Claudio nga tjínnele kuitjo ya naxinandá Roma ngatsʼi chjota judío. Si̱kjaʼaitsjenla jokoan je Áquila kao Priscila. Kʼianga jekitjoni ya naxinandá Roma, kʼiajin tsakásjaiʼnde jñani koa̱n koatio kʼoa jñani koa̱n kʼoejna negociole nga ndʼianajño sínda. Nga jexin kikatio, a tsín tikitsjoanile kjoandosin je xále Niná. ʼYañá jmeni xi kisʼin. Nga jeya tjío ya Corinto je Priscila kao Áquila tsakinyakao je jtín kʼoa kitsjoanganʼiole je pastro Pablo kʼianga kisinʼiojin je ndsʼe̱. Nga jeki nichxin, xin naxinandá kikatio jñani ngisa machjén xi tsoyason (Hech. 18:18-21; Rom. 16:3-5). Nʼiojin nda kisixále Niná kʼoa nʼiojin tsjoa kisatio kon.

12. Ánni machjénni nga kʼoendajin josʼin sixále Niná xi jechixan.

¹² Nichxin xi tiyoaa ndʼaibi, xi jechixan koaan koaitjenngi je choa̱le Priscila kao Áquila nga kui títjon xále Niná sikatío. Kʼiaa nga tosʼa tjíotsomakao xínkjín jngo xʼin jngo chjoón nga kʼoendajin josʼin sixále Niná kʼianga jekuixan. Kʼianga bʼéndajin josʼin sixále Niná kʼoa nga sítjoson jmeni xi bʼéndajin, be josʼin binyakao je nganʼiotsjele Niná (Ecl. 4:9, 12). Kataʼyala jokoan je Russell kao Elizabeth. Je Russell itso: “Kʼianga tosʼa titsomakoaijin xíngijin, kichobayanijin josʼin si̱xálaijin Niná”. Je Elizabeth itso: “Kʼianga kui kichobayanijin alikui kui tsakʼéchjoanajin jme xi kichjoejinjin  nga koanskanni kʼianga kuitjosonnajin jme xi tsakʼendajinjin”. Yaa Micronesia ki jñani ngisa machjén xi tsoyason.

13. Tojo tso Salmo 28:7, jósʼin kuichomani tsa je Jeobá si̱nʼiotʼaa.

¹³ Joni Russell kao Elizabeth, nkjín xi jechixan xi tokjimanile josʼin tjío nga ngisa tse nichxin síkʼayale nga tsoyason kʼoa nga tsoyale Biblia je chjota. Kʼiatsa kʼoasʼin kʼoendajin xi jechixan nga ngisa nda sixále je Jeobá kʼoa sitjoson jme xi kʼoendajin tsee kjoanichikontʼain sʼe̱le. Nga skoe̱ josʼin sikuinda Jeobá ngisaa sinʼiotʼa kʼoa tsjoa sa̱tío kon (tʼexkiai Salmo 28:7). *

14. Jmé xi kisʼin je pastro Pedro kao chjoónle nga koankjainle nga kuitjoson jme xi tso Mateo 6:25, 31-34.

¹⁴ Je xi kʼoati nda choa̱ bʼéjnale xi jechixan jé pastro Pedro kao chjoónle. Kʼiala nga jejaʼato jaon sá kʼoa tsa jngo nó nga tsabexkon Jesús, nʼio tjínle kjoandosin jme xi kisʼin je pastro Pedro. Kʼianga kʼoakitsole Jesús nga chjotatjenngile katama, tjínnele kisikjaʼaitsjenjin jmeni xi sʼin nga̱ jti̱ bʼasjengindá nga bajngiʼa familiale (Luc. 5:1-11). Je xi kisʼin kuinga tosa kui kiskoejin nga kitjenngile Jesús. Nʼio nda kisʼin nga kui kiskoejin Pedro. ʼYañá nga kitsjoanganʼiole je chjoónle nga̱ je Biblia kʼoatso nga ya kikao choatse nga kjin kikakóyason je Pedro kʼianga jejaʼáyanile Jesús (1 Cor. 9:5). Nga nʼio nda choa̱ tsakʼéjna je chjoónle Pedro koaan kitsjoale kjoafaʼaitsjen Pedro je xi chjoón kao xi xʼin (1 Ped. 3:1-7). Je Pedro kao chjoónle koankjainle nga kʼoatso je Jeobá nga tsjoále jme xi koa̱nchjénle kʼiatsa kui títjon xále Niná sikatío (tʼexkiai Mateo 6:25, 31-34). *

15. Jméni xi bakóyali jokisʼin je Tiago kao Esther.

¹⁵ Tsa jenkjín nó chixaon, jméni xi sʼiaon nga koa̱nmeno tosi tonda si̱xálao Jeobá. Jngo koya xi koasenkaono kuinga kuenta tʼiaon jmeni xi tjíosʼín xi kjaʼaí ndsʼee xi jechixan. Tobʼelañá, koaan chótʼao jotjíosʼín kʼa je ndsʼee tojosʼin bʼéyanajmí jñani “Kao kjoatsjoa kitsjoánganʼio” tso. Kui tsakʼéxkia je ndsʼee Tiago kao Esther, xi Brasil tsʼe. Nga kui tsakʼéxkia tsakinyakao nga koanmele ya kitsjoánganʼio jñani machjén xi tsoyason. Je Tiago itso: “Nga kui tsakʼexkiaijin josʼin tíbasenkao Jeobá je choʼndale kʼoati koanmenajin tsaʼyaijin josʼin koasenkaonajin kʼoa josʼin sikuindanajin je Jeobá”. Nga jeki nichxin, je ndsʼee jebi kao chjoónle yaa Paraguay ki, kʼoa yaa tjíotsjoánganʼio jñani én portugués nokjoa saʼnda tjen nó 2014. Je Esther itso: “Je texto xi nʼio tsjoachaijin ngajoaijin kui Efesios 3:20. Tiʼyaníjin josʼin bitjoson texto jebi nga  je Jeobá tinixálaijin”. Je carta xi kiskile Pablo je chjotale Cristo xi tsakatio ya Éfeso kʼoakitsole nga je Jeobá ngisaa tse tsjoáná jokji nga machjénná, kʼoa bitjoson ngantsjai én jebi.

16. ʼYáni xi koa̱n kuinyakao je ndsʼee xi chriansʼa chixan xi kui tjíobʼéndajin josʼin sixále Niná.

¹⁶ Xi chriansʼa chixaon kʼoati koasenkaono jotjíosʼín je ndsʼee xi jekjoatse chixan xi je Jeobá tjíosínʼiotʼa. Tjínkʼa je ndsʼee xi jechixan xi nʼio nkjín nó nga ñaki to xále Niná tjíosʼín. Koaan tijélao kjoafaʼaitsjen tsa nganʼio machjénno josʼin koa̱n si̱xálao Niná. Tsa kʼoasʼiaon, kʼoatisʼin koakoño nga je Jeobá ninʼiotʼao (Prov. 22:17, 19). Je xi chjotajchínga sʼin tjío kʼoati koa̱n kuinyakaono nga ngisa nda si̱xálao Niná kʼoa nga kuichotjenngio jme xi tibʼendajion.

17. Jókisʼin je Klaus kao Marisa, kʼoa jmé xi bakóyaná je choa̱le.

¹⁷ Sakʼoajin tsín kʼoakoa̱n josʼin tjínndajinná nga si̱xálee Niná. Kataʼyala ijngokʼá je choa̱le Klaus kao Marisa, xi jenása kanikʼaxkiaa. Jan nó koanskanni nga jechixan, kisikatío ndʼiale kʼoa yaa kitsjoánganʼio jme xá xi kisʼe ya sucursal xi tíjna Finlandia. Tonga ba kisatio kon nga kisʼejinle nga tsín koa̱n nga tsʼato jaon sá ya koatio. Nga koanskanni kʼoatsakʼinle tsa mele nga én árabe skótʼaya, kʼoa ndʼaibi nʼio tsjoa tjío kon nga xin naxinandá tjíotsjoánganʼio nga én árabe. Kʼianga síkjaʼaitsjenjin Marisa josʼin tsakʼejna ngasʼa itso: “Alikui choa ñʼai koanna nga kui kʼoakisʼian jmeni xi sa kje kʼoasʼinjian ngasʼa. Tjínnele nga ñaki toje Jeobá kisinʼiotʼa yaona. Tonga tiʼbeña josʼin tíbasenkaonajin je Jeobá. Ngisaa kjimanʼiotʼa je Jeobá nga kʼoasʼin tinixálaijin”. Tojosʼin tiʼyaa, je Jeobá sichikontʼainná kʼianga ñaki je si̱nʼiotʼaa.

18. Jméni xi koa̱n sʼin xi jechixan nga je Jeobá sinʼiotʼa.

¹⁸ Je kjoabixan jngoo kjoatjao xi tʼatsʼe Jeobá nroani, kʼoa je Niná kui xi mele nga tsjoa sa̱tío kon je xi bixan (Prov. 5:18; Mat. 19:5, 6). Xi chriansʼa chixaon, koaan si̱kjaʼaitsjenjion jméni xi sʼiaon. A tibakolao Jeobá nga bʼailao kjoanda tʼatsʼe kjoanichikontʼain xi títsjoáno. Tʼetsʼoalao je Jeobá, kʼoa tjasjaijion ya Biblia je kjoafaʼaitsjen xi koa̱nchjénno kʼoa titjoson jmeni xi tso. Ali jaojin bʼao tokon nga nʼio nda kuiyo kʼoa nʼio tsjoa sa̱tío tokon kʼiatsa kui xále Jeobá títjon si̱kʼéjnao.