1. Jméni xi ʼyaa xi chjotale Cristo maa, kʼoa jméni xi tsín jao tjín tokoán.

 ʼYAÑÁ nga toxá batiochjoa kʼani chjota kʼianga ʼmiyasoán kʼoa ngisajin koatiochjoa nichxin xi sʼa nroa (Dan. 11:44; 2 Tim. 3:12; Apoc. 16:21). Ñaki tjínjngoo tokoán nga je Jeobá koasenkaoná. Jósʼin ʼyañá. Je Jeobá basenkao ngantsjai je choʼndale nga bitjosonle je xá xi bánele ninga ñʼai tjín sakʼoa. Nga jchaa nga kʼoatjín jebi, kataʼyala jokoan je profeta Ezequiel, jé kitsoyasonle chjota judío xi ya Babilonia kinikatíonʼio.

2. 1) Jókitso Jeobá tʼatsʼe chjota judío jñani kinikasén Ezequiel nga kuitsoyasonle (Ezequiel 2:3-6). 2) Jmé xi chótʼayajiaan i̱ kjoaʼmiya jebi.

² Jókoankjoan chjota xi kitsoyasonle Ezequiel. Je Jeobá kʼoakitso nga je chjota judío alikui tsakʼaʼén, tsʼeen koan kʼoa nʼio xíjin koan. Nʼio tsʼen koan nga̱ yaa kiningósonkao je naʼyá kʼoa joni tsa cho̱naʼyá. Kuinga nkjín kʼa i̱ kitsonile Jeobá je Ezequiel: “Ali nokjonjin” (tʼexkiai Ezequiel 2:3-6). b Jan koya tjínni xi tsakasenkao Ezequiel nga kitjosonle je xá xi kisʼenele: Xi títjon, jé Jeobá kisikasén. Xi majaoni, jé nganʼiotsjele Niná tsakasenkao. Kʼoa xi majanni, kui Énle Niná tsakasenkao nga nʼio kisʼejna je kjoamakjainle. Jósʼin tsakasenkao nga jan koya jebi, kʼoa jósʼin basenkaoná tsanda ñá ndʼaibi.

3. Jmé énni xi nʼio tsakasenkao je Ezequiel, kʼoa jméni xi kitsole Jeobá nga tsakʼéjngo kon nga je koasenkao.

³ Je Jeobá i kitsole Ezequiel: “Tisikasénle” (Ezeq. 2:3, 4). Nʼiojin tsakasenkao Ezequiel nga kʼoatsakʼinle. Jaʼaitsjenjinle nga kʼoati kitsole Jeobá je Moisés kao Isaías nga profetale koan (Éx. 3:10; Is. 6:8). Je Ezequiel kʼoati be nga je Jeobá tsakasenkao profeta jebi nga kitjosonle je xá xi ñʼai tjín kisʼenele. Nga jao kʼa “tisikasénle” kitsole Niná, koanjinle nga je koasenkao. Ya libro xi tsʼe Ezequiel nkjín kʼa nga i̱ tso én xi faʼaitʼa: “Tsakjákaonajmína je Jeobá” (Ezeq. 14:2). Kʼoa nkjín kʼa nga kʼoati i̱ tso én xi faʼaitʼa: “Ijngokʼa tsakjákaonajmína je Jeobá” (Ezeq. 6:1). Alikui jao kisʼe kon profeta jebi nga je Jeobá kisikasén. Kʼoa nga naʼmi koan je nʼaile kitsoyajinle nga kʼoatsole ngantsjai Jeobá je profetale nga je koasenkao. Je Jeobá i kitsole je Isaac, Jacob kao Jeremías: “An tijnakaole” (Gén. 26:24; 28:15; Jer. 1:8).

4. Jméni xi kitsole Jeobá je Ezequiel xi nʼio tsakasenkao.

⁴ Me tongatsʼi chjota israelita nga tsín kjuinrʼoé nga kuitsoyale je Ezequiel, nga̱ je Jeobá i kitso: “Je chjota israelita alikui kjuinrʼoéli nga̱ tsín mele kjuinrʼoéna” (Ezeq. 3:7). Nga tsín kinrʼoéle profeta Ezequiel, jéni Jeobá xi tsín kinrʼoéle. Nʼiojin tsakasenkao Ezequiel én jebi, nga̱ tsínkui xi tsonile nga tsín nda tísítjoson je xá xi kisʼenele tsa tsín kjuinrʼoé je chjota. Xi ijngosani, je Jeobá kʼoakitsole kʼianga jekuitjoson je Énle, je chjota judío skoee “nga jngo profeta kinchja̱yajinle” (Ezeq. 2:5; 33:33). Nga kʼoatsakʼinle  Ezequiel tsakasenkao nga kitjosonle je xá xi kisʼenele.

5. Ánni nga basenkaoniná jmeni xi tso Isaías 44:8.

⁵ Kʼoati basenkaoná tsanda ñá nga ʼyaa nga je Jeobá síkasénná. Kui kjoanda títsjoáná nga testigole maa (Is. 43:10). Je Jeobá kʼoakitsole Ezequiel nga tsín katatsokjón kʼoa ñá kʼoati tsoná nga tsín kuinókjoaan. Ánni nga tsín je kuijkónnilee chjota xi batiochjoaná. Joni Ezequiel, jé Jeobá síkasénná kʼoa jé basenkaoná (tʼexkiai Isaías 44:8). c

6. 1) Jósʼin ʼyañá nga je Jeobá koasenkaoná. 2) Jméni xi nda bʼé tokoán.

⁶ Je Jeobá kʼoatsoná nga je koasenkaoná. Tobʼelañá, tongini nga kjesa i̱ tsojin: “Jonño testigona”. Itso: “Kʼianga kuitjátojin nandá, yaa tjenkaole, kʼoa kʼianga kuitjátojin xo̱ngá alikui koaixjakaoli. Kʼianga kuitjátojin je lʼí, alikui koakali ni jejinla ni̱je̱nlʼí koakali” (Is. 43:2). Kʼianga ʼmiyasoán sakʼoa kui kjoa bitjatojiaan xi ya mangóson jngo xo̱ngá kʼoa xi ya mangóson je lʼí. Tonga jé Jeobá basenkaoná nga tosi tonda ʼmiyasoán (Is. 41:13). Kʼoati maa tsanda ñá jokoan je Ezequiel, me tongatsʼi chjota nga tsín nrʼoéná nga ʼmiyasonlee. Kʼianga tsín nrʼoéná je chjota alikui kui xi tsonile nga tsín nda tinitjosoán je xá xi kjinená. Nda sʼe tokoán nga ʼyaa nga tsjoa tjín kon Jeobá kʼianga tosi tonda ʼmiyasoán. Je pastro Pablo i kitso: “Kʼoaile jngójngó je chjíle josʼin koan xále” (1 Cor. 3:8; 4:1, 2). Jngo tichjaa xi jenkjín nó nga precursora sʼin tísíxá, itso: “Nda sʼe tokoan nga chjí be Jeobá nga je nixálee”.

7. Jókisʼe kon Ezequiel nga kui kisikjaʼaitsjenjin je sén xi kisakole (chótsenlai sén xi faʼaitʼa ya portada).

⁷ Je Ezequiel tsabe nga nʼio tse nganʼio tjínle nganʼiotsjele Niná. Kʼianga jngo sén kisakole tsabe josʼin síxá je nganʼiotsjele Niná, nga basenkao je ánkje kʼoa josʼin síkjanle je rueda xi tjíongi carretale Jeobá (Ezeq. 1:20, 21). Je Ezequiel i kitso: “Kʼianga tsaʼbe, tsakajnaniaña”. Nga tokʼoakoanle ñaki tsakajnania je Ezequiel (Ezeq. 1:28). Kʼianga kui kisikjaʼaitsjenjin je sén xi kisakole ñaki kisʼejngo kon nga kui nganʼiotsjele Niná koasenkao nga kuitjosonle je xá xi kisʼenele.

8, 9. 1) Jméni xi kitsole Jeobá je Ezequiel. 2) Jmésa xi kisʼin je Jeobá nga kitsjoanganʼiole je Ezequiel.

⁸ Je Jeobá i kitsole Ezequiel: “ʼNdíle chjota, tisenndui nga̱ ji kjoakaonajmíle”. Nga kʼoatsakʼinle kʼoa nga kui nganʼiotsjele Niná tsakʼaile, kui xi tsakasenkao nga kitjonganʼiole. I kitso: “Jé nganʼiole Niná tsakasenkaona nga tsakasenndoa” (Ezeq. 2:1, 2). Nga koanskanni, jokjitse kitsoyason jé ntsja Jeobá tsakándiaale, xi tsonile, je nganʼiotsjele (Ezeq. 3:22; 8:1; 33:22; 37:1; 40:1). Kui nganʼiotsjele Jeobá tsakasenkao je Ezequiel nga kitsoyasonle chjota judío xi “nʼio ta jko̱ kʼoa xíjin ni̱ma̱le” (Ezeq. 3:7). Je Jeobá i kitsole: “Kʼoasʼin taja tisikoa je nkjain joni nkjaín kʼoa je totjain kʼoasʼin taja tisikoa joni tsʼe. Kʼoasʼin taja tisikoa totjain joni diamante, ngisaa taja joni la̱jao̱. Ali nokjonjinlai, kʼoa ali nkjaínjin binyáxkónli” (Ezeq. 3:8, 9). Joxi ini kitsole Jeobá: “Alikuijin síkinroajen  tokuin ninga nʼio xíjin. An koasenkaole nga nʼiojin koai̱n”.

⁹ Kui nganʼiotsjele Jeobá tsakándiaale je Ezequiel saʼnda nga kicho ya ʼnde jñani kuitsoyason. I kitso: “Nʼio kitsoana je Jeobá”. Je Ezequiel jngo xomana kisikjaʼaitsjenjin tʼatsʼe én xi kuitsoyason (Ezeq. 3:14, 15). Xijekoan, je Jeobá kʼoakitsole nga ya katafi jñani konga chon, yaa tsakʼaile nganʼiotsjele Niná (Ezeq. 3:23, 24). Nga kʼia, jetíjnanda nga koaitsoyason.

10. Jmé xi koasenkaoná nga kuitjosonná je xá xi kjinená nga ʼmiyasoán, kʼoa ánni.

¹⁰ Jmé xi koasenkaoná nga kuitjosonná je xá xi kjinená nga ʼmiyasoán. Kʼianga koa̱njinná jebi, si̱kjaʼaitsjenjiaan jokoan Ezequiel. Nga kjesa tsoyasonjin kui nganʼiotsjele Jeobá tsakasenkao. Joni je Ezequiel, alikuijin kuitjosonná je xá xi kjinená nga ʼmiyasoán tsa tsínkui nganʼiotsjele Niná koasenkaoná. Ánni kʼoabixónñá. Je Na̱i nkjín koya jmeni xi sʼín nga bʼetʼaná nga̱ kui xi mele nga tsín tikʼuínyasonñá (Apoc. 12:17). Tsakui nichxin kʼoasʼin si̱kjaʼaitsjeen nga tse nganʼio tjínle je Na̱i, tonga kʼoasʼin nikinjenilee nga ʼmiyasoán (Apoc. 12:9-11). Kʼianga ʼmiyasoán, kʼoasʼin bakoñá nga tsín nokjonlee tojmeni xi sʼín. Kʼianga ñandia ñandia ʼmiyasoán tinikinjelee je Na̱i. Kʼianga ʼmiyasoán ninga chjota batiochjoaná kʼoasʼin ʼyañá nga kui nganʼiotsjele Niná basenkaoná kʼoa nga sasénle Jeobá jmeni xi tinʼia (Mat. 5:10-12; 1 Ped. 4:14).

11. Jósʼin basenkaoná je nganʼiotsjele Niná, kʼoa jméni xi sʼiaan nga tosi tonda tsjoáná Niná je nganʼiotsjele.

¹¹ Nga je Jeobá kisitaja je nkjaín kao totjen Ezequiel kui bakóyaná nga je nganʼiotsjele Jeobá koasenkaoná nga chókjoajinná tojme kjoa xi kuitjátojiaan nga ʼmiyasoán (2 Cor. 4:7-9). Jméni xi sʼiaan nga tosi tonda tsjoáná Niná je  nganʼiotsjele. Machjén nga tosi tonda si̱jélee Niná kʼoa nga ñaki kʼoakʼoé tokoán nga kjuinrʼoéná kʼianga kʼoétsʼoalee. Je Jesús i kitsole chjotatjenngile: “Tijáo”, “tijnyísjao” kʼoa “tikjanetʼao xo̱ntjoa”. Tsa kʼoasʼiaan, je Jeobá tsjoáná nganʼiotsjele (Luc. 11:9, 13; Hech. 1:14; 2:4).

12. Tojo tso Ezequiel 2:9, 10 kao 3:1-3, jñá jaʼaini je rollo kʼoa jmé én xi tjítʼa.

¹² Kui nganʼiotsjele Niná tsakasenkao Ezequiel nga kitsoyason kʼoa kui Énle Niná tsakasenkao nga nʼio kisʼejna kjoamakjainle. Kʼianga jngo sén kisakole jngo ntsja chjota tsabe xi jngo rollo kitonntsja (tʼexkiai Ezequiel 2:9, 10; d 3:1-3 e). Jñá jaʼaini je rollo. Jmé én xi tjítʼa. Kʼoa jósʼin kitsjoanganʼiole je Ezequiel. Je rollo jebi yaa jaʼaini jñani tíjna je yáxilele Jeobá. Kʼianga kisakole sén je Ezequiel ño ánkje tsabe, tsakui nichxin jngo ánkje jebi kisichjén Niná nga kichokaole rollo (Ezeq. 1:8; 10:7, 20). Je rollo jebi kui Énle Niná tjítʼa. Kui tsoya jmeni xi koa̱ntʼain je chjota judío xi xíjin koan xi koaikájinkon je Ezequiel (Ezeq. 2:7). Jngo jto̱n jngo yátsʼi̱n faʼaitʼa Énle Niná rollo jebi.

13. Jméni xi kitsole Jeobá je Ezequiel nga katasíkao je rollo, kʼoa ánni nga xini.

¹³ Je Jeobá i kitsole Ezequiel: “Chi̱nai je rollo [...] kʼoa kui katamaskini”. Je Ezequiel kisitjoson kʼoa kiskine ngakjijngo rollo. Jmé xi tsoyanile nga kʼoakisʼin. Kui xi tsonile nga tjínnele koanjinle Ezequiel ngayeje je én xi kuitsoyason. Tjínnele koankjainle nga kui koasenkao nga kuitsoyason je én xi tjítʼa ya rollo. Je Ezequiel kʼoakitso nga kʼoakji xi rollo jebi “joni tsa ntsjén” (Ezeq. 3:3). Ánni. Je Ezequiel kʼoakitso nga tse kjoanda kitsʼaile kʼoa nga naskánatjín nga tʼatsʼe Jeobá kuinchja̱ni (Sal. 19:8-11). Kitsjoale kjoanda Jeobá nga je kiskoéjin nga profetale koa̱n.

14. Jmé xi tsakasenkao Ezequiel nga kuitjosonle je xá xi kisʼenele.

¹⁴ Nga koanskanni, je Jeobá i kitsole Ezequiel: “Tinóʼyai kʼoa tʼejnajin ni̱ma̱li ngayeje xi tixinle” (Ezeq. 3:10). Je Jeobá kʼoakitsole nga katasíkjaʼaitsjen jmeni xi tjítʼa je rollo kʼoa nga katasíkjaʼaitsjenjin jmeni xi tso. Kui xi koasenkao nga nʼio sʼe̱jna kjoamakjainle Ezequiel kʼoa sʼe̱jinkon je én xi koaikájinkon je chjota (Ezeq. 3:11). Nga ya kisʼeʼa tsʼoa kʼoa nga ya kisʼejnajin ni̱ma̱le je Énle Niná, je Ezequiel tíjnanda nga kuitsoyason kʼoa nga kuitjosonle je xá xi kisʼenele (tingósonkoai Salmo 19:14).

15. Jméni xi tjínnele sʼe̱jnajin ni̱ma̱ná nga tosi tonda kʼuínyasoán.

¹⁵ Nga tosi tonda kʼuínyasoán machjén nga kui Énle Niná koasenkaoná. Machjén nga koa̱nkjainná ngayeje jmeni xi tsoná je Jeobá. Nichxin xi tiyoaa ndʼaibi, kui Biblia síchjén Jeobá nga fákaoná. Jméni xi sʼiaan nga kui Énle Niná tosi tonda katabándiaaná josʼin nikjaʼaitsjeen kao jonʼia kʼoa jotjín tokoán.

16. Jósʼin chótʼayá je Énle Niná, kʼoa jméni xi sʼiaan nga kuichokajin ni̱ma̱ná.

 ¹⁶ Tjonganʼioná kʼianga bichaa. Kʼoati nʼio sʼejna kjoamakjainná nga chotʼayá je Énle Niná kʼoa nga nikjaʼaitsjenjiaan jmeni xi tso. Kui jebi xi bakóyaná je sén xi tsʼe rollo. Kui xi mele Jeobá nga kui Énle “katamaskiñá”, xi tsonile, nga katamajinná jmeni xi tso. Xi koasenkaoná kʼiaa nga kʼoétsʼoaa, nga kʼoéxkiaa Énle Niná kʼoa si̱kjaʼaitsjenjiaan jmeni xi tso. Xi títjon, kʼianga bʼetsʼoaa kʼoasʼin nikʼéjnandañá je ni̱ma̱ná nga kuinóʼyá jmeni xi tsoná Jeobá, kʼoa kʼiaa bʼexkiaa je Biblia. Kʼoa xijema, nikjaʼaitsjenjinñá jmeni xi kabʼexkiaa. Jósʼin kuichomani tsa kʼoasʼiaan. Kʼianga si̱kjaʼaitsjenjiaan ngisaa nda koa̱njinná Énle Niná kʼoa ngisaa nʼio sʼe̱jna kjoamakjainná.

17. Ánni nga nʼio tjínnile kjoandosin nga si̱kjaʼaitsjenjiaan jmeni xi bʼexkiaa ya Biblia.

¹⁷ Ánni nga nʼio tjínnile kjoandosin nga kʼoéxkiaa Biblia kʼoa si̱kjaʼaitsjenjiaan jmeni xi tso. Nga̱ kui xi koasenkaoná nga kʼuínyasoán Énle Niná ndʼaibi kʼoa kui xi koasenkaoná nichxin xi sʼa nroa, nga kʼia tsakui nichxin kui kjoájinkoaan chjota jmeni xi koa̱ntʼain. Xi ijngosani, ngisaa mamiyoaa je Jeobá kʼianga nikjaʼaitsjenjiaan jokjoan. Yaa mangóson joni tsa xi jme xi tichinee, xi tsonile, nda sʼe tokoán (Sal. 119:103).

18. Jméni xi skoe̱ je chjota xi ʼmiyasonlee ndʼaibi, kʼoa ánni.

¹⁸ Ningalani tsín profeta maa joni Ezequiel, tíkijnaná je Biblia nga̱ tʼatsʼe Jeobá nroani je Én xi faʼaitʼa. Ñaki kʼoatjín tokoán nga tosi tonda kʼuínyasoán je Énle Niná saʼnda nga kʼoakuitsoná Jeobá nga tsín tikʼuínyasonñá. Nga kjoaʼaí nichxin nga kʼoendajinle kjoa je chjota, alikui ʼya xi kʼoakuitso nga tsín kisʼejinkon kʼoa nga tsín kuenta kisʼin Niná (Ezeq. 3:19; 18:23). Tosaa kʼia koa̱njinle nga Énle Niná xi tsakʼinyasoán.

19. Jméni xi koasenkaoná nga kʼuínyasoán.

¹⁹ Jméni xi koasenkaoná nga kuitjosonná je xá xi kjinená nga ʼmiyasoán. Kui koasenkaoná nga jan koya xi tsakasenkao Ezequiel. Tosi tonda ʼmiyasoán nga̱ ʼyañá nga je Jeobá tísíkasénná, nga̱ kui nganʼiotsjele Niná basenkaoná kʼoa kui Énle Niná basenkaoná nga nʼio sʼejna kjoamakjainná. Nga je Jeobá koasenkaoná ñaki kʼoatjín tokoán nga kuitjosonná je xá xi kjinená nga ʼmiyasoán kʼoa nga chókjoajinná josaʼnda nga kuichokjetʼa nichxin (Mat. 24:13).