1. Jmé én xi tsakájinkon profeta Isaías je chjota israelita.

 JE PROFETA Isaías kʼoakitso nga ñaki kʼoatjín jmeni xi tso Jeobá. Je én “xi ñaki kʼoatjín” sʼin faʼatoya “kʼoakatama” tsonile kʼianga én hebreo (Is. 65:16; nota). Je én xi kʼoakatama tso kui tsoyanile nga “ñaki kʼoakoa̱n” tsa jmeni. Nkjín kʼa nga kui én xi kʼoakatama tso faʼaitʼa ya Biblia kʼianga kui nchja̱ni nga ñaki kʼoatjín jmeni xi tso kʼoa jmeni xi sʼín je Jeobá kao Jesús. Je profeta Isaías kui xi koanmele nga ñaki katasʼejngo kon je chjota israelita nga bitjoson jmeni xi tso Jeobá. ʼYañá nga sítjoson ngantsjai jmeni xi tso.

2. Ánni kʼoéjngosíñá tokoán nga sitjoson Jeobá jmeni xi tso. Jméni xi kuitsoyaná i̱ kjoaʼmiya jebi.

² Kʼoa ñá, a tjínjngoo tokoán nga sitjoson Jeobá jmeni xi tso tʼatsʼe nichxin xi sʼa nroa. Jinla siento nó koanskanni nga tsakʼejna je profeta Isaías, je pastro Pablo kʼoakitso nga tsín male bʼéndiso Niná, kuinga makjainniná nga sitjoson jmeni xi tso tʼatsʼe nichxin xi sʼa nroa (Heb. 6:18). To joma jña tjo nandá, alikui kʼoakji sje kʼoa kʼoakji nyʼán bitjo. Tikʼoasʼinni xi kao Jeobá, ñaki kʼoatjín jmeni xi tso, alikui male bʼéndiso. Kʼianga ʼyaa jebi ñaki sʼejngo tokoán nga sitjoson jmeni xi tso. Alikui jao tjínná nga sitjoson jmeni xi tjínndajinle nichxin xi sʼa nroa. I̱ kjoaʼmiya jebi kui chótʼayajiaan jmé kjoachoya xi tsjoáná  Jeobá kʼoa jósʼin bakó nga sitjoson jmeni xi tso.

3. 1) Jmé kjoachoya xi tjínná (Apocalipsis 21:​3, 4). 2) Jótso kʼa chjota kʼianga kui chjakaonajmíñá jebi.

³ I̱ kjoaʼmiya jebi kui chótʼayajiaan jmeni xi tsoná Jeobá nga sʼin nichxin xi sʼa nroa, kʼoa jebi nʼio tsjoa báya tokoán ngatsʼiaa xi choʼndale Jeobá maa (tʼexkiai Apocalipsis 21:​3, 4). b Je Jeobá kʼoatso nga “likui tisʼe̱ni kjoabiya. Likui tisʼe̱ni kjoaba, nijejin xi kjiʼnda, nijejin xi aon male”. Nʼio nichjén texto jebi kʼianga ʼmiyasoán, nga kʼoaʼmilee chjota jokoa̱nchon kʼianga jeʼndenaxó koa̱n Sonʼnde. Tonga tjínkʼa xi tsín makjainle nga kʼoakoa̱n.

4. 1) Jméni xi kitso Jeobá tʼatsʼe nichxin xi tiyoaa ndʼaibi. 2) Jmésa xi kisʼin Jeobá kʼianga kʼoakitso jmeni xi koa̱n.

⁴ Je Jeobá jé pastro Juan kisichjén nga kiski tʼatsʼe nga ʼndenaxó koa̱n Sonʼnde, nga̱ be Jeobá nga kui én jebi si̱chjén nga kʼuínyasoán ndʼaibi. Kʼoati be nga nkjín chjota xi tsín koa̱nkjainle (Is. 42:9; 60:2; 2 Cor. 4:​3, 4). Jósʼin kuinyakoaa je chjota nga katamakjainle nga kuitjoson kjoaixi jmeni xi tso ya Apocalipsis 21:​3, 4, kʼoa jméni xi sʼiaan nga tosi tonda je Jeobá si̱nʼiotʼaa kʼoa nga ñaki sʼe̱jngo tokoán nga kuitjoson jmeni xi tso. Nkjín koya jmeni xi bakóná nga sitjoson kjoaixi Jeobá jmeni xi tso. Kataʼyala.

5. Jñanile je texto xi faʼaitʼa Biblia xi bʼéjngo tokoán nga kuitjoson jmeni xi tso Jeobá, kʼoa jótso texto jebi.

⁵ Je Jeobá kʼoatso nga ʼndenaxó koa̱n Sonʼnde kʼoa je texto xi fisani kui tsoyaná nga kʼoakoa̱n kjoaixi. Itso: “Je xi tíjnason yáxile, kitso: Koeni an sichjotse ngayije. Kʼoa kitsona: Chjí, nga̱ je énbi ndaní, kʼoa kjoakixiní. Kʼoa je kitsona: Jekʼoakisʼe. An nía je Alfa kʼoa je Omega, xi títjon kʼoa xi fetʼa” (Apoc. 21:​5, 6a).

6. Ánni bʼéjngoni tokoán jmeni xi tso Apocalipsis 21:​5, 6 nga kuitjoson jmeni xi tso Jeobá.

⁶ Ánni bʼéjngoni tokoán én jebi nga kuitjoson jmeni xi tso Jeobá. Jmeni xi tso je libro Apocalipsis c kui tsoyanile joni tsa jngo xo̱n tísʼín firma Jeobá nga sitjoson jmeni xi tso. Yaa Apocalipsis 21:​3, 4 kʼoatso jmeni xi sʼin Jeobá, kʼoa jmeni xi tso versículo 5 kao 6 kui tsoyanile joni tsa tísʼín firma Jeobá nga sitjoson jmeni xi tso. Kataʼyala jme én xi síchjén Jeobá nga kʼoatso nga sitjoson jmeni xi tso.

7. ʼYáni xi nchja̱ ya versículo 5 kʼoa ánni nga nʼio tjínnile kjoandosin.

⁷ Ya versículo 5 itso je én xi bʼétsʼiakaoni: “Je xi tíjnason yáxile kitso” (Apoc. 21:5a). Nʼio tjínle kjoandosin én jebi nga̱ kui én fitsʼiani nga nchja̱ je Jeobá. Je sén xi nchja̱ni libro xi tsʼe Apocalipsis jan kʼa nga jesoa Jeobá nchja̱. Kuinga kʼoabixónñá nga jesoa Jeobá xi kʼoatso, alikui tsa jngo ánkje síchjén, nijejinla Jesús. Ngisaa sʼejngo tokoán nga kuitjoson jmesa xi tso je én xi fisani, nga̱ tsín bʼéndiso Niná (Tito 1:2). Alikui jao  tjínná nga kuitjoson jmeni xi tso Apocalipsis 21:​5, 6.

8. Jótso Jeobá nga sitjoson jmeni xi tjínndajinle (Isaías 46:10).

⁸ Si̱kjaʼaitsjenla je én xi “Koeni” tso (Apoc. 21:5). Je én griego xi “Koeni” sʼin faʼatoya nkjín kʼa faʼaitʼa ya libro xi tsʼe Apocalipsis. Jngo libro xi kʼoatso ánni nga kui én jebi machjénni. Itso: “Kuinga katamandosinle kʼoexkia je chjota jmeni xi tso nga maskanni”. Je Niná títjon “Koeni” tso, xijema itso: “An sichjotse ngayije”. Ningalani sʼa kuitjoson nichxin xi sʼa nroa én jebi, je Jeobá kʼoatso nga jekʼoakjima nga̱ tsín jao tjínle nga kuitjoson (tʼexkiai Isaías 46:10). d

9. 1) Jmé xi tsoyanile én xi “sichjotse ngayije” tso. 2) Jméni xi koa̱nle je xi “ngʼajmi” kʼoa xi “sonʼnde” tsole je Biblia.

⁹ Kataʼyalasa jmeni xi tso ya Apocalipsis 21:5. Itsosa: “Sichjotse ngayije”. Jao koya xi bakóyaná jmeni xi sʼin Jeobá, nga kjoaʼaxin kʼoa sichjotse. Kuila títjon si̱kʼaxkiaa jméni xi kjoaʼaxin. Ya Apocalipsis 21:1 itso: “Je ngʼajmi títjon kao sonʼnde títjon kini”. Je xi “ngʼajmi títjon” tsole Biblia kui tsoyanile je chjotaxá xi je Na̱i kjinentsja (Mat. 4:​8, 9; 1 Juan 5:19). Je én xi “sonʼnde” tsole Biblia kui nchja̱ sakʼoani je chjota xi tjío sonʼnde (Gén. 11:1; Sal. 96:1). Je xi “sonʼnde títjon” tsole Biblia jé nchja̱ni chjotatsʼen xi tjín ndʼaibi. Je Jeobá ali tsakuijin jebi xi sindaya, ñaki kjoaʼaxin ngayeje, kʼoa kui sikʼéjnangajao je “ngʼajmi chjotse kao sonʼnde chjotse”, xi tsonile, chjotaxá chjotse koatexomale je chjota xi kixi.

10. Jmésani xi “sichjotse” je Jeobá.

¹⁰ Jósasʼin tsoyanile nga “sichjotse ngayije” Jeobá (Apoc. 21:5). Je Jeobá kʼoendaya Sonʼnde kʼoa koasenkao je chjota josaʼnda nga chjotatsje koa̱n. Tojo kitso Isaías, ʼndenaxó koa̱n jngo tjíjtsa Sonʼnde tojo koanchon ya ʼndenaxóle Edén. Kʼoati koa̱nndayaa tsanda ñá nga jngó jngoá. Je Jeobá sindaya je chjota xi chjiʼngé, xi xka̱, xi jtaya kʼoa sikjaʼáyanile je kʼien (Is. 25:8; 35:​1-7).

11. Jmé xi kitsole Jeobá je Juan, kʼoa ánni.

¹¹ Je Jeobá i kitsosale je Juan: “Chjí, nga̱ je énbi ndaní, kʼoa kjoakixiní” (Apoc. 21:5). Je Jeobá kʼoakitsole Juan nga katakji, tonga kʼoati kitsole ánni machjénni nga skí. I kitsole: “Nga̱ je énbi ndaní, kʼoa kjoakixiní”. Kui xi tsonile nga ñaki kʼoatjín jmeni xi tso Niná kʼoa bitjoson. Nga kʼoasʼin kiski Juan ʼyañá ndʼaibi nga kjoaʼaí nichxin nga ʼndenaxó koa̱n Sonʼnde kʼoa kui nikjaʼaitsjenjiaan je kjoanda xi sʼe̱ná nga kʼia.

12. Jósʼin tsoyanile nga “Jekʼoakisʼe” tso je Jeobá.

¹² Itsosa Jeobá: “Jekʼoakisʼe” (Apoc. 21:6). Kʼoatso Jeobá nga jetíbitjoson jmeni xi kitso tʼatsʼe ʼndenaxó. Kuinga kʼoatsoni nga̱ tsín jme xi kʼoechjoale nga sitjoson jmeni xi tjínndajinle. Jmésa xi tso Jeobá.

13. Ánni nga “An nía je Alfa kʼoa je Omega” tsoni Jeobá.

¹³ Tojosʼin jekaʼyaa, jan kʼa nga jesoa Jeobá kinchja̱ kʼianga tsabe sén je Juan  (Apoc. 1:8; 21:​5, 6; 22:13). Xi jan kʼa kinchja̱ Jeobá i kitso: “An nía je Alfa kʼoa je Omega”. Je xi Alfa ʼmi kui letra xi fitsʼiani je abecedario griego, kʼoa xi Omega ʼmi kui letra xi fetʼani. Jebi kui xi tsonile nga síkjetʼa Jeobá jmeni xi bʼétsʼiakao.

14. 1) Kʼiáni nga “Alfa” kitso Jeobá kʼoa kʼiáni nga “Omega” kuitso. 2) Jméni xi tsoná Jeobá tojosʼin faʼaitʼa ya Génesis 2:​1-3.

¹⁴ Kʼianga jekoannda Adán kao Eva, je Jeobá kʼoakitsole jmé xá kisindani kʼoa jmé xi tjínndajinle xi tʼatsʼe Sonʼnde. Ya Biblia itso: “Nkjín xti katasʼeno kʼoa katamankjínyao, titsao sonʼnde kʼoa jon tjanentsjao” (Gén. 1:28). Kʼianga kʼoakitso Jeobá jmeni xi tjínndajinle, joxi ini kitso: “Alfa”. Kʼianga jekuicho nichxin nga chjotatsje koa̱n je ntje̱le Adán kao Eva, nga jesitse Sonʼnde kʼoa nga jeʼndenaxó koa̱n kʼiaa “Omega” kuitso Jeobá. Kʼianga jekoanjngole ngʼajmi kao Sonʼnde kao ngayeje jmeni xi tjín, je Jeobá kʼoakitso nga xkón tíjna xi mañatoni nichxin, kui xi tsonile nga sitjoson jmeni xi tjínndajinle (tʼexkiai Génesis 2:​1-3). e Je xi mañatoni nichxin kui xá kisikʼéjnani Jeobá nga kuitjoson jme xi tjínndajinle tʼatsʼe Sonʼnde kao chjota. Nga jekjoetʼa xi mañatoni nichxin jekuitjoson ngayeje jmeni xi tjínndajinle.

15. Ánni kʼoasʼin kisikjaʼaitsjenni je Na̱i nga tsín kʼoakoa̱nle Jeobá sitjoson jme xi tjínndajinle.

¹⁵ Kʼianga yátsʼi̱n tsakinyále Niná je Adán kao Eva, chjotajée koan kʼoa kʼoati  tsakinle ntje̱le je jée kao kjoabiya (Rom. 5:12). Ningalani kʼoakisʼin je Adán kao Eva, alikui tsʼantjaiya josʼin tjínndajinle Jeobá kʼianga je koatio i̱ Sonʼnde xi chjotatsje koa̱n kʼoa xi sitjosonle Niná. Kʼoa tsín kʼoakoa̱nle Na̱i kʼoechjoale nga “Omega” kuitso Jeobá. Kʼoajinsʼin kisikjaʼaitsjen je Na̱i nga tsín kʼoakoa̱nle Jeobá sitjoson jme xi tjínndajinle. Tobʼelañá, je Jeobá koanjin tsakjaʼáxin je Adán kao Eva kʼoa kjaʼaí chjota kisindangajao ijngokʼani xi sitjoson josʼin mele. Tsa kʼoalani kisʼin Jeobá kʼoajin kitso Na̱i nga tsín sítjoson jmeni xi tso, nga̱ ya Génesis 1:28 kʼoatso nga ya ntje̱le Adán kao Eva kjuinroani je chjota xi koatio i̱ Sonʼnde.

16. Tsakui nichxin, ánni kʼoasʼin kisikjaʼaitsjenni je Na̱i nga tsínni bitjoson jme xi bʼéndajin Jeobá.

¹⁶ Tsakui nichxin kʼoatisʼin kisikjaʼaitsjen je Na̱i nga tsjoáʼnde Jeobá nga sʼe̱le xti je Adán kao Eva tonga nga tsínkʼia chjotatsje koa̱n (Ecl. 7:20; Rom. 3:23). Tsa kʼoalani koan, kʼoajin kitso je Na̱i nga tsínni bitjoson jme xi bʼéndajin Jeobá, nga̱ tsínjinni chjotatsje je xi koatio i̱ Sonʼnde.

17. Jósʼin tsakʼéndajin Jeobá nga yátsʼi̱n tsakinyále je Na̱i, Adán kao Eva, kʼoa jósʼin kuichomani (kʼoati chótsenlai sén xi faʼaitʼa).

¹⁷ Tokʼoajin koanle je Na̱i josʼin tsakʼéndajin Jeobá nga yátsʼi̱n tsakinyále je Adán kao Eva (Sal. 92:5). Kʼianga kitsjoaʼnde nga kisʼele xti je Adán kao Eva, je Jeobá kʼoasʼin tsakakóni nga tsín ndiso, nga sítjoson ngantsjai jmeni xi tso. Kʼoa jósʼin tsakakó nga bitjoson ngantsjai jmeni xi bʼéndajin. Jé Jeobá xokisʼin nga jngo ntje̱ tsʼatsen xi kʼoasjentjai je ntje̱le Adán kao Eva xi kixi koaitʼale. Nga kʼoasʼin tsakʼéndajin Jeobá tosi tonda kitjoson jme xi tjínndajinle (Gén. 3:15; 22:18). Tsínjin kʼoasʼin kisikjaʼaitsjen je Na̱i nga je ʼNdíle sikasén Jeobá nga kʼoasjentjai je chjota. Kuinga kʼoasʼin tsakʼéchjíntjaininá nga̱ nʼio tsjoakená (Mat. 20:28; Juan 3:16). Tonga je Na̱i alikui jme kjoatsjoacha bakó nga̱ to yaole fini. Tsee kjoanda sʼe̱ nga tsakʼéchjíntjainá Jeobá. Kʼianga kjoetʼa xi 1,000 nó jeʼndenaxó koa̱n Sonʼnde, jé koatio ntje̱le Adán kao Eva xi kixi koaitʼale Jeobá kʼoa jechjotatsje koa̱n, tojosʼin koanmele Jeobá saʼnda ngasʼa. Nga kʼia, je Jeobá i kuitso: “Omega”.

18. Jñánile xi jan koya tjínni xi bʼéjngo tokoán nga sitjoson Jeobá jmeni xi tso (kʼoati chótsenlai je recuadro “ Jan koya tjínni xi bʼéjngo tokoán nga sitjoson jme xi tso Jeobá”).

¹⁸ Tojosʼin kachotʼayá, nkjín koya jmeni xi bʼéjngo tokoán nga ʼndenaxó koa̱n Sonʼnde. Jósʼin kuinyakoaa xi kjaʼaí nga kʼoati sʼe̱jngo kon nga sitjoson Niná jmeni xi tso. Xi títjon, koaan kʼoakʼuínlee nga jesoa Jeobá xi kʼoatso nga kʼoakoa̱n. Ya Apocalipsis itso: “Je xi tíjnason yáxile, kitso: Koeni an sichjotse ngayije”. Je Jeobá tíjnandaa nga sitjoson jmeni xi tso, tjínle kjoachjine kao nganʼio nga kʼoasʼin. Xi majaoni, ñaki tjínjngoo kon Jeobá nga kuitjoson énle, kuinga i̱ tsoni: “Je énbi ndaní, kʼoa kjoakixiní”. Kʼoa itsosa: “Jekʼoakisʼe”, xi tsonile, jekitjoson. Kʼoa xi majanni, síkjetʼa Jeobá jmeni xi bʼétsʼiakao. Kuinga i̱ tsoni: “An nía je Alfa kʼoa je Omega”. Je Jeobá koako nga ndiso je Na̱i kʼoa nga tsín bitjoson jmeni xi tso.

19. Jmé xi koa̱n kʼuínlee je chjota tsa kʼoakuitsoná nga tsínkʼia ʼndenaxó koa̱n Sonʼnde.

¹⁹ Kʼianga chja̱kaonajmíni chjota jmeni xi tso Niná nga sitjoson je énle, ngisaa sʼe̱jngo tokuin nga kuitjoson jme xi tjínndajinle Jeobá. Jmé xi koa̱n kʼuínlee je chjota tsa kʼoakuitsoná nga tsínkʼia kʼoakoa̱n jotso Apocalipsis 21:4. Koaan koakoyalee jmeni xi tso versículo 5 kao 6. Kʼoakʼuínlee nga ya mangóson jebi joni tsa jngo xo̱n tísʼín firma Jeobá nga kʼoatso nga sitjoson je énle (Is. 65:16).