KJOAʼMIYA XI CHOTʼAYA 47
KJOAJNDA 103 Xi bándiaaná jngoo kjoatjao xi tsʼe Niná
A meli nga chjotajchínga sʼin kuijnai
“Tsa jngo xi mele xá nga sikuinda naxinandále Cristo, kjaínga nda xá xi mele” (1 TIM. 3:1).
XI TÍNCHJA̱NI
I̱ kjoaʼmiya jebi kui chótʼayajiaan jotso je Biblia jmé xi tjínnele sʼin je ndsʼee xi mele nga chjotajchínga sʼin kʼoéjna ya jinjtín.
1, 2. Jmé xá xi sʼín je ndsʼee xi chjotajchínga sʼin tjío.
KʼIATSA jekjoatse nga siervo ministerial sʼin tijnai, tsakui nichxin jekʼoatinʼiai jme xi tjínnele sʼin jngo xi chjotajchínga sʼin tíjna. A meli nga chjotajchínga sʼin kuijnai ya jinjtín kʼoa nga tosi tonda kuisenkoai je ndsʼee (1 Tim. 3:1).
2 Je xi chjotajchínga sʼin tjío nda choa̱ batío nga tsoyason, síkuindaná, bakóyaná xi tʼatsʼe Niná kʼoa tsjoánganʼioná jmeni xi tso kʼoa jmeni xi sʼín. Je Biblia kʼoatso nga jngoyale jngo “kjoatjao” nga̱ nʼio síxá nga binyakaoná (Efes. 4:8).
3. Jmé xi tjínnele sʼin je ndsʼee xi mele nga chjotajchínga sʼin kʼoéjna ya jinjtín (1 Timoteo 3:1-7; Tito 1:5-9).
3 Kʼianga chjotajchínga sʼin bʼejna jngo ndsʼee alikui kʼoasʼin tjoéjin jomatʼain jngo chjota xi xá bajngi. Ya jñani choʼnda machjén tojekjoán bʼaixále je xi male kʼoasʼín je xá xi tjín. Kʼianga chjotajchínga sʼin bʼejna jngo ndsʼee ali tsa tokuijin xi machjén nga koa̱nle nda kuitsoyason kʼoa nga nda koakoya je Énle Niná. Tjínnele sitjoson jmeni xi tso 1 Timoteo 3:1-7 a kao Tito 1:5-9 b (tʼexkiai). I̱ kjoaʼmiya jebi jan koya tjínni xi chótʼayajiaan jme xi tjínnele sʼin je xi mele nga chjotajchínga sʼin kʼoéjna ya jinjtín, tjínnele ndasʼin koaikao yaole ánni nga ndasʼin kʼoaxki̱ni, nga nda koandiaale je xi tjío ya yaniʼyale kʼoa nga koasenkao je jtín.
TJÍNNELE NDASʼIN KOAIKAO YAOLE ÁNNI NGA NDASʼIN KʼOAXKI̱NI
4. Jmé xi nchja̱ni je Biblia kʼianga i̱ tso “alijme jée sʼele”.
4 Je Biblia kʼoatso jme xi tjínnele sʼin jngo ndsʼee kʼiatsa mele nga chjotajchínga sʼin kʼoéjna. Itso: “Alijme jée sʼele”. Kui xi tsonile nga je ndsʼee nda kʼoaxki̱ ya jinjtín kʼiatsa nda tísʼín kʼoa kʼoati nda kʼoaxki̱ ya ngixko̱n chjota. Ningalani tsín sa̱sénle chjota josʼin makjainná tonga tsínjin jña kʼoangini nga jokuitso tsa nda tísʼín je ndsʼee (Dan. 6:4, 5). Je ndsʼee koaan si̱kjaʼaitsjenjin jebi: “A nda síkʼaxki̱na je chjota kʼoa jótso je ndsʼee xi tʼatsʼan”.
5. Ánni kʼoatsoni Biblia nga tsjoacha katamaa xi ndatjín.
5 Nga kʼoatso je Biblia nga tsjoacha katamaa xi ndatjín kui xi tsonile nga kuenta sʼiaan je ndsʼee kʼoa nga kʼoakʼuínlee jñani nda sʼín. Tsjoa sa̱tío tokoán nga kuinyakoaa ninga tsín toxá je xokatsoniná nga kʼoasʼiaan (1 Tes. 2:8). Tsa kʼoasʼin je xi chjotajchínga sʼin tjío tsjoa sa̱tío kon nga sikuinda je jtín kʼoa nga sitjoson je xá xi kjinele (1 Ped. 5:1-3). Ninga tse jmeni xi sʼín nga binyakao je ndsʼee tsjoa satío kon (Hech. 20:35).
6. Jónʼia kʼianga nda chjoéyaa xíngiaa (Hebreos 13:2, 16; kʼoati chótsenlai sén xi faʼaitʼa).
6 Je “xi nda sísinle xi faʼaikonle” ali tsa tojejin miyole xi nda síkao (1 Ped. 4:9). Jngo xo̱n xi kʼoatso nga je chjota “xi nda sísinle xi faʼaikonle” nda síkao tojokji chjotani ninga tsín bexkon kʼoa síkʼasʼen niʼyale. Koaan si̱kjaʼaitsjenjiaan jebi: “A kʼoasʼin ʼyana nga nda kjoeya je xi faʼaikonna” (tʼexkiai Hebreos 13:2, 16). c Je ndsʼee xi nda kjoeya xi kjaʼaí tjotʼaa jme xi tjínle kʼianga ʼya xi bichókonle, binyakao xi ma̱ tjíosíjchá yaole kʼoa je xi ñaki to xále Niná tjíosʼín, jolani je superintendente xi tsʼe circuito kʼoa kʼoati nda kjoeya je ndsʼee xi xin jtín faʼaini nga bichótsjoá kjoanokjoaya ya jtín jña tiyoaa (Gén. 18:2-8; Prov. 3:27; Luc. 14:13, 14; Hech. 16:15, TNM; Rom. 12:13).
Je ndsʼee kao chjoónle nda kjoeya je superintendente xi tsʼe circuito kao chjoónle (Chótsenlai párrafo 6)
7. Jósʼín je xi chjotajchínga sʼin tjío “likui chi̱nga̱le tao̱n”.
7 “Likui chi̱nga̱le tao̱n”. Kui xi tsonile jebi nga tsínkui simekon je tsojmi xi tjín sonʼnde. Ni tjínle tao̱n kʼoa ni ma̱ tísíjchá yaole tjínnele nga kui xále Niná títjon sikʼejna (Mat. 6:33). Tjínnele nga kʼoasʼin sichjén nichxinle kao tsojmi xi tjínle nga je Jeobá sixále, nga sikuinda je familiale kao je jtín (Mat. 6:24; 1 Juan 2:15-17). Koaan sikjaʼaitsjenjin jebi: “Jósʼin ʼbekoan je tao̱n. A tomajngoni tokoan je tsojmi xi tjínna. Axo kui xi mena nga tsesa tao̱n sʼe̱na kʼoa nga nkjínsa tsojmi sʼe̱na” (1 Tim. 6:6, 17-19).
8. Jósʼín je chjota xi kosonnile jmeni xi sʼín kʼoa xi male kjoéxkó yaole.
8 Jngo xi kosonnile jmeni xi sʼín kʼoa xi kjoéxkó yaole alikui toxkia kjen kʼoa alikui toxkia ʼbi, alikui síkʼatone choa̱le jokjoan najño xi bʼakjá kʼoa jofa. Tsínkui síkʼayale nichxinle xi tsín jme chjíle kʼoa tsínkui kʼoasʼín jmeni xi sʼín je chjota xi tsín je Jeobá síxále (Luc. 21:34; Sant. 4:4). Nga male kjoéxkó yaole, alikui yaole síjtile ninga ʼya xi jotsole. Je xi mele nga chjotajchínga sʼin kʼoéjna alikui tjínnele nga nʼio tsjéntʼale xi xán tjínle. Koaan sikjaʼaitsjenjin jebi: “A kosonnile jmeni xi sʼian kʼoa a mana kjoexkoa yaona”.
9. Jósʼín je xi sínkjínle kon kʼoa xi nda bʼéndajin jmeni xi sʼín.
9 Je xi chjotajchínga sʼin tjío sínkjínle kon kʼoa kuenta sʼín jmeni xi tso je Biblia kʼianga jme xi bʼéndajin. Kʼianga síkjaʼaitsjenjin jotso je Biblia ngisaa nda majinle kʼoa be jmeni xi sʼín. Títjonkjoanla nda básjaiya jmeni xi bʼéndajin kʼoa alikui to kjoafaʼaitsjenle fini (Prov. 18:13). Nga kʼoasʼín, kʼoasʼin bʼéndajin kjoa josʼin mele Jeobá. Nda bʼéndajin jmeni xi sʼín kʼoa sítjoson jmeni xi tso. Je ndsʼee be nga sítjoson jmeni xi tso je naxinandále Jeobá. Nga kʼoasʼín nda bʼaxki̱. Kuila kataʼyaa jotso je Biblia jotjínnele sʼin xi chjotajchínga sʼin tjío nga nda koandiaale xi tjío ya yaniʼyale.
TJÍNNELE NDA KOANDIAALE XI TJÍO YA YANIʼYALE
10. Jméni xi sʼín xi nda bándiaale xi tjío ya yaniʼyale.
10 Kʼianga chjotajchínga sʼin kʼoéjna jngo ndsʼee xi jechixan tjínnele nda kʼoaxki̱ je xi tjío ya yaniʼyale, kuinga kʼoaʼminile nga nda katabándiaale yaniʼyale. Tjínnele tjao koa̱nle familiale, nda sitjoson je xá xi kjinele kʼoa jé kjinele nga kʼoendajin jmeni xi sʼin nga skoe̱xkón Niná kʼoa nga sixále. Nʼio tjínle kjoandosin nga kʼoasʼin, nga̱ je pastro Pablo i kitso: “Je xi tsín tsa male batéxoma niʼyale, jósʼin sikuinda naxinandále Niná” (1 Tim. 3:5).
11, 12. Jósʼin tsjoánganʼio xi tjío ya yaniʼya nga koa̱n chjotajchínga sʼin kʼoéjna jngo ndsʼee (kʼoati chótsenlai sén xi faʼaitʼa).
11 Kʼiatsa kje tsaosonjin nóle xtile je ndsʼee xi mele nga chjotajchínga sʼin kʼoéjna, tjínnele nga nda sʼin je xtile kʼoa nga sitjoson. Machjén nga ngasin nganda kuitsoyale kʼoa koatekjáyale. Ninga toxá sískáni je xtiʼndí tonga tsa nda kʼuínyale sitjoson kʼoa nda sʼin. Kʼoati je kjinele xi nʼai ma nga kuitsoyale ʼndíxtile xi tʼatsʼe Jeobá ánni nga miyole koa̱nni, nga sitjoson jmeni xi tso je Biblia kʼoa nga koa̱n koaisʼenngindá.
12 Je xi mele nga chjotajchínga sʼin kʼoéjna tjínnele nga kʼoati makjainle Énle Niná je xtile nga tsín “ʼya xi koaangi nga tosʼín tomani” kʼoa nga tsʼantjaikjoa. Tonga tsa jée koa̱njngí je xtile kʼoa tsakui kʼoakoa̱nni nga tsín kabatekjáyale tsakui nichxin tsín koa̱n nga chjotajchínga sʼin kʼoéjna (chótʼai je revista La Atalaya xi tsʼe 15 de octubre de 1996, página 21, párrafo 6 kao 7).
Je ndsʼee bakóyale je ʼndíxtile jmeni xi nʼia nga ʼyaxkoán Niná (Chótsenlai párrafo 11)
TJÍNNELE SIKUINDA JE JTÍN
13. Jósʼín je chjota xi ndʼé kʼoa xi tsín xíjin.
13 Je ndsʼee xi nda sʼín nʼio nda binyakao je jtín. Je ndsʼee xi ndʼé binyakao xi ngikʼa nga nda batiokao xínkjín kʼoa nga tsín jme kjoa sʼele. Tsa meli nga ndʼé koai̱n tjínneli nga kuinóʼyalai xi ngikʼa kʼoa nga kuenta sʼiain jmeni xi kuitso. Kʼianga kuiyojtíon xi chjotajchínga sʼin tiyo, a kʼoainganʼiolai jme xi kuitso je chjotajchínga xi ngikʼa kʼiatsa tsín kjoatéxomale Niná tjíofaʼatone. Jngo xi chjotajchínga sʼin tíjna alikui koa̱n nga xíjin koa̱n, alikui koa̱n nga totsʼe kuitjoson, tjínnele kuenta sʼin jme xi kuitso xi ngikʼa (Gén. 13:8, 9; Prov. 15:22). Alikui kjoa bʼétsʼia kʼoa tsín tokjoán síjtile yaole, ndʼéní kʼoa tsín toxkia nchja̱. Jé síkinjenyʼánjin tsa kjoalani tísʼe (Sant. 3:17, 18). Kʼianga nda tso én nokjoaa nda sʼe kon je chjota kʼiatsa jtile tsakai, ninga je xi tsín sasénle Énle Niná (Juec. 8:1-3; Prov. 20:3; 25:15; Mat. 5:23, 24).
14. Ánni nga tsín je tjoéjinni nga chjotajchínga sʼin bʼejna je “xi tosʼa koankjainle”, kʼoa jósʼin bakó nga kixi fitʼale Jeobá.
14 Je xi chjotajchínga sʼin bʼejna “ali tsa jejin xi tosʼa koankjainle”. Jebi ali tsakuijin xi tsonile tsa jenʼio nkjín nó tjínle nga kisʼenngindá nga koa̱n chjotajchínga sʼin kʼoéjna, kui xi machjén nga jemajinle jotjínni je Énle Niná. Kʼianga kjesa chjotajchínga sʼin bʼejnajin jngo ndsʼee tjínnele koako nga nangitokon ma kʼoa nga kʼoasʼin tísíxále Jeobá josʼin mele, tojo kisʼin Jesús (Mat. 20:23, TNM; Filip. 2:5-8). Kʼoati tjínnele nga kixi koaitʼale Jeobá, nga sitjoson kjoatéxomale kʼoa nga kʼoasʼin jotso je naxinandále (1 Tim. 4:15).
15. A nʼio machjén nga síxkón kuitso nga tsjoá kjoanokjoaya je xi chjotajchínga sʼin tjío.
15 Je Biblia kʼoatso nga je xi chjotajchínga sʼin tjío tjínnele nda koa̱nle koakoya Énle Niná. Tonga a kui xi tsonile jebi nga nʼio nda koa̱nle tsjoá kjoanokjoaya. Mai, nga̱ tjínkʼa je xi chjotajchínga sʼin tjío xi nʼio nda male fákaonajmí chjota kʼianga tsoyason Énle Niná kʼoa nga fisíxatʼa je ndsʼee xi nganʼio machjénle ninga tsín síxkón tso nga tsjoá kjoanokjoaya (tingósonkoai 1 Corintios 12:28, 29 kao Efesios 4:11). Ninga kʼoalani, je ndsʼee xi mele nga chjotajchínga sʼin kʼoéjna tjínnele tosi tonda nda skótʼaya ánni nga nda koa̱nnile koakoya Énle Niná. Jméni xi tjínnele sʼin.
16. Jmé xi sʼin je ndsʼee nga ngisa nda koa̱nle kuitsoya (kʼoati chótsenlai sén xi faʼaitʼa).
16 Nga ngisa nda koa̱nle kuitsoya je xi chjotajchínga sʼin tjío tjínnele nga ya Énle Niná kʼoangini nga kuitsoya ya jinjtín kʼoa nga ʼya xi kjoafaʼaitsjen tsjoále. Tjínnele nda skótʼaya je Biblia kao xo̱n xi Énle Niná yʼangini (Prov. 15:28; 16:23). Kʼianga kotʼaya kui fitjenngi josʼin bakóya naxinandále Niná je textole Biblia kʼoa kʼianga tsoya kui xi mele nga katabichókajin ni̱ma̱le je xi kjuinrʼoéle. Je xi kʼoati koasenkao nga ngisa nda koa̱nle kuitsoya kuinga kʼoati sijéle kjoafaʼaitsjen je ndsʼee xi jekjoatse nga chjotajchínga sʼin tjío (1 Tim. 5:17). Je xi chjotajchínga sʼin tjío machjén nga tsjoánganʼiole je ndsʼee kʼoa sakʼoajin machjén nga koatekjáya kʼale, tonga tjínnele ngasin nganda kjoakao je ndsʼee. Kʼiatsa kʼoasʼin kʼoa tsa ya Énle Niná kʼoangini jmeni xi kuitso nda kuitsoya kʼoa jé Jesús skénngile (Mat. 11:28-30; 2 Tim. 2:24).
Jngo ndsʼee xi siervo ministerial ma kao xi chjotajchínga sʼin tíjna fisíxatʼa jngo tichjaa ya niʼyale, Biblia síchjén nga fákaonajmí je tichjaa. Je ndsʼee xi siervo ministerial ma cho̱tsín tíkotsenya nga tíkotʼaya je kjoanokjoayale (Chótsenlai párrafo 16)
TOSI TONDA TʼENELAI YAOLI TSA MELI NGA CHJOTAJCHÍNGA SʼIN KUIJNAI
17. 1) Jméni xi koasenkao je xi siervo ministerial ma nga koa̱n chjotajchínga sʼin koatio. 2) Jméni xi kuenta sʼin xi chjotajchínga sʼin tjío tsa koa̱n nga chjotajchínga sʼin kʼoéjna jngo ndsʼee (chótsenlai je recuadro “ Jmé xi kuenta sʼiaon nga cho̱bayaño tsa koa̱n nga chjotajchínga sʼin kʼoéjna jngo ndsʼee”).
17 Nga jekaʼyaa jme xi tjínnele sʼin je ndsʼee xi mele nga chjotajchínga sʼin kʼoéjna, tsakui nichxin je ndsʼee xi siervo ministerial sʼin tjío kʼoasʼin sikjaʼaitsjen nga tsínkʼia kuichotjenngi xá jebi. Tonga je Jeobá kao naxinandále be nga tsínkjoan kʼoasʼin kuitjosonyejená jmeni xi síjé (1 Ped. 2:21). Je xi koasenkao je ndsʼee nga kuichotjenngi xá jebi kuinga je Jeobá tsjoále nganʼiotsjele (Filip. 2:13). Jmeni xi kaʼyaa i̱ kjoaʼmiya jebi, jñánile xi chali nga kʼoasʼiain. Tjasjaiyai xi tʼatsʼe jebi, kʼoatʼinlai Jeobá nga katabasenkaoli kʼoa tijélai kjoafaʼaitsjen je xi chjotajchínga sʼin tjío.
18. Jmé xi tjínnele sʼin je xi siervo ministerial sʼin tjío.
18 Ngatsʼi ndsʼee kʼoa ninga je xi chjotajchínga sʼin tjío tjínnele nga tosi tonda kʼoasʼin jmeni xi tso je kjoaʼmiya jebi (Filip. 3:16). Kʼoa tsa siervo ministerial mai, tosi tonda tʼenelai yaoli nga koa̱n chjotajchínga sʼin kuijnai. Kʼoatʼinlai Jeobá nga katabasenkaoli nga ngisa nda si̱xálai kʼoa nga ngisa nda kuisenkoai je jtín (Is. 64:8). Jé Jeobá koasenkaoli nga koa̱n chjotajchínga sʼin kuijnai.
KJOAJNDA 101 Jtín sʼin si̱xálee Niná ngatsʼiaa
a 1 Timoteo 3:1-7: “Je énbi ñaki kʼoatjín: Tsa jngo xi mele xá nga sikuinda naxinandále Cristo, kjaínga nda xá xi mele. 2 Machjén nga je xi síkuinda naxinandále Cristo alijme jée sʼele. Tojngo chjoón katasʼele. Chjotatojbi katama, kʼoa chjotaʼindatakon, kʼoa chjota xi nda síchoyale yaole, xi nda sísinle xi faʼaikonle, xi nda male bakóya. 3 Machjén nga tsín sísinle bino, nga tsín bʼéle chjota. Ali chjotachi̱nga̱jin ma tʼatsʼe tsojmi, nga tochjotandʼé ní, nga likui kjoasi sísin, nga likui chi̱nga̱le tao̱n. 4 Machjén nga nda batéxomale niʼyale, nga nda bʼénele xtile nga ñaki nda katabexkón kjoa. 5 (Je xi tsín tsa male batéxoma niʼyale, jósʼin sikuinda naxinandále Niná). 6 Ali tsa jejin xi tosʼa koankjainle, jméni nga tsín ska̱jinsíni xi tikuini kjoañʼai joni tsa na̱i, nga̱ ngʼakon koa̱n. 7 Kʼoati machjén nga xi kjaʼaí chjota nda kʼoa̱sje nga je, jméni nga tsín tsa ska̱jinsíni kjoasoa kao che̱nle na̱i”.
b Tito 1:5-9: “Kui kjoa nga ya kisikʼéjnale Creta, jméni nga kʼoéndasíni jmesa xi cha, kʼoa jméni nga si̱kinyásíni xá chjotajchínga ya ngayije naxinandá, josʼin tsakʼenele nga an. 6 Si̱kinyaí xá chjotajchínga xi tsínle jéejin, xi tojngo chjoón chixankao, xi tjínle xtile xi makjainle, xi tsín ʼya xi koaangi nga tosʼín tomani, axo nga tsʼantjaikjoa. 7 Kjaínga machjén nga tsínle jéejin je chjotajchínga xi síkuinda naxinandále Cristo, nga̱ jé xi síkuinda tʼatsʼe Niná. Machjén nga tsín ngʼakonjin ma, nga tsín majti ndi̱to̱njinle, nga tsín machʼi̱jin, nga tsín sítoánjin, nga tsín chʼaondaijin. 8 Tonga katasísinle xikʼa, katamatsjoake xi nda tjín, nda katafikao yaole, chjotakjoakixi katama, tsje katama, katakjoétjao yaole, 9 nda katafikao je én xi kjoakixi, josʼin tísakóya, jméni nga kʼoasʼin koa̱nnile kʼoeene kao kjoafaʼaitsjen xi nda, kʼoa jméni nga kʼoasʼin sichoyanile xi kjaʼaí tso”.
c Hebreos 13:2, 16: “Ali nichajinjion nga kʼoaiʼndelao je xi fichókonno. Kʼoasʼin tjín kʼa xi kʼoasʼin kitsjoaʼndele ánkje, nda tsa tsín tsabe. 16 Ali nichajinjion nga nda sʼiaon, kʼoa nga kuinyakao xikʼa, nga̱ kui kjoatjao xi sasénle Niná”.
