KJOAʼMIYA XI CHOTʼAYA 46
KJOAJNDA 49 Kjoáyatsjoaa ni̱ma̱le Jeobá
A meli nga siervo ministerial koai̱n
“Tongisa ndaní nga kʼoee kaoni tsa nga chjoé” (HECH. 20:35).
XI TÍNCHJA̱NI
Kui jchaa jméni xi sʼin je ndsʼee xi jekisʼenngindá nga koa̱n siervo ministerial koa̱n.
1. Jósʼin tsabekon pastro Pablo je xi siervo ministerial sʼin tjío.
JE NDSʼEE xi siervo ministerial sʼin tjío ya jinjtín nʼio chjíle je xá xi sʼín. Je pastro Pablo nʼio chjí tsabe je xá xi sʼín xi siervo ministerial ma. Kʼianga kiskile carta je chjotale Cristo xi Filipos tsʼe kisikasénle kjoatiʼnda xi siervo ministerial sʼin tjío kao xi chjotajchínga sʼin tjío (Filip. 1:1).
2. Jótso Luis nga siervo ministerial sʼin ma.
2 Nkjín ndsʼee xi jekisʼenngindá xi kao kjoatsjoa sítjoson je xá xi sʼenele nga siervo ministerial ma. Kʼoa koaan kʼoasʼin sixá je ndsʼee xi sʼa xti kʼoa tsa jeje̱ xi jejchínga. Tobʼelañá, je Devan 18 nóle nga siervo ministerial koan kʼoa je Luis jetsʼato 50 nóle nga siervo ministerial koan. Ndsʼee jebi kʼoatso josatío kon nga kʼoasʼin síxá. Itso: “Nʼio tsjoa tjín tokoan nga siervo ministerial sʼin tisixá kʼoa tjao bena je ndsʼee xi tjío ya jinjtín”.
3. Jmé xi chótʼayajiaan i̱ kjoaʼmiya jebi.
3 Kʼiatsa jekisʼe̱nngindái kʼoa tsa kje siervo ministerial sʼin tíjnajin koaan kʼoasʼin si̱xái. Tikjaʼaitsjenjin ánni nga menili nga kʼoasʼin si̱xái kʼoa jótso je Biblia, jméni xi tjínnele sʼin je xi mele nga siervo ministerial koa̱n. Kui tʼatsʼe jebi chótʼayajiaan i̱ kjoaʼmiya jebi, tonga kuila títjon kataʼyaa jmé xá xi sʼín je xi siervo ministerial ma.
JMÉ XÁ XI SʼÍN JE SIERVO MINISTERIAL
4. Jmé xá xi sʼín je xi siervo ministerial ma (kʼoati chótsenlai sén xi faʼaitʼa).
4 Je xi siervo ministerial ma jé ndsʼee xi jekisʼenngindá kʼoa kao nganʼiotsjele Jeobá tjoéjinni nga binyakao je ndsʼee xi chjotajchínga sʼin tjío ya jinjtín. Tjínkʼa xi je sʼenele nga kʼoatsole je ndsʼee jñani kuitsoyason kʼoa ya Ndʼia jña chotʼayá jé tsjoále ndsʼee je xo̱n xi nichjén nga ʼmiyasoán. Tjínkʼa xi ya tsjoánganʼio nga matsje kʼoa nga masinle ya Ndʼia jña chotʼayá. Tjínkʼa xi kui xá kjinele nga je kʼoatsole ndsʼee jñani koatio nga bichó kjoajtín kʼoa kʼoati tjíokʼa xi je kjinele audio kao video. Ningalani tse xá tjenkao jmeni xi sʼín ndsʼee jebi, je xi ngisa chjíle kuinga ñaki ni̱ma̱le nroajinni nga síxále Jeobá, nga sítjoson jotso kjoatéxomale kʼoa kʼoati kui kʼoasʼínni nga tsjoake je ndsʼee (Mat. 22:37-39). Jmé xi tjínnele sʼin jngo ndsʼee xi jekisʼenngindá tsa mele nga siervo ministerial koa̱n.
Nga je Jesús kjenngile je xi siervo ministerial ma nkjín koya jme xá xi sʼín ya jinjtín (Chótsenlai párrafo 4)
5. Jmé xi tjínnele sʼin je ndsʼee tsa mele nga siervo ministerial koa̱n.
5 Ya Biblia kʼoatso jme xi tjínnele sʼin je ndsʼee xi mele nga siervo ministerial koa̱n (1 Tim. 3:8-10, 12, 13). Tjínnele skótʼayajin jmeni xi tso je Biblia jotjínnele sʼin jngo xi siervo ministerial ma kʼoa kʼoasʼin jmeni xi tso je Biblia. Tonga kʼoati tjínnele sikjaʼaitsjenjin ánni nga menile nga siervo ministerial koa̱n.
ÁNNI NGA SIERVO MINISTERIAL MENILE KOA̱N JE NDSʼEE
6. Jmé xi koasenkao je ndsʼee nga kuitjosonle je xá xi sʼenele nga siervo ministerial ma (Mateo 20:28; kʼoati chótsenlai sén xi faʼaitʼa ya ).
6 Si̱kjaʼaitsjenjinla jokisʼin Jesús. Nga tsjoake koan Nʼaile kʼoa nga tsjoake koan je chjota kao kjoatsjoa kisixá kʼoa tsakasenkao chjota (tʼexkiai Mateo 20:28; a Juan 13:5, 14, 15). Tsa kuinga tsjoachai je Jeobá kʼoa tsjoachai je chjota nga menili nga siervo ministerial koai̱n, jé Jeobá koasenkaoli nga kuichotjenngi xá jebi (1 Cor. 16:14; 1 Ped. 5:5).
Jé títjon Jesús kʼoakisʼin jmeni xi tjínnele sʼin je chjotatjenngile nga kuinyakao xi kjaʼaí (Chótsenlai párrafo 6)
7. Ánni nga tsín ndatjínni tsa ngʼa kʼoasje yaole je ndsʼee.
7 I̱ Sonʼnde kui bʼasjengʼani yaole chjota jmeni xá xi sʼín, tonga ñá xi choʼndale Jeobá maa alikui kʼoanʼia. Je ndsʼee xi mele nga siervo ministerial koa̱n kui choa̱le Jesús fitjenngi, tsín ngʼa bʼasje yaole kʼoa tsín kʼoasʼin síkjaʼaitsjen nga ngisa chjíle jmeni xi sʼín tikʼoajinni xi ngikʼa. Je ndsʼee xi tsín kʼoatjín kon alikuijin sitjoson je xá xi sʼe̱nele ya jinjtín kʼoa jmeni xi tjínnele sʼin nga sikuinda je choʼndale Jeobá kʼoa kʼoajinsʼin sikjaʼaitsjen nga tsín jme chjíle je xá xi kʼoaile (Juan 10:12). Je Jeobá alikui sasénle je xá xi sʼín je chjota xi ngʼakon kʼoa xi to yaole fini (1 Cor. 10:24, 33; 13:4, 5).
8. Jókitsole Jesús je chjotatjenngile.
8 Saʼnda je chjotatjenngile Jesús koanmele nga ngisa tse xá sʼe̱le tojoni nga ngisa kataʼyale. Tobʼelañá, je Santiago kao Juan kʼoakitsole Jesús tsa koa̱n ya koatiotʼale kʼianga koatexoma. ʼNdele nga kʼoasʼin Jesús jmeni xi tsakʼinle tosaa kui kjoafaʼaitsjen jebi kitsjoale ngatsʼi, i kitsole: “Toʼyanibe xi mele nga jeya kʼoéyojinno nga jon, katasíxále xikʼa. Kʼoa toʼyanibe nga jon xi meno nga kuinyatítjon, choʼndano ngatsʼio katama nga je” (Mar. 10:35-37, 43, 44). Je ndsʼee xi ñaki kʼoatjío kon nga je Jeobá síxále nʼio nda binyakao je ndsʼee xi tjío ya jinjtín (1 Tes. 2:8).
JMÉ XI SʼIAIN NGA NGISA NDA KUISENKOAI XI NGIKʼA
9. Jméni xi sʼiain nga kuisenkoai xi kjaʼaí.
9 Nga tsjoachai Jeobá mejinli kuisenkoai je ndsʼee tonga tsakui nichxin tsín tso tokuin nga siervo ministerial sʼin si̱xái. Tikjaʼaitsjenjin jokji tsjoa sʼe tokoán nga binyakoaa je ndsʼee. Je Jesús i kitso: “Tongisa ndaní nga kʼoee kaoni tsa nga chjoé” (Hech. 20:35). Nga kʼoakisʼin Jesús jotso texto jebi, tsjoa kisʼe kon nga tsakasenkao xi ngikʼa. Kʼoati tsjoa sʼe̱ tokuin tsanda ji kʼiatsa kuisenkoai je ndsʼee.
10. Jméni xi kisʼin Jesús nga tsakasenkao je chjota (Marcos 6:31-34).
10 Kataʼyala jokisʼin Jesús nga tsakasenkao chjota (tʼexkiai Marcos 6:31-34). b Ñandia kʼianga nʼio kijtale Jesús kao chjotatjenngile kʼoa xin ʼnde ki nga kisíkjáya. Kʼianga kicho Jesús jñani sikjáya nkjín chjota xi jeya tjíokoyale nga̱ kui xi mele nga kjuinrʼoé jme xi tsoya. Je Jesús alikui totsakʼéte je chjota kʼoa tsín tojngo jao én tsakjákao ningalani baole kʼoa mele sikjáya. Tosaa kitsoyale jokjoantjínni je Énle Niná. Kui kʼoakisʼinni nga tsjoake koan je chjota (Mar. 6:35). Alikui totsakʼénele yaole nga kʼoakisʼin. Kuinga koanmake je chjota nga kitsoyanile Énle Niná. Tsjoa kisʼe kon nga tsakasenkao je chjota.
11. Jósʼin tsakasenkao Jesús je chjota (kʼoati chótsenlai sén xi faʼaitʼa).
11 Je Jesús ali tsa tokitsoyajinle chjota, kʼoati kitsjoale jmeni xi koanchjénle. Kʼianga kisikjen jé chjotatjenngile kisikʼabí jme xi kiskine chjota (Mar. 6:41). Nga je chjotatjenngile tsakʼéxále kʼoasʼin kitsoyanile nga nʼio chjíle nga bisenkoaa xi kjaʼaí. Tojo kisʼin je chjotatjenngile Jesús kʼoati sʼín je xi siervo ministerial ma nga binyakao je ndsʼee. Tsjoajin kisatio kon je chjotatjenngile Jesús nga je tsakʼaixále nga kisikʼabí je tsojmi xi kiskine chjota (Mar. 6:42). Jokji tse tsakʼejna Jesús i̱ Sonʼnde kisikʼayale nichxin je chjota nga tsakasenkao (Mat. 4:23; 8:16). Je Jesús tsjoa kisʼe kon nga tsakasenkao chjota kʼoa nga kitsoyale xi tʼatsʼe Niná. Kʼoati tsjoa sʼe̱ tokuin tsanda ji kʼianga kuisenkoai je ndsʼee kʼianga siervo ministerial jekoai̱n.
Kʼiatsa tsjoachai Jeobá kʼoa meli kuisenkoai je ndsʼee, kʼoainganʼiojinlai xi tjío ya jinjtín (Chótsenlai párrafo 11) e
12. Ánni nga tsín kʼoasʼin si̱kjaʼaitsjenñá nga tsín kuitjosonná je xá xi bʼainá ya jinjtín.
12 Ali nikinroajenjin tokuin kʼiatsa kʼoasʼin nikjaʼaitsjain nga tsín kuitjosonli je xá xi sʼe̱neli kʼiatsa siervo ministerial koai̱n. Tʼetsʼoalai Jeobá kʼoa tikjaʼaitsjenjin jmeni xi tso 1 Corintios 12:12-30. Je Pablo kʼoakitso nga nʼio chjíle je xá nʼia nga jngó jngoá ya jinjtín. Kʼiatsa kje koa̱njin nga siervo ministerial sʼin si̱xái tosi tonda tixálai Jeobá kʼoa tisenkoai je ndsʼee. Je xi chjotajchínga sʼin tjío kui kuenta sʼin jmeni xi mali nʼiai kʼianga tsjoáxáli (Rom. 12:4-8).
13. Jmé xi tjínnele sʼiaan tsa mená nga kʼoaixáná ya jinjtín.
13 Ngatsʼiñá je xi chjotale Cristo maa nga tjínnele kʼoakoa̱nkjoaan josʼin mele Jeobá. Ngatsʼiñá nga tjínnele si̱chriantʼalee Jeobá, nga kuisenkoaa xíngiaa kʼoa nga kʼoasʼin kjuinkoaa yaoná josʼin mele Niná. Tonga jmésani xi tjínnele sʼin je ndsʼee xi mele nga siervo ministerial koa̱n.
JMENI XI KOA̱N SʼIAIN NGA SIERVO MINISTERIAL KOAI̱N
14. Jmé xi tsoyanile nga tjínnele nga “skoe̱xkón kjoa” tso ya 1 Timoteo 3:8-10, 12.
14 Kataʼyala jme xi tjínnele sʼin je xi mele nga siervo ministerial koa̱n, tojo tso ya 1 Timoteo 3:8-10, 12 c (tʼexkiai). Kʼianga kʼoatso texto jebi nga tjínnele “skoe̱xkón kjoa” je xi siervo ministerial ma, kui xi tsonile nga tjínnele sitjoson je xá xi kʼoaile, nga skoe̱xkón xi ngikʼa kʼoa nga skoe̱ je ndsʼee nga nda fikao yaole. Jmeni xi tso i̱bi ali tsakuijin xi tsonile nga tsín koa̱n kʼoetsaojin (Ecl. 3:1, 4). Tonga xi tjínnele sʼin kuinga nda sitjoson je xá xi kjinele kʼoa nga koa̱n sinʼiotʼa je ndsʼee. Kʼiatsa kʼoasʼin, je ndsʼee xi tjío ya jinjtín koaikʼále kjoaxkóntokon.
15. Jmé xi tínchja̱ni nga i̱ tso je Énle Niná “ali jaojanjin bʼékon” kʼoa “ali chjotachi̱ngajin ma tʼatsʼe tsojmi”.
15 “Ali jaojanjin bʼékon”. Jebi kui xi tsonile nga je xi siervo ministerial ma tjínnele nga kixi koa̱n kʼoa alikui tjínnele kʼoanacha ánni nga koa̱n sinʼiotʼasíni je ndsʼee. Tjínnele sitjoson jmeni xi kuitso kʼoa tsín koa̱n nga tokʼoendiso (Prov. 3:32). “Ali chjotachi̱ngajin ma tʼatsʼe tsojmi”. Jebi kui xi tsonile nga je xi siervo ministerial ma tsín koa̱n sichéson tsa jme negocio sʼin kʼoa tsín koa̱n je skoé je tao̱n xi maxkó ya jinjtín. Kʼoati tsín koa̱n nga tao̱n kʼoasjetʼale je ndsʼee.
16. 1) Jmé xi tínchja̱ni nga “ali toxkia ʼbijin bino” tso je Biblia. 2) Jósʼin biyoaa nga tsje tjín kjoafaʼaitsjenná.
16 “Ali toxkia ʼbijin bino”. Jebi kui xi tsonile nga tsín sikʼatone choa̱le jokji skʼuí xi xán tjínle. Je xi siervo ministerial ma kʼoati tjínnele nga tsje sʼe̱ kjoafaʼaitsjenle. Xi tsonile nga kʼoasʼin koaikao yaole jotso je kjoatéxomale Jeobá. Ningalani chjotajée maa, nda sʼe tokoán nga ndasʼin tiyoaa ngixko̱n Niná.
17. Jósʼin ʼyanile tsa nda sítjoson je xá xi bʼaile je ndsʼee (1 Timoteo 3:10; kʼoati chótsenlai sén xi faʼaitʼa).
17 Kʼianga kjesa siervo ministerial majin jngo ndsʼee tjínnekjoanlale nga kataʼyale a nda sítjoson je xá xi bʼaile. Kʼianga tsjoáxále xi chjotajchínga sʼin tjío machjén nga sitjoson kʼoa koaitjenngi jotso naxinandále Niná, machjén nga nda koa̱njinle jmeni xi tjínnele sʼin. Kʼiatsa nda sitjoson, je ndsʼee skoee nga nda síxá. Jon xi chjotajchínga sʼin tiyo, tʼaixálao je ndsʼee xi jekisʼenngindá (tʼexkiai 1 Timoteo 3:10). d Kʼiatsa tjío ya jinjtín je xti xi kje kasonjin nóle, xi jekisʼenngindá, kuenta tʼiaon tsa nda kotʼaya Énle Niná nga toje. Tsa tsjoá comentariole nga satío kjoajtín kʼoa tsa kjitʼa bitjotsoyason. Koaan kʼoailao xá xi koa̱nle kʼoasʼin. Tsa kʼoaixálao kʼoasʼin jchaño tsa nda sítjoson je xá xi sʼenele. Kʼoa kʼianga jeska̱son nóle tsakui nichxin jekoa̱n nga siervo ministerial koa̱n.
Je xi chjotajchínga sʼin tjío koaan tsjoáxále je ndsʼee xi jekisʼenngindá ánni nga skoe̱síni tsa nda sítjoson je xá xi sʼenele (Chótsenlai párrafo 17)
18. Jmé xi tínchja̱ni nga tsín tsa jme jée sʼe̱ne tso Biblia.
18 Je xi siervo ministerial ma tjínnele nga ndasʼin koaikao yaole ánni nga tsín tsa jme jée sʼe̱neni. Je Jesús énndiso kisʼene kʼoa kʼoakitso nga kʼoati koa̱ntʼain je chjotatjenngile. Kuinga sakʼoa énndiso sʼeneñá ninga tsínni jme xi kanʼia (Juan 15:20). Tjínnele nga ndasʼin koaikao yaole tojo kisʼin je Jesús ánni nga nda kʼoaxki̱síni ya jinjtín (Mat. 11:19).
19. Jmé xi tínchja̱ni nga kʼoatso Biblia nga je xi xʼin tojngo koa̱nni je chjoónle.
19 Jmé xi tsoyanile nga kʼoatso Biblia nga “tojngo chjoón katasʼele” je xi siervo ministerial koa̱n. Kui xi tsonile nga sitjoson je kjoatéxoma xi kitsjoa Jeobá nga kʼoakitso nga tojngo chjoón kʼoa tojngo xʼin koa̱nni xi koatiokao xínkjín (Mat. 19:3-9). Je chjotale Cristo alikui koa̱n nga sichajngi (Heb. 13:4). Je xi xʼin alikui koa̱n nga kʼoanachale je chjoónle kʼoa tsín koa̱n nga si sikao xi kjaʼaí yánchjín (Job 31:1).
20. Jósʼín je xi nda sítjoson je xá xi kjinele ya yaniʼyale.
20 Je xi siervo ministerial ma tjínnele nga nda sitjoson je xá xi kjinele yaniʼyale, nga kuitsoyale Énle Niná je chjoónle kao xtile. Tobʼelañá, jé kjinele nga skótʼayajtín kao je familiale nga xki̱ xomana. Kʼoa kʼoati tjínnele koaikao chjoónle kao xtile nga koaitsoyason je Énle Niná. Kʼoa kʼoati je kjinele nga kuitsoyale Énle Niná je xtile (Efes. 6:4). Je ndsʼee xi nda síkuinda familiale kʼoati nda sikuinda je ndsʼee xi tjío ya jinjtín (tingósonkoai 1 Timoteo 3:5).
21. Jmé xi koa̱n sʼiain tsa kje siervo ministerial majin.
21 Kʼiatsa kje siervo ministerial majin, tʼetsʼoalai je Jeobá kʼoa chótʼayajin jmeni xi tso je kjoaʼmiya jebi. Chótʼayajin jmeni xi tjínnele sʼin je xi siervo ministerial mele koa̱n. Ngisasa tsjoacha katamai Jeobá kao je ndsʼee (1 Ped. 4:8, 10). Jé Jeobá sichikontʼainli nga koa̱n siervo ministerial koai̱n kʼoa tsjoa sʼe̱ tokuin nga kuisenkoai je ndsʼee (Filip. 2:13).
KJOAJNDA 17 “Mena”
a Mateo 20:28: “Tikʼoasʼinni je ʼndíle chjota likui jaʼai nga si̱xále, tonga jé xi sixá, kʼoa tsjoá ni̱ma̱le nga kʼoechjíntjai nkjín chjota”.
b Marcos 6:31-34: “Jesús kʼoakitsole: Nroáo nga jon jña ʼndetʼaxintʼa. Ya tikjáyao jngo tjo, nga̱ nkjín chjota xi tjíofi, xi tjíofaʼaikonle, saʼnda likui tjoʼndele nga kjen. 32 Ki ya chitso jinndáchikon saʼnda ya ʼndetʼaxintʼa. 33 Nkjín xi tsabe nga tjíofi, kʼoa nkjín xi tsabexkon nga je. Yaján kini ndso̱ko̱ nkjín xi tsʼe ngayije naxinandá xi yachrian. Jicho títjonle nga je, koanxkótʼale Jesús. 34 Kʼia nga Jesús jitjoni chitsobe, tsabe chjotankjín. Koanmake nga je, nga̱ je joni tsa barré xi tsínle xi koʼnda. Tsakʼétsʼiakao nga tsakakóyale nkjín kjoa”.
c 1 Timoteo 3:8-10, 12: “Tikʼoasʼinni je xi sísinle naxinandále Cristo, tjínnele nga skoe̱xkón kjoa, ali jaojanjin bʼékon, ali toxkia ʼbijin bino, ali chjotachi̱nga̱jin ma tʼatsʼe tsojmi. 9 Kʼoasʼin katasʼele je kjoaʼma xi makjainná kao kjoafaʼaitsjen xi tsje. 10 Kʼoati je chjota xi sísinle naxinandále Cristo, títjon katachotʼa, kʼia katasíxá, tsa tsín tsa jme jée tjínle. 12 Je chjota xi sísinle naxinandále Cristo tojngo chjoón katasʼele. Nda katabatéxomale xtile kao niʼyale”.
d 1 Timoteo 3:10: “Kʼoati je chjota xi sísinle naxinandále Cristo, títjon katachotʼa, kʼia katasíxá, tsa tsín tsa jme jée tjínle”.
e XI TÍNCHJA̱NI SÉN XI FAʼAITʼA: Sén xi títjon, je Jesús tíbasenkao xi kjaʼaí. Sén xi majaoni, je xi siervo ministerial ma tíbasenkao je ndsʼee xi jejchínga.
