A SAKʼOA tsín tso tokuin nga chotʼayai. Nkjín xi kʼoama sakʼoa. Nkjín koya jmeni xi nʼia nga nyaon nyaon ningalani nichxin tjenkao, jolani nga bindoyaa, tonga kʼianga jebindoyaa litonda sʼená. Tikʼoasʼinni, nda sʼe tokoán nga chotʼayá je Énle Niná nga̱ yaa mangóson joni nandá (Efes. 5:26). Chótʼayajinla kʼa jme xi koasenkaoná.

• Jngo programa tʼendai. Nʼio chjíle nga chótʼayá nga toñá (Filip. 1:10). Ya tjatʼai je programa xi kʼoéndai ya jñani matsen ánni nga tsín cha̱jinnili kʼiani chótʼayai. Kʼoati koa̱n ya kʼoétʼai je celularli ánni nga tongini sikjinrʼoénili jochon nga chótʼayai.

• Kʼoakji chótʼayai jokji tjen kʼoakoa̱nli. Tjínkʼa xi kʼoamale kʼianga tse kotʼaya kʼoa tjínkʼa xi tochoa choa kotʼaya. Tʼetʼaxuin jñánile xi ngisa skénndiaali, kʼoa tsa tsín tso tokuin nga chótʼayai jochon nga tjítʼaxo̱nli, koaan ninga to te minuto chótʼayai, ninga tochoa tonga jejinla kachotʼayai kʼoa tsakui nichxin koa̱nmesali tse chótʼayai kʼianga jekʼoatinʼiai (Filip. 2:13).

• Tongini tʼendajin jméni xi chótʼayai. Tsa tokʼiakjoan si̱kjaʼaitsjain jmeni xi chótʼayai tokuijinni kʼoachxinkaoli (Efes. 5:16). Tongini tʼetʼaxuin jmeni xi meli chótʼayai, tsa jme xi kjoaʼaítsjenli xi tsín majinli kʼoa tsa jmesa xi kʼia kjoaʼaítsjenli nga jetichotʼayai kʼoati tʼetʼaxuin.

• Kjaʼaí nichxin chótʼayai tsa tsín kʼoamali jme nichxinni nga tjínndajinli. Je xi ngisa chjíle kuinga xki̱ xomana chótʼayai, alijme xi koa̱nle tsa kjaʼaí nichxin chótʼayai, tsa kjaʼaí hora, tsa choa kʼoa tsa tse chótʼayai kʼoa tsa si̱kʼantjaiyai jme xi chótʼayai.

Kʼiatsa xki̱ xomana chótʼayai Biblia nga toji nʼio nda koasenkaoli, ngisaa koa̱nchriantʼalai Jeobá, nda kuichomani jmeni xi sʼiain kʼoa nda sʼe̱ tokuin (Jos. 1:8).