KJOAʼMIYA XI CHOTʼAYA 44
KJOAJNDA 33 Je Jeobá tikʼami chʼáli
Jósʼiaan tsa tsín kixi tíjna jmeni xi matʼeen
“Ali jejin síkinjeli xi chʼao tjínbe, tonga tikinjelai xi chʼao tjín xi totʼatsʼe xi nda tjín” (ROM. 12:21).
XI TÍNCHJA̱NI
Jméni xi sʼiaan nga tsín tse kjoa katabichómani kʼiatsa tsín kixi tíjna jmeni xi koa̱ntʼeen.
1, 2. Jósʼín je chjota nga totaon bená.
JE Jesús tsakʼéyanajmí tʼatsʼe jngo ʼndíchjoónkʼan xi nkjín kʼa kikonle jngo juez nga katabʼéndajinle kjoa nga tsín kixi tjín jme xi kjimatʼain. Je chjotatjenngile Jesús koanjinjinle jme kjoa xi tífaʼatojin ʼndíchjoón jebi nga̱ totaon ʼya chjota nga kui nichxin (Luc. 18:1-5). Kʼoa nichxin xi tiyoaa ndʼaibi kʼoati majinná jokisʼe kon ʼndíchjoónkʼan nga̱ sakʼoa kʼoati kui kʼoamatʼeen jmeni xi tsín kixi tíjna.
2 Nichxin xi tiyoaa ndʼaibi, je chjota totaon be xínkjín, bʼasjengi xínkjín kʼoa alikui tongóson sʼin ʼyatokon je xi xʼin kao xi yánchjín (Ecl. 5:8). Tonga tongisaa tichʼao sʼengáni tokoán nga je ndsʼee xosíkaoná. Ningalani tongóson sʼin makjainná, nga chjotajée maa sakʼoa totaon bená je ndsʼee. I̱ kjoaʼmiya jebi kui chótʼayajiaan jókisʼin Jesús nga totaon tsaʼya. Kʼiatsa tsejta maa nga totaon bená je chjota xi jtikená, ngisaa machjén nga tsejta koaan kao je ndsʼee tsa tsín kixi tíjna jme xi sikaoná. Tonga jósʼe kon Jeobá tsa tsín kixi tíjna jmeni xi sikaoná je ndsʼee kʼoa tsa kjaʼaí chjota. A kuenta sʼín jmeni xi matʼeen.
3. Jósʼin ʼyañá nga kuenta sʼín Jeobá jmeni xi matʼeen.
3 Je Jeobá kuenta sʼín jmeni xi matʼeen nga̱ tsjoake xi kixi tíjna (Sal. 37:28). Je Jesús kʼoakitso nga jetíjnachoa̱le nichxin Jeobá nga kʼoendajin jmeni xi kjimatʼain choʼndale (Luc. 18:7, 8). Jeme kjoaʼaxin ngayeje xi kjoañʼai síkjaʼáná kʼoa tsín tsjoáʼnde nga tosi tonda kui kʼoakoa̱ntʼeen xi tsín kixi tíjna (Sal. 72:1, 2).
4. Jósʼin basenkaoná Jeobá.
4 Nga kjesa bʼéndajinjin Jeobá je kjoa xi tjín, tsoyaná jósʼiaan tsa tsín kixi tíjna jmeni xi matʼeen (2 Ped. 3:13). Tobʼelañá, tsoyaná jósʼiaan nga tsín tse kjoa katabichómani kʼiatsa totaon tíʼyaná, kʼoati nda choa̱ tsakʼéjnaná Jesús xi koa̱n koanngíntjenngiaa. Kʼoa ya Biblia nkjín kjoafaʼaitsjen faʼaitʼa xi basenkaoná kʼianga tsín kixi tíjna jmeni xi matʼeen.
CHÓSONNILEE JÓSʼIAAN KʼIANGA TSÍN KIXI TÍJNA JMENI XI MATʼEEN
5. Ánni nga chósonnilee josʼiaan kʼiatsa tsín kixi tíjna jmeni xi kjimatʼeen.
5 Tsakui nichxin ba sʼe tokoán kʼoa nikjáojiaan kʼianga tsín kixi tíjna jmeni xi matʼeen (Ecl. 7:7). Kʼoati ba kisatio kon je Job kao Habacuc nga tsín kixi tíjna jme xi koantʼain (Job 6:2, 3; Hab. 1:1-3). Ningalani ba sʼe tokoán, chósonnilee nga tsínkui kʼoasʼiaan jmeni xi skanni kʼoakoa̱nná.
6. Jméni xi bakóyaná jokisʼin Absalón (kʼoati chótsenlai sén xi faʼaitʼa).
6 Kʼianga tsín kixi tíjna jmeni xi matʼeen tsakui nichxin koa̱nmená si̱jndangajaoñá. Tsa kʼoasʼiaan, tongisajin tse kjoa kuichomani. Kataʼyala jokisʼin je tile rey David xi Absalón tsakʼin. Nʼio jti koanle nga kisʼejinle nga je ndsʼe̱jon xi Amnón tsakʼin tsabetaon je Tamar, xi ndichja koan. Tojo tso je kjoatéxoma xi tsakʼaile Moisés, je Amnón tjínnele kinikʼien nga kʼoakisʼin (Lev. 20:17). Ningalani tsín chʼaotjín nga jti koanle Absalón jme xi koantʼain ndichja, tonga alikui tjínnele nga je kisikʼien Amnón (2 Sam. 13:20-23, 28, 29).
Kʼianga kisʼejinle Absalón jme xi koantʼain ndichja nʼio kisijtile yaole (Chótsenlai párrafo 6)
7. Jósʼin kisikjaʼaitsjen xi kiski salmo nga tsabe nga tsín kixi tjín jmeni xi sʼín je chjota.
7 Kʼianga ʼyaa nga tsín jomatʼain chjota xi kui kʼoasʼín xi tsín kixi tíjna, tsakui nichxin kʼoasʼin si̱kjaʼaitsjeen nga toxitsjoani nga kui xi ndatjín kʼoanʼia. Kʼoakoan je xi kiski salmo, kʼianga tsabe nga ndasʼin tjío je xi totaon be chjota xi tsín jme jée tjínle, i kitso: “Je chjota xi tsʼen, alijme xi ñʼai male” (Sal. 73:12). Jti koanle nga tsabe nga tsín kixi tjín jmeni xi sʼín chjota kʼoa kʼoasʼin kisikjaʼaitsjen nga toxitsjoani nga je Jeobá nixálee. I kitso: “Kʼianga kui kisikjaʼaitsjenjian, nʼio kisikjáojian” (Sal. 73:14, 16). Kʼoa i kitsosa: “Je ndso̱koa tome xin ndiaa ki, je ndso̱koa tome kijbe” (Sal. 73:2). Kʼoati kui kjoa jaʼatojin je ndsʼee xi Alberto ʼmi. a
8. Jókisʼin jngo ndsʼee kʼianga tsín kixi tíjna jmeni xi koantʼain.
8 Je ndsʼee xi Alberto ʼmi kui jée kisʼene nga je kisiché je tao̱n xi maxkó ya jinjtín. Nga kʼoasʼin tao̱n kine, alikui tichjotajchínga sʼin tsakʼejnani, kʼoa je ndsʼee xi kisʼejinle chʼaosʼin kisikʼaxki̱. Itso: “Jti koanna kʼoa chʼao kisʼe tokoan”. Nga nʼio kisijtile yaole ndsʼee jebi, kisikjinle Jeobá kʼoa aon nó nga tsín tije kisixánile. Choa̱ jebi kui bakóyaná josʼin bichómani nga tsín chosonnilee jonʼia kʼianga tsín kixi tíjna jmeni xi matʼeen.
CHJÉNNGIAA CHOA̱LE JESÚS
9. Jméni xi koantʼain Jesús (kʼoati chótsenlai sén xi faʼaitʼa).
9 Je Jesús nʼio nda choa̱ tsakʼéjnaná xi koa̱n koanngíntjenngiaa. Nkjín chjota xi totaon tsabe. Je xínkjín kʼoakitso nga skáyale je Jesús. Je chjota xi tsakinyatítjonle religión kʼoati kitso nga ya kisixákao Jesús je sénnichxin xi chʼaokjoan, kʼoa je sondado romano totsabesin kʼoa kisikʼien (Mar. 3:21, 22; 14:55; 15:16-20, 35-37, TNM). Je Jesús kichokjoajinle je kjoa xi jaʼatojin kʼoa tsín kisijndangajaoni jmeni xi koantʼain. Jméni xi bakóyaná jokisʼin Jesús.
Je Jesús nʼio nda choa̱ tsakʼéjnaná jósʼiaan kʼianga tsín kixi tíjna jme xi matʼeen (Chótsenlai párrafo 9, 10)
10. Jókisʼin Jesús nga tsín kixi tíjna jme xi koantʼain (1 Pedro 2:21-23).
10 (Tʼexkiai 1 Pedro 2:21-23 b). c Je Jesús nʼio nda choa̱ tsakʼéjnaná josʼiaan kʼianga tsín kixi tíjna jmeni xi matʼeen. Kʼianga jme xi tsakʼinle, kinchja nga tjen ndiaale kʼoa nga mai jyó tsakʼejna (Mat. 26:62-64). Tobʼelañá, kʼianga énndiso kisʼene alikui jokitso (Mat. 11:19). Kʼianga kinchja̱ alikui kiskenngiʼa je chjotakontrale kʼoa tsín kʼoakitsole nga sijndangajaoni jmeni xi kjimatʼain. Je Jesús alikui yaole kisijtile ninga tse kjoañʼai kinikjaʼá, tosaa je Jeobá kisinʼiotʼa nga̱ be nga je kʼoendajin kjoa.
11. Jméni xi sʼiaan kʼiatsa ʼya xi jokuitsoná kʼoa tsa josikaoná (kʼoati chótsenlai sén xi faʼaitʼa).
11 Koaan kʼoati sʼiaan jokisʼin je Jesús, tsín yaoná si̱jtilee kʼiatsa ʼya xi jokuitsoná kʼoa tsa josikaoná. Tsa tsín tse kjoa koaan tosi̱chajiaan, nga̱ tsa jme xi kuixoán tsakui nichxin tongisa tse kjoa kuichomani (Ecl. 3:7; Sant. 1:19, 20). Tsakui nichxin machjén nga kuinókjoaa kʼiatsa ʼya xi totaon tíʼya kʼoa tsakui kuinókjoantjéje̱ josʼin makjainná (Hech. 6:1, 2). Tonga tsa jme xi kuixoán ngasin nganda kuinókjoaa kʼoa koakoá kjoaxkóntokon (1 Ped. 3:15). d
Tsa tsín kixi tíjna jme xi koa̱ntʼeen, kʼoasʼiaan jokisʼin Jesús, chósonnilee kʼiáni kuinókjoaa kʼoa jókuixoán (Chótsenlai párrafo 11, 12)
12. Ánni kʼoéjngoñá tokoán nga je Jeobá kʼoendajin kjoa.
12 Koaan kʼoati sʼiaan jokisʼin je Jesús. Kʼiatsa ʼya xi chʼaosʼin sikʼaxki̱ná kʼoa tsa totaon skoe̱ná, je Jeobá si̱nʼiotʼaa nga̱ be jokjoantjínni kjoa. Nga je ninʼiotʼaa chókjoajinná jmeni xi matʼeen, alikui yaoná nijtilee kʼoa tsín bʼengijtiaa tokoán nga̱ ʼyañá nga je kʼoendajin kjoa. Kʼiatsa yaoná si̱jtilee tokjoajin kuijnyílee yaoná, alikuijin titsjoa sʼe̱ni tokoán kʼoa tsínjin tinda kuiyoñá ngixko̱n Jeobá (Sal. 37:8).
13. Jméni xi sʼiaan nga tosi tonda chókjoajinná tsa tsín kixi tíjna jmeni xi matʼeen.
13 Nga chjotajée maa alikuijin kʼoakoa̱nná nga kʼoakjoan sʼiaan jokisʼin Jesús. Sakʼoajin kui kʼoakuixoán kʼoa kui kʼoasʼiaan jmeni xi skanni kʼoakoa̱nná (Sant. 3:2). Kʼoa tsa tsín ndi̱to̱n chajinná nga kui kʼoamatʼeen xi tsín kixi tíjna, si̱kjaʼaitsjenjiaan nga kuenta sʼín Jeobá je kjoa xi bitjatojiaan kʼoa nga tsín tikui kjoaʼaítsjenniná nichxin xi nroaján. Je Jesús kʼoati nda majinle josʼe tokoán nga̱ kʼoati kui kjoa jaʼatojin (Heb. 4:15, 16). Je Jeobá kʼoati tsoná jmeni xi sʼiaan kʼiatsa tsín kixi tíjna jmeni xi matʼeen. Jaola versículo xi tsʼe Romanos chótʼayajiaan.
“TʼAIʼNDELAO NINÁ KAO KJOAJTILE”
14. Jósʼin bʼaiʼndelee Jeobá nga bʼéndajin jme xi matʼeen (Romanos 12:19).
14 (Tʼexkiai Romanos 12:19). e Je Pablo kʼoakitso nga kʼoaiʼndelee Jeobá nga je katabʼéndajin jmeni xi matʼeen. Kʼianga tsín ñá nijndañá jmeni xi matʼeen mangíntjenngiñá je kjoafaʼaitsjen xi kitsjoa Pablo. Nga̱ je Jeobá ngisaa be josʼin bʼéndajin kjoa kʼoa be kʼiani nga kʼoendajin. Kʼoakisʼin je John nga tsín kixi tíjna jme xi koantʼain. Itso: “Ningalani koanjtina alijme xi kisʼian. Tsakasenkaona jmeni xi tso Romanos 12:19 nga tsejta koan kʼoa nga je Jeobá kisinʼiotʼa”.
15. Ánni ngisa ndatjínni nga je Jeobá katabʼéndajin tsa tsín kixi tíjna jmeni xi matʼeen.
15 Kʼianga bʼaiʼndelee Jeobá nga je bʼéndajin kjoa alikui tikui nikjáojinñá jósʼin kʼoéndajiaan nga toñá. Je Jeobá kʼoatso nga koasenkaoná, joxi i̱ni tsoná: “An kʼoendajian kjoa xi tjínli”. Kʼiatsa kʼoakʼoé tokoán nga je Jeobá kʼoendajin kjoa xi bitjatojiaan alikuijin yaoná si̱jtilee kʼianga tsín kixi tíjna jme xi matʼeen. Kui xi tsakasenkao je John, xi jenása kabʼaxki̱. Itso: “Kʼiatsa tsjoaʼnde nga je Jeobá kʼoendajin kjoa xi tifaʼatojian, tongisaa ndasʼin kʼoendajin tikʼoajinni josʼin kʼoendajian an”.
“TIKINJELAI XI CHʼAO TJÍN XI TOTʼATSʼE XI NDA TJÍN”
16, 17. Jósʼin basenkaoná nga bʼetsʼoantjé xi totaon bená (Romanos 12:21).
16 (Tʼexkiai Romanos 12:21). f Je Pablo i kitsole je chjotale Cristo: “Tikinjelai xi chʼao tjín xi totʼatsʼe xi nda tjín”. Kʼoa je Jesús i kitso: “Katamatsjoachao xi jtikeno, tichikontʼaon xi nchja̱ʼaonno, nda tikao xi chʼao bekonno, tʼetsʼoantjao xi chʼao síkaono, kʼoa xi fitjenngi kontrano” (Mat. 5:44). Kʼoakisʼin je Jesús. Kʼianga tsakátʼa yá je sondado nʼio tse kjoañʼai kinikjaʼá kʼoa totaon tsaʼya. Alikuijin ñá koa̱njinná jokji kjoañʼai tsakjaʼá Jesús.
17 Ninga tse kjoañʼai kinikjaʼá Jesús, alikui kʼoakitsole je Jeobá nga kjoañʼai katatsjoále je sondado, tosaa i̱ kitso: “Nʼai, tichatʼalai nga tsín kui be jme xi sʼín” (Luc. 23:34). Kʼianga bʼetsʼoantjé je xi totaon bená basenkaoná nga tsín yaoná nijtilee kʼoa nga tsín bʼengijtiaa tokoán.
18. Jósʼin tsakinyakao je Alberto kao John nga tsakʼétsʼoa.
18 Nga jao ndsʼee xi kabʼaxki̱ i̱ kjoaʼmiya jebi, jé Jeobá tsakʼétsʼoale nga tsín kixi tíjna jme xi koantʼain. Je Alberto itso: “Tsakʼetsʼoantjaiña je ndsʼee xi jée tsakánena, nkjín kʼa kʼoakixinle Jeobá nga katachajinna jme xi koantʼen”. Je ndsʼee nda tísíxá ijngokʼale Jeobá. Kʼoa je John itso: “Nkjín kʼa tsakʼetsʼoantje je ndsʼee xi tjín xi kisikaona. Nga tsakʼetsʼoa nda kisʼe tokoan, kʼoa je Jeobá tsakasenkaona nga kisichatʼale ndsʼee kʼoa nga tsín tichʼaosʼin kisikʼaxki̱ña”.
19. Jméni xi sʼiaan tsakui xi tsín kixi tíjna kʼoakoa̱ntʼeen (1 Pedro 3:8, 9).
19 Toxá kuijinla kʼoakoa̱ntʼainñá xi tsín kixi tíjna nga chʼao chon sonʼnde. Tojme xi koa̱ntʼeen, tosi tonda je Jeobá si̱jélee nganʼio nga katabasenkaoná. Kʼoasʼiaan jokisʼin Jesús, kʼianga tsín kixi tíjna jmeni xi koa̱ntʼeen, tosi tonda si̱tjosoán je kjoafaʼaitsjen xi tsjoáná Jeobá. Tsa kʼoasʼiaan, tjínjngoo tokoán nga je Jeobá sichikontʼainná (tʼexkiai 1 Pedro 3:8, 9). g
KJOAJNDA 38 Jé Jeobá sikuindali
a Alikui tsa ñaki kʼoaʼmi kʼa chjota xi bʼaxki̱ i̱bi.
b 1 Pedro 2:21-23: “Kui kjoa kinokjoanino. Je Cristo kʼoati tsakjaʼá kjoañʼai xi tʼatsaan. Tsakʼéjnachoyaná ndiaa xi tsʼe, jméni nga kʼoati jon kuimasínio josʼin tsakʼamje nga je. 22 Cristo likui tsajngi jée, ni kinchjajin énchʼanacha. 23 Kʼia nga kinokjoaʼaonle nijojin kitso nga je. Kʼia nga tsakjaʼá kjoañʼai likui kiskankao, toya kiskanitʼale kjoa je xi bʼéndajin kao kjoakixi”.
c Ya capítulo 2 kao 3 xi tsʼe Pedro, kui bʼaxki̱ jokoantʼain chjotale Cristo xi títjon tsakatio nga tsʼen koan je chjota xi kisixále. Kʼoati síkʼaxki̱ kjoa xi jaʼatojin je yánchjín xi chjotale Cristo koan nga tsín koankjainle xʼinle (1 Ped. 2:18-20; 3:1-6, 8, 9).
d Chótsenlai ya jw.org je video xi ʼmi Je kjoatsjoacha kui xi basenkaoná nga nyʼán biyoaa.
e Romanos 12:19: “Jon xi tsjoake̱no, ali nijndajinnio nga tijonnio, tonga tʼaiʼndelao Niná kao kjoajtile, nga kʼoasʼin tjítʼa: An xi sijndania, an kʼoechjínia, tso Nainá”.
f Romanos 12:21: “Ali jejin síkinjeli xi chʼao tjínbe, tonga tikinjelai xi chʼao tjín xi totʼatsʼe xi nda tjín”.
g 1 Pedro 3:8, 9: “Xi fetʼani, ngatsʼio tojngo tʼiaon ni̱ma̱no, tijaotakon, tjaocha katamao xíngio joni tsa ndsʼao, jchamatakon xíngio, indanangi cho̱bao. 9 Ali kjoatsʼenjin ningósonkao xi kjoatsʼen, ali kjoaʼaontakonjin ningósonkao xi kjoaʼaontakon, tosa nda tichikontʼaon. Jeʼyao nga kui kinokjoano, jméni nga sʼe̱sínino kjoanichikontʼain”.
