Paul: Kʼianga sá noviembre nga nó 1985, nʼio tsjoa kisatio tokuinjin nga ya kinikasénnajin ya Liberia (África Occidental). Kʼianga ya kichokajnato je avión ya Senegal, je Anne i kitsona: “Jeto ijngo horasa chale nga kuichoaa ya Liberia”. Tonga je xi kinchja̱ya ya avión i kitso: “Kjoa tjín ya Liberia kʼoa alikui tiya koanngínnijin tjínnele kuitjojen xi ya tjíofi”. Kʼianga kʼoakoan, te nichxin ya tsakiyokoaijin misionero xi ya Senegal tjío. Kinoʼyaníjin nga kʼoatítso noticia nga nʼio nkjín chjota tjíonikʼien kʼoa nga to tjíoʼyanʼiosa kʼoa xi tsín tjíosítjoson chʼinsá tjíonikʼienni.

Anne: Alikui kʼoasʼin nganajin nga nʼio bitsomaijin kʼoa saʼnda nga sʼa ʼndía nʼio tsokjoan, tsokjonña ninga toya yandiaa faʼaya. Ninga kʼoalani, kui xi koanmenajin nga kuichuijin jñani kinikasénnajin.

Paul: Yaa kitsinjin ya Inglaterra kʼoa me tiya chrianni tsʼe Anne jñani tsʼan, jinla kilómetro kjinle. Precursor sʼin kinixáijin kʼianga jetʼanajin secundaria nga̱ kui xi koanmenajin nga to xále Niná sʼiainjin kʼoa je xijchána kao male Anne nʼio nda tsakinyakaonajin. Kʼianga 19 nóna yaa kisixá ya Betel kʼoa kʼianga nó 1982 kʼiaa chixainjin, kʼoati ya Betel kisixá je Anne.

Anne: Nʼio tsjoa kisatio tokuinjin kʼianga ya kinixáijin Betel, nkjín ndsʼee xi ñatjen kinixáijin xi misionero koan. Kʼoati kui xi koanmenajin nga ya koanngínkʼinyasuinjin jñani machjén nganʼio, jan nó nga nyaon nyaon tsakʼetsʼoalaijin Jeobá nga kʼoatsakʼinlaijin nga menajin nga misionero sʼin si̱xáijin. Kʼianga nó 1985 nʼio tsjoa kisatio tokuinjin nga kʼoatsakʼinnajin nga ya koanngínjin Skuela xi tsʼe Galaad xi mani 79. Kʼianga jetʼa skuela jebi yaa kinikasénnajin África Occidental ya jña Liberia ʼmi.

Paul: Nga jekitjoʼndele nga jaʼasʼen avión ya Liberia kʼiaa tsangínkoaijin je avión xi títjon kitjo. Xkón koanchon kʼoa to tsakatioʼyanʼiosa je chjota, ninga tojngo carro fane ya nditsin  jetsokjón je chjota. Nga tsínkui nʼio si̱kjáojinjin jmeni xi kjima nyaon nyaon tsakʼexkiaijin je libro xi tsʼe Salmo. Ninga kʼoalani, tsjoa kisatio tokuinjin nga ya kinixálaijin Jeobá. Je Anne misionera sʼin kisixá kʼoa an yaa ñatjen kisixá kao je ndsʼee John Charuk ya Betel. a Nga ya kisixákoa John Charuk ngisaa nda koanjinna josʼin tjíoni je ndsʼee kʼoa jme kjoa xi tjíofaʼatojin nga̱ jenʼio kjoatse nga ya tíjna ya Liberia kʼoa ngisaa nda bexkon je ndsʼee.

Anne: Kʼianga kichuijin ya Liberia koannganajin nga̱ je ndsʼee nʼio nda chjota kʼoa tsakinyakaonajin ningalani kʼoasikji kjoa tjín, kixi tjíofitʼale Jeobá, nda tsaʼyaxkuinjin kʼoa kinimiyoníjin. Je kjoafaʼaitsjen xi kitsjoanajin tsakasenkaonajin nga tosi tonda je Jeobá kinixálaijin. Je chjota kui xi koanmele nga tsesa kuinókjoakoaijin kʼoa saʼnda koanjtile tsa tsín kʼoakinʼiaijin kʼoa nkjín chjota xi kui tsakjáoyani xi tʼatsʼe Biblia kʼoa ngisaa choa ñʼai koannajin nga kinokjoakaonijin xi tʼatsʼe Biblia. Nkjín xi kiskotʼaya kʼoa saʼnda tsín koanʼanajin nga tsakʼinyalaijin ngatsʼi. Nʼio tsjoa kisatio tokuinjin nga kʼoasʼin kinixáijin.

Paul: Ñola nó kʼianga nda tsakatio chjota ya Liberia tonga kʼianga nó 1989, tije kiskanni kʼoa nʼio ñʼai koanchon. Kʼianga 2 sá julio nga nó 1990, je xi chjotatsʼen kitsole yaole jé tsakánentsja jngo ʼnde xi tiya chrian tíjnani ya Betel. Nga kʼoakoan, jan sá nga tsínti kitjo̱nijin, tsínti koan kichjakaonijin xíngijin kʼoa nijejin xi ya tjío ya sede mundial. Nga tsínti kjoatéxoma kisʼeni ñʼai koanchon, tsínti kisʼeni tsojmi xi ma chine kʼoa nkjín yánchjín xi tsaʼyataon. Teño nó nga kjoasi kisʼe kʼoa tsínti nda tsakationi je chjota.

Anne: Tijé kisikʼienni xínkjín chjota, jaʼasʼen ndʼia nga kisiché, to tsakjayo tomasani kʼoa tojo xoʼndasa sʼin tsabekon kʼianga kisikʼien xínkjín, kisinyando kʼien ya ndaindiaa kʼoa kʼoati koanchon ya chrian Betel. Jao misionero kinikʼien kʼoa nkjínsa ndsʼee kinikʼien.

Ninga xkón tsakatio je ndsʼee kitsjoaʼnde nga ya tsakationi ndʼiale je ndsʼee xi chjota tjenngike. Kʼoati kisʼin je ndsʼee xi misionero kʼoa xi ya Betel tjío. Nʼio nkjín koanni ndsʼee xi ya Betel kichokatio kʼoa ñato koanni xi ya kinikatuíjin ya cuarto jña tsakiyuijin.

Paul: Je chjota xi tjenngike je ndsʼee nyaon yaon kichokotsen tsa ʼyani xi ya tjíoʼma.  Nga kʼoakisʼin, jao ndsʼee tsakinyajchxo ya xo̱ntjoa kʼoa jao kisikuinda ya ventana. Kʼianga yátsʼi̱n tsakáyojton ntsja je ndsʼee xi nyajchxo xo̱ntjoa tsaʼyaníjin nga jeya kicho je chjota xi tjenngike je ndsʼee kʼoa kjitʼanangi kinikatíoʼmaijin.

Anne: Kʼianga jenkjín xomana jaʼato kjoanʼio jaʼasʼen je chjota xi tjíobásjai je ndsʼee ya Betel kʼoa toyaasa baño tsangínkiyoʼmaijin kao jngo tichjaa xi tjín xi tsakasénchjoa nga tsín tsaʼyanajin. Je chjota jebi metrayeta yʼa nga kicho. Kʼoa kʼianga jetjíotsjontsjá je xo̱ntjoa jña tiyuijin, je xʼinna i kitsole. “Chóyalaño, baño tíjna je chjoónna”. Nga xitso xiská tsakationda je tsojmi xi tsakatiochjoaijin tsen koan nga tjín xi jane kʼoa ñaki kitsokjonña nga̱ kʼoasʼin kisikjaʼaitsjen nga jetsabele kon je xi kicho nga tjín xi tjíoʼma. Tsakʼetsʼoale je Jeobá kʼoa kʼoakixinle nga katabasenkaona. Kʼianga kiskoʼe xo̱ntjoa ngasin nganda tsakjakaonajmía je chjota xi kicho tonga tokitsjontsjána nga jaʼasʼen je ndʼia, tonga tsín tsabe tsa ya tjío je ndsʼee kʼoa xijekoan, sa xin ndʼia kikotsenngá, kichomi saʼnda sonngʼá tonga kʼoati tsín ʼya xi koansjaile.

Paul: Nkjín sá nga nʼio tochoa tsojmi kisokonajin xi kichinaijin. Je xi nʼio nda tsakinyakaonajin kui xi tsakʼinyanajin nga tanjio ya Betel, kui xi tsakinyakaonajin nga kichokjoajinnajin.

Tsa jetʼalani jmeni xi kichinaijin kʼoa tsa tsín tikisokoninajin je nandá xi kiʼyuijin kinikʼienjin je ndsʼee xi ya tjíoʼma. Tonga Jeobá alikui kʼia kitsjionkonnajin nga̱ kisokonajin ngantsjai jmeni xi kichinaijin kʼoa jme xi kiʼyuijin. Jé tsakasenkaonajin nga tsín kinokjuinjin.

Kʼianga sa ñʼai sa ñʼai koanchon, kui Énle Niná xi nʼio nda tsakinyakaonajin. Je ndsʼee xi xinxin ʼnde tsakanga kʼianga chjota kitjenngike nʼio kisatio kjoamakjainle kʼoa alikui yaole tsakinyáxkónle. Tjínkʼa xi kʼoakitso nga jetjíobationdale nga kjoaʼaí kjoañʼai xi nʼio tse kʼianga kʼoasʼin kjoajchán kisʼe. Je xi chjotajchínga sʼin tjío kao ndsʼee xi sʼa xti tsakinyakao je ndsʼee xi kjaʼaí. Je ndsʼee kao tichjaa xi xin ʼnde kikatio jtín sʼin tsakatio, kitsoyason je Énle Niná kʼoa tsakatiojtín ninga toya ngijñá. Kʼianga kʼoasʼin tsakatiojtín kʼoa nga kitsoyason nʼio nda kisatio kon. Kʼianga tsangínkaolaijin je tsojmi xi machjénle, ʼndele nga kui sijénajin je najño xi kʼoakjá tosaa kʼoakitsonajin nga kui koanngínkaolaijin bolsa kʼoa tsa jmesani xi koa̱nchjénle nga kuitsoyason. Nga nʼio ba tjío kon je chjota nga kjoajchán kisʼe, nda tsakinyáño nga tsakʼinyale je Énle Niná kʼoa tokʼoakoanle nga tsabe nga kʼoasikji tsjoa tjío kon je testigole Jeobá. Je ndsʼee yaa koanngóson tojo ma je lʼí nga síʼisen jñani njio chon (Mat. 5:​14-16). Kʼianga kʼoasikji tsjoa kisatio kon je testigole Jeobá, tjínkʼa chjota xi kitjenngike je ndsʼee xi testigole Jeobá koan nga koanskanni.

Paul: Kʼianga tsakiyuijin ya Liberia aon kʼa nga xin naxinandá tsangínjin. Jan kʼa nga tochoatse tsangínjin kʼoa jao kʼa nga jngó jngó nó tsangínjin. Jngo tichjaa xi misionera sʼin tísíxá, i kitso: “Kʼoakinʼiaijin jotsakʼinnajin nga tsangínjin Skuela xi tsʼe Galaad nga tjínnele tsjoacha koai̱njin je ndsʼee ya ʼnde jñani kuichuijin. Kuinga nʼio aon koanninajin nga kinikatuíjin je ndsʼee kʼianga kjoa tjíojin”. Ninga kʼoalani, koan tsakinyakoaijin je ndsʼee xi Liberia tsʼe ninga jexin naxinandá tsakiyuijin.

Anne: Kʼianga sá mayo nó 1996, xjaʼaonjngo kilómetro kjin ʼnde timangínkoaijin tsakai je xo̱n xi nʼio chjíle. Kʼoa kʼianga tibitjuijin ya Betel tokʼiakjoán kisitsin chʼinsá chjota, tsakjáʼanajin carronajin kʼoa tsakʼaonsjenajin nga jainjin kʼoa kʼianga kikao je carro tojo yaa tíjnaya je Paul. Tsínti tsaʼyanijin jokinʼiaijin kʼoa kʼianga tsaʼya ijngokʼaijin je Paul kʼoasʼin kinikjaʼaitsjainjin nga chʼinsá kisatele nga̱ ñaki njín tífaijon nkjaín tonga tochoani kitsiʼaon nga kitsjontsjá chjota nga tsakʼaonsje carro.

Kʼianga tsaʼyaijin nga ya kijnachrian jngo carrole sondado yaa tsangínkinjin, ñaki tjíotsokjón je chjota xi tjíoya kʼoa nga kʼoati nʼio títsokjón je chjota xi tísíxákao ngotjo kikaoni je carro. Kʼoatsakʼinlaijin nga katabasenjna tonga tsínti kinrʼoéninajin, nga jekitjojenlaijin ñaki tokjibʼatsésa yaonajin.

Paul: Je najño xi kichʼakjáijin jejndí kjoan kʼoa jekixijnda kʼoa tokichoʼasaijin xíngijin nga tiyochuinjin. Yaa kisoyuijin jña kijna jngo helicóptero xi chʼinsá jaʼasʼenle kʼoa nga koannyaonni tikui tsangínkaonijin ya Sierra Leona. Tsjoa kisatio tokuinjin nga tiyochuinjin tonga kʼoati koankjáojinnajin je ndsʼee xi ya Liberia tsʼe.

Anne: Kʼianga kichuijin ya Betel xi tíjna Freetown ya Sierra Leona nʼio nda kisikuindanajin je ndsʼee kʼoa nda tsakiyuijin. Tonga toxijña jaʼaitsjenna jokoan nga tsakiyuijin ya Liberia. Kʼianga nichxin nʼio kitsokjoan kʼoa tjenyatokon tsakatejna. Toxaasa koantsenna kʼoa nga jemanjio tjondáña kʼoa ñaki bʼatséña nga faʼáskána. Kʼoasʼin kisikjaʼaitsjen nga tjín xi koa̱nnajin kʼoa toʼyasa koan kiskenjta. Tonga je Paul kitsoakjána, kijndaníjin je canción xi bʼasje naxinandále Jeobá josaʼnda nga ndani sʼe tokoan. Kʼoasʼin kisikjaʼaitsjen nga jekjimaskáyana kʼoa nga tsínti koa̱n misionera sʼin sixáña.

Alikui cha̱jinna jokoan nga tikuini xomana. Kʼiakjoán kichonajin je revista ¡Despertad! xi tsʼe 8 sá junio nó 1996, xi kui tínchja̱ni jméni xi koa̱n sʼiaan kʼianga nokjoaan. Nga kui tsakʼexkia koanjinna jme kjoa xi tifaʼatojian. Je revista xi kʼoati kʼia kicho kui La Atalaya xi tsʼe 15 sá mayo nó 1996, xi kui tínchja̱ni ʼyáni xi tsjoánganʼioná. Jngo cho̱tja̱tse jaʼaitʼa xi kitsiʼaon jngale kʼoa ninga kitsiʼaon tojo ma fitjen kʼoa tojo ma kjen. Tikʼoasʼinni tsanda ñá, jé Jeobá basenkaoná nga binyakoaa xi kjaʼaí ningalani tsín ndatjín tokoán xi totʼatsʼe kjoa xi kitjatojiaan ngasʼa. Nga jao revista jebi kʼiakjoán kicho nga machjénna kʼoa nʼio nda tsakasenkaona (Mat. 24:45). Kʼoati tsakasjaiyasa xi kui tínchja̱ni jmeni xi kjimana kʼoa je xo̱n xi tsakasjaiya jngo carpeta tsakayoʼnyoa. Nga jeki nichxin channi nda kisʼe tokoan.

Paul: Nʼio tsjoa kisatio tokuinjin kʼianga ñandia ñandia kinikasénnajin ya Liberia. Kʼianga nó 2004 jela me 20 nó nga misionero sʼin tinixáijin. Kʼianga kui nichxin jejetʼa kjoajchán, kʼoasʼin kisʼendajin nga sʼe̱ndaya je Betel xi ya tíjna tonga kʼoati kʼia kʼoatsakʼinnajin nga xin ʼnde koanngínkʼainganʼuijin.

Ñʼai koannajin nga kinikatuíjin je ndsʼee nga̱ jekoanngatʼalaijin. Ninga kʼoalani, tsangínníjin kʼianga ya kinikasénnajin ya Ghana, jekinatuíjin familianajin nga tsangínjin ya Galaad kʼoa ʼyaníjin nga je Jeobá síchikontʼainná nga je nixálee.

Anne: Nʼio aon koannajin kʼoa kichjiʼndáníjin  kʼianga tsínti ya Liberia tsakiyonijin. Jngo ndsʼee xi ya tsʼe xi jejchínga xi Frank ʼmi, i kitsonajin: “ʼYaníjin nga tsínkʼia jchajinno xi tʼatsainjin. Tonga machjén nga ya koanngínkʼainganʼiolao je ndsʼee xi ya tsʼe Ghana. Jé Jeobá xi ya tísíkasénno”. Kʼianga kʼoakitsonajin je ndsʼee kui xi tsakasenkaonajin nga tsangínjin ya Ghana ninga tsín ʼya xi ʼyaxkuinjin.

Paul: Ya Ghana nʼio nkjín mani je ndsʼee, ngotjo koanmiyonijin, nda tjíosíxále Jeobá kʼoa nʼio tjío kjoamakjainle. Kʼianga jetejan nó nga ya tiyuijin kʼoatsakʼinnajin nga ya si̱kasénnajin ya Kenia ya Betel xi tíjna ya África Oriental. Ningalani jaʼaitsjennajin je ndsʼee xi ya Liberia tsʼe kʼoa xi Ghana tsʼe kʼoati kinimiyuijin je ndsʼee xi Kenia tsʼe. Kʼoa tojo yaa tibʼainganʼiuijin saʼnda ndʼaibi. ʼNde jebi kʼoati nʼio machjén nganʼio.

Anne: Jokji tífaʼato nichxin, tsee kjoa tifaʼatojian kʼoa sakʼoa nʼio tsokjoan kʼoa kuinga sakʼoa tsín nda sʼeni tokoan. ʼYañá nga je Jeobá síkuindaná tonga alikui xi tsonile nga tsín jme xi koa̱nná. Kʼianga nrʼoele nga chʼinsá sítsin chjota nʼio tsokjoan kʼoa ñaki mandsokon ndsa̱. Tonga tiʼbeña josʼin tíbasenkaona Jeobá, sakʼoa tijeni ndsʼee kao tichjaa síchjén nga basenkaona. Kʼoati tiʼbe kʼiatsa si̱tjosoán ngayeje jmeni xi tsoná Jeobá tikui xi basenkaoniná kʼianga tosi tonda je nixálee.

Paul: Sakʼoa kʼoatsonajin chjota tsa tsjoachaijin ya ʼnde jña tibʼainganʼiuijin, ninga naskánachon ya naxinandá jña tibʼainganʼiuijin tonga toʼi ma nga kjoa sʼe. Je xi nʼio tsjoachaijin kuinga familianajin ma je ndsʼee kao tichjaa. Ninga kjaʼaí kjaʼaísʼin koanjchíngaijin kʼoa ninga kjaʼaí kjaʼaísʼin nikjaʼaitsjainjin tonga xi basenkaonajin kuinga tongóson sʼin tinixálaijin Jeobá. Kʼianga tokʼia kichuijin ya ʼnde jña tibʼainganʼiuijin kʼoasʼin kinikjaʼaitsjainjin nga jin kʼoainganʼiolaijin je ndsʼee tonga tosa je kisinʼio tokuinjin.

Kʼianga xinxin naxinandá nikasénnajin nda kjoéyanajin je ndsʼee kʼianga bichuijin. Nga naxinandále Jeobá tiyojiaan alijme xi chaná nga tjío je ndsʼee kao tichjaa tojñani. Ñaki tjínjngo tokuinjin nga je Jeobá koasenkaonajin tsa tosi tonda je si̱nʼiotʼaijin kʼoa tsjoánajin jmeni xi koa̱nchjénnajin (Filip. 4:13).